კახეთი. „უფლებები საქართველომ“ ორგანიზაცია „ომისა და მშვიდობის გაშუქების ინსტიტუტის“  (IWPR) მხარდაჭერით ოქტომბრიდან დაიწყო ახალი პროექტი „ლაგოდეხის მუნიციპალიტეტში ეთნიკური უმცირესობების პოლიტიკურ-სოციალურ ცხოვრებაში ჩართულობის ზრდის ხელშეწყობა“. პროექტის პარტნიორები არიან „ლელიანის ზრდასრულთა განათლების ცენტრი“ და მედია ორგანიზაცია „კახეთის ხმა“.  პროექტის დასრულების შემდეგ, პროექტში ჩართული სულ მცირე ერთი ახალგაზრდა „უფლებები საქართველოს“ დაფინანსებით გაივლის ანაზღაურებად სტაჟირებას ორგანიზაციაში და  პრაქტიკულად გაეცნობა ადამიანის უფლებათა აქტივიზმს. სრულად...  წყარო: ორგანიზაციის გვერდი სოციალურ ქსელში

გურია. 8 ოქტომბერს გაიმართა სამუშაო შეხვედრა მუნიციპალიტეტებს შორის გამოცდილების გაზიარებისა და ადგილობრივი თვითმმართველობის ინდექსის შესახებ ინფორმაციის გაზიარების მიზნით.  ტრენინგს ესწრებოდნენ ოზურგეთისა და ჩოხატაურის მუნიციპალიტეტების მერიისა და საკრებულოს PR-ის, საინფორმაციო და საფინანსო განყოფილების თანამშრომლები. შეხვედრას ასევე ესწრებოდა ფოთის მუნიციპალიტეტის მდგრადი განვითარებისა და ინოვაციების სამსახურის უფროსი, ნინო გვასალია, რომელმაც ისაუბრა კონკრეტულ ნაბიჯებზე, თუ როგორ მიაღწია ფოთის მუნიციპალიტეტმა ადგილობრივი თვითმმართველობის ინდექსის მაღალ მაჩვენებელს და მონაწილეებს გაუზიარა ფოთის გამოცდილება.  შეხვედრა ჩატარდა პროექტის - სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის, ფარგლებში. სრულად... წყარო: STAR პროექტის გვერდი სოციალურ ქსელში

კახეთი. 9 ნოემბერს, კახეთში, სასტუმროში „ლოპოტა სპა რეზორტი“ საქართველოს სტრატეგიული კვლევებისა და განვითარების ცენტრი (CSRDG) „სათემო ლიდერთა ფორუმს“ გამართავს. ფორუმი მრავალფეროვანი პროგრამით არის წარმოდგენილი და მისი მიზანია: CSRDG-ის მიერ განხორციელებული სამუშაოს გაცნობა (პროექტები, სოციალური გავლენის კვლევა, „ქრაუდფანდინგის“ ხელშეწყობა); 2020-2021 წლების საუკეთესო სათემო ინიციატივის გამოვლენა - დაჯილდოება; რეგიონებისთვის აქტუალურ საკითხებზე მულტისექტორული დიალოგი. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. „საერთაშორისო გამჭვირვალობა - საქართველოს“ ახალციხის ოფისის სამოქალაქო საბჭოს ორგანიზებით, ახალციხეში, გრიგოლ ხანძთელისა და გიორგი მთაწმინდელის ქუჩების მაცხოვრებლების 140 ხელმოწერა შეგროვდა. მოსახლეობა ითხოვს კანალიზაციის, სანიაღვრე არხებისა და ტროტუარების მოწყობას და კორპუსის გარე ფასადის რეაბილიტაციას. ორგანიზაცია მოუწოდებს ახალციხის მერიასა და გაერთიანებული წყალმომარაგების კომპანიას, განიხილონ მიმართვა და გადაჭრან ადგილობრივი მაცხოვრებლების პრობლემები. სრულად... წყარო: ორგანიზაციის გვერდი სოციალურ ქსელში

სამეგრელო. გაეროს ბავშვთა ფონდის „ბავშვზე მორგებული ქალაქების ინიციატივას“ ქალაქი ფოთიც შეუერთდა. გაეროს ბავშვთა ფონდსა და ფოთის მერიას შორის ურთიერთთანამშრომლობის მემორანდუმს მოეწერა ხელი. Მომდევნო ეტაპზე სამოქმედო გეგმა შემუშავდება, რომლის შესრულების შემდეგაც ფოთი „ბავშვზე მორგებული ქალაქის“ სტატუსს მოიპოვებს. ორგანიზაციის ცნობით, ბავშვზე მორგებული ქალაქი ადგილობრივი თვითმმართველობის ისეთი სისტემაა, სადაც ბავშვის საჭიროებები და უფლებები ადგილობრივი პოლიტიკის და პროგრამების მნიშვნელოვანი ნაწილია. გაიგეთ მეტი... წყარო: ორგანიზაციის გვერდი სოციალურ ქსელში

თბილისი. 27 სექტემბერს სასტუმრო “რუმსში” სამოქალაქო საზოგადოების ინსტიტუტის (CSI) ორგანიზებით გაიმართა ფორუმი „ადგილობრივ დონეზე მოქალაქეთა მონაწილეობის გაძლიერება“. ფორუმის მიზანი იყო მოქალაქეთა ჩართულობის კუთხით არსებული გამოცდილებისა და საუკეთესო პრაქტიკების გაზიარება, გამოწვევებისა და შესაძლებლობების გაანალიზება, ამ კუთხით მნიშვნელოვან საკითხებზე დიალოგისა და დისკუსიის სივრცის შექმნა, რაც ხელს შეუწყობს სამოქალაქო მონაწილეობის საკითხით დაინტერესებული აქტორების შესაძლებლობების გაძლიერებას და მათ შორის თანამშრომლობის სტიმულირებას. შეხვედრის დასაწყისში, სამოქალაქო საზოგადოების ინსტიტუტის, საქართველოს რეგიონული განვითარებისა და ინფრასტრუქტურის სამინისტროს და საქართველოს ადგილობრივ თვითმმართველობათა ეროვნული ასოციაციის წარმომადგენლებმა ისაუბრეს გადაწყვეტილების მიღების პროცესში მოქალაქეთა მონაწილეობის მნიშვნელობაზე. შეხვედრის მეორე პანელი დაეთმო მუნიციპალიტეტების შეფასების შიდა და გარე ინსტრუმენტებსა და ამ კუთხით რუსთავისა და გორის მუნიციპალიტეტების გამოცდილების გაზიარებას.  ამასთანავე, შეხვედრაზე როგორც მუნიციპალიტეტების, ასევე საზოგადოებრივი ორგანიზაციების წარმომადგენლებმა ისაუბრეს ადგილობრივ დონეზე არსებულ მოქალაქეთა ჩართულობის მექანიზმებსა და საუკეთესო გამოცდილებაზე, საერთაშორისო ორგანიზაციების წარმომადგენლებმა კი წარადგინეს ის პროგრამები და შესაძლებლობები, რომლებიც ხელს უწყობს პოლიტიკის შექმნის პროცესში მოქალაქეთა ჩართულობას. ფორუმის ბოლოს მონაწილეებმა დისკუსიის რეჟიმში იმსჯელეს აღნიშნული კუთხით არსებულ გამოწვევებზე და მათი გადაჭრის შესაძლებლობებზე.  ფორუმი ორგანიზებულია სამოქალაქო საზოგადოების ინსტიტუტის (CSI) მიერ, პროექტის „ადგილობრივი განვითარების აქტორების მდგრადი კავშირის შექმნა საქართველოში“ – ფარგლებში, რომელიც დაფინანსებულია გერმანული საერთაშორისო ფონდის “პური მსოფლიოსთვის” (Bread for the World) – მიერ. ინიციატივა მიზნად ისახავს ადგილობრივი თვითმმართველობის დონეზე განვითარების სფეროში ჩართული აქტორების გაძლიერებას, რათა მათ ეფექტურად შეძლონ ადგილობრივი საჭიროებებისა და განვითარების პრიორიტეტების განსაზღვრა და პოლიტიკური გადაწყვეტილებების მიღების პროცესში აქტიური მონაწილეობა.

შიდა ქართლი. კასპის მუნიციპალიტეტის სოფელ ახალციხეში თანაშექმნის სივრცე გაიხსნა, რომელიც ისრაელის საელჩოს მიერ, მაშავის პროგრამით დაფინანსდა. ადგილობრივ მოსახლეობას ექნება სივრცე მუშაობისთვის, სხვადასხვა ონლაინ თუ პირისპირი შეხვედრის ორგანიზებისთვის და ნებისმიერი სხვა ტიპის იდეის განხორციელებისთვის. პროექტის მხარდამჭერები არიან კასპის მუნიციპალიტეტის მერია და სათემო ორგანიზაცია „კომლის თემი“. სრულად... წყარო: ორგანიზაციის გვერდი სოციალურ ქსელში

თბილისი. 21 სექტემბერს, ინფორმაციის თავისუფლების განვითარების ინსტიტუტმა (IDFI), პროექტის „საჯარო და კერძო სექტორებს შორის დიალოგის ხელშეწყობა საქართველოში მონიტორინგისა და ცნობიერების ამაღლების გზით“ ფარგლებში, ქუთაისის საკრებულოს წარმომადგენლებთან საინფორმაციო შეხვედრა გამართა. შეხვედრის დასაწყისში IDFI-ის წარმომადგენლებმა ისაუბრეს 2021 წელს ცენტრალურ და მუნიციპალურ დონეზე ნორმატიული აქტების შემუშავებისას საჯარო-კერძო დიალოგის ხარისხის შეფასების მიგნებებსა და რეკომენდაციებზე. შეხვედრის მეორე ნაწილში შედგა დისკუსია, საკრებულოს წარმომადგენლებმა ისაუბრეს კერძო სექტორთან თანამშრომლობის გამოცდილებაზე. სრულად... წყარო: idfi.ge

აჭარა. „საერთაშორისო გამჭვირვალობა - საქართველოს“ აჭარის სამოქალაქო საბჭოების ორგანიზებით, ბათუმის მერიას გონიო-აფსაროსის ადმინისტრაციულ ერთეულში მცხოვრებმა მოქალაქეებმა მიმართეს. ადგილობრივები მუნიციპალიტეტისგან დასახლებაში შიდა გზების დაგებას, გარეგანათების მოწყობას, სასმელი წყლის სისტემის გამართვას, საკანალიზაციო სისტემის დამონტაჟებას და სხვა ინფრასტრუქტურული საჭიროებების მოგვარებას ითხოვენ. ორგანიზაცია მოუწოდებს ბათუმის მერიას, დროულად დაიწყოს მიმართვაში იდენტიფიცირებული პრობლემების მოკვლევა და საბიუჯეტო რესურსებით მათი ეტაპობრივი მოგვარება. სრულად... წყარო: ორგანიზაციის გვერდი სოციალურ ქსელში

თბილისი. 16-18 სექტემბერს, „ფონდი ტასოს” ორგანიზებით, გაიმართა გაერთიანებული შეხვედრა სათემო მუშაკებისთვის. შეხვედრა ჩატარდა „ქალთა ეკონომიკური გაძლიერება სოციალური მობილიზაციისა და შესაძლებლობათა განვითარების გზით“ პროექტის მეორე ფაზის ფარგლებში. პროექტი ხორციელდება გაეროს ქალთა ორგანიზაციასთან, კახეთის რეგიონალური განვითარების ფონდსა და ქეა საერთაშორისო კავკასიაში პარტნიორობით. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. „საერთაშორისო გამჭვირვალობა - საქართველოს“ ახალციხის ოფისის და სამოქალაქო საბჭოების ორგანიზებით, რაბათის დასახლებაში ხელმოწერები შეგროვდა. წერილით მოსახლეობამ ახალციხის მერს, ასევე, საქართველოს გაერთიანებული წყალმომარაგების კომპანიის დირექტორს, ორი ღია საკანალიზაციო არხის მოწესრიგება, ამასთანავე, ქალაქის რამდენიმე სოფელთან დამაკავშირებელი ამორტიზებული ხიდის რეაბილიტაცია მოსთხოვა. „ანტისანიტარიისა და აუტანელი სუნის გამო გაუსაძლისია ხარისჭირაშვილის და ყაზბეგის ქუჩების მცხოვრებლების მდგომარეობა, განსაკუთრებით ზაფხულში. მოვუწოდებთ ახალციხის მერიას და გაერთიანებული წყალმომარაგების კომპანიას ავარიული ხიდი გაამაგრონ, დაზიანებული საკანალიზაციო არხები კი დახურონ და კანალიზაცია ცენტრალურ სისტემას მიუერთონ“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) საქართველოს მთავრობის წინააღმდეგ იწყებს დავას სენაკის საკრებულოს უფლებამოსილების შეწყვეტასთან დაკავშირებით. „გამომდინარე იქიდან, რომ საქართველოს მთავრობამ საკუთარი ინიციატივით არ შეასრულა კანონით გათვალისწინებული ვალდებულება, საიამ მიმართა მას განცხადებით და მოითხოვა აქტის გამოცემა სენაკის მუნიციპალიტეტის საკრებულოს უფლებამოსილების შეწყვეტილად ცნობის თაობაზე. ამ დროისთვის არ არის ცნობილი მთავრობის ოფიციალური პოზიცია განცხადებაში დასმულ საკითხთან დაკავშირებით. იმედს გამოვთქვამთ, საქართველოს მთავრობა დროულად მოახდენს სათანადო რეაგირებას და იმსჯელებს სენაკის საკრებულოს უფლებამოსილების შეწყვეტილად ცნობასთან დაკავშირებით“. სრულად... წყარო: gyla.ge

27 სექტემბერს, სამოქალაქო საზოგადოების ინსტიტუტი (CSI) გიწვევთ ფორუმზე „ადგილობრივ დონეზე მოქალაქეთა მონაწილეობის გაძლიერება“. ფორუმის მიზანია მოქალაქეთა ჩართულობის კუთხით არსებული გამოცდილებისა და საუკეთესო პრაქტიკების გაზიარება, გამოწვევებისა და შესაძლებლობების გაანალიზება. ამ კუთხით მნიშვნელოვან საკითხებზე დიალოგისა და დისკუსიის სივრცის შექმნა, რაც ხელს შეუწყობს სამოქალაქო მონაწილეობის საკითხით დაინტერესებული აქტორების შესაძლებლობების გაძლიერებას და მათ შორის თანამშრომლობის სტიმულირებას.  მონაწილეობით დემოკრატიის პრინციპების დანერგვა ადგილობრივი მმართველობის პროცესებში განსაკუთრებით აქტუალურია. გადაწყვეტილების მიღებაში მონაწილეობა, ფართო გაგებით მოიაზრებს კონკრეტული პოლიტიკისა თუ სტრატეგიის შექმნის, რეგულაციების შემუშავების, სერვისების დანერგვა-გაუმჯობესების და ზოგადად, მოქალაქეებისთვის მნიშვნელოვანი საკითხების გადაწყვეტის პროცესს. შესაბამისად, არსებული ინოვაციური მექანიზმებისა და კარგი პრაქტიკების გაზიარება ხელს შეუწყობს მუნიციპალიტეტების საქმიანობაში მონაწილეობითი მიდგომების გაძლიერებას, ანგარიშვალდებულებისა და გამჭვირვალობის ზრდას, საჭიროებებზე მორგებული პოლიტიკის განხორციელებასა და გადაწყვეტილების მიღების პროცესში მოქალაქეთა ჩართულობის წახალისებას.  აღნიშნული ფორუმი ქმნის სივრცეს ყველა დაინტერესებული პირისთვის უკეთ გააცნობიეროს მოქალაქეთა მონაწილეობის მნიშვნელობა პოლიტიკის დაგეგმვის, განხორციელებისა და შეფასების პროცესში, და ასევე თავად წარუდგინოს აუდიტორიას მონაწილეობითი პროცესის წარმატებული მაგალითები, მექანიზმები, რესურსები და ა.შ.  მონაწილეობისთვის, გთხოვთ გაიაროთ ონლაინ რეგისტრაცია შემდეგ ბმულზე: https://forms.gle/sKM2G9TMgDRXh9Ly5 ონლაინ რეგისტრაციის ბოლო, განახლებული თარიღია 19 სექტემბერი. ფორუმი გაიმართება 27 სექტემბერს (განახლებული თარიღი), თბილისში, სასტუმრო "რუმსში", "Garden Hall" (მ. კოსტავას 14). დამატებითი კითხვების შემთხვევაში დაგვიკავშირდით:  ტელ: 555 94 50 66  ელ–ფოსტა: n.mgvdeladze@civilin.org  ფორუმი ორგანიზებულია სამოქალაქო საზოგადოების ინსტიტუტის (CSI) მიერ, „ადგილობრივი განვითარების აქტორების მდგრადი კავშირის შექმნა საქართველოში“ პროექტის ფარგლებში, რომელიც დაფინანსებულია გერმანული საერთაშორისო ფონდის, Bread for the World-ის მიერ. ინიციატივა მიზნად ისახავს ადგილობრივი თვითმმართველობის დონეზე განვითარების სფეროში ჩართული აქტორების გაძლიერებას, რათა მათ ეფექტურად შეძლონ ადგილობრივი საჭიროებებისა და განვითარების პრიორიტეტების განსაზღვრა და პოლიტიკური გადაწყვეტილებების მიღების პროცესში აქტიური მონაწილეობა.

ქვემო ქართლი. სოციალური სამართლიანობის ცენტრის ინფორმაციით, რამდენიმე თვეა მარნეულის მუნიციპალიტეტის სოფელ კიროვკას მოსახლეობა ცდილობს თვითმმართველობისთვის საკუთარი ხმის გაგონებას და მათი სოფლის სახელწოდების ცვლილების პროცესში თვითმმართველ ორგანოებისთვის სოფლის პოზიციის გაცნობას. „26 აპრილს სოფელ კიროვკას მოსახლეობამ მარნეულის მერიასა და საკრებულოს კოლექტიური წერილით მიმართა, რომლითაც ისინი მათი სოფლისთვის ახალი სახელწოდების შერჩევის პროცესში მათ ჩართვას ითხოვდნენ და თვითმმართველობას სოფლის სახელწოდებად „მამეი“-ს სთავაზობდნენ, რაც მათი განმარტებით, აღნიშნული სოფლის ისტორიული სახელწოდებაა და რომელიც 1949 წელს საბჭოთა კავშირის პერიოდში შეიცვალა, როგორც კიროვკა. სოციალური სამართლიანობის ცენტრი მხარს უჭერს მარნეულის მუნიციპალიტეტის სოფელ კიროვკას მოსახლეობის მოთხოვნას მათ სოფელში დასახლების საერთო კრების ჩატარებასთან დაკავშირებით და მოუწოდებს მარნეულის მუნიციპალიტეტის მერიას, რომ გაატაროს საერთო კრების ჩატარებისთვის საჭირო ყველა ზომა“. სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტის (IDFI) მიერ GIZ-ის მხარდაჭერითა და გერმანიის ეკონომიკური თანამშრომლობისა და განვითარების ფედერალური სამინისტროს (BMZ) დაკვეთით, პროგრამის - „კარგი მმართველობა ადგილობრივი განვითარებისთვის სამხრეთ კავკასიაში“ (GGLD) - ფარგლებში, მომზადდა სახელმძღვანელო: მდგრადი განვითარების მიზნების ლოკალიზების პრაქტიკული სახელმძღვანელო. სახელმძღვანელოში მოცემულია ინფორმაცია მდგრადი განვითარების მიზნების, მათ მიღწევაში ადგილობრივი თვითმმართველობების ჩართულობის მნიშვნელობა, SDG-ების ლოკალიზების მიზნით გასატარებელი ღონისძიებები, ძირითადი ეტაპები და ყველა დაინტერესებული მხარის ჩართულობის უზრუნველსაყოფად გასათვალისწინებელი გარემოებები. შედეგად, სახელმძღვანელო მოიცავს შემდეგს თავებს/საკითხებს:  - რა არის მდგრადი განვითარების მიზნები?  - საქართველო და მდგრადი განვითარების მიზნების ნაციონალიზაცია  - რატომ არის მნიშვნელოვანი მდგრადი განვითარების მიზნების ლოკალიზების პროცესი?  - რა დამატებით სარგებელს მოუტანს მუნიციპალიტეტებს დღის წესრიგი 2030-ში აქტიური მონაწილეობა?  - მდგრადი განვითარების მიზნების ლოკალიზების ეტაპები  - I ეტაპი: ცნობიერების ამაღლების კამპანია  - II ეტაპი: ადგილობრივ დღის წესრიგსა და  სტრატეგიულ დოკუმენტებში მდგრადი განვითარების მიზნების ინტეგრირება  - III ეტაპი: მიზნების განხორციელება  - IV ეტაპი: მონიტორინგი და შეფასება სრულად... წყარო: idfi.ge

12-14 ივლისს, ქალთა საინფორმაციო ცენტრის ორგანიზებით, ჩატარდა ორდღიანი სამუშაო შეხვედრა „ადგილობრიბი თვითმმართველობის წარმომადგენლებისა და ლიდერი ქალების შესაძლებლობების გაძლიერება“. შეხვედრას ესწრებოდნენ ზუგდიდის, მესტიის, ხაშურისა და თეთრიწყაროს გადაწყვეტილების მიმღებ პირები და ლიდერი ქალები. შეხვედრა ჩატარდა ქალთა საინფორმაციო ცენტრისა და ქალ მშვიდობისმშენებელთა გლობალური ქსელის (GNWP) ერთობლივი პროექტის „გაძლიერებული ქალები და ახალგაზრდები მშვიდობის მშენებლობისა და შენარჩუნებისთვის” ფარგლებში. სრულად...  წყარო: ორგანიზაციის გვერდი სოციალურ ქსელში

თბილისი. 2 ივლისს სამოქალაქო აქტივისტები ქალაქ მარნეულში „შინ ევროპისკენ“ საინფორმაციო კამპანიას ეწეოდნენ, რა დროსაც აქტივისტებს თავს დაესხნენ მერიის და საკრებულოს თანამშრომლები. ისინი სამირა ბაირამოვას აყენებდნენ სიტყვიერ შეურაცხყოფას და ასევე, ჰქონდათ ფიზიკური ანგარიშსწორების მცდელობაც. სამოქალაქო აქტივისტები, მედიის წარმომადგენლები, სამოქალაქო საზოგადოება შეშფოთებას გამოთქვამენ შექმნილი სიტუაციის გამო და მოუწოდებენ მარნეულის მუნიციპალიტეტის მერიას, დაუყოვნებლივ დაიწყოს დისციპლინური წარმოება საჯაროდ ჩადენილი და დღემდე მიმდინარე გადაცდომებისთვის: თანამდებობიდან გაათავისუფლოს რიმა ოთარაშვილი და ირმა ზარქუა; თანამდებობიდან გაათავისუფლოს ააიპ „მარნეულის მუნიციპალიტეტის ტერიტორიაზე არსებული ბაგა - ბაღების გაერთიანება (სკოლამდელი აღზრდის ცენტრის) დირექტორის მოადგილე, სოსო ინაძე, რომელიც არღვევდა კანონს,  სიტყვიერ შეურაცხყოფას აყენებდა სამირა ბაირამოვას. თვითმმართველობის ცალკეულმა პირებმა შეწყვიტონ შეურაცხყოფაზე დაფუძნებული გამოხატვა და დაიწყონ კონსტრუქციული თანამშრომლობა მედიასა და სამოქალაქო სექტორთან. პეტიცია სრულად იხ. ბმულზე... წყარო: socialjustice.org.ge

იმერეთი. საერთაშორისო გამჭვირვალობა - საქართველო ზესტაფონის მუნიციპალიტეტის მერიის ა(ა)იპ „ზესტაფონის დასუფთავების და კეთილმოწყობის სერვის ცენტრი“, მაია კახნიაშვილის თანამდებობაზე აღდგენის და იძულებითი განაცდურის ანაზღაურების შესახებ, სასამართლო გადაწყვეტილებას არ ასრულებს, რაც წარმოადგენს სისხლის სამართლით დასჯად ქმედებას და საფრთხეს უქმნის საქართველოს კონსტიტუციით გარანტირებულ სამართლიანი სასამართლოს უფლებას. „საერთაშორისო გამჭვირვალობა - საქართველო” მოუწოდებს: ა(ა)იპ „ზესტაფონის დასუფთავების და კეთილმოწყობის სერვის ცენტრს" - აღასრულოს სასამართლო გადაწყვეტილება, დაუყოვნებლივ აღადგინოს განთავისუფლებული პირი სამსახურში და აუნაზღაუროს იძულებითი განაცდური. საქართველოს პროკურატურას - აწარმოოს დროული და ეფექტური გამოძიება და შეისწავლოს საქმეში სავარაუდო დანაშაულის ნიშნების არსებობა. აღსრულების ეროვნულ ბიუროს - შეასრულოს მასზე კანონით დაკისრებული ვალდებულება და უზრუნველყოს სასამართლო გადაწყვეტილების შეუფერხებელი აღსრულება. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრის (CSRDG) ინფორმაციით, ორგანიზაცია თემის განვითარების მიმართულებით, 1998 წლიდან მუშაობს. პროგრამის მიზანია რეგიონებში, უფრო კი სოფლად, სათემო ლიდერების, სამოქალაქო ორგანიზაციების თუ საინიციატივო ჯგუფის მხარდაჭერა. პროგრამის შესახებ დამატებითი საინტერესო ინფორმაცია და საგანმანათლებლო მასალა, შეგიძლიათ, იხილოთ თემის განვითარების პროგრამის განახლებულ ვებგვერდზე. სრულად...  წყარო: ორგანიზაციის გვერდი სოციალურ ქსელში

ქვემო ქართლი. „ფონდი ტასოს“ გუნდის წევრები ბოლნისის მუნიციპალიტეტის მერს და მერიის წარმომადგენლებს შეხვდნენ. „სამუშაო შეხვედრა, მიზნად ისახავდა ბოლნისის მუნიციპალიტეტში ახალი სამიზნე თემების/სოფლების შერჩევას და გენდერული ბიუჯეტირების მიმართულებით სამომავლო გეგმების განსაზღვრას. პროექტის მხარდამჭერია შვეიცარიის განვითარების და თანამშრომლობისა (SDC) და ავსტრიის განვითარების თანამშრომლობის (ADC) სააგენტოების მიერ. სრულად... წყარო: ორგანიზაციის გვერდი სოციალურ ქსელში

გურია. თანამედროვე სახვითი ხელოვნების გალერეაში „ჩოხატაურის სამოქალაქო ბიუჯეტის“ პრეზენტაცია გაიმართა. შეხვედრას ესწრებოდნენ გურიაში სახელმწიფო რწმუნებული გიორგი ურუშაძე, ადგილობრივი თვითმმართველობის, სამოქალაქო სექტორისა და საზოგადოების წარმომადგენლები. იდეების მიღება უკვე დაწყებულია და 1 აგვისტომდე გაგრძელდება. ჩოხატაურის სამოქალაქო ბიუჯეტის განხორციელებისთვის 2023 წელს გამოყოფილია 50, 000 ლარი. პროექტს „ჩოხატაურის სამოქალაქო ბიუჯეტი“ ახორციელებს ჩოხატაურის მუნიციპალიტეტი, სამოქალაქო საზოგადოების ინსტიტუტისა და გერმანული ორგანიზაცია „პური მსოფლიოს“ მხარდაჭერით. სრულად... წყარო: პროექტის გვერდი სოციალურ ქსელში

გურია. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, ოზურგეთის მერად ავთანდილ თალაკვაძის არჩევის შემდეგ რეორგანიზაციად შეფუთული თანამშრომელთა სამსახურიდან გათავისუფლების პროცესი დაიწყო, რამაც, საბოლოოდ, საკადრო წმენდის სახე მიიღო. ამ ეტაპზე, მერიის სამსახურებიდან 31 თანამშრომელი გათავისუფლდა, ხოლო ათეულობით ადამიანი გათავისუფლების შიშით აგრძელებს მუშაობას. გათავისუფლებულთა ნაწილის ინტერესებს სასამართლოში „სამართლიანი არჩევნები” დაიცავს. ვრცლად ოზურგეთის მერიაში მიმდინარე პროცესებზე... წყარო: isfed.ge