თბილისი. თბილისში გაიმართა ადამიანის უფლებების დაცვის საკითხებზე საქართველო-ევროკავშირის ყოველწლიური დიალოგის მეათე შეხვედრა. „ევროკავშირი და საქართველო მიესალმნენ საქართველოს მიერ ადამიანის უფლებების დაცვის მიმართულებით მიღწეულ შემდგომ პროგრესს. ევროკავშირმა ყურადღება გაამახვილა ეუთო-ს დემოკრატიული ინსტიტუტებისა და ადამიანის უფლებათა ოფისის ODIHR არჩევნების სადამკვირვებლო მისიის მხრიდან 2016 წლის ოქტომბრის საპარლამენტო არჩევნების დადებით ანგარიშზე, ამასთან, ხაზი გაუსვა (წინა)საარჩევნო ძალადობის ინცინდენტებთან დაკავშირებით ეფექტურ გამოძიებას. ასევე აღინიშნა უფასო საინფორმაციო დროისა და საარჩევნო კამპანიის დაფინანსების კუთხით თანაბარი პირობების უზრუნველყოფის შემდგომი გაუმჯობესების მნიშვნელობა", ნათქვამია ევროკავშირის ვებ-გვერდზე. სრულად... წყარო: eeas.europa.eu

თბილისი. სახალხო დამცველი ეხმაურება ჰომოფობიასა და ტრანსფობიასთან ბრძოლის საერთაშორისო დღეს და განცხადებას ავრცელებს. „იმედს ვიტოვებთ და მოვუწოდებთ შესაბამის ორგანოებს, რომ წარსული გამოცდილებისა და მიყენებული ზიანის პირობებში, ჰომოფობიასა და ტრანსფობიასთან ბრძოლის საერთაშორისო დღის აღნიშვნა მოხდება ძალადობის მოსალოდნელი საფრთხეების სწორი შეფასებისა და უსაფრთხოების წესების მაღალი დაცვით. ამასთან, მნიშვნელოვანია, საზოგადოების ცნობიერების ამაღლება ამ დღის აღნიშვნის არსისა და მნიშვნელობის შესახებ, საზოგადოებაში ლგბტი თემის მიმართ არსებული ჰომოფობიური წინასწარგანწყობების შესამცირებლად. სახალხო დამცველის რწმუნებულები 17 მაისს, მთელი დღის განმავლობაში დააკვირდებიან ქვეყანაში მიმდინარე მოვლენებს. საჭიროების შემთხვევაში მოსახლეობას შესაძლებლობა ექნებათ 24 საათის განმავლობაში დაუკავშირდნენ საქართველოს სახალხო დამცველის აპარატის ცხელ ხაზს ნომერზე 14–81", ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. ლგბტი აქტივისტებმა და მათმა მხარდამჭერებმა თბილისში, კანცელარიასთან ძალადობის წინააღმდეგ აქცია გამართეს. შეკრებილი მოქალაქეების მთავარი მოთხოვნა თანასწორობა იყო. აქციის მონაწილეები პოლიციის ესკორტით კანცელარიასთან სამარშრუტო ტაქსებით მიიყვანეს, რათა ჰომოფობიურად განწყობილი მოქალაქეებისგან დაეცვათ. სრულად... წყარო: ორგანიზაციის ვებ-გვერდი სოციალურ ქსელში

თბილისი. კოალიცია თანასწორობისთვის სოლიდარობას უცხადებს ჰომოფიბიისა და ტრანსფობიის საერთაშორისო დღისადმი (აიდაჰო) მიძღვნილ შეკრებას. ორგანიზაციები მოუწოდებენ სახელმწიფოს უზრუნველყოს ლგბტქი თემის წევრების, აქტივისტებისა და მათი მხარდამჭერების მიერ შეკრებისა და გამოხატვის თავისუფლების განუხრელად რეალიზება და მათი უსაფრთხოების, ხელშეუხებლობისა და ღირსების დაცვა. „თემის წევრების სტრუქტურული ჩაგვრის პირობებში, შეკრების თავისუფლებით სარგებლობის და საჯარო თვითრეპრეზენტაციის შეუძლებლობა თემს საკუთარი საჭიროებებისა და გამოწვევების შესახებ პროტესტის გამოხატვისა და საჯარო პოლიტიკაზე გავლენის მოხდენის საშუალებას ართმევს. ამასთან, საჯარო სივრცეებიდან კონკრეტული ჯგუფების გარიყვა აზიანებს დემოკრატიული, პლურალური პოლიტიკური გარემოსა და სამართლიანი საზოგადოების განვითარების პროცესს. სამწუხაროდ, სახელმწიფო ხშირად არ აღიარებს ლგბტქი ადამიანების მიმართ ძალადობისა და უფლებების სისტემური დარღვევის პრაქტიკას, რაც არსებული ჰომოფობიური პოლიტიკური და სოციალური გარემოს გარდაქმას ართულებს. მეტიც, მკვეთრად არაეფექტიანი პოლიტიკით სახელმწიფო ირიბად ხელს უწყობს ძალადობისა და დისკრიმინაციის წახალისებას”, ნათქვამია ერთობლივ განცხადებაში. სრულად... წყარო: women.ge

თბილისი. 15 მაისს, ომბუდსმენმა სახალხო დამცველთან არსებული რელიგიათა საბჭოს რეკომენდაციები წარმოადგინა, რომელსაც სახელმწიფო უწყებების, ადგილობრივი და საერთაშორისო ორგანიზაციებისა და საქართველოში არსებული რელიგიური გაერთიანებების წარმომადგენლები ესწრებოდნენ. „დოკუმენტში ასახულია საქართველოში რელიგიური უმცირესობების წინაშე არსებული გამოწვევები და წარმოდგენილია ამ გამოწვევის გადაჭრის გზები. მათ შორის, კანონმდებლობაში არსებული ნორმების ცვლილების აუცილებლობა, რომელიც შესაძლებელს გახდის, ეფექტურად იქნას გამოძიებული რელიგიური ნიშნით ჩადენილი დანაშაულებები; აღმოიფხვრას არათანაბარი ან დისკრიმინაციული მოპყრობა, რელიგიური უმცირესობებისათვის საკულტო ნაგებობაზე მშენებლობის უფლების გაცემის არასათანადო პრაქტიკა, ისტორიულ ნაგებობებთან დაკავშირებული პრობლემები, უზრუნველყოფილი იყოს საჯარო სკოლებში რელიგიის თავისუფლების და ტოლერანტული გარემოს ხელშეწყობა და სხვა", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. საქართველოს შინაგან საქმეთა სამინისტროს დაეკისრა 2013 წლის 17 მაისს ჰომოფობიასა და ტრანსფობიასთან ბრძოლის საერთაშორისო დღისადმი მიძღვნილ აქციაში მონაწილეთა სასარგებლოდ 12 500 ლარის გადახდა მორალური ზიანის ანაზღაურების მიზნით. საქართველოს ახალგაზრდა იურისტთა ასოციაცია (საია) იმედოვნებს, რომ „სახელმწიფო მსგავსი გამოცდილების გააზრების შემდგომ, აღარ დაუშვებს წარსულის შეცდომებს და ეფექტურად შეძლებს ქვეყანაში შეკრების უფლების დაცვას". სრულად... წყარო: gyla.ge

თბილისი. არასამთავრობო ორგანიზაციები განცხადებას ავრცელებენ ლაშა თორდიაზე თავდასხმასთან დაკავშირებით. „ხელმომწერი ორგანიზაციები აღშფოთებას გამოვხატავთ საქართველოს გენერალურ აუდიტორ ლაშა თორდიაზე მომხდარ თავდასხმასთან დაკავშირებით. იმის გათვალისწინებით, რომ საქმე ეხება კონსტიტუციური ორგანოს ხელმძღვანელზე თავდასხმას და მასში სავარაუდოდ ფიგურირებს ყოფილი მთავარი პროკურორი ოთარ ფიცხალაძე, რომლის არაფორმალურ გავლენებზეც სამართალდამცავ უწყებებში საზოგადოებაში არსებობს კითხვები, მნიშვნელოვანია, საქმის შესწავლა განახორციელოს საქართველოს პარლამენტის საგამოძიებო კომისიამ. სხვა შემთხვევაში მიმდინარე გამოძიებას არ ექნება სანდოობა საზოგადოების თვალში”, ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. „კოალიცია თანასწორობისთვის" წევრი ორგანიზაციები საქართველოს კონსტიტუციაში ცვლილებების პროექტის 30-ე მუხლს ეხმაურებიან, რომელიც ქორწინების ახალ სამართლებრივ დეფინიციას განსაზღვრავს და უფლების შინაარს ზღუდავს. საკონსტიტუციო კომისიის მიერ შემუშავებულ ცვლილებათა პაკეტში კონსტიტუციის 36-ე მუხლი, რომელიც ქორწინებას მეუღლეთა თანასწორუფლებიანობასა და ნებაყოფლობაზე აფუძნებს და მეუღლეთა სქესის შესახებ ექსპლიციტურ მითითებას არ შეიცავს, იცვლება შემდეგი ახალი ჩანაწერით: „ქორწინება, როგორც ქალისა და მამაკაცის კავშირი ოჯახის შექმნის მიზნით, ემყარება მეუღლეთა თანასწორობასა და ნებაყოფლობას" (მუხლი 30. ქორწინების უფლება). „კოალიცია თანასწორობისთვის" ამ ჩანაწერს გაუმართლებლად მიიჩნევს და ვენეციის კომისიას საკუთარ ანალიზს და არგუმენტებს უგზავნის. მიმართვაში, რომელსაც ხელს აწერს კოალიციის წევრი 8 ორგანიზაცია, აღნიშნულია, რომ „კოალიცია თანასწორობისთვის" მიესალმება ცვლილებათა პაკეტში გათვალისწინებულ ზოგიერთ პოზიტიურ ცვლილებას, თუმცა აქვე შეშფოთებას გამოხატავს ადამიანის უფლებების შემზღუდავი ჩანაწერების გამო, რომელიც აუარესებს ცალკეული ჯგუფების უფლებრივ მდგომარეობას და ზღუდავს ცალკეული უფლებ(ებ)ის შინაარსსა და ფარგლებს", ნათქვამია ერთობლივ განცხადებაში. სრულად... წყარო: www.osgf.ge

თბილისი. ორგანიზაცია „ახალგაზრდა ადვოკატები” კომპანია „ფრესკოს" მიმართ სამართლებრივ დავაში წარმომადგენლობითი უფლებამოსილებით ჩართვის თაობაზე განცხადებას ავრცელებს. ორგანიზაცია საზოგადოების საყურადღებოდ აღნიშნავს, რომ „კომპანიის მხრიდან წარმოდგენილი სარჩელი სასამართლოში რეგისტრირებულია 2017 წლის 13 მარტს. ორგანიზაცია, რომელიც სიტყვისა და გამოხატვის თავისუფლების სფეროში არსებულ დავებთან დაკავშირებით მნიშვნელოვან გამოცდილებას ფლობს, კომპანიის სამართლებრივ პრეტენზიებთან დაკავშირებით, არავითარ კომენტარს არ გააკეთებს და დავის მნიშვნელობიდან გამომდინარე, საკითხს საზოგადოების მსჯელობის საგნად მიიჩნევს". სრულად... წყარო: barristers.ge

თბილისი. „ახალგაზრდა ადვოკატები" ტყიბულის მინდელის სახელობის შახტაში დასაქმებული მუშების დაღუპვის ფაქტს ეხმაურება და სახელმწიფოსა და დამსაქმებელი კომპანიის მიმართ პასუხისმგებლობის თანაბარ როლზე საუბრობს. მათი შეფასებით, „საზოგადოების განსჯის საკითხი ტყიბულის მინდელის სახელობის შახტაში დასაქმებულთა უფლებების მდგომარეობა უკვე მერამდენედ ხდება. ყველა ტრაგიკულ შემთხვევაში იწყება სისხლის სამართლის გამოძიება, თუმცა ქმედითი ნაბიჯები მდგომარეობის გამოსწორების მიმართულებით, არ იდგმება". ორგანიზაცია მოუწოდებს ხელისუფლებას, დააჩქაროს შექმნილი შრომის ინსპექციის რეფორმირება და ინსპექტორი აღიჭურვოს რეალური, ქმედითი უფლებამოსილებით. სრულად... წყარო: barristers.ge

თბილისი. ინფორმაციის თავისუფლების ინსტიტუტი (IDFI) უერთდება გაეროს მეოთხე საგზაო უსაფრთხოების გლობალურ კვირეულს. ორგანიზაციის თანამშრომლები მიმართავენ მძღოლებს: გაუფრთხილდი სიცოცხლეს, შეანელე! სრულად... წყარო: ორგანიზაციის ვებ-გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სახელმძღვანელო დოკუმენტს სექსუალური ორიენტაციისა და გენდერული იდენტობის საფუძველზე ჩადენილი დანაშაულის გამოძიების შესახებ. „დღემდე ლგბტ ჯგუფის წინააღმდეგ მიმართულ გახმაურებულ და არსებითად მძიმე შემთხვევებზეც კი, როცა ჰომო/ბი/ტრანსფობიის მოტივი აშკარა იყო, სახელმწიფოს საპასუხო რეაგირება არაადეკვატური იყო.მსგავსი შემთხვევები თვალსაჩინოს ხდის სამართალდამცავი სისტემისათვის სიძულვილით მოტივირებული დანაშაულების გამოძიებაზე, აღკვეთაზე, დასჯასა და მსხვერპლთა რეპარაციაზე ფოკუსირებული დეტალიზებული ოპერაციული სახელმძღვანელო დოკუმენტის საჭიროებას. წინამდებარე დოკუმენტი სწორედ ამგვარი სახელმძღვანელო დოკუმენტის შექმნის წინაპირობაა, რაც არსებითად დაეხმარება საქართველოს შინაგან საქმეთა სამინისტროს, შეიმუშაოს სიძულვილით მოტივირებულ დანაშაულთა გამოძიებისა და პრევენციის პოლიტიკის დოკუმენტები და შიდა ინსტრუქციები", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: „მაღაროებსა და შახტებში დასაქმებულთა შრომის პირობები". „მძიმე მრეწველობაში დასაქმებულების სამუშაო პირობები განსაკუთრებულად მძიმეა, რამდენადაც შრომა მომეტებული ტექნიკური საფრთხის ობიექტებზე ჯანმრთელობის და სიცოცხლის რისკებს უკავშირდება. წიაღისეულის მომპოვებელ და გადამამუშავებელ საწარმოებში დასაქმებულთა ჯანმრთელობაზე, უსაფრთხოებასა და სამუშაო გარემოზე დაკვირვების მიზნით EMC შეისწავლა: ინფრასტრუქტურისა და მანქანა-დანადგარების მდგომარეობა, ასევე შესაბამისი სპეცტანსაცმლითა და სამუშაო იარაღებით აღჭურვის საკითხი და დასაქმების ადგილებზე პირველადი და გადაუდებელი სამედიცინო დახმარების მიღების შესაძლებლობები", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. 9 მაისს, გავრცელებული ინფორმაციის თანახმად, „საქნახშირი ჯი-აი-ჯი ჯგუფის" ტყიბულის მინდელის სახელობის მაღაროში 400 მეტრის სიმაღლიდან ლიფტი ჩავარდა, რის შედეგადაც ლიფტში მყოფი 4 მაღაროელი გარდაიცვალა. „სამუშაო ადგილზე დასახიჩრებულთა და დაღუპულთა რიცხვი ყოვეწლიურად მატულობს. 2016 წელს გარდაიცვალა 58 და დაშავდა 85 ადამიანი. მდგომარეობის გაუარესებას ხელს უწყობს ქვეყანაში შრომის ინსპექციის ეფექტური მექანიზმის არარსებობა. სახალხო დამცველი მიიჩნევს, რომ სამუშაო ადგილზე დაღუპვისა და დაზიანების თითოეულ შემთხვევაზე პასუხისმგებლობა ეკისრება ყველა იმ პირს, ვინც წლებია ეწინააღმდეგება შრომის ინსპექციის შექმნას", ნათქვამია ომბუდსმენის განცხადებაში. სრულად... წყარო: ombudsman.ge

თბილისი. 2 მაისს, თეთრი ხმაურის მოძრაობამ ნარკოპოლიტიკის ეროვნულ პლატფორმასთან ერთად „საყოველთაო შეკრება - ახალი ნარკოპოლიტიკისთვის" გამართა. ღონისძიება ფონდ „ღია საზოგადოება საქართველოს" მხარდაჭერილი პროექტის „ჰუმანური ნარკოპოლიტიკისთვის" ფარგლებში ჩატარდა. „თეთრი ხმაურის მოძრაობა საყოველთაო შეხვედრას ყოველ გაზაფხულზე მართავს. ის ემსახურება მხარდამჭერებისა და სფეროს მოთამაშეებისთვის განვლილი წლის შეჯამებასა და მომავალი გეგმების გაცნობას. წლევანდელი საყოველთაო შეხვედრა პლატფორმის მიერ მომზადებული რეფორმის შინაარსის ფართო აუდიტორიამდე მიტანისა და საზოგადოებრივი მხარდაჭერის მოპოვების მიზნით გაიმართა. წარმოდგენილი რეფორმა, რომელიც პარლამენტის ჯანმრთელობის დაცვისა და სოციალურ საკითხთა კომიტეტთან მჭიდრო თანამშრომლობით შემუშავდა, საკანონმდებლო ცვლილებების გარდა პირველადი პრევენციის სისტემის დანერგვასა და სამკურნალო/სარეაბილიტაციო და სოციალური მომსახურების სფეროს გაუმჯობესებას ითვალისწინებს", ნათქვამია ორგანიზაციის ვებ-გვერდზე. სრულად... წყარო: www.osgf.ge

თბილისი. „პარტნიორობა ადამიანის უფლებებისთვის" (PHR) აქვეყნებს ბლოპოსტს: „ძალადობის მოწმე ბავშვების გაქცევა დიდობაში". „„ბავშვებმა არ დაინახონ" – ფრაზა, რომელსაც სტანდარტულად ყველა ოჯახში მოისმენთ, იმის დასტურია, რომ ბავშვებს ყოველთვის ესმით და ხედავენ ძალადობას, რომელიც მათ სახლში ხდება. ესმით, როდესაც მოსალოდნელი ჩხუბის დროს აგზავნიან „დასაძინებლად", როდესაც იღვიძებენ და დედის სახეზე ხედავენ დალურჯებებს, ხედავენ დამტვრეულ ჭურჭელს… თუ ვინმე რამეს ვერ ხედავს და არ ესმის, უმეტესად ჩვენ ვართ, – უფროსები, ვინც ვერ ვხედავთ ძალადობის მოწმე ბავშვების შეშინებულ სახეებს", ნათქვამია ორგანიზაციის ვებ-გვერდზე. სრულად... წყარო: phrgeorgia.wordpress.com

თბილისი. 2011 წლის 3 ივლისს საქართველოს ახალგაზრდა იურისტთა ასოციაციამ (საია) და ადამიანის უფლებათა დაცვის ევროპულმა ცენტრმა (EHRAC) ერთობლივი საჩივრით მიმართეს ადამიანის უფლებათა ევროპულ სასამართლოს, საპროტესტო აქციის მონაწილე პირთა სახელით. 2017 წლის 4 მაისს ევროპულმა სასამართლომ ამ საქმეზე განჩინება გამოიტანა. „2016 წლის 3 მაისს საქართველოს მთავრობამ, ევროპული კონვენციის 39-ე მუხლის საფუძველზე, მომჩივნებს საქმის მეგობრული მოგვარებით დასრულება შესთავაზა. საქართველოს მთავრობამ მომჩივნების მიმართ განხორციელებული არასათანადო მოპყრობის და შეკრების უფლების დარღვევის გამო კონვენციის მე-3 (პროცედურული ნაწილი) და მე-11 მუხლების დარღვევა აღიარა და მომჩივნებისთვის კომპენსაციის გადახდის ვალდებულება აიღო", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. ომბუდსმენი კიდევ ერთხელ ეხმაურება ე.წ. ციანიდის სისხლის სამართლის საქმის განხილვას და აღნიშნავს, რომ სასამართლო პროცესის სრულად დახურვა არ ემსახურება საგამოძიებო და სასამართლო ხელისუფლების ორგანოების მიმართ საზოგადოების ნდობის ამაღლებას. „იმ პირობებში, როდესაც სისხლის სამართლის საქმის გამოძიება დასრულდა, თუმცა დაცვის მხარეს კვლავ ეკისრება გაუთქმელობის ვალდებულება, საჯარო პროცესი მართლმსაჯულების მიმართ საზოგადოების ნდობის ამაღლების ერთადერთ საშუალებას წარმოადგენს. საქართველოს სახალხო დამცველი იმედოვნებს, რომ სასამართლო გაცილებით უფრო მკაცრ ტესტს გამოიყენებს პროცესის საჯარო ხასიათის შეზღუდვისას და შესაძლებელი გახდება აღნიშნულ საქმეზე საზოგადოებრივი კონტროლის განხორციელება", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. ცნობილია, რომ იუსტიციის სამინისტრომ გაიზიარა „პარტნიორობა ადამიანის უფლებებისთვის" ინიციატივა და ოჯახში ძალადობის მოწმე ბავშვს მსხვერპლის სტატუსი მიენიჭება. ცვლილება სტამბოლის კონვენციის სარატიფიკაციო პაკეტშია ასახული. სრულად... წყარო: phrgeorgia.wordpress.com

თბილისი. „პარტნიორობა ადამიანის უფლებებისთვის" (PHR) უფასი იურიდიულ დახმარებას გაუწევს ძალადობის მსხვერპლ ქალებს. „კონსულტაციები შეეხება ნებისმიერი სახის ძალადობასთან დაკავშირებულ საკითხებს, მათ შორის, ფიზიკურ, ფსიქოლოგიურ, სექსუალურ, ეკონომიკურ ძალადობასა და იძულებას. თუკი გამოგივლია ძალადობა ან, მიგაჩნია, რომ შენ გვერდით მყოფი ქალი, მათ შორის, შეზღუდული შესაძლებლობის მქონე ქალი ძალადობის ან გენდერული ნიშნით დისკრიმინაციის მსხვერპლია, – მოგვმართეთ!", ნათქვამია ორგანიზაციის განცხადებაში. სრულად...  წყარო: phrgeorgia.wordpress.com

თბილისი. ორგანიზაცია „ახალგაზრდა ადვოკატები" პროკურატურას ბიზნესმენ რამაზ ახვლედიანის ლისის ტბის დათმობის საქმეზე სწრაფი და ეფექტური საგამოძიებო მოქმედებების ჩატარებისთვის მიმართავს. არჩილ კაიკაციშვილის განცხადებით, რამაზ ახვლედიანმა იძულებით დაწერა განცხადება, ლისის ტბის სახელმწიფოსთვის დათმობის თაობაზე. „საქმის ფაქტობრივი და სამართლებრივი გარემოებებიდან გამომდინარე, გამოძიება უნდა დაჩქარდეს და რამაზ ახვლედიანი დაზარალებულად იქნეს ცნობილი. იმავდროულად, დადგეს კონკრეტული თანამდებობის პირთა სამართლებრივი პასუხისმგებლობის საკითხი, რომლებმაც მოახდინეს რამაზ ახვლედიანის იძულება ქონების დათმობის მიზნით", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. ადამიანის უფლებების სწავლებისა და მონიტორინგის ცენტრი იცავს აზერბაიჯანელი ჟურნალისტის, ჯამალ ალის ინტერესებს საქმეზე, რომელიც 2017 წლის 19 აპრილს, შსს-ს მიერ საქართველოს ტერიტორიაზე შემოსვლაზე სავარაუდო დისკრიმინაციული მოტივით უარს უკავშირდება. „არსებობს დასაბუთებულ ვარაუდი, რომ საქართველოში ჯამალ ალის შემოშვებაზე უარი, Meydan TV-ში მის ჟურნალისტურ საქმიანობას, უფრო ზუსტად კი, 2017 წლის იანვარში აზერბაიჯანის სახელმწიფო ნავთობის კომპანიის, სოკარის მიმართ მის მიერ გაკეთებულ კრიტიკულ სიუჟეტს უკავშირდება", ნათქვამია ორგანიზაციის ვებ-გვერდზე. სრულად... წყარო: emc.org.ge