20 სექტემბერს, 14:00 საათზე, საქართველოს ახალგაზრდა იურისტთა ასოციაცია წინასაარჩევნო გარემოს მონიტორინგის მეორე შუალედური ანგარიშის პრეზენტაციას გამართავს. მისამართი: თბილისი, თავისუფლების მოედანი 4, სასტუმრო „ქორთიარდ მარიოტი"

21 სექტემბერს, 11:00 საათზე, ასოციაცია მწვანე ალტერნატივა გამართავს დისკუსიას თემაზე – „ტყისა და სხვა ბუნებრივი რესურსების მართვის საკითხი". მისამართი: თბილისი, 26 მაისის მოედანი 1, სასტუმრო „ჰოლიდეი ინ"

თბილისი. „არასამთავრობო ორგანიზაციები გმობენ სასჯელაღსრულების სისტემაში წამებისა და არაადამიანური მოპყრობის პრაქტიკას. ისინი მოითხოვენ დაუყოვნებლივ გამოძიებას და შესაბამისი პირების სისხლის სამართლებრივ და პოლიტიკურ პასუხისმგებლობას", – ნათქვამია განცხადებაში, რომელსაც ხელს არასამთავრობო ორგანიზაციები აწერენ. განცხადებაში ნათქვამია, რომ არასათანადო მოპყრობა სისტემური ხასიათის პრობლემაა საქართველოს სასჯელაღსრულების სისტემაში, რომელზეც წლების განმავლობაში საუბრობს როგორც სახალხო დამცველი, ასევე არასამთავრობო ორგანიზაციები. არასამთავრობოები სისტემური პრობლემის აღმოსაფხვრელად მიიჩნევენ, რომ სახელმწიფომ დაუყოვნებლივ უნდა მიიღოს კონკრეტული ზომები. განცხადება სრულად წყარო: osgf.ge

19 სექტემბერს, 13.00 საათზე, „ღია დემოკრატიის კომიტეტის" აღმასრულებელი დირექტორი ბრაიან მეფორდი და თანათავმჯდომარე ბრუს ბარსელო პრესკონფერენციას გამართავენ. მისამართი: იოსებიძის #49

კახეთი. 16–17 სექტემბერს საზოგადოებრივმა ორგანიზაციამ „ახალი თაობა – ახალი ინიციატივამ" ორგანიზაციის რეგიონალურ წარმომადგენლებთან შეხვედრა გამართა. შეხვედრაზე კოორდინატორებს ორგანიზაციის მიერ შემუშავებული „დამკვირვებლის ქცევის კოდექსი" წარუდგინეს. ქცევის კოდექსი წარმოადგენს პრინციპებისა და სტანდარტების ერთობლიობას, რომლითაც უნდა იხელმძღვანელოს დამკვირვებელმა საარჩევნო უბანზე მუშაობისას.   სრულად წყარო: ორგანიზაციის გვერდი სოციალურ ქსელში

სამეგრელო. საქართველოს ახალგაზრდა იურისტთა ასოციაციის იურისტებმა, 18 სექტემბერს, ზუგდიდში, სამეგრელოში მომუშავე საზოგადოებრივი ორგანიზაციებისა და მედიის წარმომადგენლებისთვის ტრენინგი ჩაატარეს. საუბარი შეეხო მედიის წარმომადგენლების ხელისშეშლის ფაქტებს, ასევე უშუალოდ კენჭისყრის დღის პროცედურებსა და საარჩევნო უბნებზე მყოფი დამკვირვებელი ორგანიზაციების უფლებებს. საქართველოს ახალგაზრდა იურისტთა ასოციაცია საარჩევნო კანონმდებლობაზე ტრენინგებს საქართველოს სხვა ქალაქებშიც გამართავს.

აჭარა. 18 სექტემბერს, ხანდაზმულთა ასოციაციის ოფისში, ,,სამოქალაქო კულტურის საერთაშორისო ცენტრმა " და ასოციაცია ,,თავისუფალ ჟურნალისტთა სახლმა" საინფორმაციო შეხვედრა გამართა. შეხვედრა ამერიკის შეერთებული შტატების საერთაშორისო განვითარების სააგენტოს (USAID) და საარჩევნო სისტემების საერთაშორისო ფონდის (IFES) დაფინანსებული პროექტის –„ამომრჩეველთა განათლება აჭარის რეგიონში" – ფარგლებში გაიმართა. შეხვედრის  მიზანი  2012 წლის საპარლამენტო და აჭარის უმაღლესი საბჭოს არჩევნების პროცესის  შესახებ ამომრჩეველის ინფორმირება   იყო  და საზოგადოებაში   საარჩევნო კულტურის ამაღლებას ემსახურებოდა. შეხვედრამ, რომელსაც  ასოციაციის ბენეფიციარები და საზოგადოების წარმომადგენლები ესწრებოდნენ,  საქმიან გარემოში ჩაიარა და მსმენელის დიდი ინტერესი გამოიწვია. დარიგდა საარჩევნო თემაქტკტს საინფორმაცო მასალა. წყარო: awa.org.ge

იმერეთი. საინფორმაციო საშუალებებით გავრცელებული კადრების შემდგომ, ქუთაისის მეორე სასჯელაღსრულების დაწესებულებასთან მედიის, საზოგადოებრივი ორგანიზაციების წარმომადგენლები შეიკრიბნენ და გამართეს აქცია – „არ აწამო". მათ დაგმეს გლდანის მე–8 საპყრობილეში პატიმრების მიმართ არასათანადო მოპყრობის ფაქტები, მხარდაჭერა გამოუცხადეს მათ და დამნაშავეების დასჯა მოითხოვეს. ღამით გამართული აქციის შემდგომ, 19 სექტემბერს, დღის 2 საათზე, ქუთაისის მეორე სასჯელაღსრულების დაწესებულებასთან სამოქალაქო სექტორის წარმომადგენლები კვლავ შეიკრიბნენ.      

19 სექტემბერს, 12:00 საათზე,  ინფორმაციის თავისუფლების განვითარების ინსტიტუტი (IDFI) გამართავს პროექტის – „საქართველოს საჯარო დაწესებულებების საინფორმაციო (ინტერნეტ) რესურსების მონიტორინგი" - შედეგების პრეზენტაციას. მისამართი: თბილისი, ჭოველიძის 10, ფონდი „ღია საზოგადოება – საქართველო"    

აჭარა. 18 სექტემბერს, ბათუმის დემოკრატიული ჩართულობის ცენტრში, ორგანიზაციამ „თანამშრომლობა თანასწორი უფლებებისათვის" გამართა შეხვედრა სამოქალაქო საზოგადოების წარმომადგენლებთან, ფსიქოლოგებთან და ფსიქიატრებთან. ორგანიზაციის საქმიანობის მთავარ მიზანს ფსიქიკურად დაავდებულთა რეაბილიტაცია წარმოადგენს. მათთვის ღირსეული პირობების შექმნა და რეინტეგრაცია. „თანამშრომლობა თანასწორი უფლებებისათვის" უკვე წლებია რეაბილიტაციის პროცესში მონაწილე ადამიანების ნამუშევრებსაც უყრის თავს და მათ გამოფენას აწყობს. დღესვე გაიხსნა ამ ნამუშევრების მე–7 ყოველწლიური გამოფენა ბათუმში. 

თბილისი. 18 სექტემბერს, „Must carry"–ის მონიტორინგის ჯგუფმა გამართა  პრესკონფერენცია, სადაც წარადგინეს საქართველოში მაუწყებლობის სავალდებულო ტრანზიტის პრინციპის აღსრულების მონიტორინგის შედეგები.  პრესკონფერენციის დროს მიმოიხილეს მონიტორინგის შედეგად გამოვლენილი ძირითადი ტენდენციები, წარმოადგინეს რუკა, სადაც ასახულია სხვადასხვა რეგიონში არსებულ ამომრჩეველთაგან რამდენს აქვს ჩართული საკაბელო მაუწყებლობა.  მონიტორინგის პროექტი ხორციელდება ფონდის „ღია საზოგადოება – საქართველოს" მხარდაჭერით.

კახეთი. კახეთის რეგიონის განითარების სტრატეგიაზე მუშაობის ფარგლებში საზოგადოებრივმა ორგანიზაციამ ,,სამოქალაქო საზოგადოების კვლევისა და განვითარების ცენტრმა", 18 სექტემბერს, თელავის დემოკრატიული ჩართულობის ცენტრში შეხვედრა გამართა. შეხვედრის თემას წარმოადგენდა გარემოსდაცვითი ინფრასტრუქტურა რეგიონში. ექსპერტის, კახა სუხიტაშვილის განცხადებით შეხვედრას ესწრებოდნენ რეგიონის რვავე მუნიციპალიტეტის გამგეობების ინფრასტუქტურისსა და ზედამხედველობის სამსახურების წარმომადგენლები. ,,შეხვედრის მიზანი იყო, მიგვეღო ამომწურავი ინფორმაცია გარემოსდაცვითი ინფრასტურის, ასევე მისი მდგომარეობის შესახებ, თუ რა გაკეთდა, რა არის დაგეგმილი და რა გასაკეთებელი. მიღებული ინფორმაციის შედეგად შევძლებთ არსებული სიტუაციის ანალზს და რეკომენდაციების გაწერას, რომელიც მაქსიმალურად იქნება მორგებული მიმდინარე სიტუაციას და იმ გამოწვევებს, რომელიც რეგიონშია ამ მიმართულებით", აცხადებს კახა სუხიტაშვილი.  

თბილისი. 25 სექტემბრიდან 3 ოქტომბრის ჩათვლით სიქა-ს პარტნიორობით ჰოლანდიური ორგანიზაცია თბილისში მართავს საერთაშორისო სემინარს "‘European Identity and Democracy". კონფერენციაში მონაწილეობას მიიღებენ ახალგაზრდები ჰოლნადიიდან, დანიიდან, სომხეთიდან და საქართველოდან.  სემინარების თემაა მოქალაქეობის ცნება, მოქალაქის მოვალეობები, დემოკრატია, არჩევნები. ასევე მონაწილეები ოქტომბრის არჩევნებზე თავისუფალ დამკვირვებლად იმუშავებენ უცხოელ მონაწილეებთან ერთად.  წყარო: ორგანიზაციის გვერდი სოციალურ ქსელში

აჭარა. 18 სექტემბერს, ბათუმის დემოკრატიული ჩართულობის ცენტრში, საზოგადოებრივმა ორგანიზაციამ „ბორჯღალიმ" გამართა დისკუსია თემაზე: „ეკომოგრანტთა განსახლების პოლიტიკა საქართველოში". შეხვედრაზე აჩვენეს ორგანიზაციის მიერ მომზადებული დოკუმენტური ფილმი, რომელიც ეკომიგრანტთა ჩასახლების ადგილებში არსებულ ვითარებას ასახავს. დისკუსიას ესწრებოდნენ ადგილობრივი საზოგადოებრივი ორგანიზაციების წარმომადგენლები, სტუდენტები და მედია საშუალებები. ფილმის ჩვენების შემდეგ გაიმართა დისკუსია, სადაც განიხილეს ეკომიგრაციის სფეროში არსებული ძირითადი პრობლემები, ასევე იმსჯელეს მათი გადაწყვეტის გზებზე.  აღნიშნული პროექტი ხორციელდება „აღმოსავლეთ-დასავლეთის მართვის ინსტიტუტის" ფინანსური მხარდაჭერით.

კახეთი. დედოფლისწყაროში მოქმედი არასამთავრობო ორგანიზაცია ,,საქართველოს ქალები მშვიდობისა და სიცოცხლისათვის" მუნიციპალიტეტში აქტიურად მოღვაწეობს. ლალი მანგოშვილი, ,,საქართველოს ქალები მშვიდობისა და სიცოცხლისათვის" ხელმძღვანელი: ,,ჩვენი ორგანიზაცია მუშაობს მუნიციპალიტეტის ტერიტორიაზე. ოჯახებს ვეხმარებით სასმენი აპარატებით, ინვალიდებს ვურიგებთ ეტლებს და ვისაც მედიკამენტოზური მკურნალობა ესაჭიროება, ვეხმარებით მედიკამენტებით. გარდა ამისა, ამჟამად სოფლებში ვატარებთ ტრენინგებს ქალებისთვის რათა ქალბატონებმა მეტი იცოდნენ საკუთარი უფლებების შესახებ".

თბილისი. საქართველოს ახალგაზრდა იურისტთა ასოციაცია ჟურნალისტებისთვის აქვეყნებს ნაშრომს, რომლის მიზანია არჩევნების დღესთან დაკავშირებული სავალდებულოდ შესასრულებელი ნორმების მითითება და განმარტება დოკუმენტი ორი ნაწილისაგან შედგება. 1-9 პუნქტები ეთმობა საკანონმდებლო რეგულაციებს კენჭისყრის დღის მიმდინარეობის შესახებ, ხოლო 10-11 პუნქტები მოიცავს  მედიის, როგორც დამკვირვებლის სტატუსის განმარტებას და მისთვის მინიჭებულ უფლებამოსილებებს. „კენჭისყრის დღე – რეკომენდაციები მედიისთვის" წყარო: gyla.ge

19 სექტემბერს, 12:00 საათზე, „ლიბერალური კლუბი" გამართავს დისკუსიას თემაზე: „პოლიტიკური კულტურა ქართულ საზოგადოებაში". მისამართი: ქუთაისი, პუშკინის 6. დემოკრატიული ჩართულობის ცენტრი.

თბილისი. 14-15-16 სეტემბერს მსოფლიოს მრავალ ქვეყანაში ჩატარდა დასუფთავების ყოველწლიური საერთაშორისო კამპანია – ,,დავასუფთაოთ მსოფლიო" (Clean Up the World), რომელიც 1992 წელს დაფუძნდა გაეროს გარემოსდაცვითი პროგრამის (UNEP) ინიციატივით. კამპანია ტარდება ყოველ სექტემბერს და მასში მონაწილეობას ღებულობს 130-მდე ქვეყანა. 2012 წელს მსოფლიო კამპანიის დევიზია იყო: ჩვენი ქვეყანა... ჩვენი პლანეტა... ჩვენი პასუხისმგებლობაა საქართველომ ამ აქციაში უკვე მესამედ მიიღო მონაწილეობა. კამპანია ჩატარდა არასამთავრობო ორგანიზაციათა კონსორციუმის – ,,საქართველოს მწვანეთა მოძრაობა/დედამიწის მეგობრები საქართველო და მდგრადი განვითარების კავშირი ,,ეკოხედვას" ორგანიზებით, რომლებიც აქტიობებს ახორციელებენ პროექტის - ,,დავასუფთაოთ საქართველო - საზოგადოების ცნობიერების ამაღლება და მისი ჩართვა მყარი საყოფაცხოვრებო ნარჩენების მართვის გაუმჯობესების პროცესში" ფარგლებში. 14-15-16 სექტემბერს, კამპანიის ფარგლებში, დასუფთავდა მტკვრის მარჯვენა სანაპირო ქვემო ფონიჭალის დასახლებაში, დიღმის მასივში მდ. დიღმულას მონაკვეთი, ბავშვთა ქალაქ მზიურის მიმდებარედ მდ. ვერეს ხეობა, დიღმის ტყე-პარკი, ვაკის პარკი, თბილისის ზღვისა და ჯვრის მონასტრის მიმდებარე ტერიტორიები. დასუფთავების აქციები ჩატარდა ქვეყნის ყველა თვითმმართველ ქალაქსა და მუნიციპალიტეტში, პროექტის ადგილობრივი კოორდინატორების ორგანიზებით. მთელი საქართველოს მასშტაბით, აღნიშნულ კამპანიაში, მონაწილეობა მიიღეს ადგილობრივი მუნიციპალიტეტების და საკრებულოების წარმომადგენლებმა, სხვადასხვა უმაღლესი სასწავლებლების სტუდენტებმა, სკოლის მოსწავლეებმა, მოსახლეობამ, სხვადასხვა საზოგადოებრივმა და პოლიტიკურმა ორგანიზაციებმა, უცხოელმა მოხალისეებმა, ესტონეთის საელჩომ, სასტუმრო "Sheraton Metechi Palace”, კომპანია „სან იოგა თბილისის" წარმომადგენლობამ. პროექტი ხორციელდება გარემოს დაცვის სამინისტროს მხარდაჭერით და შვედეთის საერთაშორისო განვითარების სააგენტოს (Sida) ფინანსური უზრუნველყოფით. წყარო: cenn

18 სექტემბერს, 15:00 საათზე, კავშირი „თანამშრომლობა თანაბარი უფლებებისათვის" გამართავს შეხვედრას თემაზე: „ფსიქიკური ჯანმრთელობის პრობლემების მქონე პირთა საზოგადოებაში ინტეგრაცია". მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი  

  კახეთი. 15 სექტემბერს პროექტის – „იმოქმედე მწვანედ" – ფარგლებში მოეწყო ექსკურსია. წნორის საინიციატივო ჯგუფის აქტივისტებმა დაასუფთავეს ხორნაბუჯის ციხისა და ელიას მთის მიმდებარე ტერიტორიები. ორგანიზაცია მაისურებისთვის და საჭირო ინვენტარით უზრუნველყოფისთვის მადლობას უხდის მწვანეთა მოძრაობას. პროექტი ხორციელდება Iris Group – Managing Diversity–ისა და Joint Civic Education–ის მხარდაჭერით. სრულად წყარო: ორგანიზაციის გვერდი სოციალურ ქსელში  

გურია. 10-12 სექტემბერს ოზურგეთის ახალგაზრდულ ცენტრს, რომელიც „ახალგაზრდა პედაგოგთა კავშირის" ბაზაზე ფუნქციონირებს, გაცვლითი პროგრამის ფარგლებში ქუთაისის ახალგაზრდული ცენტრის წევრები ესტუმრნენ. გაცვლითი პროგრამა პროექტის –  „ეროვნული ინტეგრაციის გაძლიერება საქართველოში" – ფარგლებში ტარდება. პროექტი დაფინანსებულია აშშ–ს საერთაშორისო განვითარების სააგენტოს მიერ, განმახორციელებელი ორგანიზაციაა – საქართველოს გაეროს ასოციაცია. გაცვლითი პროგრამის მიზანია ახალგაზრდული ცენტრების დამეგობრება, სამომავლო ერთობლივი პროექტების შემუშავება, რეგიონის ტრადიციებისა და კულტურული მემკვიდრეობის ძეგლების გაცნობა. სამდღიანი პროგრამა შეხვედრებისა და დისკუსიების გარდა, ოზურგეთის ღირსშესანიშნავი ძეგლების დათვალიერებასა და მოხალისოებრივ საქმიანობებსაც ითვალისწინებდა. ახალგაზრდებმა მოინახულეს შემოქმედის, ლიხაურისა და აჭის ეკლესია-მონასტრები. ესტუმრნენ ანასეულში მდებარე ხანდაზმულთა სახლს, სადაც, ხანდაზმულებთან ერთად სხვადასხვა საინტერესო აქტივობები განახორციელეს. უახლოეს მომავალში იგეგმება ოზურგეთის ახალგაზრდული ცენტრის წევრების გამგზავრება ქუთაისში.

სამეგრელო. 14 სექტემბერს „სამოქალაქო განათლებისა და პედაგოგთა გადამზადების პროგრამის" სამეგრელო-ზემო სვანეთის პარტნიორი სკოლის სამოქალაქო კლუბის წევრები ზუგდიდში შეუერთდნენ დასუფთავების ყოველწლიურ საერთაშორისო კამპანიას – „დავასუფთაოთ მსოფლიო – დავასუფთავოთ საქართველო".  აქციაში სულ მონაწილეობა მიიღო პარტნიორი სკოლის 60-ზე მეტმა მოსწავლემ. აქტივობის ფარგლებში  დასუფთავდა ასოციაცია „ათინათის" მიმდებარე ტერიტორია. ღონისძიებაში ჩაერთვნენ  ფოთის #2 საჯარო სკოლის მოსწავლეები,  რუხის საჯარო სკოლისა და აბაშის #2 საჯარო სკოლის სამოქალაქო კლუბის წევრები, რომლებმაც დაასუფთავეს თავიანთი სკოლების მიმდებარე ტერიტორიები.  სრულად  წყარო: civics.ge