თბილისი. საქართველოს დემოკრატიული ინიციატივა პროკურატურას მოუწოდებს შოთა პაკელიანს მის მიმართ განხორციელებულ არაადამიანური მოპყრობის ფაქტზე მიმდინარე სისხლის სამართლის საქმეში დაუყოვნებლივ მიანიჭოს დაზარალებულის სტატუსი. „საგანგაშოა ის გარემოებაც, რომ GDI-ის არაერთი მიმართვის მიუხედავად, პროკურატურას შოთა პაკელიანი დღემდე დაზარალებულად არ უცვნია. ეს მაშინ, როდესაც პროკურატურაში ადასტურებენ, რომ მედიაში გავრცელებული კადრები წინამდებარე გამოძიების ფარგლებში მათაც აქვთ გამოთხოვილი და ეს მასალები უკვე დიდი ხანია დევს სისხლის სამართლის საქმეში. გავრცელებულ კადრებში ასახული ინფორმაცია სრულად აკმაყოფილებს პირის დაზარალებულად ცნობის საპროცესო კანონმდებლობით დადგენილ სტანდარტს. აღსანიშნავია, რომ პროკურატურის მიერ სისხლის სამართლის საქმეში მსხვერპლის დაზარალებულად ცნობისთვის თავის არიდება კარგად დამკვიდრებულ მავნე პრაქტიკად არის ქცეული", ნათქვამია ორგანიზაციის ვებ-გვერდზე. სრულად... წყარო: gdi.ge

თბილისი. „ძალადობისგან დაცვის ეროვნული ქსელი" მიესალმება „საქართველოს კონსტიტუციაში ცვლილებების შეტანის შესახებ" მე-11 მუხლის მესამე პუნქტით შეთავაზებულ ფორმულირებას. „ძალადობისგან დაცვის ეროვნული ქსელი” მიესალმება ”საქართველოს კონსტიტუციაში ცვლილებების შეტანის შესახებ” საქართველოს კონსტიტუციური კანონპროექტის მე-11 მუხლის მესამე პუნქტით შემოთავაზებულ ფორმულირებას, რომლის მიხედვით სახელმწიფო უზრუნველყოფს თანაბარ უფლებებსა და შესაძლებლობებს მამაკაცებისა და ქალებისათვის და სახელმწიფო იღებს განსაკუთრებულ ზომებს მამაკაცებისა და ქალების არსებითი თანასწორობის უზრუნველსაყოფად და უთანასწორობის აღმოსაფხვრელად. მითითებული ნორმა კონსტიტუციის დონეზე განამტკიცებს გენდერული თანასწორობის მიღწევის შესაძლებლობებსა და ახალ პერსპექტივებს გააჩენს იმისთვის, რომ საქართველოში ქალების და მამაკაცების თანაბარი მონაწილეობა ქვეყნის პოლიტიკურ, სოციალ-ეკონომიკურ და საზოგადოებრივ ცხოვრებაში რეალურად იქნეს უზრუნველყოფილი”, - ნათქვამია განცხადებაში. წყარო: ძალადობისგან დაცვის ეროვნული ქსელი ოფიციალური ფეისბუქგვერდი

თბილისი. არასამთავრობო ორგანიზაციები კონსტიტუციურ რეფორმაში ეროვნული უსაფრთხოების საკითხებზე განცხადებას ავრცელებენ. „დამოუკიდებლობის 26 წლიანმა გამოცდილებამ ცხადყო, რომ ქართული სამართალდამცავი ორგანოებისა და სპეცსამსახურების პოლიტიზირება წარმოადგენს სერიოზულ პრობლემას, რომელიც აფერხებს ქვეყნის დემოკრატიულ განვითარებასა და მისი უსაფრთხოების განმტკიცებას. უკანონო მოსმენების აქამდე გადაუჭრელი პრობლემა ამისი ნათელი დასტურია. შესაბამისად, სამართალდამცავი ორგანოებსა და სპეცსამსახურებზე ეფექტური დემოკრატიული კონტროლის უზრუნველყოფა უნდა წარმოადგენდეს ერთ-ერთ უმნიშვნელოვანეს ეროვნულ პრიორიტეტს. მისი მნიშვნელობიდან გამომდინარე, ხსენებულ სტრუქტურებზე ეფექტური დემოკრატიული კონტროლის დაწესების აუცილებლობა, პრინციპის სახით, კონსტიტუციის ცალკე მუხლში აუცილებლად უნდა აისახოს", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია (საია) შრომის უსაფრთხოების კანონის გამკაცრებას ითხოვს. „საია კანონპროექტით გათვალისწინებულ არაერთ რეგულაციას დადებითად აფასებს. თუმცა, ორგანიზაციის მოსაზრებით არსებობს რამდენიმე საკითხი, რომლის უცვლელად შენარჩუნების შემთხვევაში დიდია რისკი დასაქმებულთა უსაფრთხოებისა და ჯანმრთელობის დაცვა ვერ იქნეს სრულად უზრუნველყოფილი", ნათქვამია ორგანიზაციის ვებ-გვერდზე. სრულად... წყარო: gyla.ge

კახეთი. 2017 წლის 19 ივნისს სიღნაღის რაიონულ სასამართლოში სამი სასამართლო პროცესი გაიმართა, სადაც PHR სათემო სახლის – „თემი ქედელის" ინტერესებს წარმოადგენდა. სასამართლომ სრულად გაიზიარა PHR-ის იურისტის პოზიცია და მიღებული გადაწყვეტილებით, „თემი ქედელის" სათემო მომსახურებაში ჩართულ ფსიქოსოციალური საჭიროების მქონე სამ ადამიანს მხარდაჭერის სფეროები მათი სურვილის შესაბამისად განესაზღვრა. PHR-ის სამართლებრივი დახმარების შედეგად, ფსიქოსოციალური საჭიროების მქონე პირებს შეეძლებათ – წვრილმანი გარიგების დადება, საცხოვრებელი ადგილის განსაზღვრა, პენსიის განკარგვა, საქმის წარმოება სოციალური მომსახურების სააგენტოში, საბანკო მომსახურებით სარგებლობა, იუსტიციის სახლთან ურთიერთობა – აიდი ბარათის აღება და ასევე, მათ მიენიჭათ უფლება, – სრული მოცულობითა და საკუთარი შეხედულებით მიიღონ და განკარგონ საანაბრე ანგარიშზე წლების განმავლობაში დარიცხული თანხა. აღნიშნულ სფეროებში ფსიქოსოციალური საჭიროების მქონე პირებს მხარდამჭერები გაუწევენ დახმარებას. სრულად წყარო: ორგანიზაციის ვებგვერდი

თბილისი. არასამთავრობო ორგანიზაციები საარჩევნო კანონმდებლობასთან დაკავშირებით სპეციალურ განცხადებას ავრცელებენ. „19 ივნისს ცნობილი გახდა მმართველი გუნდის გადაწყვეტილება 2020 წლის საპარლამენტო არჩევნებისთვის შეინარჩუნოს შერეული საარჩევნო სისტემა და სრულად პროპორციულ სისტემაზე გადასვლა მოხდეს 2024 წლის არჩევნებისთვის. ამასთან, უმრავლესობის წარმომადგენლების განცხადებით 2020 წლის არჩევნებისთვის ბარიერი ერთჯერადად 3%-ით შემცირდება. ამავე დროს, ძალაში დარჩება გადაწყვეტილება საარჩევნო ბლოკების გაუქმების შესახებ. ცალსახად და ხაზგასმით უნდა აღვნიშნოთ, რომ „ქართული ოცნების" გადაწყვეტილება სრულიად მიუღებელი და გაუმართლებელია", - ნათქვამია განცხადებაში. განცხადების ხელმომწერი ორგანიზაციები მმართველ პარტიას მოუწოდებენ, გაითვალისწინოს ვენეციის კომისიისა და არასამთავრობო ორგანიზაციების რეკომენდაციები, ასევე - საკუთარი დაპირება საზოგადოების მიმართ და საარჩევნო სისტემასთან დაკავშირებული გადაწყვეტილებები მიიღოს მაქსიმალური კონსესუსის შედეგად და აუჩქარებლად, რათა საკონსტიტუციო ცვლილებები არ ტოვებდეს ერთი პარტიის ინტერესებზე მორგებულის შთაბეჭდილებას. სრულად წყარო: საქართველოს ახალგაზრდა იურისტთა ასოციაციის ვებგვერდი

თბილისი. საქართველოს დემოკრატიული ინიციატივა აქვეყნებს კონსტიტუციაში განსახორციელებელი ცვლილებების შესახებ ვენეციის კომისიის მოსაზრებების არაოფიციალურ თარგმანს. „კომისიამ დადებითად შეაფასა საქართველოს პარლამენტის სრულ პროპორციულ საარჩევნო სისტემაზე გადასვლა და აღნიშნა, რომ ეს „შესაბამისობაშია ევროპის საბჭოს საპარლამენტო ასამბლეისა და ევროპის საბჭოს, ასევე საქართველოს სამოქალაქო საზოგადოებისა და პარტიების უმეტესობის დიდი ხნის მოთხოვნასთან და მისასალმებელია." 5%-იანი ბარიერის განსაზღვრა, კომისიის მოსაზრებით, ასევე არ ეწინააღმდეგება ევროპის საბჭოს სტანდარტებს. საარჩევნო ბლოკების გაუქმება კომისიამ უარყოფითად შეაფასა და აღნიშნა, რომ „ეს ცვლილება ხელს შეუშლის მცირე პარტიებს, გადალახონ 5-პროცენტიანი ბარიერი და ქმნის დაკარგული ხმების რაოდენობის გაზრდის საშიშროებას", ნათქვამია ორგანიზაციის ვებ-გვერდზე. სრულად... წყარო: gdi.ge

თბილისი. საქართველოს ახალგაზრდა იურისტთა ასოციაცია ეხმაურება ზოგადსაგანმანათლებლო დაწესებულებების ავტორიზაციის საბჭოს 2017 წლის 03 თებერვლის გადაწყვეტილებას, რომლითაც შ.პ.ს. „შაჰინის სახელობის სკოლა-ლიცეუმს" ავტორიზაცია გაუუქმდა. საია მიიჩნევს, რომ გადაწყვეტილება, რომლის თანახმადაც სკოლას სასწავლო პროცესის მიმდინარეობისას გაუუქმდა ავტორიზაცია, ვერ აკმაყოფილებს დასაბუთებულობის სტანდარტს და ზოგადასაგანმანათლებლო დაწესებულებების ავტორიაზაციის საბჭომ აშკარად შეუსაბამო და არათანაზომიერი გადაწყვეტილება მიიღო, რასაც შედეგად პირთა ჯგუფისათვის (მოსწავლეები, მასწავლებლები, ადმინისტრაციის წარმომადგენლები) განათლების, შრომის და პიროვნული განვითარების დაუსაბუთებელი შეზღუდვა მოჰყვა. თავის განცხადებაში, საია, ასევე, მოუწოდებს ქართულ მხარეს მუსტაფა ემრე ჩაბუქის საექსტრადიციო პროცედურების განხილვისას იმოქმედოს საერთაშორისო სტანდარტების შესაბამისად და არ დაუშვას მისი თურქეთისათვის გადაცემა. სრულად წყარო: ორგანიზაციის ვებგვერდი

თბილისი. „საქართველოს ახალგაზრდა იურისტთა ასოციაციამ", „სამართლიანი არჩევნებისა და დემოკრატიის საერთაშორისო საზოგადოებამ" და „საერთაშორისო გამჭვირვალობა - საქართველომ" საარჩევნო გარემოს გაუმჯობესების რეკომენდაციები შეიმუშავეს. „2011 წლიდან დღემდე, მას შემდეგ, რაც საქართველოს პარლამენტმა ახალი საარჩევნო კოდექსი მიიღო, საარჩევნო კანონმდებლობაში არაერთი ცვლილება შევიდა, რამაც ხელი შეუწყო მთელი რიგი საკანონმდებლო ხარვეზების აღმოფხვრას. თუმცა, გასული არჩევნების გამოცდილებიდან გამომდინარე კვლავ რჩება პრობლემური საკითხები, რაც გასწორებას საჭიროებს," - ნათქვამია დოკუმენტის შესავალ ნაწილში, - „გასული წლების წინასაარჩევნო, არჩევნების დღისა და შემდგომი პერიოდის პრაქტიკული და საკანონმდებლო ხარვეზების, ასევე, საერთაშორისო სტანდარტების გაანალიზების საფუძველზე, „საქართველოს ახალგაზრდა იურისტთა ასოციაციამ", „სამართლიანი არჩევნებისა და დემოკრატიის საერთაშორისო საზოგადოებამ" და „საერთაშორისო გამჭვირვალობა - საქართველომ" შეიმუშავეს რეკომენდაციები, რომლებიც წინამდებარე დოკუმენტშია წარმოდგენილი. აღნიშნული რეკომენდაციები შეეხება საარჩევნო კანონმდებლობაში არსებული რიგი პრობლემების გადაჭრას, რომლის გათვალისწინება ხელს შეუწყობს უფრო კონკურენტული და ჯანსაღი საარჩევნო გარემოს შექმნას". სრულად... წყარო: www.isfed.ge

თბილისი. კოალიცია ბავშვებისა და ახალგაზრდებისთვის აქვეყნებს მიმართვას კონსტიტუციაში ბავშვთა უფლებების ასახვის თაობაზე. „19 ივნისს ვენეციის კომისიამ საქართველოს კონსტიტუციის ცვლილების შესახებ დასკვნა გამოაქვეყნა. დასკვნის 73-ე პარაგრაფში „ბავშვთა უფლებები"-ს ქვეშ აღნიშნულია, რომ ვენეციის კომისიის რეკომენდაციით, მნიშვნელოვანია ბავშვთა უფლებების დაცვა საქართველოს კონსტიტუციაში დამოუკიდებელ მუხლად ჩამოყალიბდეს. კოალიცია ბავშვებისა და ახალგაზრდებისთვის, უერთდება ვენეციის კომისიის მოწოდებას და მიმართავს საქართველოს პარლამენტს კონსტიტუციაში ბავშვთა უფლებების ასახვის მოთხოვნით", - ნათქვამია მიმართვაში. სრულად წყარო: კოალიციის ვებგვერდი

თბილისი. 2017 წლის 19 ივნისს ბავშვთა და ახალგაზრდობის ეროვნულ ცენტრში ბავშვებისთვის გაიმართა სემინარი-დისკუსია – „არასრულწლოვანთა ინფორმირება მათი უფლებებისა და მართლმსაჯულების სისტემაში არსებული მექანიზმების შესახებ". შეხვედრის მიზანს წარმოადგენდა არასრულწლოვანთა ცოდნის გაზრდა, მათი უფლებებისა და მართლმსაჯულების სისტემაში არსებული დაცვის მექანიზმების შესახებ. სემინარი ჩაატარა ორგანიზაციამ "პარტნიორობა ადამიანის უფლებებისთვის”, გაეროს ბავშვთა ფონდის ხელშეწყობით და ევროკავშირის დაფინანსებით მიმდინარე პროექტის - „მართლმსაჯულების ხელმისაწვდომობის გაუმჯობესება და ბავშვზე მორგებული მართლმსაჯულების სისტემის განვითარება საქართველოში" ფარგლებში. პროექტი ითვალისწინებს ინტერაქტიული სემინარებისა და სამუშაო შეხვედრების მოწყობას ბავშვებისთვის თბილისსა და საქართველოს რეგიონებში: იმერეთში, კახეთში, გურიაში, მცხეთა-მთიანეთში, ქვემო ქართლში. სრულად წყარო: ორგანიზაციის ვებგვერდი

სამცხე-ჯავახეთი. 17 ივნისს საქართველოს დემოკრატიული ინიციატივის წარმომადგენლებმა ახალციხის მუნიციპალიტეტის სოფლებში, აწყურსა და წყრუთში ადგილობრივი თემის წარმომადგენლებთან შეხვედრები გამართეს. შეხვედრების მიზანი იყო მოსახლეობისთვის სამართლებრივი კონსულტაციის გაწევა და ქალთა უფლებებისა და გენდერული თანასწორობის საკითხებზე ინფორმაციის მიწოდება. შეხვედრები გაიმართა პროექტის - „სამართალწარმოება თანასწორობისთვის" ფარგლებში, ააიპ „ჩართულობის და განვითარების ცენტრთან" პარტნიორობით, რომელსაც „საქართველოს დემოკრატიული ინიციატივა" East-West Management Institute , PROLoG, USAID – ის ფინანსური მხარდაჭერით ახორციელებს. პროექტი მიზნად ისახავს საქართველოში მცხოვრები რელიგიური და ეთნიკური უმცირესობების სამართლებრივი სტატუსის გაუმჯობესებას, ამ თემებში შემავალი ქალებისა და გოგონებისთვის მართლმსაჯულებაზე ხელმისაწვდომობის გაზრდას. სრულად წყარო: ორგანიზაციის ოფიციალური ფეისბუქგვერდი

თბილისი. „ახალგაზრდა ადვოკატები" ინსტიტუციური რეფორმის პროცესში სახელმწიფო-ტერიტორიული მოწყობის საკითხებს იკვლევს და შესაბამის ხედვებს წარმოადგენს. ეს, დღეს გამართულ პრეს-კონფერენციაზე ორგანიზაციის საკონსტიტუციო სამართალწარმოების მიმართულების ხელმძღვანელმა, გიორგი ლაბაძემ განაცხადა. მისი თქმით, საქართველოს მთავრობას რეფორმების განხორციელების პროცესში, საზოგადოების ყველა ჯგუფის შეხედულების მოსმენა და გათვალისწინება მართებს; გუბერნატორის ან/და გამგებლის რწმუნებულის ინსტიტუტის დატოვება კი, რეალური დეცენტრალიზაციის პირობებში, ევროპული ქვეყნების გამოცდილებას სცდება, წარმოადგენს საბჭოთა მმართველობის სტილისთვის დამახასიათებელ ფორმებს და შეიძლება შეფასდეს, როგორც სახელმწიფოს ფინანსების არამიზნობრივად ხარჯვის დაშვებაც. სრულად წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) „შრომის უსაფრთხოების შესახებ" საქართველოს კანონის პროექტთან დაკავშირებულ შეფასებას აქვეყნებს. დოკუმენტში ნათქვამია, რომ EMC პოზიტიურად აფასებს სახელმწიფოს მცდელობას განახორციელოს კანონით დაკისრებული ვალდებულება დასაქმების ადგილებზე სახელმწიფო ზედამხედველობის განხორციელებისა და შრომის უსაფრთხოების ბაზისური გარანტიების დადგენით კუთხით, თუმცა, წარმოდგენილი საკანონმდებლო პაკეტი ადეკვატურად ვერ პასუხობს ქვეყანაში შრომის უსაფრთხოების და ჯანმრთელობის ზედამხედველობის საჭიროებებს. სრულად წყარო: ორგანიზაციის ვებგვერდი

19 ივნისს, 10:30 საათზე, ორგანიზაცია „ახალგაზრდა ადვოკატების" საკონსტიტუციო სამართლის ხელმძღვანელი გიორგი ლაბაძე პორტალ „კვირას" პრეს-კლუბში სპეციალურ ბრიფინგს გამართავს. „ახალგაზრდა ადვოკატები" პრესკონფერენციაზე საქართველოს მთავრობას, ტერიტორიული მოწყობისთვის გუბერნატორების, გამგებლის წარმომადგენლის ინსტიტუტის გაუქმებისთვის სარეკომენდაციო წინადადებით მიმართავენ.  მის: ნუცუბიძის ქ. #14ბ, I სადარბაზო, მე-2 სართული, I ოფისი სრულად საკონტაქტო პირი გიორგი ზოიძე - 599 291202

თბილისი. 11 ივნისს, გავრცელდა ინფორმაცია 21 წლის სექს-მუშაკი ქალის ცემის ფაქტზე. „ქალთა მოძრაობა მოუწოდებს პროკურატურას, დროულად და ეფექტურად გამოიძიოს პოლიციის მიერ განხორციელებული სავარაუდო ძალადობა. აღსანიშნავია, რომ სექს-მუშაკები საქართველოში ერთ-ერთ ყველაზე დაუცველი და მარგინალიზებული ჯგუფია, რომელიც გარიყულია საზოგადოების მხრიდან. ამასთან, ხშირია მათ მიმართ ძალადობა, როგორც გარეშე პირების, ისე სამართალდამცავთა მხრიდან," ნათქვამია ორგანიზაციის ვებ-გვერდზე სოციალურ ქსელში. ქალთა მოძრაობა მოითხოვს საზოგადოების ინფორმირებას გამოძიების მიმდინარეობის შესახებ. სრულად... წყარო: ორგანიზაციის ვებ-გვერდი სოციალურ ქსელში

გურია. პარტნიორობა ადამიანის უფლებებისთვის (PHR) იწყებს სამუშაო შეხვედრებს ბავშვებთან, რომლის მიზანია მათი ინფორმირება მართლმსაჯულების სისტემაში არსებული ბავშვის უფლებათა დაცვის მექანიზმების შესახებ. „უკვე ჩატარდა შეხვედრები ოზურგეთში, ჩოხატაურსა და ქსანში. ბავშვები ასევე მიიღებენ ინფორმაციას მესამე ფაკულტატიური ოქმის შესახებ, რომელიც საშუალებას აძლევს მათ, თავად, ან წარმომადგენლის დახმარებით მიმართონ გაეროს ბავშვის უფლებათა კომიტეტს დარღვეული უფლების დაცვის მიზნით. პროექტის განმავლობაში დაგეგმილია შეხვედრები თბილისსა და რეგიონებში: იმერეთი, კახეთი, გურია, მცხეთა-მთიანეთი, ქვემო ქართლი", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. კოალიცია "დამოუკიდებელი და გამჭვირვალე მართლმსაჯულებისთვის" და "საქართველოს ნარკოპოლიტიკის ეროვნული პლატფორმა" დემურ სტურუასა და ჯგუფ "ბირჟა მაფიას" წევრების საქმეს ეხმაურებიან. მათი განცხადებით, ამ საქმეებთან დაკავშირებით არსებული ვითარება ცხადყოფს, რომ საჭიროა: მოხდეს პრობლემის ადეკვატური გააზრება და მაღალი პოლიტიკური თანამდებობის პირებმა სწორი შეფასება მისცენ პრობლემას, რომელიც სცილდება ნარკოპოლიტიკას და სისტემური მიზეზები გააჩნია; განხორციელდეს სასამართლოს ძირეული რეფორმა და ჩამოყალიბდეს პოლიტიკური ჯგუფების, აღმასრულებელი ხელისუფლებისა და სამართალდამცავი ორგანოებისგან თავისუფალი, ძლიერი და კომპეტენტური სასამართლო კორპუსი; გატარდეს ძირეული რეფორმა სამართალდამცავ სისტემაში, რომლის მიზანიც იქნება თანამედროვე პოლიციის ჩამოყალიბება, სადაც მინიმუმამდე იქნება დაყვანილი არასათანადო მოპყრობისა და ძალის გადამეტების რისკები სამართალდამცავთა მხრიდან; განხორციელდეს არსებული რეპრესიული ნარკოპოლიტიკის საფუძვლიანი გადახედვა, რომლის შედეგადაც ძირითადი აქცენტები მოქალაქეთა დასჯიდან და იზოლაციიდან, გადავა საჭიროების მქონე ადამიანების რეაბილიტაციასა და რესოციალიზაციაზე; შეიქმნას დამოუკიდებელი საგამოძიებო მექანიზმი, რომელიც იქნება უფლებამოსილი, აწარმოოს გამოძიება და სისხლისსამართლებრივი დევნა სამართალდამცავთა მხრიდან შესაძლო დანაშაულის ფაქტებზე. სრულად წყარო: ორგანიზაცია „კონსტიტუციის 42-ე მუხლის" ვებგვერდი

თბილისი. არასამთავრობო ორგანიზაციები მოუწოდებენ პარლამენტს სრულად გაითვალისწინოს ვენეციის კომისიის რეკომენდაციები რეკომენდაციები და შენიშვნები. „მმართველი პარტიის მიერ გაკეთებული რიგი განცხადებები აჩენს ეჭვს, რომ ხელისუფლება ცდილობს იპოვოს გზები, თუ როგორ აარიდოს თავი ვენეციის კომისიის რეკომენდაციების სრულად გათვალისწინებას და ტოვებს შთაბეჭდილებას, რომ ხელისუფლება ცდილობს დააკნინოს ვენეციის კომისიის გარკვეული რეკომენდაციები. აღნიშნული განცხადებები არ შეესაბამება ხელისუფლების მიერ წინასწარ გაცხადებულ მზაობას ვენეციის კომისიის მოსაზრებების გათვალისწინებასთან დაკავშირებით და შესაძლოა მნიშვნელოვნად დააზიანოს ნდობა საკონსტიტუციო რეფორმის პროცესისადმი", - ნათქვამია განცხადებაში. მიმართვის ხელმომწერი ორგანზიაციების მოთხოვნაა, ვენეციის კომისიის საბოლოო დასკვნაში მოცემული მოსაზრებების სათანადოდ გააზრებისა და საკონსტიტუციო ცვლილებების პროექტში სრულყოფილად ასახვის უზრუნველსაყოფად, საკონსტიტუციო ცვლილებებზე საპარლამენტო მოსმენები დაჩქარებულ რეჟიმში არ ჩატარდეს და პარლამენტმა დაიტოვოს გონივრული ვადა საკონსტიტუციო ცვლილებების განახლებული პროექტის დაინტერესებულ მხარეებთან განხილვისათვის. სრულად წყარო: emc.org.ge

აჭარა. 2017 წლის 10 ივნისს ა(ა)იპ „ბათუმში ახალი მეჩეთის მშენებლობის ფონდმა", მეჩეთის მშენებლობის ნებართვის მოპოვების მიზნით, ბათუმის მუნიციპალიტეტის მერიის წინააღმდეგ ბათუმის საქალაქო სასამართლოში სარჩელი წარადგინა. მუსლიმი თემის ინტერესებს სასამართლოში ტოლერანტობისა და მრავალფეროვნების ინსტიტუტი (TDI) და ადამიანის უფლებების სწავლებისა და მონიტორინგის ცენტრი (EMC) იცავენ. სარჩელის ძირითად მოთხოვნას წარმოადგენს მუსლიმი თემის მიერ შეძენილ მიწის ნაკვეთზე მშენებლობის ნებართვის გაცემის თაობაზე ქ. ბათუმის მუნიციპალიტეტის მერიის მიერ გაცემული უარყოფითი გადაწყვეტილებების ბათილად ცნობა, ბათუმის მუნიციპალიტეტის მიმართ სასამართლოს მიერ მეჩეთის მშენებლობის ნებართვის გაცემის დავალება და რელიგიური ნიშნით დისკრიმინაციის ფაქტის დადგენა. სრულად... წყარო: emc.org.ge

თბილისი. არასამთავრობო და საერთაშორისო ორგანიზაციებისგან შემდგარ ქალთა პოლიტიკური მონაწილეობის სამუშაო ჯგუფმა (Task Force) საქართველოს პარლამენტში კანონპროექტი შეიტანა. კანონპროექტს ხელს აწერს საქართველოს მასშტაბით 37 455 ამომრჩეველი. ის გულისხმობს 2 ორგანულ კანონში ცვლილებების შეტანას და დროებითი ზომების მიღებას ქალთა პოლიტიკური მონაწილეობის გასაზრდელად. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია მიიჩნევს, რომ „აღნიშნული საქმე არის კიდევ ერთი დასტური ქვეყნის სამართალდამცავ სისტემაში და სასამართლო ხელისუფლებაში არსებული სისტემური პრობლემებისა". „წლებია სისტემურ პრობლემას წარმოადგენს სამართალდამცავი უწყების თანამშრომელთა მხრიდან სავარაუდო არასათანადო მოპყრობის შემთხვევები. ამასთან, ცნობილია არაერთი ფაქტის შესახებ, სადაც მოქალაქეები საუბრობენ, რომ ძალოვანი სტრუქტურის წარმომადგენლებმა ნარკოტიკული საშუალება „ჩაუდეს." ქვეყანაში დამოუკიდებელი და მიუკერძოებელი საგამოძიებო ინსიტიტუტის არარსებობა და შემთხვევების არაეფექტური გამოძიება უფრო ახალისებს ასეთი ტიპის დანაშაულების ჩადენას. აღნიშნულს ემატება ქვეყანაში არსებული რეპრესიული ნარკოპოლიტიკა, რომელიც მოქალაქეთა დასჯის მექანიზმად იქცა”, ნათქვამია ორგანიზაციის განცხადებაში. სრულად... წყარო: ორგანიზაციის ვებ-გვერდი სოციალურ ქსელში