თბილისი. ორგანიზაცია „კონსტიტუციის 42-ე მუხლის ორგანიზებითა“ და ფონდ „ღია საზოგადოება საქართველოს“ ფინანსური ხელშეწყობით, სასტუმრო „ჰოლიდეი ინ“-ში გაიმართა კონფერენცია - „გირგვლიანის საქმე და სასამართლო პრაქტიკა“. კონფერენციაზე წარმოდგენილი და განხილული იყო „კონსტიტუციის 42-ე მუხლის“ მიერ შემუშავებული დასკვნის პროექტი "უზენაესი სასამართლოს მიერ “გირგვლიანის საქმეზე” მიღებული გადაწყვეტილების ანალიზი სასამართლოს პრაქტიკისფონზე", რომლის თანახმადაც, იმდროინდელი საპროცესო კანონმდებლობის და სასამართლო პრაქტიკის მხედველობაში მიღებით, საკასაციო სასამართლოს ჰქონდა შესაძლებლობა და ვალდებულება „გირგვლიანის საქმე“ დაებრუნებინა ხელახალი სასამართლო განხილვისთვის და ასევე მიეღო კერძო განჩინება.  სრულად... წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი“ (EMC), რომელიც მალხაზ მაჩალიკაშვილის ძმისშვილის, 26 ივლისს დაკავებული მორის მაჩალიკაშვილის ინტერესებს იცავს, განცხადებას ავრცელებს.  „ამ ეტაპზე საგამოძიებო ორგანოს მიერ წარმოდგენილი საქმის მასალები ვერ ქმნის დასაბუთებულ ვარაუდს იმის თაობაზე, რომ მორის მაჩალიკაშვილმა განახორციელა ჯგუფურ ძალადობაში მონაწილეობა, მით უფრო ადგილზე მყოფ პოლიციის თანამშრომლებზე თავდასხმა ან რაიმე სხვა ძალადობრივი ქმედება. 20-21 ივნისს პარლამენტის წინ გამართული აქციის დროს მიმდინარე მოვლენები პროკურატურის მხრიდან დეტალურ ფაქტობრივ და სამართლებრივ შეფასებას მოითხოვს. პროკურატურამ მკაფიოდ უნდა გამიჯნოს აქციის მონაწილეების ნაწილის მიერ განხორციელებული ძალადობრივი ქცევა, შეკრების იმ მონაწილეების ქცევისგან, რომლებიც პოლიციასა და აგრესიულ აქციის მონაწილეების ნაწილს შორის მომხდარ დაძაბულობასა და ჭყლეტაში მოჰყვა და სპონტანური ქცევა და თვითგადარჩენის მდგომარეობაში ყოფნა უწევდა. ამ მოცემულობას, მათ შორის, ქმნიდა პოლიციის მიერ მასების მართვისთვის გამოყენებული არასათანადო სტრატეგია, რომელიც აქციის მონაწილეებს საკუთარი ქცევის სათანადო კონტროლის შესაძლებლობას უკარგავდა“, - ვკითხულობთ განცხადებაში.  სრულად...   წყარო: ორგანიზაციის ვებგვერდი

თბილისი. საზოგადოებრივი ორგანიზაციების ნაწილი განცხადებას ავრცელებს „თიბისი ბანკის” დამფუძნებლებისთვის ბრალის წაყენების ფაქტზე. „24 ივლისს, საქართველოს გენერალურმა პროკურატურამ „თიბისი ბანკის” დამფუძნებლებს - მამუკა ხაზარაძეს და ბადრი ჯაფარიძეს უკანონო შემოსავლების ლეგალიზების 11 წლის წინანდელ სავარაუდო ფაქტზე ბრალდება წაუყენა. აღნიშნულ საკითხზე გამოძიება 2018 წლის აგვისტოში დაიწყო, რომლის საფუძვლიანობის შესახებ არაერთი ლეგიტიმური კითხვა გაჩნდა. მას შემდეგ აღნიშნული პირების მიმართ სხვადასხვა სახელმწიფო უწყების მხრიდან ბევრი საეჭვო გადაწყვეტილება იქნა მიღებული. ხელმომწერი ორგანიზაციები ვფიქრობთ, რომ  ამ საქმის გარშემო არსებულ გარემოებათა ერთობლიობა, ხაზარაძისა და ჯაფარიძის მიმართ გამოძიების დაწყება და ბრალის წაყენება, შესაძლოა, იყოს პოლიტიკურად მოტივირებული. ამ ვარაუდს კიდევ უფრო ამყარებს ის ფაქტი, რომ მიმდინარე წლის 9 ივლისს მამუკა ხაზარაძემ საზოგადოებრივი მოძრაობის შექმნის შესახებ განცხადება გააკეთა. ამასთანავე, მამუკა ხაზარაძე არის „ანაკლიის განვითარების კონსორციუმის“ დამფუძნებელი, რომელიც ქვეყნის განვითარებისთვის უმნიშნელოვანესი ანაკლიის ღრმაწყლოვანი პორტის მშენებლობის პროექტის მთავარი განმახორციელებელია“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) აქვეყნებს ბლოგპოსტს: როგორ გავზარდოთ ძალადობის მსხვერპლთა მხრიდან პოლიციისადმი მიმართვიანობა გენდერული სტატისტიკის წარმოების გზით. „ჩემთვის, როგორც ადვოკატისთვის, ძალადობაგამოვლილი ქალის დასარწმუნებლად, ენდოს სახელმწიფოს, ყველაზე კარგი ბერკეტი სტატისტიკაა.  სტატისტიკა, რომელიც თითქმის არასდროს მაქვს, რადგან სახელმწიფოს არ მიაჩნია მნიშვნელოვნად იცოდეს,  ქალები რა ფორმით და რამდენჯერ ხდებიან ძალადობის მსხვერპლები, რა მოსდით ამ ქალებს მოძალადის საპატიმროდან გათავისუფლების შემდეგ, განიცდიან თუ არა ისინი განმეორებით ძალადობას და კიდევ სხვა უამრავი.   იმ პირობებში, როდესაც დაბალია სამართალდამცავი ორგანოებისადმი ნდობა, როდესაც პოლიციის განყოფილებაში მისული ქალი ხშირად განიცდის რევიქტიმიზაციას, როდესაც რეაგირება გაჭიანურებულია, ქალებს უჭირთ, დაიჯერონ, რომ სახელმწიფო მას დაიცავს და მოძალადის პირისპირ მარტო არ დატოვებს“, ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ინფოგრაფიკას: რას გულისხმობს საპარლამენტო კონტროლი გენერალურ პროკურატურაზე? სრულად... წყარო: idfi.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, ზურაბ ვაზაგაშვილის სიცოცხლის უფლების დარღვევაზე სტრასბურგის სასამართლომ საქართველოს პასუხისმგებლობა დააკისრა. „წინამდებარე საქმეზე ევროპულმა სასამართლომ ევროპული კონვენციის მე-2 მუხლის (სიცოცხლის უფლება) არსებითი ნაწილის დარღვევა დაადგინა და განმარტა, რომ ეროვნულ დონეზე მიმდინარე პროცესების დროს სასამართლოებმა ცხადად აღნიშნეს, რომ სპეცოპერაციის დროს პოლიციელები ოფიციალური სტატუსით მოქმედებდნენ, შესაბამისად, ზურაბ ვაზაგაშვილის მკვლელობა სახელმწიფოს შეერაცხებოდა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. სახალხო დამცველი საკონსულტაციო საბჭოს წევრებს 20-21 ივნისს შინაგან საქმეთა სამინისტროს თანამშრომლების მიერ სამსახურებრივი უფლებამოსილების სავარაუდო გადამეტების ფაქტზე მიმდინარე სისხლის სამართლის საქმის შესახებ პირველადი ინფორმაცია მიაწოდა.  „სახალხო დამცველისა და საბჭოს ერთობლივი რეკომენდაციაა – გამოძიებამ მთავარი ყურადღება ერთიანი სურათის შესწავლაზე გაამახვილოს; თუ როგორ, რა ვითარებაში გამოიყენა ძალა პოლიციამ, რამდენად შეესაბამებოდა ეს ძალა არსებულ ინსტრუქციებსა და საქართველოში მოქმედ საკანონმდებლო რეგულაციებს; როგორ დაიგეგმა ოპერაცია, ვინ იღებდა ბრძანებებს, რა ბრძანებები იყო გაცემული და ვინ იყო მათ შესრულებაზე პასუხისმგებელი პირი. ეს არის მთავარი საკითხი და მხლოდ ამის შემდეგ უნდა მოხდეს კონკრეტულად ინდივიდუალური პოლიციელების მხრიდან უფლებამოსილების გადამეტების ფაქტების შესწავლაზე კონცენტრირება“, – განუცხადა სახალხო დამცველმა ჟურნალისტებს.  სრულად... წყარო: ორგანიზაციის ვებგვერდი

თბილისი. კოალიცია დამოუკიდებელი და გამჭვირვალე მართლმსაჯულებისთვის თვლის, რომ უზენაესი სასამართლოს მოსამართლეობის კანდიდატების შერჩევის პროცესს ჩრდილს აყენებს მთელი რიგი გარემოებები. მათ შორის - იუსტიციის უმაღლესი საბჭოს წევრების ინტერესთა კონფლიქტი, საბჭოს არაუფლებამოსილი წევრის მიერ შერჩევის პროცედურებში მონაწილეობა, უზენაესი სასამართლოს მოსამართლეობის კანდიდატის მიერ საბჭოს აპარატის ხელმძღვანელობა, პირველ ფარულ კენჭისყრაზე საბჭოს წევრების მიერ ხმების გადანაწილება, კანდიდატების შესახებ ინფორმაციის გაცემაზე უარი. სრულად... წყარო: gyla.ge

თბილისი. საკონსტიტუციო სასამართლოს გადაწყვეტილების სრულყოფილად აღსრულების მიზნით საია პარლამენტს საკანონმდებლო წინადადებით მიმართავს. საიას მიაჩნია, რომ ცვლილება უნდა შევიდეს საქართველოს ადმინისტრაციულ სამართალდარღვევათა კოდექსის 1502 მუხლში საქართველოს საკონსტიტუციო სასამართლოს 2019 წლის 4 ივლისის N1/5/1271 გადაწყვეტილებაში ასახული პრინციპების შესაბამისად და განისაზღვროს, რომ ამ მუხლის პირველი ნაწილის მოქმედება არ ვრცელდება მესაკუთრის მიერ ან მესაკუთრის თანხმობით პლაკატების, ლოზუნგების, ბანერების სპონტანური საპროტესტო აქციის ფარგლებში ხანმოკლე ვადით, დროებით განთავსებაზე. სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრმა“ (EMC) საზოგადოებას წარუდგინა კვლევა “ნარკოპოლიტიკა საქართველოში - შეჩერებული რეფორმა და ახალი ტენდენციები“.  „ნარკოპოლიტიკა საქართველოში - შეჩერებული რეფორმა და ახალი ტენდენციები კვლევაში მიმოხილულია ნარკოტიკულ დანაშაულებთან დაკავშირებით სახელმწიფოს პოლიტიკის, საკანონმდებლო ჩარჩოს და სისხლისსამართლებრივი პრაქტიკის ძირითადი ტენდენციები“, - აღნიშნულია კვლევის შესავალში.  სრულად  წყარო: ორგანიზაციის ვებგვერდი

12 ივლისს მართლმსაჯულების სკოლის ჯგუფისთვის გაიმართა სერიალის „შავი სარკე“ ერთ-ერთი ეპიზოდის „თეთრი შობა“ ჩვენება.  „ფილმის ჩვენებას მოყვა დისკუსია. მონაწილეებმა თავისუფალი უნივერსიტეტის პროფესორ, დავით ზედელაშვილთან ერთად იმსჯელეს მტკიცებულებების მოპოვების ეთიკურობაზე და იმ საკითხზე, როგორ შეიძლება ტექნოლოგიები, რომლებიც მართლმსაჯულების უკეთ აღსრულებისკენაა მიმართული ადამიანის თავისუფლების განადგურებისთვის იქნეს გამოყენებული“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. იუსტიციის უმაღლესმა საბჭომ დღეს, 12 ივლისის სხდომაზე სახალხო დამცველის 27 ივნისის რეკომენდაცია განიხილა და მისი გათვალისწინების გადაწყვეტილება მიიღო. შესაბამისად, დამკვირვებელი ორგანიზაციებისა და ნებისმიერი დაინტერესებული პირისათვის ხელმისაწვდომი გახდება უზენაესი სასამართლოს მოსამართლეების შერჩევის პროცესში მონაწილე 137 კანდიდატის მიერ წარმოდგენილი განცხადებისა და თანდართული დოკუმენტების ასლები.  სრულად...  წყარო: ორგანიზაციის ვებგვერდი

თბილისი. „ინფორმაციის თავისუფლების განვითარების ინსტიტუტმა“ (IDFI) მოამზადა ვიზუალური მასალა, რომელიც საპროკურორო საბჭოში განხორციელებულ ცვლილებებს ეხება.  იხილეთ მასალა  წყარო: ორგანიზაციის ვებგვერდი

თბილისი. „კონსტიტუციის 42-ე მუხლის“ დახმარებით, უფროსმა სოციალურმა მუშაკმა სოციალური მომსახურების სააგენტოს წინააღმდეგ შრომითი დავა წარმატებით დაასრულა. სასამართლომ არაერთი განხილვის შედეგად დაადგინა, რომ მუშაკის წინააღმდეგ სანქცია უსაფუძვლოდ იყო გამოყენებული და მას აღუდგინა დარღვეული უფლებები. სამართლებრივად, შესაძლებელია სასამართლოს გადაწყვეტილება სააპელაციო და საკასაციო ინსტანციის სასამართლოში გასაჩივრდეს. სრულად...  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი“ (EMC) de facto ცხინვალის დაქვემდებარებში მყოფი ახალგორის რაიონულმა სასამართლოს მიერ ახალგორელი აქტივისტის, თამარ მეარაყიშვილსთვის ყველა ბრალდების მოხსნას ეხმიანება.  „მიუხედავად ორი წლის განმავლობაში ფიზიკური და ეკონომიკური იზოლაციისა, შევიწროვებისა, გადაადგილების თავისუფლების შეზღუდვის და სხვა ფუნდამენტური უფლებების სისტემური დარღვევისა, თამარმა მეორედ შეძლო დაემტკიცებინა პროკურატურის ბრალდებების უსაფუძვლობა. ცხადია, de facto პროკურატურას რჩება ახალგორის სასამართლოს მიერ მიღებული გადაწყვეტილების ზემდგომ სასამართლო ინსტანციებში გასაჩივრების შესაძლებლობა. ამ მექანიზმს პროკურატურა გამოიყენებს თუ არა, ამ დრომდე უცნობია“, - აღნიშნულია გამოხმაურებაში, - „მნიშვნელოვანია, რომ ადგილობრივმა de facto ხელისუფლებამ შეწყვიტოს თამარის დევნის პრაქტიკა. არსებითია, თამარს დაუბრუნდეს პირადობის დამადასტურებელი დოკუმენტები და შეძლოს გადაადგილების თავისუფლებით სარგებლობა“.  სრულად...  წყარო: ორგანიზაციის ვებგვერდი

თბილისი. 17 ივლისს, მართლმსაჯულების საერთაშორისო დღეს, სისხლის სამართლის საერთაშორისო სასამართლოს საქართველოს კოალიციის წევრი ორგანიზაციები სპეციალური ანგარიშის, „ათი წელი აგვისტოს ომიდან: დაზარალებულთა მდგომარეობა საქართველოში“, პრეზენტაციას გამართავენ.  ანგარიში ასახავს 2008 წელს, რუსეთ-საქართველოს ომის დროს, ცხინვალის რეგიონიდან/სამხრეთ ოსეთიდან დევნილთა წინააღმდეგ ჩადენილ დანაშაულებს, ასევე, განსახლების ადგილზე მათ ამჟამინდელ სოციალურ-ეკონომიკურ მდგომარეობასა და საჭიროებებს. ანგარიშში, ასევე, საუბარია სისხლის სამართლის საერთაშორისო სასამართლოს მიერ საქართველოს სიტუაციასთან დაკავშირებით 2016 წლის იანვარში დაწყებულ გამოძიებაზე, მის მიმდინარეობასა და დღეს არსებულ გამოწვევებზე; წარმოდგენილია რეკომენდაციები სახელმწიფო ინსტიტუტებისა და სისხლის სამართლის საერთაშორისო სასამართლოს შესაბამისი ორგანოებისთვის.  სრულად...  წყარო: https://gyla.ge

თბილისი. „ადამიანის უფლებების სწავლებისა და მონიტორინგის ცენტრი“ (EMC) აქვეყნებს ანალიტიკურ დოკუმენტს - „შეჯიბრებითი სისხლის სამართლის პროცესის კრიტიკისთვის: ბარიერები სიმართლის დადგენის გზაზე“.  „სამართლებრივი დავების გადაწყვეტის ორი ძირითადი გზა შეჯიბრებითი და ინკვიზიციური პროცესებია. ზოგადი განმარტების თანახმად, მათ შორის ფუნდამენტური განსხვავება იმაში მდგომარეობს, თუ ვინ წარმართავს და აკონტროლებს პროცესს. ინკვიზიციურ მოდელში, სასამართლო უშუალოდაა ჩართული საქმის გადაწყვეტის საკითხში, კერძოდ, მოსამართლეები იწყებენ სასამართლო პროცედურებს, აგროვებენ მტკიცებულებებს და განსაზღვრავენ, თუ როგორ უნდა გაიხსნას საქმეში არსებული სამართლებრივი და ფაქტობრივი გარემოებები. ასევე, ნიშნავენ მოწმეებსა და ექსპერტებს, კითხავენ მათ და განსაზღვრავენ ჩვენებების ღირებულებას. საპირისპიროდ, შეჯიბრებით პროცესში საქმის მიმდინარეობა მთლიანად მხარეებს აქვთ მინდობილი (მათ იურისტებს, რომლებიც ახორციელებენ მოწმეთა დაკითხვას), მოსამართლე კი ნეიტრალური „არბიტრის“ ფუნქციას ასრულებს: ის კი არ აწარმოებს დამოუკიდებელ კვლევა-ძიებას, არამედ აფასებს მხარეების მიერ სასამართლოს წინაშე წარმოდგენილ მტკიცებულებებს და წყვეტს საქმეს არსებული ფაქტებისა და არგუმენტების გათვალისწინებით”, - ვკითხულობთ დოკუმენტში. სრულად...  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია 20-21 ივნისის მოვლენების შესახებ ანგარიშს მოამზადებს.  „20-21 ივნისს საზოგადოება კიდევ ერთხელ გახდა ფართომასშტაბიანი საპროტესტო აქციის არაპროპორციული საპოლიციო ძალის გამოყენებით დაშლის მოწმე. აქციის დაშლას 305 პირის ადმინისტრაციული წესით დაკავება მოჰყვა, ხოლო ჯანმრთელობის დაზიანება არაერთმა პირმა მიიღო“, - აღნიშნულია საია-ს მიერ გავრცელებულ ინფორმაციაში.  სრულად...  წყარო: ორგანიზაციის ვებგვერდი

თბილისი. “კონსტიტუციის 42-ე მუხლმა” 2019 წლის 7 ივნისს საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტს ადამიანის უფლებათა ევროპული სასამართლოს მიერ საქართველოს წინააღმდეგ გამოტანილი გადაწყვეტილებების აღსრულების შესახებ ალტერნატიული ანგარიში წარუდგინა.  ანგარიში მოიცავს ეროვნული კანონმდებლობისა და პრაქტიკის ანალიზს სამ თემატურ საკითხზე. ყველა მათგანთან დაკავშირებით რეფორმების გატარება საქართველოს წინააღმდეგ ევროპული სასამართლოს მიერ გამოტანილი გადაწყვეტილებებიდან გამომდინარეობს, რომელთა აღსრულებას ევროპის საბჭოს მინისტრთა კომიტეტი ზედამხედველობს.  სრულად...  წყარო: ორგანიზაციის ვებგვერდი

თბილისი. რა დარღვევებით მიმდინარეობს უზენაესი სასამართლოს მოსამართლეების შერჩევის პროცესი - ამ საკითხის ირგვლივ მარიამ მხატვრის თვალსაზრისს „ადამიანის უფლებების სწავლებისა და მონიტორინგის ცენტრი“ თავის ვებგვერდზე წარმოგვიდგენს.  „იუსტიციის უმაღლესი საბჭო (შემდგომში საბჭო) უკვე მეორედ ცდილობს შეიმუშავოს უზენაესი სასამართლოს მოსამართლის თანამდებობაზე ასარჩევად, პარლამენტისთვის წარსადგენ კანდიდატთა სია. 2019 წლის 20 ივნისს, 137 კანდიდატიდან, ფარული კენჭისყრით, საბჭომ პირველადი შერჩევის შედეგად 50 კანდიდატი შემდეგ ეტაპზე გადაიყვანა. კენჭისყრის შედეგებით კანდიდატებს შორის გადანაწილებულმა ხმებმა საზოგადოებაში გააჩინა ეჭვი, რომ სასამართლოში არსებულ გავლენიან ჯგუფსა და მმართველ გუნდს შორის 20 ვაკანტური ადგილის გადანაწილებაზე შეთანხმება უკვე მიღწეულია“, - მიიჩნევს მარიამ მხატვარი, - „უზენაესი სასამართლოს მოსამართლეების შერჩევის საწყისი ეტაპებიდან პროცესზე დაკვირვებამ, არაერთი დარღვევა და გამოწვევა გამოავლინა, რაც საბჭოს ირგვლივ არსებული მძიმე კონტექსტის გათვალისწინებით, კიდევ უფრო ამცირებს საზოგადოების ნდობას საბჭოს მიერ მიღებული გადაწყვეტილებების მიმართ“.  სრულად... წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციამ, ჯემალ დუმბაძის სახელით, საკონსტიტუციო სასამართლოს მიმართა და საქართველოს სისხლის სამართლის საპროცესო კოდექსით გათვალისწინებული განაჩენის გადასინჯვის წესის არაკონსტიტუციურად ცნობა მოითხოვა.  საია მიიჩნევს, რომ სისხლის სამართლის საპროცესო კოდექსის 310-ე მუხლის „დ“ ქვეპუნქტის ის ნორმატიული შინაარსი, რომელიც გამორიცხავს 1998 წლის 20 თებერვლის სისხლის სამართლის საპროცესო კოდექსის საფუძველზე გამოტანილი განაჩენების გადასინჯვას, ეწინააღმდეგება კონსტიტუციის მე-11 მუხლის პირველ პუნქტს, რომელიც თანასწორობის უფლებას ითვალისწინებს, ასევე კონსტიტუციის 31-ე მუხლის პირველ და მეშვიდე პუნქტებს, რომელიც სამართლიანი სასამართლოს უფლებას განამტკიცებს და მიუთითებს, რომ დადგენილება ბრალდებულის სახით პირის პასუხისგებაში მიცემის შესახებ უნდა ემყარებოდეს დასაბუთებულ ვარაუდს, ხოლო გამამტყუნებელი განაჩენი − უტყუარ მტკიცებულებებს.საია მიიჩნევს, რომ სისხლის სამართლის საპროცესო კოდექსის 310-ე მუხლის „დ“ ქვეპუნქტის ის ნორმატიული შინაარსი, რომელიც გამორიცხავს 1998 წლის 20 თებერვლის სისხლის სამართლის საპროცესო კოდექსის საფუძველზე გამოტანილი განაჩენების გადასინჯვას, ეწინააღმდეგება კონსტიტუციის მე-11 მუხლის პირველ პუნქტს, რომელიც თანასწორობის უფლებას ითვალისწინებს, ასევე კონსტიტუციის 31-ე მუხლის პირველ და მეშვიდე პუნქტებს, რომელიც სამართლიანი სასამართლოს უფლებას განამტკიცებს და მიუთითებს, რომ დადგენილება ბრალდებულის სახით პირის პასუხისგებაში მიცემის შესახებ უნდა ემყარებოდეს დასაბუთებულ ვარაუდს, ხოლო გამამტყუნებელი განაჩენი − უტყუარ მტკიცებულებებს.  სრულად...  წყარო: ორგანიზაციის ვებგვერდი

თბილისი. „პარტნიორობა ადამიანის უფლებებისთვის“ (PHR) შეზღუდული შესაძლებლობის მქონე მოზარდების სექსუალური და რეპროდუქციული ჯანმრთელობის უფლების სამართლებრივ და პრაქტიკულ მიმოხილვას აქვეყნებს. კვლევა მომზადებულია MAC Georgia-ს მხარდაჭერით განხორციელებული პროექტის - „შეზღუდული შესაძლებლობის მქონე გოგონების სექსუალური ძალადობისგან დაცვა“ - ფარგლებში. პროექტი ითვალისწინებდა სექსუალური ძალადობის პრევენციის მნიშვნელოვანი მექანიზმის, კერძოდ, სექსუალური და რეპროდუქციული ჯანმრთელობის უფლებებთან დაკავშირებით შშმ მოზარდებთან მომუშავე პროფესიონალების ცნობიერების ამაღლებას.  სრულად...  წყარო: ორგანიზაციის ვებგვერდი