კახეთი. 18 აპრილს, ადამიანის უფლებების სწავლებისა და მონიტორინგის ცენტრმა (EMC) უმასპინძლა სამუშაო შეხვედრას თემაზე: პანკისში ჩატარებული სპეცოპერაციის სოციალური და ემოციური გავლენები ადგილობრივ ქისტ თემზე. „შეხვედრა ადგილობრივი თემის წარმომადგენლებს, მათ შორის, უხუცესთა საბჭოს, ჯამაათის, ადგილობრივი საზოგადოებრივი ორგანიზაციებისა და ჯგუფების წარმომადგენლებს დაეთმო. მათ აღწერეს და შეაფასეს ხეობაში 2017 წლის 26 დეკემბრის სპეცოპერაციის შემდეგ შექმნილი მდგომარეობა და იმსჯელეს ხეობაში სახელმწიფო პოლიტიკის ძირითად ხარვეზებზე, რომელიც ადგილობრივი ქისტი თემის სოციალური ინკლუზიის და თანასწორი შესაძლებლობების შექმნის ნაცვლად, სახელმწიფო უსაფრთხოების პარადიგმას ეფუძნება შედეგად კი ხეობის იზოლაციას უწყობს ხელს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ადრეული ქორწინების საზიანო პრაქტიკის შესახებ თვისებრივი კვლევა განხორციელდა საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ გაეროს მოსახლეობის ფონდისა (UNFPA) და გაეროს ბავშვთა ფონდის (UNICEF) მხარდაჭერით. კვლევის თანახმად, „დაქორწინებული მოზარდი გოგონასთვის, ოჯახის ყოლასთან ერთად, განათლების მიღება შეუთავსებელია. ქორწინების შემდგომი როლები და პასუხისმგებლობები უმეტესწილად გადანაწილებულია გენდერული ნიშნით. ოჯახის ფინანსების განკარგვის, გოგონას განათლების გაგრძელების და ოჯახის დაგეგმვის შესახებ გადაწყვეტილებებს ქმარი და ქმრის მშობლები იღებენ. გოგონას მოვალეობად ოჯახისა და ბავშვის მოვლა მიიჩნევა". სრულად... წყარო: unicef.ge

თბილისი. არასამთავრობო ორგანიზაციები თვლიან, რომ დეპუტატ არველაძის ინიციატივა ეწინააღმდეგება საქართველოს ანტიკორუფციული პოლიტიკის მიზნებსა და ქვეყნის საერთაშორისო ვალდებულებებს. „შემოთავაზებული პროექტი მნიშვნელოვნად ასუსტებს დღეს არსებულ პრევენციისა და სანქცირების სტანდარტს, ზრდის ინტერესთა კონფლიქტის შესაძლებლობას და ამცირებს თანამდებობის პირების მიმართ საზოგადოებრივი კონტროლის განხორციელების შესაძლებლობას. განსაკუთრებით შემაშფოთებელია წინადადება, რომ გაუქმდეს ჯარიმა თანამდებობის პირის ქონებრივ დეკლარაციაში საჯარო სამსახურის ბიუროს მიერ დარღვევის აღმოჩენის შემთხვევაში, რადგანაც ასეთი ცვლილება არსებითად აზრს დაუკარგავს ქონებრივი დეკლარაციების მონიტორინგის სისტემას, რომელიც გასულ წელს ამოქმედდა და ყველაზე მნიშვნელოვანი ანტიკორუფციული რეფორმა იყო უკანასკნელ წლებში. აღსანიშნავია, რომ მონიტორინგის სისტემის ეფექტიანი ფუნქციონირების უზრუნველყოფა საქართველოს ხელისუფლების ვალდებულებაა საქართველო-ევროკავშირის 2017-2020 წლების ასოცირების დღის წესრიგის თანახმად", ნათქვამია ერთობლივ განცხადებაში. სრულად... წყარო: www.transparency.ge

თბილისი. ფსიქიატრიულ დაწესებულებაში მოთავსებული პირებისთვის სამართლებრივი დახმარების აღმოჩენის მიზნით, ორგანიზაციის წარმომადგენლები ხშირად მართავენ საინფორმაციო შეხვედრებს სხვადასხვა ფსიქიატრიულ დაწესებულებაში. „სწორედ ამ მიზნით, 2018 წლის 27-28 მარტს ორგანიზაციის იურისტები ხონში (ქუტირი) მდებარე ფსიქიკური ჯანმრთელობის ცენტრში იმყოფებოდნენ, რა დროსაც მათ არ მიეცათ ფსიქიატრიულ დაწესებულებაში მოთავსებულ პირებთან პირდაპირი კომუნიკაციის შესაძლებლობა, რაც თავის მხრივ, გვაფიქრებინებს, რომ ამ ადამიანებს, დაწესებულების ადმინისტრაციის მხრიდან, ირიბად შეეზღუდათ სამართლებრივი დახმარების მიღების უფლება. მიუხედავად დაწესებულების ადმინისტრაციის პოზიციისა, ფსიქიატრიულ დაწესებულებაში მოთავსებული პირებისთვის ორგანიზაციის წარმომადგენლებს გაეწიათ სამართლებრივი დახმარება, მათ იურისტებს არ მისცეს შესაძლებლობა თავად შესულიყვნენ განყოფილებაში, შეხვედროდნენ იქ მოთავსებულ პირებს და სურვილის შემთხვევაში, გაეცათ სამართლებრივი კონსულტაციები. ორგანიზაციამ უკვე მიმართა ჯანდაცვის სამინისტროს გაითვალისწინოს აღნიშნული გარემოებები და მიიღოს ყველა საჭირო ზომა იმისათვის, რომ როგორც ქუტირის ფსიქიატრიულ დაწესებულებაში, ასევე ყველა სხვა ფსიქიატრიულ დაწესებულებაში მოთავსებულ პირებს არ შეეზღუდოთ უფლებადამცველებთან შეხვედრისა და სამართლებრივი დახმარების მიღების უფლება", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. საქართველოს სახალხო დამცველი ნინო ლომჯარია ეხმიანება სოციალური ქსელით გავრცელებულ ვიდეო მასალას, რომელიც ბავშვის მიმართ სავარაუდო უგულებელყოფის ფაქტს ასახავს. „2018 წლის 18 აპრილს სახალხო დამცველი პირადად შეხვდა ბავშვს, მის მშობელს და მკურნალ ექიმს, ასევე მყისიერი კომუნიკაცია შედგა სოციალური მომსახურების სააგენტოსთან. მიუხედავად მშობლის თანხმობისა, სახალხო დამცველი თავს იკავებს არასრულწლოვნის ჯანმრთელობის მდგომარეობის შესახებ ინფორმაციის გავრცელებისგან, თუმცა, აღნიშნავს, რომ ბავშვის ფსიქო-ემოციური მდგომარეობა, მათ შორის ოჯახთან ურთიერთობის თვალსაზრისით ამ ეტაპზე დამაკმაყოფილებელია. არასრულწლოვანი ჩართულია განათლების მიღების პროცესში და მისი ძირითადი სამედიცინო და სოციალური საჭიროებები უზრუნველყოფილია", ნათქვამია ორგანიზაციის ვებგვერდზე. სრულად... წყარო: ombudsman.ge

თბილისი. არასამთავრობო ორგანიზაციები დაუყოვნებლივ რეაგირებას მოითხოვენ პარლამენტის და მთავრობის მხრიდან ტყიბულის შახტის შემთხვევასთან დაკავშირებით. „ტყიბულში 5 აპრილს მომხდარმა საწარმოო შემთხვევამ, რომელმაც ექვსი მეშახტის დაღუპვა და სამი მათგანის დაშავება გამოიწვია, ცხადი გახადა სახელმწიფოს მხრიდან უკანასკნელ დროს გადადგმული ნაბიჯების არაეფექტურობა და არსებული პოლიტიკის უუნარობა რეალურად დააზღვიოს ის რისკები, რაც დასაქმებულების დაღუპვას და დასახიჩრებას იწვევს. სახელმწიფოს პოლიტიკა კი ვერ უზრუნველყოფს ადამიანების მინიმალურ სოციალურ დაცულობას. აღსანიშნავია, რომ მთავრობის მიერ „შრომის უსაფრთხოების კანონის" ინიცირება 2017 წელს სწორედ ტყიბულის შახტში 4 მეშახტის დაღუპვის საპასუხოდ განხორციელდა. არსებული მდგომარეობდა ცალსახად მიუთითებდა კანონის უმოკლეს ვადებში მიღების საჭიროებაზე. ამის მიუხედავად, კანონპროექტის განხილვა თითქმის ერთი წლის მანძილზე გაჭიანურდა, რისი მიზეზი საქართველოს ეკონომიკური გუნდის პოზიციონირება გახდა... მივიჩნევთ, რომ სახელმწიფომ დაუყოვნებლივ უნდა გაიაზროს და აღიაროს მისი მნიშვნელოვანი როლი დასაქმებულთა და მათი ოჯახების ფიზიკური და სოციალური უსაფრთხოების უზრუნველყოფაში და უსაფრთხოების კონტროლის სპეციალური ad hoc სისტემის შექმნითა და სოციალური დაცვის მინიმალური გარანტიების შემუშავებით უზრუნველყოს მათი მყისიერი საჭიროებების გადაჭრა", ნათქვამია ორგანიზაციის განცხადებაში. სრულად... წყარო: gyla.ge

თბილისი. 19 აპრილს, გაიმართება კონფერენცია „მტკიცებულებებიდან პოლიტიკასა და ქმედებამდე - ადრეულ/ბავშვთა ასაკში ქორწინებისა და ქალთა სასქესო ორგანოების დასახიჩრების საზიანო პრაქტიკები". კონფერენციაზე წარმოდგენილი იქნება 2017 წელს ადრეულ/ბავშვობის ასაკში ქორწინებისა და ქალთა სასქესო ორგანოების დასახიჩრების/კვეთის საზიანო პრაქტიკების შესახებ ჩატარებული თვისებრივი კვლევის შედეგები. თვისებრივი კვლევის შედეგად დადგინდა, რომ „ადრეული/ბავშვობის ასაკში ქორწინება გავრცელებული მოვლენაა მთელი ქვეყნის მასშტაბით, დედაქალაქის - თბილისის - ჩათვლით, ის ასევე გვხვდება სხვადასხვა ეთნიკური თუ რელიგიური კუთვნილების თემებში". სრულად... წყარო: georgia.unfpa.org

თბილისი. „ქალთა მზერა" უცნობი ავტორის კრიტიკულ, ფემინისტურ რეფლექსიას აქვეყნებს ჟურნალისტ, თამარ ჩერგოლეიშვილის სიტყვით გამოსვლაზე Women in the World-ის სამიტზე. „მჩაგვრელები" ავტორიტარი ლიდერები არიან, რომლებიც თავისუფლებისთვის მებრძოლ ჟურნალისტებს თუ აქტივისტებს დევნიან. ჩაგვრის ამგვარად განხილვა სტრუქტურული ჩაგვრების უგულებელყოფას იწვევს. ამ ნარატივის მიხედვით, ჩაგვრა მხოლოდ ისაა, რასაც „ბოროტი ლიდერი" აკეთებს, შეუძლებელია ჩაგვრამ ლიბერალური დემოკრატიის ინსტიტუტებისა და სტრუქტურების ყოველდღიურობაში იარსებოს; შეუძლებელია „თავისუფლებამ" (რაც სინამდვილეში კონკურენციის თავისუფლებას ნიშნავს) ჩაგვრა წარმოშვას. ეს იწვევს იმას, რომ პრაქტიკულად არ არის საუბარი განხილულ ქვეყნებში ქალთა რეალურ მდგომარეობაზე. მაგალითად, თამარა ბევრს ლაპარაკობს პუტინზე, მაგრამ არც ერთხელ არ ახსენებს საქართველოში ფემიციდისა და ქალთა მიმართ ძალადობის პრობლემას ან საკანონმდებლო ორგანოებში ქალი წარმომადგენლების ნაკლებობას (მარტში საქართველოს პარლამენტმა გენდერული კვოტირების კანონპროექტი განიხილა, მაგრამ კანონი ჩავარდა. „ევროპულმა საქართველომ", პარტიამ, რომელთანაც თამარა ჩერგოლეიშვილია ასოცირებული, კვოტების მხარდაჭერაზე უარი განაცხადა)", ნათქვამია ბლოგპოსტში. სრულად... წყარო: womensgaze.org.ge

თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ ირაკლი ხოფერიას მიმართ განხორციელებული წამების საქმის გამოძიება უსაფუძვლოდ ჭიანურდება. 2017 წლის 16 თებერვალს, ირაკლი ხოფერია პოლიციის თანამშრომლებმა დააკავეს, აწამეს, შემდეგ კი გაირკვა რომ, ის სხვა პირში შეეშალათ. გათავისუფლების შემდეგ, მოქალაქეს მრავლობითი დაზიანებები აღენიშნებოდა: თავის ტრავმა, გულმკერდის ზედაპირული ტრავმა, სისხლნაჟღენთები... „საია-მ არაერთხელ მოუწოდა შესაბამის ორგანოებს, დროულად ჩაეტარებინათ ყველა საგამოძიებო მოქმედება და პასუხისგებაში მიეცეთ პოლიციის შესაბამისი თანამშრომლები, თუმცა, 2017 წლის თებერვლიდან დღემდე ამ საქმეზე განვითარებული მოვლენები გვაფიქრებინებს, რომ გამოძიება არაეფექტურად და მნიშვნელოვანი შეფერხებებით მიმდინარეობს". ორგანიზაცია მოუწოდებს პროკურატურას, დროულად გამოიძიოს ირაკლი ხოფერიას საქმე. სრულად... წყარო: gyla.ge

თბილისი. გენდერული საინფორმაციო პორტალის ინფორმაციით, საქართველო პირველად UN Women-ის აღმასრულებელი საბჭოს წევრი გახდა. „გაერო-ს ქალთა ორგანიზაციის აღმასრულებელი საბჭო 41 წევრი სახელმწიფოსგან შედგება და მის ფუნქციას წარმოადგენს გაერო-ს ქალთა ორგანიზაციის საქმიანობის ხელშეწყობა წევრი ქვეყნების წინაშე მდგარი გამოწვევებისა და მათი პრიორიტეტების შესაბამისად", ნათქვამია ორგაბნიზაციის ვებგვერდზე. სრულად... წყარო: ginsc.net

თბილისი. საქართველოს ახალგაზრდა იურისტთა ასოციაციამ (საია) საქართველოს პარლამენტს წერილობითი მოსაზრებები წარუდგინა პარლამენტის წევრების, ზაზა გაბუნიას, არჩილ თალაკვაძის, მარიამ ჯაშის, ბექა ოდიშარიას და ალექსანდრე ქანთარიას მიერ ინიცირებულ საკანონმდებლო პაკეტზე. „წარმოდგენილი კანონპროექტის თანახმად, კოდექსს ემატება 1502 მუხლი, რომლითაც ხდება ქ. თბილისის მუნიციპალიტეტის იერსახის დამახინჯების 150-ე მუხლიდან ცალკე გამოყოფა და დაწესებულია უფრო მაღალი ჯარიმები, ვიდრე ეს 150-ე მუხლით დღეისათვის არის დადგენილი. 150-ე მუხლის პრაქტიკაში გამოვლენილი განმარტებები პოლიციას აძლევს შესაძლებლობას, ხელისუფლებისთვის არასასურველი შინაარსის გამოხატვის ფორმები „იერსახის დამახინჯებად", და შესაბამისად, სამართალდარღვევად დააკვალიფიციროს[2]. საია-ს მოსაზრებით, აღნიშნული მუხლი ეწინააღმდეგება საქართველოს კონსტიტუციის 24-ე (გამოხატვის თავისუფლება), 25-ე (მშვიდობიანი შეკრების უფლება) და 26-ე (გაერთიანების თავისუფლება) მუხლებს", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. სახალხო დამცველი, ნინო ლომჯარია მწუხარებას გამოთქვამს 2018 წლის 13 აპრილს, თბილისში მომხდარი ქალის მკვლელობის გამო და თანაგრძნობას უცხადებს გარდაცვლილის ოჯახსა და ახლობლებს. „მიუხედავად იმისა, რომ ბოლო წლების განმავლობაში გაიზარდა ოჯახში ძალადობის გამოვლენის მაჩვენებელი და ერთი შეხედვით პრობლემამ ჩაკეტილი სოციალური წრიდან საჯარო სფეროში გადაინაცვლა, კვლავ მაღალია ძალადობის სასტიკი ფორმების და მკვლელობების რიცხვი. 2017 წელს მომხდარი ქალის მკვლელობის 26 შემთხვევიდან 14 ოჯახში ძალადობის პირობებში იყო ჩადენილი, ხოლო 15 მკვლელობის მცდელობის ფაქტიდან 12 ოჯახურ დანაშაულს უკავშირდებოდა. სახალხო დამცველი მუდმივად მიუთითებს დამცავი ღონისძიებების არაეფექტურობასა და პრევენციის ღონისძიებების გაძლიერების საჭიროებაზე", ნათქვამია განცხადებაში. სრულად... წყარო: www.ombudsman.ge

თბილისი. 13 თებერვალს არასამთავრობო ორგანიზაციებმა და დამოუკიდებელმა აქტივისტურმა ჯგუფებმა ერთობლივი წერილით მიმართეს ევროკომისრებს იოჰანეს ჰანს, მარიანა ტისენის და სესილია მალმსტრომს. საპასუხო წერილი ევროკომისრებისგან „შრომის უსაფრთხოების შესახებ" საქართველოს კანონის მიღების შემდეგ გამოიგზავნა, სადაც აღწერილია ევროკომისრების მოსაზრებები შრომის უსაფრთხოების მიღებულ კანონთან და საქართველოში შრომის პოლიტიკის საკითხებთან დაკავშირებით. „საქართველოში არსებული ამჟამინდელი პრაქტიკა, ისევე, როგორც „შრომის უსაფრთხოების შესახებ" კანონი, სრულად არ შეესაბამება საქართველოს იმ ვალდებულებებს, რომელიც გულისხმობს ეროვნული კანონმდებლობის დაახლოებას ევროკავშირის [სტანდარტებთან] სამუშაო ადგილას ჯანმრთელობისა და უსაფრთხოების და შრომის დაცვის სფეროში. ეს უკანასკნელი უზრუნველყოფს ეფექტიანი, პროპორციული და გამჭვირვალე სანქციების მოქმედებას, რომლებსაც დამსაქმებლებთან მიმართებით გააჩნია ნამდვილი და შემაკავებელი ეფექტი", საქართველოს ახალგაზრდა იურისტთა ასოციაციის მიერ გავრცელებულ წერილში.  სრულად... წყარო: gyla.ge

თბილისი. არასამთავრობო ორგანიზაციები 2016 წლის 10 იანვარს, გუდაურში, სათხილამურო ტრასაზე დაღუპული სალომე ტატიშვილის საქმეს ეხმაურებიან. „როგორც ცნობილია, 12 წლის სალომე ტატიშვილს, ტრასაზე დაშვებისას უკნიდან შეეჯახა დიდი სიჩქარით მოსრიალე სხვა ახალგაზრდა. მიღებული დაზიანებების შედეგად სალომე ტატიშვილი ადგილზე გარდაიცვალა. საქმის მიმართ არსებული მაღალი საჯარო ინტერესის და საზოგადოებაში გაჩენილი არაერთი შეკითხვის გათვალისწინებით, გვსურს გამოვეხმაუროთ პირველი ინსტანციით საქმის სასამართლო განხილვისას გამოვლენილ ხარვეზებს. თბილისის საქალაქო სასამართლოს მიერ გამოტანილი განაჩენი მიუთითებს, რომ სასამართლოს მსჯელობა არაერთ შემთხვევაში არის აბსტრაქტული და არადამაჯერებლი. განაჩენში მოყვანილი მსჯელობებიდან იკვეთება, რომ მთელ რიგ შემთხვევებში, მოსამართლის მიერ მტკიცებულებები ინტერპრეტირებული და შეფასებულია ცალმხრივად და ყურადღების მიღმაა დატოვებული არაერთი მოწმის ერთგვაროვანი ჩვენება. სასამართლო ფაქტებს უნდა აფასებდეს ობიექტურად და მიუკერძოებლად, რაც მოითხოვს ყველა მტკიცებულების შეფასებას, ცალ-ცალკე და ერთობლიობაში, ვინმესთვის რაიმე უპირატესობის მინიჭების გარეშე. მართლმსაჯულების სამართლიანად აღსრულების მიზნით, მნიშვნელოვანია თბილისის სააპელაციო სასამართლოში საქმის განხილვისას, ყურადღება გამახვილდეს იმ საკითხებზე, რაც პირველი ინსტანციის სასამართლოს მიერ არადამაჯერებლად, საეჭვოდ და დაუსაბუთებლად იქნა გადაწყვეტილი/შეფასებული, ან საერთოდ შეფასების გარეშეა დატოვებული", ნათქვამია ერთობლივ განცხადებაში. სრულად... წყარო: phrgeorgia.wordpress.com

10 აპრილს საქართველოს ახალგაზრდა იურისტთა ასოციაციამ, სარჩელით მიმართა საქართველოს საკონსტიტუციო სასამართლოს. ორგანიზაციამ მოითხოვა საგადასახადო კოდექსში არსებული ჩანაწერის იმ ნორმატიული შინაარსის გაუქმება, რომელიც ზღუდავს მაღალმთიან რეგიონებში მცხოვრებ პირებზე საგადასახადო შეღავათების თანაბრად გავრცელებას. „საია იცავს მოქალაქე მელს ბდოიანის ინტერესებს, რომელიც აკმაყოფილებს „მაღალმთიანი რეგიონების განვითარების შესახებ" კანონით გათვალისწინებულ კრიტერიუმებს, თუმცა საგადასახადო შეღავათებით ვერ სარგებლობს საგადასახადო კოდექსში არსებული დისკრიმინაციული ჩანაწერის გამო. მოსარჩელე არის ნინოწმინდის მუნიციპალიტეტში მუდმივად მცხოვრები პირი, თუმცა მასზე საგადასახადო შეღავათი არ გავრცელდა, რადგან იგი ცხოვრობს ნინოწმინდის მუნიციპალიტეტის ერთ ადმინისტრაციულ ერთეულში, ხოლო მისი მიწის ნაკვეთი ამავე მუნიციპალიტეტის სხვა სოფლებში მდებარეობს. საია მიიჩნევს, რომ აღნიშნული მიდგომა ეწინააღმდეგება კონსტიტუციით გარანტირებულ თანასწორობის უფლებას. საგადასახადო შეღავათები თანაბრად უნდა ვრცელდებოდეს მაღალმთიან რეგიონებში მცხოვრებ პირებზე. შესაბამისად, საია ასაჩივრებს საგადასახადო კოდექსის 206-ე მუხლის იმ ნორმატიულ შინაარსს, რომელიც მოითხოვს, რომ საგადასახადო შეღავათებით სარგებლობისთვის პირი იმავე ადმინისტრაციულ ერთეულში ცხოვრობდეს, რომელშიც იგი მიწის ნაკვეთს ფლობს", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. რადიო „თავისუფლება" ავრცელებს სამოქალაქო აქტივისტის, ესმა გუმბერიძის ვლოგს, სადაც ის იუსტიციის სახლში ორგანიზაციის დაფუძნებასთან დაკავშირებით შექმნილ პრობლემებზე საუბრობს. „ვიცოდი, რომ იუსტიციის სახლს აქვს ბრაილის პრინტერი. მოვითხივე ამოებეჭდათ დოკუმენტის ტექსტი, მაგრამ ვერ ამობეჭდეს, რადგან პრინტერი ტექნიკურად გაუმართავი იყო. უსინათლოების 95 %- მა არც იცის ბრაილი. რა უნდა ქნან მათ?!" სრულად... წყარო: www.radiotavisupleba.ge

თბილისი. 12 აპრილს, სახალხო დამცველი, ნინო ლომჯარია სასჯელაღსრულებისა და პრობაციის მინისტრს კახა კახიშვილს შეხვდა. ომბუდსმენმა სასჯელაღსრულებისა და პრობაციის სისტემაში გატარებული და მიმდინარე რეფორმების, აგრეთვე სამომავლო გეგმების შესახებ ინფორმაცია მიიღო. სრულად... წყარო: ombudsman.ge

ახალგაზრდა იურისტთა ასოციაციამ (საია) სტუდენტებს ichange-ის პლატფორმა გააცნო. „დიკუსია ივ.ჯავახიშვილის სახელობის თბილისის სახელმწიფო უნივერსიტეტში, თბილისის სახელმწიფო სამედიცინო უნივერსიტეტში, ბათუმის შოთა რუსთაველის სახელმწიფო უნივერსიტეტსა და ოზურგეთის კოლეჯ „ჰორიზონტში" გაიმართა. შეხვედრის ფარგლებში მიმოხილულ იქნა პეტიციების პორტალის შექმნის ისტორია, ელექტრონული პეტიციის არსი, მისი დანიშნულება, ვებგვერდ ichange.gov.ge-ს ინტერფეისი, პორტალზე რეგისტრაციის, ინიცირებისა და ხელმოწერის პროცედურები, აგრეთვე პეტიციის განხილვისა და გადაწყვეტილების მიღების წესები", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. სამოქალაქო პლატფორმა „არა-ფობიას!" განცხადებას ავრცელებს შავკანიან სტუდენტებზე თავდასხმის ფაქტთან დაკავშირებით. „უკიდურესად შემაშფოთებელია 8 აპრილის საღამოს დიღმის მასივში შავკანიან სტუდენტებზე თავდასხმის ფაქტი. გავრცელებულ კადრებში ჩანს თავდამსხმელთა რასისტული მოტივები. ეს ინციდენტი ბოლო პერიოდში გამოვლენილ შეუწყნარებლობის საფუძველზე ჩადენილ სხვა ქმედებებთან ერთად, სახელმწიფოს მიერ თანმიმდევრული და სისტემური ანტიდისიკრიმინაციული პოლიტიკის გატარების აუცილებლობაზე მიუთითებს", ნათქვამია ორგანიზაციის ვებგვერდზე. სრულად... წყარო: mdfgeorgia.ge

კახეთი. საქართველოს სახალხო დამცველის მოადგილე, ეკატერინე სხილაძე კახეთის მუნიციპალიტეტების მერიისა და საკრებულოს თანამშრომლებს შეხვდა. შეხვედრა სახალხო დამცველის აპარატის თელავის ოფისის თანამშრომლებთან და ქალთა საინფორმაციო ცენტრის წარმომადგენელთან ერთად გაიმართა. ამ საინფორმაციო ღონისძიების მიზანს ადგილობრივ თვითმმართველობებში არსებული გენდერული საბჭოების შესახებ ინფორმაციის მიღება და მერიაში გენდერული თანასწორობის საკითხებზე პასუხისმგებელი პირების საქმიანობისა და გეგმების გაცნობა წარმოადგენდა. სრულად  წყარო: ორგანიზაციის ვებგვერდი

თბილისი. 4 აპრილს, „ადამიანის უფლებების სწავლებისა და მონიტორინგის ცენტრმა" (EMC) და „საქართველოს იურიდიული ფირმების ასოციაციამ" (სიფა) ერთობლივი კვლევის პრეზენტაცია გამართეს. „ღონისძიებაზე წარმოდგენილი კვლევა - „საგამოძიებო სისტემის ანალიზი", ეხებოდა საგამოძიებო უწყებების ინსტიტუციურ მოწყობას, გამოძიების პროცესში გამომძიებლის დამოუკიდებლობის ხარისხს, ინდივიდუალური გამომძიებლების კვალიფიკაციისა და მომზადების დონეს, ასევე, პროკურორის როლთან, გამოძიების ობიექტურობასა და მიუკერძოებლობასთან დაკავშირებულ საკითხებს. კვლევა, რომელიც საერთაშორისო და ადგილობრივის დახმარებით, ერთი წლის განმავლობაში მზადდებოდა, მიმოიხილავს სხვა ქვეყნების სამართლებრივ სისტემებსა და გამოცდილებას, აგრეთვე საქართველოში დამკვიდრებული პრაქტიკის კუთხით არსებულ ვითარებას. დოკუმენტში ასევე გაანალიზებულია რელევანტური ნორმატიული აქტები", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ძალადობის მსხვერპლმა მ. რ.-მ და მისმა არასრულწლოვანმა შვილმა დახმარებისათვის „საფარს" მიმართეს. „2017 წლიდან, მ. რ-ისა და მისი არასრულწლოვანი შვილის მიმართ სახელმწიფო უსაფრთხოების სამსახურის თანამშრომელი სექსუალურ, ეკონომიკურ, ფიზიკურ და ფსიქოლოგიურ ძალადობას ახორციელებდა. „საფარის" დახმარებით, მ. რ-მ პოლიციას მიმართა. იგი აცხადებდა, რომ სისტემატურად იყო უკანონო თვალთვალის, არასასურველი კომუნიკაციის მსხვერპლი, აღნიშნული ვითარება იწვევდა მის ფსიქიკურ ტანჯვას და ცხოვრების წესის შეცვლას აიძულებდა. შედეგად, დაიწყო გამოძიება სისხლის სამართლის კოდექსის 126-ე მუხლით, რაც ძალადობას მოიცავს. 21 მარტს, თბილისის საქალაქო სასამართლომ სს კოდექსის 126-ე მუხლით დამნაშავედ ცნო სუს-ის თანამშრომელი, 4 წლით თავისუფლების აღკვეთა და 5000 ლარი ჯარიმა შეუფარდა", ნათქვამია ორგანიზაციის ვებგვერდზე. სრულად... წყარო: sapari.ge