სვანეთი. 30-31 ოქტომბერს მესტიაში და 1-2 ნოემბერს ლატალში საქართველოს სტრატეგიული კვლევებისა და განვითარების ცენტრის ორგანიზებით ჩატარდა ტრენინგი თემაზე - ,,ადგილობრივი თვითმმართველობა და მონიტორინგის მეთოდები”. ტრენინგს ესწრებოდა მესტიის და ლატალის თემის 40-მდე აქტივისტი. შეხვედრაზე განიხილეს ადგილობრივი თვითმმართველობის სტრუქტურა, კომპეტენციები, გადაწყვეტილების მიღების პროცესისთვის დამახასიათებელი მონაწილეობის ფორმები, აგრეთვე ადგილობრივი თვითმმართველობის ბიუჯეტის ციკლი და ბიუჯეტის მონიტორინგის ეტაპები. ტრენინგი სათემო ორგანიზაციებისთვის ჩატარდა ევროკავშირის დელეგაციის მიერ დაფინანსებული პროექტის ,,სამოქალაქო საზოგადოების ხელშეწყობა ზემო სვანეთში და მისი ჩართვა ადგილობრივ მმართველობაში” პროგრამის ფარგლებში. სრულად წყარო: ორგანიზაციის ოფიციალური გვერდი სოციალურ ქსელში

6 ნოემბერს, 17:00 საათზე, ბათუმის დემოკრატიული ჩართულობის ცენტრი გამართავს დისკუსიას თემაზე  –  „აჭარის ტელევიზიისა და რადიოს სტატუსი". მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი.

თბილისი. 2 ნოემბერს ევრაზიის თანამშრომლობის ფონდის ინიციატივით გაიმართა დისკუსია თემაზე: „სამოქალაქო საზოგადოების როლი პოლიტიკური ტრანსფორმაციის პროცესში". დისკუსიაში მონაწილეობა მიიღო რეინტეგრაციის საკითხებში სახელმწიფო მინისტრის მოადგილემ, ქეთევან ციხელაშვილმა, ბერლინის ლიტერატურისა და კულტურის ცენტრის მეცნიერ-თანამშრომელმა, პროფესორმა ზაალ ანდრონიკაშვილმა, ილიას უნივერსიტეტის პროფესორმა და ჟურნალისტმა, დავით პაიჭაძემ და გურიის ახალგაზრდული რესურს ცენტრის ვიცე-პრეზიდენტმა, თამარ ღლონტმა. დისკუსიისას განიხილეს ისეთი საკითხები, როგორიცაა სამოქალაქო საზოგადოების მნიშნველობის ზრდა პოლიტიკური ცლილებების პროცესში, საზოგდოებრივი ორგანიზაციებისა და ხელისფულების ურთიერთობა და ა.შღონისძიება მიეძღვნა ევრაზიის თანამშრომლობის ფონდის, როგორც ადგილობრივი ორგანიზაციის, საქმიანობის 5 წლისთავს. დისკუსიაზე დაისვა შეკთხვები და გამოითქვა მოსაზრებები დარბაზიდანაც.

სამცხე–ჯავახეთი. სამოქალაქო განათლებისა და პედაგოგთა გადამზადების პროგრამის ფარგლებში 3 და 4 ნოემბერს ახალციხის ახალგაზრდულ ცენტრში სოციალური მედიის საკითხებზე ტრენინგი ჩატარდა. ტრენინგს უძღვებოდნენ საქართველოს საზოგადოებრივ საქმეთა ინსტიტუტის (GIPA) კურსდამთავრებულები ქეთი გიგაშვილი და თეა გამეზარდაშვილი. ხოლო მონაწილეები იყვნენ ახალციხის საჯარო სკოლების ათი და სოფელ აწყურის საჯარო სკოლის ორი მოსწავლე, რომლებიც ასისტენტობას უწევდნენ ტრენერებს.პირველი დღე დაეთმო თეორიულ საკითხებს: რა არის სოციალური მედია, მასმედია, ბლოგი, როგორ უნდა განათავსონ ინფორმაცია ბლოგზე და როგორ გამოიყენონ სოციალური მედიის საშუალებები. მეორე დღე პრაქტიკული მუშაობით გაგრძელდა. მოსწავლეებმა შექმნეს ბლოგები, ისწავლეს ბლოგებზე ინფორმაციის განთავსება და ბლოგის სწორად გამოყენება.ტრენინგის მეორე დღეს მოსწავლეებმა შეაფასეს ერთმანეთის იდეები – თუ რა სახის ინფორმაციის განთავსებას აპირებდნენ ბლოგზე და დაუწერეს ერთმანეთს კომენტარები შეფასების ფურცლებში. ბოლოს კი შეავსეს ტრენინგის შეფასების ონლაინ აპლიკაცია.პროგრამის – „სოციალური მედიის განვითარება რეგიონულ დონეზე" – ერთ–ერთი უმნიშვნელოვანესი კომპონენტია სოციალური მედიის ცოდნისა და უნარ-ჩვევების განვითარება მოსწავლეთა, მასწავლებელთა და სხვა დაინტერესებული მიზნობრივ ჯგუფებისათვის.

თბილისი. 1-2 ნოემბერს საქართველოს სტრატეგიული კვლევებისა და განვითარების ცენტრში „თემის განვითარების რესურს ცენტრის” პროგრამის ფარგლებში, ჩატარდა ტრენინგი თემაზე - „მართვის ზოგადი უნარები”. ტრენინგებს ესწრებოდნენ თემის განვითარებაზე მომუშავე საზოგადოებრივი ორგანიზაციების წარმომადგენლები. ტრენინგს უძღვებოდნენ ამავე ორგანიზაციის ტრენერები. ორი დღის განმავლობაში ჯგუფი მუშაობდა თეორიულ მასალასა და პრაქტიკულ სავარჯიშოებზე. განიხილეს ორგანიზაციის მართვის არსი, ფუნქციები, დაგეგმვისა და მოტივაციის მნიშვნელობა. ტრენინგს ესწრებოდა საქართველოში თემზე მომუშავე ცამეტი ორგანიზაციის წარმომადგენელი. სრულად წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია განცხადებას ავრცელებს, სადაც ნათქვამია, რომ აჭარის ტელევიზიას საზოგადოებრივი მაუწყებილს სტატუსი უნდა მიენიჭოს.  „დღეისათვის აჭარის ავტონომიური რესპუბლიკის საქვეუწყებო დაწესებულება  მაუწყებლობის ფუნქციას ასრულებს. საკანონმდებლო აქტების ანალიზი კი ცხადყოფს, რომ დაუშვებელია ადმინისტრაციული ორგანოსათვის მსგავსი ფუნქციის მინიჭება.  აჭარის ტელევიზიის აღნიშნული სტატუსი წინააღმდეგობაშია „მაუწყებლობის შესახებ" საქართველოს კანონის 37-ე მუხლის  მე-2 პუნქტის ჩანაწერებთან, რომ მაუწყებლობის სფეროში ლიცენზიის მფლობელი/ავტორიზებული პირი არ შეიძლება იყოს ადმინისტრაციული ორგანო" – ნათქვამია განცხადებაში. საია მზადყოფნას გამოთქვამს მონაწილეობა მიიღოს მაუწყებლობის სფეროში საქართველოს კანონმდებლობის ფორმირების პროცესში. განცხადება აჭარის ავტონომიური რესპუბლიკის სახელმწიფო ტელევიზიის სტატუსი და სამართლებრივი მდგომარეობა (მოკლე ანალიზი)   წყარო: gyla.ge

სამეგრელო. ზუგდიდში მოქმედი არასამთავრობო ორგანიზაცია „ახალგაზრდები სამოქალაქო ინტერესებისათვის" 3 ნოემბრიდან, ზუგდიდის კინოთეატრ „ატრიუმში" დოკუმენტური ფილმების ჩვენებას იწყებს. ოთხი დღის განმავლობაში ნაჩვენები იქნება დოკუმენტური ფილმები ადამიანის უფლებებზე. კინოჩვენების შემდეგ გაიმართება დისკუსია, რომელსაც მოწვეული ექსპერტები და კინოფესტივალის ორგანიზატორები წარმართავენ. კინოფესტივალის მხარდამჭერები არიან არასამთავრობო ორგანიზაცია „ადამიანი გაჭირვებაში" და ამერიკის შეერთებული შტატების საელჩო საქართველოში. კინოსეანსებზე, რომელიც ექვს ნოემბერს დასრულდება დასწრება თავისუფალია.

იმერეთი. 31 ოქტომბერს, ქუთაისის №17 საჯარო სკოლაში სტუმრად იმყოფებოდნენ აშშ საერთაშორისო განვითარების სააგენტოს დემოკრატიისა და მმართველობის ოფისის დირექტორი  დანიელა რიფი და სამოქალაქო განათლებისა და პედაგოგთა გადამზადების პროგრამის დირექტორი, მარინა უშვერიძე.  იმერეთის  რეგიონის სასკოლო სამოქალაქო კლუბების  წევრებმა სტუმრებს  კლუბების საქმიანობის პრეზენტაცია წარუდგინეს, ასევე ისაუბრეს პროგრამის მიმდინარეობის და წარმატებების შესახებ. შეხვედრის ბოლოს ქ-მა დანიელამ შეხვედრაზე მყოფ საზოგადოებას მიმართა, ისაუბრა  სამოქალაქო განათლების მნიშვნელობაზე და დამსწრეთა შეკითხვებსაც უპასუხა. შეხვედრას ესწრებოდნენ ქუთაისის საგანმანათლებლო რესურსცენტრის ხელმძღვანელი,  საჯარო სკოლის დირექტორები, სამოქალაქო განათლების პედაგოგები და მოსწავლეები. სრულად წყარო: civics.ge

აჭარა. ხანდაზმულ ქალთა ასოციაციის ინიციატივით იმართება სემინარების ციკლი „მამაკაცური საუბრები გენდერული ძალადობის შესახებ". ერთ–ერთი ბოლო სემინარის დროს განხილული იყო გენდერული თანასწორობის სხვადასხვა  ასპექტები,   დისკრიმინაცია გენდერული ნიშნით, ტრადიციული გენდერული როლები, სტერეოტიპები  და სხვა. სემინარი  მიზნად ისახავს  გენდერული თანასწორობის  უზრუნველყოფისა  და   გენდერული ძალადობის დაძლევის პროცესში მამაკაცების  ჩართულობის სტიმულირებას. სემინარები პროექტის ,,ხანდაზმულთა სოციალური ცენტრის" ფარგლებში ტარდება და მასში მონაწილეობას  სხვადასხვა ასაკის და პროფესიის მამაკაცები იღებენ, თუმცა  სამიზნე ჯგუფს უპირატესად ახალგაზრდა მამაკაცები წარმოადგენენ. სრულად წყარო: awa.org.ge

სამეგრელო. ევროკავშირის სადამკვირვებლო მისიის ორგანიზებით ზუგდიდის სამხატვრო გალერეაში, მისიის გორის ოფისის წევრის რეი კუპერის ფოტო გამოფენა მოეწყო. სადამკვირვებლო მისიის ზუგდიდის ოფისის ხელმძღვანელის მოვალეობის შემსრულებლის ჯეკ სტივენს ბორგის განცხადებით, ფოტოები გადაღებულია სამხრეთ ოსეთის ადმინისტრაციული საზღვრის გასწვრივ, თუმცა, მისივე თქმით, ასეთივე ფოტოების გადაღება შეიძლებოდა აფხაზეთის ადმინისტრაციულ საზღვართან. „პატრულირებისას ჩვენ ყურადღებას ვამახვილებთ ხალხზე და ასევე იმ მდგომარეობაზე, სადაც მათ ცხოვრება უწევთ. ფოტოგამოფენის ავტორის რეი კუპერის მიერ გადაღებული ფოტოები სახელწოდებით, „სიცოცხლე ხაზის გასწვრივ" ასახავს ევროკავშირის სადამკვირვებლო მისიის ყოველდღიურ საქმიანობას" – აღნიშნა ჯეკ სტივენს ბორგმა. ფოტოგრაფ რეი კუპერის თქმით, ადმინისტრაციული საზღვრის ორივე მხარეს ადამიანური სახეები ერთნაირია, თუმცა მას გადაღების შესაძლებლობა მხოლოდ თბილისის მიერ კონტროლირებად ტერიტორიაზე ჰქონდა. „გადასვლის უფლება რომ მქონოდა, დარწმუნებული ვარ ასეთივე ადამიანების პორტრეტებს გადავიღებდი" – განაცხადა ფოტოგრაფმა. 

სამცხე–ჯავახეთი. 1 ნოემბერს, სოციალურ ქსელში (facebook) ახალციხის მუნიციპალიტეტის ოფიციალურ გვერდზე, პროექტ ,,გამჭირვალე თვითმმართველობის" ფარგლებში  მორიგი ონლაინ–კონფერენცია გაიმართა. მოსახლეობის შეკითხვებს  საკრებულოს თავმჯდომარის მოადგილემ, მალხაზ ასპანიძემ უპასუხა. შეკითხვები შეეხებოდა სანიაღვრე არხების, სასმელი წყლის, ლიფტის, სპორტული მოედნების მოწყობას და კერძო საკუთრების საკითხებს. კონფერენცია დიდი აქტივობის ფონზე მიმდინარეობდა. მასში ჩაერთო  როგორც სოფლის, ასევე ქალაქის მაცხოვრებლები.   პროექტი „გამჭვირვალე თვითმმართველობა" ხორციელდება არასამთავრობო ორგანიზაცია „დემოკრატ მესხთა კავშირის" მიერ. მისი მიზანია გააადვილოს  თანამშრომლობა თვითმმართველობის წარმომადგენლებსა და მოსახლეობას შორის.

სამცხე–ჯავახეთი.  31 ოქტომბერს ახალციხის მუნიციპალიტეტის სოფელ სხვილისის საჯარო სკოლას სამართალდამცავი ორგანოს წარმომადგენლები სტუმრობდნენ. შეხვედრა შედგა ამავე სკოლის სამოქალაქო კლუბ „სამშობლოს" წევრების ინიციატივით. შეხვედრას სამოქალაქო განათლების პედაგოგი საგუმე ამბარცუმაინი უძღვებოდა, მთავარი თემა  „მოსწავლეთა უფლებები და მოვალეობები" იყო. აღნიშნულ საკითხებზე მოსწავლეებმა პრეზენტაცია მოაწყეს და შესაბამისი თემატიკის ნახატები შექმნეს.  შეხვედრა  საინტერესოდ წარიმართა. მოწვეული სამართალდამცავები  აქტიურად ჩაერთვნენ გამართულ დისკუსიაში, პასუხობდნენ მოსწავლეთა მიერ დასმულ კითხვებს. აღნიშნული შეხვედრა მიზნად ისახავდა მოსწავლეთა უფლებებისა და მოვალეობების გაცნობას, ასევე, ამ შეხვედრამ საშუალება მისცა მოსწავლეებს პასუხები მიეღოთ კომპეტენტური პირებისგან.

გურია. „ახალგაზრდა პედაგოგთა კავშირთან" არსებულ ხანდაზმულთა სახლში ახალი სტანდერტები ინერგება, ამ მიზნით მომუშავე პერსონალს ტრენინგები ჩაუტარდა ოკუპაციური თერაპიის საკითხებში.  ტრენინგის ფარგლებში განხილული იყო ისეთი საკითხები, როგორიცაა: ფიზიკური გარემოს შეფასება და მისი როლის განსაზღვრა  ხანდაზმულთა სახლში; ხანდაზმულების ფუნქციური უნარების შეფასება და მათი მნიშვნელობა ხანდაზმულთა კეთილდღეობის შენარჩუნებისთვის, რომელიც გულსიხმობს აქტიურ მოხუცებულობას; ჯგუფური შეხვედრები ხანდაზმულებთან თერაპიული მიზნით; ინდივიდუალური შეხვედრები ხანდაზმულებთან კმაყოფილების ხარისხის განსასაზღვრად; მომუშავე პერსონალთან შეხვედრა და განვითარების გეგმებზე მუშაობა; განვითარების გეგმების მონიტორინგი; ჯგუფური თერაპიული შეხვედრა მომუშავე პერსონალთან; დღის აქტივობის  გაწერა, იმ აქტივობების გათვალისწინებით, რომელიც გულისხმობს ხანდაზმულთა ინტერესებს და შესაძლებლობებს; რეკომენდაციების შემუშავება და მოდელირებითი სწავლება მომუშავე პერსონალისთვის, რომელიც ასევე გულისხმობს ხანდაზმულთა კეთილდღეობის ხარისხის და ზრდას პროფესიონალურ ჭრილში; ახალი სამუშაო მიზნების დასახვა და დავალებების გაცემა მომუშავე პერსონალისთვის.

შიდა ქართლი. 30 ოქტომბერს საზოგადოება ,,ბილიკში" რეზო ოქრუაშვილთან გაიმართა შეხვედრა. რეზო ოქრუაშვილი გორის მუნიციპალიტეტთან არსებული საზოგადოებრივი დარბაზის და ახლად შექმნილი სამოქალაქო გაერთიანების „გორის დარბაზის" წევრიცაა.  შეხვედრაზე მან მოზარდებს მიაწოდა ინფორმაცია, თუ რას საქმიანობს საზოგადოებრივი დარბაზი, რა ფორმით შეუძლიათ ითანამშრომლონ მათთან და წარუდგინონ ინიციატივები.   შეხვედრა სამოქალაქო განათლებისა და პედაგოგთა გადამზადების პროგრამის (USAID / PH International) მოეწყო და მისი მიზანი სამოქალაქო საზოგადოებოს როლზე დიალოგი და გამოცდილების გაზიარება იყო. სრულად წყარო: ორგანიზაცია „ბილიკის" ოფიციალური გვერდი სოციალურ ქსელში

სამცხე–ჯავახეთი. ორგანიზაციის ახალციხის ახალგაზრდული ცენტრის ორგანიზებით ასპინძის მუნიციპალიტეტის  დამალის  საჯარო სკოლის საინიციატივო ჯგუფს ჩაუტარდა ტრენინიგი მცირე გრანტების პროგრამის ფარგლებში.  ტრენინგს უძღვებოდა მცირე გრანტების პროგრამის კოორდინატორი მეგი ბერიძე. ტრენინგის მიზანი იყო საინიციატივო ჯგუფისათვის იმ უნარ–ჩვევების შეძენა, რომელიც გაუადვილებს მათ სააპლიკაციო ფორმის ონლაინ რეჟიმში შევსებას, ბიუჯეტის, განხორციელების გეგმისა და თანადაფინანსების დოკუმენტაციის  მომზადებას.

იმერეთი. 1 ნოემბერს, სამოქალაქო განათლებისა და პედაგოგთა გადამზადების პროგრამის პროექტის სამიზნე სკოლების სამოქალაქო კლუბებისათვის ჩატარდა ტრენინგი თემაზე: „სამოქალაქო კლუბების მენეჯმენტი". ტრენინგს უძღვებოდა ქუთაისის განათლების განვითარების და დასაქმების ცენტრის დირექტორი. შეხვედრას 35 მოსწავლე ესწრებოდა.   სრულად წყარო: kedec.ge

თბილისი. 31 ოქტომბერს რუსთავის #16 დაწესებულებაში ,,საქართველოს ახალგაზრდა იურისტთა ასოციაციის", ,,წამების მსხვერპლთა ფსიქო–სოციალური და სამედიცინო რეაბილიტაციის ცენტრის" (GCRT) და ,,ციხის საერთაშორისო რეფორმის" წარმომადგენლები შევიდნენ.  ისინი შეხვდნენ და გაესაუბრნენ დაწესებულების დირექტორს, სამარტოო საკანში მოთავსებულ პატიმრებს, ,,ა", ,,ბ" და ,,გ" კორპუსებში განთავსებულ მსჯავრდებულებს, აგრეთვე დაწესებულების შესასვლელთან შეკრებილ პატიმართა ოჯახის წევრებს. ,,დაწესებულებაში სიმშვიდეა, პატიმრები უარყოფენ მათი მხრიდან რაიმე სახის არეულობის მცდელობას.  ვიზიტისას შიმშილობდა სამარტოო საკანში მოთავსებული ორი პატიმარი და აგრეთვე მათი თანამოსაკნე რამდენიმე მსჯავრდებული ,,ა" კორპუსზე (...) მათი ძირითადი მოთხოვნა უკავშირდება დირექტორისა და იმ ძველი თანამშრომლების დათხოვნას, რომლებიც ახორციელებდნენ არაადამიანურ მოპყრობას პატიმართა მიმართ, აგრეთვე გარკვეული სახის უკანონო შეზღუდვების დაწესებას ადმინისტრაციის მხრიდან" - ნათქვამია ორგანიზაციების მიერ გავრცელებულ განცხადებაში განცხადება წყარო: gyla.ge

თბილისი. ფონდ „ღია საზოგადოება – საქართველოს" ოფისში პროფესორმა მარგარეტ ლინჩმა ლექცია გამართა ბავშვზე ძალადობის საკითხებზე. შეხვედრას ესწრებოდნენ სკოლის პედაგოგები და განათლების სპეციალისტები. პროფესორმა ლინჩმა ისაუბრა მოზარდებზე ძალადობის სხვადსხვა ფორმებსა და მათ უგულვებელყოფასა თუ ექსპლოატაციაზე. შეხვედრაზე აღინიშნა, რომ ბავშვზე ძალადობის თავიდან არიდების საქმეში მნიშვნელოვანი როლი მასწავლებელს ენიჭება, თუმცა აუცილებელია ამ საკითხის მიმართ განხორციელდეს კომპლექსური მიდგომა და მასში ჩაერთნონ არამარტო სკოლის, არამედ სამედიცინო დაწესებულებების, სოციალური მომსახურების სააგენტოების, პოლიციის დეპარტამენტებისა და საზოგადოების სხვა წარმომადგენლები.  პროფესორმა ლექციის მონაწილეებს მსგავსი მულტიდისციპლინარული საქმიანობის წარმატებული მაგალითებიც გაუზიარა. ლექცია ფონდ „ღია საზოგადოება - საქართველოს" და ქსელური პროგრამის „აღმოსავლეთი - აღმოსავლეთის საზღვრებს გარეშე" ხელშეწყობით ჩატარდა სრულად წყარო: osgf.ge

3 ნოემბერს, 14:00 საათზე, ოზურგეთის დემოკრატიული ჩართულობის ცენტრში ნაჩვენები იქნება ლევან კოღუაშვილის დოკუმენტური ფილმი „ქალები საქართველოდან". ჩვენების შემდეგ გაიმართება დისკუსია, რომელშიც მონაწილეობას მიიღებენ ემიგრაციიდან დაბრუნებული და საზღვარგარეთ სამუშაოს საძიებლად წასვლის  მსურველი მოქალაქეები. მისამართი: ოზურგეთი, ჭავჭავაძის ქუჩა #14

2 ნოემბერს, 16:30 საათზე, ,,ევრაზიის თანამშრომლობის ფონდი" მართავს დისკუსიას თემაზე: ,,სამოქალაქო საზოგადოების როლი პოლიტიკური ტრანსფორმაციის პროცესში". ღონისძიება ეძღვნება ევრაზიის თანამშრომლობის ფონდის, როგორც ადგილობრივი ორგანიზაციის, საქმიანობის 5 წლისთავს. მისამართი: თბილისი, სასტუმრო,,შერატონ მეტეხი პალასი", დარბაზი ,,სალხინო".

თბილისი. 31 ოქტომბერს საქართველოს მცირე და საშუალო საწარმოთა ასოციაციამ გამართა ჰოლანდიური პროგრამების პრეზენტაცია. ეს პროგრამები ეხმარება ქართულ კომპანიებს ჰოლანდიაში პარტნიორის მოძიებაში და ასევე ითვალისწინებს ერთობლივი საწარმოების გრანტის სახით დაფინანსებას. შეხვედრაზე ასევე გაიმართა საქართველოს ტექნოლოგიური გადაცემის ცენტრის ინოვაციების კონკურსის პრეზენტაცია, რომელიც ითვალისწინებს კონკურსში გამარჯვებული 5 კომპანიიდან თითოეულისთვის დაფინანსებას მაქსიმუმ 20 000 ლარის ფარგლებში და უსასყიდლო საექსპერტო მხარდაჭერას საქართველოს ტექნოლიგიური ცენტრისგან.  სრულად წყარო: gsmea.ge

იმერეთი. 31 ოქტომბერს,   დემოკრატიული ჩართულობის ცენტრში შეზღუდული შესაძლებლობების მქონე  პირთა უფლებებით დაინტერესებულ ორგანიზაციათა ქსელური შეხვედრა  გაიმართა. შეხვედრის მიზანს წარმოადგენდა  იმ პრობლემების  განხილვა, რომელიც ქალაქში  მცხოვრებ  შეზღუდული შესაძლებლობების მქონე პირებს აწუხებთ, მათი გადაჭრის გზების მოძიება  და პრობლემების მოგვარებაში კერძო სექტორის გააქტიურება.  ქსელური შეხვედრას ორგანიზება ქუთაისის განათლების განვითარების და დასაქმების ცენტრმა  და საქართველოს ახალგაზრდა იურისტთა ასოციაციის ქუთაისის ფილიალმა გაუწია ერთობლივი პროექტის: ’’თანაბარი შესაძლებლობები შეზღუდული შესაძლებლობების მქონე პირებისათვის’’ ფარგლებში.  პროექტის მიზანია შეზღუდული შესაძლებლობების მქონე პირების თანაბარი შესაძლებლობებით უზრუნველყოფა, მათი უფლებების დაცვა, პროპაგანდა და მონიტორინგი, პროექტის  ფინანსური  მხარდამჭერია   ფონდი ,,ღია საზოგადოება - საქართველო’’. შეხვედრას ესწრებოდა  ადგილობრივი ხელისუფლების, არასამთავრობო ორგანიზაციების და მედიის წარმომადგენლები. სრულად წყარო: kedec.ge