5–8 მარტს, მცხეთაში, გაიმართა ტრენინგი „ადამიანის უფლებებისა და გენდერული თანასწორობის საკითხებზე". „ტრენინგის მიზანი იყო ადგილობრივი თვითმმართველობის საჯარო მოხელეების ინფორმირება ადამიანის უფლებებისა და გენდერული თანასწორობის საკითხებზე, ადგილობრივი და საერთაშორისო ვალდებულებების გაცნობა. ტრენინგი გაიმართა GIZ-ის ორგანიზებით ქალთა საინფორმაციო ცენტრთან თანამშრომლობით პროექტის „კახეთიდან და სამცხე–ჯავახეთიდან ქალი პოლიტიკოსებისა და გენდერზე პასუხისმგებელი პირების ქსელი პროფესიული და ლიდერული უნარ–ჩვევების გაძლიერებისათვის", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ქუთაისის სააპელაციო სასამართლოს გადაწყვეტილებით, ზესტაფონის საგანმანათლებლო რესურსცენტრს დაევალა 2017 წელს გამოცხადებულ მთავარი სპეციალისტის შესარჩევ კონკურსში მონაწილე ნონა ბაბუაძის ამ თანამდებობაზე დანიშვნა. " ნონა ბაბუაძემ კონკურსის ყველა ეტაპი წარმატებით გაიარა, მათ შორის გასაუბრების ეტაპზეც საკონკურსო კომისიის წევრთა უმრავლესობამ მხარი მას დაუჭირა, თუმცა რესურსცენტრის უფროსმა, ერთპიროვნული გადაწყვეტილებით, მთავარ სპეციალისტად სხვა პირი დანიშნა. ქუთაისის სააპელაციო სასამართლოს გადაწყვეტილებით, ზესტაფონის საგანმანათლებლო რესურსცენტრს, ასევე, დაევალა ნონა ბაბუაძისთვის თანამდებობრივი სარგოს ანაზღაურება, რაც დაახლოებით 8000 ლარს შეადგენს", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. გენდერული საინფორმაციო პორტალი აქვეყნებს ევროკავშირის დაფინანსებით ჩატარებული კვლევის შედეგებს, რომელიც საქსტატისა და გაეროს ქალთა ორგანიზაციის თანამშრომლობით ჩატარდა. „იმ ქალების 2%-მა, რომელიც ოდესმე ყოფილა ორსულად, განაცხადა, რომ განუცდია ფიზიკური ძალადობა მინიმუმ ერთი ორსულობის დროს. საქართველოს მასშტაბით ეს მაჩვენებელი დაახლოებით 15 000 ქალს უდრის. მათგან 37%-მა განაცხადა, რომ ორსულობის დროს მუცელში ჩაარტყეს მუშტი, ან წიხლი. იმ დროს ქალების 64%, რომელმაც ორსულობის დროს ცემის შესახებ განაცხადა, ამბობს, რომ ცემა იყო ძალადობის მიმდინარე ციკლის ნაწილი, რომელსაც ერთი და იგივე პირი ახორციელებდა. უფრო მეტიც, 6%-მა განაცხადა, რომ ძალადობა ორსულობის დროს გამწვავდა", ნათქვამია ორგანიზაციის ვებგვერდზე. სრულად... წყარო: ginsc.net

თბილისი. ომბუდსმენი გაეცნო იაკობ გოგებაშვილის სახელობის სასწავლებლის XII კლასის მოსწავლეების ღია წერილს, რომლითაც მოსწავლეები გამოთქვამენ წუხილს საზოგადოების მხრიდან გამოვლენილ აგრესიის გამო, რომელიც სახალხო დამცველის მიერ მათი სკოლის მიმართ გაცემულ ზოგად წინადადებას მოჰყვა. „უპირველესად, სახალხო დამცველი აღნიშნავს, რომ სკოლის მიმართ გაცემული წინადადება შეეხებოდა ერთ კონკრეტულ ფაქტს, კერძოდ, 2017-2018 სასწავლო წელს VIII კლასში გადამსვლელი ბიჭებისთვის გამოცხადებულ სასტიპენდიო პროგრამას და წინადადებაში არ არის შეფასებული ზოგადად სკოლაში არსებული თანასწორობის მდგომარეობა. ამასთან, სახალხო დამცველისთვის მნიშვნელოვანია, რომ არ შეილახოს ბავშვების უფლებები და მოუწოდებს ყველას, აღნიშნულ საკითხზე გამოხმაურებისას მხედველობაში მიიღონ მოსწავლეების ინტერესები", ნათქვამია ომბუდსმენის განცხადებაში. სრულად... წყარო: ombudsman.ge

შიდა ქართლი. საქართველოს სახალხო დამცველმა სურამის ფსიქიატრიული საავადმყოფო მოინახულა. როგორც სახალხო დამცველის აპარატის მიერ გავრცელებულ ინფორმაციაშია აღნიშნული, სახალხო დამცველი უკიდურესად არის შეშფოთებული დაწესებულებაში არსებული ინფრასტრუქტურული და თერაპიული გარემოთი, რაც პაციენტები ფაქტიურად გაუსაძლის, ადამიანის ღირსების შემლახავ პირობებში ამყოფებს. „სახალხო დამცველის შეფასებით სურამის ფსიქიატრიული საავადმყოფოს მთლიანი შენობა, როგორც საცხოვრებელი, ასევე, საერთო სარგებლობის ტერიტორიები ძველი და გაუმართავია, ძველია ინვენტარიც, უკიდურესად მძიმეა სანიტარულ-ჰიგიენური მდგომარეობა. ხაზგასმით უნდა აღინიშნოს, რომ ფაქტიურად არ არსებობს თერაპიული გარემო", - ვკითხულობთ ინფორმაციაში, - „საავადმყოფოში არსებულ გაუსაძლის პირობებზე სახალხო დამცველი არაერთხელ მიუთითებდა თავის წლიურ ანგარიშებსა და სპეციალურ ანგარიშებში. ასევე, რეკომენდაციებით მიმართავდა შრომის, ჯანმრთელობისა და სოციალური დაცვის სამინისტროს და პაციენტების ადამიანის ღირსებასთან თავსებად პირობებსა და თერაპიულ გარემოში მოთავსების დაუყოვნებლივ უზრუნველყოფას ითხოვდა. სამწუხაროდ, დღეს სახალხო დამცველს მდგომარეობა კვლავ უცვლელი დახვდა". სრულად  წყარო: ორგანიზაციის ვებგვერდი

თბილისი. სახალხო დამცველი კრიტიკულად აფასებს იუსტიციის უმაღლესი საბჭოს მიერ ლილი მსხილაძის მოსამართლის თანამდებობაზე უვადოდ დანიშვნას. ის მოუწოდებს იუსტიციის უმაღლეს საბჭოს, რომ მოსამართლეთა გამწესების შესახებ გადაწყვეტილების მიღების პროცესში გადაამოწმოს და მხედველობაში მიიღოს მოსამართლეთა მიერ ისეთი ღირებულებებისადმი ერთგულება, როგორიც არის თანასწორობა, დისკრიმინაციის აკრძალვა და შემწყნარებლობა. მედიით გავრცელებული ინფორმაციის თანახმად, ლილი მსხილაძე სოციალურ ქსელში გამოეხმაურა 2013 წლის 17 მაისს ჰომოფობიისა და ტრანსფობიის წინააღმდეგ საერთაშორისო დღეს გამართულ აქციას, რომელიც კონტრდემონსტრანტებმა ძალადობრივი გზით დაშალეს. კერძოდ, მსხილაძემ ლგბტ+ თემის წარმომადგენელთა უფლებებისათვის ბრძოლის პროცესს „ავადმყოფობა" და „უმსგავსობა" უწოდა. სრულად  წყარო: ორგანიზაციის ვებგვერდი

თბილისი. პარტნიორობა ადამიანის უფლებებისთვის (PHR) აქვეყნებს ინფორმაციას, რომლის თანახმადაც, მოძალადეს ყოფილ სიდედრთან მიახლოება აეკრძალა. „თბილისის საქალაქო სასამართლომ გაიზიარა ჩვენი ორგანიზაციის იურისტის პოზიცია, სიტყვიერი შეურაცხყოფა განიხილა ფსიქოლოგიური ძალადობის ერთ-ერთ ფორმად და გადაწყვეტილებაში განმარტა, რომ აღნიშნულ ფსიქოლოგიურ ძალადობას შედეგად მოჰყვა მსხვერპლის პატივისა და ღირსების შელახვა. გადაწყვეტილება მნიშვნელოვანია, რადგან სასამართლომ იხელმძღვანელა საქართველოს კანონმდებლობაში სტამბოლის კონვენციის რატიფიცირების შედეგად შესული ცვლილებით, რომლის თანახმადაც, ოჯახის წევრებად მოიაზრებიან არა მხოლოდ ის პირები, რომლებიც მუდმივად ეწევიან ერთიან საოჯახო მეურნეობას, არამედ ისინიც, ვისთან ერთადაც მოძალადეები წარსულში ეწეოდნენ საოჯახო მეურნეობას", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

შიდა ქართლი. საქართველოს სახალხო დამცველმა სოფელ წილკანში ცხინვალში გარდაცვლილი არჩილ ტატუნაშვილის ოჯახს შეხვდა და საქმეში სახალხო დამცველის ჩართულობის შესახებ ინფორმაცია მიაწოდა. „ჩვენ მივაწვდინეთ ინფორმაცია ყველა საერთაშორისო ორგანიზაციას და ვცდილობთ მაქსიმალურად დაჩქარდეს გადმოსვენების პროცესი. ამ ეტაპზე ოჯახისთვისაც და სახელმწიფოსთვისაც პირველი რიგის ამოცანა სწორედ ეს არის. ჯერ-ჯერობით, ძნელია იმის დაზუსტება კონკრეტულად რა დრო დაჭირდება გადმოსვენების პროცესს, ინფორმაციის მიღება ოკუპირებული რეგიონიდან გართულებულია, გამკაცრებულია საპოლიციო რეჟიმი. ჩვენ ვიქნებით ჩართული საქმის ყველა ეტაპზე და მაქსიმალურად მივაწვდით ინფორმაციას საზოგადოებას", – განაცხადა ნინო ლომჯარიამ. სრულად  წყარო: ორგანიზაციის ვებგვერდი

თბილისი. შინაგან საქმეთა სამინისტროს ავტორობით მომზადებულ და საქართველოს მთავრობის მიერ ინიცირებულ საკანონმდებლო პაკეტთან დაკავშირებით, საია-მ პარლამენტს წერილობითი მოსაზრებები წარუდგინა. საია მიიჩნევს, რომ სანქციების გამკაცრება იმ ვითარებაში, როდესაც ადმინისტარციულ სამართალდარღვევათა კანონმდებლობით დადგენილი საქმის განხილვის პროცედურული ნაწილი შესაბამისობაში არ არის მოყვანილი საქართველოს კონსტიტუციასა და საერთაშორისო ხელშეკრულებებით ნაკისრ ვალდებულებებთან, არის გაუმართლებელი და ზრდის ადამიანის უფლებებში არამართლზომიერი ჩარევის რისკს. ამასთან, საია-ს აზრით, სანქციის გამკაცრება იქონიებს მსუსხავ ეფექტს მშვიდობიანი შეკრებისა და გამოხატვის თავისუფლების რეალიზებაზე, მით უფრო იმ პირობებში, როდესაც აღნიშნული მუხლების ნორმატიული შინაარსი არაკონსტიტუციურია. სრულად  წყარო: ორგანიზაციის ვებგვერდი

თბილისი. EMC-ს განცხადების საფუძველზე, ზვიად რატიანის საქმესთან დაკავშირებით, პერსონალურ მონაცემთა დაცვის ინსპექტორმა შინაგან საქმეთა სამინისტრო სამართალდამრღვევად სცნო. 2018 წლის 11 იანვარს, EMC-იმ განცხადებით მიმართა ინსპექტორს და მოითხოვა ზვიად რატიანის საქმესთან დაკავშირებით შემდეგი გარემოებების კანონიერების შესწავლა: პოლიციელების მიერ ზვიად რატიანთან კომუნიკაციის პირადი მობილური ტელეფონით გადაღება; ზვიად რატიანის შესახებ მობილურით გაკეთებული ჩანაწერის საზოგადოებრივი მაუწყებლისთვის გადაცემა; 2018 წლის 23 თებერვლის გადაწყვეტილებით, ინსპექტორმა ორივე საკითხთან დაკავშირებით შსს სამართალდამრღვევად ცნო და 2000 ლარით დააჯარიმა. სრულად  წყარო: ორგანიზაციის ვებგვერდი

თბილისი. საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტში სახალხო დამცველის რეკომენდაციათა შესრულების ანგარიშის წარდგენა დასრულდა. ანგარიშები წარმოადგინეს შრომის, ჯანმრთელობისა და სოციალური დაცვის, განათლებისა და მეცნიერების, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა, საგარეო საქმეთა, კულტურისა და სპორტის, გარემოს დაცვისა და სოფლის მეურნეობის, რეგიონული განვითარებისა და ინფრასტრუქტურის სამინისტროებმა, საქართველოს ცენტრალურმა საარჩევნო კომისიამ, საქართველოს საზოგადოებრივმა მაუწყებელმა. ანგარიშების წარმოდგენის შემდეგ სხდომა კითხვა-პასუხის რეჟიმში გაგრძელდა. სხვა საკითხებთან ერთად, სახალხო დამცველი დაინტერესდა ძალადობის, განსაკუთრებით სექსუალური ძალადობის მსხვერპლ ბავშვთა საჭიროებებისა და პრობლემების მოგვარების საკითხებით; არსებული სერვისების ქმედუნარიანობით და იმ ზომებით, რასაც სახელმწიფო იღებს პრობლემის გადაჭრისთვის. ასევე, ყურადღება გაამახვილა ეთნიკური უმცირესობებისთვის ქართული ენის სწავლების შესახებ გაცემული რეკომენდაციის შესრულების საკითხზე, ქართული ენის პოპულარიზაციის კუთხით სახელმწიფოს ვალდებულებაზე და აღნიშნა, რომ არსებული პროგრამები, რომლებმაც უნდა უზრუნველყოს სახელმწიფო ენის სწავლება, ვერ პასუხობს გამოწვევებს, რაც ეთნიკური უმცირესობების საზოგადოებაში ინტეგრაციის პროცესს უშლის ხელს. სრულად  წყარო: ორგანიზაციის ვებგვერდი

თბილისი. 27 და 28 თებერვალს საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტში „საქართველოში ადამიანის უფლებათა და თავისუფლებათა დაცვის მდგომარეობის შესახებ სახალხო დამცველის 2016 წლის ანგარიშის თაობაზე" საქართველოს პარლამენტის დადგენილებით გაცემული რეკომენდაციების შესრულების მდგომარეობას განიხილავენ. დადგენილება საქართველოს პარლამენტმა 2017 წლის 14 ივლისს მიიღო და მასში სახალხო დამცველის 240–მდე რეკომენდაციაა შესული, რომელთა შესასრულებაც საქართველოს მთავრობას, სამინისტროებსა და სხვადასხვა უწყებებს დაევალა. სრულად  წყარო: ორგანიზაციის ვებგვერდი

თბილისი. ცხინვალის იზოლატორში საქართველოს მოქალაქის, არჩილ ტატუნაშვილის გარდაცვალებას საქართველოს სახალხო დამცველი განცხადებით ეხმაურება. „2018 წლის 23 თებერვალს ცხინვალის დე ფაქტო ხელისუფლებამ გაავრცელა ინფორმაცია ცხინვალის იზოლატორში საქართველოს მოქალაქის არჩილ ტატუნაშვილის გარდაცვალების შესახებ. სახალხო დამცველისათვის მიწოდებული ინფორმაციით, არჩილ ტატუნაშვილი ცხინვალის საავადმყოფოში უკვე გარდაცვლილი მიიყვანეს და სამედიცინო პერსონალის შეფასებით, დაზიანებები მიანიშნებდა, რომ იგი ნაცემი იყო. სახალხო დამცველი მოუწოდებს საოკუპაციო ძალებს დაუყოვნებლივ გადმოსცენ ტატუნაშვილის ცხედარი საქართველოს ხელისუფლებას, რათა მას ჩაუტარდეს სამედიცინო ექპერტიზა და დადგინდეს გარდაცვალების გამომწვევი მიზეზები და ხანდაზმულობა; ასევე, ითანამშრომლონ საქართველოსთან საქმის ეფექტური გამოძიების მიზნით", - აცხადებს სახალხო დამცველი. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია აქვეყნებს ინფორმაციას, რომლის თანახმადაც სასამართლომ მოძალადის მიმართ გამამტყუნებელი განაჩენი გამოიტანა. „თბილისის საქალაქო სასამართლომ მოძალადის მიმართ გამამტყუნებელი განაჩენი გამოიტანა და მას 6 თვით თავისუფლების აღკვეთა შეუფარდა. ამ საქმეში დაზარალებული ქალის ინტერესებს საია იცავდა. ოჯახში ძალადობის მსხვერპლი ყოფილი ქმრის მხრიდან სისტემატურად განიცდიდა ძალადობას. უკანასკნელი შემთხვევა 2017 წლის დეკემბერში დაფიქსირდა, როდესაც მოძალადემ დაარღვია შემაკავებელი ორდერის პირობები და მსხვერპლს სიცოცხლის მოსპობით დაემუქრა. მოსამართლემ განაჩენის გამოცხადებისას განმარტა, რომ სასჯელის დანიშვნისას, მხედველობაში მიიღო შემაკავებელი ორდერის დარღვევის ფაქტი და ის გარემოება, რომ დანაშაული ჩადენილი იყო ოჯახის ერთი წევრის მიერ მეორის მიმართ, რაც თავისთავად წარმოადგენდა დამამძიმებელ გარემოებას", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს დემოკრატიული ინიციატივის დახმარებით, თბილისის საქალაქო სასამართლოს მოძალადე ქმრის (მამისგან) მსხვერპლი ქალისა და მისი სამი შვილის დასაცავად შემაკავებელი ორდერი გამოსცა. „მოძალადე გოჩა ა.-ს აეკრძალა საკუთარ სახლთან (მსხვერპლთა საცხოვრებელთან), სამუშაო, სასწავლო და ყველა იმ ადგილთან მიახლოება, სადაც მაკა და მისი შვილები იქნებიან. ასევე, მოძალადეს აეკრძალა ოჯახში ძალადობის მსხვერპლებთან ნებისმიერი სახის კომუნიკაცია. თბილისის საქალაქო სასამართლომ დამცავი ორდერი გამოსცა მაქსიმალური ვადით, რაც საქართველოს კანონმდებლობის მიხედვით 6 თვეს შეადგენს", ნათქვამია ორგანიზაციის ვებგვერდზე. სრულად... წყარო: gdi.ge

თბილისი. საქართველოს ახალგაზრდა იურისტთა ასოციაციამ საკონსტიტუციო სასამართლოში, მუნიციპალიტეტის საკრებულოს ის უფლებამოსილება გაასაჩივრა, რომლითაც, არჩევნებიდან 6 თვის გასვლის შემდეგ, უნდობლობის გამოცხადებით, შესაძლებელია მერის თანამდებობიდან გადაყენება. „ხალხის მიერ პირდაპირი წესით არჩეული მერის თანამდებობიდან დაუსაბუთებელი გათავისუფლებით საკრებულო არღვევს არა მარტო იმ პირის უფლებას, ვისაც მერის თანამდებობა უკავია, არამედ იმ ამომრჩეველთა უფლებებსაც, რომლებმაც ეს პირი თანამდებობაზე აირჩია. არაკონსტიტუციურია, როდესაც საკრებულოს არ ევალება იმ მიზეზებზე მითითება, რის გამოც ხდება ხალხის მიერ არჩეული მერის თანამდებობიდან გათავისუფლება", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) ზვიად რატიანის ინტერესებს საზოგადოებრივი მაუწყებლის თვითრეგულირების სააპელაციო სასამართლოში დაიცავს. „2018 წლის 7 თებერვალს, საზოგადოებრივი მაუწყებლის სამეურვეო საბჭოში გასაჩივრდა ამავე მაუწყებლის თვითრეგულირების ორგანოს მიერ ზვიად რატიანის საქმეზე მიღებული გადაწყვეტილება, რომელიც წინააღმდეგობაში მოდის „მაუწყებელთა ქცევის კოდექსით" დადგენილ მოთხოვნებთან", ნათქვამია ორგანიზაციის ვებგვერდზე. სრულად... წყარო: gyla.ge

იმერეთი. „საჩხერის შეზღუდული შესაძლებლობის მქონე პირთა რეგისტრირებული კავშირის" ორწლიანი ადვოკატირების შემდეგ, ჭიათურის მუნიციპალიტეტის საკრებულომ სოციალური დახმარების გაცემის წესი შეცვალა. საკრებულოს 2018 წლის 26 იანვარის №18 დადგენილებით, დაამტკიცა „ჭიათურის მუნიციპალიტეტის ბიუჯეტიდან სოციალური დახმარების გაცემისა და მიღების წესი", რომლის მიხედვითაც, მუნიციპალიტეტის ბიუჯეტიდან სოციალური დახმარება მიეცემა ჭიათურის მუნიციპალიტეტის ტერიტორიაზე რეგისტრირებულ მკვეთრად გამოხატულ შეზღუდული შესაძლებლობის მქონე პირებს კომუნალური გადასახადების გადახდის უზრუნველსაყოფად (1 ნოემბრიდან 1 მაისამდე - ყოველთვიურად 30 ლარის ოდენობით; 1 მაისიდან 1 ნოემბრამდე-ყოველთვიურად 20 ლარის ოდენობით) და არა მხოლოდ მკვეთრად გამოხატულ შეზღუდული შესაძლებლობის მქონე მხოლოდ უსინათლო პირებს. სრულად წყარო: ორგანიზაციის გვერდი სოციალურ ქსელში

თბილისი. „აღმოსავლეთ ევროპის მრავალპარტიული დემოკრატიის ცენტრი" (EECMD) და ფონდი „ღია საზოგადოება - საქართველო" 16 თებერვალს ბათუმში ევროკავშირთან ასოცირების ხელშეკრულებით ნაკისრი ვალდებულებების შესრულების ანგარიშის პრეზენტაციას მართავს. ანგარიშები შეეხება შემდეგ საკითხებს: კორუფციის წინააღმდეგ ბრძოლა და საჯარო სამსახურის რეფორმა; შრომის სტანდარტები; ბავშვთა უფლებები; გარემოს დაცვა თანასწორობა. 11:00 საათზე, „თავისუფალ ჟურნალისტთა სახლში" (მისამართზე - მემედ აბაშიძის №48) ორგანიზაცია „პარტნიორობა ადამიანის უფლებებისთვის" აღმასრულებელი დირექტორი, ანა არგანაშვილი ბავშვთა უფლებების საკითხზე ისაუბრებს; პარალელურად, მრავალპარტიული დემოკრატიის აღმოსავლეთ ევროპულ ცენტრში (დემოკრატიის სკოლა, ახმედ მელაშვილის №20) კორუფციის წინააღმდეგ ბრძოლისა და საჯარო სამსახურის რეფორმის, შრომის სტანდარტების, გარემოს დაცვისა და თანასწორობის საკითხებს მიმოიხილავენ. დასწრება ორივე შეხვედრაზე თავისუფალია. სრულად  წყარო: http://www.osgf.ge

თბილისი. საქართველოს სახალხო დამცველი ეხმიანება საქართველოს იუსტიციის სამინისტროს მიერ მომზადებულ კანონპროექტს „სახელმწიფო ინსპექტორის სამსახურის შესახებ". სახალხო დამცველი მიიჩნევს, რომ „სახელმწიფო ინსპექტორის სამსახურის შესახებ" საქართველოს კანონის პროექტით წარმოდგენილი მოდელი, შესაძლოა, ეფექტური იყოს გამოძიების ეტაპზე არსებული პრობლემების გადაჭრის კუთხით, თუკი მოხდება კანონპროექტში არსებული რიგი პრინციპული მნიშვნელობის მქონე საკითხების კორექტირება. სწორედ ამ მიზნით, საქართველოს სახალხო დამცველმა საქართველოს იუსტიციის სამინისტროს წარუდგინა მოსაზრებები კანონპროექტთან დაკავშირებით. სრულად  წყარო: ორგანიზაციის ვებგვერდი

თბილისი. GIZ-ის სამართლის პროგრამამ გამოსცა ჰააგის 1980 წლის კონვენცია „ბავშვთა საერთაშორისო გატაცების სამოქალაქო ასპექტების შესახებ". იგი პრაქტიკული სახელმძღვანელობა და მისი ელ–ვერსიას შეგიძლიათ გაეცნოთ. სახელმძღვანელო... წყარო: GIZ-ის სამართლის პროგრამა

თბილისი. „კოალიცია დამოუკიდებელი და გამჭვირვალე მართლმსაჯულებისთვის" ეხმიანება საქართველოს იუსტიციის სამინისტროს მიერ მომზადებულ კანონპროექტს, რომლის მიზანიც სახელმწიფო ინსპექტორის სამსახურის შექმნაა. „კანონპროექტის თანახმად, ახალი სამსახური შეიქმნება პერსონალურ მონაცემთა დაცვის ინსპექტორის ნაცვლად და ამ უკანასკნელის დღევანდელ ფუნქციებთან ერთად, სამსახური შეითავსებს სამართალდამცავი ორგანოს წარმომადგენლის, მოხელის ან მასთან გათანაბრებული პირის მიერ კონკრეტული ტიპის დანაშაულებზე გამოძიების წარმოების უფლებამოსილებას", - ნათქვამია განცხადებაში, -„კოალიცია იმედოვნებს, რომ წარმოდგენილ კანონპროექტთან დაკავშირებით შესაძლებელი იქნება როგორც ტექნიკურ/ფორმალურ საკითხებზე, ისე პრინციპების დონეზე არგუმენტირებული მსჯელობა და დისკუსია, რათა პირველ რიგში, ფუნდამენტურ საკითხებზე იქნეს სწორი და რაციონალური გადაწყვეტილება მიღებული. წარმოდგენილ დოკუმენტში კოალიცია სწორედ იმ საკითხებზე ამახვილებს ყურადღებას, რაც ჩვენი პოზიციით, პრინციპული მნიშვნელობის არის ეფექტიანი და დამოუკიდებელი საგამოძიებო სამსახურის შექმნისთვის, რომელიც იქნება ღირსეული პასუხი დღევანდელ გამოწვევებზე". სრულად  წყარო: https://gyla.ge