სამოქალაქო საზოგადოების ინსტიტუტი (CSI) იწყებს ახალ პროექტს - „ადგილობრივ თვითმმართველობებში სამოქალაქო ჩართულობის და მონაწილეობითი მმართველობის გაძლიერება“. პროექტი USAID-ის ადგილობრივი თვითმმართველობის პროგრამის ნაწილია, რომლის ფინანსური მხარდამჭერია აშშ-ის საერთაშორისო განვითარების სააგენტო (USAID/Georgia). პროექტის მიზანია სამოქალაქო ჩართულობის გაზრდა ადგილობრივ დონეზე გადაწყვეტილებების მიღების პროცესებში და მონაწილეობითი მმართველობის გაძლიერება შემდეგ სამიზნე მუნიციპალიტეტებში: ბათუმში, ჩოხატაურში, დმანისსა და მარნეულში. პროექტის ფარგლებში დაგეგმილი აქტივობები მოიცავს: სამიზნე მუნიციპალიტეტებში მონაწილეობითი მექანიზმების გაუმჯობესების ხელშეწყობას; მოქალაქეთა მონაწილეობის ხარისხის შეფასების მეთოდოლოგიის დანერგვას; თვითმმართველობის წარმომადგენლების შესაძლებლობების ზრდის ხელშეწყობას; სამოქალაქო საზოგადოების აქტორების გაძლიერებას და მყარი კავშირების შექმნას. პროექტის ფარგლებში, პირველი შეხვედრა გაიმართება 21-23 ივნისს, ბათუმში, რომელსაც პროექტის სამიზნე მუნიციპალიტეტების საკრებულოსა და მერიის წარმომადგნელები დაესწრებიან.

სამცხე-ჯავახეთი. საერთაშორისო გამჭვირვალობა - საქართველოს (TI Georgia) ახალციხის ოფისის სამოქალაქო საბჭოს წევრების ორგანიზებით, ადიგენში, სოფელ არზნეში სპორტული მოედნის მოწყობის მოთხოვნით, თვითმმართველობას მიმართეს. წერილს ხელს აწერენ ადგილობრივები. „16 კომლიან მაღალმთიან სოფელში, სადაც 30-ზე მეტი ბავშვი ცხოვრობს, არ არსებობს სპორტული ინფრასტრუქტურა, რეკრეაციულ-გასართობი სივრცე“. TI Georgia მოუწოდებს ადიგენის მუნიციპალიტეტის მერიას, დროულად განიხილოს მიმართვა და მიმდინარე წლის ბიუჯეტში ცვლილებების შეტანისას აღნიშნული საკითხი გაითვალისწინოს. სრულად... წყარო: ორგანიზაციის გვერდი სოციალურ ქსელში

კახეთი. გაეროს განვითარების პროგრამამ (UNDP) გასულ კვირას, შეხვედრა გამართა ყვარლის მუნიციპალიტეტში ხუთი სხვადასხვა სკოლის ასამდე მოსწავლესთან. „ახალგაზრდებთან ერთად ვისაუბრეთ განათლების უფლების რეალიზებაზე საქართველოში, ამ მხრივ უმცირესობათა უფლებების დაცვაზე და დემოკრატიის მშენებლობაში ახალგაზრდების ჩართულობაზე. თემატური ფოტო-გამოფენით „მრავალფეროვნების სახეები” ყვარლის ევროკლუბს ვესტუმრეთ სადაც საინტერესო შეხვედრა გვქონდა ადგილობრივ ახალგაზრდებთან. გავეცანით მათ არაჩვეულებრივ ინიციატივებს ადამიანის უფლებების, გენდერული თანასწორობისა და ინკლუზიის საკითხებთან დაკავშირებით. მარნეულის, თეთრიწყაროს, ახალციხის და ყვარლის შემდეგ, ახალგაზრდებთან შეხვედრები საქართველოს სხვა რეგიონებშიც გაგრძელდება. შეხვედრების ციკლი ხორციელდება ნორვეგიისა და შვედეთის ხელშეწყობით, UNDP-ის მიმდინარე პროექტების ფარგლებში, რომლებიც გენდერულ თანასწორობას, უმცირესობათა უფლებების დაცვასა და სოციალურ ინკლუზიას ემსახურება“. სრულად... წყარო: ორგანიზაციის გვერდი სოციალურ ქსელში

თბილისი. USAID-ის ადგილობრივი თვითმმართველობის პროგრამის ინფორმაციით, საქართველოში სხვადასხვა მოწყვლად ჯგუფებს არ აქვთ თანაბარი წვდომა ან კონტროლი რესურსებზე, განიცდიან სტრუქტურულ სიღარიბეს, დისკრიმინაციას და სახელმწიფო სერვისებზე ხელმისაწვდომობის ნაკლებობას. „მიუხედავად იმისა, რომ ზოგიერთმა სახელმწიფო სტრატეგიამ და განხორციელებულმა პროგრამებმა მნიშვნელოვნად გააუმჯობესა ინტეგრაციის დონე, მოწყვლადი ჯგუფების შესაძლებლობა მიიღონ გადაწყვეტილებები და უფლებამოსილება მინიმალურია, როგორც ცენტრალურ, ასევე მუნიციპალურ დონეზე“. ორგანიზაციის მიერ გენდერული თანასწორობისა და სოციალური ინკლუზიის (GESI) გეგმა სწორედ იმისათვისაა შემუშავებული, რომ უკეთ გავიაზროთ ასეთი ჯგუფების გამოწვევები და დავეხმაროთ სირთულეებთან უკეთ გამკლავებაში. „USAID-ის ადგილობრივი თვითმმართველობის პროგრამა იძლევა შესაძლებლობას ვიმუშაოთ მინიმუმ 22 პარტნიორ მუნიციპალიტეტთან საქართველოს მასშტაბით, იმისათვის, რომ უზრუნველვყოთ მოწყვლადი ჯგუფების მონაწილეობა და დეცენტრალიზაციის და საჯარო სექტორის რეფორმებით მიღებული შედეგებით სარგებლობა“. სრულად... წყარო: ორგანიზაციის გვერდი სოციალურ ქსელში

ქვემო ქართლი. სოციალური სამართლიანობის ცენტრის ინფორმაციით, სამირა ისმაილოვამ სამოქალაქო თანასწორობის პლატფორმა 1 წლის წინ დააფუძნა და მას შემდეგ ქვემო ქართლში, განსაკუთრებით კი ბოლნისის მუნიციპალიტეტში მუშაობს ეთნიკურ უმცირესობებთან. „სამირა ცდილობს, რომ სოფლად მცხოვრები ქალების და გოგოების რეალობა უკეთესობისკენ შეცვალოს - დაეხმაროს მათ არაფორმალურ განათლების მიღებაში, მიაწოდოს მათ ინფორმაცია რეპროდუქციული ჯანმრთელობაზე და იმ სერვისებზე, რომლის მიღებაც შეუძლიათ და ეკუთვნით. ცდილობს ადგილობრივების გააქტიურებას, რომ ისინი უფრო მეტად იყვნენ ჩართული გადაწყვეტილების მიღების პროცესებში“. სრულად... წყარო: socialjustice.org.ge

სამეგრელო. საერთაშორისო გამჭვირვალობა - საქართველოს (TI Georgia) სამოქალაქო საბჭოების ორგანიზებით, ზუგდიდის მუნიციპალიტეტის სოფელ ჭითაწყარში, სანაპიროს ქუჩაზე მცხოვრებთა პრობლემის მოგვარების მოთხოვნით, ზუგდიდის მერიაში განცხადება შევიდა. ადგილობრივები ითხოვენ გზის საფარის მოასფალტებას, სანიაღვრე არხების გაყვანას, გარეგანათების სისტემის მონტაჟს, წყალმომარაგებისა და კანალიზაციის სისტემის მოწყობას. ორგანიზაცია მოუწოდებს ზუგდიდის მუნიციპალიტეტის მერიას, დროულად განიხილოს მიმართვა და დააკმაყოფილოს მოქალაქეთა მოთხოვნები. სრულად... წყარო: ორგანიზაციის გვერდი სოციალურ ქსელში

9 ივნისს, USAID-ის „ადგილობრივი თვითმმართველობის პროგრამამ“ და სამოქალაქო საზოგადოების ინსტიტუტმა (CSI) გამართეს ახალი პროექტის – „ადგილობრივ თვითმმართველობებში სამოქალაქო ჩართულობის და მონაწილეობითი მმართველობის გაძლიერების“ – ონლაინ პრეზენტაცია. შეხვედრაში მონაწილეობდა 20–მდე საზოგადოებრივი ორგანიზაციის წარმომადგენელი საქართველოს სხვადასხვა რეგიონიდან. პროექტის მიზანია სამოქალაქო ჩართულობის გაზრდა ადგილობრივ დონეზე გადაწყვეტილებების მიღების პროცესებში და მონაწილეობითი მმართველობის გაძლიერება შემდეგ სამიზნე მუნიციპალიტეტებში: ბათუმი, ჩოხატაური, დმანისი და მარნეული. პრეზენტაციის შემდგომ შეხვედრა წარიმართა კითხვა–პასუხის რეჟიმში, რომელიც მოიცავდა თემებს დეინსტიტუციონალიზაციის, თვითმმართველობის საქმიანობაში მონაწილეობის, სამოქალაქო ბიუჯეტირების მიმართულებით. როგორც უკვე აღვნიშნეთ, პროექტს ახორციელებს სამოქალაქო საზოგადოების ინსტიტუტი, USAID-ის „ადგილობრივი თვითმმართველობის პროგრამის“ მხარდაჭერით. „ადგილობრივი თვითმმართველობის პროგრამა“ წარმოადგენს ხუთწლიან ინიციატივას, რომელიც აშშ საერთაშორისო განვითარების სააგენტოს (USAID) დაფინანსებით ხორციელდება საქართველოში. პროგრამა მიზნად ისახავს საქართველოში მიმდინარე დეცენტრალიზაციის და საჯარო მმართველობის რეფორმის მხარდაჭერას და ადგილობრივ თვითმმართველობებში ეფექტიანობის, ანგარიშვალდებულებისა და მოქალაქეთა ჩართულობის გაზრდას. პროგრამა მუშაობს ადგილობრივ თვითმმართველობის დონეზე ანგარიშვალდებულების გაძლიერების, ინკლუზიური და მომხმარებელზე ორიენტირებული საჯარო სერვისების მიწოდების გაუმჯობესების კუთხით და დახმარებას უწევს ცენტრალურ ინსტიტუტებს დეცენტრალიზაციის და საჯარო მმართველობის რეფორმის განხორციელებაში.

თბილისი. ეროვნულ დემოკრატიულმა ინსტიტუტმა (NDI), პროექტის „საარჩევნო და პოლიტიკური პროცესების მხარდაჭერა საქართველოში“ ფარგლებში, მოამზადა მოქალაქის საბიუჯეტო გზამკვლევი. დოკუმენტში განხილულია ისეთი მნიშვნელოვანი საკითხები, როგორებიცაა: ადგილობრივი თვითმმართველი ერთეულის ბიუჯეტი და მისი დაგეგმვის, განხილვისა და დამტკიცების ეტაპები, მუნიციპალიტეტის უფლებამოსილებები, საბიუჯეტო პროცესის მონაწილე მხარეები. მთავარი აქცენტი კი გაკეთებულია მოქალაქის მიერ ჩართულობის მექანიზმების გამოყენებასა და მნიშვნელობაზე. ასევე, გზამკვლევში კონკრეტული მაგალითები არის განხილული, რომლებიც მოქალაქეებისა და თვითმმართველობის საერთო თანამშრომლობის კარგ პრაქტიკას აღწერს. ეროვნულ დემოკრატიული ინსტიტუტი (NDI) აქტიურად თანამშრომლობს  სამოქალაქო ჯგუფებთან და სხვადასხვა აქტორებთან, რომლებიც ხელს უწყობენ ადგილობრივ თვითმმართველობასთან თანამშრომლობის პროცესს, ღიაობას და ინკლუზიურობას. გამოცემა შესაძლებელი გახდა ამერიკელი ხალხის მიერ ამერიკის შეერთებული შტატების საერთაშორისო განვითარების სააგენტოს USAID-ის მიერ გაწეული დახმარებით. სრულად... მოქალაქის გზამკვლევი: რა უნდა ვიცოდეთ მუნიციპალიტეტის ბიუჯეტზე...  გზამკვლევი ხელმისაწვდომია ქართულ, აზერბაიჯანულ და სომხურ ენებზე. წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრი (CSRDG) აქვეყნებს მოკლე, საინფორმაციო ვიდეოს დეცენტრალიზაციის შესახებ. ვიდეოში საუბარია თუ როგორ უნდა მოხდეს ფუნქციების გადანაწილება ცენტრალურ და ადგილობრივ ხელისუფლებას შორის? რა ფუნქციები უნდა ჰქონდეს ცენტრს და რა უნდა წყდებოდეს ადგილობრივ დონეზე? იხილეთ ყველაფერი ევროკავშირთან ასოცირების შესახებ ერთ საიტზე... ვიდეო შექმნილია ევროკავშირისა და კონრად ადენაუერის ფონდის მხარდაჭერით. წყარო: www.asocireba.ge

სამეგრელო-ზემო სვანეთი. საერთაშორისო გამჭვირვალობა - საქართველომ ღია მონაცემთა ბაზებსა და ადგილობრივი თვითმმართველობის საკითხებზე ტრენინგები ჩაატარა მესტიაში მომუშავე სამოქალაქო აქტივისტებისა და სხვადასხვა ორგანიზაციის წარმომადგენლებისთვის. შეხვედრაზე განიხილეს თვითმმართველობის ორგანოთა საქმიანობაში მოქალაქეთა ჩართულობის მექანიზმები, ასევე, საჯარო მონაცემების ბაზებიდან ინფორმაციის მოპოვებისა და დამუშავების ხერხები, „საერთაშორისო გამჭვირვალობა - საქართველოს” მიერ შექმნილი ვებგვერდების გამოყენების მეთოდები. სრულად... წყარო: ორგანიზაციის გვერდი სოციალურ ქსელში

საქართველოს რამდენიმე ქალაქში – რუსთავსა და ოზურგეთში, ევროპის საბჭოსა და შესაბამისი მუნიციპალიტეტების ორგანიზებით, მოქალაქეთა მონაწილეობის ახალი მექანიზმი – მოქალაქეთა ასამბლეის დანერგვა დაიწყო. რუსთავში მოქალაქეებმა ჭალის ტყის განვითარების რეკომენდაციები შეიმუშავეს, რომელსაც რუსთავის მუნიციპალიტეტს წარუდგენენ. ხოლო ოზურგეთში პარკირების სისტემის გაუმჯობესების მიმართულებით იმუშავეს ადგილობრივმა მაცხოვრებლებმა.  სამოქალაქო საზოგადოების ინსტიტუტის (CSI) წარმომადგენლები ჩართულნი იყვნენ სამუშაო პროცესში – მოდერაციას უწევდნენ შეხვედრას, რათა მოქალაქეების მიერ რეკომენდაციების შემუშავება და ინიციატივების კენჭისყრა ეფექტურად წარმართულიყო.  რა არის მოქალაქეთა ასამბლეა?  მოქალაქეთა ასამბლეა სათათბირო დემოკრატიის ფორმაა, რომელიც საშუალებას აძლევს მოქალაქეებს, შეისწავლონ და ასამბლეის წევრებთან ერთად განიხილონ კონკრეტული საკითხი და ადგილობრივ დონეზე გადაწყვეტილებების მიღების პროცესში ჩაერთონ.  ასამბლეის წევრები შემთხვევითობის პრინციპით, წინასწარ გაწერილი მეთოდოლოგიით შერჩეული მოქალაქეები არიან, რომლებიც ერთად ქმნიან მრავალფეროვან, დემოგრაფიულად წარმომადგენლობით ჯგუფს, ისეთი კრიტერიუმების მიხედვით, როგორიცაა, ასაკი, სქესი, განათლების დონე და საცხოვრებელი უბანი. წყარო: ევროპის საბჭოს ოფისი საქართველოში

კახეთი. 13 მაისს, ნუკრიანში, ანდრონიკაანთ უბანში საუბნო შეკრება გაიმართა, რომელსაც სკოლის პედაგოგები, მოსწავლეები და სხვა დაინტერესებული პირებიც ესწრებოდნენ. შეხვედრას ცოდნის კაფეს დამფუძნებლები, ნანა ბაგალიშვილი და ქეთი მოლაშვილი უძღვებოდნენ. ანდრონიკაანთ უბანი საინტერესო არქიტექტურით გამოირჩევა და სოფლის ისტორიის მნიშვნელოვანი შემადგენელი ნაწილია. შეკრების მიზანი იყო ემსჯელათ თუ როგორ შეიძლება აქ, ამ უბანში, სამეზობლო ინიციატივა განვითარდეს, რომელიც თავის მხრივ საუბნო პრობლემების მოგვარებაზე, მის პოპულარიზაციაზე, საერო კულტურული მემკვიდრეობის შენარჩუნებაზე იზრუნებს სოფლის სათემო კავშირთან ნუკრიანის სახელოსნოებთან ერთად. სრულად... წყარო: ორგანიზაციის გვერდი სოციალურ ქსელში

შიდა ქართლი. 21 აპრილს, კასპის ტექნოპარკში, შიდა ქართლის რეგიონული ჰაბის „საზოგადოება ბილიკის“ ორგანიზებით ახალგაზრდული ფორუმი გაიმართა. შეხვედრის მიზანი იყო შიდა ქართლის რეგიონის ახალგაზრდების აქტიური ჩართვა ადგილობრივი თემის საჭიროებების მოგვარებაში. ახალგაზრდულ ფორუმზე კასპის მუნიციპალიტეტის სხვადასხვა თემის ახალგაზრდებმა  მოწვეულ სტუმრებს/მხარდამჭერებს წარუდგინეს პროექტი „მოხალისეობრივი საქმიანობა უკეთესი მომავლისათვის“. ახალგაზრდების საპროექტო ინიციატივამ მოწონება და მხარდაჭერა დაიმსახურა. ახალგაზრდული ფორუმი ჩატარდა ევროკავშირის და კონრად ადენაუერის ფონდის მიერ მხარდაჭერილი პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში

აჭარა. სამოქალაქო საზოგადოების ინსტიტუტმა (CSI), 25–26 აპრილს, ბათუმსა და ხელვაჩაურში გამართა შეხვედრები ადგილობრივი პრობლემების მოგვარებაში მოქალაქეთა მონაწილეობის მნიშვნელობის შესახებ. მასში მონაწილეობას იღებდნენ ბათუმსა და ხელვაჩაურში მცხოვრები ახალგაზრდები. შეხვედრებზე განიხილეს ადგილობრივი განვითარების პროცესში ჩართული აქტორების როლი და მნიშვნელობა, ადგილობრივი თვითმმართველობის სტრუქტურა და უფლებამოსილებები, ასევე ბათუმის და ხელვაჩაურის მუნიციპალიტეტებში დანერგილი მოქალაქეთა მონაწილეობის მექანიზმები. სამოქალაქო საზოგადოების ინსტიტუტის მიერ გამართული ღონისძიების მხარდამჭერია გერმანული ორგანიზაცია „პური მსოფლიოსთვის“. სრულად...

რეგიონები. საქართველოს სახალხო დამცველის აპარატმა მუნიციპალიტეტების გენდერული თანასწორობის პოლიტიკის შესახებ სპეციალური ანგარიში მოამზადა. კვლევაში შეფასებულია ადგილობრივ დონეზე ქალთა უფლებრივი მდგომარეობა, მხარდამჭერი მექანიზმების არსებობა, გადაწყვეტილების მიღების პროცესში მათი ჩართულობა და მონაწილეობა. სრულად... წყარო: ombudsman.ge

ქვემო ქართლი. აშშ–ის საერთაშორისო განვითარების სააგენტოს (USAID) ადგილობრივი თვითმმართველობის პროგრამის ფარგლებში, გაფორმდა მემორანდუმი ბოლნისის, დმანისის და მარნეულის მუნიციპალიტეტებთან. მემორანდუმი გაფორმდა, აშშ–ის საერთაშორისო განვითარების სააგენტოს (USAID) ახალი, 5–წლიანი ინიციატივის ფარგლებში. ღონისძიებას, რომელიც 19 აპრილს გაიმართა, ესწრებოდნენ საქართველოს რეგიონული განვითარებისა და ინფრასტრუქტურის მინისტრის მოადგილე, მზია გიორგობიანი, USAID–საქართველოს დემოკრატიის, ადამიანის უფლებებისა და მმართველობის ოფისის დირექტორის მოადგილის მოვალეობის შემსრულებელი, კორინ როტბლუმი, და USAID-ის ადგილობრივი თვითმმართველობის პროგრამის ხელმძღვანელი, კევინ მაკლოკლინი. ბოლნისის, დმანისის და მარნეულის მუნიციპალიტეტები, ახალი 5–წლიანი ინიციატივის პირველი სამუშაო წლის 11 პარტნიორ მუნიციპალიტეტებს შორის არიან შერჩეულები. აშშ–ის საერთაშორისო განვითარების სააგენტოს (USAID) ადგილობრივი თვითმმართველობის პროგრამა წარმოადგენს 5–წლიან ინიციატივას, რომლის მიზანია საქართველოში მიმდინარე დეცენტრალიზაციის და საჯარო მმართველობის რეფორმის მხარდაჭერა, თვითმმართველობის საქმიანობის ხელშეწყობა და მის საქმიანობაში მოქალაქეთა მონაწილეობის გაზრდა. ამოცანა 1: საჯარო მმართველობის და ანგარიშვალდებულების სისტემის გაუმჯობესება თვითმმართველობებში. ამოცანა2: მოქალაქეთა საჭიროებებზე მორგებული და თანაბრად მისაწვდომი ადგილობრივი სერვისების მიწოდების ხელშეწყობა. ამოცანა 3: სამოქალაქო საზოგადოების ჩართულობის გაძლიერება თვითმმართველობის საქმიანობაში, ადგილობრივი ხელისუფლების ანგარიშვალდებულების გაზრდის მიზნით. ამოცანა 4: დეცენტრალიზაციის პროცესის ხელშეწყობა საკანონმდებლო ჩარჩოს დახვეწის, ცენტრალური ხელისუფლების ინსტიტუციური შესაძლებლობების გაძლიერებისა და დაინტერესებულ მხარეებს შორის კოორდინაციის გაუმჯობესების გზით.

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: მუნიციპალიტეტების მიერ 2022 წელს გაწეული სარეკლამო ხარჯების ანალიზი. კვლევის მიგნებების თანახმად, 2022 წელს 18-მა მუნიციპალიტეტის მერიამ ჯამურად 503,140 ლარის ღირებულების სარეკლამო მომსახურების ხელშეკრულება გააფორმა. „სახელმწიფო შესყიდვების ელექტრონულ პორტალზე გადამოწმების შედეგად გამოვლინდა, რომ გარკვეულმა მუნიციპალიტეტებმა, რომლებმაც საჯარო ინფორმაციაში მიუთითეს, სარეკლამო ხარჯების არარსებობის შესახებ, IDFI-ის სრულყოფილი ინფორმაცია არ მიაწოდეს, რაც შეიძლება ინფორმაციის დაფარვის მცდელობაზე მიუთითებდეს. კერძოდ, რუსთავისა და ზუგდიდის შემთხვევაში, ორივე მერიამ ორგანიზაციას უპასუხა, რომ მსგავსი ხარჯი 2022 წელს არ ყოფილა გაწეული, თუმცა შესყიდვების ელექტრონული პორტალის თანახმად, აღნიშნულ მერიებს სარეკლამო მომსახურების კონტრაქტები უფიქსირდებათ. მნიშვნელოვანია, რომ რამდენიმე მუნიციპალიტეტს ხელშეკრულება აქვს გაფორმებული ონლაინგამოცემა მარშალპრესთან, რომელიც გამოირჩევა რუსული სამთავრობო და პროპაგანდისტული მედიების მიერ გავრცელებული ინფორმაციის ტირაჟირებით“, ნათქვამია ნაშრომში. გაეცანით IDFI-ის კვლევას აქ... წყარო: idfi.ge

რეგიონები. საქართველოს შემეცნებითი ცენტრის ორგანიზებით, სამოქალაქო სექტორის გაძლიერების და ერთობლივი სამომავლო თანამშრომლობის მიზნით, ადგილობრივ ორგანიზაციებთან სათემო შეხვედრები გაიმართება. თუ ხართ სათემო, საზოგადოებრივი, სამოქალაქო ორგანიზაციის ან სოციალური საწარმოს წარმომადგენელი შეავსეთ რეგისტრაციის ფორმა... შეხვედრაზე ჩატარდება თვითზრუნვის სესია, საკუთარ თავთან დაბრუნების და ჰარმონიაში მოსვლისთვის. შეხვედრები ინიცირებულია კომლის, საქართველოს შემეცნებითი ცენტრის, ფემინას, საქართველოს სხეულზე ორიენტირებული ფსიქოთერაპიის ასოციაციის მიერ, ქალთა ფონდი საქართველოში-ს მხარდაჭერით. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. „საერთაშორისო გამჭვირვალობა - საქართველოს“ ახალციხის ოფისის სამოქალაქო საბჭოს ორგანიზებით, მოქალაქეებმა ვალეში, მანველიშვილის ქუჩაზე, ე.წ. ყორიანის ტერიტორიაზე, გზის და სანიაღვრე არხების მოწყობა მოითხოვეს. „გარდა იმისა, რომ უამინდობის დროს გზა პრაქტიკულად გაუვალია და მისი კეთილმოწყობა ადგილობრივებისთვის ძალიან მნიშვნელოვანი ინფრასტრუქტურული საჭიროებაა, ამ მონაკვეთის გავლა უწევთ ვალეში სხვა მცხოვრებლებსაც საკუთარ სახნავ-სათეს ფართობებამდე“. ორგანიზაცია მოუწოდებს ახალციხის მუნიციპალიტეტის მერიას, დროულად განიხილოს მიმართვა და დააკმაყოფილოს ადგილობრივების მოთხოვნა. სრულად... წყარო: ორგანიზაციის გვერდი სოციალურ ქსელში

გურია. 24 მარტს დაბა ჩოხატაურში, ხიდისთავსა და ჯვარცხმაში გურიის სამოქალაქო ცენტრი მოსახლეობას შევხვდა. შეხვედრაზე განიხილეს რა არის ადგილობრივი თვითმმართველობის ინდექსი, რა კრიტერიუმებით ფასდებიან მუნიციპალიტეტები, რა ინფორმაცია უნდა იყოს ხელმისაწვდომი მათ ვებგვერდებზე და როგორია ჩოხატაურის მუნიციპალიტეტის შეფასება... შეხვედრა გაიმართა კონსულტაციისა და ტრენინგის ცენტრი - CTC-ს მხარდაჭერით, ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. სრულად... წყარო: ორგანიზაციის გვერდი სოციალურ ქსელში

ქვემო ქართლი. განათლების განვითარების და დასაქმების ცენტრის  და ქვემო ქართლის რეგიონული ჰაბის ორგანიზებით, ბოლნისის ახალგაზრდული საბჭოს წევრებისთვის გაიმართა მორიგი ვორკშოფი თემაზე „ადგილობრივი თვითმმართველობის ბიუჯეტი და მისი მონიტორინგი“. ტრენინგის მიზანი იყო ახალგაზრდული საბჭოს წევრების ცნობიერების ამაღლება ადგილობრივი თვითმმართველობის ბიუჯეტის  ფორმირებისა და ფუნქციონირების თავისებურებების, თვითმმართველობის ბიუჯეტის დაგეგმვის, შესრულებისა და მონიტორინგის საკითხების შესახებ. სრულად... წყარო: ორგანიზაციის გვერდი სოციალურ ქსელში

გურია. „ახალგაზრდა პედაგოგთა კავშირის“ პარტნიორი საჯარო სკოლების „იდეებისა და მეწარმეობის ლაბორატორიის“ წევრებმა საკუთარი ინიციატივების დაფინანასების შესაძლებლობების შესახებ შეხვედრა ჩაატარეს ოზურგეთის მუნიციპალიტეტის მერიის კულტურის, განათლების, სპორტის და ახალგაზრდულ საქმეთა სამსახურში. სრულად... წყარო: ახალგაზრდა პედაგოგთა კავშირის გვერდი სოციალურ ქსელში