თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ია ერაძის ბლოგპოსტს: „ყოველდღიური ცხოვრების ფინანსიალიზაცია საქართველოში". „თუ ჩემი მშობლების თაობას ჩემს ასაკში არც საბანკო ანგარიში გააჩნდა და ვერც ტელევიზორს იყიდდა სესხით, ახლა უკვე აღებული კრედიტით მივდივართ დასასვენებლად, ვყიდულობთ ბინას, მანქანას ან ახალ მობილურ ტელეფონს, ვარემონტებთ სახლს, ვიხდით დაბადების დღეს, ვმკურნალობთ ოჯახის ავადმყოფ წევრებს, ვიძენთ შვილებისთვის სასკოლო წიგნებს ან შეგვაქვს უნივერსიტეტის გადასახადი – ვცხოვრობთ კრედიტით, ანუ ფულით, რომელიც არ გვაქვს და რისკით, რომელიც ჩვენს ყოველდღიურობას განკარგავს! სწორედ ეს გახლავთ ფინანსიალიზაციად წოდებული პროცესის ერთ-ერთი გამოძახილი – ყოველდღიურობის ფინანსიალიზაცია", ნათქვამია სტატიაში. სრულად... წყარო: emc.org.ge

თბილისი. ENPARD/სოფლისა და სოფლის მეურნეობის განვითარების ხელშეწყობა აქვეყნებს ბლოგპოსტს წარმატებული სასოფლო-სამეურნეო კოოპერატივის „სამეგობრო - 2014"-ის შესახებ. „როგორც ამ მოკლე დოკუმენტურ ვიდეოშია ნაჩვენები, ENPARD-ის მიერ დაფინანსებული კოოპერატივი „სამეგობრო 2014" ხელს უწყობს და თავადაც იღებს სარგებელს ადგილობრივი ბაზრის განვითარებისგან. კოოპერატივის წევრები ნელ-ნელა გაიცნეს ღირებულებათა ჯაჭვის სხვა მონაწილეებმა და მათ შორის მტკიცე ურთიერთობები ჩამოყალიბდა. კოოპერატივის ერთ-ერთი წევრი, ოთარ გიორგაძე აღნიშნავს: „არავინ მიცნობდა მე… დღეს ჩვენ გვიცნობენ და კოოპერატივს მეტად ენდობიან". დღეს კოოპერატივი რეგულარულად აწვდის კალმახს ქუთაისის ყველაზე პოპულარულ სუპერმარკეტების ქსელს „გურმანს". კარგად განვითარებული კავშირები ერთ-ერთი მთავარი ფაქტორია, რის გამოც კოოპერატივი „სამეგობრო 2014" სიცოცხლისუნარიანი ბიზნესმოდელი გახდა", ნათქვამია ბლოგპოსტში. სრულად... წყარო: enpard.ge

თბილისი. არასამთავრობო ორგანიზაცია საზოგადოება და ბანკების ტრენინგი „რჩევები მომხმარებლებს” ახლგაზრდებისთვის გაიმართა. „ორგანიზაციის წარმომადგენლებმა მსმენელებს საბანკო პროდუქტებისა და მომსახურების პირობებზე ესაუბრნენ. შეხვედრის ძირითადი თემა საკრედიტო პროდუქტები იყო, ტრენინგზე ყურადღება დაზოგვის კულტურის წახალისებაზეც გამახვილდა. საზოგადოება და ბანკები პროექტს გერმანული შემნახველი ბანკების ფონდის მხარდაჭერით ახორციელებს", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. ახალგაზრდა ფინანსისტთა და ბიზნესმენთა ასოციაცია - „აფბა", ეხმაურება ქვეყანაში ფინანსური პირამიდის სქემით მოქმედი კომპანიების გააქტიურებას და მოსახლეობას სიფრთხილისკენ მოუწოდებს. „ფინანსური პირამიდა საქმიანობის ისეთი ფორმაა, რა დროსაც მოსახლეობისგან თანხების მოზიდვა ხდება ბაზარზე არსებულ საპროცენტო განაკვეთზე გაცილებით მაღალი სარგებლის შეთავაზებით. ასეთი ორგანიზაციების იურიდიული ფორმა „შეზღუდული პასუხისმგებლობის საზოგადოებაა"(შპს), რომელთაც, როგორც წესი არ გააჩნიათ არანაირი მატერიალური აქტივები და მათი საქმიანობა მეტწილად რისკზე არის დაფუძნებული. ფინანსური პირამიდის მეორე, შედარებით უფრო რთული სქემა არის ქსელური მარკეტინგის პრინციპით მომუშავე კომპანიები, რომლებიც მოსახლეობისგან თანხის მოზიდვას სხვადასხვა ნივთებისა თუ მომსახურების გაყიდვით ახდენენ. აღსანიშნავია, რომ სხვა შემთხვევაში ამ ნივთების თუ მომსახურებების რეალიზება ძალიან რთული იქნებოდა ჩვეულებრივი, ლეგალური გზით." ბაირახტარმა საკანონმდებლო ხარვეზზეც გაამახვილა ყურადღება და აღნიშნა, რომ დღეს არსებული კანონმდებლობით ძლიან რთულია ფინანსურ პირამიდებთან სამართლებრივი ბრძოლა და მათ მიერ მომხმარებლების დაზარალების პრევენცია", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. ევროკავშირმა საქართველოს უწყებებს ევროკავშირთან პოლიტიკური და ეკონომიკური ინტეგრაციის ვალდებულებათა შესრულებაში დასახმარებლად 83 მილიონი ლარი გამოუყო. „ამ პროგრამის ფარგლებში, რომელიც 2024 წლამდე გასტანს, ევროკავშირი საქართველოს საჯარო უწყებებს გამოუყოფს 83 მილიონ ლარს (32 მილიონი ევრო), რათა დაეხმაროს მათ ევროკავშირი-საქართველოს ასოცირების შესახებ შეთანხმების, სავიზო რეჟიმის ლიბერალიზაციის სამოქმედო გეგმის ნიშნულებისა და რეადმისიის შესახებ შეთანხმების შესრულებაში, აგრეთვე ხელი შეუწყოს ქართული ბენეფიციარი უწყებების ევროკავშირის სპეციალურად შერჩეულ პროგრამებში მონაწილეობას", ნათქვამია ევროკავშირის ვებ-გვერდზე საქართელოში. სრულად... წყარო: eeas.europa.eu

თბილისი. კავშირი „საფარი" აქვეყნებს ინტერვიუს ნინო წინწალაშვილთან. ნინო სამედიცინო უნივერსიტეტის მეხუთე კურსის სტუდენტია, სტომატოლოგიას სწავლობს, მუშაობს და პარალელურად ბიზნეს სფეროშია ჩართული. მან „აწარმოე საქართველოში"-ს გრანტი მოიპოვა და ბაკურციხეში მწყრების ფერმა გააშენა. „ცხოველები და ფრინველები საოცრად მიყვარს. ჯერ კიდევ ძალიან პატარას, ბიძაჩემის მიერ ნადირობიდან მოყვანილი მწყერი ხშირად დაკვლას გადამირჩენია. 2015 წლის ზაფხულში, დედამ „აწარმოე საქართველოშის" პროგრამის შესახებ ინფორმაცია მომაწოდა. სანამ ამ დაფინანსებას მოვიპოვებდი, რამდენიმე ათეული მწყერი მოშენებული მყავდა. დაფინანსების მოპოვებამდე ძალიან მიჭირდა, რადგან მწყერს სპეციალური გალიები და ბევრი სპეციფიკური ინვენტარი სჭირდება, რაც მე არ მქონდა. სპეციალური გალიების შეძენამდე, ფრინველი ფართოდ და თავისუფლად მყავდა, – მეგონა, ამით მის უკეთ მოვლას ვუწყობდი ხელს, მაგრამ ეს ასე არ აღმოჩნდა: სინამდვილეში, მწყრისთვის დაბალი გალიებია განკუთვნილი, რომ მაღლა არ ახტეს და თავი არ გაიტეხოს. დაფინანსების მიღების შემდეგ, რაც მწყრების ფერმისთვის საჭირო ინვენტარი შევიძინე, ჩემი მეურნეობის მოვლა გაცილებით გამარტივდა. ახლა ყველაფერი რიგზეა, მაგრამ საქმის წამოწყებისას, ბევრი სირთულე მქონია: ფრინველი გალიიდან გამირბოდა (იცინის, შ. გ.)", ნათქვამია ინტერვიუში. სრულად... წყარო: sapari.ge

თბილისი. საქართველოს სტრატეგიული კვლევებისა და განვითარების ცენტრმა ფონდ „ღია საზოგადოება საქართველოს" გრანტის ფარგლებში განახორციელა პროექტი „არჩევნები და საჯარო ფინანსების მართვა". პროექტის მიზანი იყო საჯარო ფინანსების მართვის სისტემისა და წინასაარჩევნო პერიოდში შეზღუდვების უზრუნველყოფის კვლევა იმ საჯარო სამართლის იურიდიულ პირებში, რომლებიც არ ფინანსდებიან სახელმწიფო, ავტონომიური ან მუნიციპალური ბიუჯეტებიდან. „არჩევნებისას საჯარო ფინანსების ჩვეულებრივზე უფრო მეტი მოცულობით პირდაპირი თუ ირიბი გამოყენებს წლების განმავლობაში დამკვიდრებულ მავნე პრაქტიკად ჩამოყალიბდა", ნათქვამია კვლევაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. „ბანკები და საზოგადოება" 1 აპრილის მდგომარეობით საბანკო სექტორის მიმოხილვას აქვეყნებს. „ეკონომიკურ აქტივობაზე ლარის გაუფასურებასთან ერთად მნიშვნელოვანი გავლენა იქონია საკანონმდებლო ცვლილებებმა, კერძოდ უცხოურ ვალუტაში სესხების გაცემასთან დაკავშირებულმა შეზღუდვამ. ცვლილებების გათვალისწინებით მოსალოდნელი იყო მოკლევადიან პერიოდში დაკრედიტების შესუსტება და სესხებზე საპროცენტო განაკვეთების ზრდა. ბოლო ორი თვის მონაცემებით იკვეთება, რომ მოსახლეობა მეტი სიფრთხილით ეკიდება ახალი გარიგებების დადებას, რაც ვალუტების მიხედვით ჩაშლილ სასესხო პორტფელის ცვლილებაზეც აისახა. მოკლევადიანი სირთულის მიუხედავად კომერციული საბანკო სექტორი სტაბილურად იზრდება, მარტის საკონვერსიო შემოსავლებიდან მიღებულმა სარგებელმა 24.8 მლნ ლარი, ხოლო წმინდა მოგებამ 115.1 მლნ ლარი შეადგინა", ნათქვამია ორგანზიაციის ვებ-გვერდზე. სრულად... წყარო: sab.ge

აჭარა. განახლდა ტრენინგების ციკლი თემაზე „საოჯახო ბიზნესის გაძლიერების ხელშეწყობა". პროექტი ევროკავშირის დაფინანსებული კოალიციური პროექტის „ხანდაზმულთა უფლებების დაცვის ხელშეწყობისა და სოციალურ-ეკონომიკური გაძლიერების კამპანია აჭარის რეგიონში" ფარგლებში მიმდინარეობს და მას ასოციაცია „ღირსეული სიბერე" ახორციელებს. „პროგრამაში 50 წლის ზემოთ ასაკის ადამიანები მონაწილეობენ, რომლებსაც აქვთ მცირე ბიზნესი, ან აპირებენ ბიზნესის დაწყებას. პროგრამა ითვალისწინებს ტრენინგს ბიზნესის ადმინისტრირების მხრივ და საგრანტო კონკურსს. სემინარები ტარდება ასევე მეცხოველეობასა და მემცენარეობაში. განაცხადების შემოტანა ყოველდღე შეგიძლიათ - მისამართი ქობულეთი, რუსთაველის 36", ნათქვამია ორგანზიაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. 20 აპრილს, „რედისონ ბლუ ივერია”-ში გაიმართა „მუნიციპალური ფინანსების მართვის სისტემის კვლევის პრეზენტაცია”. ღონისძიება განხორციელდა, საქართველოს სტრატეგიული კვლევებისა და განვითარების ცენტრის (CSRDG) მიერ, USAID-საქართველოს პროექტის „მოქალაქეები ღია და ეფექტური ადგილობრივი მმართველობისთვის" ფარგლებში. სრულად... წყარო: ორგანიზაციის ვებ-გვერდი სოციალურ ქსელში

თბილისი. არასამთავრობო ორგანიზაცია საზოგადოება და ბანკების ეკონომიკურ მედია სკოლაში სწავლა დაიწყო. „ტრენინგებს საქართველოს ეროვნული ბანკის პრეზიდენტის მრჩეველი, მოაზროვნე გიორგი ბაქრაძე ჩაატარებს. სკოლას მოწვეული სტუმრებიც ეყოლება. მედია სკოლის მიზანია ჟურნალისტების ფინანსური განათლების ამაღლება. მსმენელები ეკონომიკის საფუძვლებს სპეციალური კურსის მიხედვით შეისწავლიან. სასწავლო კურსი, რომელიც 2 თვის განმავლობაში გაგრძელდება, უფასოა და მისი დასრულების შემდეგ, წარმატებულ კურსდამთავრებულებს სერტიფიკატები გადაეცემათ", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. ლიბერალიზმის სასწავლო ცენტრი აქვეყნებს გვანცა ფორჩხიძის ბლოგპოსტს: „გარევაჭრობა, პრობლემა და რეალობა". „ამ არგუმენტის გასამყარებლად, რომ გარევაჭრობა ჩვენს ხელისუფლებას მემკვიდრეობით ერგო და კაპიტალიზმი სწორი გზით ვერ განვითარდა გარევაჭრობასთან დაკავშირებული პრობლემების დასახელებაც კმარა. ერთი მხრივ გარევაჭრობა ამ საქმით დაკავებული ადამიანთათვის ხელსაყრელია, რადგან ისედაც დაბალი შემოსავლების მქონე ადამიანებს, საკუთარი ადგილისთვის მინიმალური თანხის გადახდა უწევთ, ან საერთოდ არ იხდიან. მეორე მხრივ, საფრთხის წინაშე დგება მოსახლეობა, რადგან გარევაჭრობის ადგილებში ანტისანიტარიის, ხალხმრავლობის გამო და ასევე ცენტრალური ქუჩების იერსახის დამახინჯების გამო მისი შეზღუდვა აუცილებელ ფაქტორად რჩება ხელისუფლებისთვის", ნათქვამია ორგანიზაციის ვებ-გვერდზე. სრულად... წყარო: libcenter.ge

თბილისი. „საზოგადოება და ბანკებმა" საკრედიტო ბიუროების საქმიანობა შეისწავლა. კვლევის შედეგად გამოიკვეთა მათი როლი კერძო სექტორის განვითარებაში. „ინფორმაცია საფინანსო სექტორის მონაწილეების მიხედვით შემდეგნაირად გამოიყურება: კომერციული ბანკები - 13%, მიკროსაფინანსო ორგანიზაციები - 30%, ონლაინ გამსესხებლები - 35% და სხვა - 16%. ონლაინ გამსესხებლების და მიკროსაფინანსო ორგანიზაციების ასეთი მაღალი მაჩვენებელი შეიძლება მეტყველებდეს იმაზე, რომ ისინი შედარებით მცირე რესურსით მოქმედებენ და მოკლევადიან სესხებზე არიან ორიენტირებულები, მაშინ როდესაც კომერციულ ბანკს შეუძლია მომხმარებელი უზრუნველყოს გრძელვადიანი ფინანსური რესურსით. ასევე მიკროსაფინანსო ორგანიზაციებს და ონლაინ გამსესხებლებს მიმართავენ ის ფიზიკური პირები და ბიზნეს სუბიექტები, რომლებსაც შემოსავლის სტრუქტურა არ აძლევთ საშუალებას მიმართონ კომერციულ ბანკებს", ნათქვამია ორგანიზაციის ვებ-გვერდზე. სრულად... წყარო: sab.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ლელა რეხვიაშვილის ბლოგპოსტს: „გარემოვაჭრეები და კაპიტალისტური წესრიგი". „სახელმწიფო ვერ განდევნის მოვაჭრეებს და თუ მოწესრიგება სურს, მაშინ: უნდა აღიაროს მოვაჭრეების სოციალური მოწყვლადობა, ზოგად სახელმწიფო დონეზე უნდა გაზარდოს სოციალური დახმარების პროგრამების მოცულობა. მიკრო დონეზე უნდა ჩაერიოს კომერციული ფართის ფასების დარეგულირებაში, ბაზრებისა და სავაჭრო ცენტრების მფლობელებსა და მოვაჭრეებს შორის მოლაპარაკებებში, უნდა გამოყოს საჯარო სივრცეები, სადაც მოვაჭრეებს უფასოდ ან დაბალი და სტაბილური გადასახადის ნაცვლად შეეძლებათ ვაჭრობა. უნდა გახსნას სახელმწიფო მფლობელობაში არსებული ბაზრები და სხვა სახის სავაჭრო სივრცეები”, ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: „როგორ ჩავაყენოთ ეკონომიკა სოციალური უფლებების სამსახურში?". „მაგრამ ამ თეორიებს რომ თავი დავანებოთ, ცოტა რამ პირადი გამოცდილებითაც შეგვიძლია ვისწავლოთ. „ნაცმოძრაობის" მიერ გატარებული რადიკალური მარკეტიზაციის პოლიტიკა უპრეცედენტოა ჩვენს რეგიონში – პოსტსაბჭოთა და ზოგადად პოსტსოციალისტურ სივრცეში. შესაბამისად, საკმაოდ მკაფიო გაკვეთილებსაც გვაძლევს. ამ გაკვეთილებიდან, რომელიც, სამწუხაროდ, ვერც თავად „ნაცმოძრაობამ" და ვერც ოცნებამ ვერ გაიაზრა, ორი საკითხი იკვეთება განსაკუთრებული სიცხადით და სიმწვავით: ერთი – ეკონომიკურ ზრდას სიღარიბის შემცირება არ მოჰყვება და მეორეც – სახელმწიფო ჩარევის გარეშე ეკონომიკა არ მოძრაობს", ნათქვამია ლელა რეხვიაშვილის ბლოგპოსტში. სრულად... წყარო: emc.org.ge

23 მარტს, „ტრანსსასაზღვრო ეკონომიკური განვითარების" პროექტის ფარგლებში დილიჟანში გაიმართა შემაჯამებელი კონფერენცია. „ღონისძიების ფარგლებში მოხდა ქვემო ქართლისა და ტავუშის რეგიონების ბიზნესის წარმომადგენლებისთვის პროექტის შედეგების გაცნობა, ინფორმაციის მიწოდება და კონსულტაცია საბაჟო რეგულაციების შესახებ პროდუქციის, ნედლეულის და ტექნოლოგიების იმპორტისა და ექსპორტის პროცესში. მონაწილეები დაწვრილებით გაეცნენ სოფლის მეურნეობის, მრეწველობის, ინოვაციური ტექნოლოგიების და ტურიზმის სექტორებში საქართველოსა და სომხეთში მიმდინარე სახელმწიფო პროგრამების შესახებ. 24 მარტს ქალაქ ნოემბერიანში გაიხსნა „ბიზნესის საინფორმაციო-საბროკერო ცენტრი", რომელიც დაფუძნდა „ტრანსსასაზღვრო ეკონომიკური განვითარების" პროექტის ფარგლებში და მისი მიზანია მოემსახუროს სომხეთსა და საქართველოს შორის ვაჭრობით, ინვესტირებითა და იმპორტ/ექსპორტით დაინტერესებულ კომპანიებს", ნათქვამია „სამოქალაქო განვითარების სააგენტოს" ვებ-გვერდზე. სრულად... წყარო: www.cida.ge

თბილისი. ახალი ეკონომიკური სკოლა შავი ზღვის საერთაშორისო უნივერსიტეტის ახალგაზრდა ეკონომისტთა კლუბის მიწვევით, 4 ლექციას წაიკითხავს ეკონომიკურ თავისუფლებაზე. სრულად... წყარო: ორგანიზაციის ვებ-გვერდი სოციალურ ქსელში

10 მარტს, არასამთავრობო ორგანიზაცია „სიდას" ორგანიზებით გაიმართა საინფორმაციო-საკონსულტაციო შეხვედრა ქვემო ქართლის ბიზნესის წარმომადგენლებთან. „შეხვედრის მონაწილეებმა სომხეთთან ეკონომიკური თანამშრომლობის გაუმჯობესების პერსპექტივებზე იმსჯელეს და სოფლის მეურნეობის განვითარების მხარდაჭერის სამთავრობო პროგრამებს გაეცნენ", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. 9 მარტს, ათასწლეულის გამოწვევის ფონდმა კონკურსში „ბიზნესი გენდერული თანასწორობისთვის" სამ გამარჯვებულს ჯილდო გადასცა. „კონკურსი ხორციელდება გაეროს ქალთა ორგანიზაციისა და გაეროს გლობალური კომპაქტის მიერ შემუშავებული ქალთა უფლებების გაფართოების პრინციპების პოპულარიზების მიზნით. კერძოდ, აღნიშნული კონკურსი ითვალისწინებს მეოთხე პრინციპს - ქალების განათლების, სწავლებისა და პროფესიული განვითარების ხელშეწყობა ბიზნესში გენდერული თანასწორობისთვის. აღნიშნული პრინციპი პასუხობს აშშ-ის ათასწლეულის გამოწვევის კომპაქტის ძირითად ამოცანას - უზრუნველყოს ქალები თანაბარი შესაძლებლობებით", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს უზენაესი სასამართლოს განჩინებით დაუშვებლად იქნა ცნობილი ეკონომიკის სამინისტროს საკასაციო საჩივარი „ინფორმაციის თავისუფლების განვითარების ინსტიტუტის" (IDFI) წინააღმდეგ. „სამინისტროს მოთხოვნას წარმოადგენდა თბილისის საქალაქო სასამართლოს გადაწყვეტილების გაუქმება, რომლითაც ეკონომიკის სამინისტროს დაევალა გაეცა ინფორმაცია მის მიერ 2014 წელს გაწეული ისეთი ადმინისტრაციული ხარჯის შესახებ როგორიც არის პრემიები, დანამატები, სამივლინებო ხარჯები, გამარტივებული შესყიდვები, როუმინგის ხარჯები და სხვა. ინსტიტუტმა აღნიშნული ინფორმაციის მოთხოვნით სამინისტროს 2015 წლის 3 მარტს მიმართა, თუმცა ორი წლის გასვლის შემდეგაც დღეის მდგომარეობით უწყებას მონაცემები ჯერ კიდევ არ გაუცია", ნათქვამია ორგანიზაციის ვებ-გვერდზე. სრულად... წყარო: idfi.ge

სამცხე-ჯავახეთი. ბორჯომში, საზოგადოება და ბანკების ახალი პროექტის, სადისკუსიო კლუბის პირველი შეხვედრა გაიმართა. „კლუბის პირველი სტუმარი ეროვნული ბანკის ყოფილი პრეზიდენტი იყო. გიორგი ქადაგიძემ საქართველოს ეკონომიკა და საბანკო სექტორი მიმოიხილა. პროექტში მედიის 30-მდე წარმომადგენელი მონაწილეობდა, მათ სხვადასხვა აქტუალურ თემებზე იმსჯელეს. სადისკუსიო კლუბის შეხვედრები მომავალშიც გაიმართება", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. ქალაქ ზუგდიდის საკრებულომ გარევაჭრობის რეგულაციის წესზე მუშაობა დაიწყო. „ვფიქრობთ, რომ გარევაჭრობის პროცესის გარკვეული რეგულაციების ქვეშ მოქცევა მნიშვნელოვანია, რადგანაც არსებობს პრობლემები სურსათის უვნებლობის, გარემოს დაბინძურებისა და ქალაქის იერსახის დამახინჯების თვალსაზრისით", ნათქვამია ორგანიზაციის ვებ-გვერდზე. საერთაშორისო გამჭვირვალობა - საქართველო აქვეყნებს რეკომენდაციებსა და შენიშვნებს და თვლის, რომ მათი გათვალისწინების შემდეგ უფრო სრულყოფილი გახდება აღნიშნული რეგულაცია. სრულად... წყარო: www.transparency.ge