„კანტის აკადემია“, „We Make Change” და UNICEF 12-იდან 19 წლამდე ახალგაზრდებს იწვევს, მონაწილეობა მიიღონ კვლევაში, რომლის მიზანია, შეისწავლოს თუ როგორია COVID-19 პანდემიისა და მისი თანმდევი მოვლენების გავლენა მოზარდებზე.  გამოკითხვა მოიცავს შეკითხვებს, რომელიც ემსახურება მოზარდების დამოკიდებულებების, აღქმის, მოტივაციის დონისა და მომავალი ცვლილებების შესახებ მოლოდინების შესწავლას.  კვლევაში მოცემულ შეკითხვებზე პასუხები კონფიდენციალურია და გამოყენებული იქნება განზოგადებული ინფორმაციის სახით.  სრულად  კვლევა  წყარო: გვერდი სოციალურ ქსელში

სამეგრელო-ზემო სვანეთი. 28 ივლისს, სამშაბათს, 17 საათზე, „დემოკრატიული ჩართულობის ცენტრების ქსელის“ ზუგდიდის ოფისის ორგანიზებით, გაიმართება ონლაინ-პრეზენტაცია - „ახალგაზრდული ბიუჯეტი, ახალგაზრდული იდეები და ინიციატივები“. როგორ ახორციელებს ახალგაზრდულ პოლიტიკას ზუგდიდის მუნიციპალიტეტის ადგილობრივი თვითმმართველობა, როგორია ახალგაზრდების ჩართულობის დონე და ხარისხი აქტიურ საზოგადოებრივ ცხოვრებაში, რამდენად არის მხარდაჭერილი ახალგაზრდული იდეები და ინიციატივები და როგორ ხდება წარმატებული პროექტების შესახებ საზოგადოების ინფორმირებულობა - ამ და სხვა საკითხებზე ახალგაზრდებთან ერთად დისკუსიას გამართავენ ზუგდიდის მუნიციპალიტეტის ადგილობრივი თვითმმართველობის წარმომადგენლები. შეხვედრას შეგიძლიათ შემოუერთდეთ ზუმის საშუალებით  სრულად  წყარო: გვერდი სოციალურ ქსელში

დაუნის სინდრომის საერთაშორისო ორგანიზაციამ დაუნის სინდრომის მქონე მოსწავლეებთან მომუშავე სპეციალისტებისთვის ახალი გზამკვლევი შექმნა. ინფორმაციას ამის შესახებ საქართველოს დაუნის სინდრომის ასოციაცია ავრცელებს.  „ჩვენი ასოციაცია საერთაშორისო ორგანიზაციის წევრია და მოხარულები ვართ, რომ მოგვეცა საშუალება ჩვენი წვლილიც შეგვეტანა გზამკვლევის შექმნაში“. - ვკითხულობთ ინფორმაციაში, - „აღსანიშნავია, რომ სახელმძღვანელო იქნება პირველი, საერთაშორისო გამოცდილებაზე დაყრდნობით შექმნილი გზამკვლევი, რომელიც აერთიანებს სხვადასხვა ქვეყნების საუკეთესო პრაქტიკას“.  სრულად   წყარო: გვერდი სოციალურ ქსელში

„სამყაროს ამბების“ შესახებ შეხვედრების ფარგლებში, განათლების განვითარებისა და დასაქმების ცენტრთან (EDEC) არსებული შეზღუდული შესაძლებლობის მქონე ბავშვთა და პირთა დღის ცენტრის ბენეფიციარებისთვის მზისა და მზის ირგვლივ მოძრავი პლანეტების, გლობალური დათბობის შესახებ საუბარი შედგა. დღის ცენტრების პროგრამა ხორციელდება განათლების განვითარების და დასაქმების ცენტრის მიერ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო, სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს მხარდაჭერით.  სრულად  წყარო: გვერდი სოციალურ ქსელში

სამოქალაქო კამპანიის, „ეს ქვეყანა შენია“, ფარგლებში, სამოქალაქო საზოგადოების ინსტიტუტმა საქართველოს რეგიონებში ახალგაზრდებთან საჯარო შეხვედრები დაიწყო...  შეხვედრებზე, რომელშიც პოპულარული ადამიანები მონაწილეობენ, ახალგაზრდებს სამოქალაქო საზოგადოების, სამოქალაქო ღირებულებებისა და საზოგადოებრივი ორგანიზაციების საქმიანობის შესახებ მოუთხრობენ; შეხვედრის მონაწილეები მიიღებენ კამპანიის ფარგლებში მომზადებულ ალმანახს, რომელშიც თავმოყრილია საქართველოს საუკეთესო შვილების ნააზრევი თავისუფლების, სამართლიანობისა და დემოკრატიის შესახებ, ასევე - მსოფლიოს, ევროპის, რეგიონულ და საქართველოს ფიზიკურ რუკებს, მათზე დატანილი მნიშვნელოვანი ინფორმაციებით, კამპანიის პრომო-პროდუქციას.  საჯარო შეხვედრებზე გაიმართება კამპანია „ეს ქვეყანა შენიას“ ახალგაზრდული კონკურსის გამარჯვებულების დაჯილდოებაც. ეს კონკურსი მთელი ქვეყნის მასშტაბით გაიმართა და მასში უფროსკლასელთა 150-მდე გუნდი მონაწილეობდა. გამარჯვებულებს - მოსწავლეებსა და მათ კურატორ-მასწავლებლებს - რომლებიც პედაგოგებისა და საზოგადოებრივი ორგანიზაციების წარმომადგენლებისგან შემდგარმა ჟიურიმ გამოავლინა, საჩუქრად ნოუთ-ბუქები გადაეცემათ.  პირველი საჯარო შეხვედრა და გამარჯვებულების პირველი დაჯილდოება, დღეს, გორში გაიმართა. 15 აგვისტომდე, სამოქალაქო საზოგადოების ინსტიტუტის გუნდი, კიდევ 15 ასეთ შეხვედრას გამართავს შიდა ქართლში, კახეთში, სამცხე-ჯავახეთში, ქვემო ქართლში, მცხეთა-მთიანეთში, რაჭა-ლეჩხუმ-ქვემო სვანეთში, იმერეთში, აჭარაში, გურიასა და სამეგრელოში.  სამოქალაქო კამპანიის, „ეს ქვეყანა შენია“, მიზანია საქართველოში სამოქალაქო საზოგადოების გაძლიერების ხელშეწყობა და საზოგადოებრივი ორგანიზაციების ცნობადობის გაზრდა; მოსახლეობამდე სამოქალაქო საზოგადოების ორგანიზაციების ღირებულებებისა და ფუნქციების, მათი საქმიანობის არსის სწორად მიტანა და სამოქალაქო აქტიურობის მნიშვნელობის ჩვენება. კამპანია მიმდინარეობს პროექტის, „სამოქალაქო საზოგადოების განვითარების ინიციატივა“, ფარგლებში.  პროექტი „სამოქალაქო საზოგადოების განვითარების ინიციატივა“ ხორციელდება კონრად ადენაუერის ფონდის (KAS) მიერ, სამოქალაქო საზოგადოების ინსტიტუტთან (CSI), კონსულტაციის და ტრენინგის ცენტრთან (CTC), საქართველოს სტრატეგიული კვლევებისა და განვითარების ცენტრთან (CSRDG) და განათლების განვითარების და დასაქმების ცენტრთან (EDEC) თანამშრომლობით. პროექტს აფინანსებს ევროკავშირი და კონრად ადენაუერის ფონდი.

თბილისი. პროექტის - „კარგი მმართველობის გაძლიერება საქართველოში“ - ფარგლებში, ინფორმაციის თავისუფლების განვითარების ინსტიტუტმა (IDFI), ხელისუფლების საქმიანობის მონიტორინგის მექანიზმები და მეთოდების შესახებ, ორდღიანი ტრენინგი გამართა.  ტრენინგში, რომელიც გლობალური საქველმოქმედო ორგანიზაცია Luminate-ის მხარდაჭერით ჩატარდა, მონაწილეობა მიიღეს ღია კონკურსის შედეგად შერჩეულმა რეგიონში მცხოვრებმა სტუდენტებმა, სამოქალაქო აქტივისტებმა და ჟურნალისტებმა.  სრულად   წყარო: ორგანიზაციის ვებგვერდი

შიდა ქართლი. 15-16 და 17 ივლისს, გორის სამოქალაქო აქტივიზმის ცენტრის, პროგრამა PITA-ში ჩართული მოხალისეებისათვის გაიმართა 3-დღიანი ტრენინგი „მრავალფეროვნების მართვა, ტოლერანტობა და სოციალური ინოვაციები“. აქტივობა დაიგეგმა პროგრამა PITA-ს ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს განვითარების სააგენტოს (USAID) ფინანსური მხარდაჭერით.  სრულად  წყარო: გვერდი სოციალლურ ქსელში

თბილისი. 13 ივლისს, პროექტის - „ახალგაზრდული მოხალისეობა COVID 19-ის პანდემიის საპასუხოდ საქართველოში“ - ონლაინ-პრეზენტაცია გაიმართა. მასშტაბურ მოხალისეობრივ პროექტს არასამთავრობო ორგანიზაცია „ჰელფინგ ჰენდი“ გაეროს ბავშვთა ფონდის UNICEF Georgia მხარდაჭერით ახორციელებს. პროექტის პარტნიორია ახალგაზრდობის სააგენტო. „ონლაინ-პრეზენტაციაზე, პროექტით დაინტერესებულ საზოგადოებას, მონაწილეობის მსურველ მოზარდებსა და ახალგაზრდებს შეხვდნენ: ღასან ხალილი, გაეროს ბავშვთა ფონდის წარმომადგენელი საქართველოში; ნინა ფერენჩიჩი, გაეროს ბავშვთა ფონდის ევროპისა და ცენტრალური აზიის რეგიონული ოფისი, მრჩეველი მოზარდების ჯანმრთელობის, განვითარების და მონაწილეობის, ასევე აივ/შიდსის საკითხებში; რევაზ ჩარკვიანი - ახალგაზრდობის სააგენტოს ხელმძღვანელი; თინათინ მესხი - არასამთავრობო ორგანიზაცია „ჰელფინგ ჰენდ-ის“ აღმასრულებელი დირექტორი. პროექტი რამდენიმე ეტაპისგან შედგება და მთელი ქვეყნის მასშტაბით საწყის ეტაპზე 150-ზე მეტ მოხალისეს გააერთიანებს, რომლებიც მიიღებენ პროფესიულ გამოცდილებას და ცოდნას, გამოიმუშავებენ საჭირო უნარ-ჩვევებს, გაიჩენენ ახალ მეგობრებს და რაც მთავარია, შეძლებენ თავიანთ თემში სასარგებლო მოხალისეობრივი აქტივობების დაგეგმვას და სხვების დახმარებას. პროექტის ფარგლებში შექმნილი პლატფორმა youthvolunteering.ge საშუალებას მისცემს საქართველოში მცხოვრებ ყველა მოზარდსა და ახალგაზრდას ჩაერთონ მოხალისეობრივ საქმიანობაში და მიიღონ კონსულტაციები, როგორც ადგილობრივი, ასევე საერთაშორისო ექსპერტებისაგან მოხალისეობის საკითხებში“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. PHR-ს დასახმარებლად მიმართა დედამ, რომელიც უცხოეთიდან დაბრუნების შემდეგ საკარანტინე ზონაში 3 მცირეწლოვან შვილთან ერთად არანებაყოფლობით იმყოფებოდა. „მცირეწლოვანი ბავშვების დედის განცხადებით საკარანტინე ზონაში ბავშვებისთვის შეუფერებელი პირობებია. ბავშვებს განსაკუთრებით უჭირთ უკიდურესად პატარა და უცხო სივრცეში, საკუთარი სახლისგან და ნივთებისგან დაშორებით, იზოლაციაში დარჩენა. ეს ყოველივე რთულდება არაადეკვატური კვებით. უცხო სივრცეში კარანტინში ყოფნა აგრეთვე იწვევს ბავშვებისთვის ემოციური პრობლემების გაჩენას. ჩვენი ორგანიზაციის იურისტებმა შეისწავლეს საქმე და დაიწყეს სამართლებრივი პროცედურების განხორციელება. ამავე დროს, ჩვენს მიერ საჯაროდ გავრცელდა აღნიშნული ინფორმაცია, რასაც საბოლოოდ პოზიტიური შედეგი მოჰყვა და ოჯახი ინფორმაციის გავრცელების დღესვე გადავიდა თვითიზოლაციაში“, ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. 7 ივლისს, დასრულდა სასამართლო პროცესი, სადაც მოსამართლემ დააკმაყოფილა პარტნიორობა ადამიანის უფლებებისთვის (PHR) აღმასრულებელი დირექტორის, ანა არგანაშვილის მოთხოვნა არასრულწლოვან ბავშვთან ერთად კარანტინიდან თვითიზოლაციაში გადასვლაზე. „სასამართლოს გადაწყვეტილებით, ბავშვის ინტერესის დაცვა უპირატესია და მისი საჭიროებების გათვალისწინების გარეშე არ უნდა ხდებოდეს გადაწყვეტილებების მიღება. სამართლებრივი მხარდაჭერა ხორციელდება პროექტ „ბავშვთა მართლმსაჯულების უფლების გაძლიერება საქართველოში” ფარგლებში USAID/PROLoG-ის ფინანსური მხარდაჭერით“. სრულად... წყარო: ორგანიზაციის გვერდი სოციალურ ქსელში

თბილისი. ქალთა მოძრაობა ეხმიანება COVID 19 -თან დაკავშირებით მთავრობის მიერ მიღებულ საკარანტინე ზომებს, რომელიც არღვევს ბავშვების და ბავშვიანი ოჯახების ფუნდამენტურ უფლებებს. „მიუხედავად იმისა, რომ მთავრობის 322-ე დადგენილებით არასრულწლოვნების შემთხვევაში სსიპ საგანგებო სიტუაციებისა და გადაუდებელი დახმარების ცენტმა უნდა დააკმაყოფილოს ბავშვიანი მშობლის მომართვა თვითიზოლაციაში განთავსების თაობაზე, უგულვებელყოფს ბავშვიანი ოჯახების მიმართვებს. სახელმწიფო დისკრიმინაციულია ოჯახებთან მიმართებაში: გაუგებარია მისი შეფასების კრიტერიუმები რომლითაც ზოგიერთ ბავშვს ათავსებს თვითიზოლაციაში და ზოგს არა“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ბოლო პერიოდში ახალგაზრდებს შორის მომხდარ ძალადობრივ კონფლიქტებს. ორგანიზაცია მოუწოდებს ხელისუფლებას, დაიწყოს სისტემური მუშაობა განათლების და დანაშაულის პრევენციის მიმართულებით, რომლის მიზანიც იქნება ძალადობრივი კულტურისა და ახალგაზრდებში კრიმინალური მენტალიტეტის გავრცელების პრევენცია. „მოკლე პერიოდში მომხდარი ტრაგიკული შემთხვევები აჩვენებს, რომ ინდივიდუალური ძალადობრივი ფაქტების მიღმა, ფუნდამენტურ გამოწვევას წარმოადგენს ის ზოგადი გარემო, რომელშიც მოზარდებს უწევთ თანაცხოვრება და განვითარება. ეს შემთხვევები კიდევ ერთხელ გვახსენებს ხორავას ქუჩის საქმეს, რომელმაც სამართალდამცავი ორგანოების სისტემურ ჩავარდნებთან ერთად, ასევე გამოავლინა განათლების სისტემის და სკოლის არაეფექტურობა, მოზარდებში შეემცირებინა კრიმინალური და ძალადობრივი მენტალიტეტი“. სრულად... წყარო: emc.org.ge

თბილისი. სამოქალაქო საზოგადოების ორგანიზაციები ეხმაურებიან საქართველოში გერმანიის ფედერაციული რესპუბლიკის ელჩის, ბატონი ჰუბერტ ქნირშის განცხადებას, რომელიც 25 ივნისს, გერმანიის საელჩოს ოფიციალური სოციალური ქსელის (Facebook) გვერდზე გამოქვეყნდა. „მიმართვაში ელჩი აფასებს საქართველოში მოქმედი არასამთავრობო ორგანიზაციის კრიტიკულ პოზიციას, რომელიც გაეროს ბავშვის უფლებათა კომიტეტის წევრობის კანდიდატად, საქართველოს პარლამენტის წევრის, სოფიო კილაძის წარდგენას ეხება. სახელმწიფოს მიერ წარმოდგენილი კანდიდატი გამოირჩევა სამოქალაქო საზოგადოებასთან ღია დაპირისპირებით. ის სიტყვიერად თავს ესხმის უფლებადამცველებს, შედის კონფრონტაციაში ადამიანის უფლებათა აქტივისტებთან, გამოირჩევა ჰომოფობიური და სხვაგვარი დისკრიმინაციული განწყობებით. განსაკუთრებით უნდა აღინიშნოს მისი უარყოფითი დამოკიდებულება ლგბტქ თემის წარმომადგენელთა მიმართ. აღნიშნული ფაქტები აღწერილია სხვადასხვა საერთაშორისო და ადგილობრივი ორგანიზაციების განცხადებებში და ფართოდ არის გაშუქებული არაერთი მედია საშუალების მიერ. აღნიშნულის გამო საზოგადოებამ არაერთ პროტესტის ფორმას მიმართა. ამიტომ, არასამთავრობო ორგანიზაციების განცხადება არა ქალბატონ კილაძეზე პერსონალური თავდასხმა, არამედ სახელმწიფოს მიერ ზემოთქმული პრინციპების უგულვებელყოფის შეფასებაა. ეს კი სამოქალაქო საზოგადოების ორგანიზაციების საქმიანობის ნაწილი და ამავდროულად, მოვალეობაცაა“. სრულად... წყარო: phrgeorgia.wordpress.com

თბილისი. პარტნიორობა ადამიანის უფლებებისთვის (PHR) ავრცელებს განცხადებას პოლიციის მხრიდან, არასრულწლოვნის მიმართ, სავარაუდო ძალადობასთან დაკავშირებით. ორგანიზაცია მიუთითებს, რომ დედის დასახმარებლად მიმავალი არასრულწლოვანი სამართალდამცავებმა უსაფუძვლოდ შეაჩერეს, მოსთხოვეს პირადობის დამადასტურებელი მოწმობა, ჩაუტარეს ზედაპირული შემოწმება და ცდილობდნენ გადაეღოთ ფოტო. ბავშვმა კი შესაბამისი საფუძვლის მითითება მოითხოვა მათგან, სამართალდამცავები გაღიზიანდნენ და უკანონოდ შეეცადნენ ბავშვის მანქანაში ჩასმას. აღნიშნული უკანონო ქმედებების და მუქარის შემდეგ არასრულწლოვანი შეუძლოდ გახდა, თუმცა პოლიციელები მაინც აგრძელებდნენ ძალის გამოყენებით მოზარდის მანქანაში გადაყვანას. ორგანიზაციის განცხადებით, ბავშვმა მხოლოდ მოქალაქეების დახმარებით დააღწია თავი პოლიციას და საქმეს ათეულობით მოწმე ჰყავს, ერთერთმა მოქალაქემ ინციდენტის ვიდეოც კი გადაიღო. „PHR-მა საქმეში ჩართვისთანავე გამოძიების დაწყების მოთხოვნით დამატებით მიმართა სახელმწიფო ინსპექტორის სამსახურს და ითხოვა მტკიცებულებების დაუყოვნებლივ შეგროვება. თუმცა ამ დრომდე გამოძიება არ დაწყებულა, შესაბამისად არ მომხდარა მტკიცებულებათა მოპოვება. ვინაიდან საქმეში ფიგურირებენ სამართალდამცავი ორგანოს თანამშრომლები არსებობს მტკიცებულებათა განადგურების მაღალი რისკი, შესაბამისად, სახელმწიფო ინსპექტორის სამსახურის მიერ გამოძიების დაწყების ხელოვნურად დაყოვნება საფრთხის ქვეშ აყენებს საქმეზე ჭეშმარიტების დადგენას და ზიანს აყენებს ბავშვის საუკეთესო ინტერესებს. PHR-ი აგრძელებს ბავშვის ინტერესების დაცვას და საზოგადოებას პერიოდულად მივაწოდებთ დეტალურ ინფორმაცია პროცესების განვითარების შესახებ“. სრულად... წყარო: phrgeorgia.wordpress.com

თბილისი. მაკლეინის ასოციაცია ბავშვებისთვის აქვეყნებს ბლოგპოსტს: როგორ ვმართოთ ბავშვის მიერ ეკრანთან გატარებული დრო. „თანამედროვე ეპოქაში ვირტუალური რეალობა განსაკუთრებით დიდ მნიშვნელობას იძენს. ზოგიერთ შემთხვევაში ეკრანთან გატარებული დრო საგანმანათლებლო დატვირთვის მქონეა და ბავშვის სოციალური განვითარების ხელშემწყობიც კი შეიძლება იყოს, თუმცა ეკრანთან გატარებული უკონტროლო დრო შესაძლოა უარყოფითად აისახოს ბავშვის ფიზიკურ და ფსიქიკურ ჯანმრთელობაზე და გამოიწვიოს შემდეგი სირთულეები: ჭარბწონიანობა, ძილის რეჟიმის დარღვევა და უძილობა, ქცევითი სირთულეები, სოციალური უნარების დეფიციტი, თამაშზე და ურთიერთობებზე უარის თქმა ან ძალიან მცირე დროის გამოყოფა მისთვის და სხვა“. სრულად... წყარო: ორგანიზაციის გვერდი სოციალურ ქსელში

თბილისი. მედიაჩექერი აქვეყნებს ნატალია ვახტანგიშვილის და ნინო ნარიმანიშვილის სტატიას, რომელიც „მთავარი არხი“-ს მიერ ბავშვთა პორნოგრაფიის საქმეზე მომზადებულ სიუჟეტს შეეხება. სადავო სიუჟეტზე მასალის ავტორებს ფსიქოლოგი მაია ცირამუა ესაუბრა. მისი შეფასებით, მსხვერპლებისთვის ე.წ. სახის „გაბლარვა“ საკმარისი არ არის და არსებობს ბავშვების ამოცნობის საფრთხე, ასევე ტრავმის ხელახალი განცდის საშიშროება. პორნოგრაფიის საქმეში მონაწილე მოზარდები კი ჟურნალისტური მასალის გავრცელების შემდეგ სექსტინგისა და ბულინგის მსხვერპლებიც გახდნენ. საზოგადოების ნაწილმა ისინი დამნაშავეებად გამოიყვანა - „ამ ბავშვებს წავართვით შანსი, რომ ნდობა გაუჩნდეთ ადამიანების მიმართ. იმიტომ რომ ეს ტალღა, რისხვა, ისევ წავიდა ამ ბავშვების მისამართით და არა იქით, საითაც უნდა წასულიყო“, ამბობს მაია ცირამუა. სპეციალისტის განმარტებით, კიდევ ერთი პრობლემა, რომელიც ამ სიუჟეტს უკავშირდება არის ის, რომ ბავშვთა პორნოგრაფიის ამსახველი კადრები ხელახლა იწყებს ცირკულირებას, რაც პირველ რიგში, მზა მასალაა პედოფილებისთვის. სრულად... წყარო: www.mediachecker.ge

თბილისი. წამების მსხვერპლთა ფსიქოსოციალური და სამედიცინო რეაბილიტაციის ცენტრი - GCRT შეშფოთებას გამოთქვამს „მთავარი არხის“ ეთერით გავრცელებული სიუჟეტის გამო, რომელიც არასრულწლოვანი, 6-დან 16 წლამდე ასაკის ბავშვების პორნო-ტრეფიკინგს შეეხებოდა. „კატეგორიულად მიუღებელია მასობრივი ინფორმაციის საშუალებით ბავშვების შიშველი, ეროტიკული შინაარსის ფოტო და ვიდეომასალის გავრცელება, იმის მიუხედავად, დაფარულია თუ არა მათი სახეები. ეს ქმედება ეწინააღმდეგება ბავშვთა სექსუალური ექსპლუატაციისა და სექსუალური ძალადობისაგან დაცვის ევროპის საბჭოს კონვენციას. ბავშვების სახეების დამალვა თავიდან ვერ აგვაცილებს მათი იდენტიფიცირების რისკს იმ ადამიანების მხრიდან, რომლებიც პირადად იცნობენ ამ პროცესში ჩართულ არასრულწლოვნებს. გარდა ამისა, მაღალია რეტრავმატიზაციის რისკი - არავინ იცის რა სიძლიერის განცდებს გამოიწვევს ამ მასალის ნახვა მოზარდებში, რომლებმაც საკუთარ თავზე გამოსცადეს ძალადობა. გასათვალისწინებელია ისიც, რომ ამ კადრების ტელევიზიით ტირაჟირებით, ინტერნეტში პრაქტიკულად სამუდამოდ ვტოვებთ ბავშვების ფოტო და ვიდეომასალას, რომელთა ნახვასაც მსხვერპლები წლების მერეც შეძლებენ“, ნათქვამია ორგანიზაციის ვებგვერდზე. სრულად... წყარო: gcrt.ge

თბილისი. საზოგადოებრივი ორგანიზაციები გაეროს ბავშვის უფლებათა კომიტეტს სოფიო კილაძის კომიტეტის წევრად შესაძლო არჩევასთან დაკავშირებით მიმართავენ.  „წინამდებარე განცხადებაზე ხელმომწერი ორგანიზაციები მივიჩნევთ, რომ სახელმწიფომ ბავშვის უფლებათა კომიტეტის წევრობის კანდიდატის შერჩევისას უგულებელყო გაეროს რეკომენდაციები კანდიდატის შერჩევის პროცედურასთან დაკავშირებით და ამასთან, კომიტეტის წევრობის კანდიდატად წარადგინა სოფიო კილაძე, რომელიც, ჩვენი შეფასებით, არ გამოირჩევა თანასწორობისა და ადამიანის უფლებების მაღალი რწმენითა და პატივისცემით. ქალბატონი კილაძე ადამიანის უფლებებისა და სამოქალაქო ინტეგრაციის კომიტეტის თავმჯდომარედ ყოფნის პერიოდში გამოირჩევა ჰომოფობიური განწყობებით და ზოგადად უმცირესობების უფლებების არაღიარების და არასათანადო მხარდაჭერის პრობლემური გამოცდილებით. ხელმომწერი ორგანიზაციები ვთვლით, რომ სამოქალაქო საზოგადოების პოზიცია ცნობილი უნდა იყოს კომიტეტისთვის გადაწყვეტილების მიღებამდე. სწორედ ამის გამო გიზიარებთ ჩვენი პოზიციის დასაბუთებას და გთხოვთ, რომ გადაწყვეტილების მიღების დროს ის გაითვალისწინოთ“, ნათქვამია ერთობლივ განცხადებაში. სრულად... წყარო: phrgeorgia.wordpress.com

თბილისი. „სკოლა ყველა ბავშვისათვის“ კამპანიის ფარგლებში ონლაინ დისკუსია გრძელდება. რა სირთულეებს აწყდებიან მიუსაფარი ბავშვები და როგორ ვუპასუხოთ ახალ გამოწვევებს?! 18 ივნისს, 17:00 საათზე, ამ თემებზე ისაუბრებენ ლალი კალანდაძე, თეა გალახვარიძე, სალომე ჭიჭინაძე, ნინო თოდუა, ლია რაზიკაშვილი. სრულად... წყარო: ორგანიზაციის გვერდი სოციალურ ქსელში

თბილისი. მაკლეინის ასოციაცია ბავშვებისთვის (MAC Georgia) აქვეყნებს ბლოგპოსტს: რატომაა მნიშვნელოვანი სწავლისა და ქცევის სირთულეების მქონე ბავშვის მოტივაციის შენარჩუნება. „ბავშვები, რომელთაც სწავლასთან და ქცევის რეგულაციასთან დაკავშირებული სირთულეები აქვთ, გამუდმებით იღებენ ნეგატიურ უკუკავშირს გარშემომყოფებისგან. მაგალითად, ყურადღების დეფიციტისა და ჰიპერაქტივობის სინდრომის მქონე ბავშვი, რომელსაც მუდმივად ავიწყდება საშინაო დავალების მოტანა, ან ბავშვი, რომელსაც აქვს მათემატიკური დავალებების შესრულების სირთულე და ვერ ასწრებს მათ დროულად ამოხსნას ან პასუხების ნახევარს შეცდომით წერს. ასეთ შემთხვევებში, მიუხედავად ჩადებული ძალისხევისა, წარმატება, რაც თავის მხრივ, სხვადასხვა უნარის გაწაფვასთანაა დაკავშირებული, შედარებით ნელა მიიღწევა, რაც ნეგატიურ გავლენას ახდენს ბავშვის მოტივაციის ხარისხზეც. „რატომ ვეცადო, თუ მაინც ცუდ შედეგს ვიღებ ტესტში?“ შეიძლება მსგავსი შეკითხვა დაებადოს ბავშვს, რომელიც იმედგაცრუებულია საკუთარი მიღწევებით და შეიქმნას ნეგატიური მოლოდინები სამომავლო საქმიანობებთან დაკავშირებითაც...“ სრულად... წყარო: ორგანიზაციის გვერდი სოციალურ ქსელში

თბილისი. მაკლეინის ასოციაცია ბავშვებისთვის (MAC) აქვეყნებს ბლოგპოსტს: როგორ შევიმუშავოთ ეფექტური ქცევითი კონტრაქტი. „ქცევითი კონტრაქტი ქცევის მართვის ერთ-ერთი ეფექტური სტრატეგიაა. ის მოზრდილსა და ბავშვს შორის პრობლემური ქცევის ცვლილების შესახებ არსებული შეთანხმების წერილობითი აღწერილობაა. აღნიშნული სტრატეგია ემსახურება პრობლემური ქცევის შემცირებას და მისაღები ქცევების სწავლებას. ქცევითი კონტრაქტის მეშვეობით, ბავშვი სწავლობს, რომ გარკვეული პრივილეგიის მისაღებად საჭიროა კონკრეტული ნაბიჯების განხორციელება. ეს მას ეხმარება იყოს მეტად ორგანიზებული, მიზანზე ორიენტირებული. ქცევითი კონტრაქტის შედგენისას, განსაკუთრებით მნიშვნელოვანია ბავშვის ჩართულობა, მისი მოსაზრებების გაზიარება და კონტრაქტის პირობების ერთობლივი შეთანხმების საფუძველზე განსაზღვრა. ასეთ შემთხვევაში, ბავშვები მეტად იღებენ პასუხისმგებლობას მის შესრულებაზე“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. მაკლეინის ასოციაცია ბავშვებისთვის გთავაზობთ რამდენიმე თამაშს, რომელიც სწავლის პროცესს უფრო სახალისოსა და საინტერესოს გახდის. მაგ: „სამოსის დაჯგუფება“ - მიეცით ბავშვს სხვადასხვა სამოსის ფოტოები და სთხოვეთ მათი თემატური დაჯგუფება ფორმატის ქაღალდზე. მაგ: სთხოვეთ სამოსი სეზონების შესაბამისად გაანაწილოს, ან განასხვავოს სუფთა და ჭუჭყიანი სამოსი და სხვა. ფოტოების მოძიება შესაძლებელია ონლაინ სივრცეში ან შეგიძლიათ თავად გადაუღოთ ფოტოები ბავშვის, ან ოჯახის სხვა წევრების ტანსაცმელს“. სრულად... წყარო: ორგანიზაციის გვერდი სოციალურ ქსელში