გაეცანი კვლევას, რომელიც ჰაინრიჰ ბიოლის ფონდის მხარდაჭერით ორგანიზაციამ „ჩვენ ვიკვლევთ“ ჩაატარა კვლევა, რომლის თანახმადაც ახალგაზრდების უმეტესობა ნეგატიურად აფასებს საბჭოთა კავშირს. ამ ეპოქაზე საუბრისას ხშირად იყენებს ისეთ სიტყვებს, როგორიცაა: „დამახინჯებული აზროვნება“, „თავისუფალი აზრის შეზღუდვა“, „მოქალაქის პირადი თავისუფლების შეზღუდვა“, „არანორმალური რეჟიმი“, „მარწუხი“, „ბოროტების იმპერია“, „სტაგნაცია“ და სხვა.  ეს ყოველივე ნათქვამია კვლევაში, რომელიც ახალგაზრდების ისტორიის სწავლებისადმი დამოკიდებულებას ასახავს. კვლევამ, ასევე შეისწავლა სხვადასხვა ისტორიული ეპოქის თუ მოვლენის მიმართ ახალგაზრდების დამოკიდებულება, მათ შორის საბჭოთა კავშირის მიმართაც:  „ყველანაირ ცუდთან ასოცირდება საბჭოთა კავშირი, თვითონ ადამიანების ფსიქოლოგიურ წნეხთან, ეკონომიკურ გაჭირვებასთან. ყველაფერი ცუდი, რაც შეიძლება მომხდარიყო და მოხდა საქართველოს ისტორიაში, საბჭოთა კავშირს უკავშირდება“.  „ჩემთვის საბჭოთა კავშირი არის რუსეთის ბატონობის ხანა, იმიტომ, რომ ამ დროს საქართველოსა და სხვა ქვეყნებში რუსული იმპერია ბატონობდა, ყველაფერი რუსულენოვანი იყო და ამიტომ ნიშნავს რუსეთის ბატონობას ჩემთვის“ გამოკითხვამ აჩვენა, რომ ახალგაზრდებს ძირითადად ნეგატიური დამოკიდებულება აქვთ საბჭოთა კავშირის მიმართ. მათი პასუხებისა და დამოკიდებულებების მიხედვით იგი იყო:   სახელმწიფო, სადაც ირღვეოდა ადამიანის უფლებები (68%)  სახელმწიფო, რომელმაც გამოიწვია საქართველოს განვითარების შეფერხება (59%)  სახელმწიფო, რომელიც იყო არადემოკრატიული (61%) სახელმწიფო, სადაც ხდებოდა რეპრესიები (62%)  კვლევის მონაწილეთა 42% არ ეთანხმება მოსაზრებას, რომ სსრკ დაეხმარა საქართველოს ეკონომიკის განვითარებაში, ასევე 39% არ იზიარებს მოსაზრებას, რომ სსრკ–ის ფარგლბში თავისუფლად შეიძლებოდა მოგზაურობა. კვლევა: „საქართველოს ახალგაზრდობა და ისტორია“ კვლევა „საქართველოს ახალგაზრდობა და ისტორია“ 2021 წელს ჩატარდა და მისი მიზანი ისტორიისა და მისი სწავლების მიმართ ახალგაზრდების დამოკიდებულების შესწავლა იყო. „ჩვენ ვიკვლევთ“, ასე ჰქვია ორგანიზაციას, რომელმაც ჰაინრიჰ ბიოლის ფონდის მხარდაჭერით, საქართველოს მასშტაბით გამოიკითხა საჯარო სკოლის 9-12 კლასის 4366 მოსწავლე. ასევე გამართა 12 ფოკუს–ჯგუფი მასწავლებლებთან, მოსწავლეებთან და სტუდენტებთან, 8 პირისპირ ინტერვიუ – სფეროს ექსპერტებთან

"ჩვენს ქვეყანაში, ეკონომიკური მდგომარეობიდან გამომდინარე, ხშირად ადამიანებს ყოველდღიურ სარჩოზე ზრუნვა უწევთ, რაც მათ მთლიან დროსა და ენერგიას ჭამს, ამიტომ დაავალდებულო ადამიანი, რომ იყოს აქტიური მოქალაქე - ცოტა უხერხულია...  მაგრამ სადღაციდან ხომ უნდა დავიწყოთ, არა?"  მოუსმინე აქტივისტი ეთო არსანიძის პოდკასტს სამოქალაქო პასუხისმგებლობის შესახებ.  #გაიზიარეპასუხისმგებლობა, რადგან #ესქვეყანაშენია

"გვეყო მოსკოვ-პეტროგრადში გაცხრილული ევროპული კულტურით კვება, რომელსაც უფრო მეტი მონღოლური შხამი ურევია, ვიდრე დასავლეთის წმინდა სასმელი" – მიხეილ ჯავახიშვილი. #გაიზიარეპასუხისმგებლობა, რადგან #ესქვეყანაშენია

ყველაფერი მეგობრების მიერ ლაშქრობებში წაღებული რამდენიმე წიგნით დაიწყო, რომელთაც ადგილობრივ ბავშვებს უტოვებდნენ. მაღალმთიან რეგიონებში მოგზაურობისას აღმოაჩინეს, რომ თანამედროვე ლიტერატურა ნაკლებად ხელმისაწვდომი იყო ბავშვებისთვის. ბევრ რაიონულ ცენტრში საერთოდ არ იყო წიგნის მაღაზია, ბიბლიოთეკებში კი სიძველისგან გაცრეცილი წიგნები ბავშვებს კითხვის ჟინს უკარგავდა. მეგობრებმა გადაწყვიტეს, რომ რამდენიმე წიგნის წაღების ნაცვლად, უფრო მასშტაბური საქმიანობა წამოეწყოთ – ასე შეიქმნა მთიელი წიგნები. ოთხი მეგობრის – გიორგის, ლევანის, ნათიასა და მარიამის წამოწყება თანდათან გაფართოვდა. ბევრ ერთგულ მხარდამჭერთან ერთად სვანეთში, ლეჩხუმსა და ახმეტაში მცხოვრებ 700–მდე ბავშვს და 30–მდე მცირეკონტინგენტიან სკოლას თანამედროვე გამოცემები გადასცეს.  ბავშვებმა კი „მთიელ წიგნებს“ უამრავი ემოციური სტრიქონი დაუბრუნეს: „ბავშვები მეკითხებოდნენ, მართლა რაც გვინდა იმ წიგნს მოგვცემენო, თანაც პირადადო? ვპასუხობდი, მგონი ასე იქნება–მეთქი. დაუჯერებელია ეს ამბავი, დიდი მადლობა წიგნებისთვის, ძალიან გაუხარდათ ბავშვებს...“  „საღამო მშვიდობისა... წიგნი მეორე დღესვე დავასრულე, ბოდიში, განხილვის მოწერა რომ დამაგვიანდა. მადლობა, ეს წიგნი რომ ჩემამდე მოვიდა... უზომოდ მომეწონა... თითქოს კითხვის დროს იქ ვიდექი და სიუჟეტი ჩემს თვალწინ ვითარდებოდა... თქვენი დამსახურებით კიდევ ერთ საუკეთესო დეტექტივს გავეცანი“  „წიგნი ისეთი საინტერესო იყო, საკითხავად რომ ვჯდებოდი, თავის დანებება აღარ მინდოდა, მადლობა“ ბავშვების ემოციები გრძელვადიანი საქმიანობისთვის კარგ მოტივატორად იქცა.  გეგმავენ, რომ საქართველოს მთიანი რეგიონები და მიმდებარე სოფლები სრულად მოიცვან და ახალი კამპანია „დაუბრუნე წიგნი მთას“ დაიწყეს. ამ მიზნით არასამთავრობო ორგანიზაცია „ორბელიანი საქართველოს" „ქრაუდფანდინგის“ პროგრამაში იღებენ მონაწილეობას. ეს თანხის მოძიების თანამედროვე გზაა საზოგადოების, საერთაშორისო თუ ადგილობრივი არასამთავრობო ორგანიზაციების დახმარებით.  ზუსტად ახლა კი, რაჭის მაღალმთიანი სოფლებისთვის ემზადებიან. ბავშვების გამოკითხვის შემდგომ სასურველი წიგნების სიაც მზად არის და 300–მდე ბავშვისთვის წიგნების შეგროვებაც დაიწყეს.

„მობრძანდით "ცოდნის კაფეში“, თქვენ გელით სითბო და სიყვარული, გარემო, სადაც ნიჭის და შესაძლებლობების გამოვლენის შანსი გაქვთ“ – სულ ცოტა ხნის წინ ასე შეხვდნენ „ცოდნის კაფეს“ 60+ კლუბელები ახალ წევრებს. თავდაპირველად „ცოდნის კაფემ“ ახალგაზრდებისთვის დაიწყო მუშაობა. ერთ დღესაც ფილმის საყურებლად დაპატიჟეს 60 წელს გადაცილებული მეზობელი წნორელები, ფილმსაც ერთად უყურეს, დისკუსიაც გამართეს. იმ დღიდან ბევრი რამ შეიცვალა – გაჩნდა ახალი პროგრამები და ახალგაზრდებთან ერთად, უფროსი თაობის ადამიანებმაც მოუხშირეს „ცოდნის კაფეში“ სიარულს. "არ არსებობს ხანდაზმულთა უწყვეტი განათლების, რესოციალიზაციის, გასართობ– შემეცნებითი პროგრამები ქვეყანაში“, – ამბობს „ცოდნის კაფეს“ დამფუძნებელი ნანა ბაგალიშვილი. ის და მისი თანაგუნდელები მიიჩნევენ, რომ ხანდაზმულებს გამოცდილებისა და შესაძლებლობების გარდა, დიდი სურვილი აქვთ რომ კვლავ განვითარდნენ, გაიგონ სიახლე, გაიცნონ ახალი ადამიანები და ნაყოფიერად გაატარონ დრო. ისინი ცდილობენ ადგილობრივ თუ ცენტრალურ ხელისუფლებას და მთლიანად საზოგადოებას დაანახონ ხანდაზმულთათვის კულტურულ–საგანმანათლებრო სერვისების შექმნის აუცილებლობა.  „...ხან მინდორში, ხან ბაღებში დავდივარ, ხან ნესვს ვრგავ, რთველში დავდივარ, რა გამოლევს მინდორში საქმეს, გაზაფხულიდან დაწყებული, რთვლობამდე, ერთი დღე მოსვენება არ გვაქვს, სულ ვმუშაობთ. ... „ცოდნის კაფე” ჩემთვის სულიერი საზრდოს ადგილია, დაღლილ-დაქანცული რომ მოვდივარ სამუშაოდან, „ცოდნის კაფეში” სულ ისეთი შეხვედრები გვაქვს, განვიტვირთები ხოლმე“, ამბობს კლუბის ერთ–ერთი წევრი.  „ცოდნის კაფეში“ უამრავი სხვადასხვა პროგრამა შეიქმნა მათთვის – ლექციები და დისკუსიები ჯანდაცვაზე, სხვადასხვა ქვეყნის ტრადიციებსა და კულტურაზე, ხელსაქმის კლუბი და სამაგიდო თამაშები, კულტურული ტურები საქართველოს სხვადასხვა კუთხეში. ისინი დიდი რუდუნებით ელოდებიან დღესასწაულებსა და წვეულებებსაც. 2023 წლისთვის 50–მდე ხანდაზმული მიიღებს მონაწილეობას 60+ კლუბის საქმიანობაში. „გამოცდილებამ აჩვენა, რომ ხანდაზმული ადამიანების საზოგადოებრივ ცხოვრებაში ჩართვა არასოდეს არის გვიან“,– ამბობს ნანა ბაგალიშვილი.  „ცოდნის კაფე“ სოციალური საწარმოა, რომელიც არასამთავრობო ორგანიზაციის „სამოქალაქო ინიციატივის“ მიერ 2016 წელს დაფუძნდა. ეს არის უნიკალური სივრცე, სადაც შესაძლებელია კულტურულ–საგანმანათლებლო და გასართობი ღონისძიებების გამართვა ყველა ასაკის ადამიანისთვის. საზოგადოების ნებისმიერ წევრს შეუძლია პროგრამების განვითარებასა და ცვლილებების მხარდაჭერა.  გახდი თანაშემქმნელი! #გაიზიარეპასუხისმგებლობა, რადგან #ესქვეყანაშენია

დღეს მოხალისე მასწავლებლებისა და სხვადასხვა რეგიონში მცხოვრები მოსწავლეების ამბავს მოგიყვებით. ეკონომიკური საერთაშორისო სკოლის (ISET) სტუდენტები და კურსდამთავრებულები, აშშ–ის მომავალ ლიდერთა გაცვლითი პროგრამის (FLEX) მონაწილეებთან ერთად კვირაში რამდენიმე საათის განმავლობაში უზიარებენ თავიანთ ცოდნასა და გამოცდილებას მათ, ვისაც ეს ყველაზე მეტად სჭირდებათ. ისინი პროექტ ხიდის საშუალებით მათემატიკის, ინგლისური და ქართული ენების ონლაინ გაკვეთილებზე ხვდებიან. მოსწავლეები თუ კონკრეტულ საგნებში იმაღლებენ ცოდნას და ეროვნული გამოცდებისთვის ემზადებიან, მოხალისე მასწავლებლები საქარათველოს იმ კუთხის შესახებ იღებენ დეტალურ ინფორმაციას, რომელშიც მათი მოსწავლეები ცხოვრობენ. ორმხრივად ცოდნის გაზიარება კი ახალი მეგობრების შეძენით სრულდება. ციფრული კავშირი „ხიდი“, არასამთავრობო ორგანიზაციის "მაკ-ჯორჯიას" ბევრ საინტერესო პროექტს შორს ერთ–ერთია და, როგორც პროექტები „მესტუმრე“, „შუქი მოვიდა“, „მშობელთა სკივრი“ და ა.შ., ცდილობს მრავალ რესურსზე თანაბარი წვდომა მისცეს სხვადასხვა სოციალურ ჯგუფს. პროექტის იდეა რამდენიმე წლის წინ გაჩნდა, თუმცა ონლაინ ფორმატი პანდემიის დროს შეიქმნა, „ბევრი ეჭვობდა, რომ „ხიდი“ ვერ იმუშავებდა, რადგან ის მოხალისე მასწავლებლების მოტივაციას ეყრდნობოდა“, ამბობს პროექტ “ხიდის” დამფუძნებელი ემი სევიმლი. დრომ აჩვენა, რომ ინიციატივა წარმატებით მუშაობს – პროექტი 7 მოხალისე მასწავლებლის მონაწილეობით დაიწყო, წელს კი 50–მდე მოხალისე მასწავლებელი საკუთარი სურვილით დაუთმობს დროს და გაუზიარებს ცოდნას 70–მდე საშუალო სკოლის მოსწავლეს. „სასიამოვნოა, როცა უყურებ სკოლის მოსწავლეებისა და უმაღლესი სასწავლებლის სტუდენტების შეხვედრებს, უყურებ მათ ენთუზიაზმს და ერთობლივი საქმიანობის შედეგს: მიღებულ ცოდნასა და აკადემიურ ქულებს, მეგობრულ ურთიერთობას, რომელიც საქართველოს სხვადასხვა კუთხეში მცხოვრებ ადამიანებს შორის ყალიბდება“, ამბობს ემი სევიმლი.

გაეცანით მოსახლეობის განწყობებს და მათ მიერ დასახელებულ პრობლემებს ეროვნულ დემოკრატიული ინსტიტუტის (NDI) კვლევის მიხედვით. საქართველოს მოსახლეობის მიერ დასახელებული ეროვნული და ადგილობრივი დონის გამოწვევები:  • ეროვნულ დემოკრატიული ინსტიტუტის (NDI) ბოლო კვლევის მიხედვით საქართველოს მოსახლეობამ სამუშაო ადგილები, ფასების ზრდა და სიღარიბე კვლავ ყველაზე მნიშვნელოვან ეროვნულ საკითხებად დაასახელა.  • კვლევა გვიჩვენებს, რომ მოსახლეობის აზრით, ბოლო 10 წლის მანძილზე, ტერიტორიულ მთლიანობასთან, სიღარიბესთან და კრიმინალთან დაკავშირებით სიტუაცია გაუარესებულია.  • კვლევის მიხედვით, 2018 წელთან შედარებით ნაკლები ადამიანი ფიქრობს, რომ ჯანდაცვის ხელმისაწვდომობის და სიტყვის თავისუფლების ირგვლივ მდგომარეობა გაუმჯობესდა.  • მოსახლეობამ ერთ–ერთ მთავარ გამოწვევად დაასახელა განათლების დაბალი ხარისხი, ონლაინ სწავლებასთან დაკავშირებული სირთულეები.  • მოსახლეობა წამლების საფასურს დიდ გამოწვევად მიიჩნევს.  • დედაქალაქის მოსახლეობას სოციალური საკითხებიდან ყველაზე მეტად გზების სისუფთავე, კომუნალური გადასახადები და უსახლკარო ცხოვლები აწუხებს.  • რეგიონებში მნიშვნელოვან სოციალურ საკითხებად წყლის მომარაგება, კანალიზაცია და გზები დასახელდა.  გაეცანით ეროვნულ დემოკრატიული ინსტიტუტის (NDI) კვლევას სრულად და გაიგეთ მეტი რას ფიქრობს საქართველოს მოსახლეობა. 

იცით, რომ საქართველოში ჯერ ისევ საბჭოთა კავშირის დროს მიღებული ადმინისტრაციულ სამართალდარღვევათა კოდექსი მოქმედებს? საიას ინფორმაციით, სწორედ ამ კოდექსით ხდება ასობით მოქალაქის საქმის განხილვა. ადმინისტრაციულ სამართალდარღვევათა კოდექსი 1984 წელს მიიღო საქართველოს საბჭოთა სოციალისტური რესპუბლიკის უმაღლესმა საბჭომ და მისი რამდენიმე მუხლი საქართველოს მოქმედ კონსტიტუციასთან და ადამიანის ფუნდამენტურ უფლებებთან წინააღმდეგობაში მოდის. დროთა განმავლობაში კოდექსში ცვლილებები შედიოდა, ემატებოდა–აკლდებოდა მუხლები, იზრდებოდა ჯარიმები, თუმცა კოდექსის რეფორმის საკითხი კვლავ ღიაა. საქართველოს ახალგაზრდა იურისტთა ასოციაციის ინფორმაციით მოქმედი ადმინისტრაციულ სამართალდარღვევათა კოდექსი ყოველდღიურად არღვევს ადამიანის ფუნდამენტურ უფლებებს: • კოდექსი ცალკეული სამართალდარღვევისთვის ითვალისწინებს მძიმე სახდელებს, მათ შორის ადმინისტრაციულ პატიმრობას, თუმცა ნაკლებ პროცედურულ გარანტიებს აწესებს, სისხლის სამართლის დანაშაულის ჩადენაში ბრალდებულ პირებთან შედარებით; • ბრალმდებლის მხარის არარსებობა, სისხლისსამართლებრივი ბუნების სამართალდარღვევების განხილვისას, ლახავს სასამართლოს მიუკერძოებლობის და დამოუკიდებლობის პრინციპს, რადგან, რეალურად, მოსამართლე ითავსებს ბრალმდებლის ფუნქციას; • კოდექსი არ ითვალისწინებს უდანაშაულობის პრეზუმფციის მოთხოვნებს; • არსებული კანონმდებლობა ადმინისტრაციულ პასუხისგებაში მიცემულ პირს ავალდებულებს, წარადგინოს მტკიცებულებები და დაამტკიცოს, რომ ადმინისტრაციული სამართალდარღვევა მას არ ჩაუდენია; • სამართალდარღვევის საქმის განმხილველი მოსამართლე არ ამოწმებს დაკავების კანონიერებას. დაკავების კანონიერების თაობაზე დავის არსებული მექანიზმი არაეფექტიანი და კონსტიტუციასთან შეუსაბამოა; • საქმის განმხილველი მოსამართლე არ ამოწმებს პოლიციელის მოთხოვნის კანონიერების საკითხს. გაიგე მეტი საიას პუბლიკაციიდან: https://bit.ly/3sb4JTf

“ფეხბურთი სოციალური მოვლენაა და მისი გამიჯვნა პოლიტიკისგან დილეტანტიზმი და შეცდომა", ამბობს ისტორიკოსი დავით ჯიშკარიანი. იგი საბჭოთა რეალობაში აღმოცენებულ ფეხბურთსა და ჩეკისტ ფეხბურთელებზე გვიყვება.

ფიქრია ბარამიძე – 25 წლის ახალგაზრდა გურიიდან. იგი ხშირად ამბობს, რომ ბევრი სტერეოტიპი დაამსხვრია – ჯანმრთელობის მდგომარეობის მიუხედავად ისწავლა, ცხოვრობს და მუშაობს დამოუკიდებლად. საკუთარი თავი სხვანაირად ვერც კი წარმოუდგენია. ამაყია, რომ საზოგადოებას აზრი შეაცვლევინა, რადგან უარი თქვა შშმ პირებისთვის საჭირო სერვისებით სარგებლობაზე. მაგალითად დამხმარე ასისტენტზე, ეროვნულ გამოცდებზე გამარტივებულ ტესტებზე, გამცილებელზე... საერთაშორისო და საზოგადოებრივ ორგანიზაციებთან თანამშრომლობამ ახალი შესაძლებლობები დაანახა, რაც ფიქრიასთვის მოტივაცია აღმოჩნდა, რათა დაეწყო ზრუნვა და მუშაობა შშმ პირების უფლებების დასაცავად. „ჩემი მიზანია, შეზღუდული შესაძლებლობის მქონე ადამიანები გავაძლიერო, რათა მონაწილეობა მიიღონ საზოგადოებრივ ცხოვრებაში და ბარიერების მიუხედავად, დაიმკვიდრონ თავი“. ფიქრია ფიქრობს, რომ მათი მონაწილეობა გადაწყვეტილების მიღების პროცესში მნიშვნელოვანია ხელმისაწვდომი და თანაბარი გარემოს შესაქმნელად. ფიქრია 2020 წლიდან იცავს შშმ პირების უფლებებს და დღეს ოზურგეთის დამოუკიდებელი ცხოვრების ცენტრს ხელმძღვანელობს.

მას შემდეგ, რაც რუსეთი უკრაინაში შეიჭრა, საქართველოს საზღვარი რუსეთის მრავალმა მოქალაქემ გადმოლახა. რას ნიშნავს ქვეყნის ეკონომიკისთვის ამ ადამიანებისა და მათი ბიზნესების შემოდინება? არის თუ არა პროცესი ქვეყნისთვის საფრთხის შემცველი? საზოგადოებრივი ორგანიზაციები პროცესებს სწავლობენ და აკვირდებიან გაიგე მათი დაკვირვების შედეგები. უკრაინაში რუსეთის შეჭრის შემდგომ საქართველოში რუსი ვიზიტორების შემოსვლის ტემპი გაიზარდა. საქართველოს ბანკებში მათი ფინანსების სტატისტიკა ასეთია:  2022 წლის აგვისტოს მდგომარეობით რუსეთის მოქალაქეების მიერ საქართველოს კომერციულ ბანკებში განთავსებული დეპოზიტები შეადგენს 1,88 მილიარდ ლარს;  რუსეთ-უკრაინის ომის დაწყებიდან 31 აგვისტომდე საქართველოსკომერციულ ბანკებში ახალი ანგარიშები გახსნა რუსეთის 45,349 მოქალაქემ;  31 აგვისტოს მდგომარეობით კომერციულ ბანკებში აქტიური ანგარიშისმფლობელი რუსეთის მოქალაქეების რიცხვი დაახლოებით 60 ათასს აჭარბებს; წყარო: ინფორმაციის თავისუფლების გავრცელების ინსტიტუტის კვლევა https://bit.ly/3RIp1Oa საქართველოში შემოსული რუსული კომპანიების სტატისტიკა: საქართველოში სულ 13,500-მდე რუსული კომპანიაა რეგისტრირებული და მათი ნახევარი უკრაინაში ომის დაწყების შემდეგ დარეგისტრირდა;   მარტიდან დარეგისტრირებული კომპანიების 93% ინდივიდუალური საწარმოა. ეს იმას ნიშნავს, რომ რუსეთის მოქალაქეების ნაწილი საქართველოში საცხოვრებლად და ბიზნესის საკეთებლად გადმოვიდა;   2022 წლის იანვარ-ივნისში რუსეთიდან იმპორტი 51%-ით გაიზარდა და 706 მლნ აშშ დოლარი შეადგინა. რუსეთიდან იმპორტის წილი საქართველოს ჯამური იმპორტის 11.9% იყო, რაც ბოლო 15 წლის მაქსიმუმია; წყარო: საერთაშორისო გამჭვირვალობა – საქართველოს კვლევა https://transparency.ge რა გვასწავლა ოკუპანტ ქვეყანასთან მეზობლობამ:  საბჭოთა კავშირის დაშლის შემდეგ რუსეთმა არაერთხელ გამოიყენა ეკონომიკური ბერკეტი. მაგალითად 2006 წელს ბუნებრივი აირის და ელექტროენერგიის მიწოდება შეგვიწყვიტა, შემდეგ საქართველოდან პროდუქციის ექსპორტი ფაქტობრივად აკრძალა, იმავე წელს საქართველოს მოქალაქეების დეპორტაცია დაიწყო დეტალები... საქართველოში შემოსული რუსეთის მოქალაქეებისა და ბიზნესის კონტროლი, ქვეყნის ეროვნული უსაფრთხოების საკითხია. მცოცავი ოკუპაცია, რუსეთის ფედერაციის მიერ საქართველოში ჩადენილი ეთნიკური წმენდა, უკრაინაში მიმდინარე კონფლიქტი და რუსეთის ფედერაციის მიერ ხშირად გამოყენებული მიდგომა – საკუთარი მოქალაქეების ე.წ. დაცვის საბაბით, უცხო ქვეყანაში ინტერვენციასთან დაკავშირებით – საკმარის საფუძველს ქმნის სავიზო რეჟიმის დასაწესებლად. დეტალები...  გაზრდილი რუსული ექსპორტი, რუსეთის მოქალაქეებისა და ბიზნესის მასობრივი შემოდინება ოკუპანტი სახელმწიფოს მოქალაქეებს, თავისუფლად აძლევს შესაძლებლობას, ოკუპირებული საქართველოს გამოყენებით, თავი დააღწიონ რუსეთის ფედერაციის წინააღმდეგ დაწესებული სანქციების გამო შექმნილ რთულ ეკონომიკურ ვითარებას.  დეტალები... 

„ნეპოტიზმის და კრონიზმის ხელშემწყობი ფაქტორები სასამართლო სისტემაში“ გაიგეთ რას წერს „საქართველოს სასამართლოს გუშაგი“ 2022 წლის სექტემბერში გამოქვეყნებულ კვლევაში. მოქმედ და ყოფილ მოსამართლეებთან, ადვოკატებთან, ექსპერტებთან და აკადემიური წრეების წარმომადგენელთან ჩატარებულ სიღრმისეულ 30 ინტერვიუს, კანონმდებლობის და იუსტიციის უმაღლესი საბჭოს გადაწყვეტილებების ანალიზს ეფუძნება „სასამართლოს გუშაგის“ მიერ გამოქვეყნებული უახლესი კვლევა. კვლევაში მონაწილე რესპონდენტები მიიჩნევენ, რომ: ნეპოტიზმი და კრონიზმი სასამართლოებში სისტემური და მზარდია; იუსტიციის უმაღლესი საბჭოს წევრები მოსამართლეების შერჩევისას არაფორმალური კრიტერიუმებით ხელმძღვანელობენ. კერძოდ - ამოწმებენ, რამდენად ლოიალური, სანდო, მართვადი და პროგნოზირებადია კანდიდატი; საბჭოს წევრები „საკუთარ წრეში“ ეძებენ მოსამართლეობის მსურველებს, რომლებიც ამ კრიტერიუმებს აკმაყოფილებენ; სისტემა დახურულია გარე კადრებისთვის, რომლებსაც მფარველები არ ჰყავთ („სასამართლოში ქუჩიდან ვერ მოხვდები… რეკომენდატორი გჭირდება“); სასამართლო სისტემაში კარიერული წინსვლა დამოკიდებულია ლოიალურობის დემონსტრირებასა და მფარველის „წონაზე“; არსებული საკადრო პოლიტიკა მოსამართლეთა მცირე ჯგუფს სისტემის მართვის ბერკეტების მონოპოლიზების საშუალებას აძლევს. დამკვიდრებული პრაქტიკა უარყოფითად მოქმედებს ინდივიდუალური მოსამართლეების დამოუკიდებლობაზე, ასევე, ზოგადად, მართლმსაჯულების ხარისხსა და ეფექტიანობაზე. კვლევა - https://bit.ly/3RCSjxs