თბილისი. 13 ნოემბერს, თბილისში იურიდიული დახმარების შესახებ მესამე საერთაშორისო კონფერენცია გაიხსნება. „ორი დღის მანძილზე საქართველო 60 ქვეყნიდან 300-ზე მეტ სტუმარს უმასპინძლებს. კონფერენციის მონაწილეები განიხილავენ იმ შესაძლებლობებს და ღონისძიებებს, რაც ხელს შეუწყობს იურიდიული დახმარების ეფექტური და ინსტიტუციურად გამართული სისტემების შექმნას. ეს უმნიშვნელოვანესია ჩვენი ქვეყნის მოქალაქეებისთვის, განსაკუთრებით მათთვის, ვისაც სოციალური მდგომარეობის თუ სხვა ბარიერის გამო, ხშირად ხელი არ მიუწვდება კვალიფიციურ იურიდიულ დახმარებაზე, მათ შორის სასამართლოში წარმომადგენლობაზე ადვოკატის მეშვეობით. კონფერენციის ერთერთი მხარდამჭერი ღია საზოგადოების ფონდია - „ჯერ კიდევ 2000-იანი წლების დასაწყისში დავიწყეთ აქტიური მუშაობა დამოუკიდებელი და კვალიფიციური იურიდიული დახმარების სამსახურის შექმნაზე. ამ პროცესში საქართველომ შეძლო საინტერესო მოდელის შემუშავება, რაც გულისხმობს სრულიად დამოუკიდებელ და პარლამენტის წინაშე ანგარიშვალდებული სამსახურის არსებობას." სრულად... წყარო: ღია საზოგადოების ფონდის ვებგვერდი სოციალურ ქსელში

თბილისი. საქართველოს დემოკრატიული ინიციატივა (GDI) აქვეყნებს ბლოგპოსტს: „საერთო სასამართლოებში საქმეთა განაწილების ახალი სისტემის სამართლებრივი და ტექნიკური ანალიზი." „აღნიშნული ცვლილება მართლმსაჯულების დამოუკიდებლობის გაუმჯობესებისკენ წინგადადგმული ნაბიჯია, რომელმაც სასამართლოებში მოსამართლეებზე საქმეთა განაწილების პროცესში არსებულ მრავალ გამოწვევას, მათ შორის მოსამართლეთა მიუკერძოებლობას და მათი თანაბარი დატვირთვის უზრუნველყოფას უნდა უპასუხოს. ახალი რეგულაციის ამოქმედება განსაკუთრებით მნიშვნელოვანია საქმეთა განაწილების პროცესში თავმჯდომარის როლის შემცირების თვალსაზრისით, რამდენადაც სასამართლოს თავმჯდომარეების უფლებამოსილება, გაანაწილონ საქმეები მოსამართლეთა შორის, ვენეციის კომისიის მოსაზრებით, დისკრეციის ელემენტებს გულისხმობდა, რაც შეიძლება ბოროტად ყოფილიყო გამოყენებული, როგორც მოსამართლეზე ზემოქმედების საშუალება," ნათქვამია ორგანიზაციის ვებგვერდზე. სრულად... წყარო: gdi.ge

თბილისი. „საერთაშორისო გამჭვირვალობა - საქართველო" (TI) „შრომის უსაფრთხოების შესახებ" ორგანულ კანონში შესატან ცვლილებებს მიმოიხილავს. დოკუმენტში, რომელიც ორგანიზაციის ვებგვერდზეა გამოქვეყნებული, ვკითხულობთ: „საქართველოს პარლამენტი პირველი მოსმენით განიხილავს ცვლილებებს საქართველოს „შრომის უსაფრთხოების შესახებ" ორგანულ კანონში. საკანონმდებლო ინიციატივის მიხედვით, 2019 წლის 1 სექტემბრიდან შრომის უსაფრთხოების შესახებ საქართველო კანონი - არა მხოლოდ საფრთხის შემცველ, მძიმე, მავნე და საშიშპირობებიან სამუშაოებზე, არამედ ეკონომიკური საქმიანობის ყველა დარგზე გავრცელდება". სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აცხადებს, რომ საქართველოს პროკურატურა არ ასაჯაროებს ინფორმაციას, სისტემაში მიმდინარე რეორგანიზაციის შესახებ. „EMC-იმ, პროცესის მონიტორინგის მიზნით, მიმდინარე წლის 12 სექტემბერს, განცხადებით მიმართა საქართველოს პროკურატურას და გამოითხოვა რეორგანიზაციასთან დაკავშირებული დეტალური ინფორმაცია... უწყებამ, კანონმდებლობით დადგენილ ვადაში, არ მოგვაწოდა აღნიშნული ინფორმაცია. EMC-იმ, მიმდინარე წლის 11 ოქტომბერს, განმეორებით მიმართა საქართველოს პროკურატურას გამოთხოვილი ინფორმაციის შემჭიდროვებულ ვადაში მოწოდების შესახებ. თუმცა, რეორგანიზაციის პროცესთან დაკავშირებულ ინფორმაციას პროკურატურა ამ დრომდე არ ასაჯაროებს", - აღნიშნულია EMC-ის მიერ გავრცელებულ ინფორმაციაში, - „დახურულ კარს მიღმა მასშტაბური საკადრო და სტრუქტურული ცვლილებების განხორცილება აზიანებს რეორგანიზაციის პროცესის სანდოობას როგორც სისტემის შიგნით, ასევე გარეთ. EMC მოუწოდებს საქართველოს მთავარ პროკურორს, უზრუნველყოს პროცესის გამჭვირვალედ წარმართვა და დაინტერესებული ჯგუფებისთვის ხელმისაწვდომი გახადოს რეორგანიზაციის პროცესთან დაკავშირებული ინფორმაცია". სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია აქვეყნებს ასოციაციის წევრის, იურისტ ნიკა სიმონიშვილის პოსტს, რომელიც საპრეზიდენტო არჩევნების შედეგებისა და მარიხუანას კულტივაციის კანონპროექტის შესაძლო კავშირს აანალიზებს. „აქ არ ვისაუბრებ, ვის რა სარგებელს მოუტანს ან მოუტანდა ეს კანონპროექტი, ეს საკითხი ამჯერად ნაკლებად საინტერესოა და სხვა დროს ვიმსჯელოთ, საინტერესოა ის, მართლა ამ რეგულაციებმა განაპირობა თუ არა არჩევნების შედეგები", - სვამს კითხვას ავტორი, - „წარმოების ყველა პროცესი დახურულად მიმდინარეობს, პროდუქტი საქართველოში არ იყიდება, ხოლო კანაფის ის ჯიში, რომლისგანაც პროდუქცია მზადდება, პირადი მოხმარებისთვის საერთოდ არაა გამოსადეგი. ამ მსჯელობით, გასაგებია, რომ კანაფის კულტივაციით, ქვეყანას ზიანი არ ადგება, მაგრამ რატომ გაუძნელდა ხელისუფლებას ის, რომ ამ საკითხით აღშფოთებული მოსახლეობისთვის აეხსნა კანონპროექტის შინაარსი, ან რატომ მიიღო გადაწყვეტილება დახურულ კარს მიღმა და ზუსტი მიზეზები კანონპროექტის გახმობისას არ დაუსახელებია?" სრულად  წყარო: ორგანიზაციის ვებგვერდი

თბილისი. საზოგადოებრივი ორგანიზაციები ავრცელებენ მორიგ განცხადებას, საქართველოს პარლამენტის თავმჯდომარის მიერ გაკეთებულ განცხადებასთან დაკავშირებით. „2018 წლის 2 ნოემბერს, საქართველოს პატრიარქთან გამართული შეხვედრის შემდეგ, მმართველმა გუნდმა გაასაჯაროვა გადაწყვეტილება კანაფის კულტივაციასთან დაკავშირებული კანონპროექტის პარლამენტიდან გაწვევის შესახებ. ირაკლი კობახიძის განცხადებით, ასევე პრინციპული გადაწყვეტილებაა მიღებული, რომ განხორციელდეს ცვლილებები, რომელიც ჩარჩოში მოაქცევს საკონსტიტუციო სასამართლოს გადაწყვეტილების მიღებას ნარკოტიკული პოლიტიკის სფეროში”, - ვკითხულობთ განცხადებაში, - „პარლამენტის თავმჯდომარის განცხადება საკონსტიტუციო სასამართლოს შესახებ ქვეყანაში კონსტიტუციური წესრიგისთვის დამაზიანებელია". სრულად  წყარო: emc.org.ge

თბილისი. „საერთაშორისო გამჭვირვალობა - საქართველო" (TI) 30 ოქტომბერს ახალქალაქში მომხდარი ფაქტს ეხმაურება. „ვეხმაურებით „ერთიანი ნაციონალური მოძრაობის” რამდენიმე წარმომადგენლის ცემის ფაქტს, რომელსაც, როგორც დაზარალებულები აცხადებენ, საქართველოს პარლამენტის წევრი ენზელ მკოიანი ხელმძღვანელობდა", - ვკითხულობთ TI-ის განცხადებაში, - „საპრეზიდენტო არჩევნების მეორე ტურის წინ მომხდარმა მსგავსმა ინციდენტებმა შეიძლება მნიშვნელოვნად დააზიანოს საარჩევნო გარემო და გაზარდოს პოლიტიკური პროცესების პოლარიზება. აქედან გამომდინარე, აუცილებლია, ეს შემთხვევა რაც შეიძლება სწრაფად იქნეს სამართალდამცველი ორგანოების მიერ გამოძიებული". სრულად  წყარო: ორგანიზაციის ვებგვერდი

თბილისი. წინა ხელისუფლების დროს ჩამორთმეული ყველაზე დიდი ბიზნესი, რომელსაც მოქმედი ხელისუფლება არ აბრუნებს, - ამის შესახებ დღეს გამართულ პრეს-კონფერენციაზე ისაუბრეს. პრეს-კონფერენცია, საქართველოს ახალგაზრდა იურისტთა ასოციაციის თავმჯდომარე სულხან სალაძემ, იურისტებმა - კახა კოჟორიძემ და მაია მწარიაშვილმა, საავიაციო ქარხანაში გამართეს. „თბილისის საავიაციო ქარხნის საქმე არის ნათელი მაგალითი იმისა ხდება თუ არა სამართლიანობის აღდგენა. 6 წელია მოქმედი ხელისუფლება აგრძელებს წინა ხელისუფლების მიერ უკანონო, ძალადობრივი გზებით წართმეული ქონების შენარჩუნებისთვის ბრძოლას. სამართლიანობის აღდგენის ნაცვლად, ხდება უსამართლობის დაკანონება. ხელისუფლების სხვადასხვა ორგანო - სასამართლო, პროკურატურა, ეკონომიკის სამინისტრო მოქმედებენ ორკესტრირებულად იმ მიზნით, რომ წართმეული ქონება მათ კანონიერ მესაკუთრეებს არ დაუბრუნდეთ", - ითქვა პრეს-კონფერენციაზე. სრულად  წყარო: https://gyla.ge

თბილისი. „ადამიანის უფლებების სწავლებისა და მონიტორინგის ცენტრის" (EMC) განცხადებით, საქართველოს პარლამენტის იურიდიულმა კომიტეტმა, პროკურატურის რეფორმის შესახებ უმნიშვნელოვანესი ცვლილებები, სხდომის შესახებ ინფორმაციის წინასწარი გამოქვეყნების გარეშე, განიხილა. „იურიდიული კომიტეტის სხდომის შესახებ ინფორმაცია პარლამენტის ვებ-გვერდზე გამოქვეყნებული არ ყოფილა. შესაბამისად, დაინტერესებულ ჯგუფებს არ მიეცათ შესაძლებლობა დასწრებოდნენ კანონპროექტის განხილვას და მონაწილეობა მიეღოთ დისკუსიაში", - აღნიშნულია EMC-ის მიერ გავრცელებულ ინფორმაციაში, - „იმ პირობებში, როცა პროკურატურის სისტემის დამოუკიდებლობის და მიუკერძოებლობის მიმართ არაერთი ლეგიტიმური კითხვა არსებობს და ინიცირებული კანონპროექტის მიმართაც ბევრი შენიშვნაა გამოთქმული, საზოგადოებრივი ჯგუფების მონაწილეობის გარეშე, მეორე და ყველაზე მნიშვნელოვანი საკომიტეტო მოსმენის ჩატარება, ამ რეფორმის მიმართ ნდობას და მოლოდინებს კიდევ უფრო ამცირებს". სრულად  წყარო: ორგანიზაციის ვებგვერდი

თბილისი. დისკრიმინაციის რისკისგან დაცვის მიზნით, ორგანიზაცია "პარტნიორობა ადამიანის უფლებებისთვის" (PHR) ორგანიზებით, მოსამართლეებთან სამუშაო შეხვედრა გაიმართა. სამუშაო შეხვედრის მიზანს მოსამართლეებისთვის იმ ინფორმაციის გაზიარება წარმოადგენდა, რაც მათ ქმედუნარიანობის რეფორმის განხორციელების პროცესში დისკრიმინაციული პრაქტიკის თავიდან არიდებაში დაეხმარებათ. „სახალხო დამცველის მიერ შემუშავებული ზოგადი წინადადების მნიშვნელობიდან გამომდინარე, რომელიც PHR-ის მიმართვის საფუძველზე შემუშავდა, ორგანიზაციის წარმომადგენლებმა მიიჩნიეს, რომ ქმედუნარიანობის რეფორმის ეფექტურად განსახორციელებლად, საჭირო იყო სამუშაო შეხვედრის ჩატარება, სადაც მოსამართლეებს ექნებოდათ შესაძლებლობა, სხვადასხვა სფეროს ექსპერტებისგან მიეღოთ საჭირო ინფორმაცია", - ვკითხულობთ PHR-ის მიერ გავრცელებულ ინფორმაციაში. სრულად  წყარო: ორგანიზაციის ვებგვერდი

თბილისი. კარვების გაშლის თვითნებური და უკანონო შეზღუდვის საქმეზე მორიგი სხდომა ჩაინიშნა. „31 ოქტომბერს 10:00 საათზე თბილისის საქალაქო სასამართლოში დანიშნულია მოსარჩელეების ზაზა სარალიძის და მალხაზ მაჩალიკაშვილის სარჩელის განხილვა. მოპასუხეების საქართველოს შინაგან საქმეთა სამინისტროს და საქართველოს შინაგან საქმეთა სამინისტროს საპატრულო პოლიციის დეპარტამენტის წინააღმდეგ იმ გადაწყვეტილების (ქმედების) ბათილად ცნობის თაობაზე, რომლითაც მოსარჩელეებს შეეზღუდათ მშვიდობიანი შეკრების უფლება და არ მიეცათ კარვის განთავსების შესაძლებლობა პარლამენტის შენობის მიმდებარე ტროტუარზე", ნათქვამია ორგანიზაციის ვებგვერდზე სოციალურ ქსელში. სრულად... წყარო: gyla.ge

თბილისი. საზოგადოებრივი ორგანიზაციები ზაზა სარალიძის დაკავების ფაქტს გამოეხმაურნენ. მათი განცხადებით, ზაზა სარალიძის ქმედება შინაგან საქმეთა სამინისტრის მიერ ადამიანის უფლებების უხეში და განგრძობითი დარღვევის გამოძახილია. „ზაზა სარალიძის, მალხაზ მაჩალიკაშვილისა და მისი მხარდამჭერების მიერ საქართველოს პარლამენტის წინ მრავალდღიანი მშვიდობიანი პროტესტის დროს საქართველოს შინაგან საქმეთა სამინისტრომ არაერთხელ დაარღვია საქართველოს კონსტიტუცია და კანონი „შეკრებებისა და მანიფესტაციების" შესახებ, როცა აქციის მონაწილეებს არ მისცა მშვიდობიანი პროტესტის გამოსახატავად კარვის ან/და სხვა კონსტრუქციის მოწყობის უფლება. სწორედ საქართველოს შსს-ს წარმომადგენლების მიერ კანონის დარღვევას მოჰყვა დღეს ძალადობის ესკალაცია", - ვკითხულობთ ორგანიზაციების მიერ გავრცელებულ განცხადებაში. სრულად  წყარო: emc.org.ge

თბილისი. 25 ოქტომბერს, ადამიანის უფლებათა ცენტრმა პროექტის - „ქალების, რელიგიური და ეთნიკური უმცირესობების უფლებების დაცვის ხელშეწყობა საქართველოს რეგიონებში” - ფარგლებში მომზადებული ანგარიშის პრეზენტაცია გამართა. „ადამიანის უფლებათა ცენტრის ანგარიშში „ქალების, რელიგიური და ეთნიკური უმცირესობების მართლმსაჯულებაზე ხელმისაწვდომობა" წარმოდგენელია ორგანიზაციის წარმოებაში არსებული გენდერული ძალადობის, გენდერული ნიშნით ან/და ეთნიკური და რელიგიური ნიშნით დისკრიმინაციის საქმეები და მათი ანალიზი; საკონსტიტუციო სასამართლოსა და გაეროს ქალთა მიმართ დისკრიმინაციის ყველა ფორმის აღმოფხვრის კომიტეტში გაგზავნილი საქმეები; ასევე ანგარიშში მიმოხილულია საქმის წარმოების პროცესში იდენტიფიცირებული როგორც საკანონმდებლო ისე პროცესუალურ დონეზე არსებული ხარვეზები, რაც აფერხებს ძალადობის და დისკრიმინაციის მსხვერპლთა უფლებების ეფექტურად დაცვას. ანგარიშში წარმოდგენილია რეკომენდაციები კონკრეტული სახელმწიფო უწყებების მიმართ”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) შინაგან საქმეთა სამინისტროში მართლწესრიგის ოფიცრის ინსტიტუტის ამოქმედებას ეხმაურება. „საპოლიციო სისტემის რეფორმის ერთ-ერთ კომპონენტად შინაგან საქმეთა სამინისტრო დანაშაულის პრევენციის მოდელის ცვლილებას ასახელებს. ამ მიმართულებით, მნიშვნელოვანია შინაგან საქმეთა სამინისტროს სტრუქტურაში ახალი რგოლის - მართლწესრიგის ოფიცრის ინსტიტუტის ჩამოყალიბება, რომელმაც საზოგადოებაზე ორიენტირებული პოლიციის გაძლიერებას უნდა შეუწყოს ხელი”, - ვკითხულობთ განცხადებაში, - „რეფორმის სწორი და საფუძვლიანი განხორციელების შემთხვევაში, შესაძლებელი იქნება საპოლიციო პრაქტიკების მნიშვნელოვანი ცვლილება და პოლიციის მუშაობაში ადამიანის უფლებებზე დაფუძნებული ხედვის გაძლიერება". სრულად  წყარო: ორგანიზაციის ვებგვერდი

თბილისი. საზოგადოებრივი ორგანიზაციები გორში მშვიდობიანი აქციის მონაწილის მიმართ ჩადენილ ძალადობრივ ქმედებაზე ადეკვატურ რეაგირებას ითხოვენ. „ჩვენ, განცხადებაზე ხელმომწერი არასამთავრობო ორგანიზაციები ვეხმაურებით გორის მერიის იურიდიული სამსახურის უფროსის, თეიმურაზ მანველიშვილის მხრიდან დამოუკიდებელი აქტივისტის, გიგა მაქარაშვილის მიმართ განხორციელებულ შეურაცხმყოფელ და დამამცირებელ მოპყრობას და მოვუწოდებთ საქართველოს შინაგან საქმეთა სამინისტროს საქმე დროულად და ეფექტურად გამოიძიოს", - აცხადებენ საზოგადოებრივი ორგანიზაციები. სრულად  წყარო: www.transparency.ge

თბილისი. საკონსტიტუციო სასამართლომ გამოაცხადა გადაწყვეტილება ადმინისტრაციულ სამართალდარღვევათა კოდექსის არაკონსტიტუციური გამოყენების შესაცვლელად, საიას მიერ წარდგენილ ერთ-ერთ საქმეზე და სააპელაციო წესით გასაჩივრების შეზღუდვის რიგი შემთხვევებისა არაკონსტიტუციურად სცნო. როგორც, ამ საკითხთან დაკავშირებით, საია-ს მიერ გავრცელებულ ინფორმაციაში ვკითხულობთ, - „საია მიესალმება საკონსტიტუციო სასამართლოს გადაწყვეტილებას. საიას პროგრესულ ნაბიჯად მიაჩნია მძიმე სამართალდარღვევების ცალკე გამოყოფა და მოუწოდებს პარლამენტს სათანადო საპროცესო დაცვის გარანტიები გაითვალისწინოს მძიმე სამართალდარღვევისათვის და გაატაროს მრავალჯერ გადადებული ადმინისტრაციულ სამართალდარღვევათა კანონმდებლობის რეფორმა". სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრმა" (EMC), „კანაფის ლეგალიზაციის ფესტივალის" დაწყებამდე, გააკეთა განმარტებები, მცენარე კანაფისა და მარიხუანას რეგულირების სამართლებრივი რეჟიმის თაობაზე. „ღონისძიების აღწერაში დაზუსტებული არ არის კონკრეტულად რა აქტივობები იგეგმება ფესტივალის ფარგლებში. ამავე აღწერაში, სამწუხაროდ, დეტალურად და ზუსტად ასევე არ არის გადმოცემული მცენარე კანაფთან და მარიხუანასთან დაკავშირებული საკანონმდებლო რეგულაციები, რომელიც ბოლო წლების მნიშვნელოვანი ცვლილებების მიუხედავად, კვლავ საკმაოდ ხისტი რჩება. სათანადო ინფორმაციის არქონამ, შეიძლება ფესტივალზე მისულ ადამიანებს გაუთვალისწინებელი სამართლებრივი პრობლემები შეუქმნას", - აღნიშნულია განცხადებაში. სრულად  წყარო: ორგანიზაციის ვებგვერდი

ქვემო ქართლი. „კონსტიტუციის 42-ე მუხლის" იურისტებმა რუსთავის მუნიციპალიტეტის მერიისა და საკრებულოს თანამშრომლებთან შეხვერდა გამართეს. შეხვედრის მთავარი მიზანი იყო სამუშაო ადგილზე შევიწროების საკითხების განხილვა და ბოლო კვლევების მონაცემების გაცნობა; მუნიციპალიტეტის თანამშრომლებისთვის ინფორმაციის მიწოდება იმის თაობაზე, თუ როგორ არეგულირებს სამუშაო ადგილზე შევიწროების/სექსუალური შევიწროებას ქართული და ევროპული კანონები. სრულად  წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია იუსტიციის უმაღლესი საბჭოს წევრის გასაუბრებაზე აცილების არსებულ მოდელს არაკონსტიტუციურად მიიჩნევს და, ანა დოლიძის სახელით, საკონსტიტუციო სასამართლოს კონსტიტუციური სარჩელით მიმართავს. საია-ს მიერ გავრცელებული ინფორმაციის მიხედვით, ამ დავის საგანია „საერთო სასამართლოების შესახებ" ორგანული კანონის ის ნორმები, რაც მოსამართლეობის კანდიდატს არაობიექტურობისა და მიკერძოების გამო აძლევს უმაღლესი საბჭოს წევრის აცილების უფლებას. სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" (EMC) დაღუპული სამხედრო მოსამსახურის, სერგო ჯიმშერაშვილის საქმეზე მიმდინარე გამოძიებას ეხმაურება. EMC მოუწოდებს ქვემო ქართლის საოლქო პროკურატურას: „მიანიჭოს სერგო ჯიმშერაშვილის ოჯახის ერთ-ერთ წევრს დაზარალებულის სტატუსი; გამოძიება წარიმართოს ყოველმხრივ, სრულად და ობიექტურად, გარდაბნის რაიონული სამმართველოს ვაზიანის განყოფილების პოლიციის თანამშრომელთა, ასევე მათი ხელმძღვანელი პირების შესაძლო პასუხისმგებლობის სრულყოფილად გამოკვლევის მიზნით. საკმარისი მტკიცებულებების არსებობის შემთხვევაში, შინაგან საქმეთა სამინისტროს შესაბამის მოსამსახურეთა მიმართ დაიწყოს სისხლისსამართლებრივი დევნა; გამოძიებამ სრულყოფილად შეისწავლოს სერგო ჯიმშერაშვილის ჯანმრთელობის დაზიანების საქმეზე სამხედრო პოლიციის თანამშრომელთა ქმედებების კანონიერება, ასევე დადგინდეს, სერგო ჯიმშერაშვილის ჯანმრთელობის მძიმე დაზიანების ფაქტზე გამოძიების დაგვიანებით დაწყებით დაინტერესებული ყველა შესაძლო სამოქალაქო და სამხედრო პირის ვინაობა". სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია დღეს, ზურაბ ჯაფარიძის სახელით, საკონსტიტუციო სასამართლოს მიმართავს და ადმინისტრაციულ სამართალდარღვევათა კოდექსის რვა მუხლის არაკონსტიტუციურად ცნობას მოითხოვს. საუბარია კოდექსის 32-ე, 33-ე, 233-ე, 236-ე, 237-ე, 240-ე, 264-ე, 266-ე მუხლების შესახებ. „ადმინისტრაციულ სამართალდარღვევათა კოდექსი საბჭოთა პერიოდიდან შემორჩენილი ერთადერთი ნორმატიული აქტია, რომელიც დღემდე მოქმედებს. მისი გამოყენებით ყოველდღიურად არაერთი პირის უფლებების არამართლზომიერი შეზღუდვა ხდება. საია წლების განმავლობაში აყენებს კოდექსის შეცვლის საკითხს. საკონსტიტუციო სასამართლოს მიერ სარჩელის დაკმაყოფილება დაასრულებს ადმინისტრაციულ სამართალდარღვევათა კოდექსის არაკონსტიტუციურ გამოყენებას და გამოიწვევს კანონმდებლობის სრულ რეფორმას", - მიიჩნევს საია. სრულად  წყარო: ორგანიზაციის ვებგვერდი

თბილისი. პარტნიორობა ადამიანის უფლებებისთვის (PHR) იურისტებმა ქეთევან კოპალიანმა და სოფიკო მენაბდიშვილმა ქმედუნარიანობის რეფორმის შესახებ მორიგი ტრენინგი ჩაატარეს. „ტრენინგზე PHR-ის წარმომადგენლებმა ისაუბრეს ქმედუნარიანობის რეფორმის ფუნდამენტური პრინციპების შესახებ და შეხვედრის მონაწილეებს მიაწოდეს ინფორმაცია მხარდაჭერის მიმღებისა და მხარდამჭერის კანონმდებლობით გათვალისწინებული უფლება-მოვალეობების შესახებ. ტრენინგის განმავლობაში იურისტებმა ყურადღება გაამახვილეს აღნიშნული რეფორმის გამოწვევებზე და აუდიტორიას უცხო ქვეყნების პრაქტიკა გაუზიარეს", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com