თბილისი. 14 სექტემბერს ადამიანის უფლებათა ცენტრმა საპარლამენტო არჩევნების გაშუქების მედიამონიტორინგის ბოლო ორი პერიოდული ანგარიშის შედეგები გამოაქვეყნა. ადამიანის უფლებათა ცენტრის მონიტორები აკვირდებოდნენ შემდეგ ტელეარხებზე გასულ ფარულ პოლიტიკურ, სოციალურ და ფასიან პოლიტიკურ რეკლამებს: საზოგადოებრივი მაუწყებელი, „იმედი", „რუსთავი 2", „კავკასია", „მაესტრო" და „მე-9 არხი". მონიტორინგი მოიცავს 30 ივლისი-12 აგვისტოს, ასევე 13–26 აგვისტოს პერიოდის. მედიამონიტორინგის მიზანია, გამოავლინოს მედიის მიერ საარჩევნო კამპანიის გაშუქების ტენდენციები და შეიმუშაოს რეკომენდაციები საარჩევნო გარემოს გაუმჯობესების მიზნით. კვლევა მოიცავს როგორც რაოდენობრივ, ისე თვისებრივ კომპონენტებს. მედიამონიტორინგი ხორციელდება ამერიკის საერთაშორისო განვითარების სააგენტოს  (USAID) დაფინანსებული ოთხწლიანი პროექტის „ნდობის გაზრდა საარჩევნო პროცესებისადმი"  ფარგლებში, რომელსაც ახორციელებს საარჩევნო სისტემების საერთაშორისო ფონდი  (IFES). სრულად წყარო:  humanrights.ge

18 სექტემბერს, 14:00 საათზე, "Must Carry"-ს მონიტორინგის ჯგუფი მართავს პრესკონფერენციას, რომელიც შეეხება საქართველოში მაუწყებლობის სავალდებულო ტრანზიტის პრინციპის აღსრულებას. პრესკონფერენციის დროს მიმოხილული იქნება მონიტორინგის შედეგად გამოვლენილი ძირითადი ტენდენციები, პრობლემები და "Must Carry"-ს გავრცელების გეოგრაფიული რუკა. მისმართი: სასტუმრო "თბილისი მარიოტი", რუსთაველის 13, თბილისი.

შიდა ქართლი. 17 სექტემბერს გორში, სამოქალაქო საზოგადოების ინსტიტუტის ორგანიზებით, გაიმართა ადგილორბივი საზოგადოებრივი ორგანიზაციებისა და მედიის წარმომადგენელების შეხვედრა, რომელის თემა საზოგადოებრივი ორგანიზაციების საკომუნიკაციო სტრატეგიები და მათი აქტივობების გაშუქება იყო.  შეხვედრაზე ნაჩვენები იყო სამოქალაქო საზოგადოების ინსტიტუტის მომაზადებული ფილმი, რომელიც ასახავს სამოქალაქო საზოგადოების და, კონკრეტულად, საზოგადოებრივი ორგანიზაციების განვითარების ისტორიას. ფილმში დასმული პრობლემური საკითხები, როგორიცაა მესამე სექტორის დაბალი ცნობადობა, მის მიმართ ნაკლები ნდობა და სექტორის გარშემო არსებული სტერეოტიპები, განიხილეს თავად ორგანიზაციების წარმომადგენლებმა და ჟურნალისტებმა.  

სამეგრელო. 14 სექტემბერს, ასოციაცია „ათინათმა" „სამოქალაქო განათლებისა და პედაგოგთა გადამზადების პროგრამის" ფარგლებში არსებული მცირე საგრანტო კონკურსის შესახებ  ღია კარის დღე მოაწყო. ღია კარის დღეს ესწრებოდა ზუგდიდის პარტნიორი სკოლის დირექტორები. მათ მიიღეს ინფორმაცია პროექტის შესახებ და დაურიგდათ პროგრამის ფარგლებში შექმნილი ბიულეტენი, საგრანტო თემების ჩამონათვალი და ასევე საგრანტო აპლიკაციის ფორმა.  ღია კარის დღე ჩატარდა ზუგდიდის საგანმანათლებლო რესურს ცენტრის დახმარებით. სრულად წყარო: civics.ge

ქვემო ქართლი. საგანმანათლებლო ინიციატივების ქართული ასოციაცია (სიქა) იწყებს დებატების პროგრამას VII-XI კლასის მოსწავლეთათვის. კლუბის პროგრამა გულისხმობს მოსწავლეთათვის დებატების ხელოვნების შესწავლას, დებატების ეროვნულ, რეგიონალურ და ადგილობრივ ტურნირებში, ასევე ქალაქგარეთ ლაშქრობებსა და ექსკურსიებში მონაწილეობას; ეროვნულ და საერთაშორისო ბანაკებში მონაწილეობის საშუალებას; როლურ და სიტუაციურ თამაშებს, კომპიუტერისა და ინტერნეტის გამოყენებას, ჯგუფურ სავარჯიშოებს, პრაქტიკულ დავალებებს, პრეზენტაციებს და დისკუსიებს.  კლუბის წევრობა არის ფასიანი და შეადგენს 3 თვეში 59 ლარს. კლუბის კურსდამთავრებულები მიიღებენ სერტიფიკატებს. კლუბი ფუქნციონირებას 2012 წლის ოქტომბერში  დაიწყებს.  დამატებითი ინფორმაცია და სააპლიკაციო ფორმა

18 სექტემბერს, 18:00 საათზე ჰაინრიხ ბიოლის ფონდის სამხრეთ კავკასიის რეგიონალური ბიურო გიწევეთ საჯარო დისკუსიაზე: დემოკრატიზაციის კრიზისი და ეთნო–პოლიტიკური კონფლიქტების ტრანსორმაცია სამხრეთ კავკასიაში. მომხსენებლები:  • მარინა ელბაქიძე, მშვიდობის, დემოკრატიის და განვითარების კავკასიური ინსტიტუტი (თბილისი)  • ტომას დე ვაალი, კარნეგის ფონდი საერთაშორისო მშვიდობისთვის, უფროსი მეცნიერ-თანამშრომელი (ვაშინგტონი კ/ო, აშშ)  • გიორგი კანაშვილი, კავკასიური სახლი, აღმასრულებელი დირექტორი (თბილისი)  • ლორენს შითსი, საერთაშორისო კრიზისების ჯგუფი (თბილისი) მოდერატორი: გოგი გვახარია, რადიო თავისუფლება (თბილისი, საქართველო) ინგლისურ-ქართული და პირიქით სინქრონული თარგმანი უზრუნველყოფილია! დასწრება თავისუფალია  მისამართი: თბილისი, ზოვრეთის ქ. 38 

18 სექტემბერს, 12:00 საათზე, სამოქალაქო საზოგადოების განვითარების კავშირი „ბორჯღალი" გამართავს შეხვედრას თემაზე: „ეკომიგრანტთა განსახლების პროცესის მიმოხილვა".  მისამართი: ბათუმი, ფარნავაზ მეფის 62–64 . ბათუმის დემოკრატიული ჩართულობის ცენტრი. 

18 სექტემბერს, 14 საათზე, კახეთში, სოფელ ხორნაბუჯში, ევროკავშირი აღნიშნავს „პარკების მსოფლიო დღეს".  ღონისძიების ფარგლებში, დედოფლისწყაროს რაიონის სოფელ ხორნაბუჯის საჯარო სკოლის ეზოში დაგეგმილია 50 ძირი კატალპას ჯიშის ხის ნერგის დარგვა ადგილობრივი ხელისუფლების ხელშეწყობითა და დედოფლისწყაროს მუნიციპალიტეტის საჯარო სკოლების მოსწავლეებისა და ადგილობრივი მოსახლეობის მონაწილეობით. ღონისძიების ორგანიზებას უზრუნველყოფს საერთაშორისო ორგანიზაცია  Mercy Corps და კავკასიის გარემოსდაცვითი არასამთავრობო ორგანიზაციების ქსელი CENN. „პარკების მსოფლიო დღის" შესახებ დეტალური ინფორმაციისთვის ეწვიეთ ვებგვერდს: www.worldparksday.com, ხოლო დამატებითი ინფორმაციისთვის ევროკავშირის გარემოსდაცვითი პოლიტიკის თაობაზე: http://europa.eu/pol/env

თბილისი. გაეროს განვითარების პროგრამა (UNDP) დახმარებას გაუწევს სტიქიური უბედურების შედეგად დაზარალებულ კახეთის ფერმერებს. სოფლის მეურნეობის სპეციალისტები და კონსულტანტები გურჯაანის, თელავის, ყვარლისა და ლაგოდეხის მუნიციპალიტეტების 30-ზე მეტ სოფელს ეწვევიან. მათი დახმარებით ფერმერები სეტყვით დაზიანებული ვენახებისა და ხეხილის ბაღების რეაბილიტაციას შეძლებენ.  კახეთის რეგიონში უკვე მუშაობს ოთხი საკონსულტაციო ჯგუფი, რომელთა შემადგენლობაში შედიან საქართველოს აგრარული უნივერსიტეტის და კაჭრეთის პროფესიულ კოლეჯთან არსებული სასოფლო-სამეურნეო ექსტენციის ცენტრის გამოცდილი სპეციალისტები.  თეორიული კონსულტაცია და პრაქტიკული ტრენინგი მოიცავს მცენარეთა მოვლას და მკურნალობას, პესტიციდებისა და სასუქების სწორად და დროულად გამოყენებას, დაზიანებული ვენახებისა და ხეხილის ბაღების დაცვას და რეაბილიტაციას.  დღემდე კონსულტაცია და ტრენინგი 700 ფერმერმა გაიარა. სექტემბრის ბოლომდე საკონსულტაციო დახმარებას 1500-მდე ფერმერი მიიღებს. 600 სასოფლო-სამეურნეო ნაკვეთზე ჩატარდება სადემონსტრაციო სამუშაოები და გაიცემა პრაქტიკული რეკომენდაციები.      დახმარების პროგრამა 2012 წლის დეკემბრამდე გაგრძელდება. აგრონომიული კონსულტაციების გარდა ფერმერებთან იმუშავებენ აგრო-ბიზნესის სპეციალისტებიც, რომლებიც რჩევებს მისცემენ ფერმერებს ფინანსური ზარალის შემცირებისა და მეურნეობის სამომავლო განვითარების საკითხებზე.   კახეთის ფერმერთა დახმარების პროგრამა დაიწყო 2012 წლის აგვისტოში მას შემდეგ, რაც ძლიერმა წვიმამ, სეტყვამ და ქარბორბალამ დააზიანა სასოფლო-სამეურნეო ნარგავები რეგიონის ოთხ მუნიციპალიტეტში და პირდაპირი ზარალი მიაყენა 17 ათასზე მეტ ოჯახს.   გაეროს განვითარების პროგრამა (UNDP) 2006 წლიდან მუშაობს კახეთის რეგიონში. UNDP-ის დახმარება მოიცავს რეგიონის ეკონომიკური განვითარების მხარდაჭერას, პროფესიული განათლების განვითარებას და ფერმერთა საკონსულტაციო მომსახურების ხელშეწყობას.  წყარო: cenn

აჭარა. 14 სექტემბერს ბათუმში სამოქალაქო საზოგადოების ინსტიუტმა ადგილობრივ საზოგადოებრივ ორგანიზაციებს წარუდგინა ეროვნული პლატფორმის კონცეფცია. კონცეფციის მიხედვით, პლატფორმა სექტორში არსებული მოსაზრებების შეჯერების, გამოცდილების გაზიარების, საერთო აქტივობათა განხორციელებისა და ხელისუფლებასა და სხვა აქტორებთან დიალოგის გამართვის ინსტრუმენტია. შეხვედრის მიზანი, როგორც მის დასაწყისში აღინიშნა, პლატფრომის კონცეფციის შესახებ საზოგდოებრივი ორგანიზაციების მხრიდან შენიშვნების და კომენტარების მიღება იყო. კონცეფციის პრეზენტაციის შემდეგ გაიმართა ცოცხალი და საინტერესო დისკუსია ეროვნული პლატფორმის სამომავლო მოდელის, მისი მუშაობის წესის შესახებ. მიღებული შენიშვნები და წინადადებები გათვალისწინებული იქნება ეროვნული პლატფორმის დებულებების შედგენის დროს.   საზოგადოებრივი ორგანიზაციების ეროვნული პლატფორმის კონცეფციის პრეზენტაცია საქართველოს ყველა რეგიონშია დაგეგმილი. 

ქვემო ქართლი. 15 სექტემბერს სამოქალაქო ინიციატივების ქართული ასოციაციის (სიქას) ორგანიზებით დასუფთავდა საჯარო სკოლების მიმდებარე ტერიტორია. აქტივობაში „გავაკეთოთ ეს ქვემო ქართლში", მონაწილეობდა „სამოქალაქო განათლებისა და პედაგოგთა გადამზადების პროგრამაში" ჩართული ქვემო ქართლის რეგიონის სკოლები. სრულად წყარო: ორგანიზაციის ქვერდი სოციალურ ქსელში

სამცხე–ჯავახეთი. 14 სექტემბერს ახალციხისა და ადიგენის მუნიციპალიტეტის სამოქალაქო კლუბების, გარემოსდაცვითი ორგანიზაციების და  ადგილობრივი მოსახლეობის მონაწილეობით, აქციის ფარგლებში  - „დავასუფთავოთ მსოფლიო – დავასუფთავოთ საქართველო"  ერთობლივი დასუფთავების აქცია მოეწყო. „დასუფთავების აქციაში მონაწილეობა თითოეული მოქალაქის ვალდებულებაა.  მოსახლეობა პასუხისმგებელია  იცხოვროს სუფთა გარემოში, რაც ჯანსაღი გარემოს შექმნის აუცილებელი პირობაა", - ამ შინაარსის შემცველი ბუკლეტები,  საყოველთაო დასუფთავების დღეს, სამოქალაქო კლუბის წევრებმა ადგილობრივ მოსახლეობას დაურიგეს და აქციაში აქტიურად ჩართვისკენ მოუწოდეს. აქციის მონაწილეებმა მუნიციპალიტეტის სხვადასხვა  უბანი  დაასუფთავეს.   აქცია სამ დღეს გაგრძელდება. მას ახალციხის მუნიციპალიტეტის დასუფთავების სამსახური შეუერთდა, მისმა თანამშრომლებმა შეგროვილი ნარჩენები მანქანით გაიტანეს. კამპანია „დავასუფთავოთ მსოფლიო" გაეროს ეგიდით და გარემოსდაცვითი ორგანიზაციების ხელმძღვანელობით, ყოველწლიურად სექტემბრის თვეში ტარდება და მასში ჩართულ 130 ქვეყნის  35 მილიონამდე მოქალაქეს შორის საქართველო აქტიურად მონაწილეობს. 

ქვემო ქართლი. 14 სექტემბერს რუსთავის დემოკრატიული ჩართულობის ცენტრში, გაიმართა საჯარო დებატები ქვემო ქართლისა და შიდა ქართლის სამოქალაქო კლუბებს შორის  თემაზე: „არჩევნებში მონაწილეობა კანონით სავალდებულო უნდა იყოს".  მონაწილეებმა დებატებისა და საჯარო გამოსვლების უნარები გაიღრმავეს და დაგეგმეს ერთობლივი  აქტივობები. დებატებში მონაწილეობა მიიღო 50-მა მოსწავლემ ორივე რეგიონიდან.   სრულად წყარო: civics.ge

სამცხე–ჯავახეთი. კონკურსი ორიენტირებულია სამოქალაქო კლუბის წევრებზე. მსურველებს შეუძლიათ წარადგინონ პროექტები 8 ოქტომბრამდე სხვადასხვა მიმართულებით. კერძოდ, ბიზნეს-სექტორის ჩართვა ახალგაზრდებისათვის აქტუალური პრობლემების მოგვარებაში; ახალგაზრდების მედიასთან თანამშრომლობა; სკოლის თუ თემის პრობლემების მოგვარება ადგილობრივ ხელისუფლებასთან თანამშრომლობით; მოსწავლეთა თვითმმართველობის, ან სასკოლო სამოქალაქო კლუბების გაძლიერება; ახალგაზრდებს შორის ჯანსაღი ცხოვრების წესის პოპულარიზაცია; ადამიანთა უფლებების დაცვა და კანონის უზენაესობის ხელშეწყობა; სამოქალაქო განათლების პოპულარიზაცია; ინტეგრაციის ხელშეწყობა (მაგ: შეზღუდული შესაძლებლობების მქონე პირები, იძულებით გადაადგილებულები და ა.შ.), ეკოლოგიური პრობლემების მოგვარება, ადვოკატირება, გენდერული თანასწორობის ხელშეწყობა. კონკურსის გამოცხადებამდე ახალციხის ახალგაზრდულმა ცენტრმა, სამოქალაქო კლუბის წევრებისთვის, უზრუნველყო ტრენინგები პროექტების წერის უნარ-ჩვევების გასავითარებლად.

სამეგრელო. საზოგადოებრივი ორგანიზაციის „დევნილი ქალები საკუთარი უფლებების დაცვისთვის" ინიციატივით,  საზოგადოებრივი ორგანიზაციის წარმომადგენელი, მაჟორიტარ კანდიდატებთან შეხვედრას მართავს. ორგანიზაციის ხელმძღვანელის ნონა უბილავას განცხადებით, დევნილთა პრობლემებზე მომუშავა საზოგადოებრივი ორგანიზაციები მაჟორიტაორობის კანდიდატებთან შეხვედრებს აღმოსავლეთ–დასავლეთის მართვის ინსტიტუტის პროექტის – „იმოქმედე ახლა" – ფარგლებში მართავენ. სამოქალაქო სექტორს სურს მოისმიონს პოლიტიკოსებისგან, თუ რას სთავაზობენ ისინი კონფლიქტის მოგვარებისა და დევნილთა პრობლემების მოგვარების საკითხებზე. 14 სექტემბერს ორგანიზაციის ინიციატივით შეხვედრა შედგა ზუგდიდის დეპუტატობის მაჟორიტარ კანდიდატთან ირაკლი ალასანიასთან. შეხვედრას 20–ზე მეტი საზოგადოებრივი ორგანიზაციის წარმომადგენელი ესწრებოდა. მაჟორიტაორის კანდიდატმა მათ კოალიციის ხედვა გააცნო კონფლიქტებთან მიმართებაში.

სამცხე–ჯავახეთი. სამართლიანი არჩევნებისა და დემოკრატიის საერთაშორისო საზოგადოება (ISFED) სამცხე-ჯავახეთში 2012 წლის პირველი ოქტომბრის საპარლამენტო არჩევნების დამკვირვებელთა ტრენინგებს მართავს. ტრენინგი ახალციხის დემოკრატიული ჩართულობის ცენტრში, 12 სექტემბრიდან მიმდინარეობს და მას  რეგიონის ექვსივე მუნიციპალიტეტის (ახალციხე, ახალქალაქი, ასპინძა, ადიგენი, ბორჯომი, ნინოწმინდა) წარმომადგენლები ესწრებიან.  დამკვირვებელთა ტრენინგი სამცხე-ჯავახეთში 17 სექტემბერს დასრულდება.

კახეთი. 14 სექტემბერს, თელავის დემოკრატიული ჩართულობის ცენტრში საქართველოს ახალგაზრდა იურისტთა ასოციაციის ქართული მედიის სამართლებრივი დაცვის ცენტრის იურისტებმა ადგილობრივი მედიის წარმომადგენლებთან შეხვედრა გამართეს. საიას თელავის ხელმძღვანელმა, მარეხ მგალობლიშვილმა და მედიის სამართლებრივი დაცვის ცენტრის კოორდინატორმა, ნათია კაპანაძემ ჟურნალისტებს მედიის სამართლებრივი დაცვის ცენტრის საქმიანობისა და ჟურნალისტთა უფლებების შესახებ  მიაწოდეს ინფორმაცია.  შეხვედრის მონაწილეებს გადაეცათ საქართველოს ახალგაზრდა იურისტთა ასოციაციის მიერ მომზადებული რეკომენდაციები წინასაარჩევნო პროცესებისა და კენჭისყრის დღის გაშუქების თაობაზე.

გურია.  9–13 სექტემბერს ლანჩხუთში გაიმართა ტრენინგი ასპინძის, ჩოხატაურის და ლანჩხუთის სასწრაფო დახმარების ექიმებისთვის. ტრენინგი პროექტის –  „ერთობლივი მუშაობა - თემების მზაობა კრიზისული სიტუაციებისთვის და საჯარო-სამაშველო სამსახურების დახმარება" – ფარგლებში მიმდინარეობს, რომელიც დაფინანსებულია პოლონეთის საგარეო საქმეთა სამინისტროს მიერ და ახორციელებს „კივიტას გეორგიკა" პოლონურ ორგანიზაცია „პოლონეთის საერთაშორისო დახმარების ცენტრთან" ერთად. ტრენინგი ჩაატარეს პოლონელმა ექსპერტებმა პოლონეთის კატასტროფების ცენტრიდან. ტრენინგის მიზანია ასწავლოს ექიმებს იმ აპარატურის გამოყენება, რომელიც პოლონეთმა საჩუქრად გადასცა მუნიციპალიტეტებს. სამივე მუნიციპალიტეტს გადეცა სხვადასხვა აპარატურა – დეფიბრილატორები, ლარინგოსკოპები და სპეციალური საკაცეები. მათი დამონტაჟება მოხდება მუნიციპალურ სასწრაფო დახმარების მანქანებზე. 

თბილისი. 14 სექტემბერს  „საქართველოს ჟურნალისტური ეთიკის ქარტიამ" და სლოვაკურმა საზოგადოებრივმა ორგანიზაციამ „მემო 98–მა" მედია მონიტორინგის პირველი და მეორე შუალედური ანგარიშის შედეგები წარადგინა. მონიტორინგის მიზანია დეტალურად გამოავლინოს, როგორ ხდება სხვადასხვა თემების გაშუქება წინასაარჩენო პერიოდში ტელეეთერით.  პირველ და მეორე შუალედურ ანგარიშში გაანალიზებულია 2012 წლის 1–15 ივლისისა და 23 ივლისი–5 აგვისტოს პერიოდში 11 ტელევიზიის საუკეთესო საეთერო დროის დაკვირვების შედეგები. ეს ტელევიზიებია: საზოგადოებრივი მაუწყებლის პირველი არხი, რუსთავი 2, იმედი, მაესტრო, კავკასია, მეცხრე არხი, რეალ ტვ, 25-ე არხი, აჭარის ტელევიზია, ტვ რიონი და მეგა ტვ. მონიტორინგისას გამოყენებული იყო თვისებრივი ანალიზის მეთოდი. მონიტორინგის შედეგად გაირკვა, რომ ყველა ტელეკომპანიის შედეგი დაახლოებით ერთნაირად მაღალია და ის მერყეობს კარგსა და მაღალპროფესიულ სტანდარტს შორის.  პროექტი „მედია გამჭვირვალე და სამართლიანი არჩევნებისთვის" ხორციელდება ფონდი „ღია საზოგადოება – საქართველოს" მხარდაჭერით. პირველი შუალედური ანგარიში მეორე შუალედური ანგარიში

აჭარა. 14 სექტემბერს, ბათუმის დემოკრატიული ჩართულობის ცენტრში, გაიმართა მრგვალი მაგიდა თემაზე: „გენდერი, ქალი და არჩევნები". შეხვედრის მიზანი იყო, საქართველოში და მის რეგიონში გენდერული თანასწორობის პოლიტიკის ხელისშემშლელი პრობლემების და სტერეოტიპების გამოვლენა და მათი მოგვარების გზების დასახვა.  შეხვედრაში მონაწილეობას იღებდნენ ადგილობრივი აქტივისტი/ლიდერი ქალები, ადგილობრივი საზოგადოებრივი და სამთავრობო ორგანიზაციების წარმომადგენლები, პოლიტიკური პარტიები, სტუდენტები, სხვა სოციალური ჯგუფები, რეგიონში მცხოვრები დევნილები, ეთნიკური უმცირესობები და მასმედია. შეხვედრის მონაწილეებმა იმსჯელეს გენდერული თანასწორობის კუთხით რეგიონში არსებულ პრობლემებზე, დასახეს პრობლემების მოგვარების გზები და შეიმუშავეს რეკომენდაციები. პროექტი ხორციელდება „ახალგაზრდა პედაგოგთა და ფსიქოლოგთა ასოციაციის" მიერ, „საარჩევნო სისტემების საერთაშორისო ფონდის" და ამერიკის შეერთებული შტატების საერთაშორისო განვითარების სააგენტოს" ფინანსური მხარდაჭერით.

კახეთი. საზოგადოებრივმა ორგანიზაციამ ,,ბიზნეს ცენტრმა კახეთმა", დედოფლისწყაროში, გამართა შეხვედრა შემდეგ საკითხზე  – როგორია რეგიონული ეკონომიკა კახეთში. შეხვედრას ესწრებოდნენ საზოგადოებრივი  ორგანიზაციების წარმომადგენლები, სტუდენტები, ჟურნალისტები, ადგილობრივი თვითმმართველობის წარმომადგენლები და დაინტერესებული მოქალაქეები. საზოგადოებას მიაჩნია, რომ კახეთის რეგიონული განვითარების 5 წლიან სტრატეგიაში, რომელიც დამუშავების პროცესშია, უნდა შევიდეს ისეთი პრობლემები რომელიც ეკონომიკის კუთხით მუნიციპალიტეტების როლს განსაზღვრავს. მაკა ხაზიური, ჟურნალისტი: ,,კახეთი ერთ-ერთ მდიდარ რეგიონად ითვლება და ეკონომიკის მხრივ დიდი პოტენციალი აქვს, მაგრამ რეგიონს ჭირდება გეგმა რისი მიხედვითაც განვითარდება ეკონომიკა". ,,ბიზნეს ცენტრის" ხელმძღვანელის, სოსო მიქელაძის თქმით, რეგიონში ეკონომიკის კუთხით პრობლემების გამოვლენაა საჭირო: ,,პირველ რიგში პრობლემების ანალიზი უნდა მოხდეს ყველა მუნიციპალიტეტში. რეგიონში გამოსაკვლევია ძირითადი ეკონომიკური მაჩვენებლებიც და სხვა ბევრი საკითხი, რომელიც შესასწავლი და გასათვალისწინებელია რეგიონული ეკონომიკის დასაგეგმად".

იმერეთი. ჰაინრიჰ ბიოლის ფონდის სამხრეთ კავკასიის რეგიონულმა ბიურომ, 14 სექტემბერს, პროექტის –  „დევნილების ჩართულობის გაძლიერება საპარლამენტო არჩევნების კონტექსტში" – ფარგლებში, დევნილების მონაწილეობით გამართა საჯარო შეხვედრა 2012 წლის საპარლამენტო არჩევნებში მონაწილე მაჟორიტარი დეპუტატობის კანდიდატებთან . შეხვედრის მიზანს მაჟორიტარი დეპუტატობის კანდიდატების მხიდან დევნილებისთვის პარტიების პროგრამების შესახებ   ინფორმაციის მიწოდება წარმოადგენდა. შეხვედრა წყალტუბოში,  სასტუმრო  „პრომეთეს" დარბაზში გაიმართა.