თბილისი. აქტიურ სტუდენტთა ასოციაცია–ASA იწყებს პროექტს „აქტიურ ლექციათა კვირეული", რომელშიც ჩაერთვებიან უნივერსიტეტის სტუდენტები. ისინი გაიგზავნებიან საქართველოს სკოლებში და ჩაატარებენ ტრენინგ-ლექციებს სხვადასხვა თემაზე მოსწავლეთა და დაინტერესების შემთხვევაში პედაგოგებისთვის.  მონაწილეობის მსურველმა სტუდენტებმა მოკლე ბიოგრაფია (CV), ფოტო–სურათი უნდა გააგზავნონ 20 ნოემბრის ჩათვლით მისამართზე asalectures@gmail.com  სრულად წყარო: ორგანიზაციის გვერდი სოციალურ ქსელში

აჭარა. მშვიდობის, დემოკრატიის და განვითარების კავკასიური ინსტიტუტის ორგანიზებით 3 ნოემბერს ბათუმში  გაიმართა სამუშაო შეხვედრა სტუდენტურ დებატების შესახებ. შეხვედრას ესწრებოდნენ ბათუმის შოთა რუსთაველის სახელმწიფო უნივერსიტეტის სტუდენტები. აღნიშნული შეხვედრის დროს სტუდენტები გაეცნენ დებატების წესებს და იმ თემებს, რომელზეც  ნოემბრის ბოლოს იდებატებენ. სტუდენტური დებატები იმართება პროექტის: სამოქალაქო საზოგადოება განვითარებისთვის: დეცენტრალიზაცია და მონაწილეობა საქართველოში - ფარგლებში, ნიდერლანდების საგარეო საქმეთა სამინისტროს ფინანსური მხარდაჭერით. წყარო: participate.ge

თბილისი. 19 ნოემბერს, ფონდის  „ღია საზოგადოება საქართველო"  ოფისში პროგრამის – „აღმოსავლეთი–აღმოსავლეთი საზღვრებს გარეშე" – ფარგლებში გაიმართება სემინარი ჟურნალისტებისთვის ბავშვებზე ძალადობის საკითხებზე. სემინარს ჩაატარებს ფსიქოლოგი ქეთევან თავართქილაძე,  საქართველოს საზოგადოებრივი ჯანდაცვის და მედიცინის განვითარების ფონდიდან. სემინარზე ყურადრება გამახვილდება შემდეგ საკითხებზე: ბავშვის თვალით  დანახული ძალადობა - რას ამბობენ, ფიქრობენ და გრძნობენ ბავშვები საკუთარ თავზე, დიდებზე, ცხოვრებაზე; ძალადობის ზეგავლენა ბავშვის განვითარებასა და კეთილდღეობაზე; საზოგადოების როლი ძალადობისაგან ბავშვის დაცვაში; მედია და ბავშვები: როგორ გავაშუქოთ ბავშვზე ძალადობასთან დაკავშირებული საკითხები ისე, რომ არ ვავნოთ. სრულად წყარო: osgf.ge

გურია. 7 ნოემბერს ოზურგეთის დემოკრატიული ჩართულობის ცენტრის ორგანიზებით გაიმართა საჯარო დისკუსია საბავშვო ბაღების თემაზე. განხილულ იქნა სტრატეგიული დაგეგმვის საკითხები, რომელიც აიპ ოზურგეთის „სკოლამდელი აღზრდის ცენტრმა" შეიმუშავა არასამთავრობო ორგანიზაცია „ოზურგეთის ახალგაზრდა მეცნიერთა კლუბის" კონსულტირების საფუძველზე. დისკუსიაში მონაწილეობდა ოზურგეთის მუნიციპალიტეტის სააღმზრდელო დაწესებულებების ცენტრის, არასამთავრობო ორგანიზაციებისა და საზოგადოების წარმომადგენლები.

სამცხე–ჯავახეთი. სამოქალაქო განათლებისა და პედაგოგთა გადამზადების პროგრამის ფარგლებში, ახალციხის ახალგაზრდული ცენტრის სამოქალაქო კლუბების წევრები   ახალციხის მუნიციპალიტეტის სასამართლოს ეწვივნენ. გაეცნენ სასამართლოს მუშაობის პრინციპს და დაესწრნენ სასამართლო პროცესს, რამაც მათში დიდი ინტერესი გამოიწვია. კლუბის წევრებმა გამოთქვეს სურვილი მომავალშიც დაესწრონ სხვადასხვა პროცესებს. სამოქალაქო პროცესი ერთ საათს გაგრძელდა. 

ქვემო ქართლი. 7 ნოემბერს დებატ-კლუბის მორიგი შეხვედრა ჩატარდა. მონაწილეებმა გააკეთეს გუნდებში პრეზენტაცია იმაზე, თუ მათი წარმოდგენით როგორი უნდა იყოს საჯარო გამოსვლა და თავად მომხსენებელი. შემდეგ კი ტრენერებისგან მოისმინეს რჩევები იმის შესახებ, თუ როგორ უნდა გავხადოთ მოხსენება მეტად ეფექტური. შემდეგი კვირისთვის მათ მიიღეს დავალება, რომ გააკეთონ ორწუთიანი პრეზენტაცია მათთვის სასურველ თემაზე. მოსწავლეთა დებატების კლუბი 25 მარტიდან სიქა-ს ინციციატივით ფუნქციონირიებს. კლუბში მონაწილეობას დებატების ხელოვნებით დაინტერესებული 18-მდე ახალგაზრდა იღებს რუსთავიდან, თბილისიდან და გარდაბნიდან.  სრულად წყარო: დებატ–კლუბის გვერდი სოციალური ქსელში

თბილისი. ოც წელზე მეტია გაეროს ბავშვთა ფონდი საქართველოს მთავრობას ეხმარება სოციალური პოლიტიკისა და პროგრამირების გაუმჯობესების საქმეში მსოფლიოს საუკეთესო პრაქტიკის გათვალისწინებით. კონსულტაციას უწევს იმ უწყებებს, რომლებიც პასუხიმგებელნი არიან პოლიტიკის შემუშავებაზე. ფონდი კვლავ იღებს ვალდებულებას დაეხმაროს საქართველოს მთავრობას ყველაზე დაუცველი მოსახლეობის კეთილდღეობის გაუმჯობესების საქმეში. ამ მიმართულებით ფონდმა დოკუმენტი მოამზადა, რომელშიც განხილულია ქართული ოცნების საარჩევნო პროგრამის ის ნაწილები, რომლებიც ეხება ბავშვთა უფლებების დაცვას საქართველოში და ასევე წარდგენილია კონკრეტული რეკომენდაციები. რეკომენდაციები წყარო:unicef.ge

ქვემო ქართლი. 2 ნოემბერს სიქა-ს სამოქალაქო განათლებისა და პედაგოგთა გადამზადების პროგრამის ფარგლებში სტუმრად ეწვია აჭარის დელეგაცია. ქვემო ქართლისა და აჭარის რეგიონების სასკოლო სამოქალაქო კლუბებმა ერთმანეთს გაუზირეს საკლუბო მუშაობის გამოცდილება. ასევე სკოლებს შორის ხელი მოეწერა თანამშრომლობისა და მეგობრობის მემორანდუმს, რომლის საფუძველზეც რეგიონების სკოლები გააგრძელებენ თანაშრომლობას, დაგეგმავენ და ერთობლივად განახორციელებენ სამოქალაქო აქტივობებს. სრულად წყარო: სიქას ოფიციალური გვერდი სოციალურ ქსელში

იმერეთი. 5 ნოემბერს,  ვანის მუნიციპალიტეტის, სოფელ ქვედაგორას  საჯარო სკოლაში  სამოქალაქო განათლების  და პედაგოგთა გადამზადების პროგრამის ფარგლებში, ჩატარდა სოციალური მედიის ტრენინგი სამოქალაქო კლუბის   მე–9, მე–10, მე–11, მე–12  კლასის მოსწავლეებისთვის. ტრენინგის მიზანს წარმოადგენდა, სოციალური მედიის შესახებ ინფორმაციის გავრცელება მოსწავლეებში და მისი გამოყენების უნარ–ჩვევების განვითარება პროექტის მიზნობრივ ჯგუფებში, რაც სამომავლოდ ხელს შეუწყობს ახალგაზრდებმა გაიაზრონ, თუ რა როლი აქვს სოციალურ მედიას საზოგადოების მობილიზების საქმეში. ტრენინგს სულ 26 მოსწავლე მოსწავლე დაესწრო.  სამოქალაქო განათლების  და პედაგოგთა გადამზადების პროგრამა ხორციელდება PH-International-ის მიერ USAID-ის ფინანსური მხარდაჭერით. სრულად წყარო: kedec.ge

იმერეთი. 31 ოქტომბერს, ქუთაისის №17 საჯარო სკოლაში სტუმრად იმყოფებოდნენ აშშ საერთაშორისო განვითარების სააგენტოს დემოკრატიისა და მმართველობის ოფისის დირექტორი  დანიელა რიფი და სამოქალაქო განათლებისა და პედაგოგთა გადამზადების პროგრამის დირექტორი, მარინა უშვერიძე.  იმერეთის  რეგიონის სასკოლო სამოქალაქო კლუბების  წევრებმა სტუმრებს  კლუბების საქმიანობის პრეზენტაცია წარუდგინეს, ასევე ისაუბრეს პროგრამის მიმდინარეობის და წარმატებების შესახებ. შეხვედრის ბოლოს ქ-მა დანიელამ შეხვედრაზე მყოფ საზოგადოებას მიმართა, ისაუბრა  სამოქალაქო განათლების მნიშვნელობაზე და დამსწრეთა შეკითხვებსაც უპასუხა. შეხვედრას ესწრებოდნენ ქუთაისის საგანმანათლებლო რესურსცენტრის ხელმძღვანელი,  საჯარო სკოლის დირექტორები, სამოქალაქო განათლების პედაგოგები და მოსწავლეები. სრულად წყარო: civics.ge

სამცხე–ჯავახეთი.  31 ოქტომბერს ახალციხის მუნიციპალიტეტის სოფელ სხვილისის საჯარო სკოლას სამართალდამცავი ორგანოს წარმომადგენლები სტუმრობდნენ. შეხვედრა შედგა ამავე სკოლის სამოქალაქო კლუბ „სამშობლოს" წევრების ინიციატივით. შეხვედრას სამოქალაქო განათლების პედაგოგი საგუმე ამბარცუმაინი უძღვებოდა, მთავარი თემა  „მოსწავლეთა უფლებები და მოვალეობები" იყო. აღნიშნულ საკითხებზე მოსწავლეებმა პრეზენტაცია მოაწყეს და შესაბამისი თემატიკის ნახატები შექმნეს.  შეხვედრა  საინტერესოდ წარიმართა. მოწვეული სამართალდამცავები  აქტიურად ჩაერთვნენ გამართულ დისკუსიაში, პასუხობდნენ მოსწავლეთა მიერ დასმულ კითხვებს. აღნიშნული შეხვედრა მიზნად ისახავდა მოსწავლეთა უფლებებისა და მოვალეობების გაცნობას, ასევე, ამ შეხვედრამ საშუალება მისცა მოსწავლეებს პასუხები მიეღოთ კომპეტენტური პირებისგან.

შიდა ქართლი. 30 ოქტომბერს საზოგადოება ,,ბილიკში" რეზო ოქრუაშვილთან გაიმართა შეხვედრა. რეზო ოქრუაშვილი გორის მუნიციპალიტეტთან არსებული საზოგადოებრივი დარბაზის და ახლად შექმნილი სამოქალაქო გაერთიანების „გორის დარბაზის" წევრიცაა.  შეხვედრაზე მან მოზარდებს მიაწოდა ინფორმაცია, თუ რას საქმიანობს საზოგადოებრივი დარბაზი, რა ფორმით შეუძლიათ ითანამშრომლონ მათთან და წარუდგინონ ინიციატივები.   შეხვედრა სამოქალაქო განათლებისა და პედაგოგთა გადამზადების პროგრამის (USAID / PH International) მოეწყო და მისი მიზანი სამოქალაქო საზოგადოებოს როლზე დიალოგი და გამოცდილების გაზიარება იყო. სრულად წყარო: ორგანიზაცია „ბილიკის" ოფიციალური გვერდი სოციალურ ქსელში

სამცხე–ჯავახეთი. ორგანიზაციის ახალციხის ახალგაზრდული ცენტრის ორგანიზებით ასპინძის მუნიციპალიტეტის  დამალის  საჯარო სკოლის საინიციატივო ჯგუფს ჩაუტარდა ტრენინიგი მცირე გრანტების პროგრამის ფარგლებში.  ტრენინგს უძღვებოდა მცირე გრანტების პროგრამის კოორდინატორი მეგი ბერიძე. ტრენინგის მიზანი იყო საინიციატივო ჯგუფისათვის იმ უნარ–ჩვევების შეძენა, რომელიც გაუადვილებს მათ სააპლიკაციო ფორმის ონლაინ რეჟიმში შევსებას, ბიუჯეტის, განხორციელების გეგმისა და თანადაფინანსების დოკუმენტაციის  მომზადებას.

კახეთი. განათლების განვითარებისა და გადამზადების ცენტრმა სკოლის კლუბების თანამშრომლობის ფარგლებში თელავის IV საჯარო სკოლაში სამოქალაქო კლუბი დაარსა.  კლუბი გეგმავს მოაწყოს სკოლაში სამოქალაქო თემატიკის აქტივობები, რომლის ბენეფიციარები სკოლის მოსწავლეები იქნებიან.

იმერეთი. საქველმოქმედო ჰუმანიტარულმა ცენტრმა „აფხაზეთმა" ბელგიელი EVS მოხალისის დახმარებით 500 ევროს შემოწირულობა მიიღო ორგანიზაციებისგან - „Gemeente Middelkerke" და „Cel Ontwikkelingssamenwerking". ცენტრ „აფხაზეთის" ოფიციალური ვებგვერდის მიხედვით, ეს თანხა მოხმარდება ლაგოდეხის რაიონის სოფელ ბაისუბნის საჯარო სკოლის სპორტული დარბაზის რეაბილიტაციას. სკოლაში 250-მდე მოზარდი სწავლობს, მათ შორის ბაისუბნის მცირე საოჯახო ტიპის სახლის აღსაზრდელები.  „სპორტული დარბაზის რეაბილიტაციის შემდეგ შესაძლებელი გახდება ზამთრის თვეებში ფეხბურთის, კალათბურთისა და სხვა წრეების ორგანიზება, რაც ხელს შეუწყობს ამ სოფელში მცხოვრები ბავშვების განვითარებას და სპორტულ აქტივობებში ჩართვას" – ნათქვამია ორგანიზაციის ვებგვერდზე გავრცელებულ განცხადებაში.  სრულად წყარო: chca.org.ge

იმერეთი. CENN–ის ინიციატივის „სამხრეთ კავკასიის ქვეყნებში სოფლად მცხოვრებ ქალთა უნარ-შესაძლებლობების გაძლიერება და მათი ჩართვა ბუნებრივი რესურსების მდგრად მართვაში" ფარგლებში ტყიბულის მუნიციპალიტეტის სოფელ გელათში დაარსებულმა ქალთა საბჭომ  გელათის საჯარო სკოლის ბაზაზე შექმნა  ეკო კლუბი „ჩვენ გვინდა სუფთა გარემო".  გელათის ქალთა საბჭომ და ეკოკლუბმა, ევრაზიის თანამშრომლობის ფონდის ფინანსური მხარდაჭერით, განახორციელეს ერთობლივი პროექტი „თანამედროვე ცხოვრება ნარკომანიის გარეშე". პროექტის მიზანს წარმოადგენდა ახალგაზრდა თაობის ცნობიერების ამაღლება ცხოვრების ჯანსაღი წესის შესახებ. ინიციატივის ფარგლებში ა.წ. 22 ოქტომბერს ჩატარდა  საგანმანათლებლო სემინარი, რომელსაც ესწრებოდნენ გელათის საჯარო სკოლის მოსწავლეები.   აღნიშნული ინიციატივის ფარგლებში 25 ოქტომბერს მოეწყო ნარკომანიის თემაზე დოკუმენტური ფილმის „ქუჩის ცხოვრება" ჩვენება და ფასილიტირებული დისკუსია. 29 ოქტომბერს კი სკოლის მოსწავლეები შეხვდნენ ექიმ ნარკოლოგს, რომელთანაც გამართეს დისკუსია.  ქალთა საბჭო მომავალშიც გეგმავს ეკო კლუბთან ერთად ერთობლივი  პროექტების განხორციელებას. წყარო: CENN

გურია. 19 და 26 ოქტომბერს გურიის ახალგაზრდულ რესურსცენტრში მოქმედი ახალგაზრდა მოხალისეთა სახლის წევრებს ორი ტრენინგი ჩაუტარდათ თემაზე: პროექტის დიზაინი და მენეჯმენტისა და პროექტის საჭიროებების შეფასება. ტრენინგზე მოხალისეები გაეცნენ პროექტის დიზაინისა და მენეჯმენტის ძირითად პრინციპებს, პრაქტიკული სამუშაოებისა და გუნდური მუშაობის შედეგად მოამზადეს პროექტები და ბოლოს თავადაც ჩაატარეს კვლევა ქალაქ ოზურგეთის ტერიტორიაზე და კვლევის საფუძველზე გამოავლინეს ქალაქისთვის საჭირბოროტო რამდენიმე საკითხი. მოხალისეები პროექტის მომზადებას და განხორციელებას გეგმავენ.

გურია. 26 ოქტომბერს გურიის ახალგარდულ რესურსცენტრში ჩატარდა ტრენინგი გურიის რეგიონში სამოქალაქო განათლებისა და პედაგოგთა გადამზადების პროგრამის ფარგლებში მოქმედი სამოქალაქო კლუბებისა და საინიციატივო ჯგუფებისათვის. პროგრამას ახორციელებს Ph International ამერიკის საერთაშორისო განვითარების სააგენტოს დაფინანსებით. გურიის ახალგაზრდული რესურსცენტრი პროგრამის განმახორციელებელი პარტნიორია გურიაში.  ტრენინგის თემა იყო პროექტების წერა და მასში 25 ბავშვი მონაწილეობდა. მნიშვნელოვანია ის, მათი უმეტესობა პირველად ესწრებოდა ამ პროგრამის ფარგლებში ორგანიზებულ ტრენინგს. 

აჭარა. 26 ოქტომბერს ბათუმის პრესკაფეში, აჭარის ავტონომიური რესპუბლიკის ხელოვანთა ნაწილმა გამართა დისკუსია,  თემაზე „კულტურის განვითარების ასპექტები აჭარის ავტონომიურ რესპუბლიკაში". დისკუსიის მიზანი იყო შესაბამისი საკითხების კვლევა, ანალიზი და პრობლემების გადაჭრის გზების მოძიება. შეხვედრას ესწრებოდნენ ადგილობრივი საზოგადოებრივი ორგანიზაციების, პოლიტიკური პარტიების და მედია საშუალებების წარმომადგენლები.  მომხსენებლების მხრიდან  ძირითადი  აქცენტი ბათუმის დრამატულ თეატრში, სახელმწიფო ტელევიზიასა და ბათუმის ხელოვნების უნივერსიტეტში  არსებულ პრობლემებზე გაკეთდა. აღნიშნული ორგანიზაციების პრობლემები, როგორც დისკუსიის ორგანიზატორებმა აღნიშნეს სწრაფად არის გადასაჭრელია, რათა ახალაგაზრდა ხელოვანებს თავიანთი ნიჭის წარმოჩენის შესაძლებლობა მიეცეთ.

სამცხე–ჯავახეთი. 24 ოქტომბერს მცირე გრანტების პროგრამის ფარგლებში დაბა  ვალეს #2 საჯარო სკოლაში გაქტიურდა შიდა სასკოლო რადიო. რადიოქსელის საშუალებით სამოქალაქო კლუბისა და სკოლის თვითმმართველობის წევრები გაავრცელებენ ინფორმაციას კლუბური მუშაობის შესახებ.   როგორც სკოლის დირექციის, ასევე პედაგოგებისა და მოსწავლეების აზრით რადიოს მუშაობა ხელს შეუწყობს მოსწავლეების აქტიურ ჩართვას საკლუბო და სასკოლო ცხოვრებაში. მცირე გრანტების პროგრამას სამცხე–ჯავახეთში ახალციხის ახალგაზრდული ცენტრი ახორციელებს.

სამცხე–ჯავახეთი.  20 ოქტომბერს ახალციხის სახელმწიფო სასწავლო უნივერსიტეტში პროექტ „speak up"–ის მონაწილეთა დაჯილდოვების ცერემონიალი გაიმართა. „speak up" ინგლისურენოვანი საერთაშორისო პროექტია, რომლის მიზანიცაა ინგლისური ენის გაღრმავება და ლიდერული უნარ–ჩვევების განვითარება. პროექტი მსოფლიოს მრავალ ქვეყანაშია ცნობილი. საქართველოში პროექტი უკვე ორი წელია ხორციელდება.  პროექტი  საქართველოს ყველა დიდი ქალაქში განხორციელდა და მის ფარგლებში სტუდენტებმა და სკოლის  მოსწავლეებმა ორთვიანი ტრენინგ–კურსები გაიარეს. პროექტს ახალციხეში დაახლოებით 90 მონაწილე ჰყავდა და თითოეულ მათგანს სერთიფიკატი გადაეცა. 

ქვემო ქართლი. საგანმანათლებლო ინიციატივების ქართული ასოციაცია (სიქა) იწვევს 10-15 წლის მოზარდებს, რომლებიც დაინტერესებულნი არიან ორიგამის ხელოვნებით ან სურვილი აქვთ შეისწავლონ უძველესი იაპონური კულტურა.  „ორიგამი-დო"-ს შეხვედრებზე მონაწილეები განივითარებენ უნარებს, რომელიც დაეხმარება მათ ქაღალდის ფურცლისგან შექმნან ოთახის გასალამაზებელი დეკორატიული მოდელები და ის დეკორაციები, რომლებიც გამოიყენება პრაქტიკულ ცხოვრებაში.  შეხვედრები გაიმართება კვირაში ერთხელ, ორშაბათობით. კლუბის ხელმძღვანელია „ევროპული მოხალისეთა სერვისის" მოხალისე პოლონეთიდან ლუკაშ სამულნიკი.  სრულად წყარო: ორგანიზაციის გვერდი სოციალურ ქსელში