სამცხე-ჯავახეთი. ტოლერანტობის სამოქალაქო ცნობიერებისა და ინტეგრაციის მხარდაჭერის პროგრამა PITA-ში ჩართულმა ახალგაზრდებმა მონაწილეობა მიიღეს, ბორჯომ-ხარაგაულის ეროვნული პარკის მიერ ორგანიზებულ პროექტში - „კავშირი ბუნებასთან". პროექტის ფარგლებში, ახალგაზრდები შეხვდნენ დაცული ტერიტორიების სხვადასხვა ტერიტორიული ადმინისტრაციის თანამშრომლებს და მონაწილეობა მიიღეს თემატურ გარემოსდაცვით აქტივობებში. სრულად  წყარო: ორგანიზაციის გვერდი სოციალურ ქსელში

თბილისი. მედიის განვითარების ფონდი რეგიონული აქტივისტებისთვის მედიაწიგნიერების ახალ ორწლიან პროექტს იწყებს. UN Association of Georgia - UNAG-ის ახალგაზრდულ ცენტრებთან და სხვა რეგიონულ ორგანიზაციებთან პარტნიორობით, საქართველოს 17 ქალაქში სხვადასხვა ღონისძიება და კვლევა ჩატარდება. რეგიონულ აქტივისტებს MDF-ის ექსპერტებთან ერთად გამოცდილებას უცხოელი პარტნიორებიც გაუზიარებენ. სრულად  წყარო: ორგანიზაციის გვერდი სოციალურ ქსელში

შიდა ქართლი. გორის სამოქალაქო აქტივიზმის ცენტრის მოხალისემ, ლუკა ზედაშიძემ პროფესიულ კოლეჯ „განთიადის" სტუდენტებისათვის ჩაატარა ტრენინგი - „საჯარო საუბარი და პრეზენტაციის უნარები". თეორიული კურსის გავლის შემდეგ, ტრენინგის მონაწილეებს მიღებული ცოდნის პრაქტიკაში გამოყენების შესაძლებლობა მიეცათ. ახალგაზრდებმა მიიღეს სხვადასხვა რჩევები, გააანალიზეს შეცდომები, რასაც გამომსვლელები უშვებენ. სრულად  წყარო: ორგანიზაციის გვერდი სოციალურ ქსელში

თბილისი. საქართველოს მოხალისის პროგრამის ფარგლებში, გაიმართა პანელური დისკუსია - მოხალისეობა საქართველოში. 2015-2017 წლის პროგრამის მონაწილეებმა მომავალ მოხალისეებს თავიანთი გამოცდილება გაუზიარეს, არსებულ გამოწვევებსა და მიღწევებზე ისაუბრეს. პროგრამას საქართველოს განათლების, კულტურის, მეცნიერებისა და სპორტის სამინისტრო, „ჰელფინგ ჰენდთან" და რეგიონულ ორგანიზაციებთან ერთად ახორციელებს. სრულად  წყარო: ორგანიზაციის გვერდი სოციალურ ქსელში

თბილისი. შოთა რუსთაველის ფონდი, მაგისტრანტთა სასწავლო-კვლევითი პროექტების დასაფინანსებლად, მიმდინარე წლის სექტემბერში ინდივიდუალურ სასწავლო-კვლევით გრანტებს გასცემს. კონკურსის მიზანია მაგისტრატურის აკრედიტებულ საგანმანათლებლო პროგრამაზე ჩარიცხული მაგისტრანტების სამაგისტრო ნაშრომის ფარგლებში სამეცნიერო კვლევების ხარისხის გაზრდის, აკადემიური დონის ამაღლებისა და კვლევითი უნარ-ჩვევების განვითარების ხელშეწყობა, ასევე, საქართველოს უმაღლესი საგანმანათლებლო დაწესებულების სამეცნიერო-კვლევითი პოტენციალის გაუმჯობესების, სწავლის პროცესში კვლევის ინტეგრაციისა და თემატური და/ან ინტერდისციპლინური მიმართულებით კვლევითი აქტივობის განვითარების ხელშეწყობა. სრულად  წყარო: ფონდის ვებგვერდი

იმერეთი. ადგილობრივი დემოკრატიის სააგენტო საქართველომ, „მშვიდობის კორპუსის" მოხალისეებთან ერთად, პროექტ "გაეროს მოდელირების საერთაშორისო კონფერენცია - ქუთაისი 2018”-ის ფარგლებში, კონფერენციის მონაწილეებისათვის ჩაატარა ტრენინგი, თემაზე - „დებატების კულტურა". „გაეროს მოდელირების საერთაშორისო კონფერენციაში” მონაწილეობას იღებს 18-დან 25 წლამდე 60 ახალგაზრდა, როგორც ქუთაისის მუნიციპალიტეტიდან, ისე - ქუთაისთან დაძმობილებული ქალაქებიდან. "გაეროს მოდელირების” მიზანია ახალგაზრდებში დემოკრატიული ღირებულებების დანერგვა და გავრცელება, კომუნიკაციური და პროფესიული უნარ-ჩვევების განვითარება და ქუთაისის თანამშრომლობის გაძლიერება მუნიციპალიტეტთან დაძმობილებულ ქალაქებთან. პროექტი „ქუთაისის გაეროს მოდელირება (MUN )-2018" ხორციელდება „ადგილობრივი დემოკრატიის სააგენტო საქართველოს" მიერ, ქალაქ ქუთაისის მერიასთან, „გაეროს განვითარების ფონდთან (UNDP)" და „მშვიდობის კორპუსთან" თანამშრომლობით. სრულად  წყარო: ორგანიზაციის გვერდი სოციალურ ქსელში

თბილისი. საქართველოს ჟურნალისტური ეთიკის ქარტია ბუნებრივი კატაკლიზმების გაშუქების სახელმძღვანელო წესებს აქვეყნებს. „მიწისძვრა, ხანძარი, წყალდიდობა, ქარიშხალი - ამგვარი ბუნებრივი კატაკლიზმების გაშუქება მედიას ხშირად უწევს. ინფორმირებულობის მნიშვნელობა ასეთ დროს იზრდება, მოქალაქეები განახლებულ ცნობებს ელიან. მედიის მიერ გავრცელებულ ზუსტ ცნობებზე ბევრი რამ არის დამოკიდებული, განსაკუთრებით მოვლენის პირველ ეტაპზე. ამ თემებზე მუშაობისას, ჟურნალისტს, ინფორმაციის გადაცემასთან ერთად, საკუთარი უსაფრთხოებაზე ზრუნვაც უწევს. რედაქცია დარწმუნებული უნდა იყოს, რომ, პროფესიონალიზმთან ერთად, ჟურნალისტს აქვს ფიზიკური და ფსიქოლოგიური მზაობა გააშუქოს ბუნებრივი კატაკლიზმები", - აღნიშნულია დოკუმენტის შესავალ ნაწილში. სრულად  წყარო: ორგანიზაციის ვებგვერდი

თბილისი. საქართველოს დემოკრატიული განვითარების ინიციატივა (GDI) აქვეყნებს ზვიად ქორიძის საჯარო ლექციის ვიდეოჩანაწერს: „ესკიზები ქართული ლიბერალიზმის ისტორიისათვის". „ილია ჭავჭავაძე არასოდეს იქნებოდა ალექსანდრე ჭავჭავაძის „მემკვიდრე", საზოგადოებრივი თვალსაზრისით, მიუხედავად იმისა, რომ ჭავჭავაძე იყო ისიც, ის არასოდეს მიიღებდა მონაწილეობას შეთქმულებაში, მერე არ გაყიდიდა ამ შეთქმულებას და ამ გაყიდული შეთქმულების შედეგად აღებული ფულით არ აიშენებდა სასახლეს, ეს სხვა მომენტია. ილია ჭავჭავაძე იყო ადამიანი, რომელიც გეუბნებოდა, რა უნდა აკეთო შენ, იმისათვის რომ იყო თავისუფალი. მან იქამდე აწია თამასა, რომ ბოლოს თქვა თავისუფლებას როცა უმღეროდა, რომ „ხე ცნობადისა, ედემს რგული, შენი ხე იყო". ანუ, პრინციპში, ადამიანს ეუბნება, რომ შენმა მსგავსებმა, პირველმა ადამიანებმა სამოთხე დათმეს, იმისთვის, რომ თავისუფლება მიეღოთ, ანუ, თავისუფლებისთვის მათ გაწირეს სამოთხის ბაღი და დაიწყეს საუკუნო სიარული, საუკუნო მიგრაცია, საუკუნო ხეტიალი, ეს არის ლიბერალიზმი", ნათქვამია ლექციაში. სრულად... წყარო: ორგანიზაციის ვებგვერდი სოციალურ ქსელში

სამეგრელო. 9-10 აგვისტოს ასოციაცია „ათინათის" ახალგაზრდული ცენტრის წევრების ინიციატივით შედგა „Job shadowing"-ი, რომელიც არის სწავლის, კარიერის განვითარებისა და ლიდერობის პროგრამა. პროგრამა გაიარეს ახალგაზრდული ცენტრის წევრმა და მას უძღვებოდა რადიო „ათინათის" თანამშრომელი ვერიკო ბულია. ახალგაზრდებმა მონაწილეობა მიიღეს რადიოში გადაცემის მომზადების და პირდაპირ ეთერში გაშუქების სამუშაო პროცესში. სრულად... წყარო: ორგანიზაციის ვებგვერდი სოციალურ ქსელში

თბილისი. გერმანიის საელჩო თბილისში წარმოგიდგენთ ახალ სამენოვან (ქართული, გერმანული და ინგლისური), ილუსტრირებულ წიგნს: „გერმანული დასახლებები და არქიტექტურული მემკვიდრეობა საქართველოში", რომელიც საქართველოში გერმანელ კოლონისტთა ჩამოსახლების 200 წლისთავს ეძღვნება. „წიგნის გამოცემას წინ უძღოდა საქართველოს გერმანული კულტურული მემკვიდრეობის ინვენტარიზაციისა და კვლევის 3 წლიანი ფართომასშტაბიანი პროგრამა, რომლის ფარგლებშიც საქართველოში არსებული 23 გერმანული დასახლებისა და იქ არსებული შენობა-ნაგებობების შესწავლა მოხდა. წიგნისა და ინვენტარიზაციის სრული ელექტრონული მასალა უკვე აიტვირთა კულტურული მემკვიდრეობის დაცვის ეროვნული სააგენტოს საქართველოს კულტურული მემკვიდრეობის ერთიან გეო-მონაცემთა ბაზაში”, ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

აჭარა. ევროკავშირის მხარდაჭერით, დაბა ქედაში, ქედის ადგილობრივი განვითარების ჯგუფის მმართველი საბჭოს წევრებისთვის, სასწავლო კურსი „პროექტის წერა" ჩატარდა. კურსი ევროკავშირის ENPARD-ის პროექტის - „ადგილობრივი რესურსებისა და პოტენციალის ოპტიმალური გამოყენება სოფლის განვითარებისათვის (ქედა ლიდერი)" - ფარგლებში, საქართველოს სტრატეგიული კვლევებისა და განვითარების ცენტრის, CENN-ის პარტნიორი ორგანიზაციის მიერ იყო ორგანიზებული. იგი მიზნად ისახავდა ადგილობრივი განვითარების ჯგუფის მმართველი საბჭოს წევრებში პროექტის წერის ცოდნის/უნარ-ჩვევების განვითარებას და მოიცავდა ისეთ საკითხებს, როგორიცაა: საჭიროებების შეფასება, მიზანი და ამოცანები, გეგმა-გრაფიკი, მონიტორინგი და შეფასება, სხვა. სრულად  წყარო: http://enpard.ge

26-28 სექტემბერს, არასამთავრობო ორგანიზაციების ლიდერებისთვის და სამოქალაქო აქტივისტებისთვის, EWMI ACCESS-ის დაფინანსებით და კონსულტაციისა და ტრენინგის ცენტრი - CTC-ის ორგანიზებით, გაიმართება ტრენინგი - სოციალური კამპანიების წარმოება სოციალური ცვლილებისთვის. „ტრენინგი დაეთმობა სოციალური ცვლილების (ტრასფორმაციის) არსის გაგებას და კამპანიების დაგეგმვას არაძალადობრივი მეთოდების გამოყენებით. ტრენინგს გაუძღვებიან უცხოელი ტრენერები: სებასტიან შვაიცერი და ისრაელ პერალტა. დეტალური ინფორმაცია ტრენერების და ტრენინგის თემების შესახებ იხილეთ ქვემოთ მოცემულ ბმულზე. დაინტერესებულმა პირებმა 7 სექტემბრამდე უნდა გაიარონ რეგისტრაცია. CTC მონაწილეებს 14 სექტემბრამდე დაუკავშირდება. ტრენინგი ინგლისურ ენაზე ჩატარდება", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს სახალხო დამცველმა ახმეტის მუნიციპალიტეტის მერს საბავშვო ბაგა–ბაღების კეთილმოწყობის მიზნით დროული და კომპლექსური ღონისძიებების გატარების რეკომენდაციით მიმართა. სახალხო დამცველის აპარატის მონიტორინგის შედეგად გამოიკვეთა, რომ სოფლების – ქისტაურისა და ზემო ხოდაშენის, ასევე ახმეტის N5 და N6 საბავშვო ბაგა-ბაღებში საკმაოდ მძიმე მდგომარეობაა, მოუწესრიგებელია სასწავლო და სააღმზრდელო გარემო, არ არის უზრუნველყოფილი უსაფრთხოება, ფიზიკურ-ინფრასტრუქტურული და სანიტარულ-ჰიგიენური პირობები. სრულად  წყარო: სახალხო დამცველის ვებგვერდი

თბილისი. სახალხო დამცველმა ქვემო ქართლის საჯარო სკოლებში არსებული მძიმე სანიტარულ-ჰიგიენური მდგომარეობის გამო, შესაბამის მუნიციპალიტეტებს, უსაფრთხო წყალსა და სანიტარიაზე სკოლების ხელმისაწვდომობის უფლებით უზრუნველყოფის რეკომენდაციით მიმართა. სახალხო დამცველის აპარატის მიერ გავრცელებული ინფორმაციის თანახმად, აპარატის მიერ მარნეულის, წალკის, გარდაბნისა და დმანისის მუნიციპალიტეტების რიგ სკოლებში 2018 წლის ივნისში ჩატარებულმა მონიტორინგმა აჩვენა, რომ სასკოლო გარემო და ინფრასტრუქტურული პირობები, ისევე როგორც, წყლის ხელმისაწვდომობისა და სანიტარიულ-ჰიგიენური მდგომარეობის მხრივ არსებული მდგომარეობა, საგანგაშოა და გადაუდებელ მოწესრიგებას საჭიროებს, რაც შესაბამისი პასუხისმგებელი უწყებების ერთ-ერთ უმნიშვნელოვანეს პრიორიტეტს უნდა წარმოადგენდეს. სრულად  წყარო: სახალხო დამცველის ვებგვერდი

თბილისი. საერთაშორისო გამჭვირვალობა - საქართველოს სამთვიანი სტაჟირების პროგრამა დასრულდა. სერთიფიცირებულთა შორისაა: თინათინ გაჩეჩილაძემ, ალექსანდრე ეროიანმა, გიორგი თხელიძემ, მარიამ ლიპარტელიანმა, ნანა ღარიბაშვილმა, საბა ელიზბარაშვილმა, ანა მესხმა, ხატია ნიკოლაიშვილმა და თამარ გიორგობიანმა დაასრულეს. „აღმასრულებელი დირექტორის მოადგილემ, გიორგი ონიანმა მათ პროგრამის წარმატებით გავლის დამადასტურებელი სერთიფიკატები გადასცა. ორგანიზაცია დიდ მადლობას უხდის მათ თანამშრომლობისა და გაწეული დახმარებისთვის", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს დემოკრატიული ინიციატივა (GDI) გთავაზობთ, გიორგი მშვენიერაძის საჯარო ლექციას თემაზე: „რისთვის გვჭირდება სიტყვის თავისუფლება”. ლექცია ჩატარდა პროექტის „თავისუფლების სკოლა - Liberty School” ფარგლებში. პროქტი განხორციელდა „საქართველოს დემოკრატიული ინიციატივის” ეგიდით, UN Association of Georgia - UNAG და აშშ-ს საერთაშორისო განვითარების სააგენტოს ფინანსური მხარდაჭერით. ყოველ ხუთშაბათს, 10 კვირის განმავლობაში შესაძლებლობა გექნებათ კიდევ ერთხელ იხილოთ „თავისუფლების სკოლა - Liberty School” ფარგლებში ჩატარებული საჯარო ლექციები. ვიდეო ლექცია... წყარო: ორგანიზაციის ვებგვერდი სოციალურ ქსელში

მცხეთა-მთიანეთი. ევროკავშირის მიერ დაფინანსებული ევროპის სამეზობლო პროგრამის (ENPARD) ფარგლებში ბორჯომისა და ლაგოდეხის განვითარების ჯგუფების (LAG-ების) წევრები ორდღიანი ვიზიტით ყაზბეგის მუნიციპალიტეტს ესტუმრნენ. ვიზიტის მიზანს ფონდების მოძიების ტრეინინგში მონაწილეობა და ყაზბეგის მუნიციპალიტეტში ENPARD-ის პროგრამის პირველ ფაზაში დაფინანსებული პროექტების მონახულება წარმოადგენდა. ფონდების მოძიების ტრეინინგი მიზნად ისახავდა საგრანტო პროექტის წერის პრაქტიკული და თეორიული ცოდნისა და ფონდების მოძიების გზებისა და ხერხების შესახებ ინფორმაციის მიწოდებას LAG-ების წევრებისათვის. ტრეინინგის მონაწილეებმა, მიღებული ცოდნის საფუძველზე, საპროექტო კონცეფციები დაამუშავეს. სრულად  წყარო: http://enpard.ge

აჭარა. 27 ივლისს, „თავისუფალ ჟურნალისტთა სახლის" პროექტში „მოქალაქეთა ჩართულობის გაზრდა ასოცირების ხელშეკრულების შესრულების პროცესში" შეხვედრა ხელვაჩაურის მუნიციპალიტეტის სოფელ ჭარნალში გაიმართა. „მსგავსი შეხვედრების მიზანია მოსახლეობის ინფორმირება ასოცირების ხელშეკრულებით ნაკისრი ვალდებულებების შესახებ და აღებული ვალდებულებების შესრულების პროცესის მონიტორინგში მონაწილეობისადმი ინტერესის გაღვივება", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

კახეთი. „დემოკრატიული ჩართულობის ცენტრების ქსელის" თელავის წარმომადგენლობაში, ადგილობრივ არასამთავრობო ორგანიზაციებს, სამოქალაქო აქტივისტებსა და დაინტერესებულ პირებს საკუთარი გამოცდილება „თეთრი ხმაურის მოძრაობისა" და „ადამიანის უფლებების სწავლებისა და მონიტორინგის ცენტრის" წარმომადგენლებმა გაუზიარეს. შეხვედრის თემა იყო სამოქალაქო კამპანიების დაგეგმვა და განხორციელება. შეხვედრაზე სპიკერებმა დეტალურად განიხილეს არსებული ნარკოპოლიტიკის შესაცვლელად სამოქალაქო კამპანიის მაგალითი და დამსწრეების კითხვებს უპასუხეს. სრულად წყარო: https://www.facebook.com/Centers.ge/posts/803793519828224

ქვემო ქართლი. ორგანიზაცის „პარტნიორობა ადამიანის უფლებებისთვის" (PHR) წარმომადგენლები ფსიქიატრიულ დაწესებულებებში მცხოვრები პირებისთვის სამართლებრივი დახმარების აღმოჩენის სამუშაოებს განაგრძობენ. ამ კუთხით დისკრიმინაციასთან დაკავშირებით ცნობიერების ამაღლებისა და ანტიდისკრიმინაციული მექანიზმების შესახებ ინფორმაციის მიწოდების მიზნით, ისინი რუსთავის ფსიქიკური ჯანმრთელობის ცენტრშიც იმყოფებოდნენ. PHR-ის იურისტები დაწესებულების პერსონალსა და იქ მცხოვრებ პირებს შეხვდნენ. საუბრისას, განსაკუთრებული ყურადღება გამახვილდა ქმედუნარიანობის რეფორმასა და დაწესებულებაში ამ მიმართულებით არსებულ გამოწვევებზე. სრულად  წყარო: ორგანიზაციის ვებგვერდი

იმერეთი. ორგანიზაცია „პარტნიორობა ადამიანის უფლებებისთვის" (PHR) იურისტმა ქუთაისში გამართა სემინარი თემაზე – „სექსუალური შევიწროების რეგულირება საქართველოში და არსებული პრაქტიკა". სემინარზე განხილულ იქნა სექსუალური შევიწროების დეფინიცია, სახეები და ფორმები; ის, თუ რა გავლენას ახდენს სექსუალური შევიწროება მსხვერპლზე; ასევე, სექსუალური შევიწროების დადასტურებისთვის საჭირო მტკიცებულებების შეგროვების საკითხი. სემინარების ეს ციკლი კატო მიქელაძის სკოლის ორგანიზებით მიმდინარეობს. სრულად  წყარო: ორგანიზაციის ვებგვერდი

კახეთი. ევროკავშირის მხარდაჭერითა და ახალქალაქის LAG-ის ინიციატივით, კახეთში ახალგაზრდული ბანაკი მიმდინარეობს. ბანაკს 15 ახალგაზრდა სტუმრობს ახალქალაქის სხვადასხვა სოფლიდან, მათი მასპინძლები კი, საზოგადოებრივი კოლეჯ "აისის” ქვემო ალვანის ფილიალის სტუდენტები არიან. ღირშესანიშნაობების მონახულება, გუნდური თამაშები, საინტერესო ლექციები და ადგილობრივი ტრადიციების გაცნობა, ეს იმ აქტივობების მცირე ჩამონათვალია რაშიც ბანაკის მონაწილეები რამდენიმე დღის განმავლობაში ჩაერთვებიან. პროექტის - "სოფლის განვითარების ახალი მიდგომის ხელშეწყობა ახალქალაქში” ფარგლებში, ახალგაზრდული აქტივობების განხორციელება მომავალშიც იგეგმება. სრულად  წყარო: http://enpard.ge