თბილისი. პარტნიორობა ადამიანის უფლებებისთვის (PHR) ინფორმაციით, 14 წლის ლუკა ფსიქიატრიული საავამდყოფოს სასამართლოს დღევანდელი გადაწყვეტილების შემდეგ დატოვებს, ვინაიდან ამ გადაწყვეტილებით სასამართლომ ლუკას სიცოცხლის და უსაფრთხოების დაცვა მთავრობისთვის პრიორიტეტად აქცია. „ლუკა, 14 წლის ბავშვი, ფსიქიატრიულ საავადმყოფოში 2020 წლის 28 აგვისტოდან იმყოფება. ლუკას გამოკეტვის ერთადერთი მიზეზი საავადმყოფოს გარეთ, თემში, ადეკვატური სერვისის არქონა გახდა. ამ სარეაბილიტაციო სერვისის გარეშე ლუკას ოჯახი ვერ იცავდა ბავშვის უსაფრთხოებას და სიცოცხლეს, შესაბამისად, იძულებული გახდა, სასწრაფო დახმარება გამოეძახა მის გადასარჩენად, რომელმაც იგი ფსიქიატრიულ საავადმყოფოში გადაიყვანა, ვინაიდან არ მოიძებნა მისთვის სხვა ალტერნატიული სერვისი მთელ საქართველოში“. სრულად... წყარო: phr.ge

თბილისი. საქართველოს პოლიტიკის ინსტიტუტი (GIP) აგრძელებს საინფორმაციო შეხვედრების გამართვას 2020-2021 წლისთვის მომავალ ლიდერთა სკოლაში (ELS) მონაწილეობის მიღების მსურველებისთვის. "ვეძებთ 18-35 წლის, ცვლილებებზე ორიენტირებულ, ლიდერული პოტენციალის მქონე ახალგაზრდებს – აქტივისტებს, პოლიტიკოსებს, ჟურნალისტებს, სამოქალაქო საზოგადოების წარმომადგენლებს – საქართველოს რეგიონებიდან და თბილისიდან. მეორე საინფორმაციო შეხვედრა 25 სექტემბერს, თბილისში გაიმართა". სრულად... წყარო: ორგანიზაციის გვერდი სოციალურ ქსელში

თბილისი. 23 სექტემბერს, სახალხო დამცველის აპარატის დასავლეთ საქართველოს სამმართველოს გაეროს ბავშვთა ფონდის წარმომადგენელი საქართველოში (UNICEF) ღასან ხალილი ეწვია და სამმართველო წარმომადგენლებს მადონა ბასილაძეს და თამთა ჩეჩელაშვილს შეხვდა. "შეხვედრაზე შეაფასეს დასავლეთ საქართველოს რეგიონებში ბავშვთა უფლებრივი მდგომარეობა და სახალხო დამცველის როლი პანდემიის (COVID-19) პირობებში. განსაკურებული ყურადღება გაამახვილეს ბავშვთა განათლების ხელმისაწვდომობის უფლებზე და იმ გამოწვევებზე, რაც დისტანციური სწავლების დროს გამოიკვეთა. ისაუბრეს ბავშვთა მიმართ ოჯახში ძალადობის გახშირებულ ფაქტებზე, ბავშვთა სიღარიბესა და ოჯახების მძიმე სოციალურ პირობებზე და ამ მიმართულებით რეგიონებში არსებულ ვითარებაზე", ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. კოალიცია „ბავშვებისა და ახალგაზრდებისთვის“ წარმომადგენლებმა, 2020 წლის საპარლამენტო არჩევნებში ბავშვთა საკითხების შესახებ ინფორმირებულობის გაზრდის ინიციატივის ფარგლებში, პოლიტიკური პარტია „თავისუფალი დემოკრატების“ წარმომადგენლებთან შეხვედრა გამართეს.  ინიციატივა ,,ბავშვთა საკითხების შესახებ ინფორმირებულობის გაზრდა 2020 წლის საპარლამენტო არჩევნებში“ ხორციელდება აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის მხარდაჭერით, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით.  სრულად...  წყარო: გვერდი სოციალურ ქსელში

თბილისი. საქართველოს სტრატეგიისა და საერთაშორისო ურთიერთობების კვლევის ფონდი წარმოგიდგენთ ახალ პროექტზე - ჟურნალ „ჩემი სამყაროს“ სტატიებზე დაფუძნებულ აუდიოვიზუალურ პროდუქტს, რომელიც მიზნად ისახავს ახალგაზრდების ზოგადი განათლების ხარისხის გაუმჯობესებას. სტატიის სრული ვერსიის წასაკითხად ეწვიეთ ბმულს... წყარო: ორგანიზაციის გვერდი სოციალურ ქსელში

იმერეთი. სამოქალაქო მონაწილეობის მნიშვნელობა, სამოქალაქო საზოგადოების ორგანიზაციების არსი, საერთაშორისო მოხალისეობრივი პლატფორმა "დროის ბანკი" - ეს ის თემებია, რომელთა შესახებაც ადგილობრივი დემოკრატიის სააგენტო საქართველო ბაღდათის მუნიციპალიტეტის ახალგაზრდებს ესაუბრა. საინფორმაციო შეხვედრა, რომელიც პროექტის, "სამოქალაქო საზოგადოების განვითარების ინიციატივა", ფარგლებში ჩატარდა, სოფელ როხის ახალგაზრდულ ცენტრში გაიმართა.  პროექტი „სამოქალაქო საზოგადოების განვითარების ინიციატივა“ ხორციელდება კონრად ადენაუერის ფონდის (KAS) მიერ სამოქალაქო საზოგადოების ინსტიტუტთან (CSI), კონსულტაციისა და ტრენინგის ცენტრთან (CTC), საქართველოს სტრატეგიული კვლევებისა და განვითარების ცენტრთან (CSRDG) და განათლების განვითარების და დასაქმების ცენტრთან (EDEC) თანამშრომლობით. პროექტს აფინანსებს ევროკავშირი (EU), ხოლო თანადამფინანსებელია კონრად ადენაუერის ფონდი (KAS).  სრულად...  წყარო: ორგანიზაციის ვებგვერდი

განათლების განვითარების და დასაქმების ცენტრის (EDEC) ინფორმაციით, ორგანიზაციამ 11 და 12 სექტემბერს ქუთაისსა და ზუგდიდში, მეტყველების განვითარებისა და კორექციის ცენტრ „ლოგომედთან“ ერთად, მეტყველების შეფერხების მქონე ბავშვებისა და ზრდასრულებისთვის უფასო გამოკვლევები ჩაატარა. აქციით 139–მა ადამიანმა ისარგებლა.  „გამოკვლევები მეტყველების დარღვევათა სრულ დიაგნოსტირებას გულისხმობდა და ემსახურებოდა მეტყველების ნებისმიერი ტიპის დარღვევათა დროულ აღმოჩენას, დიაგნოსტიკას, მიზეზის დადგენასა და მის დასაძლევად საჭირო ღონისძიებებისა და მოქმედების ოპტიმალური გეგმის დასახვას. სპეციალისტებმა მშობლისათვის/პაციენტისათვის უზრუნველყვეს ინფორმაციის მიწოდება პრობლემის გადასაჭრელად საჭირო ღონისძიებებსა და საშუალებებზე“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 1 სექტემბერს „ჰელფინგ ჰენდ”-მა არასამთავრობო ორგანიზაცია „კოგნიტიო”-ს მოწვევით ახალგაზრდებთან ჩაატარა ტრენინგი თემაზე „მოხალისეობა და ახალგაზრდები.”  ორგანიზაციის აღმასრულებელმა დირექტორმა, თინათინ მესხმა, მონაწილეებს გააცნო დეტალურად ორგანიზაციის საქმიანობა და ისაუბრა მოხალისეობასა და აქტიურ მოქალაქეობაზე, მიმდინარე მოხალისეობრივ შესაძლებლობებსა და მოხალისეობის განსაკუთრებულ როლზე ახალგაზრდების პროფესიული და პიროვნული განვითარების პროცესში. ხოლო მოხალისეთა კოორდინატორმა, ქეთი ზარანდიამ ტრენინგის მონაწილეებს გაუზიარა მოხალისეობის პერიოდში მიღებული გამოცდილება. სრულად... წყარო: ორგანიზაციის გვერდი სოციალურ ქსელში

თბილისი. 14 აგვისტოს, სამოქალაქო საზოგადოების ინსტიტუტმა (CSI), 16-ე შეხვედრით, რეგიონებში, უფროსკლასელთა კონკურსის „ეს ქვეყანა შენიას“ გამარჯვებულთა დაჯილდოება და ახალგაზრდებთან შეხვედრები დაასრულა. თბილისის (ასევე, სოფ. გლოლას) გამარჯვებული გუნდების დაჯილდოება კი სექტემბერში გაიმართება. კონკურსის ბოლო ეტაპია სუპერ ფინალი, რომელშიც თითოეული რეგიონის და მათ შორის, თბილისის ერთი გუნდი მიიღებს მონაწილეობას. სუპერ ფინალი 2-3 დღით შეკრებას, საინტერესო შეხვედრებს, ვიქტორინებს გულისხმობს და ეპიდემიური სიტუაციის შესაბამისად დაიგეგმება. კონკურსი „ეს ქვეყანა შენია“ მთელი ქვეყნის მასშტაბით გაიმართა და მასში 150-მდე გუნდი მონაწილეობდა. გამარჯვებულ მოსწავლეებს და მათ კურატორ-მასწავლებლებს საჩუქრად გადაეცათ ნოუთ-ბუქები, პირბადეები, რუკები, რვეულები, ალმანახი „თავისუფლება, სამართლიანობა და დემოკრატია ქართულ აზროვნებაში“... ახალგაზრდებთან საჯარო შეხვედრები გამართეს საზოგადოებისთვის ცნობილმა მწერლებმა, გამომცემლებმა, ჟურნალისტებმა და განათლების ექსპერტებმა. მათ ისაუბრეს სამოქალაქო ღირებულებების, საზოგადოებრივი ორგანიზაციების საქმიანობის, სამოქალაქო პასუხისმგებლობის, აქტივიზმის და განათლების შესახებ. საერთო ჯამში, რეგიონულ შეხვედრებს 600-მდე ადამიანი დაესწრო. სამოქალაქო კამპანია „ეს ქვეყანა შენია“ მიმდინარებს „სამოქალაქო საზოგადოების განვითარების ინიციატივის“ ფარგლებში, რომელიც ხორციელდება კონრად ადენაუერის ფონდის (KAS) მიერ სამოქალაქო საზოგადოების ინსტიტუტთან (CSI), კონსულტაციის და ტრენინგის ცენტრთან (CTC), საქართველოს სტრატეგიული კვლევებისა და განვითარების ცენტრთან (CSRDG) და განათლების განვითარების და დასაქმების ცენტრთან (EDEC) თანამშრომლობით. პროექტს აფინანსებს ევროკავშირი და კონრად ადენაუერის ფონდი.

კახეთი. პანკისში, სოფელ ჯოყოლოში პროექტში, „ჩემი სამყარო“, მონაწილე ხეობის სკოლების უფროსკლასელების დაჯილდოების საზეიმო ცერემონია გაიმართა. პროექტში გამარჯვებულები გამოვლინდნენ ჟურნალ „ჩემი სამყაროს“ საფუძველზე ჩატარებულ ვიქტორინაში ნაჩვენები შედეგებისა და პროექტში აქტიური მონაწილეობის საფუძველზე. გამარჯვებულებს და მონაწილეებს გადაეცათ პრიზები და სერტიფიკატები.  პროექტი „ჩემი სამყარო“ რონდელის ფონდში, საქართველოში აშშ-ის საელჩოს მხარდაჭერით, 2013 წლიდან მიმდინარეობს და მიზნად ისახავს ქვეყნის მასშტაბით ახალგაზრდების სამოქალაქო ცნობიერების ამაღლებასა და საგარეო თუ საშინაო პოლიტიკის საკითხებში მათი ცოდნის გაფართოებას. პროექტის ძირითად სამიზნე ჯგუფებია: დევნილი ბავშვები აფხაზეთიდან და სამაჩაბლოდან, მაღალმთიანი აჭარის, გურიისა და პანკისის ხეობის რელიგიური და ეთნიკური უმცირესობები.  სრულად...   წყარო: ორგანიზაციის ვებგვერდი

თბილისი. 2020 წლის 20 ივლისს სახალხო დამცველმა სასამართლო-ფსიქიატრიული და კომპლექსური ფსიქიატრიულ-ფსიქოლოგიური ექსპერტიზის ჩატარებისას ასაკის ნიშნით დისკრიმინაციული პრაქტიკის თავიდან აცილების საკითხზე ზოგადი წინადადებით მიმართა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრს და სსიპ ლევან სამხარაულის სახელობის სასამართლო ექსპერტიზის ეროვნული ბიუროს უფროსს. სახალხო დამცველმა განმარტა, რომ 10 წლამდე ასაკის ბავშვები, 10 წლის ზემოთ ასაკის ადამიანებთან შედარებით, მათი გონებრივი მომწიფების გათვალისწინებით, განსხვავებულ მოპყრობას საჭიროებენ. ის ფაქტი, რომ ამ ეტაპზე არ არსებობს არასრულწლოვანთა სასამართლო-ფსიქიატრიული და კომპლექსური ფსიქიატრიულ-ფსიქოლოგიური ექსპერტიზის ჩატარების წესის შესახებ სპეციალური სახელმძღვანელო პრინციპები, 10 წლამდე არასრულწლოვან პირებს არათანაბარ მდგომარეობაში აქცევს მათზე ასაკით უფროს პირებთან შედარებით. მსგავსი პრაქტიკა წარმოადგენს ასაკის ნიშნით დისკრიმინაციულ მოპყრობას, ვინაიდან არსებული საერთო წესი უარყოფითად აისახება 10 წლამდე ასაკის ბავშვებზე. სრულად...  წყარო: ორგანიზაციის ვებგვერდი

თბილისი. „უფლებები საქართველომ“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს წინააღმდეგ სასამართლოში შეიტანა სარჩელი, რომელითაც ითხოვს ბათუმის ერთ-ერთ სასტუმროში, კარანტინში მოთავსებული მცირეწლოვანი ბავშვის უფლებების ხელყოფის ფაქტის დადგენას, აგრეთვე მოსარჩელისათვის მორალური ზიანის ანაზღაურებას. „უფლებები საქართველო“ მიიჩნევს, რომ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო და უფლებამოსილი პირები, არ ითვალისწინებდნენ რა ბავშვის საუკეთესო ინტერესების უპირატესი დაცვის პრინციპებს, უხეშად ხელყოფდნენ როგორც საერთაშორისო კონვენციების მოთხოვნებს, ისე ეროვნულ კანონმდებლობას. ორგანიზაციის განცხადებით, ეს ფაქტი განსაკუთრებით შემაშფოთებელია იმ ფონზე, როდესაც ქვეყანამ მიიღო ბავშვთა უფლებების კოდექსი, რითაც გადადგა ნაბიჯი ბავშვთა უფლებების სფეროში ეროვნული კანონმდებლობის საერთაშორისო აქტებთან შესაბამისობაში მოსაყვანად.  სრულად...   წყარო: ორგანიზაციის ვებგვერდი

პროექტის, ,,ახალგაზრდული მოხალისეობა COVID 19-ის საპასუხოდ საქართველოში“, ფარგლებში, საქართველოს მასშტაბით, 150 ახალგაზრდა მოხალისე მუშაობას შეუდგა... მოხალისეობრივი აქტივობები ხორციელდება ისეთი მიმართულებებით, როგორიცაა: ინტელექტუალური მხარდაჭერა; ფსიქოლოგიური კონსულტაცია; არტ-თერაპია; სწავლა-სწავლება; პროგრამირება; არაფორმალური განათლება; თემში პრობლემების გადაწყვეტასა და სათანადო ჯგუფების მხარდაჭერა, სხვა. პროექტს საზოგადოებრივი ორგანიზაცია „ჰელფინგ ჰენდი“ მიერ გაეროს ბავშვთა ფონდის (UNICEF) მხარდაჭერით, ახალგაზრდობის სააგენტოსთან პარტნიორობით ახორციელებს. სრულად...  წყარო: გვერდი სოციალურ ქსელში

12 აგვისტო ახალგაზრდობის საერთაშორისო დღეა.  ორგანიზაცია UN Women Georgia მას ახალგაზრდების ხმების, ქმედებებისა და მოძრაობების გაძლიერებით აღნიშნავს.  იხილეთ ბმული  სრულად...   წყარო: გვერდი სოციალურ ქსელში

განათლების განვითარების და დასაქმების ცენტრმა (EDEC) შიდა ქართლსა და სამეგრელოში მცხოვრები იძულებით გადაადგილებული და კონფლიქტის შედეგად დაზარალებული ახალგაზრდებისთვის პროფესიული ორიენტაციის და კარიერის დაგეგმვის – CV ტრენინგი ჩაატარა. “CV ტრენინგში” 323–მა ადამიანმა მიიღო მონაწილეობა. მათ შეისწავლეს CV-ის სწორედ შევსება და სამოტივაციო წერილის შედგენა, ასევე, მიიღეს ინფორმაცია დამსაქმებელთან კომუნიკაციის ეტაპებისა და ეფექტური გასაუბრების ტექნიკების შესახებ. მიღებული ცოდნა მონაწილეებს დაეხმარება უკეთ წარმოაჩნონ საკუთარი უნარები, შეადგინონ დამსაქმებლისთვის საინტერესო რეზიუმე და პირველი ნაბიჯი გადადგან წარმატებული კარიერის შექმნისთვის. სრულად...  წყარო: გვერდი სოციალურ ქსელში

შიდა ქართლი. USAID-ისა და საქართველოს გაეროს ასოციაციის PITA-ს პროგრამის ფარგლებში, ცენტრალური საარჩევნო კომისიისა და საარჩევნო სისტემების განვითარების, რეფორმებისა და სწავლების ცენტრის მონაწილეობით, გორში მიმდინარეობს ტრენერთა ტრენინგი - „საინფორმაციო კურსი ახალგაზრდა ამომრჩევლისთვის".  ორდღიანი ტრენინგის დასრულების შემდეგ, ჩამოყალიბდება ახალგაზრდების მობილური ჯგუფი (youth mobile task force) „არჩევნები 2020“. ჯგუფის წევრები, პროგრამის ახალგაზრდული ცენტრის წევრები 13 ქალაქიდან, 3 თვის განმავლობაში, საქართველოს სხვადასხვა მუნიციპალიტეტსა და სოფელში ახალგაზრდა ამომრჩეველს მიაწვდიან ინფორმაციას არჩევნებთან დაკავშირებული აქტუალური საკითხების შესახებ.  სრულად...  წყარო: გვერდი სოციალურ ქსელში

ახალგაზრდული სფეროსთვის უმნიშვნელოვანესი დოკუმეტი, რომელიც მომდევნო 5 წლის განმავლობაში ქვეყნის ახალგაზრდულ სტრატეგიას განსაზღვრავს, საქართველოში ევროკავშირის პროგრამის „Skills4jobs“ საერთაშორისო ექსპერტებისა და გაეროს სააგენტოების ადგილობრივი ექსპერტების მონაწილეობით იქმნება. რეგიონულ ფორუმებზე სააგენტო სტრატეგიის ამ ეტაპზე არსებულ დოკუმენტს წარადგენს, ახალგაზრდები კი, თემატურ ჯგუფებში გაერთინდებიან და რეკომენდაციებს შეიმუშავებენ. ქვეყნის მასშტაბით ფორუმების დასრულების შემდეგ, სააგენტო, ახალგაზრდებისგან მიღებული რეკომენდაციების შემაჯამებელ ანგარიშს, სტრატეგიის დამტკიცების ეტაპზე, საქართველოს მთავრობას, სხვა შესაბამის დოკუმენტაციასთან ერთად წარუდგენს. სრულად...  წყარო: გვერდი სოციალურ ქსელში

შიდა ქართლი. 8 აგვისტოს გორის სამოქალაქო აქტივიზმის ცენტრის მოხალისეები, რუსეთ-საქართველოს ომის მე-12 წლისთავთან დაკავშირებით, სოფელ შინდისში ჩავიდნენ და რუსული ოკუპაციის, რუსული პროპაგანდის შესახებ ისაუბრეს.  სოფელი შინდისი ერთერთი ცხელი წერტილი იყო 2008 წლის ომის დროს სადაც 15 ჯარისკაცი დაიღუპა და აღნიშნულ ადგილას კი მემორიალი აღიმართა.  სრულად...   წყარო: გვერდი სოციალურ ქსელში

წნორის აგრო სკოლის პატარა ფერმერები საკუთარ მოსავალს ხვალ, 7 აგვისტოს, საღამოს 17:00 საათიდან, თბილისურ აგრო ბაზარზე, კაფე „მზიურში“ გაიტანენ.  8-13 წლის პატარა ფერმერებმა „ცოდნის კაფეს“ ონლაინ აგრო სკოლაში 5 კულტურის მოყვანა ისწავლეს და პარასკევს, მზიურის კაფეს ეზოში, აგრო ბაზარზე დაგახვედრებენ: კიტრს, პომიდორს, კარტოფილს, ბროკოლს.  აგრო ბაზრის პატარა სტუმრებისთვის გაიმართება სახალისო აგრო ვიქტორინა, რომლის გამარჯვებულები აგრო სტიკერებით დასაჩუქრდებიან. აგრო მარკეტიდან შემოსულ თანხას კი, ქიზიყელი პატარა ფერმერები „ცოდნის კაფესთვის“ შენობის ასაშენებლად გადარიცხავენ.  სრულად...  წყარო: გვერდი სოციალურ ქსელში

10 აგვისტოდან, ყოველდღე, 21:00 საათზე, „ცოდნის კაფე“, დიდებსა და პატარებს ზღაპრების ონლაინ მოსასმენად იწვევს.  ახალი პროექტის საყურებლად, ეწვიეთ ბმულს.   სრულად...  წყარო: გვერდი სოციალურ ქსელში

29 და 30 ივლისს ქუთისის ახალგაზრდული ცენტრის წევრები, პროგრამა PITA-ს გაცვლითი კონკურსის ფარგლებში, გორის სამოქალაქო აქტივიზმის ცენტრის მოხალისეებს შეხვდნენ. თანატოლ-განმანათლებლებმა გორელი ახალგაზრდებისათვის გამართეს ტრენინგი თემაზე - „ტოლერანტობა და მრავალფეროვნება“: მიმოიხილეს თემასთან დაკავშირებული საკითხები, გაცვალეს ინფორმაციები, ჩაატარეს სახალისო და საგანმანათლებლო სავარჯიშოები. სრულად  წყარო: გვერდი სოციალურ ქსელში

თბილისი. პარასკევს, 31 ივლისს, 17:00, ახალგაზრდული იდეების განხორციელების ინსტრუქციების პირველი ქართული ვებგვერდის ონლაინ პრეზენტაცია გაიმართება. „იდეების ბუდე“ არის სივრცე, სადაც თავმოყრილია სხვადასხვა მცირე პროექტისა და ადგილობრივი ინიციატივების იდეები, რომლებსაც თან ახლავს მათი განხორციელების დეტალური ინსტრუქცია. ვებგვერდის ძირითად სამიზნე ჯგუფს წარმოადგენენ ახალგაზრდები, რომლებსაც, შეიძლება, არ გააჩნდეთ პროექტების განხორციელების მდიდარი გამოცდილება.  ხვალ შეძლებთ მიიღოთ ინფორმაცია მცირე საგრანტო კონკურსის შესახებ. ვებგვერდის პრეზენტაციასა და საგრანტო შესაძლებლობის საინფორმაციო ონლაინ-შეხვედრაზე დასასწრებად, უნდა შეავსოთ სარეგისტრაციო ფორმა.  სრულად   წყარო: გვერდი სოციალურ ქსელში