თბილისი. „საქართველოს ახალგაზრდა იურისტთა ასოციაციამ“ გამართა კვლევის დოკუმენტის - „უმცირესობა უმრავლესობაში - პროცედურული ომი და არჩევნების შემდგომი კრიზისი საკრებულოებში“ პრეზენტაცია. „კვლევის შედეგად გამოვლინდა, რომ 6-ვე საკრებულოში (ბათუმი, ზუგდიდი, წალენჯიხა, ჩხოროწყუ, სენაკი, რუსთავი) კრიზისის ძირითადი მიზეზი პარტიებს შორის მკვეთრი პოლიტიკური პოლარიზაცია იყო. მათთვის გადაულახავ წინააღმდეგობად ერთმანეთთან კონსესუსი და თანამდებობებზე ერთიანი კანდიდატების წარდგენა იქცა. შეთანხმების პროცესი თვეები გაგრძელდა, რამაც ამ საკრებულოების საქმიანობის დაწყება მნიშვნელოვნად შეაფერხა. კვლევამ გამოავლინა აგრეთვე, რომ არც თვითმმართველობის კოდექსი და არც საკრებულოთა რეგლამენტები არ აღმოჩნდა მზად მსგავს პოლიტიკურ კრიზისებთან გასამკლავებლად“, ნათქვამია საია-ს მიერ მომზადებულ დოკუმენტში. სრულად... წყარო: gyla.ge

სამცხე-ჯავახეთი. „საერთაშორისო გამჭვირვალობა - საქართველოს“ ახალციხის სამოქალაქო საბჭოების წევრებმა სამცხე-ჯავახეთის ორი მუნიციპალიტეტის, ახალციხისა და ადიგენის, 24 დასახლებულ პუნქტში 42 პრობლემა გამოავლინეს. მათი დიდი ნაწილი სასმელ და სარწყავ წყალს, ცენტრალურ და შიდა საავტომობილო გზებს, გარე განათების, სპორტული მოედნებისა და მოსაცდელების მოწყობას ეხებოდა. ახალციხის ოფისისა და სამოქალაქო საბჭოების მუშაობა-ადვოკატირების შედეგად, ახალციხესა და ადიგენში 12 პრობლემა მოგვარდა. სრულად... წყარო: transparency.ge

რეგიონები. ინფორმაციის თავისუფლების განვითარების ინსტიტუტმა (IDFI) ქედის, სენაკის, ონისა და საგარეჯოს მუნიციპალიტეტების მერიისა და ადგილობრივი დაინტერესებული მხარეების წარმომადგენლებისთვის მდგრადი განვითარების მიზნების (SDGs) ლოკალიზების შესახებ ონლაინ ტრენინგები გამართა. ტრენინგებს 40-მდე დაინტერესებული მხარე ესწრებოდა, მათ შორის მუნიციპალიტეტის მერიებში დასაქმებული საჯარო მოხელეები, არასამთავრობო ორგანიზაციების წარმომადგენლები, სკოლის პედაგოგები და ახალგაზრდული მრჩეველთა საბჭოს წევრები. სრულად... წყარო: idfi.ge

თბილისი. „საერთაშორისო გამჭვირვალობა - საქართველოს“ მიაჩნია, რომ მხოლოდ მმართველი პარტიის ინტერესებზეა მორგებული საქართველოს საარჩევნო კოდექსსა და ადგილობრივი თვითმმართველობის კოდექსში საპარლამენტო უმრავლესობის წევრების მიერ 10 მაისს ინიცირებული ცვლილება, რომელიც ახლებურად არეგულირებს საკრებულოს შუალედურ არჩევნებში არჩეული მაჟორიტარის უფლებამოსილების ცნობის საკითხს, პროპორციული სიით არჩეულის მიმართ კი მოქმედ წესს უცვლელად ტოვებს. ორგანიზაცია მოუწიდებს საქართველოს პარლამენტს, არ მოარგოს საკანონმდებლო ცვლილებები მხოლოდ მმართველი პარტიის ინტერესებს და აქცენტი გააკეთოს ადგილობრივი თვითმმართველობის ორგანოების დაკომპლექტების ერთიანი სტანდარტის შემუშავებასა და დამკვიდრებაზე. სრულად... წყარო: transparency.ge

გურია. ქალები რეგიონის განვითარებისთვის ახალ პროექტს „ჩემი დრო ჩემი სოფლისთვის“ ახორციელებს.  პროექტის მიზანია თემში ფილანთროპიისა და მოხალისეობის კულტურის განვითარების ხელშეწყობა. პროექტი ხორციელდება ოზურგეთის მუნიციპალიტეტის სამ სოფელში - ბოხვაური, შემოქმედი, და ვაკიჯვარი, ასევე, დაბა ნასაკირალში. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა (IDFI) შეიმუშავა რეკომენდაციები აჭარის უმაღლესი საბჭოსთვის საჯარო ინფორმაციის პროაქტიულად გამოქვეყნებასთან დაკავშირებით. „რეკომენდაციები შემუშავებულია აჭარის უმაღლესი საბჭოს ღია მმართველობის 2020-2021 წლების სამოქმედო გეგმით გათვალისწინებულ მე-11 ვალდებულებასთან დაკავშირებით. აღნიშნული ვალდებულება ითვალისწინებს უმაღლესი საბჭოს ვებგვერდზე დოკუმენტების ადვილად დასამუშავებელ ფორმატში განთავსებას და პროაქტიულად გამოსაქვეყნებელი ინფორმაციის ნუსხის გაზრდას“. სრულად... წყარო: idfi.ge

სამეგრელო. „საერთაშორისო გამჭვირვალობა - საქართველო” აქვეყნებს ანგარიშს, 2021 წელს, სამეგრელოში, ორგანიზაციის სამოქალაქო საბჭოების მუშაობისა და ადვოკატირების შედეგების შესახებ. „საერთაშორისო გამჭვირვალობა - საქართველოს” ზუგდიდის ოფისისა და სამოქალაქო საბჭოების წევრების მუშაობა-ადვოკატირების შედეგად, ხობში, ზუგდიდსა და წალენჯიხაში 2021 წელს განხორციელდა 10 პროექტი, მიმდინარეობს და 2022 წელს დასრულდება 11 პროექტი, წინა წლების მიმართვებიდან 2022 წლის ბიუჯეტით გათვალისწინებულია 5 პროექტის დასრულება. სრულად... წყარო: transparency.ge

აჭარა. „საერთაშორისო გამჭვირვალობა - საქართველოს“ ინფორმაციით, ბათუმის ოფისის კოორდინატორი, მალხაზ ჭკადუა, ბათუმის მე-18 საჯარო სკოლის უფროსკლასელებს შეხვდა და მოზარდებს ადგილობრივი თვითმმართველობის მუშაობასა და ადგილობრივი პრობლემების ადვოკატირებაში მოქალაქეთა ჩართულობის მექანიზმებზე ესაუბრა.  „სკოლის მოსწავლეები გაეცნენ თვითმმართველობის კომპეტენციებსა და, ამასთან, მიიღეს ინფორმაცია „საერთაშორისო გამჭვირვალობა - საქართველოსთან“ არსებული სამოქალაქო საბჭოების მუშაობის პრინციპებსა და მიღწეულ შედეგებზე“. შეხვედრა „თავისუფალ ჟურნალისტთა სახლის“ ორგანიზებით გაიმართა. სრულად... წყარო: ორგანიზაციის გვერდი სოციალურ ქსელში

აჭარა-იმერეთი. გაეროს განვითარების პროგრამის ინფორმაციით, ბათუმი და ქუთაისი მუნიციპალური გარდაქმნის პორტფელებს შეიმუშავებენ, რაშიც მათ ევროკავშირისა და UNDP-ის რეგიონული ინიციატივა „მერები ეკონომიკური ზრდისთვის“ (M4EG) დაეხმარება. „ბათუმის შემთხვევაში, ეს სტრატეგიული მიდგომა ხელს შეუწყობს სტარტაპებისა და ინოვაციების ეკოსისტემის შექმნას. ქუთაისის მიზანი ეკო-ქალაქის განვითარებაა, სადაც მდგრადი, ეფექტიანი და ბუნებრივ პირობებზე მორგებული გარემო ხელს შეუწყობს მოქალაქეთა ჯანსაღ და კომფორტულ არსებობას“. სრულად... წყარო: ორგანიზაციის გვერდი სოციალურ ქსელში ფოტო: ირაკლი ძნელაძე, ვლადიმირ ვალიშვილი/UNDP

სამცხე-ჯავახეთი. სამცხე-ჯავახეთის სამოქალაქო საზოგადოების ორგანიზაციები განცხადებით მიმართავენ საქართველოს მთავრობას და საქართველოში მოქმედ საერთაშორისო ორგანიზაციებს. „ჩვენ, სამცხე-ჯავახეთის სამოქალაქო საზოგადოების ორგანიზაციები, შეშფოთებით ვადევნებთ თვალს რუსეთის აგრესიას უკრაინაში და მხარს ვუჭერთ უკრაინელ ხალხს ამ მძიმე ბრძოლაში.  რუსეთის აგრესია, გარდა იმისა, რომ საერთაშორისო მშვიდობას, თავისუფლებასა და დემოკრატიული განვითარების ღირებულებებს უქმნის საფრთხეს, წარმოადგენს კონკრეტულად ჩვენი რეგიონისთვის მნიშვნელოვან გამოწვევას. კერძოდ, ამ ომმა კიდევ უფრო გამოააშკარავა სამცხე-ჯავახეთის წინაშე მდგარი რისკები, რომლებიც განპირობებულია ჩვენი რეგიონის ეკონომიკური, ფინანსური და საინფორმაციო დამოკიდებულებით რუსეთზე: რეგიონიდან ბევრი ადამიანი წლებია ცხოვრობს რუსეთში და იქედან ფინანსური გადმორიცხვებით არჩენს ოჯახებს; ბევრიც რუსეთში სეზონურ სამუშაოზე მიდიოდა. ასევე, რუსეთის პროპაგანდისტული მედია საშუალებები რჩება ინფორმაციის მიღების მნიშვნელოვან წყაროდ რეგიონში.  ზემოაღნიშნულ რისკებზე ჩვენ ადრეც არაერთხელ მივუთითებდით. ახლა კი, საერთაშორისო საზოგადოების მიერ რუსეთისთვის დაწესებული სანქციების გათვალისწინებით, დიდი ალბათობით, საგრძნობლად შემცირდება რუსეთიდან გადმორიცხვები, ხოლო იქ წასული მოსახლეობის ნაწილი დაუბრუნდება თავის რეგიონს. მთლიანობაში, მოსალოდნელია, რომ სამცხე-ჯავახეთში უმუშევრობის დონე გაიზარდოს და სოციალური ფონი გაუარესდეს.  ზემოთქმულიდან გამომდინარე, ჩვენ, სამცხე-ჯავახეთის სამოქალაქო საზოგადოების ორგანიზაციები, საქართველოს მთავრობას და საქართველოში მოქმედ საერთაშორისო ორგანიზაციებს მოვუწოდებთ, გაითვალისწინონ აღნიშნული რისკები, აქციონ ისინი შესაძლებლობებად და გამოიყენონ ეს ფანჯარა რეგიონში მცხოვრები მოქალაქეების საკეთილდღეოდ“, ნათქვამია განცხადებაში. სრულად... წყარო: დემოკრატ მესხთა კავშირის გვერდი სოციალურ ქსელში

თბილისი. სოციალური სამართლიანობის ცენტრი წარმოგიდგენთ თოზუ გულმემედლის ბლოგპოსტს: ვინ ვართ ჩვენ, იორმუღანლოელები. „მე ვარ თოზუ, სოფელ იორმუღანლოდან. დავიბადე და გავიზარდე ფერმერის ოჯახში. ამ წერილში შევეცდები, ჩვენი მომთაბარე ცხოვრების შესახებ მეტი მოგიყვეთ. აქვე მინდა ვთქვა, რომ ეს ტექსტი დაწერილია ყოველგვარი რომანტიზების გარეშე.  ფოტოზე ასახული კაცი მამაჩემია. ის 60 წლისაა. თითქმის მთელი ცხოვრება მწყემსი იყო. მამაჩემს სოფელში, საკუთარი შრომით აშენებულ სახლში ალბათ მთლიანობაში ერთი წელი აქვს გატარებული, დანარჩენი მომთაბარეობაში, ისეთ მიუწვდომელ ადგილებში, როგორც ეს ფოტოზე ჩანს“. სრულად... წყარო: socialjustice.org.ge

სამცხე-ჯავახეთი. „საერთაშორისო გამჭვირვალობა - საქართველოს“ სამოქალაქო საბჭოებისა და ახალციხის ოფისის ორგანიზებით, ახალციხეში, იაძის N12-ში, N4 სკოლამდელი აღზრდის დაწესებულების დემონტაჟისა და ამავე მისამართზე ახალი საბავშვო ბაღის აშენების მოთხოვნით, საკრებულოში პეტიცია დარეგისტრირდა. პეტიციას ხელს 360 ადგილობრივი აწერს. ორგანიზაცია მოუწოდებს, ახალციხის მუნიციპალიტეტის საკრებულოს კანონით დადგენილ ვადაში განიხილოს და მხარი დაუჭიროს წარდგენილ პეტიციას, დაანგრიოს არსებული შენობა და ამავე მისამართზე ააშენოს სტანდარტების შესაბამისი საბავშვო ბაღი. სრულად... წყარო: ორგანიზაციის გვერდი სოციალურ ქსელში

კახეთი. საერთაშორისო გამჭვირვალობა - საქართველოს სამოქალაქო საბჭოების წარმომადგენლები ეთნიკურად აზერბაიჯანული თემით დასახლებულ, საგარეჯოს სოფელ იორმუღანლოს ადგილობრივი პრობლემების გასაცნობად და მათი მოგვარების ადვოკატირებისთვის ეწვივნენ. ერთ-ერთი მთავარი პრობლემა სოფელში შესასვლელი მთავარი ხიდის სავალალო მდგომარეობა, რომელიც ნემისმიერ დროს შეიძლება ჩაინგრეს და მძიმე შედეგები გამოიწვიოს. იორმუღანლოში ძალიან აწუხებთ საბავშვო ბაღის პრობლემა, რადგან თითქმის 40 000 კაციან თემში მოქმედ ბაღს მხოლოდ 30-40 ბავშვის მიღება შეუძლია. სამოქალაქო საბჭოს ინიციატივით, შეგროვდა ხელმოწერები ხიდის რეაბილიტაციასა და ახალი ბაღის მშენებლობასთან დაკავშირებით. ორგანიზაციის წარმომადგენლები შეხვდნენ საგარეჯოს მერის მოადგილეს, რომლის ინფორმაციითაც, სამხარაულის ექსპერტიზის ბიურო აპირებს ხიდის გამოკვლევას, რათა დადგინდეს თუ რა სახის ჩარევა გახდება საჭირო. საბავშვო ბაღის აშენებასთან დაკავშირებით კი, მისი თქმით, დაპირება კერძო კომპანიისგან აქვთ მიღებული.  სრულად... წყარო: ორგანიზაციის გვერდი სოციალურ ქსელში

იმერეთი. გაეროს ბავშვთა ფონდის ინფორმაციით, 8 აპრილს, ქუთაისში, აკაკი წერეთლის სახელმწიფო უნივერსიტეტში ათი მუნიციპალიტეტის მერი შეიკრიბა იმის განსახილველად, თუ როგორ გაიზარდოს მუნიციპალიტეტების ჩართულობა მათი თემების სოციალური კეთილდღეობის უზრუნველსაყოფად. მაღალი დონის შეხვედრას დაესწრნენ ცენტრალური ხელისუფლებისა და მუნიციპალური თვითმმართველობის წარმომადგენლები, დონორები და სამოქალაქო საზოგადოების ორგანიზაციები...  სრულად... პროექტი ხორციელდება ევროკავშირის მხარდაჭერით. წყარო: www.unicef.org

აჭარა. გაეროს განვითარების პროგრამის ინფორმაციით, აჭარის ავტონომიური რესპუბლიკის უმაღლესმა საბჭომ მოქალაქეთა ჩართულობის ახალი ციფრული პლატფორმა წარადგინა. მისი მეშვეობით მოქალაქეებს შეუძლიათ მიმართონ უმაღლეს საბჭოს პეტიციით ან წერილობითი განცხადებით, გააკეთონ კომენტარი კანონპროექტზე, ჩანიშნონ შეხვედრა საბჭოს წევრთან... საქართველოს საჯარო უწყებებს შორის chaerte.sca.ge შეზღუდული შესაძლებლობის მქონე პირთათვის ყველაზე მაღალი სტანდარტით ადაპტირებული ვებ-გვერდია. ონლაინ პლატფორმა შეიქმნა აჭარის ავტონომიური რესპუბლიკის უმაღლესი საბჭოს ღია მმართველობის 2021-2022 წლების სამოქმედო გეგმის საფუძველზე, ევროკავშირისა (EU) და გაეროს განვითარების პროგრამის (UNDP) მხარდაჭერითა და ინფორმაციის თავისუფლების განვითარების ინსტიტუტთან (IDFI) თანამშრომლობით. სრულად... წყარო: ორგანიზაციის გვერდი სოციალურ ქსელში

აჭარა. 30 მარტს, სამოქალაქო საზოგადოების ინსტიტუტისა (CSI) და ხელვაჩაურის მერიის ახალგაზრდობის ცენტრის ერთობლივი ორგანიზებით, ხელვაჩაურში მცხოვრები ახალგაზრდებისთვის გაიმართა საგანმანათლებლო კამპანიის პრეზენტაცია - „შენი ხმა ხელვაჩაურის მუნიციპალიტეტში.“ შეხვედრას ახალგაზრდები, ხელვაჩაურის რესურს-ცენტრის წარმომადგენლები, მუნიციპალიტეტის მერიისა და საკრებულოს წევრები ესწრებოდნენ. კამპანიის მიზანია ახალგაზრდებში სამოქალაქო აქტივიზმის პოპულარიზაცია და მხარდაჭერა, ასევე თვითმმართველობის საქმიანობაში მათი ჩართულობის წახალისება. აღნიშნულ კამპანაში ხელვაჩაურის მუნიციპალიტეტის სოფლებში: კირნათაში, მარადიდში, ახალშენსა და სარფში მცხოვრები ახალგაზრდები არიან ჩართული. კამპანია „შენი ხმა ხელვაჩაურის თვითმმართველობაში“ ხორციელდება სამოქალაქო საზოგადოების ინსტიტუტის მიერ, პროექტის - „ადგილობრივი განვითარების აქტორებს შორის მყარი კავშირების დამყარება“ - ფარგლებში, რომლის ფინანსური მხარდამჭერია საერთაშორისო ორგანიზაცია „პური მსოფლიოსთვის“ (BftW).

აჭარა. 29 მარტს, პროექტის „სამოქალაქო საზოგადოების ინიციატივა“ ფარგლებში, აჭარის ჰაბმა ქობულეთის მუნიციპალიტეტის წარმომადგენლებთან შეხვედრა გაიმართა. „19 ადმინისტრაციული ერთეულის წარმომადგენელს გავაცანით „თავისუფალ ჟურნალისტთა სახლის“ საქმიანობა. დეტალურად მივაწოდეთ ინფორმაცია პროექტის მიზნებისა და შესაძლებლობების შესახებ“. აჭარის რეგიონული ჰაბი ევროკავშირისა და კონრად ადენაუერის ფონდის დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში შეიქმნა. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად: საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ინსტიტუტმა შექმნა მონაწილეობითი ბიუჯეტირების საკომუნიკაციო სტრატეგიიის სახელმძღვანელო, რომელიც წარმოადგენს დამხმარე რესურსს საქართველოს მუნიციალიტეტებისთვის. ასევე სახელმძღვანელო განკუთვნილია მათთვის, ვინც მონაწილეობითი ბიუჯეტირების პროგრამის შემუშავების, დანერგვისა და საზოგადოების ინფორმირების პროცესშია ჩართული. სახელმძღვანელო

თბილისი. ქალთა საინფორმაციო ცენტრი დანიის არასამთავრობო ორგანიზაცია KVINFO-ს მხარდაჭერით ახორციელებს 3 წლიან პროექტს „ქალთა გაძლიერება და სრულფასოვანი მონაწილეობა ადგილობრივი გენდერული პოლიტიკის განხორციელებაში“.  პროექტში ჩართულია ასევე ორი ქართული არასამთავრობო ორგანიზაცია - ქალთა ფონდი საქართველოში და საფარი. 28 მარტს ვიზიტი შედგა შიდა-ქართლის რეგიონში, სოფელ ჩორჩანაში, რომელიც მდებარეობს ადმინისტრაციულ სასაზღვრო ზოლთან და ხაშურის მუნიციპალიტეტის გენდერული საბჭოს წევრებთან. შეხვედრის ფარგლებში განიხილეს საბჭოს სამომავლო გეგმები. აქცენტები გაკეთდა საკითხებზე, რომლებიც ასახულია ხაშურის მუნიციპალიტეტის გენდერული თანასწორობის სამოქმედო გეგმაში... სრულად... წყარო: ორგანიზაციის გვერდი სოციალურ ქსელში

იმერეთი. „ადგილობრივი დემოკრატიის სააგენტო საქართველომ” შეხვედრა გამართა ბაღდათის ახალგაზრდული საბჭოს წევრებთან. „შეხვედრაზე საბჭოს წევრებს ინფორმაცია მიეწოდათ ადგილობრივი თვითმმართველობის მნიშვნელობისა და როლის, უფლებამოსილების სახეების, მოქალაქეთა მონაწილეობის ფორმების შესახებ.“ ბაღდათის ახალგაზრდული საბჭოს გაძლიერება ხდება პროექტის „სამოქალაქო საზოგადოების ინიციატივის“ ფარგლებში, ევროკავშირისა და კონრად ადენაუერის ფონდის მხარდაჭერით. სრულად... წყარო: ორგანიზაციის გვერდი სოციალურ ქსელში

საქართველო. „საერთაშორისო გამჭვირვალობა - საქართველოს” ინფორმაციით, ორგანიზაციის სამოქალაქო საბჭოების 2021 წლის მუშაობის შედეგად საქართველოს 4 რეგიონში, სამეგრელოში, იმერეთში, სამცხე-ჯავახეთსა და აჭარაში 95 ინფრასტრუქტურული პრობლემა გადაიჭრა. სამოქალაქო საბჭოები საერთაშორისო გამჭვირვალობა - საქართველოს მიერ ქვეყნის 6 რეგიონში (აჭარა, სამეგრელო, იმერეთი, კახეთი, სამცხე-ჯავახეთი, შიდა ქართლი) შექმნილი მოქალაქეთა არაფორმალური გაერთიანებებია, რომელთა მიზანია ადგილობრივი მოსახლეობისა და თვითმმართველობების დახმარებით, სხვადასხვა თემში არსებული ინფრასტრუქტული საჭიროებების გამოვლენა და გადაწყვეტა. სრულად... წყარო: ორგანიზაციის გვერდი სოციალურ ქსელში

სამეგრელო. „ფონდი ტასო“ „ქალთა ეკონომიკური გაძლიერების“ პროექტის ფარგლებში, სამიზნე სოფლებს სტუმრობს. 14 მარტს, ფონდმა სამუშაო შეხვედრა ჩხოროწყუს მუნიციპალიტეტის სოფელ ხაბუმეში გამართა. აღნიშნულ პროექტს „ფონდი ტასო“ გაეროს ქალთა ორგანიზაციის (UN Women) და ნორვეგიის მთავრობის მხარდაჭერით, შიდა ქართლის, სამეგრელოს, გურიის, იმერეთისა და რაჭა-ლეჩხუმის რეგიონებში ახორციელებს. სრულად... წყარო: ორგანიზაციის გვერდი სოციალურ ქსელში