გურია. ციფრული სივრცე - მეტი შესაძლებლობისთვის ინფორმაციით, დაიწყო პროექტის „თანასწორობა ძლიერი თემისთვის“ განხორციელება, რომელიც ასკანის და მზიანის თემში მაცხოვრებლებს შესაძლებლობას მისცემს განავითარონ პიროვნული უნარ-ჩვევები, მიიღონ ახალი ცოდნა და მნიშვნელოვანი გამოცდილება. „პროექტის ფარგლებში არაერთი საინტერესო აქტივობა იგეგმება, როგორიცაა: ტრენინგები, კურსები, ლექციები, სამეწარმეო-შემეცნებითი ტურები, ფლეშმობები, საინფორმაციო კამპანიები, ფილმის ჩვენება-განხილვები, მასტერკლასები. თითოეული აქტივობა კოვიდ რეგულაციების გათვალისწინებით განხორციელდება. პროექტში ჩართვის შესაძლებლობა აქვთ სოფელ ასკანის და მზიანის თემში მცხოვრებ პირებს, რომლებსაც უკვე შეუსრულდათ 13 წელი. თუ აკმაყოფილებ მონაწილეთა შერჩევის კრიტერიუმებს, მოდი ასკანის საჯარო სკოლაში, ან გააკეთე განაცხადი სატელეფონო კომუნიკაციით. პროექტს „თანასწორობა ძლიერი თემისთვის“ ახორციელებს „ნასაკირალის საინიციატივო ჯგუფი - ნასა“ და ასკანის საჯარო სკოლის „ციფრული სივრცე - მეტი შესაძლებლობა“, ქალთა ფონდი საქართველოში და ქალები საერთო მომავლისთვის (WECF) საქართველოს ოფისთან პარტნიორობით, პროექტის „ქალების ძალაუფლება ინკლუზიისთვის“ ფარგლებში, რომელიც ხორციელდება ადგილობრივ ორგანიზაციებთან „ახალგაზრდა პედაგოგთა კავშირი“, „რაჭის სათემო ორგანიზაცია“, „ქალი და რეალობა“ და „უხუცეს ქალთა საბჭო“ თანამშრომლობით. პროექტის ფინანსური მხარდამჭერია ევროკავშირი“. კითხვების ან რეგისტრაციის სურვილის შემთხვევაში, დარეკეთ: 555 53 78 19 ან 557 93 63 11. სრულად... წყარო: ციფრული სივრცე - მეტი შესაძლებლობა

შიდა ქართლი. 7 მარტს, „საზოგადოება ბილიკში“ (შიდა ქართლის რეგიონული ჰაბი), გორის ახალგაზრდულ საბჭოს წევრი ახალგაზრდებისთვის ტრენინგი გაიმართა თვითმმართველობის სტრუქტურის და ორგანიზაციული მართვის შესახებ. გორის ახალგაზრდული საბჭოს გაძლიერება ხდება პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში. პროექტი ხორციელდება ევროკავშირისა და კონრად-ადენაუერის ფონდის მხარდაჭერით. გორის ახალგაზრდული საბჭოს მხარდამჭერია გორის მუნიციპალიტეტის მერია. სრულად... წყარო: ორგანიზაციის გვერდი სოციალურ ქსელში

აჭარა. „თავისუფალ ჟურნალისტთა სახლის“ (აჭარის ჰაბი) ორგანიზებით, თებერვლის თვეში ქედის მუნიციპალიტეტის თვითმმართველობის წარმომადგენლებთან შეხვედრა გაიმართა. „ახალდაარსებული სამოქალაქო საზოგადოების ორგანიზაციების წარმომადგენლები, ქედის მერიის ხელმძღვანელ პირებს შევახვედრეთ. მონაწილე ორგანიზაციებმა თავიანთ საქმიანობაზე ისაუბრეს. ყურადღება დაეთმო ქედის მუნიციპალიტეტის მერიის საგრანტო პროგრამას“. აჭარის რეგიონული ჰაბი ევროკავშირისა და კონრად ადენაუერის ფონდის დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში შეიქმნა. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად: საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად... წყარო: ორგანიზაციის გვერდი სოციალურ ქსელში

იმერეთი. ადგილობრივი დემოკრატიის სააგენტო საქართველოს (LDA) მხარდაჭერით ხარაგაულის, ბაღდათის, სამტრედიის, ვანის, ხონისა და წყალტუბოს მუნიციპალიტეტების ვებ გვერდზე საპილოტედ დაინერგა მოქალაქეთა უკუკავშირის ონლაინ პლატფორმა. „პლატფორმის შექმნის მიზანია შეფასდეს მოქალაქეების მხრიდან მუნიციპალიტეტის მიერ განხორციელებული სერვისები/პროგრამები. პირველ ეტაპზე საპილოტედ მიმდინარეობს სოციალური პროგრამების შეფასება”. მოქალაქეთა უკუკავშირის პლატფორმა შეიქმნა გრანტის „მოქალაქეთა ჩართულობის ხარისხის ზრდა ადგილობრივ თვითმმართველობაში“ ფარგლებში, რომელიც განხორციელდა „გაეროს განვითარების პროგრამის (UNDP), დანიის საგარეო საქმეთა სამინისტროსა და საქართველოს მთავრობის“ მხარდაჭერით. სრულად... წყარო: ორგანიზაციის გვერდი სოციალურ ქსელში

სამეგრელო. „საერთაშორისო გამჭვირვალობა - საქართველოს“ ზუგდიდის ოფისმა და ორგანიზაციის სამოქალაქო საბჭოების წევრებმა ინფრასტრუქტურის სამინისტროსა და ხობის მერიას განცხადებით მიმართეს. დოკუმენტს 47 ადგილობრივი მაცხოვრებელი აწერს ხელს. „მოვუწოდებთ ხობის მერიასა და სამინისტროს დეტალურად და დროულად შეისწავლონ თორსა-დღვაბელთა პრობლემები, რათა მიმდინარე წელსვე გახდეს შესაძლებელი მათი მოსაგვარებელი სამუშაოების დაწყება“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

საქართველო. ინფორმაციის თავისუფლების განვითარების ინსტიტუტმა (IDFI), პროექტის „საჯარო და კერძო სექტორებს შორის დიალოგის ხელშეწყობა საქართველოში მონიტორინგისა და ცნობიერების ამაღლების გზით“ ფარგლებში, საინფორმაციო შეხვედრა გაიმართა ოზურგეთის, ზუგდიდის და ბათუმის საკრებულოს წარმომადგენლებთან. „პროექტის ფარგლებში, IDFI შეაფასებს მუნიციპალიტეტებში რეგულაციების შემუშავების პროცესში საჯარო-კერძო დიალოგის ხარისხს. გარდა ამისა, პროექტი მიზნად ისახავს შერჩეულ მუნიციპალიტეტებში საკრებულოს წევრების ცნობიერების ამაღლებას დიალოგის მნიშვნელობასა და ხარისხის შეფასების მექანიზმის თაობაზე“. სრულად... წყარო: idfi.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) დააკვირდა პოსტსაარჩევნო პერიოდში იმ მუნიციპალიტეტებში განვითარებულ მოვლენებს, სადაც უმრავლესობა მმართველმა პარტიამ ვერ მოიპოვა. ორგანიზაციის შეფასებით, „საკრებულოებში მიმდინარე პროცესები ნათლად წარმოაჩენს ქართული დემოკრატიის ნაკლოვანებებს, რომელთა შორისაა ძალაუფლების განაწილების მიუღებლობა, საზოგადოების საკეთილდღეოდ შეთანხმების მიღწევის სირთულე, უარეს შემთხვევაში - შეუძლებლობა, თვითმმართველობის არსის გაუცნობიერებლობა და რეალურად დეცენტრალიზაციის არარსებობა“. სრულად... წყარო: isfed.ge

აჭარა. სამოქალაქო საზოგადოების ისტიტუტი (CSI) მხარს უჭერს პროექტს „შენი იდეა ბათუმს“, რომელსაც ბათუმის მერია 2019 წლიდან ახორციელებს. „შენი იდეა ბათუმს“ არის მონაწილეობითი ბიუჯეტის პროექტი, რომლის მიზნია ქალაქის ბიუჯეტის დაგეგმარებასა და მართვაში ადგილობრივი მოსახლეობის მონაწილეობის ხელშეწყობა. მისი განხორციელება აშშ-ს საერთაშორისო განვითარების სააგენტოს (USAID) დემოკრატიული მმართველობის ინიციატივის პროგრამის (GGI Georgia) მხარდაჭერით გახდა შესაძლებელი. სრულად... წყარო: ორგანიზაციის ვებვეგრდი

იმერეთი. გაეროს ბავშვთა ფონდის ინფორმაციით, 1 თებერვალს, იუნისეფის წარმომადგენელი საქართველოში, ღასან ხალილი ქუთაისის მერს, იოსებ ხახალეიშვილს შეხვდა. „საუბარი შეეხებოდა, თუ როგორ უნდა გახდეს ქუთაისი ბავშვზე მორგებული ქალაქი. გასულ წელს ქუთაისმა აიღო ვალდებულება შეერთებოდა გაეროს ბავშვთა ფონდის ინიციატივას ბავშვზე მორგებული ქალაქების შესახებ“. სრულად... წყარო: www.unicef.org

თბილისი. გაეროს განვითარების პროგრამის ინფორმაციის მიხედვით, 24 იანვარს, საკრებულოს წევრი ქალები ყოველწლიურ ფორუმზე შეიკრიბნენ და ის კონკრეტულ ნაბიჯები განიხილეს, რომელთა განხორციელება ხელს შეუწყობს გენდერულად დაბალანსებული პოლიტიკის შემუშავებასა და ადგილობრივ დონეზე არსებულ ეკონომიკურ და სოციალურ გამოწვევებთან გამკლავებას. სრულად... წყარო: www.ge.undp.org

აჭარა. სამოქალაქო საზოგადოების ინსტიტუტისა და ხელვაჩაურის მერიის ახალაგაზრდული ცენტრის ერთობლივი ორგანიზებით, ხელვაჩაურში მცხოვრები ახალგაზრდებისთვის იწყება გრძელვადიანი საგანამანათლებლო კამპანია – „შენი ხმა ხელვაჩაურის მუნიციპალიტეტში!“. კამპანიის მიზანია სამოქალაქო აქტივიზმის მხარდაჭერა და თვითმმართველობის საქმიანობაში ახალგაზრდების აქტიური ჩართვა. კამპანიაში მონაწილეობისთვის განაცხადის შემოტანა შეუძლიათ ხელვაჩაურში მცხოვრებ 14-29 წლის ახალგაზრდებს. მსურველებმა 2022 წლის 1 თებერვლამდე უნდა შეავსონ სააპლიკაციო ფორმა... სრულად... კამპანია – „შენი ხმა ხელვაჩაურის მუნიციპალიტეტში!“ ხორციელდება სამოქალაქო საზოგადოების ინსტიტუტის მიერ, პროექტის – „ადგილობრივი განვითარების აქტორებს შორის მყარი კავშირების დამყარება“ (მეორე ფაზა) ფარგლებში, გერმანული ორგანიზაცია „პური მსოფლიოს“ მხარდაჭერითა და ხელვაჩაურის მუნიციპალიტეტის ახალგაზრდულ ცენტრთან პარტნიორობით.

თბილისი. საერთაშორისო გამჭვირვალობა - საქართველოს ინფორმაციით, თვითმმართველობის არჩევნების შემდგომ პერიოდში ვრცელდება ცნობები ადგილობრივი საჯარო სამსახურებიდან თანამშრომელთა გათავისუფლების შესახებ. თუ თვლით, რომ თქვენი უფლებები ირღვევა, უკანონოდ გაგათავისუფლეს საჯარო სამსახურიდან, იურიდიული დახმარებისთვის მიმართეთ ორგანიზაციას.  სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ანალიტიკურ სტატიას, რომლის ავტორია ანატოლი კორეპანოვი. სტატია დაიწერა კონკურსისთვის „მონაცემები ცვლილებებისთვის“. ანატოლი კორეპანოვი კონკურსის პირველი ადგილის მფლობელია. „წინამდებარე დოკუმენტში გაანალიზებულია იმერეთის რეგიონის 11 მუნიციპალიტეტის (12-დან) სპორტის პოლიტიკა და პროგრამული ხარჯები, ასევე მიმოხილულია მერიებს დაქვემდებარებული სპორტული ორგანიზაციების -არაკომერციული (ააიპ) და შეზღუდული პასუხისმგებლობის (შპს) იურიდიული პირების საქმიანობის არაერთი ასპექტი: გამჭვირვალობა, ფინანსები და შემოსავლის წყაროები, მოქმედი პროგრამები და ბენეფიციართა ჯგუფები, მწვრთნელთა კვალიფიკაცია და ანაზღაურება, აგრეთვე შეზღუდული შესაძლებლობების მქონე პირთა სპორტში ჩართულობის ხელშეწყობად არსებული მიდგომები. ანალიზი ეფუძნება სამაგიდე კვლევას, რომლის ფარგლებში დამუშავდა მუნიციპალიტეტების მერიებისგან მიღებული ინფორმაცია (2021 წლის მაისი-ივნისი) და საჯაროდ ხელმისაწვდომი მონაცემები“.  სრულად... წყარო: idfi.ge

თბილისი. ჰაინრიხ ბიოლის ფონდის სამხრეთ კავკასიის რეგიონული ბიურო აქვეყნებს ნინო ზუბაშვილის კვლევას „არაფორმალური სამოქალაქო ჯგუფების ჩართულობა ადგილობრივ დონეზე გადაწყვეტილების მიღების პროცესში“. კვლევა მომზადდა ფონდის მწვანე აკადემიის მცირე გრანტების პროექტის ფარგლებში. „კვლევა შეისწავლის არაფორმალური სამოქალაქო ჯგუფების ურთიერთობას თემთან და მათ ჩართულობას ადგილობრივ დონეზე გადაწყვეტილების მიღების პროცესში“. სრულად... წყარო: ge.boell.org

თბილისი. საერთაშორისო გამჭვირვალობა - საქართველოს კვლევის მიხედვით, მუნიციპალიტეტების მიერ 2020 წელს განხორციელებული სახელმწიფო შესყიდვების კვლევის შედეგად, დგინდება, რომ:  „სახელმწიფო შესყიდვების შედეგად 15-მა ადგილობრივმა ტელევიზიამ ჯამში 686 ათას ლარზე მეტი მიიღო. 63 მუნიციპალიტეტიდან სამაუწყებლო მომსახურების შესყიდვა 18-მა განახორციელა, კერძოდ, ჩატარდა 14 ტენდერი და 4 გამარტივებული შესყიდვა. ყველაზე მსხვილი შესყიდვები რუსთავის, მარნეულის, გურჯაანის, ქუთაისის და ნინოწმინდის მუნიციპალიტეტებმა განახორციელეს“... სრულად... წყარო: transparency.ge

იმერეთი. ადგილობრივი დემოკრატიის სააგენტო საქართველო გიზიარებთ გრანტის „მოქალაქეთა ჩართულობის ხარისხის ზრდა ადგილობრივ თვითმმართველობაში“ ფარგლებში განხორციელებული აქტივობებისა და შედეგების მოკლე მიმოხილვას. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ადგილობრივი თვითმმართველობების ბიუჯეტების ანალიზს. „2021 წელს მუნიციპალიტეტების მიერ დაგეგმილი ხარჯების ყველაზე დიდი წილი 37% (716,3 მლნ. ლარი) სუბსიდიებზე მოდის, რომელიც უმეტესწილად ა(ა)იპ-ების დაფინანსებაზე გაიცემა. 2020-2021 წლებში თბილისის ბიუჯეტში საქალაქო სამგზავრო ტრანსპორტის სუბსიდიისთვის, გათვალისწინებული იყო სულ 212 მილიონი ლარი. მუნიციპალიტეტებში შრომის ანაზღაურების ხარჯების წილი მთლიან ხარჯებში 8%-დან 50%-მდე მერყეობს, ხოლო სოც. უზრუნველყოფის - 2%-დან 17%მდე. 2021 წელს ადგილობრივი თვითმართველობის არჩევნებამდე ბიუჯეტის ცვლილებების შედეგად საერთო ხარჯების გეგმიური მაჩვენებელი 292 მილიონი ლარით გაიზარდა“, აღნიშნულია კვლევის ძირითად მიგნებებში. სრულად... წყარო: idfi.ge

კახეთი. საერთაშორისო გამჭვირვალობა - საქართველომ კახეთის რეგიონში მოქმედი არასამთავრობო ორგანიზაციებისთვის ტრენინგი ჩაატარა თემაზე: „საბიუჯეტო პროცესი მუნიციპალიტეტებში და სამოქალაქო სექტორის ჩართულობა ბიუჯეტირებაში“. „მონაწილეები გაეცნენ ბიუჯეტის შედგენის, მასში ცვლილებების შეტანისა და დამტკიცების სრულ ციკლს. გაეცნენ იმ დოკუმენტაციას, რაც საბიუჯეტო პროცესს სავალდებულოდ ახლავს. ასევე, გაეცნენ ინიციატივების სწორედ ჩამოყალიბებისა და მუნიციპალიტეტისთვის დროულად მიწოდების წესებისა და ვადების შესახებ ინფორმაციას“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) თვლის, რომ ბათუმისა და ზუგდიდის 2022 წლის ბიუჯეტის დამტკიცებასთან დაკავშირებით განვითარებული მოვლენები, ბადებს ეჭვებს აღნიშნულ პროცესთან დაკავშირებით მიღებულ გადაწყვეტილებათა მატერიალური კუთხით კანონიერების შესახებ. „მსგავსი პრაქტიკა ეწინააღმდეგება კონსტიტუციით განმტკიცებულ დემოკრატიულ პრინციპებსა და ადგილობრივი თვითმმართველობის არსს, რითაც საფრთხეს უქმნის მოსახლეობის მიერ ადგილზე მმართველობის დემოკრატიული განხორციელების პერსპექტივას“. სრულად... წყარო: idfi.ge

თბილისი. 15 დეკემბერს, ინფორმაციის თავისუფლების განვითარების ინსტიტუტის (IDFI), კონსულტაციისა და ტრენინგის ცენტრის (CTC) და მმართველობითი სისტემების განვითარების ცენტრის (MSDC) წარმომადგენლებმა ადგილობრივი თვითმმართველობის ინდექსის 2021 წლის შეფასების შედეგები წარმოადგინეს. „მუნიციპალიტეტების გამჭვირვალობისა და ანგარიშვალდებულების საშუალო შედეგი, 2021 წელსაც დაბალია - 28%. მერიების საშუალო შედეგია - 26%, ხოლო საკრებულოების კი 31%“. სრულად... წყარო: idfi.ge

აჭარა. „საერთაშორისო გამჭვირვალობა - საქართველოს” ორგანიზებით, ბათუმში სამოქალაქო სექტორის წარმომადგენლებისთვის მუნიციპალური ბიუჯეტირების პროცესსა და არასამთავრობო სექტორის ჩართულობაზე ტრენინგი ჩატარდა. „შეხვედრაზე მონაწილეებმა განიხილეს მუნიციპალური ბიუჯეტირების პროცესი, ვადები, სამოქალაქო სექტორის ჩართულობის ასპექტები და საზოგადოებრივ მონიტორინგთან დაკავშირებული სხვა საკითხები“. სრულად... წყარო: ორგანიზაციის გვერდი სოციალურ ქსელში

სამეგრელო. წალენჯიხაში, ჯგალის თემსა და ქალაქ ჯვარში მოქმედი სათემო ორგანიზაციების წარმომადგენლებსა და სამოქალაქო აქტივისტებს ადგილობრივი თვითმმართველობის ორგანოთა საქმიანობაში მოქალაქეთა ჩართულობის მექანიზმებზე ტრენინგი ჩაუტარდათ. „ტრენინგის მონაწილეები გაეცნენ ადგილობრივი თვითმმართველობის სისტემაში არსებულ გამოწვევებს, საკრებულოს საზედამხედველო ფუნქციებსა და მუნიციპალიტეტის პროგრამული ბიუჯეტის შედგენის მეთოდებს“. სრულად... წყარო: ორგანიზაციის გვერდი სოციალურ ქსელში