თბილისი. საქართველოს ჟურნალისტური ეთიკის ქარტია შინაგან საქმეთა სამინისტროს საჯარო განცხადებით მიმართავს. „საქართველოს ჟურნალისტური ეთიკის ქარტიისთვის ცნობილი გახდა, რომ 8 ივლისს რუსთაველის გამზირზე მიმდინარე 2 აქციის გაშუქებისას დემონსტრანტთა ნაწილი აგრესიული იყო ჟურნალისტების მიმართ, ხელს უშლიდა მათ პროფესიული საქმიანობის განხორციელებას. ამის საპასუხოდ რეპორტიორების დაცვის ნაცვლად სამართალდამცავები მათ ურჩევდნენ ტერიტორიის დატოვებას. ამასთან ჟურნალისტები ამბობენ, რომ მათ შინაგან საქმეთა სამინისტროს წარმომადგენლებისთვის უწევთ ახსნა თუ რატომ არის პროფესიულ საქმიანობაში ხელშეშლა დანაშაული“, - ვკითხულობთ განცხადებაში, - „მოგმართავთ თხოვნით, მიაწოდეთ ინფორმაცია თითოეულ სამართალდამცავს იმის შესახებ, რომ საქართველოს კანონმდებლობით დაცულია ჟურნალისტის საქმიანობა, რეპორტიორები იმყოფებიან დემონსტრაციაზე არა როგორც მხარდამჭერები, არამედ მუშაობენ საზოგადოების ინფორმირებისთვის. ამიტომაც სამართალდამცავები ვალდებულნი არიან უზრუნველყონ მათი უსაფრთხოება. დაიცავით ჟურნალისტები სხვადასხვა პირთა აგრესიული ქმედებებისგან და მიეცით საშუალება თავისუფლად გააშუქონ მიმდინარე მოვლენები“.  სრულად...  წყარო: ორგანიზაციის ვებგვერდი

თბილისი. „ღია საზოგადოების ფონდი“ საქართველოს უზენაესი სასამართლოს მოსამართლეობის კანდიდატების მონაცემების შესწავლის ალტერნატიული პროცესის შესახებ იუწყება და კანდიდატებს თანამშრომლობისკენ მოუწოდებს.  „საქართველოში მართლმსაჯულების დამოუკიდებელი, მიუკერძოებელი და გამჭვირვალე სისტემის ჩამოყალიბებისა და ამ სისტემაში საქართველოს უზენაესი სასამართლოს როლისა და მნიშვნელობის გათვალისწინებით, საქართველოს ღია საზოგადოების ფონდის მხარდაჭერით გადაწყდა უზენაესი სასამართლოს მოსამართლეობის კანდიდატთა შესახებ ინფორმაციის მოძიებისა და დამუშავების ალტერნატიული პროცესის წარმოება, რომლის ფარგლებშიც, მოხდება იუსტიციის უმაღლესი საბჭოს მიერ შერჩეული/ნომინირებული 20 კანდიდატის შესახებ საჯაროდ ხელმისაწვდომი ინფორმაციის შეგროვება და დამუშავება, რის საფუძველზეც თითოეულ კანდიდატზე შეიქმნება დოკუმენტი (ე.წ. პორტფოლიო), რომელიც წარედგინება საქართველოს პარლამენტს“, - ვკითხულობთ ფონდის მიერ გავრცელებულ განცხადებაში, - „შესაბამისად, ფონდი მოუწოდებს, უზენაესი სასამართლოს მოსამართლეობის ყველა კანდიდატს, გამოავლინოს მაღალი პროფესიული სტანდარტი და მოგვაწოდოს ნებისმიერი ინფორმაცია, რომელიც აუცილებელი და საჭიროა, კანდიდატის კეთილსინდისიერებისა და პროფესიონალიზმის შესაფასებლად“.  სრულად  წყარო: ორგანიზაციის ვებგვერდი

აჭარა. ნორმა, რომელიც კერძო საკუთრებაში არსებულ შენობაზე მესაკუთრის თანხმობით საპროტესტო ბანერის დროებით გამოფენას კრძალავდა, საკონსტიტუციო სასამართლომ არაკონსტიტუციურად სცნო. ინფორმაციას ამის შესახებ „საქართველოს ახალგაზრდა იურისტთა ასოციაცია“ ავრცელებს.  „საკონსტიტუციო სასამართლომ 2019 წლის 4 ივლისის გადაწყვეტილებით არაკონსტიტუციურად სცნო გასაჩივრებული ნორმის ის ნორმატიული შინაარსი, რაც მესაკუთრეს ართმევს უფლებას, საკუთარი სახლის ფასადზე განათავსოს ბანერი დროებით, მერიის თანხმობის გარეშე. საკონსტიტუციო სასამართლომ ასევე არაკონსტიტუციურად მიიჩნია იმ პირის დასჯა საპროტესტო ბანერის დროებით შენობაზე დროებითი განთავსებისათვის, რომელიც ამას შენობის მესაკუთრის თანხმობით აკეთებს. საკონსტიტუციო სასამართლომ ამ საქმეში გამოხატვის თავისუფლების დარღვევა დაადგინა“, - ვკითხულობთ საია-ს მიერ გავრცელებულ ინფორმაციაში.  სრულად  წყარო: https://gyla.ge

თბილისი. „კოალიცია დამოუკიდებელი და გამჭვირვალე მართლმსაჯულებისათვის“ ეხმიანება საქართველოს პარლამენტის მიერ სახელმწიფო ინსპექტორის სამსახურის საგამოძიებო უფლებამოსილების ამოქმედების კიდევ ერთხელ გადავადებას, ამჯერად - 2019 წლის 1 ნოემბრამდე. „კოალიცია საგანგაშოდ აფასებს, საქართველოს მთავრობის მიერ კანონმდებლობის მოთხოვნებისა და საერთაშორისო ვალდებულებების შეუსრულებლობას, რაც გახდა დამოუკიდებელი საგამოძიებო მექანიზმის ამოქმედების მეოთხედ გადავადების საფუძველი. ამასთანავე, დროულად ამოქმედების მოთხოვნასთან ერთად, საზოგადოებას, საქართველოს აღმასრულებელ და საკანონმდებლო ხელისუფლებას კიდევ ერთხელ ვახსენებთ იმ ხარვეზებს, რომელიც არსებობს სახელმწიფო ინსპექტორის კანონმდებლობით გათვალისწინებულ მოდელში“, - ვკითხულობთ დღეს გავრცელებულ განცხადებაში. სრულად  წყარო: https://www.gdi.ge

თბილისი. „კონსტიტუციის 42-ე მუხლი“ საქართველოს უზენაესი სასამართლოს მოსამართლეთა ვაკანსიაზე მიმდინარე კონკურსს ეხმიანება და მიაჩნია, რომ კონკურსის მიმდინარეობისას გამოვლენილი ხარვეზები, მთელი პროცესის ლეგიტიმურობას კითხვის ნიშნის ქვეშ აყენებს.  შესაბამისად, - „კონსტიტუციის 42-ე მუხლი მოუწოდებს: საქართველოს პარლამენტს - ინიცირება გაუკეთოს და განიხილოს სასამართლოში კლანური მმართველობის შესახებ რეზოლუციის პროექტი, რომელიც პარლამენტში შეტანილი იქნა 2019 წლის 4 ივნისს; უმოკლეს ვადებში განიხილოს და გადაწყვიტოს იუსტიციის უმაღლესი საბჭოს წევრის ზაზა ხარებავას უფლებამოსილების შეწყვეტის საკითხი; იურიდიულ საკითხთა კომიტეტის სამუშაო ჯგუფში უზრუნველყოს „კოალიცია დამოუკიდებელი და გამჭვირვალე მართლმსაჯულებისათვის“ წარმომადგენელთა მონაწილეობა; საქართველოს იუსტიციის უმაღლეს საბჭოს - დროულად განიხილოს და გადაწყვიტოს კონკურსის მიმდინარეობისას იუსტიციის უმაღლესი საბჭოს წევრის თამარ ონიანის აცილების საკითხი; - უზრუნველყოს კანდიდატთა მონაცემების საჯაროობა“.  სრულად  წყარო: ორგანიზაციის ვებგვერდი

თბილისი. 2019 წლის 2 ივლისიდან სახალხო დამცველის აპარატმა 2019 წლის 20-21 ივნისს შს სამინისტროს თანამშრომლების მიერ სამსახურებრივი უფლებამოსილების სავარაუდო გადამეტების ფაქტზე მიმდინარე სისხლის სამართლის საქმის (#074220619801) შესწავლა დაიწყო.  „სახალხო დამცველის აპარატი გამოძიების პროცესს ეფექტიანი გამოძიების საერთაშორისო სტანდარტების გათვალისწინებით შეაფასებს. შეფასების კრიტერიუმები გამოძიების დამოუკიდებლობის, დროულობის, ზედმიწევნითობის, კომპეტენტურობისა და დაზარალებულის მონაწილეობის ელემენტები იქნება. სახალხო დამცველის აპარატი განსაკუთრებულ ყურადღებას მიაქცევს იმას, ჩატარდა თუ არა ყველა აუცილებელი საგამოძიებო/საპროცესო მოქმედება, ეს მოქმედებები ჩატარდა თუ არა დროულად და ხომ არ არის სახეზე გამოძიების პროცესის არაგონივრული გაჭიანურება, ჩატარებული საგამოძიებო მოქმედებები ტარდებოდა თუ არა ჯეროვანი გულისხმიერებით და ამომწურავად“, - ხაზგასმულია სახალხო დამცველის აპარატის მიერ გავრცელებულ ინფორმაციაში. სრულად წყარო: ორგანიზაციის ვებგვერდი

თბილისი. თბილისის საქალაქო სასამართლომ სრულად დააკმაყოფილა ააიპ „ინფორმაციის თავისუფლების განვითარების ინსტიტუტის“ (IDFI) სარჩელი საქართველოს იუსტიციის სამინისტროს სსიპ „საქართველოს ეროვნული არქივის“ (ეროვნული არქივი) წინააღმდეგ. სასამართლომ მოპასუხე მხარეს დაავალა ინფორმაციის გაცემა საარქივო ფონდის დოკუმენტებზე დაშვების შესახებ განხილულ განცხადებათა და მათზე მიღებულ გადაწყვეტილებათა რაოდენობის შესახებ, მიუხედავად იმისა, რომ ეროვნული არქივის განცხადებით, ის არ აწარმოებდა IDFI-ის მიერ მოთხოვნილ სტატისტიკურ მონაცემებს. სრულად  წყარო: ორგანიზაციის ვებგვერდი

თბილისი. სახალხო დამცველი უზენაესი სასამართლოს მოსამართლეების შერჩევის მიმდინარე პროცესს ეხმიანება და განცხადებას ავრცელებს.  „როგორც საზოგადოებისათვის არის ცნობილი, საერთაშორისო და ადგილობრივ არასამთავრობო ორგანიზაციებთან ერთად, სახალხო დამცველი დამოუკიდებლად აკვირდება უზენაესი სასამართლოს მოსამართლეების შერჩევის პროცესს“, - აღნიშნავს სახალხო დამცველი, - „იუსტიციის უმაღლეს საბჭოში გამართული პირველი ფარული კენჭისყრა და მასზე დაკვირვების შედეგები ავლენს იმ პრობლემებსა და ხარვეზებს, რაც აღნიშნულ პროცესს ახლავს თან და საფრთხეს უქმნის მის მაღალი სტანდარტებით წარმართვას“.  სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციის (საია) ინფორმაციით, ევროპულმა სასამართლომ ე.წ. ყინწვისის სპეცოპერაციის დროს დაკავებული ნიკოლოზ გოგუაძის არასათანადო მოპყრობის ფაქტზე საქართველოს პასუხისმგებლობა დაადგინა. „წინამდებარე გადაწყვეტილებით ევროპულმა სასამართლომ ევროპული კონვენციის მე-3 მუხლის არსებითი ნაწილის დარღვევა დაადგინა და განმარტა, რომ საქმეში არსებული ობიექტური მტკიცებულებებით დასტურდებოდა, რომ 2011 წლის 26-27 მაისს მომჩივანმა ხელისუფლების კონტროლის ქვეშ ყოფნისას მიიღო მრავალი სახის დაზიანება სახისა და ტანის არეში, რომელიც მას დაკავებამდე არ ჰქონდა. ამასთან, სახელმწიფომ ვერ შეძლო, წარმოედგინა დამაჯერებელი არგუმენტი, თუ რამ გამოიწვია აღნიშნული დაზიანებები. ამის საპირისპიროდ, სახელმწიფომ წარმოადგინა კვალიფიკაციის შეცვლის შესახებ პროკურორის დადგენილება, რომლითაც საგამოძიებო ორგანოები ადასტურებენ, რომ საქმეში არსებობდა საკმარისი მტკიცებულებები მომჩივნის მიმართ არასათანადო მოპყრობის განხორციელების ფაქტზე“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს სახალხო დამცველმა „პრევენციის ეროვნული მექანიზმის 2018 წლის ანგარიში“ წარმოადგინა.  „ანგარიშში ასახულია ქვეყანაში თავისუფლების აღკვეთისა და შეზღუდვის ადგილებში წამებისა და არასათანადო მოპყრობასთან დაკავშირებით არსებული მდგომარეობა. პენიტენციური სისტემის მიმართულებით შემუშავდა პენიტენციური სისტემის განვითარების 2019-2020 გეგმა.მიუხედავად ამისა, სახალხო დამცველის 2017 წლის რეკომენდაციების მნიშვნელოვანი ნაწილი, რომელიც წამებისა და არასათანადო მოპყრობისაგან დაცვის პროცედურული და ინსტიტუციური გარანტიების გაძლიერებისკენ იყო მიმართული, კვლავ შეუსრულებელია. მნიშვნელოვანი გამოწვევა და სერიოზული საფრთხის შემცველია კრიმინალური სუბკულტურა. ანგარიშში მიმოხილულია დეესკალაციის ოთახში ხანგრძლივად მოთავსების პრაქტიკა, უსაფრთხოების ზომების შესაბამისი დასაბუთების გარეშე ჩატარება, რეაბილიტაციის ღონისძიებების სიმცირე, დაწესებულებებში არსებული გადატვირთულობა და ფიზიკური გარემოს კუთხით არსებული პრობლემები“, - ვკითხულობთ თანდართულ ინფორმაციაში. სრულად  წყარო: ორგანიზაციის ვებგვერდი

თბილისი. საქართველოს სახალხო დამცველმა წარმოადგინა ანგარიში „არასათანადო მოპყრობის სისხლის სამართლის საქმეთა გამოძიების ეფექტიანობა“. „წინამდებარე ანგარიშში საზოგადოება გაეცნობა 38 კონკრეტული სისხლის სამართლის საქმის ანალიზს. ყველა საქმეზე გამოძიება ისე წარიმართა და დასრულდა, რომ შედეგი არ დამდგარა, კონკრეტული პირი პასუხისგებაში არ მიცემულა, გამოძიება ისე შეწყდა, რომ სავარაუდო მსხვერპლი არც ერთ შემთხვევაში არ სცნო გამოძიებამ დაზარალებულად. გამოძიებას სერიოზული პრობლემები ხშირ შემთხვევაში ჰქონდა ინსტიტუციური დამოუკიდებლობის თვალსაზრისით. მიუხედავად ვალდებულებისა, გამოძიება დაეწყო და ეწარმოებინა პროკურატურას, ეს მოთხოვნა მრავალ საქმეში არ შესრულდა. გამოძიებაში აქტიურად იყვნენ ჩართულნი ის უწყებები, რომელთა თანამშრომლების მიმართაც არასათანადო მოპყრობის ჩადენის ეჭვები არსებობდა“, - ვკითხულობთ თანდართულ ინფორმაციაში. სრულად  წყარო: ორგანიზაციის ვებგვერდი

თბილისი. 21 ივნისს, თბილისის საქალაქო სასამართლომ 20-21 ივნისის მოვლენებთან დაკავშირებით დაკავებულ არაერთ პირს სათანადო მტკიცებულებების არარსებობის მიუხედავად, 1000 ლარიანი ჯარიმა დააკისრა. „სასამართლო გადაწყვეტილების მიღებისას დაეყრდნო მხოლოდ პოლიციელთა ახსნა-განმარტებებს, მათ მიერ შედგენილ სამართალდარღვევისა და დაკავების ოქმებს. საია მიიჩნევს, რომ თბილისის საქალაქო სასამართლოში საქმის განხილვისას დაკავებულმა პირებმა ვერ ისარგებლეს სამართლიანი სასამართლოს უფლებით, დაირღვა სასამართლოს მიუკერძოებლობის და დამოუკიდებლობის პრინციპი. ამიტომ, საია 12 პირის სახელით, რომლებსაც ჯარიმის გადახდა დაეკისრათ, სააპელაციო სასამართლოში საჩივრებს წარადგენს. ჯარიმის დაკისრების შესახებ 21 ივნისს მიღებული დადგენილებების გასაჩივრების ვადა 1 ივლისს იწურება”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. თბილისის საქალაქო სასამართლომ, ვიტალი საფაროვის ჯგუფურად, განზრახ მკველობის ჩადენის მუხლით ბრალდებულები დამნაშავედ ცნო. „მოსამართლე შორენა გუნცაძემ ბრალდებულებს მკვლელობის მოტივად მოხსნა 109-ე მუხლის ბ ქვეპუნქტი, რაც გულისხმობს რასობრივი, რელიგიური, ეროვნული ან ეთნიკური შეუწყნარებლობას და ბრალდებულები მხოლოდ ჯგუფურ მკვლელობაში ცნო ბრალდებულად. ავთანდილ კანდელაკიშვილსა და გიორგი სოხაძეს 15-15 წლით პატიმრობა მიესაჯათ. პატიმრობის ვადის ათვლა დაიწყო 2018 წლის სექტემბრიდან. 25 წლის ვიტალი საფაროვი 2018 წლის 30 სექტემბერს, თბილისის ცენტრში, დიუმას ქუჩაზე მოკლეს”, ნათქვამია ადამიანის უფლებათა ცენტრის გვერდზე სოციალურ ქსელში. წყარო: ორგანიზაციის გვერდი სოციალურ ქსელში

თბილისი. ტრენინგი არასამთავრობო ორგანიზაციების წარმომადგენლებისთვის გამოხატვის თავისუფლების, სიძულვილის ენის და დისკრიმინაციის წახალისების შესახებ გრძელდება. სააპელაციო სასამართლოს მოსამართლე, ქეთევან მესხიშვილი, საუბრობს შიდა სასამართლო პრაქტიკასა და პრეცედენტებზე. სრულად... წყარო: ორგანიზაციის გვერდი სოციალურ ქსელში

თბილისი. 26 ივნისს, ადამიანის უფლებების სწავლებისა და მონიტორინგის ცენტრმა (EMC) კავკასიის კვლევითი რესურსების ცენტრთან (CRRC) ერთად წარადგინა სისხლის სამართლის მართლმსაჯულებაში მოსამართლის როლზე ჩატარებული თვისებრივი კვლევის შედეგები. კვლევა მომზადებულია ევროკავშირის მიერ დაფინანსებული პროექტის „სასამართლო რეფორმის განხორციელების მხარდაჭერის (FAIR)“ ფარგლებში. „კვლევა მიზნად ისახავდა მოსამართლის როლთან დაკავშირებით იმ საკითხების გამოვლენას, რომლებსაც მნიშვნელოვნად მიიჩნევენ პროფესიული ჯგუფები (მოსამართლეები და ადვოკატები) სამართლიანი, მიუკერძოებელი და ადამიანის უფლებებზე ორიენტირებული სისხლის სამართლის მართლმსაჯულების უზრუნველსაყოფად“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. სახალხო დამცველი ეხმაურება საქართველოს გენერალური პროკურატურის მზადყოფნას, 20-21 ივნისის აქციის მონაწილეთა მიმართ სამართალდამცავთა მხრიდან უფლებამოსილების შესაძლო გადამეტების საქმეების გამოძიების პროცესში სახალხო დამცველის საზედამხედველო უფლებამოსილებით ჩართვასთან დაკავშირებით.  "სახალხო დამცველი დიდი ხანია ითხოვს სამართალდამცავთა მხრიდან უფლებამოსილების გადამეტების საქმეებთან დაკავშირებულ მასალებზე წვდომას. შესაბამისად, მიიჩნევს, რომ საქართველოს პარლამენტში წარდგენილ კანონპროექტში აუცილებელია გატარდეს ისეთი ცვლილებები, რომლებიც უზრუნველყოფს სახალხო დამცველის განსაკუთრებული კატეგორიის საქმეებზე დაშვების უფლებამოსილებას და ეს არ უნდა იყოს ერთჯერადი და დამოკიდებული საქართველოს პროკურატურის მიერ საგამონაკლისო და შერჩევითი წესით გამოხატულ კეთილ ნებაზე. თითოეულ მოქალაქეს სახალხო დამცველისგან თანაბარი მოლოდინები და იმედი უნდა ჰქონდეს“, - აღნიშნავს სახალხო დამცველი.  სრულად  წყარო: http://ombudsman.ge

თბილისი. 23 ივნისს ადამიანის უფლებების სწავლებისა და მონიტორინგის ცენტრმა (EMC) სააპელაციო სასამართლოს მიმართა და 20 ივნისს, პარლამენტთან გამართულ აქციასთან კავშირში, დაკავებული ოთხი პირისთვის ადმინისტრაციული პატიმრობის გაუქმება მოითხოვა. „EMC-ის დაცვის ქვეშ მყოფ ოთხივე დაკავებულს რამდენიმე წუთიანი სასამართლო პროცესის შემდეგ, სასამართლომ 12 და 13 დღიანი ადმინისტრაციული პატიმრობა მხოლოდ სამართალდამცავი ორგანოს წარმომადგენლის ახსნა-განმარტებების საფუძველზე, წვრილმანი ხულიგნობისა და პოლიციის მიმართ დაუმორჩილებლობის ჩადენისთვის, შეუფარდა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ჟურნალისტური ეთიკის ქარტია აქვეყნებს ჟურნალისტების მიმართვას საქართველოს მთავრობისა და დიპლომატიური კორპუსის წარმომადგენლებისადმი.  „21 ივნისს, თბილისში, რუსთაველის გამზირზე აქციის დარბევის დროს დაშავდნენ მედიის წარმომადგენლები. მათი თქმით, სამართალდამცავები დამიზნებით ესროდნენ მაშინაც კი, როდესაც თვალსაჩინო იყო, რომ ისინი მედიის წარმომადგენლები იყვნენ და პროფესიულ მოვალეობას ასრულებდნენ“, - ვკითხულობთ მიმართვაში, - „მოვითხოვთ იმ სამართალდამცავების სასწრაფოდ გამოვლენას და სისხლის სამართლის პასუხისგებაში მიცემას, რომლებიც დამიზნებით ესროდნენ ჟურნალისტებს, რომელთა იდენტიფიცირება შესაძლებელი იყო, მაგრამ მაინც მიაყენეს სხეულის დაზიანებები და ხელი შეუშალეს პროფესიული საქმიანობის შესრულებაში; მივმართავთ საქართველოში აკრედიტებულ დიპლომატიურ კორპუსსა და საერთაშორისო ორგანიზაციებს, მყისიერი და ეფექტიანი რეაგირება მოახდინონ 21 ივნისს, რუსთაველის გამზირზე, საპროტესტო აქციის დაშლის დროს, შინაგან საქმეთა სამინისტროს მხრიდან ჟურნალისტების მიზანმიმართულ დევნაზე, ჯანმრთელობის დაზიანების, პროფესიული მოვალეობის შესრულების დროს დაკავებისა და ხელშეშლის ფაქტებზე“.  სრულად  წყარო: https://www.qartia.ge

თბილისი. საზოგადოებრივი ორგანიზაციები განცხადებას ავრცელებენ 20 ივნისს განვითარებული მოვლენების შესახებ. „ხელმომწერი ორგანიზაციები უკიდურესად აღშფოთებული ვართ 20 ივნისს განვითარებული მოვლენებით. სამწუხაროდ, საზოგადოება კიდევ ერთხელ გახდა ფართომასშტაბიანი სამოქალაქო პროტესტის წინააღმდეგ საპოლიციო ძალის არაპროპორციული გამოყენების მოწმე, რასაც შედეგად მოჰყვა ათობით ადამიანის დაკავება და ჯანმრთელობის მძიმე დაზიანება“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. სახალხო დამცველის აპარატი გუშინდელი აქციის მონაწილეებს მოუწოდებს, სავარაუდო უფლებადარღვევის თაობაზე ინფორმაციის ფლობის შემთხვევაში, დაუკავშირდნენ სახალხო დამცველის აპარატის ცხელ ხაზს: 1481.  „სახალხო დამცველის წარმომადგენლები აქტიურად სწავლობენ აქციის მიმდინარეობისას დაფიქსირებულ თითოეულ ინციდენტს. ასევე მუშაობენ სავარაუდოდ დაკავებულ და დაკარგულ პირთა ადგილსამყოფელის დასადგენად. ამასთან, დააკვირდებიან სასამართლო პროცესებს, მოინახულებენ საავადმყოფოში გადაყვანილ დაზარალებულებს. რუსთაველს გამზირზე განვითარებულ მოვლენებთან დაკავშირებით სახალხო დამცველი სამართლებრივ შეფასებას მოგვიანებით გააკეთებს“, - აღნიშნულია განცხადებაში.  სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია (საია) აქციისას დაკავებულებს და დაზარალებულებს სამართლებრივ დახმარებას აღმოუჩენს. დარეკეთ შემდეგ ნომერზე: 577 07 05 11 სრულად... წყარო: საიას გვერდი სოციალურ ქსელში

თბილისი. 20 ივნისს თბილისში განვითარებულ მოვლენებთან დაკავშირებით, საქართველოს ჟურნალისტური ეთიკის ქარტია საგანგებო განცხადებას ავრცელებს.  „თბილისში, რუსთაველის გამზირზე, პოლიციის მიერ საპროტესტო აქციის ცრემლსადენი გაზითა და რეზინის ტყვიებით დაშლის შედეგად დაშავდნენ "პირველი არხის", რუსთავი 2"-ის,” ტვ პირველის” და სხვა მედიაორგანიზაციების ჟურნალისტები“, - ვკითხულობთ განცხადებაში, - „საქართველოს ჟურნალისტური ეთიკის ქარტია მოუწოდებს საქართველოს მთავრობას, შინაგან საქმეთა სამინისტროს, უზრუნველყონ ჟურნალისტების უსაფრთხოება, სამართალდამცავებმა არ მიაყენონ სხეულისა და ჯანმრთელობის დაზიანებები და მისცენ პროფესიული მოვალეობის შესრულების შესაძლებლობა. ქარტია ასევე მოუწოდებს საქართველოში აკრედიტებული დიპლომატიური კორპუსისა და საერთაშორისო ორგანიზაციების წარმომადგენლებს, მაქსიმალური ზეწოლა მოახდინონ ხელისუფლებაზე რათა არ მოხდეს საპროტესტო აქციაზე მყოფი ჟურნალისტებისა და მოქალაქეების კონსტიტუციური უფლებების დარღვევა“.  სრულად  წყარო: ორგანიზაციის ვებგვერდი