აჭარა. „საერთაშორისო გამჭვირვალობა - საქართველოს” ბათუმის ოფისისა და სამოქალაქო საბჭოების კოორდინატორმა, მალხაზ ჭკადუამ, ორგანიზაცია Orbeliani Georgia ორბელიანი საქართველოს მიწვევით, ახალგაზრდა აქტივისტებისთვის ტრენინგი ჩაატარა. შეხვედრაზე საუბარი შეეხო ორგანიზაციის სამოქალაქო საბჭოების მუშაობასა და შედეგებს, ადგილობრივ თვითმმართველობებთან თანამშრომლობის პრაქტიკას, მუნიციპალიტეტების კომპეტენციებსა და მოქალაქეთა ჩართულობის მექანიზმებს ადგილობრივი მნიშვნელობის საკითხების გადაწყვეტის პროცესში. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) სამართლებრივი დახმარების შედეგად, სიღარიბის გამო ბავშვების ოჯახისგან დაშორება სასამართლომ უკანონოდ ცნო.  „თბილისის საქალაქო სასამართლომ უპრეცედენტო გადაწყვეტილება მიიღო. სიღარიბის გამო მინდობით აღზრდაში ბავშვების გადაყვანა და ოჯახთან დაცილება უკანონოდ ცნო და დაზარალებულ სამ ბავშვს მორალური ზიანის ანაზღაურების მიზნით 35 000 ლარი მიაკუთვნა. ბავშვები, 2 წლის წინ, სოციალურმა სამსახურმა უკანონოდ, ოჯახის გაძლიერების გარეშე, გამოიყვანა სახლიდან და დედას დააცილა. ბავშვებმა ორი წელი მშობლისგან მოშორებით გამოწვეული სტრესის ქვეშ იცხოვრეს. ეს გარემოება სასამართლომ მიიჩნია უკანონოდ და დააკმაყოფილა PHR-ის სარჩელი“. სრულად... წყარო: ორგანიზაციის გვერდი სოციალურ ქსელში

თბილისი. ამერიკის შეერთებული შტატების საელჩო საქართველოში კითხვაში საზაფხულო გამოწვევას აცხადებს. „პროგრამა მარტივია: აირჩიეთ წიგნი ქართულ ან ინგლისურ ენაზე, წაიკითხეთ, შეავსეთ ამერიკული სივრციდან მიღებული წიგნის ფორმა და დაუბრუნეთ მათ 10 სექტემბრამდე. ბავშვებს შეუძლიათ, რომ წიგნები გამოიტანონ ამერიკული სივრციდან, საჯარო, სკოლის ან ოჯახის ბიბლიოთეკიდან, ითხოვონ მეგობრებისგან, ან ოჯახის წევრებისგან, შეიძინონ მაღაზიაში, ან ნახონ ნებისმიერ ხელმისაწვდომ ადგილას. ეს შეიძლება იყოს ნებისმიერი წიგნი ინგლისურად ან ქართულად, მხატვრული ან არამხატვრული ლიტერატურა. ნებისმიერი ბავშვი, რომელიც 100 გვერდს მაინც წაიკითხავს, მიიღებს ამერიკის ელჩის, კელი დეგნანის ხელმოწერილ ვერცხლის სერტიფიკატს. ბავშვები, რომლებიც 500 გვერდს მაინც წაიკითხავენ, მიიღებენ ოქროს სერტიფიკატს. ქულები ინგლისურად წაკითხული გვერდებისთვის გაორმაგდება“, ნათქვამია საელჩოს გვერდზე სოციალურ ქსელში  სრულად... წყარო: ორგანიზაციის გვერდი სოციალურ ქსელში

შიდა ქართლი. CSI-ს გორის ოფისმა, გორის მერიის ახალგაზრდული განყოფილების ხელმძღვანელთან ერთად, სოფელ ქორდში, ახალგაზრდული სივრცე მოინახულეს და კამპანია „ეს ქვეყანა შენიას“ ფარგლებში მომზადებული მასალები ჩაიტანეს. სამოქალაქო საზოგადოების ინსტიტუტი (CSI) აქტიურად მუშაობს რეგიონში ახალგაზრდების შესაძლებლობების განვითარების მიმართულებით და მზად არის, არსებული რესურსების გამოყენებით, წვლილი შეიტანოს ახალგაზრდული ეკოსისტემის შექმნის პროცესში. რეგიონებში ახალგაზრდული სივრცეების საჭიროება ახალგაზრდული სტარტეგიის დოკუმენტზე მუშაობისას გამოიკვეთა და გორის მუნიციპალიტეტმა, ახალგაზრდობის სააგენტოსთან ერთად, სოფელ ქორდში სამოდელო სივრცის შექმნას შეუწყო ხელი. ამ ეტაპზე, ახალგზრდები ცენტრის მოხატვასა და, სხვადასხვა ორგანიზაციის დახმარებით, მის აღჭურვაზე მუშაობენ. ქორდის ახალგაზრდული სივრცე მალე ოფიციალურად გაიხსნება და კონფლიქტის ზონაში მცხოვრებ ახალგაზრდებს შესაძლებლობა ექნებათ ისარგებლონ ადგილით, რომელსაც არაფორმალური განათლების მისაღებად და სხვადასხვა აქტივობისთვის გამოიყენებენ. სრულად...

თბილისი. ომბუდსმენისთვის ცნობილი გახდა, რომ ნინოწმინდის ბავშვთა პანსიონის ყოფილ აღსაზრდელს სავარაუდოდ, იძულებით დაატოვებინეს საქართველოს საპატრიარქოს წმიდა ტბელ აბუსერისძის სახელობის სასწავლო უნივერსიტეტის საერთო საცხოვრებელი, მას შემდეგ, რაც მან სამართალდამცავ უწყებას ინფორმაცია მიაწოდა პანსიონში მისი ყოფნისას არსებული სავარაუდო ძალადობის ფაქტების შესახებ. სახალხო დამცველმა უკვე დაიწყო პანსიონის ყოფილი აღსაზრდელის მიმართ განხორციელებული სავარაუდო დისკრიმინაციის ფაქტის შესწავლა. დამატებით, მიმართა სამართალდამცავ უწყებას - მოახდინოს სამართლებრივი რეაგირება სავარაუდო იძულების, ზეწოლისა და ფსიქოლოგიური ძალადობის ფაქტებზე. ვინაიდან, ახალგაზრდას არ აქვს სხვა საცხოვრებელი, იგი სახალხო დამცველის შესაბამის უწყებებთან კომუნიკაციით დროებით განთავსდა უსაფრთხო გარემოში. სრულად... წყარო: ombudsman.ge

თბილისი. 2021 წლის ივნისის თვეში ბავშვთა დაცვისა და გარემოს საერთაშორისო კვირეულის ფარგლებში, ომბუდსმენის აპარატის აღმოსავლეთ და დასავლეთ საქართველოს სამმართველოების წარმომადგენლებმა ქართულ, აზერბაიჯანულ და სომხურ ენაზე ვებინარები და შეხვედრები გამართეს ქვეყნის სხვადასხვა რეგიონებში საჯარო სკოლის მოსწავლეებთან, მასწავლებლებთან, მშობლებთან, სკოლამდელი სააღმზრდელო დაწესებულებების ხელმძღვანელებთან, ახალგაზრდებთან და სათემო ცენტრებთან. ასევე, მონაწილეობა მიიღეს ტელე/რადიო გადაცემებში. ღონისძიებებმა მოიცვა იმერეთის, სამეგრელოს, გურიის, აჭარის, სვანეთის, შიდა ქართლის, კახეთის, მცხეთა-მთიანეთის, ქვემო ქართლისა და სამცხე-ჯავახეთის რეგიონები. სრულად... წყარო: ombudsman.ge

თბილისი. საქართველოს სახალხო დამცველის მიმართვის საფუძველზე, სამედიცინო და ფარმაცევტული საქმიანობის რეგულირების სააგენტომ შეისწავლა მცირეწლოვანი ბავშვების თვითნებური ე.წ. „მაუგლის მეთოდით“ მკურნალობის საკითხი და უკანონო საექიმო საქმიანობის განხორციელების ფაქტი დაადგინა. შესწავლის შედეგად გამოიკვეთა, რომ აღნიშნული მეთოდი წარმოადგენს ბავშვების სიცოცხლის და ჯანმრთელობისთვის რისკის შემცველ ჩარევას, რასაც განსაკუთრებით მათ ადრეულ ასაკში, მძიმე და შეუქცევადი გართულებების განვითარება შეიძლება მოჰყვეს. აღნიშნული მეთოდის განმახორციელებელ პირს ადმინისტრაციული პასუხისმგებლობა დაეკისრა. სრულად... წყარო: ombudsman.ge

თბილისი. სახალხო დამცველი ეხმიანება თბილისის საქალაქო სასამართლოს განჩინებას სსო „პარტნიორობა ადამიანის უფლებებისთვის“ სარჩელზე ნინოწმინდის პანსიონიდან არასრულწლოვნების გამოყვანის თაობაზე. სახალხო დამცველი აუცილებლად მიიჩნევს სასამართლოს განჩინების დაუყოვნებლივ აღსრულებას. „სასამართლოს განჩინება კიდევ ერთხელ, ცალსახად მიუთითებს იმ რეალურ რისკსა და საფრთხეზე, რომელიც დაწესებულებაში ბავშვის უფლებათა დაცვის კუთხით არსებობს და საჭიროებს სახელმწიფო უწყებების მხრიდან დროულ და კოორდინირებულ მოქმედებას. სახალხო დამცველი აღნიშნავს, რომ პანსიონში არსებული მდგომარეობა არათუ არ შეესაბამება არასრულწლოვანთა ინტერესებს და არსებულ სტანდარტებს, საფრთხის შემცველია ბავშვებისთვის ძალადობისგან დაცვის, სრულფასოვანი განვითარების, სოციალიზაციისა და დამოუკიდებელი ცხოვრებისთვის მომზადების კუთხით. არსებითად მნიშვნელოვანია ის ფაქტი, რომ სასამართლო განჩინებაში საფრთხის შემცველად აფასებს პანსიონში არსებულ ზოგად მდგომარეობას და მისი გადაწყვეტილება არ შეიძლება აღქმულ იქნეს, რომ თითქოს საფრთხე მხოლოდ შეზღუდული შესაძლებლობის მქონე ბავშვებისთვის არსებობს“. სრულად... წყარო: ombudsman.ge

თბილისი. „კოალიცია თანასწორობისთვის” შემავალი ორგანიზაციები მიიჩნევენ, რომ ნინოწმინდის პანსიონატთან დაკავშირებით მიმდინარე მოვლენები საგანგაშოა და სახელმწიფოსგან დაუყოვნებელ, მკაცრ რეაგირებას საჭიროებს. „ამ დრომდე სახელმწიფოს არცერთ უწყებას მკაფიო პოზიცია არ გამოუხატავს პანსიონატში არასრულწლოვნების მიმართ ჩადენილი სავარაუდო ძალადობისა და ბავშვთა უფლებების დარღვევის განგრძობად შემთხვევებზე. ამასთან, სახელმწიფოს არ შეუქმნია დემოკრატიული სამუშაო პროცესი, რომელიც სახალხო დამცველის მიერ პანსიონატში ბავშვთა უფლებების მდგომარეობის მონიტორინგს უზრუნველყოფდა. უფრო მეტიც, ამ დრომდე ხელისუფლების წარმომადგენლების მხრიდან არ კეთდება განცხადება დიდი პანსიონატების დეინსტიტუციონალიზებისა და აუცილებელი რეფორმის შესახებ, რაც ამ დაწესებულებებში მცხოვრები ბავშვებისთვის ღირსეული და სათანადო საცხოვრებელი გარემოს და უფლებების დაცვის აუცილებელი წინაპირობაა“. სრულად... წყარო: www.equalitycoalition.ge

თბილისი. ქეთი ხუციშვილის სტატიიდან გაიგებთ არის თუ არა კონკორდატში ჩანაწერი, რომელიც სახალხო დამცველს რომელიმე დაწესებულებაში ბავშვთა უფლებების დაცვას უკრძალავს და რატომ სპეკულირებს პრიმაკოვის სახელობის ქართულ-რუსული საზოგადოებრივი ცენტრის ხელმძღვანელი კონკორდატით?. „ლორთქიფანიძის განცხადება იმის თაობაზე, თითქოს კონკორდატი ეკლესიას მის დაქვემდებარებაში მყოფ ბავშვთა სახლებში სახალხო დამცველის არშეშვების დისკრეციას ანიჭებს, მანიპულაციურია და სიმართლეს არ შეესაბამება. კონკორდატში ამ მტკიცების შესაბამისი მუხლი არ არის. გარდა ამისა, ნინოწმინდის ბავშვთა სახლი არასამეწარმეო (არაკომერციული) იურიდიული პირის სტატუსითაა რეგისტრირებული, სახალხო დამცველის შესახებ ორგანული კანონი და ბავშვის უფლებათა კოდექსი ამ ტიპის დაწესებულებებში სახალხო დამცველის მიერ მონიტორიგნის განხორციელების უფლებას ითვალისწინებს“. სრულად... წყარო: www.mythdetector.ge

თბილისი. საქართველოს სახალხო დამცველის აპარატი მაღალი საზოგადოებრივი ინტერესიდან გამომდინარე, ნინოწმინდის ბავშვთა პანსიონში, ამ დროისთვის არსებულ მდგომარეობაზე განცხადებას ავრცელებს. „ომბუდსმენის აპარატმა პანსიონში მომხდარი სავარაუდო დანაშაულებრივი ფაქტების შესახებ ინფორმაცია გამოითხოვა საქართველოს გენერალური პროკურატურიდან და საქართველოს შინაგან საქმეთა სამინისტროდან. მიღებული ინფორმაციით ირკვევა, რომ ‪2016-2021 წლებში დაწყებულია ოთხი სისხლის სამართლის საქმის გამოძიება არასრულწლოვნების მიმართ სავარაუდო ძალადობის ფაქტზე. გამოძიება მიმდინარეობს სავარაუდო ძალადობის 3 ფაქტზე (სისხლის სამართლის კოდექსის 126-ე მუხლი) და სავარაუდო გაუპატიურების ერთ ფაქტზე (სისხლის სამართლის კოდექსის 137-ე მუხლი). ამ დროისთვის ომბუდსმენის აპარატი არ ფლობს დეტალურ ინფორმაციას სავარაუდო დანაშაულებრივი ფაქტების, მასში მონაწილე პირების და გარემოებების, ასევე, გატარებული და მიმდინარე ღონისძიებების შესახებ. საკითხის დაზუსტების მიზნით, სახალხო დამცველის აპარატმა უკვე მიმართა პასუხისმგებელ უწყებებს“. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია (საია) ბავშვთა დაცვის საერთაშორისო დღესთან დაკავშირებით განცხადებას ავრცელებს. „პირველი ივნისი ბავშვთა დაცვის საერთაშორისო დღეა. ეს თარიღი კიდევ ერთხელ გვახსენებს სახელმწიფოს მხრიდან იმ ღონისძიებების გატარების აუცილებლობას, რომლებიც ბავშვის საუკეთესო ინტერესებიდან გამომდინარეობს და მათი სიცოცხლის, ჯანმრთელობის, განათლების, განვითარებისა და ღირსეული ცხოვრების უფლების დაცვას ემსახურება. ამისთვის მნიშვნელოვანია კომპლექსური და ქმედითი მექანიზმების არსებობა, რომლებიც ბავშვთა უფლებების მაღალი სტანდარტით დაცვას უზრუნველყოფს“. სრულად... წყარო: gyla.ge

თბილისი. საქართველოს სახალხო დამცველი, ნინო ლომჯარია, პირველ ივნისს ბავშვის უფლებათა დაცვის საერთაშორისო დღეს განცხადებით ეხმაურება. „ამ მნიშვნელოვან დღეს, საქართველოში მცხოვრებ ყველა ბავშვს მსურს ვუთხრა, რომ სახალხო დამცველი ყოველთვის იქნება მათ გვერდით და მათი უფლებების დასაცავად. დღეს, როდესაც არაერთი ბავშვი ცხოვრობს სიღარიბეში, განიცდის ძალადობას, უგულებელყოფილია ჯანდაცვის, განათლების, განვითარების საჭიროებები, ისე როგორც არასდროს, მნიშვნელოვანია ამ დღის აღნიშვნა გასცდეს სიმბოლურ დატვირთვას და სახელმწიფომ ქმედითი ნაბიჯები გადადგას მათი უფლებების დასაცავად. საქართველოში, წლების განმავლობაში ვხვდებით ბავშვის უფლებების დარღვევის უმძიმეს ფაქტებს, რაც უმეტესწილად დაკავშირებულია მხარდამჭერი სერვისების არაეფექტიანობასთან, სახელმწიფოს დაგვიანებულ რეაგირებასთან, სოციალური და ბავშვებზე ზრუნვის პროგრამების ხარვეზებთან. საზოგადოების დამოკიდებულება ბავშვის უფლებების დარღვევის ფაქტების მიმართ კვლავ არაერთგვაროვანია და ხშირად, ბავშვები პირისპირ რჩებიან ძალადობის წინაშე. ამ დრომდე, პასუხისმგებელი უწყებები არ ახდენენ ბავშვის უფლებადარღვევის ფაქტების დროულ იდენტიფიცირებას, სათანადო რეაგირებას და არასრულწლოვნების მხარდაჭერას მათი საჭიროებების შესაბამისად“. სრულად... წყარო: ombudsman.ge

თბილისი. 29 მაისს, რონდელის ფონდის პროექტის „ახალგაზრდები რეგიონის განვითარებისთვის“ ფარგლებში, „ზარზმის ბავშვთა აკადემიის“ მოსწავლეებისთვის გაიმართა ლექცია-დისკუსია თემაზე „საქართველოს დასავლური გზის ისტორია“. დისკუსიას უძღვებოდა თბილისის სახელმწიფო უნივერსიტეტის ასისტენტ-პროფესორი - ირაკლი ჩხაიძე. პროექტის მიზანია ადიგენისა და ახალციხის მუნიციპალიტეტების სკოლების მოსწავლეებში სამოქალაქო ცნობიერების ამაღლება და სამოქალაქო აქტივიზმის გაზრდა. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. CENN-მა ევროკავშირის მხარდაჭერითა და ნინოწმინდის ახალგაზრდულ ცენტრთან თანამშრომლობით, ნინოწმინდაში ინოვაციურ ცოდნის ჰაბი გახსნა. „ინოვაციური ცოდნის ჰაბის მიზანი ადგილობრივ დონეზე ახალგაზრდების გაძლიერება და მათი სოციალური და მწვანე მეწარმეობის მიმართულებით განვითარების ხელშეწყობაა. ინოვაციური ცოდნის ჰაბი არის ახალგაზრდული სამუშაო სივრცე, რომელიც ხელმისაწვდომი იქნება ნინოწმინდის მუნიციპალიტეტში მცხოვრები ახალგაზრდებისათვის. ჰაბში პერიოდულად გაიმართება გარემოსდაცვითი და ახალგაზრდული კამპანიები, ასევე, ბენეფიციარებს ექნებათ შესაძლებლობა, შეხვდნენ სხვადასხვა სფეროს წარმომადგენლებს და გამართონ საჯარო დისკუსიები და საგანმანათლებლო ღონისძიებები“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) ინფორმაციით, პროკურატურამ, ქალი ფეხბურთელების მიმართ, მწვრთნელის მხრიდან სავარაუდო გარყვნილი ქმედების ფაქტზე, დევნის დაწყებაზე უარი განაცხადა. ასევე, უარი თქვა დაზარალებულთა დაცვის მიზნით მიახლოვების აკრძალვისა და მწვრთნელისათვის სამსახურებრივი საქმიანობის შეჩერებაზე. „ორგანიზაცია იცავს 9 ქალი ფეხბურთელის ინტერესებს (მათ შორის ერთი ბავშვის), რომელთა მიმართაც მწვრთნელმა კაცმა განახორციელა სავარაუდო სექსუალური შევიწროება, სექსუალური ძალადობა და თაღლითობის დანაშაული. სექსუალური შევიწროება და ძალადობა გამოიხატებოდა არასასურველ სექსუალური შინაარსის ფიზიკურ შეხებაში, კომენტარებსა და პორნოგრაფიული მასალის იძულებით ჩვენებაში. თაღლითობაში ბრალდებული კაცი მწვრთნელი, რომელსაც ფეხბურთელი გოგოები სექსუალურ შევიწროებას და ბავშვების მიმართ ჩადენილ გარყვნილ ქმედებას ედავებიან, ამ წუთებშიც დასაქმებულია ერთ-ერთ საჯარო სკოლაში ფიზკულტურის მასწავლებლის პოზიციაზე და ყოველდღიური შემხებლობა აქვს ბავშვებთან“, ნათქვამია ორგანიზაციის განცხადებაში. სრულად... წყარო: phr.ge

სამცხე-ჯავახეთი. „კოალიცია თანასწორობისთვის“ ეხმიანება საქართველოს მართლმადიდებელი ეკლესიის საპატრიარქოს ა(ა)იპ ჯავახეთის ნინოწმინდის წმინდა ნინოს ობოლ, უპატრონო და მზრუნველობამოკლებულ ბავშვთა პანსიონატში ბავშვის უფლებების განგრძობადი დარღვევის ფაქტს. „უკიდურესად შემაშფოთებელია, რომ კვლავ დაფიქსირდა საქართველოს სახალხო დამცველის საქმიანობისათვის ხელის შეშლა და სახელმწიფო დღემდე არ ასრულებს გაეროს ბავშვის უფლებათა კომიტეტის დროებითი ღონისძიების მოთხოვნებს. „კოალიცია თანასწორობისათვის“ მოუწოდებს ხელისუფლებას, დაუყოვნებლივ დაიწყოს ქმედითი ღონისძიებების გატარება პანსიონატში მცხოვრები ბავშვების უფლებების დაცვის მიზნით, რაც მოცემული დროისათვის გულისხმობს შესაბამისი უფლებამოსილების მქონე დამოუკიდებელი მონიტორინგის განმახორციელებელი ორგანოსათვის ეფექტური მონიტორინგის განხორციელების შესაძლებლობის მიცემას, ხოლო გრძელვადიანად, ბავშვების რეინტეგრაციას ბიოლოგიურ ოჯახებში ან/და ოჯახურ გარემოსთან მიახლოებულ ზრუნვის ფორმაში განთავსებას“, ნათქვამია განცხადებაში.  სრულად... წყარო: phr.ge

თბილისი. გაეროს ბავშვთა ფონდის განცხადებით, ბავშვთა დიდი ზომის დარჩენილი ინსტიტუციების მონიტორინგი უნდა ხორციელდებოდეს ქვეყნის შესაბამისი უწყებების მიერ, რათა ბავშვთა უფლებები სრულად იყოს დაცული. „ბავშვთა დიდი ზომის დარჩენილ ინსტიტუციებთან დაკავშირებით უნდა შემუშავდეს და გაძლიერდეს ალტერნატიული მომსახურებები დეინსტიტუციონალიზაციის საერთო სტრატეგიის ფარგლებში, სადაც ზედმიწევნით იქნება გაწერილი შესაბამისი მიზნები და ამოცანები, რაც თავის მხრივ, ხელს შეუწყობს აღნიშნული ინსტიტუციების ოჯახსა და თემზე დაფუძნებული სერვისებით თანდათანობით ჩანაცვლებას... ამავდროულად, ყველა შესაბამის სახელმწიფო ინსტიტუციას უნდა შეეძლოს მონიტორინგი აწარმოოს ყველგან, სადაც ბავშვები არიან, რათა მათი უფლებები დაცული იყოს“, ნათქვამია ორგანიზაციის განცხადებაში. სრულად... წყარო: www.unicef.org

სამცხე-ჯავახეთი. სახალხო დამცველის ინფორმაციით, ომბუდსმენის რწმუნებულები განმეორებითი ვიზიტით იმყოფებოდნენ ნინოწმინდის ბავშვთა პანსიონში, თუმცა მონიტორინგის განხორციელების შესაძლებლობა, გაეროს ბავშვთა კომიტეტის მიერ მიღებული დროებითი ღონისძიების მიუხედავად, კვლავ არ მიეცათ. დაწესებულების წარმომადგენლებმა გასაუბრება არ ისურვეს და ამის მიზეზად, ხელმძღვანელის მითითება დასახელდა. „ომბუდსმენის წარმომადგენლები, ასევე, იმყოფებოდნენ ნინოწმინდის მე-4 საჯარო სკოლაში. აღსანიშნავია, რომ სკოლაში პანსიონიდან არცერთი ბავშვი არ გამოცხადებულა, რაც მიუთითებს, რომ სახელმწიფო უწყებების მხრიდან დაწესებულებას ინფორმაცია ჰქონდა სახალხო დამცველის მოსალოდნელი ვიზიტის შესახებ. სკოლის დირექტორთან გასაუბრებით კიდევ ერთხელ დადასტურდა, რომ სკოლაში ბავშვები ზედამხედველების თანხლებით დადიან. ამასთან, ზედამხედველები საგაკვეთილო პროცესის მიმდინარეობისას სკოლის შენობაში იმყოფებიან და იქ ელოდებიან ბავშვებს. აღნიშნული პრაქტიკის თაობაზე, სკოლის ადმინისტრაციას ადგილზე მიეცა რეკომენდაცია, რადგან არღვევს ბავშვის საუკეთესო ინტერესს. საქართველოს სახალხო დამცველი კიდევ ერთხელ, მოუწოდებს ყველა შესაბამის სახელმწიფო უწყებას, დაუყოვნებლივ მოახდინოს ბავშვის უფლებათა კომიტეტის დროებითი ღონისძიებების შესრულება და უზრუნველყოს პანსიონში დამოუკიდებელი მონიტორინგის ორგანოს მიერ საკუთარი უფლებამოსილების განხორციელება“, ნათქვამია ომბუდსმენის ვებგვერდზე. სრულად... წყარო: ombudsman.ge

კახეთი. ამერიკის შეერთებული შტატების ელჩმა საქართველოში, კელი დეგნანმა გუშინ ყვარელში მედიის განვითარების ფონდის (MDF) ორგანიზებული მედიაწიგნიერების ფორუმის გამარჯვებულები სპეციალური სერტიფიკატებით დააჯილდოვა. „ანა ქიზიყელაშვილი, ანა-მარია კოკორაშვილი, მარიამ ბოჭორაშვილი, ეკატერინე ბეჟანიშვილი, ნანუკა მოლაშვილი, დავით ჭუნაშვილი, მაკა ზაუტაშვილი, ნანიკო მამულაშვილი და დიანა სანადირაძე ის ახალგაზრდები არიან, რომლებმაც ყალბი ფოტო-ვიდეოს გადამოწმება, ინფორმაციულ ქაოსთან გამკლავება და კლონირებული ვებ-გვერდების იდენტიფიცირება შესძლეს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) ინფორმაციით, სახელმწიფო აგვიანებს გაეროს ბავშვთა კომიტეტის დროებითი ზომის აღსრულებას საქმეზე, რომელიც ეხება ნინოწმინდის პანსიონატში ბავშვების უსაფრთხოებას და ძალადობისგან დაცვას. ორგანიზაცია აქვეყნებს გაეროს შეტყობინების ქართულ თარგმანს, თანდართული ორიგინალით. PHR კიდევ ერთხელ მოუწოდებს სახელმწიფო უწყებებს დაუყოვნებლივ აღასრულონ გაეროს ბავშვთა კომიტეტის მიერ გამოცემული დროებითი ზომა. სრულად... წყარო: phr.ge

თბილისი. საქართველოს სახალხო დამცველი ეხმიანება გაეროს ბავშვის უფლებათა კომიტეტის დროებით ღონისძიებას ნინოწმინდის ბავშვთა პანსიონთან მიმართებით, რომელიც ა/ო „პარტნიორობა ადამიანის უფლებებისთვის“ მიმართვის საფუძველზე გამოიცა. „კომიტეტის მოწოდებით, სახელმწიფო ვალდებულია, დაუყოვნებლივ უზრუნველყოს შესაბამისი უფლებამოსილების მქონე მონიტორინგის განმახორციელებელი ორგანოების მიერ ნინოწმინდის პანსიონში ბავშვის უფლებრივი მდგომარეობის შემოწმება. საქართველოს კონსტიტუციის და მოქმედი კანონმდებლობის მიხედვით, სახალხო დამცველი მონიტორინგის განმახორციელებელი ორგანოა და კომიტეტის გადაწყვეტილების შესაბამისად, დაუყოვნებლივ უნდა მიეცეს ყოველმხრივი შემოწმების შესაძლებლობა ნინოწმინდის ბავშვთა პანსიონში. ომბუდსმენი მადლობას უხდის ორგანიზაციას გაწეული სამუშაოსთვის და მოუწოდებს საქართველოს მთავრობას და საქართველოს შრომის, ჯანმრთელობისა და სოციალური დაცვის სამინისტროს მყისიერი რეაგირება მოახდინონ კომიტეტის მიერ მიღებულ გადაწყვეტილებაზე“. სრულად... წყარო: სახალხო დამცველის გვერდი სოციალურ ქსელში