თბილისი. 23-24 მაისს, საერთაშორისო გამჭვირვალობა - საქართველომ, იურიდიულ საკითხთა კომიტეტის აპარატის თანამშრომლებს საპარლამენტო კონტროლის თემაზე ტრენინგი ჩაუტარა. ტრენინგი, რომელსაც ჩვენი საპარლამენტო მდივანი, ლიკა საჯაია წარმართავდა, შემდეგ საკითხებს მოიცავდა: საპარლამენტო კონტროლის საკანონდებლო მექანიზმები და მათი პრაქტიკაში გამოყენება მე-8 და მე-9 მოწვევის პარლამენტების საქმიანობის ანალიზზე დაყრდნობით; საკონსტიტუციო ცვლილებები საპარლამენტო კონტროლის გაძლიერების მიმართულებით და პარლამენტის რეგლამენტში მათი ასახვა; კომიტეტების და მათი აპარატების როლი საპარლამენტო კონტროლის განხორციელების პროცესში; საზღვარგარეთის ქვეყნების საუკეთესო პრაქტიკა; სრულად... წყარო: ორგანიზაციის ვებგვერდი სოციალურ ქსელში

გურია. 24 მაისს, „ახალგაზრდა პედაგოგთა კავშირთან” არსებული ბავშვთა, თეატრალურმა სტუდიამ, ჩოხატაურის კინოს სახლში გამართა ინტერაქტიული სპექტაკლის „ამიტომ არ მჯერა თქვენი” ჩვენება. „სპექტაკლი მოგვითხრობს ოჯახში ძალადობის მსხვერპლი ბავშვის ისტორიას, რომელიც სახელმწიფო ზრუნვაშია გადაყვანილი. იმ დამოკიდებულებების შესახებ, რასაც საზოგადოება, სკოლა თუ ჩვენს ირგვლივ მყოფი სხვა აქტორები გამოავლენენ მსგავსი პრობლემების მქონე მოზარდების მიმართ. სპექტაკლის დასრულების შემდგომ საინტერესო დისკუსია გაიმართა”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

სამცხე-ჯავახეთი. ბიომრავალფეროვნების საერთაშორისო დღესთან დაკავშირებით, დემოკრატიული ჩართულობის მხარდაჭერის და ტოლერანტობის სამოქალაქო ცნობიერებისა და ინტეგრაციის მხარდაჭერის პროგრამა PITA-ს ფარგლებში, ბორჯომ-ხარაგაულის ეროვნული პარკის, ქვაბისხევის მონაკვეთზე, შემეცნებითი ტური გაიმართა. შემეცნებითი ტური სხვადასხვა ეტაპისგან შედგებოდა და საგანმანათლებლო ნაწილის გარდა მოიცავდა, ტურს ეროვნული პარკის ტერიტორიაზე და პრაქტიკულ სამუშაოებს. სრულად... წყარო: ორგანიზაციის ვებგვერდის სოციალურ ქსელში

ქვემო ქართლი. მცირე და საშუალო ბიზნესის წარმომადგენლებისა და ამ მიმართულებებით დაინტერესებული მხარეებისათვის 25 მაისს მარნეულში საინფორმაციო კამპანია იმართება. არასამთავრობო ორგანიზაცია „ირის ჯგუფი" და „ეკონომიკური პოლიტიკის კვლევის ცენტრის" წარმომადგენლები, საინფორმაციო ტურის ფარგლებში, მარნეულში ევროკავშირის ლურჯი ავტობუსებით ჩავლენ და მცირე და საშუალო ბიზნესში ჩართულ მეწარმეებს, ფერმერებს, მუნიციპალუტეტის დაინტერესებულ მცხოვრებლებს, ბიზნესიდეების განვითარების, სამეწარმეო საქმიანობის პოტენციალისა და ახალი შესაძლებლობების შესახებ, ინფორმაციას მიაწვდიან. სრულად წყარო: http://irisgroup.org.ge

თბილისი. მედიის განვითარების ფონდი (MDF), ილიაუნი და მასწავლებელთა პროფესიული განვითარების ცენტრი მედიაწიგნიერების სასკოლო პროგრამის შემუშავებას გეგმავენ. შესაბამისი მემორანდუმი მხარეებს შორის დღეს გაფორმდა. თანამშრომლობის ფორმატში გათვალისწინებულია, სკოლებში მედიაწიგნიერების სასწავლო კურსის დანერგვის მიზნით, სილაბუსის შემუშავება, რომელიც სასკოლო სივრცეში მედია შინაარსის კრიტიკულ გააზრებას და ინფორმაციული უსაფრთხოების უნარების განვითარებას ისახავს მიზნად. მედიაწიგნიერების კურსის და სასწავლო რესურსების მომზადების შემდეგ, მასწავლებელთა პროფესიული განვითარების ეროვნული ცენტრთან პარტნიორობით, დაგეგმილია მედიის განვითარების ფონდის მიერ პედაგოგთა გადამზადება და ილიას სახელმწიფო უნივერსიტეტში მასწავლებელთა მომზადების საგანმანათლებლო პროგრამაში ახალი საგნის ინტეგრირება. პროექტი "სკოლებში მედიაწიგნიერებისა და კრიტიკული აზროვნების ხელშეწყობა” საქართველოში ნიდერლანდების საელჩოს მხარდაჭერით ხორციელდება. სრულად წყარო: ორგანიზაციის ვებგვერდი

თბილისი. 21 მაისს, თბილისში, მრავალფუნქციურ სივრცეში „ფაბრიკა" კულტურულ-საგანმანათლებლო გამოფენა „ერთიანობა მრავალფეროვნებაში" გაიმართა.  „პროექტის მონაწილე სტუდენტებმა ევროკავშირის 28 წევრი ქვეყნისა და საქართველოს სტენდები მოაწყვეს, სადაც ქვეყნების ტრადიციული კერძები, სამოსი და სუვენირები წარმოადგინეს. ღონისძიება ევროპის დღეები 2018-ის ფარგლებში გაიმართა და მისი მიზანი ევროკავშირის წევრი ქვეყნების მრავალფეროვნებისა და კულტურული ღირებულებების წარმოჩენა იყო", ნათქვამია ორგანიზაციის ვებგვერდზე სოციალურ ქსელში. სრულად...  წყარო: ორგანიზაციის ვებგვერდი სოციალურ ქსელში

იმერეთი. აკაკი წერეთლის სახელობის სახელმწიფო უნივერსიტეტში არასამთავრობო ორგანიზაციამ „განათლების განვითარების და დასაქმების ცენტრი" „ჰელფინგ ჰენდთან" და ქუთაისის აკაკი წერეთლის სახელმწიფო უნივერსიტეტთან თანამშრომლობით მოხალისეობის გამოფენა გამართა. ღონისძიების მიზანია მოხალისეობის, როგორც დემოკრატიული საზოგადოების განვითარების ერთ-ერთი მძლავრი იარაღის, კულტურის პოპულარიზაცია. ყოველწლიური გამოფენა ხელს უწყობს ახალგაზრდებისა და მოქალაქეების მოხალისეობრივ პროგრამებში ჩართულობას. სრულად... წყარო: ორგანიზაციის ვებგვერდი სოციალურ ქსელში

გურია. 21 მაისს, ახალგაზრდული პროგრამების თანატოლგანმანათლებლებმა ლიკა ღლონტმა და ნუკა ქინქლაძემ ტრენინგი: „ეფექტური საქმიანი ურთიერთობები” ჩაატარეს. „ტრენინგი მოიცავდა თემებს რეალობის აღქმის სუბიექტურობასა და კომუნიკაციის დონეებზე. ახალგაზრდებმა პრაქტიკული სავარჯიშოების გზით თანატოლებს საკითხის სიღრმისეული შესწავლის შესაძლებლობა მისცეს”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

სამცხე-ჯავახეთი. ახალქალაქის ახალგაზრდულ ცენტრში გაიმართა Pita-ს წარმომადგენელთა შეხვედრა ახალგაზრდებთან და erasmus plus-ის პრეზენტაცია.  ღონისძიება დაიგეგმა ტოლერანტობის სამოქალაქო ცნობიერებისა და ინტეგრაციის, მხარდაჭერის პროგრამა PITA-ს ფარგლებში, რომელსაც ახორციელებს საქართველოს გაეროს ასოციაცია, აშშ-ს საერთაშორისო განვითარების სააგენტოს (USAID) ფინანსური მხარდაჭერით. სრულად... წყარო: ორგანიზაციის ვებგვერდი სოციალურ ქსელში

თბილისი. ორგანიზაციამ „პარტნიორობა ადამიანის უფლებებისთვის" (PHR) ქუჩაში მომუშავე და მცხოვრები ბავშვებისთვის ტრენინგი ჩაატარა. PHR-ის იურისტმა ტრენინგზე ისაუბრა, თუ რა სამართლებრივი რეგულაციები და მექანიზმები არსებობს ქუჩაში მცხოვრები და მომუშავე ბავშვებისთვის. ყურადღება გაამახვილა ისეთ მწვავე პრობლემაზე, როგორიცაა ტრეფიკინგის საფრთხე ბავშვებში, იძულებითი შრობა და მათი სხვა ანტისაზოგადოებრივ საქმიანობაში ჩაბმა. ასევე, ისაუბრა იმ ხარვეზებზე, რომლებსაც არსებული რეგულაციების აღსრულების პროცესში აწყდება სახელმწიფო. ტრენინგის დასკვნით ნაწილში, იურისტმა აუდიტორიის კითხვებს უპასუხა. სრულად... წყარო: phrgeorgia.wordpress.com

არასამთავრობო ორგანიზაცია „მწვანე კავკასია" აქვეყნებს სიუჟეტს უცხოელი სტუდენტებზე, რომლებიც თბილისის სახელმწიფო სამედიცინო უნივერსიტეტში სწავლობენ. უცხოელი სტუდენტები საუბრობენ მათ გამოცდილებაზე, მოსახლეობის დამოკიდებულებებზე. სიუჟეტში აღნიშნულია, რომ ჯამში 10300 უცხოელი სტუდენტი სწავლობს მსოფლიოს 59 ქვეყნიდან და მათი წლიური დანახარჯი 195 მილიონი ლარია. სრულად... წყარო: ორგანიზაციის ვებგვერდი სოციალურ ქსელში

თბილისი. 19 მაისს, ილიას სახელმწიფო უნივერსიტეტის სოციალური მუშაობის მიმართულების სტუდენტებს ჩაუტარდათ ტრენინგი თემაზე „სოციალური მუშაობის ფემინისტური პერსპექტივა". ტრენინგს უძღვებოდნენ სოციალური მუშაობის დოქტორანტი თეონა გოცირიძე და ამავე მიმართულების მაგისტრი, ქეთი ლეკიშვილი. ტრენინგი ჩატარდა პროექტის „ფემინისტური ხედვის გაძლიერება სოციალური მუშაობის პრაქტიკაში" ფარგლებში, რომელსაც ახორციელებს ორგანიზაცია „ინიციატივა სოციალური ცვლილებებისთვის" (ISC), „ქალთა ფონდი საქართველოში" (WFG) მხარდაჭერით. სრულად... წყარო: ორგანიზაციის ვებგვერდი სოციალურ ქსელში

გერმანიის საელჩო საქართველოში აქვეყნებ ჰუმბოლდტის ფონდის შესახებ ინფორმაციას. ჰუმბოლდტის ფონდი მხარს უჭერს თანამშრომლობას საუკეთესო უცხოელ და გერმანელ მკვლევარებს შორის და ყოველ წელს გასცემს 700-ზე მეტ სტიპენდიასა და პრიზს. რომელთა საშუალებითაც უცხოელი მეცნიერები გერმანიაში ჩადიან და ანხორციელებენ თავად შერჩეულ საკვლევ პროექტებს თავიანთ მასპინძელ კოოპერაციის პარტნიორებთან ერთად, ან პირიქით. ჰუმბოლდტის ფონდის ქსელში უკვე გაერთიანებულია ყველა მიმართულების 28 ათასზე მეტი ყოფილი სტიპენდიატი დაახლოებით 140 ქვეყნიდან. მათ შორის არის 55 ნობელის პრემიის ლაურეატიც. მთლიანობაში ჰუმბოლდტის ფონდს ქართველი მეცნიერებისათვის აქამდე უკვე 42 სტიპენდია აქვს გამოყოფილი. სრულად ჰუმბოლდტის ფონდისა და სტიპენდიების შესახებ ... წყარო: გერმანიის საელჩო საქართველოში

ოზურგეთი. 16 მაისს, პოეტმა, რატი ამაღლობელმა „ახალგაზრდა პედაგოგთა კავშირის" ახალგაზრდული პროგრამების ფარგლებში საჯარო ლექცია: „ლიტერატურა თანამედროვე საზოგადოებაში" ჩაატარა. პოეტმა ისაუბრა ლიტერატურის მნიშვნელობაზე თანამედროვე ადამიანის პიროვნების ფორმირების პროცესში: როგორ, რა გზებით შეიძლება ადამიანი „წავართვათ" თანამედროვე ტექნოლოგიებს და წიგნს დავუბრუნოთ. სრულად... წყარო: ორგანიზაციის ვებგვერდი სოციალურ ქსელში

სამეგრელო. 15 მაისს, ასოციაცია „ათინათის" ახალგაზრდული ცენტრის წევრების ორგანიზებით და მონაწილეობით ჩატარდა კონფერენცია თემაზე „კულტურა და მრავალფეროვნება". „ღონისძიების მიზანია ახალგაზრდებმა გაიაზრონ კულტურათა დიალოგის მნიშვნელობა კულტურული მრავალფეროვნების კონტექსტში, განსხვავებული ეთნიკური ჯგუფების კულტურული მრავალფეროვნებისა და ადგილობრივი ტრადიციების პოპულარიზაცია", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

ევროკავშირის მხარდაჭერით და ხორვატიის სოფლის განვითარების ქსელის (HMRR) ორგანიზებით ხულოს ადგილობრივი განვითარების ჯგუფის (LAG) წევრები სასწავლო ვიზიტით ხორვატიაში იმყოფებოდნენ. ერთი კვირის განავლობაში დელეგაციამ გამართა შეხვედრები ლიკასა და დალმაციის რეგიონში არსებულ LAG-ების წარმომადგენლებთან და ადგილზე მოინახულა განხორციელებული პროექტები. ვიზიტის მიზანი იყო სოფლის განვითარების ევროპული მოდელის – LEADER მიდგომის გამოცდილების გაზიარება, ხორვატული LAG-ების მუშაობის პრინციპების გაცნობა და წარმატებული პროექტების შესახებ ინფორმაციის გაზიარება. სრულად  წყარო: ორგანიზაციის ვებგვერდი

აჭარა. ევროკავშირის მხარდაჭერით, დაბა ქედაში, ქედის ადგილობრივი განვითარების ჯგუფის მმართველი საბჭოს წევრებისთვის ჩატარდა სასწავლო კურსი „ორგანიზაციული მართვა". სწავლება მიზნად ისახავს ადგილობრივი განვითარების ჯგუფის მმართველი საბჭოს წევრებში ორგანიზაციული მართვის ცოდნის/უნარ-ჩვევების განვითარებას და შექმნილია ზრდასრულთა განათლების მეთოდების გამოყენებით, რაც მონაწილეთა მაქსიმალურ მონაწილეობას განაპირობებს. კურსი ევროკავშირის ENPARD-ის პროექტის - „ადგილობრივი რესურსებისა და პოტენციალის ოპტიმალური გამოყენება სოფლის განვითარებისათვის (ქედა ლიდერი)" - ფარგლებში, საქართველოს სტრატეგიული კვლევებისა და განვითარების ცენტრის, პროექტის განმახორციელებლის – CENN-ის პარტნიორი ორგანიზაციის მიერ იყო ორგანიზებული. სრულად  წყარო: ორგანიზაციის ვებგვერდი

თბილისი. ევროკავშირისა და ფონდ „ღია საზოგადოება - საქართველოს" მხარდაჭერით, ორი წლის განმავლობაში, საქართველოს რეგიონებში მიმდინარეობდა პროექტი, რომელიც მიზნად ბავშვთა უფლებების დაცვისთვის ადგილობრივი შესაძლებლობების გაძლიერებას ისახავდა. „დღეს, ეთნიკური უმცირესობების წარმომადგენელი მოსწავლეები და მათი ქართულენოვანი თანატოლები ვერ სარგებლობენ ხარისხიან განათლებაზე თანაბარი ხელმისაწვდომობით. საქართველოს სტატისტიკის ეროვნული სამსახურის მონაცემებით 2015-2016 სასწავლო წლის დასაწყისისათვის 12441 მოსწავლემ მიატოვა სწავლა. განსაკუთრებით მაღალია სწავლის მიტოვების მაჩვენებელი უმცირესობებით კომპაქტურად დასახლებულ ქვემო ქართლსა და სამცხე-ჯავახეთში. ხშირია სწავლის მიტოვება მუშაობის დაწყების მიზეზით. მაღალ კლასებში რიცხული გოგონები სწავლას თავს ანებებენ გათხოვების შემდეგ. კვლევებით დასტურდება, რომ სკოლის მიტოვების პრობლემა შეიძლება თაობებზე ვრცელდებოდეს”, - ნათქვამია ფონდ „ღია საზოგადოება - საქართველოს" მიერ გავრცელებულ ინფორმაციაში. რეგიონებში პროექტს ახორციელებდნენ: სამოქალაქო განვითარების ინსიტუტი, საზოგადოება „ბილიკი", რეგიონული ასოციაცია „ტოლერანტი" და მარნეულის ახალგაზრდული ცენტრი. სრულად  წყარო: ორგანიზაციის ვებგვერდი

თბილისი. 14 მაისს, „საქართველოს სოციალური მუშაკთა ასოციაციამ" სოციალური მომსახურების სააგენტოს თბილისის სოციალური მუშაკებისთვის ტრენინგი ჩაატარა, რომლის თემაც „ემოციების მართვის სირთულეების მქონე პირებთან მუშაობა" იყო. „ტრენინგი მოიცავს ემოციების მართვის სირთულეების მქონე პირებთან და ოჯახებთან მუშაობის პრაქტიკულ და თეორიულ სწავლებას. ძირითადი ნაწილი ეთმობა, ემოციების იდენტიფიცირებას, სტრესს და მასთან გამკლავების გზებს, ასევე, ბრაზს და ბრაზის მართვის ტექნიკებს. სწავლება მიმდინაროებს მინი-ლექციების, შემთხვევების განხილვის, ჯგუფური და ინდივიდუალური მუშაობის მეთოდების გამოყენებით.  ტრენინგი 2 ეტაპად ტარდება (14-15 მაისი და 16-17 მაისი) და მასში მონაწილეობას სულ 30 სოციალური მუშაკი მიიღებს”, ნათქვამია ასოციაციის ვებგვერდზე სოციალურ ქსელში. სრულად... წყარო: ასოციაციის ვებგვერდი სოციალურ ქსელში

თბილისი. გერმანიის პარლამენტი ბერლინის უნივერსიტეტებთან ერთად ყოველ წელს თავისი პროგრამის „საერთაშორისო საპარლამენტო სტიპენდია" (IPS) ფარგლებში პოლიტიკურად დაინტერესებულ ახალგაზრდებს 42 ქვეყნიდან აძლევს უნიკალურ შანსს, უშუალოდ გაეცნონ პოლიტიკური გადაწყვეტილებების მიღების პროცესებს. პროგრამა გათვლილია დასრულებული საუნივერსიტეტო განათლების მქონე, პოლიტიკურად დაინტერესებული, ოცდაათ წლამდე ასაკის ახალგაზრდებზე, რომლებსაც თავიანთ სამშობლოში დემოკრატიული ღირებულებებისათვის აქტიურად საქმიანობა სურთ. პროგრამა გრძელდება 2019 წლის პირველი მარტიდან 31 ივლისამდე. სრულად... წყარო: tiflis.diplo.de

თბილისი. 10-11 მაისს, „ევროპის დღეები 2018"-ის ფარგლებში, საინფორმაციო ცენტრი ნატოსა და ევროკავშირის შესახებ თბილისისა და რეგიონალური უნივერსიტეტების 40-მდე სტუდენტს მასპინძლობს. „ორი დღის განმავლობაში სტუდენტები მიიღებენ ინფორმაციას ისეთ საკითხებზე, როგორიცაა: ანტიდასავლური პროპაგანდა და საინფორმაციო ომი, საქართველოს მონაწილეობა ევროკავშირის მისიებში, ასოცირების შესახებ შეთანხმება, უვიზო მიმოსვლა, DCFTA და სოფლის მეურნეობის განვითარება, რელიგიური მრავალფეროვნება ევროკავშირში, ევროინტეგრაციის მნიშვნელობა და სხვა”, ნათქვამია ცენტრის ვებგვერდზე სოციალურ ქსელში. სრულად... წყარო: ცენტრის ვებგვერდი სოციალურ ქსელში

სამცხე-ჯავახეთი. პროექტის - „ეთნიკური უმცირესობების საზოგადოებრივი ორგანიზაციებისა და სამოქალაქო აქტივისტების შესაძლებლობების გაძლიერება" - ფარგლებში, ბორჯომში ტრენინგი მიმდინარეობს. 22 სამოქალაქო აქტივისტი თბილისიდან და საქართველოს ეთნიკური უმცირესობებით დასახლებული რეგიონებიდან, ადგილობრივ და ცენტრალურ ხელისუფლებასთან, მედიასთან, ადგილობრივ თემთან, დონორ ორგანიზაციებსა და სხვა მხარეებთან ერთად, ეფექტური კომუნიკაციის ტრენინგს გაივლის. ტრენინგი მათ შესაძლებლობას მისცემს განავითარონ უნარ-ჩვევები, რომელიც მხარესთან მიზანზე ორიენტირებული და კონკრეტულ საჭიროებებზე მორგებული კომუნიკაციის წარმოებაში დაეხმარება. სრულად  წყარო: ორგანიზაციის ვებგვერდი