თბილისი. საქართველოს სახალხო დამცველი დღეს თბილისის მეტროს გაფიცულ მემანქანეებს შეხვდა და სრულ სამართლებრივ მხარდაჭერას დაჰპირდა. სახალხო დამცველმა უპრეცედენტო და კომიკური უწოდა სასამართლოს მიერ გამოტანილ გადაწყვეტილებას, რომლითაც მემანქანეებს არასამუშაო საათებში გაფიცვის უფლება განუსაზღვრელი ვადით შეეზღუდათ. სახალხო დამცველის აპარატი უახლოეს დღეებში წარადგენს სასამართლოს მეგობრის შესაბამის მოსაზრებას. ამასთან, სახალხო დამცველი მიმართავს თბილისის სატრანსპორტო კომპანიას, თბილისის მუნიციპალიტეტს და, მემანქანეებთან შესათანხმებლად, სახალხო დამცველის მონაწილეობას სთავაზობს. სრულად  წყარო: სახალხო დამცველის ვებგვერდი

თბილისი. კოალიცია „დამოუკიდებელი და გამჭვირვალე მართლმსაჯულებისთვის" ანა სუბელიანისა და თამაზ ახობაძის სამსახურში აღდგენის შესახებ სასამართლო გადაწყვეტილების აღუსრულებლობას ეხმაურება და საქმით პროკურატურის დაინტერესებას მოითხოვს. „აღნიშნული საქმე წარმოაჩენს იუსტიციის სამინისტროსადმი სსიპ აღსრულების ეროვნული ბიუროს ინსტიტუციური დაქვემდებარების პრობლემას. როგორც აღსრულების ეროვნული ბიურო, ასევე დანაშაულის პრევენციის ცენტრი, ინსტიტუციურად დაკავშირებულია იუსტიციის სამინისტროსთან. ორივე უწყების ხელმძღვანელი თანამდებობაზე ინიშნება და თავისუფლდება იუსტიციის მინისტრის მიერ. აღსრულების ეროვნული ბიუროს ინსტიტუციური კავშირი იუსტიციის სამინისტროსთან, ქმნის საფრთხეს, რომ იუსტიციის მინისტრისათვის მიუღებელი გადაწყვეტილების აღსრულების პროცესი ხელოვნურად გაჭიანურდეს ან აღუსრულებელი დარჩეს", - ნათქვამია განცხადებაში. სრულად  წყარო: emc.org.ge

თბილისი. საზოგადოებრივი ორგანიზაციები მოუწოდებენ თბილისი მერს, გაიაზროს პასუხისმგებლობა და დაუყოვნებლივ დაიწყოს მოლაპარაკებები მეტროს თანამშრომლებთან. ამასთან დაკავშირებით, 4 ივნისს, ორგანიზაციებმა სპეციალური განცხადება გაავრცელეს. „დღეს, 4 ივნისს დილის 06:00 საათიდან თბილისის მეტროპოლიტენის მუშაობა შეჩერდა. მეტროს თანამშრომელთა პროფესიულმა გაერთიანებამ, „ერთობა-2013"-მა გაფიცვა გუშინ, 3 ივნისს 15:00 საათზე დაიწყო. გაფიცვა მეტროს იმ თანამშრომლებმა დაიწყეს, რომლებსაც სასამართლოს განჩინებით გაფიცვის უფლება შეზღუდული არ ჰქონდათ, ასევე გაფიცვაში მონაწილეობდნენ ელ. მატარებლის ის მემანქანეები, რომლებიც იმყოფებოდნენ არასამუშაო რეჟიმში. დასვენების დროს გაფიცვის პარალელურად მეტროს მემანქანეები შიმშილობდნენ, რამაც გაართულა მათი ჯანმრთელობის მდგომარეობა და შეუძლებელი გახადა მეტროს ფუნქციონირება", - ნათქვამია განცხადებაში, - „მივიჩნევთ, რომ უკიდურესად მნიშვნელოვანია ქ. თბილისის მუნიციპალიტეტმა სრულად გაიაზროს მისი როლი და პასუხისმგებლობა მიმდინარე მოვლენებში და გადადგას ქმედითი ნაბიჯები მოლაპარაკებების დაწყების მიზნით, რაც დაეფუძნება ადამიანების უფლებების დაცვის მიდგომებსა და სოციალური დიალოგის პრინციპებს". სრულად  წყარო: http://www.osgf.ge

თბილისი. კოალიცია ,,დამოუკიდებელი და გამჭვირვალე მართლმსაჯულებისთვის" ეხმაურება ანა სუბელიანისა და თამაზ ახობაძის სამსახურში აღდგენის შესახებ სასამართლო გადაწყვეტილების აღუსრულებლობას, რამაც ადმინისტრაციული ორგანოების მიერ სამართლიანი სასამართლოს უფლების პატივისცემა კითხვის ნიშნის ქვეშ დააყენა. სუბელიანი და ახობაძე სსიპ - დანაშაულის პრევენციის ცენტრიდან 2014 წლის იანვარში გათავისუფლდნენ. ისინი თავიდანვე მიუთითებდნენ, რომ გათავისუფლება იუსტიციის მინისტრის, თეა წულუკიანის ჩარევით, უკანონოდ და დაუსაბუთებლად განხორციელდა, ხოლო გათავისუფლების ოფიციალურ მიზეზად რეორგანიზაცია დასახელდა. თითქმის ოთხი წლის განმავლობაში სამივე ინსტანციის სასამართლოში მიმდინარე დავა, საბოლოო 2017 წლის 15 სექტემბერს ანა სუბელიანისა და თამაზ ახობაძის სასარგებლოდ დასრულდა და ცენტრს დაევალა მათი კონკრეტულ პოზიციებზე აღდგენა და გათავისუფლებიდან აღდგენამდე პერიოდისთვის იძულებითი განაცდურის სრულად ანაზღაურება. სრულად წყარო: coalition.ge

ქვემო ქართლი. მცირე და საშუალო ბიზნესის წარმომადგენლებისა და ამ მიმართულებებით დაინტერესებული მხარეებისათვის 25 მაისს მარნეულში საინფორმაციო კამპანია იმართება. არასამთავრობო ორგანიზაცია „ირის ჯგუფი" და „ეკონომიკური პოლიტიკის კვლევის ცენტრის" წარმომადგენლები, საინფორმაციო ტურის ფარგლებში, მარნეულში ევროკავშირის ლურჯი ავტობუსებით ჩავლენ და მცირე და საშუალო ბიზნესში ჩართულ მეწარმეებს, ფერმერებს, მუნიციპალუტეტის დაინტერესებულ მცხოვრებლებს, ბიზნესიდეების განვითარების, სამეწარმეო საქმიანობის პოტენციალისა და ახალი შესაძლებლობების შესახებ, ინფორმაციას მიაწვდიან. სრულად წყარო: http://irisgroup.org.ge

თბილისი. ახალგაზრდა ფინანსისტთა და ბიზნესმენთა ასოციაციის (აფბა) ახალი პლატფორმის – ბიზნესსაბჭოს ფორმატში, რედისონში გამართულ შეხვედრაზე საფინანსო სექტორში არსებულ გამოწვევებზე იმსჯელეს. „აფბას ბიზნესსაბჭოს წევრები არიან საქართველოში მოქმედი როგორც მსხვილი, ისე საშუალო მცირე ბიზნესის, ასევე პროფილური არასამთავრობო ორგანიზაციების წარმომადგენლები და ანალიტიკოსები. შეხვედრას, ბიზნესსაბჭოს წევრებთან ერთად, მოწვეული სტუმრის სტატუსით დაესწრნენ ფინანსთა მინისტრის პირველი მოადგილე გიორგი თაბუაშვილი, ეროვნული ბანკის ვიცე-პრეზიდენტი მურთაზ კიკორია და ბანკების ასოციაციის პრეზიდენტი ზურაბ გვასალია. ბიზნესსაბჭოს სხდომაზე ბანკებისა და ბიზნესის ურთიერთობაზე, ასევე, ამ საკითხისადმი მონეტარული და ფისკალური ხელისუფლების მიდგომების თაობაზე შინაარსიანი და არგუმენტირებული მსჯელობა შედგა”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს სახალხო დამცველმა კერძო სექტორის, სახელმწიფო უწყებების, ადგილობრივი და საერთაშორისო არასამთავრობო ორგანიზაციების წარმომადგენლებთან შეხვედრა გამართა. შეხვედრაზე დასაქმების სფეროში თანასწორობის უფლების რეალიზაციის მიმართულებით ქვეყანაში არსებული მდგომარეობა, გამოწვევები და მათი გადაჭრის გზები განიხილეს. შეხვედრის ბოლოს გამართულ დისკუსიაზე საქართველოში თანასწორობის უფლების დაცვის, განსაკუთრებით კი დასაქმების სფეროში დისკრიმინაციის აღმოფხვრის მხრივ გადაწყვეტილების მიღების პროცესში კერძო სექტორის არსებით როლსა და მონაწილეობაზე ისაუბრეს. ღონისძიება ევროკავშირის პროექტის „ბრძოლა დისკრიმინაციის ყველა ფორმის წინააღმდეგ საქართველოში" მხარდაჭერით გაიმართა. სრულად  წყარო: ორგანიზაციის ვებგვერდი

აჭარა. ასოციაციაში „ღირსეული სიბერე" სრულდება ტრენინგების ციკლი „საოჯახო ბიზნესის გაძლიერების ხელშეწყობა". „პროგრამაში მონაწილეობას იღებდნენ 50 წლის ზემოთ ასაკის ადამიანები, რომლებსაც აქვთ მცირე ბიზნესი, ან აპირებენ ბიზნესის დაწყებას. ის ითვალისწინებდა საგანმანათლებლო ტრენინგებს მეცხოველეობასა და მემცენარეობაში, ასევე ტრენინგს ბიზნესის ადმინისტრირებაში და საგრანტო კონკურსს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. 18 მაისს, 12:30 საათზე,„სამოქალაქო განათლებისა და განვითარების ცენტრი"-ს გიწვევთ ტრეინინგზე ევროკავშირთან დადებული „ღრმა და ყოვლისმომცველი თავისუფალი ვაჭრობის შეთანხმების (DCFTA)” შესახებ. ტრეინინგი განკუთვნილია იმ პირებისთვის, რომლების დაინტერესებული არიან საქართველოსა და ევროკავშირს შორის თავისუფალი ვაჭრობის შესახებ პერსპექტივებით. სრულად… წყარო: ორგანიზაციის ვებგვერდი სოციალურ ქსელში

თბილისი. 2018 წლის 16 აპრილს სახალხო დამცველმა წინადადებით მიმართა საქართველოს მთავრობას, მცირე საოჯახო ტიპის ბავშვთა სახლებში მცხოვრებ ბენეფიციართა, სრულწლოვანების მიღწევის შემდეგ, სათანადო მომსახურებით უზრუნველყოფის შესახებ. საქართველოს სახალხო დამცველის მიერ მცირე საოჯახო ტიპის სახლებში ჩატარებულმა მონიტორინგმა გამოკვეთა, რომ ერთ-ერთ მნიშვნელოვან გამოწვევად, წლების განმავლობაში, რჩება არასრულწლოვნების დამოუკიდებელი ცხოვრებისთვის მომზადებისა და მცირე საოჯახო ტიპის სახლების მომსახურებიდან გასული 18 წლის პირების უფლებების დაცვის საკითხი. ხშირ შემთხვევაში, 18 წლის ახალგაზრდა ადამიანი ზრუნვის სისტემას დამოუკიდებელი ცხოვრებისთვის მოუმზადებელი ტოვებს - არ არის დასაქმებული, არ აქვს თავისი ინტერესების შესაბამისი პროფესია, არ არის უზრუნველყოფილი საცხოვრებლით. სახელმწიფოს ამ დრომდე არ აქვს მომსახურებიდან გასული 18 წლის პირების მხარდაჭერის კონკრეტული სერვისი, რაც მორგებული იქნება მათ ბაზისურ საჭიროებებზე, რათა მიეცეთ განათლების მიღების შესაძლებლობა და დაცული იყვნენ სიღარიბის, ძალადობისა და სხვა საფრთხეებისგან. სრულად  წყარო: ორგანიზაციის ვებგვერდი

თბილისი. საქართველოს სახალხო დამცველმა დღეს შეზღუდული შესაძლებლობის მქონე პირთა დასაქმების ხელშემწყობი სახელმწიფო პროგრამების მონიტორინგის ანგარიში წარმოადგინა. სახალხო დამცველის სპეციალურ ანგარიშში შეფასებული და გაანალიზებულია მოქმედი ნორმატიული ბაზა, მათ შორის მთავრობის დადგენილებით დამტკიცებული სამი სახელმწიფო პროგრამა, ასევე საქართველოს შრომის, ჯანმრთელობისა და სოციალური დაცვის სამინისტროდან და სსიპ სოციალური მომსახურების სააგენტოდან მიღებული ინფორმაცია. დოკუმენტში საქართველოს სხვადასხვა ქალაქებში შშმ პირებთან გამართული შეხვედრების შედეგებიც არის ასახული. სახალხო დამცველის შეზღუდული შესაძლებლობის მქონე პირთა უფლებების დაცვის დეპარტამენტმა მონიტორინგის შედეგად დაადასტურა, რომ მიუხედავად სახელმწიფოს გაცხადებული ნებისა – უზრუნველყოს შეზღუდული შესაძლებლობის მქონე პირთა დასაქმება და რიგი პროგრამების არსებობისა, სათანადო სამართლებრივი გარანტიების, პრაქტიკული ხელშეწყობისა და აღსრულების ეფექტური მექანიზმების ნაკლებობის გამო, შეზღუდული შესაძლებლობის მქონე პირთა შრომის უფლების რეალიზება სათანადოდ არ ხდება. სრულად  წყარო: ორგანიზაციის ვებგვერდი

ქვემო ქართლი. ევროკავშირის მხარდაჭერით მიმდინარე სოფლის განვითარების პროექტის ფარგლებში, თეთრიწყაროს მუნიციპალიტეტში დასაქმების პროგრამის პირველი ფაზა წარმატებით განხორციელდა. დასკვნითი ღონისძიება RDFG-ს თეთრიწყაროს ოფისში გაიმართა. პროგრამის პირველი ფაზის შედეგად, 20 მონაწილიდან 8 უკვე დასაქმდა, დანარჩენები კი აქტიურად აგრძელებენ სამუშაოს ძიებას. სრულად  წყარო: http://enpard.ge

თბილისი. გერმანიის საერთაშორისო თანამშრომლობის საზოგადოების ფინანსური დახმარებით გამოიცა შედარებითი კვლევა: „დომინირებული მდგომარეობის ბოროტად გამოყენების აკრძალვა: საქართველოს, სომხეთის და ევროკავშირის კონკურენციის კანონმდებლობების შედარებითი ანალიზი". „დომინირებული მდგომარეობის ბოროტად გამოყენების აკრძალვის მიზანია, თავიდან იქნეს აცილებული დომინირებული მდგომარეობის მქონე საწარმოების მხრიდან ამ მდგომარეობის ბოროტად გამოყენება თავიანთ ეკონომიკურ სექტორში და ასევე აცილებულ იქნას კონკურენციის იმგვარად დამახინჯება, რაც საზიანოა სხვა ეკონომიკური აგენტებისა და მომხმარებლებისათვის. კონკრეტულად, ეს ამკრძალავი მექანიზმი არსებობს იმიტომ, რომ დაცულ იქნას თავისუფალი და სამართლიანი კონკურენცია ბაზრებზე საბაზრო ძალაუფლების კონტროლის გზით", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

გურია. 26 მარტს, „ახალგაზრდა პედაგოგთა კავშირის" ახალგაზრდული პროგრამების ფარგლებში დაგეგმილი ქალთა კვირეულის შემაჯამებელი აქტივობა გაიმართა. ჟურნალისტმა, ესმა კუნჭულიამ ჩაატარა საჯარო ლექცია „გასტრონომიული ტურიზმი და საქართველო". „საუბარი შეეხო ქ-ნ ესმას ოჯახის მიერ წოდორეთში დაწყებულ გასტრონომიული ტურიზმის გამოცდილებას, ქვევრის ღვინისა და გასტრონომიული კულტურების ტურისტებისათვის საინტერესო და მოთხოვნად პროდუქტად ქცევას", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

სამეგრელო. 23 მარტს ანაკლიაში, სასტუმრო „პალმ ბიჩში", გაიმართა საინფორმაციო შეხვედრა სამეგრელო-ზემო სვანეთის რეგიონში მოღვაწე მეწარმეებთან. „ორგანიზაციის საარსებო წყაროებისა და ეკონომიკური განვითარების პროექტების მენეჯერმა, დავით გუჩუამ David Guchua, სტუმრებს რეგიონში მიმდინარე პროექტი „ზრდა საქართველოში" გააცნო. გარდა ამისა, შეხვედრაზე ნაჩვენები იყო პროექტის ფარგლებში გადაღებული ფილმი, რომელიც ორწლიან შედეგებსა და წარმატებული ბენეფიციარების ისტორიებს მოიცავდა. საინფორმაციო შეხვედრას 30-მდე მეწარმე დაესწრო. მათ შორის იყვნენ როგორც პოტენციური, ასევე უკვე დაფინანსებული ბენეფიციარებიც. პროექტის ფარგლებში მომავალ კვირას უპროცენტო სესხების მიღების მსურველებს (20 ადამიანი), რომლებმაც პროექტში ჩართვის სურვილი უკვე გამოთქვეს და ცენტრი „აფხაზეთის" ზუგდიდის ოფისში სააპლიკაციო განაცხადი შეავსეს, ბიზნეს ტრენინგებს გაივლიან. ტრენინგის დასრულების შემდგომ კი მონაწილეები ტრენერის უშუალო ჩართულობითა და დახმარებით ბიზნეს წინადადებებს შეიმუშავებენ. აპრილის ბოლოს 15 საუკეთესო ბიზნეს წინადადების ავტორი სასესხო კომიტეტის გადაწყვეტილებით 10 000 ლარამდე ოდენობის უპროცენტო სესხს მიიღებს", ნათქვამია საქველმოქმედო ჰუმანიტარული ფონდის „აფხაზეთი" ვებგვერდზე სოციალურ ქსელში. სრულად... წყარო: ფონდის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიას „მშრომელთა მოლაპარაკების ძალა, პოლიტიკური მოცემულობა, სოციალური სტრუქტურა და რესურსები". მასალაში საუბარი 2010-2016 წლებში საქართველოში გამართული გაფიცვების შესახებ და გააანალიზებულია მშრომელთა წინააღმდეგობის პოლიტიკა. „მშრომელთა წინააღმდეგობის პოლიტიკის შემთხვევაზე დაკვირვებისას საინტერესოა, თუ რა გარემოებები განაპირობებდა წინააღმდეგობის შემთხვევების ეფექტურობას და რა ქმნიდა გამონაკლის შემთხვევებს? რა შემთხვევაში მიდოდა საწარმოს წარმომადგენლები დათმობაზე და რა მეთოდებს იყენებდნენ ისინი პროცესების სამართავად? ამ კითხვებზე პასუხის გასაცემად და მსჯელობისთვის წერილში განხილულია ის ფაქტორები, რომლებიც სინამდვილეში მსჯელობის ცენტრალურ საკითხად უნდა გადაიქცეს და მათზე რეფლექსირებით მოხდეს მშრომელთა წინააღმდეგობის მოქმედებების ანალიზი თუ შეფასება", - ვკითხულობთ სტატიაში. სრულად  წყარო: ორგანიზაციის ვებგვერდი

აჭარა. ბათუმში ღრმა და ყოვლისმომცველი თავისუფალი სავაჭრო სივრცის (DCFTA) საინფორმაციო ცენტრი გაიხსნა. „შეხვედრაზე საუბარი საქართველო-ევროკავშირს შორის გაფორმებულ ღრმა და ყოვლისმომცველ თავისუფალი ვაჭრობის დოკუმენტს შეეხო. ღონისძიებას ბიზნეს-ასოციაციების, დონორი ორგანიზაციებისა და ბიზნეს-სექტორის წარმომადგენლები დაესწრნენ. პრეზენტაციის დასრულების შემდეგ დისკუსია გაიმართა. მეწარმეებმა DCFTA (საქართველო-ევროკავშირს შორის გაფორმებული ღრმა და ყოვლისმომცველი თავისუფალი ვაჭრობის დოკუმენტი) საინფორმაციო ცენტრის ექსპერტებისგან, ევროკავშირის ბაზრისა და შეთანხმების ფარგლებში, საქართველოს მიერ აღებული ვალდებულებების შესახებ ინფორმაცია მიიღეს", ნათქვამია აჭარის ფინანსთა და ეკონომიკის სამინისტროს ვებგვერდზე სოციალურ ქსელში. სრულად... წყარო: სამინისტროს ვებგვერდი სოციალურ ქსელში

საქართველო. ევროკავშირის მიერ დაფინანსებული პროექტის "სამოქალაქო საზოგადოების ორგანიზაციები ევროპასთან თავისუფალი ვაჭრობის მხარდასაჭერად" ფარგლებში სამეგრელო-ზემო სვანეთის, აჭარისა და იმერეთის სამოქალაქო საზოგადოების ორგანიზაციებმა ადვოკატირების კუთხით საკუთარი უნარები გაიუმჯობესეს. მიღებული თეორიული ცოდნა და პრაქტიკული უნარები მათ დაეხმარებათ დაგეგმონ მიზანზე ორიენტირებული ადვოკატირების კამპანიები და ეფექტური ადვოკატირება გაუწიონ ამა თუ იმ საჭირბოროტო საკითხს მათ მუნიციპალიტეტში. სრულად  წყარო: ორგანიზაციის გვერდი სოციალურ ქსელში

თბილისი. „ქალთა ფონდი საქართველოში" იწყებს კამპანიას - „თავშესაფარს მიღმა”, რომელიც მიზნად ისახავს, ხელი შეუწყოს ძალადობის მსხვერპლთა და დედათა და ბავშვთა თავშესაფარში დროებით მცხოვრებ ქალებს დასაქმებასა და ფინანსურ გაძლიერებაში, რათა მათ აღარ მოუწიოთ ძალადობრივ გარემოში დაბრუნება. შეგროვილი თანხით თავშესაფრის სამზარეულო აღიჭურვება საჭირო პროფესიული ტექნიკით, რაც იქ მცხოვრებ ქალებს საშუალებას მისცემს, გამოცდილი შეფ-მზარეულის ხელმძღვანელობით გაიარონ მზარეულის კურსი, რაც როგორც თავშესაფარში, ასევე თავშესაფრის მიღმა მათ დასაქმებაში დაეხმარება. საჭირო თანხის შეგროვების შემდეგ თავშესაფარში ამუშავდება სოციალური საწარმო - მზა კერძების მიწოდების სერვისი, სადაც დასაქმდებიან ცენტრში მცხოვრები ქალები. გარდა იმისა, რომ ისინი შეიძენენ პროფესიულ გამოცდილებას, თავშესაფარი უზრუნველყოფილი იქნება დამატებითი შემოსავლით. სრულად  წყარო: ორგანიზაციის გვერდი სოციალურ ქსელში

შიდა ქართლი. ლტოლვილთა დანიის საბჭოს ორგანიზებით, ქალაქ გორში ჩატარდა ორდღიანი ტრენინგი პროექტის ციკლის მართვაში. ტრენინგს აღმოსავლეთ საქართველოს დევნილთა ჩასახლებების 20-მდე წარმომადგენელი ესწრებოდა. ტრენინგი ჩატარდა პროექტის, „სამართლიანი საზოგადოებისკენ" ფარგლებში, რომელიც, ლტოლვილთა დანიის საბჭოს მიერ, „სამართლებრივი დახმარება საქართველოსა" და საქველმოქმედო ჰუმანიტარულ ცენტრ „აფხაზეთთან" თანამშრომლობით ხორცილდება. პროექტის ფინანსური მხარდამჭერია სამოქალაქო საზოგადოების განვითარების ფონდი (CISU). სრულად  წყარო: ორგანიზაციის გვერდი სოციალურ ქსელში

სამეგრელო-ზემო სვანეთი. საქველმოქმედო ჰუმანიტარულმა ცენტრმა „აფხაზეთმა" შოთა მესხიას ზუგდიდის სახელმწიფო სასწავლო უნივერსიტეტში სტუდენტებთან საინფორმაციო შეხვედრა გაიმართა. შეხვედრის მონაწილეებმა მიიღეს ინფორმაცია იმ პროექტის შესახებ, რომლის ფარგლებშიც ზუგდიდის მუნიციპალიტეტში მცხოვრები გოგონები და ახალგაზრდა ქალები ხელსაქმის - პოლიმერულ თიხასა და სუტაჟის ტექნიკაზე მუშაობა - ჯგუფებში მეცადინეობებს დაიწყებენ; სხვადასხვა კულტურულ ღონისძიებებში ჩაერთვებიან, სხვადასხვა ტრენინგში მიიღებენ მონაწილეობას, პროექტის დასასრულს კი, მათ მიერ შექმნილი ნამუშევრების გამოფენა გაიმართება. სრულად წყარო: ორგანიზაციის გვერდი სოციალურ ქსელში

იმერეთი. ქუთაისის ახალგაზრდული ცენტრმა ქალაქის 23-ე სკოლის მოსწავლეებისთვის ტრენინგი ჩაატარა. ტრენინგის მიზანს წარმოადგენდა ახალგაზრდების ცნობიერების დონის ამაღლება, სოციალური მეწარმეობის, სოციალური პასუხისმგებლობის, ასევე, ბიზნესთან თანამშრომლობის სტრატეგიებზე და მიდგომებთან დაკავშირებით. ტრენინგი ორგანიზებული იყოა ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) ფინანსური მხარდაჭერით. პროგრამის პარტნიორია განათლების განვითარების და დასაქმების ცენტრი (EDEC). სრულად  წყარო: ორგანიზაციის გვერდი სოციალურ ქსელში