თბილისი. 15 ივნისს, ასოციაცია ანიკაში, დღის ცენტრის სპეციალისტებისთვის დაიწყო ტრენინგი ეიდეტიკური სწავლების მეთოდოლოგიაში. „ტრეინინგი მიმდინარეობს პროექტის „თემზე დაფუძნებული სერვისების განვითარება შეზღუდული შესაძლებლობის მქონე ბავშვებისათვის", ფარგლებში, რომელიც ხორციელდება Save the Children International - საქართველოს წარმომადგენლობის ფინანსური მხარდაჭერით,” ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 14 ივნისს, რუსთაველის სამეცნიერო ფონდსა და საქართველოს რეგიონულ მაუწყებელთა ასოციაციას შორის მემორანდუმი გაფორმდა. „შეთანხმების საფუძველზე მხარეები ითანამშრომლებენ განათლებისა და მეცნიერების პოპულარიზაციისთვის და თანხმდებიან, რომ ამ მიზნის მისაღწევად მნიშვნელოვანია მოსწავლეების, პედაგოგების, სტუდენტებისა და მკვლევრების, სამეცნიერო-შემოქმედებითი და სხვა სახის აქტივობების წახალისება და ხელშეწყობა...," ნათქვამია ორგანიზაციის ვებ-გვერდზე. სრულად... წყარო: rustaveli.org.ge

თბილისი. განათლების საერთაშორისო ცენტრი ავრცელებს ინფორმაციას ხელოვნების მიმართულებით დაინტერესებული პირებისთვის. კერძოდ სასტიპენდიო პროგრამების შესახებ. დაინტერესებულმა პირებმა განაცხადი ცენტრის ვებგვერდზე განთავსებული ელექტრონული ფორმის უნდა შეავსონ. სრულად... წყარო: განათლების საერთაშორისო ცენტრი

იმერეთი. იურიდიული განათლების ხელშეწყობისა და ტყიბულის რაიონის განვითარების ფონდების ერთობლივი პროექტის ფარგლებში სამოქალაქო განათლების საკვირაო სკოლამ სასწავლო პროცესი დაასრულა. სკოლის მსმენელებს შორის კონკურსი (ბრეინ-რინგი) გაიმართა. ჟიურის გადაწყვეტილებით, კონკურსში გაიმარჯვა გუნდმა „ფილოკრატოსი". გამარჯვებულებს გადაეცათ სამახსოვრო თასი. საკვირაო სკოლის ყველა მოსწავლე დაჯილდოვდა სერთიფიკატებითა და წიგნებით. წყარო: იურიდიული განათლების ხელშეწყობის ფონდი

სამოქალაქო საზოგადოების ინსტიტუტმა ონლაინ პლატფორმაზე (www.e-learning.ge) ახალი სასწავლო პროგრამა „თვითმმართველობის ზოგადი საფუძვლები" განათავსა. კურსს უძღვება ირაკლი მელაშვილი და იგი განკუთვნილია თვითმმართველობის მოხელეებისთვის. ონლაინ სასწავლო პროგრამის ფარგლებში გამოცხადდა მონაწილეთა შერჩევა. მსურველ აპლიკანტთა რაოდენობამ 400–ს გადააჭარბა. 7 ივნისს „თვითმმართველობის ზოგადი საფუძვლების" მონაწილეთა პირველმა ნაკადმა სასწავლო პროცესი დაიწყო. პროგრამაში მონაწილეობას იღებს საქართველოს სხვადასხვა რეგიონის თვითმმართველობების 80 მოხელე. სასწავლო პროცესი მოიცავს თვითმმართველობის საკითხებზე შექმნილ 10 ვიდეოლექციას, საკითხავ მასალას და შესაბამის ტესტებს. პროექტი ხორციელდება ფონდ "ღია საზოგადოება– საქართველოს" მხარდაჭერით.

თბილისი. 3 ივნისს, ომბუდსმენს მთავრობის ადმინისტრაციიდან შეატყობინეს, რომ საქართველოს მთავრობა ეთანხმება ომბუდსმენის რეკომენდაციას გაერთიანების წევრობის ნიშნით დისკრიმინაციის ფაქტის დადგენასთან დაკავშირებით. განათლების სამინისტრო კი მუშაობს „უმაღლესი განათლების შესახებ" საქართველოს კანონით დადგენილი რეგულაციების დახვეწაზე. „სახალხო დამცველის რეკომენდაციის შესაბამისად, იგეგმება ყველა სტუდენტი, გაერთიანებისადმი კუთვნილების მიუხედავად, უმაღლესი საგანმანათლებლო დაწესებულების მართვის პროცესში მონაწილეობის უფლებით საკანონმდებლო დონეზე იყოს უზრუნველყოფილი. მუშაობის დასრულების შემდგომ სამინისტრო კანონპროექტს განსახილველად საქართველოს მთავრობას წარუდგენს," ნათქვამია ომბუდსმენის ვებ-გვერდზე. სრულად... წყარო: www.ombudsman.ge

ორგანიზაცია „ახალგაზრდა ადვოკატები" პროექტს: „ქობულეთი - ტოლერანტობის ქალაქი" განახორციელებს, რომელშიც მონაწილეობას მუნიციპალიტეტის საჯარო სკოლის IX_XII კლასის მოსწავლეები მიიღებენ. „პროექტის პრეზენტაცია ქობულეთში, 2016 წლის 8 ივნისს, ქობულეთის მუნიციპალიტეტის თვითმმართველობის დარბაზში, 12:00 საათზე გაიმართება. პროექტის მიზანია, ტოლერანტული ქალაქის ახალი თაობა მუდმივად გრძნობდეს სამოქალაქო პასუხისმგებლობას, როცა არსებობს თანამედროვე დროის ახალი გამოწვევები, როგორც გამოხატვის თავისუფლების, ასევე რელიგიის თავისუფლების მიმართულებით, რათა გაძლიერდეს ტრადიციებზე დაფუძნებული ურთიერთობები," ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. შოთა რუსთაველის ეროვნული სამეცნიერო ფონდის ორგანიზებით, ევროკავშირის კვლევისა და ინოვაციის ჩარჩო პროგრამა „ჰორიზონტი 2020"-თან საქართველოს ასოცირების საკითხებზე სამუშაო შეხვედრა გაიმართა. „შეხვედრის მიზანი იყო საქართველოს მეცნიერების, ტექნოლოგიებისა და ინოვაციის მიმართულებით პოლიტიკის შემმუშავებელ და განმახორციელებელ უწყებებთან თუ ორგანიზაციებთან ერთად, პროგრამა „ჰორიზონტი 2020"- ში ჩართვის პრაქტიკული ასპექტების განხილვა," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

სამოქალაქო საზოგადოების ინსტიტუტი გორში, ქუთაისსა და ბათუმში ახორციელებდა შედეგზე ორიენტირებული პროექტის მართვის პროგრამას. იგი შეიქმნა განვითარების სექტორში არსებული უახლესი მიდგომების გათვალისწინებით და მოიცავდა რეგიონული საზოგადოებრივი ორგანიზაციებისთვის ხუთ ტრენინგ-მოდულს: სისტემური ცვლილება; ინდიკატორების შემუშავება; პროექტის ციკლის მართვა; მონიტორინგი და შეფასება; მონაწილეობითი ფასილიტაცია. ორმოცდასამმა მონაწილემ პროგრამა წარმატებით დაასრულა და მიიღო სერტიფიკატი. შედეგზე ორიენტირებული პროექტის მართვის პროგრამის ფარგლებში ასევე შეიქმნა წიგნი „სოციალური ცვლილების მართვა", რომელიც განკუთვნილია სამოქალაქო საზოგადოების განვითარებაში ჩართული აქტორებისთვის, მათთვის ვისაც სურს მდგრადი სოციალური ცვლილების განხორციელება. სახელმძღვანელო აგებულია თანამედროვე საერთაშორისო ტენდენციებზე დაყრდნობით და მასში აღწერილია როგორი უნდა იყოს გავლენაზე ორიენტირებული ინტერვენცია და როგორ უნდა მივაღწიოთ სისტემურ ცვლილებას, დეტალურად არის მიმოხილული მონაწილეობითი ინსტრუმენტები და პროექტის მართვისთვის საჭირო დოკუმენტები. წიგნი „სოციალური ცვლილების მართვა", რომლის ავტორია ეველინ შპაიხ-ბაერი, შექმნილი და გამოცემულია სამოქალაქო საზოგადოების ინსტიტუტის მიერ, GIZ-ისა და BFTW-ის მხარდაჭერით. 25, 30 და 31 მაისს (გორში, ქუთაისში და ბათუმში) გაიმართა დაჯილდოების ცერემონია, სადაც მონაწილეებს გადაეცათ სერტიფიკატები და წიგნები. „შედეგზე ორიენტირებული პროექტის მართვის" პროგრამა შემუშავებულია „საზოგადოებრივი ორგანიზაციების საარსებო გარემოს გაუმჯობესებისა და მათი ეფექტურობის გაზრდის ხელშეწყობის” პროექტის ფარგლებში, მოწვეული საერთაშორისო ექსპერტის -ეველინ შპაიხ-ბაერის ხელმძღვანელობით და აგებულია თანამედროვე მეთოდებისა და სტანდარტების საფუძველზე. პროგრამის ფინანსურ მხარდაჭერას უზრუნველყოფს „Bread for the World".

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს სტატიას: „სახელმწიფოს მიერ სრულად დაფინანსებული ფაკულტეტების ეფექტიანობა". „სამი უნივერსიტეტის მაგალითზე შეგვიძლია ვთქვათ, რომ ე.წ. „უფასო ფაკულტეტების" პროგრამის შედეგები მოზიდული სტუდენტების უნარების კუთხით წინააღმდეგობრივია. პროგრამამ შედეგად გამოიღო პროგრამაში მოხვედრილი სტუდენტების მუდმივი ზრდა, ასევე უნივერსიტეტების (განსაკუთრებით, ტექნიკური უნივერსიტეტის მხრიდან) მხრიდან პროგრამაში მოხვედრილი მიმართულებების დამატება, ასევე სტუდენტთა რიცხოვნობის გაზრდა. იმ პროგრამებზე სადაც პროგრამის დაწყებამდე ადგილების შევსების პრობლემა იყო არ შეინიშნება უფრო უანარიანი სტუდენტების მოზიდვის ტენდენცია, ზოგიერთ პროგრამაზე (მაგ. ქართული ფილოლოგია, მშენებლობა, ენერგეტიკა და ა.შ.) მართლაც აღინიშნება სტატისტიკურად მნიშვნელოვანი გაუმჯობესება, თუმცა იმ ფონზე როდესაც ამავე უნივერსიტეტებში საკონტროლო პროგრამებზეც იყო მოზიდული კონტიგენტის საშუალო უნარიანობის ზრდა," ნათქვამია ორგანიზაციის ვებ-გვერდზე. სრულად... წყარო: idfi.ge

აჭარა. 29 მაისს, ბათუმის სახელმწიფო უნივერსიტეტში, გაიმართა დისკუსია თემაზე: „სეკულარულობა და მისი კრიზისი თანამედროვე საქართველოში". დისკუსიის თემაზე მოხსენება წაიკითხა ფილოსოფოსმა, ილიას სახელმწიფო უნივერსიტეტის პროფესორმა გიორგი მაისურაძემ. წყარო: presscafe.ge

სამეგრელო. 30 მაისს, რუხის საჯარო სკოლაში ჩატარდა პროგრამის პრეზენტაცია და ტრენინგი თემაზე „ტოლერანტობა". „ასევე მოეწყო მოკლემეტრაჟიანი ანიმაციის ჩვენება და განხილვა. ახალგაზრდებს მიეცათ შესაძლებლობა ენახათ და განეხილათ 2011 წლის მულტიმედიური ფილმი „Zero”, რომელიც თვალსაჩინოდ წარმოაჩენს ადამიანებში განსხვავებულობის აღიარებისკენ მზაობისა და შემწყნარებლობის დაბალ დონეს. დისკუსიის პროცესში ახალგაზრდებმა აქტიურად გამოხატეს საკუთარი აზრი ფილმთან და შეხვედრის თემასთან დაკავშირებით," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

კახეთი. 29 მაისი - 1ივნისი, სასტუმრო „ყვარლის ედემში" ქალთა საინფორმაციო ცენტრი პროდიუსერების, რედაქტორებისა და ჟურნალისტებისათვის, მართავს ტრენინგს „გენდერულად მგრძნობიარე საკითხების გაშუქება კონფლიქტურ და პოსტ-კონფლიქტურ სიტუაციებში". „ტრენინგის მიზანია, ტრადიციული და ახალი მედიის წარმომადგენლების ცნობიერების ამაღლება გენდერული თანასწორობის საკითხების, კონფლიქტური და პოსტ-კონფლიქტური სიტუაციების გაშუქებისა და ადგილობრივი სამშვიდობო მოლაპარაკებების პროცესის უშუალო მონაწილეებთან ჯანსაღი დისკუსიის უზრუნველყოფა იმ სხვადასხვა მნიშვნელოვანი საკითხის შესახებ, რაც გამყოფ ხაზთან მცხოვრებ მოსახლეობას აწუხებს. ტრენინგი ტარდება პროექტის „გაძლიერებული ქალები მშვიდობისა და განვითარებისათვის" ფარგლებში," ნათქვამია ორგანიზაციის ვებ-გვერდზე. სრულად... წყარო: www.ginsc.net

თბილისი. „აუდიტორია 115-მა" უნივერსიტეტის პირველი კორპუსის ეზოში აქცია გამართა. „აქციის მონაწილეები აცხადებენ, რომ თვითმმართველობის 20 პირმა „აუდიტორია115-ის" წევრს ფიზიკური და სიტყვიერი შეურაცხყოფა მიაყენა. აუდიტორიის წევრები უფლებამოსილი პირებისგან, ამ ფაქტთან დაკავშირებით, სათანადო რეაგირებას ითხოვენ. მათი კიდევ ერთი მოთხოვნა - თვითმმართველობის გაუქმებაა," ნათქვამია ლიბცენტრის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 23-24 მაისს, ვანო ხუხუნაიშვილის სახელობის ეფექტიანი მმართველობის სისტემის და ტერიტორიული მოწყობის რეფორმის ცენტრის ორგანიზებით, საჯარო მოხელეთათვის ჩატარდა ტრენინგი თემაზე „საჯარო პოლიტიკის ანალიზი და შეფასება". სრულად... წყარო: ორგანიზაციის ვებ-გვერდი სოციალურ ქსელში

თბილისი. „ლიბცენტრის" მოწვევით, ფილოსოფოსმა ლევან ღამბაშიძემ წაიკითხა ლექცია „ალუდა ქეთელაური და თავისუფლების პრობლემა". წყარო: ორგანიზაციის ვებ-გვერდი სოციალურ ქსელში

სამცხე-ჯავახეთი. 20 მაისიდან 23 მაისამდე ბორჯომში, კერძოდ ლიკანში, პროექტ „PITA”-ში ჩართული ახალგაზრდებისათვის გაიმართა 3 დღიანი ტრენინგი ეთნიკური ტოლერანტობის თემაზე. „სამუშაო შეხვედრას ესწრებოდა 20 ახალგაზრდა მონაწილე გორისა და ახალციხის მუნიციპალიტეტებიდან, რომლებიც ორ სხვადასხვა ეთნიკურ კულტურას (ქართულ და სომხურ) წარმოადგენენ. შეხვედრის მიზანი იყო ტოლერანტობის მნიშვნელობის არსის გაგება მრავალ ეთნიკურ საქართველოში და ორ ეთნიკურად განსხვავებული კულტურის ახალგაზრდების დამეგობრების ხელშეწყობა," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

სამოქალაქო საზოგადოების ინსტიტუტი გორში, ქუთაისსა და ბათუმში მართავს შედეგზე ორიენტირებული პროექტის მართვის პროგრამის შედეგების პრეზენტაციას. ღონისძიებაზე მოსულ სტუმრებს საშუალება ექნებათ გაეცნონ პროგრამის ფარგლებში, უახლესი ტენდენციების საფუძველზე შექმნილ წიგნს „სოციალური ცვლილების მართვა", გაესაუბრონ ავტორს და ასევე მიიღონ ინფორმაცია დისტანციური სწავლების ახალი კურსების შესახებ, რომლებიც განკუთვნილია როგორც საზოგადოებრივი ორგანიზაციების წარმომადგენლებისთვის, ისე სტუდენტებისთვის. ღონისძიებაზე გაიმართება „შედეგზე ორიენტირებული პროექტის მართვის" ტრენინგების მონაწილეთა სერტიფიკატებით დაჯილდოების ცერემონია. დასწრება თავისუფალია. მოსულ სტუმრებს სამოქალაქო საზოგადოების ინსტიტუტი წიგნს -„სოციალური ცვლილების მართვა"- საჩუქრად გადასცემს სრულად...

2016 წლის ევროპის დღეებს საქართველოს რეგიონები მრავალფეროვანი ღონისძიებებით შეუერთდა. „მოეწყო სხვადასხვა საგანმანათლებლო, შემეცნებითი, კულტურული თუ გასართობი აქტივობა, დებატები, კონფერენციები, საჯარო ლექციები, ინტელექტუალური თამაშები, ჯანსაღი ცხოვრების მხარდამჭერი აქტივობები. დაგეგმილია რიგი საინფორმაციო შეხვედრები საჯარო და კერძო სკოლებში, უნივერსიტეტებში, მათ შორის საქართველოს საპატრიარქოს დაქვემდებარებაში მყოფ საგანმანათლებლო დაწესებულებებში," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდის სოციალურ ქსელში

  სამეგრელო. ასოციაცია „ათინათის" ახალგაზრდული კლუბის წევრები გაცვლითი პროგრამის ფარგლებში იმყოფებოდნენ გორის ახალგაზრდულ ცენტრში, პროექტი „ნდობის მშენებლობა სამხრეთ კავკასიაში" ფარგლებში. „3 დღის მანძილზე განხორციელდა ზუგდიდისა და გორის ახალგაზრდების ერთობლივი აქტივობები, ტრენინგები, სემინარები და სასწავლო ვიზიტები," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში  

აჭარა. 15 მაისს, „დემოკრატიის ინსტიტუტის" ტრენინგ ცენტრში საოჯახო ბიზნესის გაძლიერების ხელშეწყობაზე ორდღიანი ტრენინგი დასრულდა. ტრენინგი სმენისა და მეტყველების შეზღუდვის მქონე პირებისთვის ჩატარდა. ტრენინგ-პროგრამა მოიცავდა: ბიზნესის დაგეგმვას, რესურსების ეფექტურად გამოყენების მეთოდების შესწავლას, თანამედროვე ტექნოლოგიების გამოყენებით ბიზნესის გაძლიერების მეთოდებს, ბიზნესის რეგისტრაციის ეტაპებს, აუცილებელი საკანონმდებლო ბაზის გაცნობას, დამატებითი რესურსების მოძიების შესაძლებლობებს, გაყიდვების დაგეგმვას, მომხმარებელთან კომუნიკაციას, ბიზნეს-გეგმის მომზადებას, დაფინანსების მოძიებას და მართვას. ტრენინგი „დემოკრატიის ინსტიტუტის" ტრენერმა პაატა აროშიძემ სურდო თარჯიმანის დახმარებით ჩაატარა. მსმენელებს სერთიფიკატები გადაეცათ. ტრენინგის მონაწილეებისთვის გამოცხადდება საგრანტო კონკურსი, რომლის მიზანია, მათი უნარ-ჩვევების განვითარება და საოჯახო ბიზნესის გაძლიერება. ტრენინგი ჩატარდა პროექტის - „დასაქმებაზე ორიენტირებული განათლებისა და განვითარების სისტემის ამოქმედება აჭარაში" ფარგლებში. პროექტს აფინანსებს „ევროკავშირი".

აჭარა. 15 მაისს, ბათუმის სახელმწიფო უნივერსიტეტის სააქტო დარბაზში, საჯარო ლექცია-მოხსენება გააკეთეს ილიას სახელმწიფო უნივერსიტეტის პროფესორებმა ლევან ბერძენიშვილმა და ლევან გიგინეიშვილმა. მომხსენებლებმა ისაუბრეს უმაღლესი განათლების განსაკუთრებულ მნიშვნელობასა და როლზე. ასევე, უმაღლესი განათლების დღევანდელ მდგომარეობასა და ბოლონიის პროცესის შესახებ. ღონისძიება ჩატარდა თანამშრომლობის და განვითარების რეგიონული ქსელი - „R N C D-ს" პროექტის - „უმაღლესი განათლების წახალისება და პოპულარიზაცია აჭარის რეგიონული განვითარებისათვის" ფარგლებში, რომლის მიზანიცაა აჭარის მაღალმთიანი სკოლის მოსწავლეებისთვის უმაღლესი განათლების წახალისება და პროფესიული არჩევანის უკეთესი პრაქტიკის დანერგვა.