სამცხე-ჯავახეთი. 5 მაისს, ახალციხის დემოკრატიული ჩართულობის ცენტრში, არასამთავრობო ორგანიზაციის „ეკონომიკური პოლიტიკის კვლევის ცენტრის" (EPRC) ექსპერტებმა, ბიზნესის დაწყების მსურველი ქალბატონებისთვის ტრენინგი ჩაატარეს. ტრენინგის თემები იყო: რეგისტრაცია, საგადასახადო პოლიტიკა, ბიზნეს გეგმის არსი და მისი მომზადება. ტრენინგი ჩატარდა პროექტის ფარგლებში: „ქალი მეწარმეების შესაძლებლობების ზრდა და ეკონომიკური გაძლიერება", რომელიც შვეიცარიის საელჩოს მხარდაჭერით ხორციელდება. პროექტის ფარგლებში, საინტერესო ბიზნეს-გეგმის ათამდე ავტორისთვის იგეგმება ბიზნეს-საქმიანობის ხელშესაწყობად მცირე თანხების გამოყოფა და დაფინანსების წყაროების მოძიებაში დახმარების გაწევა. საუკეთესო ბიზნეს გეგმები კონკურსის შედეგად გამოვლინდება.

თბილისი. „ლიბერალი" აქვეყნებს ინფოგრაფიკას, რომელიც საქართველოში გენდერული ნიშნით სქესის შერჩევის კვლევის მონაცემებს ეყრდნობა. იგი კრისტოფ ზ.გილომოტომ მსოფლიო ბანკისა UNFPA-ის მხარდაჭერით ჩაატარა საქართველოში. სრულად... წყარო: liberali.ge

შიდა ქართლი. ჟურნალისტთა ქსელმა გენდერული თანასწორობისთვის მარნეულის მუნიციპალიტეტის სოფლებში: არაფლოში, აღმამედლოსა და ქესალოში მდებარე ჩაიხანებში, ამ სოფლებში მცხოვრები ეთნიკურად აზერბაიჯანელი მოსახლეობისთვის საინფორმაციო ხასიათის შეხვედრები გამართა. ორგანიზაციის ჟურნალისტები და ექსპერტები მოსახლეობას ნაადრევი ქორწინების უარყოფით მხარეებზე და იძულებით ქორწინებასთან დაკავშირებით გამკაცრებულ სანქციებზე დეტალურად ესაუბრნენ. სრულად ... წყარო: ორგანიზაციის ვებ-გვერდი სოციალურ ქსელში

კახეთი. არასამთავრობო ორგანიზაციამ „ქალები სამართლიანობისათვის" – აქტიურ პოლიტიკაში ქალთა გააქტირების მიზნით კახეთში კამპანია დაიწყო. არასამთავრობო ორგანიზაციამ თელავისა და ახმეტის მუნიციპალიტეტებში 3 კვირიანი საინფორმაციო-შემეცნებითი შეხვედრები უკვე დაასრულა. შეხვედრების მიზანს პოლიტიკაში ქალების მონაწილეობის გაზრდა წარმოადგენდა. „დავიდივართ სოფელ-სოფელ და ქალებს ვასწავლით კომუნიკაციის უნარ-ჩვევებს, ასევე ვაცნობთ საკუთარ უფლებებს. ჩვენ არ ვგულისხმობთ იმას, რომ ყველა ქალბატონი, რომლებთანაც ჩვენ ვმუშაობთ, ყველა საკრებულოს ან პარლამენტის წევრი გახდება. ისინი უნდა გაიზარდნენ როგორც ამომრჩევლები", - განაცხადა ორგანიზაციის დირექტორმა ნათია ქევხიშვილმა. აღნიშნული პროექტის ფინანსური მხარდამჭერია ფრიდრიხ ებერტის ფონდის სამხრეთ კავკასიაში. ფრიდრიხ ებერტის ფონდის სამხრეთ კავკასიის საკოორდინაციო ოფისის ხელმძღვანელი იულია ბლეზიუსი აცხადებს, რომ პოლიტიკაში ქალების გააქტიურების მთავარი წინაპირობა საზოგადოების ცნობიერებისა და თვითშეგნების ამაღლებაა.

თბილისი. ამერიკის შეერთებული შტატებიდან მოწვეული პროფესორი მარლი ს. ვაისი პროექტ „გენდერული თანასწორობის ხელშეწყობა სამუშაო ადგილებზე" ადვოკატირების ჯგუფის წარმომადგენლებს შეხვდა. შეხვედრაზე განხილეს ყველა ის პრობლემა, რომელიც გენდერული კუთხით არსებობს სამუშაო ადგილებზე, ასევე ქალბატონმა ვაისმა ადვოკატირების გუნდს მისცა გარკვეულ რეკომენდაციები პოლიტიკის დოკუმენტის დაწერისთვის. წყარო: ორგანიზაცია 42–ე მუხლის ვებგვერდი სოციალურ ქსელში

კახეთი. 20 აპრილს, თელავში, არასამთავრობო ორგანიზაციამ ,,ქალები სამართლიანობისათვის" პროექტის ,,ქალები აქტიურ პოლიტიკაში" – ფარგლებში შეხვედრა გამართა. მათ განიხილეს ისეთი მნიშნელოვანი საკითხები, როგორიცაა - რატომ არის გენდერული პოლიტიკა მნიშვნელოვანი პოლიტიკურ პროცესებში, ადგილობრივი თვითმმართველობის არჩევნები და ქალთა მონაწილეობა, ქალების როლი საარჩევნო პროცესებში, ქალთა ელექტორალური ქცევის თავისებურებები და ქალთა უფლებები. ორგანიზაციის ,,ქალები აქტიურ პოლიტიკაში" თავმჯდომარის ნათია ქევხიშვილის განცხადებით, ორგანიზაციის მიზანია ხელი შევუწყოთ ქალებს გახდნენ აქტიურები როგორც ამომრჩევლები ან როგორც პოლიტიკური ფიგურები: ,,პროექტის მიზანია ვიპოვოთ ქალები, რომლებიც სოფლებში ცხოვრობენ და მათ არ აქვთ სათანადო ინფორმაცია. ხშირ შემთხვევაში არ აქვთ ინტერნეტის და სხვა კომუნიკაციის საშუალება. ქალებს ტრენინგების მეშვეობით ვასწავლით კომუნიკაციის უნარ-ჩვევებს, ვასწავლით მათ უფლებებს, ასევე როგორ აირჩიონ პოლიტიკური პარტია. ჩვენს მიერ გადამზადებული ქალები უკვე თავიანთ საცხოვრებელ თემებში, სოფლებში, გადასცემენ მიღებულ ცოდნას სხვა ქალებს. ვეძებთ ქალებს, რომელთაც აქვთ ინიციატივები სოფლის, თემის დონეზე და ვცდილობთ მათ დახმარებას". არასამთავრობო ორგანიზაცია „ქალები სამართლიანობისათვის" მეორე წელია ფრიდრიხ ებერტის ფონდის მხარდაჭერით ახორციელებს პროექტს „ქალები აქტიურ პოლიტიკაში".

აჭარა. 14 აპრილს, ხულოს მუნიციპალიტეტში, გენდერული თანასწორობის ქსელის ორგანიზებით გაიმართა დისკუსია პოლიტიკურ პროცესებში ქალთა მონაწილეობის გაძლიერების მიზნით. შეხვედრაზე ისაუბრეს მაღალმთიან აჭარაში ქალთა აქტივობის დაბალი დონის შესახებ. დისკუსიის მონაწილეებმა აღნიშნეს, რომ ქალთა უმრავლესობა მხოლოდ საკუთარი ოჯახის მოვლით და სეზონურ სამუშაოებში პერიოდული ჩართულობით შემოიფარგლებიან, რაც სტერეოტიპებითაა განპირობებული. ორგანიზაციამ ხულოში დააფუძნა კლუბი „დემოკრატიისა და თანასწორობისთვის", რომლის მიზანი რეგიონში ქალთა პოლიტიკური აქტივობის გაძლიერება იქნება. შეხვედრას გენდერული თანასწორობის ქსელის თანამშრომლების გარდა ადგილობრივი ხელისუფლების წარმომადგენლებიც ესწრებოდნენ.

ქვემო ქართლი. 8 აპრილს გენდერული თანასწორობის ქსელმა (GEN) ქვემო ქართლში, დმანისის მუნიციპალიტეტის საკონფერენციო დარბაზში, ჩაატარა საჯარო დისკუსია, თემაზე: „ქალების გაძლიერება პოლიტიკურ პროცესებში მონაწილეობის მისაღებად". საჯარო დისკუსიას ესწრებოდნენ: ადგილობრივი თვითმართველობის, პოლიტიკური პარტიების, აქტიური ლიდერი ქალები და სხვადასხვა სოციალური ჯგუფების წარმომადგენლები. გენდერული თანასწორობის ქსელმა დმანისში დააფუძნა კლუბი „დემოკრატიისა და თანასწორობისათვის," რომლის საქმიანობა მიმართული იქნება რეგიონში ქალთა პოლიტიკურ გაძლიერებაზე. გენდერული თანასწორობის ქსელი საქმიანობას ახორციელებს, პროექტის „ ქალების მონაწილეობა პოლიტიკური პროცესებში" ფარგლებში, რომელიც მხარდაჭერილია სსიპ „საარჩევნო სისტემების განვითარების, რეფორმებისა და სწავლების ცენტრის მიერ". წყარო: ორგანიზაციის ვებგვერდი სოციალურ ქსელში

თბილისი. ქალთა ფონდის ფინანსური მხარდაჭერით, ახალგაზრდა მკვლევართა –„სოციალური ცვლილებების მხარდამჭერები" – წარმომადგენლებმა კვლევა გამოაქვეყნეს: „სექსუალური შევიწროება – ქალთა „უჩინარი" დისკრიმინაცია". „სექსუალური შევიწროება გენდერული დისკრიმინაციის ნაკლებად ხილულ და რთულად იდენტიფიცირებად ფორმას წარმოადგენს. მიუხედავად „უჩინარი" ხასიათისა, სექსუალური შევიწროება მეტად გავრცელებული, ქალთა უფლებებისა და ღირსების შემლახველი სოციალური პრაქტიკაა", ნათქვამია ქალთა ფონდის ვებგვერდზე სოციალურ ქსელში. კვლევა... წყარო: ქალთა ფონდის ვებგვერდი სოციალურ ქსელში

კახეთი. თელავში, არასამთავრობო ორგანიზაციის ,,ნადიკვარის" ინიციატივით, გაიმართა მრგვალი მაგიდა თემაზე: ეთნიკური უმცირესობების თემებში ადრეული ქორწინების პრევენცია. შეხვედრაზე ისაუბრეს არასრულწლოვან გოგონათა უფლებების შესახებ, განიხილეს ქორწინების სამართლებრივი რეგულაციები და ყურადღება არასრულწლოვანთა ქორწინებით გამოწვეულ საფრთხეებზეც გაამახვილეს. ორგანიზაცია ,,ნადიკვარის" პროექტების მოძიების მენეჯერის განცხადებით, მრგვალი მაგიდის მონაწილეების მიერ ხელი მოეწერა მემორანდუმს, რომელიც ითვალისწინებს გოგონათა რეპროდუქციული ჯანმრთელობისა და უფლებების შესახებ ცნობიერების ამაღლებას სხვადასხვა რეგლიგიისა და ეთნიკური წარმომავლობის მოსახლეობისათვის კახეთის რეგიონში: ,,მრგვალი მაგიდის მონაწილეები დაეხმარებიან კახეთის რეგიონის სხვადასხვა რელიგიისა და ეთნიკური წარმომავლობის მოსახლეობას გენდერული სტერეოტიპების მიმართ კრიტიკული აზროვნების ჩამოყალიბებასა და დაძლევაში. ასევე, მრგვალი მაგიდის წევრები ხელს შეუწყობენ პროექტით გათვალისწინებულ საინფორმაციო კამპანიის წარმართვას". პროექტის ორგანიზატორია არასამთავრობო ორგანიზაციათა კოალიცია „ვეჟინი", „ნადიკვარი" და „ფიროსმანი". პროექტის ფინანსური მხარდამჭერია ქალთა ფონდი საქართველოში.

კახეთი. თელავში, დემოკრატიული ჩართულობის ცენტრის ორგანიზებით, ქალთა ისტორიის თვის ფარგლებში, გაიმართა დისკუსია საკითხებზე ჰომოფობია და ლგბტ თემის წარმომადგენელ ქალთა უფლებები. შეხვედრაზე საუბარი შეეხო ჰომოფობიისა და ტრანსფობიის ნიადაგზე დისკრიმინაციას, საზოგადოების მხრიდან ლგბტ თემის წარმომადგენელთა მიმართ დამოკიდებულებას და სხვა საკითხებს. ღონისძიებას ესწრებოდნენ თელავის გენდერული თანასწორობის კლუბის წევრები, აქტიური მოქალაქეები, არასამთავრობო ორგანიზაციების, თვითმმართველობისა და მედიის წარმომადგენლები.

თბილისი. რა არის „მიგრაციის ფემინიზაცია?" რა მოაქვს მას ქალებისთვის - თავისუფლება და დამოუკიდებლობა თუ დისკრიმინაცია? რამდენად თავისუფლები არიან ქალები თავიანთ არჩევანში შრომითი მიგრაციის დროს? ქალების წასვლისა თუ დაბრუნების რთული და წინააღმდეგობრივი გზები გადაცემაში - „ფემინისტრიმი" ანუ „გენდერული ამბები +". პროექტი ხორციელდება ქალთა ფონდის საქათველოში და ფემინისტების დამოუკიდებელი ჯგუფის მიერ, რადიო თავისუფლებასთან პარტნიორობით და ჰაინრიჰ ბიოლის ფონდის სამხრეთ კავკასიის რეგიონული ბიუროს ფინანსური მხარდაჭერით. სრულად... წყარო: ბიოლის ფონდი

კახეთი. თელავში გაიმართა პროექტის „ძლიერი ქალები სოფლად" პრეზენტაცია, რომელიც ხორციელდება ევროპის სამეზობლო პროგრამის – „სოფლის მეურნეობის და სოფლის განვითარებისათვის" (ENPARD) ფარგლებში. პროგრამის მიზანია სასოფლო სამეურნეო საქმიანობაში ჩართული ქალების როლის გაძლიერება, მათი პრობლემებისა და საჭიროებების შესახებ საზოგადოების ინფორმირება და მათი გააქტიურება თემსა და რეგიონში. შეხვედრაზე დამსწრე საზოგადოება გაეცნო პროექტის დეტალებს, რომელსაც ერთობლივად ახორციელებენ ასოციაცია „ქალი და ბიზნესი" და ბიზნესის განვითარების ცენტრი „კავკასია". სერგო ბარამიძე, საქართველოს ბიზნესის განვითარების ცენტრი ,,კავკასია" დირექტორი: ,,თელავში გაიმართა საინფორმაციო შეხვედრა სოფლის მეურნეობაში არსებული პრობლემებისა და საჭიროებების შესახებ. ვიმსჯელეთ არსებულ ვითარებაზე. პროექტის მიზანია ქალბატონებმა მიიღონ მაქსიმალური ინფორმაცია იმ შესაძლებლობების შესახებ, რომელიც დღეს არის სოფლის მეურნეობაში. ასევე, საზოგადოებამ უნდას იცოდეს რამდენად მნიშნელოვანია ქალის როლი სოფლის მეურნეობის განვითარებაში. წლის ბოლოს, სამუშაო შეხვედრების დასრულების შემდეგ თემების და რეგიონების მასშტაბით ჩამოყალიბდება ფერმერული კლუბები, რომლებიც უზრუნველყოფენ სოფლად მცხოვრები ქალების აქტიურ ჩართულობას ადგილობრივი სოფლის მეურნეობის განვითარებაში". პროექტის ,,ძლიერი ქალები სოფლად" პრეზენტაცია ახმეტაშიც გაიმართება.

თბილისი. ჰაინრიჰ ბიოლის ფონდმა გასულ კვირას თბილისში, ბათუმსა და ქუთაისში გამართა დისკუსიები: „ვის ეშინია გენდერული კვოტების?". ფონდი საშუალებას აძლევს მათ, ვინც ვერ შეძლო საჯარო დისკუსიაზე დასწრება, იხილოს თბილისში გამართული დისკუსიის ვიდეოჩანაწერი.     წყარო: ბიოლის ფონდის ვებგვერდი სოციალურ ქსელში

თბილისი. კვლევითი ორგანიზაციის, „ეისითის" მონაცემებით ათიდან ექვსი თბილისელი გენდერული კვოტირების სისტემის მომხრეა ყველა დონეზე: პარლამენტში, პოლიტიკური პარტიების საარჩევნო სიებში და აღმასრულებელ თანამდებობებზეც. თუმცა, გენდერულ ჭრილში კვლევის შედეგების ანალიზმა გამოავლინა, რომ კვოტირების პრინციპს მამაკაცების მხოლოდ ნახევარი (50%) უჭერს მხარს, მაშინ როცა ქალების უმრავლესობა (69%-66%-63% ზემოთ მოცემული გრაფიკის შესაბამისად) ყველა დონეზე კვოტირების მომხრეა. სრულად... წყარო: www.liberali.ge

შიდა ქართლი. 31 მარტს გენდერული თანასწორობის ქსელმა შიდა ქართლში, ხაშურში, გამართა საჯარო დისკუსიას, თემაზე: „ქალების მონაწილეობა პოლიტიკურ პროცესებში." დისკუსიაში მონაწილეობდნენ ხაშურის მუნიციპალიტეტის საკრებულოს და გამგეობის წარმომადგენლები,ადგილობრივი აქტიური ლიდერი ქალები,სხვადასხვა სოციალური ჯგუფის წარმომადგენლები. გენდერული თანასწორობის ქსელი საქმიანობას ახორციელებს, პროექტის „ქალების მონაწილეობა პოლიტიკური პროცესებში" ფარგლებში, რომელიც მხარდაჭერილია სსიპ „საარჩევნო სისტემების განვითარების,რეფორმებისა და სწავლების ცენტრის მიერ." წყარო: ორგანიზაციის ვებგვერდი სოციალურ ქსელში

თბილისი. ამ წუთებში მიმდინარეობს არასამთავრობო ორგანიზაცია „ჰელფინგ ჰენდისა" და აზიის განვითარების ბანკის თანამშრომლობით ორგანიზებული ფორუმი. მისი თემაა: „ახალგაზრდა ლიდერი გოგონების ჩართულობა პოლიტიკურ ცხოვრებაში". ფორუმი იმართება თბილისში, დიდუბე პლაზაში, წერეთლის 116

ქვემო ქართლი. 26 მარტს სიქას ევროპელი მოხალისეები გერმანიიდან და პოლონეთიდან - ჰანა მატიასი, ლუსი ტელმანი და ბეატა გუდზი სიქას წევრებთან ერთად, ბოლნისის მუნიციპალიტეტის ჯავშანიანის აზერბაიჯანული სკოლის სამოქალაქო კლუბს ეწვივნენ. მოხალისეებმა კლუბის წევრებს მოუწყვეს სამუშაო შეხვედრა, რომლის თემა გენდერულ თანასწორობა და ქალების თვითრეალიზება გახლდათ. სრულად... წყარო: ორგანიზაციის ვებ-გვერდი სოციალურ ქსელში  

აჭარა. 26 მარტს ბათუმის ახალგაზრდული ცენტრის გენდერის თემატური ჯგუფის წევრებმა ჩაატარეს თანატოლთა ტრენინგი გენდერულ თანასწორობაზე. აღნიშნულ ტრენინგს ქედის მუნიციპალიტეტის სხვადასხვა საჯარო სკოლის მოსწავლეები ესწრებოდნენ. სრულად... წყარო: ორგანიზაციის ვებ-გვერდი სოციალურ ქსელში  

თბილისი. 24 მარტს საქართველოს სახალხო დამცველის აპარატის ორგანიზებით გაიმართა საჯარო დებატები – „ევროსაბჭოს კონვენცია ქალთა მიმართ ძალადობისა და ოჯახში ძალადობის წინააღმდეგ ბრძოლასა და პრევენციაზე: განხორციელება და მონიტორინგი". დებატები ჩატარდა ევროკავშირის პროექტის „სახალხო დამცველის აპარატის ხელშეწყობა" ფარგლებში. საჯარო დებატების მიზანს წარმოადგენდა დაინტერესებული მხარეების მონაწილეობით კონვენციის განხორციელებისა და მონიტორინგის სამომავლო გზების დასახვა. დებატებს საკანონმდებლო და აღმასრულებელი ხელისუფლების, საერთაშორისო და ადგილობრივი ორგანიზაციების წარმომადგენლები დაესწრნენ. სრულად... წყარო: ombudsman.ge

თბილისი. ჰაინრიჰ ბიოლის ფონდი თბილისში, ბათუმსა და ქუთაისში მართავს საჯარო დისკუსიებს: „ვის ეშინია გენდერული კვოტების?". თბილისში დისკუსია გაიმართება 25 მარტს. სრულად... ბათუმში დისკუსია გაიმართება 26 მარტს. სრულად... ქუთაისში დისკუსია გაიმართება 27 მარტს. სრულად... წყარო: ბიოლის ფონდის ვებგვერდი სოციალურ ქსელში

კახეთი. არასამთავრობო ორგანიზაცია ,,ქალი და ბიზნესი’’, ყოფილი პატიმარი ქალების ბიზნეს იდეების განხორციელებაში ეხმარება. იგი, ქალების ბიზნეს პროექტებს აფინანსებს. აღნიშნულ საკითხთან დაკავშირებით, ორგანიზაციის წარმომადგენლებმა შეხვედრა თელავში გამართეს, რომლის მიზანს იდეების პროექტად დამუშავება წარმოადგენდა. ,,ქალი და ბიზნესის’’ ექსპერტი, ეკა გეგეშიძე: ,,ყოფილ პატიმარ ქალებს გაეწიათ კონსულტაციები, რომლებსაც გაითვალისწინებენ იდეის გეგმის დამუშავების დროს. გეგმები პროექტებად ჩამოყალიბდება, რომელიც განსახილველად სპეციალურ კომისიას გადაეცემა. პროექტი უკვე 2 წელია ხორციელდება, რომელსაც აფინანსებს ევროკავშირი და ის მოიცავს საქართველოს სხვადასხვა რეგიონებში ყოფილი პატიმარი ქალების რესოციალიზაციას და ეკონომიკურ გაძლიერებას. რაც შეეხება საგრანტო თანხას, თითო ადამიანზე გამოყოფილია 1000 ევრო, მთლიანობაში კი დაგეგმილია 60 ბიზნეს იდეის დაფინანსება. ამ დროისთვის, 11 ბენეფიციარზე გრანტი უკვე გაცემულია,’’ - აცხადებს ეკა გეგეშიძე.