თბილისი. საია-მ საქართველოს პარლამენტს წარუდგინა კრიტიკული შენიშვნები საქართველოს შინაგან საქმეთა სამინისტროს მიერ მომზადებულ და საქართველოს მთავრობის მიერ ინიცირებულ საკანონმდებლო პაკეტთან დაკავშირებით. საია-ს მიაჩნია, რომ „პოლიციის შესახებ" კანონში ინიცირებული ნორმები არ შეესაბამება საქართველოს კონსტიტუციის მეორე თავით გარანტირებულ ძირითად უფლებებს, საქართველოს საერთაშორისო შეთანხმებებით ნაკისრ ვალდებულებებს და, აგრეთვე, პერსონალურ მონაცემთა დაცვის შესახებ საქართველოს მოქმედი კანონმდებლობით განმტკიცებულ ძირითად სამართლებრივ პრინციპებს. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს მასალას: „კლანი არსად წასულა" - ვის სურს უზენაესი სასამართლოს უვადო მოსამართლეობა. „ის, რომ ლიდერი არ არის სიაში, არ ნიშნავს, რომ კლანი არ არის წარმოდგენილი. პირიქით, ძირითადი ბირთვი ამ ადამიანებისა სიაში არის. და ეს მხოლოდ აღნიშნული 8 მოსამართლე არ არის. არიან სხვებიც, რომლებიც რაღაც ფორმით დაკავშირებული არიან ამ ჯგუფთან", ამბობს იურისტი, სოფო ვერძეული. სრულად... წყარო: emc.org.ge

თბილისი. „ადამიანის უფლებების სწავლებისა და მონიტორინგის ცენტრმა" (EMC), მაჩალიკაშვილების ოჯახის სახელით, ადამიანის უფლებათა ევროპულ სასამართლოში განაცხადი წარადგინა. განაცხადში მოსარჩელეები, დაობენ ადამიანის უფლებათა ევროპული კონვენციის მე-2 მუხლის (სიცოცხლის უფლება), მე-3 მუხლის (წამების, არაადამიანური და ღირსებისშემლახავი მოპყრობის ან დასჯის აკრძალვა) და 13-ე მუხლის (უფლება ეფექტიანი სამართლებრივი დაცვის შიდა საშუალებებზე) სავარაუდო დარღვევის თაობაზე. სრულად  წყარო: ორგანიზაციის ვებგვერდი  

სამეგრელო-ზემო სვანეთი. ზუგდიდის რაიონულმა სასამართლომ „პრესა ჯი"-ს რედაქტორისა და ,,აიტივის" დამფუძნებლის, ჟურნალისტ გიორგი კაპანაძის ადმინისტრაციულ სამართალდარღვევათა საქმე განიხილა. გიორგი კაპანაძე პოლიციის თანამშრომლებმა 2019 წლის 19 მაისს, ზუგდიდის მერის რიგგარეშე არჩევნების დღეს პროფესიული საქმიანობის განხორციელებისას დააკავეს და, მოგვიანებით, ადმინისტრაციული სამართალდარღვევის ოქმი 166-ე (წვრილმანი ხულიგნობა) და 173-ე (სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობა) მუხლების საფუძველზე შეუდგინეს. 5 ივნისს ზუგდიდის რაიონულმა სასამართლომ საკმარისი მტკიცებულებების არარსებობის გამო შეწყვიტა საქმის წარმოება წვრილმანი ხულიგნობის ნაწილში. რაც შეეხება 173-ე მუხლით გათვალისწინებულ ქმედებას, სასამართლომ სამართალდარღვევა ჩადენილად მიიჩნია, თუმცა, დარღვევის მცირემნიშვნელობიდან გამომდინარე, გიორგი კაპანაძეს სახდელის ნაცვლად სიტყვიერი შენიშვნა მისცა. გიორგი კაპანაძის ინტერესებს საიას ზუგდიდის ოფისი იცავს. სრულად  წყარო: ორგანიზაციის ვებგვერდი

თბილისი. საქართველოს იუსტიციის სამინისტროს ინიციატივითა და GIZ-ის სამართლის პროგრამის მხარდაჭერით, 3-7 ივნისს, საქართველოს კანონმდებლობის ევროკავშირის სამართალთან დაახლოების საკითხებზე სამი განსხვავებული შეხვედრა იმართება. სრულად... წყარო: ორგანიზაციის გვერდი სოციალურ ქსელში

2019 წლის 20-24 მაისს, ჰააგაში, სისხლის სამართლის საერთაშორისო სასამართლოსა და საზოგადოებრივ ორგანიზაციებს შორის, ყოველწლიური სტრატეგიული მრგვალი მაგიდის შეხვედრების მორიგი სერია გაიმართა. შეხვედრები შეეხებოდა მესამე სექტორსა და სასამართლოს შორის თანამშრომლობის საკითხებსა და იმ გამოწვევებს, რომელთა წინაშე სასამართლოს ორგანოები დგას. მრგვალი მაგიდის შეხვედრებში მონაწილეობდნენ სისხლის სამართლის საერთაშორისო სასამართლოს მოსამართლეები და პროკურორი, ასევე პროკურორის ოფისის, რეგისტრატურისა და სასამართლოს სხვა სექციების წარმომადგენლები, მესამე სექტორის მხრიდან კი - ადგილობრივი საზოგადოებრივი ორგანიზაციებისა და საერთაშორისო უფლებადამცველი ორგანიზაციების წარმომადგენლები. საქართველოდან, შეხვედრებს ესწრებოდნენ: „ადამიანის უფლებათა ცენტრის", „კონსტიტუციის 42-ე მუხლის", „საერთაშორისო სამართლიანობის", „საქართველოს ახალგაზრდა იურისტთა ასოციაციისა" და „წამების მსხვერპლთა ფსიქო-სოციალური და სამედიცინო რეაბილიტაციის ცენტრის" წარმომადგენლები. სრულად  წყარო: gyla.ge

სამეგრელო. „საერთაშორისო გამჭვირვალობა - საქართველოს" დახმარებით, მოქალაქე, ბადრი პაჭკორიამ სასამართლო პროცესი მოიგო. ზუგდიდის რაიონულმა სასამართლომ, ბათილად ცნო მიწის აღიარების კომისიის 2017 წლის 8 აგვისტოს განკარგულება, რომლის თანახმადაც ბადრი პაჭკორიას უარი ეთქვა მფლობელობაში არსებული მიწის ნაკვეთის საკუთრებად აღიარებაზე. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველმა საქართველოში ადამიანის უფლებათა და თავისუფლებათა დაცვის მდგომარეობის შესახებ 2018 წლის ანგარიშში ხაზი გაუსვა, რომ საქართველოში ადრეულ ასაკში ქორწინება კვლავ ერთ-ერთ გამოწვევად რჩება. მიუხედავად იმისა, რომ ადრეულ ასაკში ქორწინების რეგისტრაცია საქართველოს კანონმდებლობით აკრძალულია, როგორც ანგარიშშია ხაზგასმული, „როდესაც საქმე ეთნიკურ უმცირესობას ეხება, ამ კონკრეტულ დანაშაულთან მიმართებით მკაცრი პოლიტიკა არ ტარდება". შესაბამისად, დღემდე პრობლემურია არასრულწოვანი გოგოების მოტაცება მათი დაქორწინების მიზნით, ძირითადად კი ეთნიკურ უმცირესობებით დასახლებულ რეგიონებში. „თბილისის ადამიანის უფლებათა სახლი" წარმოადგენს ეთნიკურად აზერბაიჯანელ ნარგიზა ემანოვას, რომელიც ამ მანკიერ პრაქტიკას - აზერბაიჯანულ თემში ადრეულ და ბავშვობის ასაკში ქორწინებას ებრძვის. სრულად  წყარო: https://hrht.ge

თბილისი. „საერთაშორისო გამჭვირვალობა - საქართველო" (TI) აქვეყნებს მასალას „რატომ არ უნდა შეიზღუდოს გამოხატვის თავისუფლების სტანდარტები”. „ბოლო პერიოდში ხელისუფლების წარმომადგენლების მხრიდან არაერთი განცხადება გაკეთდა ყალბ ინფორმაციასა და სიძულვილის ენასთან ბრძოლის მოტივით ცილისწამების შესახებ საკანონმდებლო ცვლილებების ინიცირების აუცილებლობაზე, რასაც შესაძლოა გამოხატვის თავისუფლების მაღალი სტანდარტისა და ოპონენტების კრიტიკული აზრის შეზღუდვა მოყვეს", - ვკითხულობთ მასალაში, - „ამ გამოწვევების გათვალისწინებით, შევეცადეთ გაგვეანალიზებინა, თუ რა საფრთხეები ახლავს თან სადავო ინიციატივას და მის ირგვლივ მიმდინარე დისკუსიას. ასევე, მიმოვიხილეთ არსებული საკანონმდებლო ჩარჩოს პირობებში ცილისწამებასთან დაკავშირებული სასამართლო საქმეები, სადაც შერჩევითი მართლმსაჯულების ნიშნები ჩნდება მაშინ, თუ საქმე ხელისუფლების ოპონენტებს ეხება".  სრულად... წყარო: ორგანიზაციის ვებგვერდი

თბილისი. „ინფორმაციის თავისუფლების განვითარების ინსტიტუტმა" (IDFI) გააანალიზა ინფორმაცია 2013-2017 წლებში საჯარო დაწესებულებების წინააღმდეგ დასრულებული სასამართლო დავები და დაკისრებული ფინანსური პასუხისმგებლობის შესახებ.  „მოცემული ანალიზის ფარგლებში [2013-2017 წლებში საჯარო დაწესებულებების წინააღმდეგ დასრულებული სასამართლო დავები და დაკისრებული ფინანსური პასუხისმგებლობა] IDFI-მ სხვადასხვა სახელმწიფო დაწესებულებიდან საჯარო ინფორმაციის სახით მოითხოვა 2013-2017 წლებში კანონიერ ძალაში შესული მათ წინააღმდეგ დასრულებული სასამართლო დავების ჩამონათვალი, დავის საგნისა და დაკისრებული პასუხისმგებლობის მითითებით (მათ შორის, დაკისრებული და ანაზღაურებული თანხის ოდენობა)", - ვკითხულობთ IDFI-ის მიერ გავრცელებულ ინფორმაციაში, - „IDFI-მ ამავე წერილით მოითხოვა ინფორმაცია რეგრესის წესით შესაბამისი პასუხისმგებელი პირებისგან მოთხოვნილი და ანაზღაურებული ზიანის ოდენობა და ამ საკითხზე მიღებული სასამართლო გადაწყვეტილებების რაოდენობა. საერთო ჯამში, გამოკვლეულ იქნა 89 საჯარო დაწესებულების, მათ შორის, სამინისტროების, პარლამენტის, საჯარო სამართლის იურიდიული პირებისა და დამოუკიდებელი მარეგულირებელი ორგანოების წინააღმდეგ კანონიერ ძალაში შესული სასამართლო გადაწყვეტილებები და უწყებათა მიერ რეგრესის წესით მოთხოვნილი და ანაზღაურებული ზიანის ოდენობა".  სრულად... წყარო: ორგანიზაციის ვებგვერდი

თბილისი. ქობულეთში მუსლიმი მოსწავლეების პანსიონატის საქმეზე ადამიანის უფლებების სწავლებისა და მონიტორინგის ცენტრმა (EMC), პარტნიორ ორგანიზაციასთან, ადამიანის უფლებათა დაცვის ევროპულ ცენტრთან (EHRAC) ერთად, ადამიანის უფლებათა ევროპულ სასამართლოს მიმართა. განაცხადის თანახმად, EMC კონვენციის მე-3 (დამამცირებელი და არაადამიანური მოპყრობა) და მე-14 მუხლის (დისკრიმინაციის აკრძალვა) სავარაუდო დარღვევაზე დავობს. სრულად... წყარო: emc.org.ge

აჭარა. ბათუმში ახალი მეჩეთის მშენებლობის საქმის განხილვა ბათუმის საქალაქო სასამართლოში დღეს, 22 მაისს გაგრძელდება. ინფორმაციას ამის შესახებ „ადამიანის უფლებების სწავლებისა და მონიტორინგის ცენტრი" (EMC) და „ტოლერანტობისა და მრავალფეროვნების ინსტიტუტი" (TDI) ავრცელებენ. „ბათუმის მერის მხრიდან მოლაპარაკების თაობაზე პოზიციების ფორმალურობის და არასათანადო ძალისხმევის გათვალისწინებით, მუსლიმი თემი სამართლებრივი გზების გამოყენებით აგრძელებს ბრძოლას დარღვეული უფლებისათვის", - ვკითხულობთ ინფორმაციაში, - „ბათუმში ახალი მეჩეთის მშენებლობის საქმეზე მუსლიმი თემის ინტერესებს ადამიანის უფლებების სწავლებისა და მონიტორინგის ცენტრი (EMC) და ტოლერანტობისა და მრავალფეროვნების ინსტიტუტი (TDI) წარმოადგენენ".  სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციამ შეისწავლა სასამართლოში წარდგენილი სარჩელი და თანდართული დოკუმენტები და მიიჩნევს, რომ თბილისის საქალაქო სასამართლომ საქმე ერთ ნაწილში უნდა შეწყვიტოს, ხოლო მეორე ნაწილში ნინო ნიჟარაძე არასათანადო მოსარჩელეა. „საიამ შეისწავლა სასამართლოში წარდგენილი სარჩელი და თანდართული დოკუმენტები და მიიჩნევს, რომ თბილისის საქალაქო სასამართლომ საქმე ერთ ნაწილში უნდა შეწყვიტოს, ხოლო მეორე ნაწილში ნინო ნიჟარაძე არასათანადო მოსარჩელეა. მიუხედავად იმისა, რომ 2015-2017 წლებში ,,რუსთავი 2-"ის საქმის განხილვის პროცესი თავიდანვე აჩენდა კითხვებს სასამართლოს მიუკერძოებლობასთან დაკავშირებით და ცალსახად ტოვებდა აღქმას, რომ ამ საქმის შედეგთან მიმართებით არსებობდა ხელისუფლების დაინტერესება (რაც თავისთავად მნიშვნელოვან პრობლემას წარმოადგენს და სასამართლო გადაწყვეტილების სისწორეს ეჭქვეშ აყენებს), უზენაესი სასამართლოს დიდი პალატის გადაწყვეტილება შესულია კანონიერ ძალაში, რომლის თანახმად ნინო ნიჟარაძე არ წარმოადგენს ,,რუსთავი 2"-ის წილის მესაკუთრეს", ნათქვამია ორგანიზაციის ვებგვერდზე. სრულად... წყარო: www.gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ანალიტიკურ დოკუმენტს: თავმჯდომარეების როლი და გავლენები სასამართლოში. „გასულ წლებში თავმჯდომარეთა ჭარბი გავლენების შესამცირებლად განხორციელებული ცვლილებების მიუხედავად, თავმჯდომარეები კვლავ აღიქმებიან მოსამართლეთა უფროსებად და ზოგიერთ შემთხვევაში მათ ხელში თავს იყრის სრულიად არასაჭირო და ზედმეტი კომპეტენცია. ეს და სასამართლოში წლების განმავლობაში დანერგილი სხვა პრაქტიკები გახდა იმის საფუძველი, რომ დღეს სწორედ თავმჯდომარეები ქმნიან ყველაზე გავლენიანი მოსამართლეების ჯგუფს სისტემაში. ამიტომაც, სასამართლოს დამოუკიდებლობის გაძლიერებაზე ზრუნვა, უპირატესად სწორედ არასაჭირო და გაუმართლებელ ვერტიკალზე უარის თქმას და მოსამართლეების სამართლიან წარმომადგენლობას ითხოვს თითოეულ სასამართლოში", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „კოალიცია თანასწორობისთვის" ანტიდისკრიმინაციულ კანონმდებლობაში განხორციელებულ ცვლილებებს ეხმიანება. „კოალიცია თანასწორობისთვის" მიესალმება კანონმდებლობაში განხორციელებულ ცვლილებებს, რომელიც მნიშვნელოვნად აუმჯობესებს საქართველოში დისკრიმინაციის წინააღმდეგ ბრძოლის სამართლებრივ და ინსტიტუციურ გარანტიებს. იმის გათვალისწინებით, რომ ჩვენს საზოგადოებაში არსებითი თუ ტრანსფორმაციული თანასწორობის მიღწევას სისტემური პოლიტიკური, სოციალური და ინსტიტუციური გამოწვევები არსებითად ასუსტებს, დისკრიმინაციასთან ეფექტიანად ბრძოლისთვის მნიშვნელოვანია, სულ მცირე, მყარი საკანონმდებლო საფუძველების შექმნა. 2014 წელს დისკრიმინაციის ყველა ფორმის აღმოფხვრის შესახებ კანონის მიღების ეტაპზე კანონში რჩებოდა არა ერთი ხარვეზი, რომელიც თანასწორობის მექანიზმების ეფექტიან მუშაობას ართულებდა. მნიშვნელოვანია, რომ განხორციელებული საკანონმდებლო ცვლილებები თანასწორობის მექანიზმების და გარანტიების გაძლიერებაზე არის ორიენტირებული", ნათქვამია ორგანიზაციის ვებგვერდზე. სრულად... წყარო: gyla.ge

აჭარა. „საერთაშორისო გამჭვირვალობა - საქართველოს" იურისტები 13-14 მაისს, შუახევის მუნიციპალიტეტის მოქალაქეებს, ხელმღვანელობას და მიწის აღიარების კომისიის წარმომადგენლებს შეხვდნენ და ის პრობლემური საკითხები განიხილეს, რაც შუახევის მცხოვრებლებს აწუხებთ მიწის რეგისტრაციის კუთხით. „ჩვენმა იურისტებმა მათ კონკრეტული რჩევები მისცეს, რათა დაგროვილი პრობლემები ეფექტურად მოგვარდეს. ასევე, შეხვედრა გაიმართა შუახევის მუნიციპალიტეტის საჯარო მოხელეებთან, სადაც საჯარო სამსახურის შესახებ ახალ კანონსა და იმ პრაქტიკულ საკითხებს შეეხო მსჯელობა, რომლებიც საჯარო მოხელეებს აწუხებთ. ჩვენმა იურისტებმა მათ უფლებები დეტალურად განუმარტეს და გააცნეს არსებული სასამართლო პრაქტიკა", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „კოალიცია თანასწორობისთვის" საქმიანობის ანგარიშებში ეთნიკური ნიშნით დისკრიმინაციის ბევრი შემთხვევა ფიქსირდება. მათ შორის ერთ-ერთია, საქმე „პარტნიორობა ადამიანის უფლებებისთვის" (PHR) - შინაგან საქმეთა სამინისტროს საპატრულო პოლიციის დეპარტამენტის წინააღმდეგ. „2017 წელს, ტელეეთერში „სტუდია მონიტორის" ფილმის, „ბავშვები ჩვენი რეალობიდან", გასვლის სემდეგ, PHR-მა საჩივრით მიმართა სახალხო დამცველს. ორგანიზაციამ მიიჩნია, რომ პოლიციის თანამშრომელს ჰქონდა დისკრიმინაციული და ქსენოფობიური დამოკიდებულება ქუჩაში მცხოვრები და მომუშავე ბავშვის მიმართ და მათ ეთნიკური ნიშნით ყოფდა, ამიტომ საჩივრით მიმართა სახალხო დამცველს”, - ვკითხულობთ „კოალიცია თანასწორობისთვის" მიერ გავრცელებულ ინფორმაციაში, - „სახალხო დამცველმა, PHR-ის განცხადების საფუძველზე, საპატრულო პოლიციის თანამშრომლების მხრიდან სამსახურებრივი გადაცდომის სავარაუდო შემთხვევასთან დაკავშირებით, შინაგან საქმეთა სამინისტროს გენერალურ ინსპექციას მიმართა. ფაქტის შესწავლის შემდეგ, სახალხო დამცველს ეცნობა, რომ შსს-ს გენერალურ ინსპექციაში ჩატარდა სამსახურებრივი შემოწმება, რომლის შედეგად, პოლიციის ერთ-ერთ თანამშრომელს დისციპლინური სახდელის სახით შეეფარდა შენიშვნა, ხოლო მეორე თანამშრომლის მიმართ გამოყენებული იყო სარეკომენდაციო ბარათი".  სრულად... წყარო: კოალიციის ვებგვერდი

თბილისი. კოალიცია „დამოუკიდებელი და გამჭვირვალე საქართველოსთვის" საქართველოს პარლამენტის თავმჯდომარეს მიმართავს. მიმართვის საგანს ზაზა ხარებავასთვის იუსტიციის უმაღლესი საბჭოს წევრის უფლებამოსილების შეწყვეტა წარმოადგენს. „საგამოძიებო ჟურნალისტიკის ფარგლებში, „სტუდია მონიტორის” მიერ მომზადებული სიუჟეტით (https://bit.ly/2H3D9Ai) და სხვადასხვა მედია საშუალებებით, გავრცელდა ინფორმაცია, რომ პარლამენტის მიერ, იუსტიციის უმაღლესი საბჭოს ერთ-ერთი არამოსამართლე წევრის, ზაზა ხარებავას არჩევის დროს, დარღვეულ იქნა „საერთო სასამართლოების შესახებ” საქართველოს ორგანული კანონის მოთხოვნა. კანონმდებლობით, ამ მოთხოვნის დარღვევა საბჭოს წევრისათვის უფლებამოსილების შეწყვეტის საფუძველია. კოალიცია დაინტერესდა მოცემული შემთხვევით, შეისწავლა დოკუმენტაცია, რომლის საფუძველზეც ზაზა ხარებავა თანამდებობაზე აირჩიეს და მიაჩნია, რომ ის თანამდებობაზე კანონის დარღვევით იქნა განწესებული. შესაბამისად, მოგმართავთ განცხადებით, პარლამენტმა იმსჯელოს და პარლამენტის რეგლამენტის 212-ე მუხლის მე-4 პუნქტის საფუძველზე უფლებამოსილება შეუწყვიტოს ზაზა ხარებავას", - ვკითხულობთ მიმართვაში.  სრულად... წყარო: კოალიციის ვებგვერდი

თბილისი. ნარკოპოლიტიკის რეფორმის მხარდამჭერმა ჯგუფებმა 14 მაისს, EMC-ს ოფისში გამართეს პრესკონფერენცია და გააჟღერეს საერთო მოთხოვნები. „ნარკოპოლიტიკის რეფორმის მხარდამჭერები, მნიშვნელოვნად მივიჩნევთ, ნარკოპოლიტიკის სფეროში სისტემური და ძირეული ცვლილებების შეჩერების ფონზე, სახელმწიფომ მიიღოს შუალედური გადაწყვეტილება ამნისტიის ან/და შეწყალების მექანიზმის გამოყენების თაობაზე, რომელიც უსამართლო ან/და არაპროპორციული სასჯელებისგან მსჯავრდებულთა გათავისუფლებისკენ იქნება მიმართული. ამ მიზნით, საჭიროა, პარლამენტმა აღმასრულებელი ხელისუფლების შესაბამისი უწყებების მონაწილეობით, ნარკოტიკების მომხმარებელთა თემის და ადამიანის უფლებებზე მომუშავე ორგანიზაციების ჩართულობით, შექმნას სამუშაო ჯგუფი და გატარდეს მოსამზადებელი სამუშაოები საბოლოო პოლიტიკური გადაწყვეტილების მისაღებად", ნათქვამია განცხადებაში. სრულად... წყარო: emc.org.ge

თბილისი. „ადამიანის უფლებების სწავლებისა და მონიტორინგის ცენტრის" (EMC) ინფორმაციით, „ბიბლუსმა" ცილისწამების საქმეზე სასამართლო დავა წააგო.  „კომპანიამ დასაქმებულებს 2017 წლის მაისში უჩივლა, იმ ვიდეომიმართვის გამო, რომელშიც დასაქმებულები „ბილუსში" შექმნილ არასათანადო შრომით პირობებს აღწერდნენ და საზოგადოებას მხარდაჭერის გამოხატვისა და სოლიდარობისათვის მოუწოდებდნენ", - ნათქვამია EMC-სი მიერ გავრცელებულ განცხადებაში, - „თბილისის საქალაქო სასამართლომ „ბიბლუსის" მოთხოვნა, უსაფუძვლობის გამო, არ დააკმაყოფილა". საქმეზე მოპასუხე მხარეთა ინტერესებს სასამართლოში EMC იცავდა.  სრულად... წყარო: ორგანიზაციის ვებგვერდი

თბილისი. ინფორმაციის თავისუფლების განვითარების ინსტიტუტის (IDFI) ორგანიზებით, 20-მდე პროკურორმა და გამომძიებელმა გენდერის, სქესის, სექსუალური ორიენტაციისა და გენდერული იდენტობის ნიშნით დისკრიმინაციის შესახებ ტრენინგში მიიღო მონაწილეობა. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს 12 მაისის მოვლენებიდან ერთი წლის შეფასებას. „12 მაისის მოვლენებიდან ერთი წლის თავზე კიდევ უფრო მეტი დამაჯერებლობით შეიძლება ითქვას, რომ ჩატარებული საპოლიციო ოპერაციის დასაბუთებულობა და მიზანშეწონილობა მნიშვნელოვანი კითხვის ნიშნის ქვეშ იდგა. 12 მაისის ღამესვე ცნობილი გახდა, რომ უშუალოდ კლუბების შიგნით, საპოლიციო ოპერაციის შედეგად არავინ დაუკავებიათ, რამაც კიდევ უფრო გააღრმავა უნდობლობა და კითხვები პოლიციის მოქმედების მიმართ", ნათქვამია ორგანიზაციის ვებგვერდზე. სრულად... წყარო: emc.org.ge