თბილისი. საქართველოს ახალგაზრდა იურისტთა ასოციაცია ვენეციის კომისიის დასკვნას ეხმაურება და აღნიშნავს, რომ კომისია ამ დოკუმენტში საქართველოს პროკურატურასა და სასამართლოში ძირეული რეფორმების საჭიროებაზე მიუთითებს. „ვენეციის კომისიის დასკვნამ კიდევ ერთელ დაადასტურა მართლმსაჯულების სისტემაში მნიშვნელოვანი რეფორმების გატარების საჭიროება, მათ შორის ისეთ საკითხებზე, რაზეც მრავალი წელია საია და სხვა საზოგადოებრივი ორგანიზაციები პასუხისმგებელ სახელმწიფო უწყებებს აქტიურად მიუთითებდნენ. ამასთან", - ვკითხულობთ ორგანიზაციის მიერ გავრცელებულ განცხადებაში, - „საია კიდევ ერთხელ გამოთქვამს მზადყოფნას, აქტიური მონაწილეობა მიიღოს მართლმსაჯულების სისტემის რეფორმაზე მუშაობის პროცესში და მოუწოდებს საქართველოს პარლამენტს და საქართველოს მთავრობას შექმნან შესაბამისი ფორმატები ვენეციის კომისიის დასკვნიდან გამომდინარე ცვლილებებზე ეფექტიანი მუშაობისთვის, ყველა დაინტერესებული პირის მონაწილეობით". სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" (EMC), იუსტიციის უმაღლეს საბჭოსა და საპროკურორო საბჭოსთან დაკავშირებით, ვენეციის კომისიის მიერ გაკეთებულ დასკვნას ავრცელებს. „დღეს ვენეციის კომისიამ გამოქვეყნა მოსაზრებები ორი კონსტიტუციური ორგანოს - იუსტიციის უმაღლესი საბჭოსა და საპროკურორო საბჭოს - მარეგულირებელ კანონმდებლობაზე. დასკვნაში კომისია ყურადღებას ამახვილებს, კონსტიტუციის ახალი რედაქციით ფორმირებული კონსტიტუციური ჩარჩოს პირობებში, საპროკურორო საბჭოსა და იუსტიციის უმაღლესი საბჭოს ინსტიტუციური მოწყობის, საქმიანობის ფორმებისა და ანგარიშვალდებულების საკითხებზე. ვენეციის კომისია გატარებული რეფორმების ნაწილს პოზიტიურად აფასებს, თუმცა დასკვნაში წარმოდგენილი მოსაზრებები ნათლად მიუთითებს, როგორც სასამართლოში, ასევე პროკურატურის სისტემაში შემდგომი, ძირეული, რეფორმების საჭიროებაზე", - აღნიშნულია ინფორმაციაში. სრულად  წყარო: https://emc.org.ge

თბილისი. „სამართლიანი არჩევნებისა და დემოკრატიის საერთაშორისო საზოგადოება" (ISFED) მიიჩნევს, რომ 15 დეკემბერს ტელეკომპანია „რუსთავი 2"-ის ეთერში, გადაცემა „შაბათის კურიერის" სიუჟეტში დაფიქსირებულ ფაქტებზე გამოძიება უნდა დაიწყოს. „სიუჟეტში ნაჩვენებია დმანისის, სენაკის, მარნეულისა და ბოლნისის უბნებთან დაკავშირებული ვიდეო მასალები, სადაც ჩანს საუბნო საარჩევნო კომისიის წევრების მიერ, სავარაუდოდ, ამომრჩეველთა სიებში ამომრჩეველთა ნაცვლად ყალბი ხელმოწერების გაკეთების, ბიულეტენების ჩაყრის და ხმის მიცემის ფარულობის დარღვევის ფაქტები", - ნათქვამია ISFED-ის მიერ გავრცელებულ განცხახდებაში, - „სამართლიანი არჩევნები" მიიჩნევს, რომ გავრცელებულ ჩანაწერებთან დაკავშირებით, უნდა დაიწყოს გამოძიება და წარიმართოს დროულად და ეფექტურად, რათა ადეკვატური პასუხი მოეთხოვოთ სავარაუდო დანაშაულებში მონაწილე პირებს, რაც სამომავლოდ ამგვარი დანაშაულების ჩადენის რისკებს შეამცირებს". სრულად წყარო: ორგანიზაციის ვებგვერდი

თბილისი. 14 დეკემბერს, ილიას სახელმწიფო უნივერსიტეტში გაიმართა საჯარო ლექცია თემაზე: „რელიგიური თანასწორობის ახალი საქმეები საკონსტიტუციო სასამართლოში". „შეხვედრის მიზანი იყო 2018 წლის 3 ივლისს საქართველოს საკონსტიტუციო სასამართლოს რელიგიური გაერთიანებების ორი სარჩელის გაცნობა სტუდენტებისთვის. აღნიშნულ საქმეებზე მოსარჩელეების პოზიციით, საქართველოს საგადასახადო კოდექსისა და სახელმწიფო ქონების შესახებ კანონის ნორმები არღვევდა კონსტიტუციის მე-14 მუხლს (თანასწორობის უფლება) და რელიგიური გაერთიანებებისთვის დისკრიმინაციულ გარემოს ქმნიდა. მომხსენებლებმა ისაუბრეს ბოლო პერიოდში საკონსტიტუციო სასამართლოში განხილულ საქმეებზე რელიგიური თანასწორობის შესახებ. ასევე რელიგიის თავისუფლების შესახებ მოსალოდნელ საქმეებზე, რომლებიც საკონსტიტუციო სასამართლომ შეიძლება უახლოეს პერიოდში განიხილოს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია ადამიანის უფლებათა ევროპულმა სასამართლოს მიერ გიგა ოთხოზორიას მკვლელობის საქმის არსებითი განხილვის დაწყებას ეხმაურება. კერძოდ, სასამართლომ რუსეთის ფედერაციას, როგორც მოპასუხე სახელმწიფოს, ოთხოზორიას მკვლელობის საქმესთან დაკავშირებით შესაბამისი კითხვებით მიმართა. „გიგა ოთხოზორიას საქმეს აქვს პრეცედენტული მნიშვნელობა, რადგან სასამართლოს მოუწევს იმსჯელოს, რამდენად ახორციელებს რუსეთის ფედერაცია ეფექტურ კონტროლს აფხაზეთის ტერიტორიაზე და რამდენად ეკისრება მას პასუხისმგებლობა აფხაზეთის დე-ფაქტო ხელისუფლების წარმომადგენელთა ქმედებებზე", - ვკითხულობთ საია-ს განცხადებაში, - „ამავდროულად, ოთხოზორიას საქმე ცხადყოფს ოკუპირებული აფხაზეთის და ცხინვალის რეგიონის ტერიტორიებსა და საოკუპაციო ხაზის მიმდებარე სოფლებში არსებულ საგანგაშო ვითარებას ადამიანთა უფლებრივი მდგომარეობის კუთხით და კიდევ ერთხელ ნათლად წარმოაჩენს უსაფრთხოების სერიოზულ პრობლემებს ე.წ. ადმინისტრაციულ საზღვარზე". სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" (EMC), დღეისთვის, საქართველოს პარლამენტის ჯანმრთელობის დაცვისა და სოციალურ საკითხთა კომიტეტში დაგეგმილ, შრომის უსაფრთხოების ორგანული კანონის პროექტის განხილვას ეხმაურება. „ადამიანის უფლებების სწავლების და მონიტორინგის ცენტრი (EMC) დადებითად აფასებს საქართველოს პარლამენტის ინიციატივას, დახვეწოს შრომის უსაფრთხოების შესახებ საქართველოს კანონი, აღმოფხვრას კანონმდებლობაში ამ მიმართულებით არსებული ძირითადი ხარვეზები და მეტად დაუახლოვოს ის საერთაშორისო სტანდარტებს. თუმცა, შემოთავაზებული ცვლილებები კვლავ არ ქმნის სრულყოფილ საკანონმდებლო ჩარჩოს შრომითი უფლებების ეფექტიანი და სამართლიანი დაცვის მიზნით", - ნათქვამია EMC-ის განცხადებაში. სრულად  წყარო: ორგანიზაციის ვებგვერდი

თბილისი. საზოგადოებრივი ორგანიზაციების ნაწილის განცხადებით, გაერთიანებული ოპოზიციისათვის თელავში მიმავალი გზების გადაკეტვა შეკრების თავისუფლების მორიგი შეზღუდვაა. „ხელმომწერი ორგანიზაციები უკიდურეს შეშფოთებას გამოხატავთ ახალი პრეზიდენტის ინაუგურაციის პარალელურად, სახელმწიფოს მხრიდან, გაერთიანებული ოპოზიციის მიერ თელავში მანიფესტაციის ჩატარების ხელშეშლის ფაქტთან დაკავშირებით", - აღნიშნულია მათ მიერ გავრცელებულ განცხადებაში, - „მიგვაჩნია, რომ სახელმწიფოს ქმედება და მანიფესტანტების უფლებების შეზღუდვა ეწინააღმდეგება დემოკრატიულ ღირებულებებს, საქართველოს კონსტიტუციასა და საერთაშორისო ხელშეკრულებებით ნაკისრ ვალდებულებებს. ვითარებას ამძაფრებს ის ფაქტი, რომ მოცემულ შემთხვევაში, სახეზე იყო არა რიგითი საჯარო მოხელეების მხრიდან უფლებამოსილების გადაჭარბება, არამედ სახელმწიფოს ინსტიტუციონალური ნაბიჯი - ოპოზიციის წარმომადგენელთათვის ქ. თელავში შესვლის აკრძალვით, არამართლზომიერად შეეზღუდათ გადაადგილების თავისუფლება და ამდენად არ მიეცათ მათთვის აქციის გამართვის საშუალება. უნდა აღინიშნოს ისიც, რომ მსგავსი გადაწყვეტილებები ზიანს აყენებს პოლიციის რეპუტაციას, რაც თავის მხრივ მოქალაქეებსა და პოლიციას შორის კონფლიქტის მიზეზი ხდება". სრულად  წყარო: www.osgf.ge

თბილისი. „ადამიანის უფლებების სწავლებისა და მონიტორინგის ცენტრი" (EMC), გუშინ, კახეთში პრეზიდენტის ინაუგურაცის პარალელურად, ოპოზიციის მხარდამჭერებსა და პოლიციის წარმომადგენლებს შორის მოხდარ ფიზიკური დაპირისპირებასთან დაკავშირებით, განცხადებას ავრცელებს. „EMC-ის არ ჰქონდა შესაძლებლობა ადგილზე დაკვირვებოდა მოვლენების განვითარებას, მათ შორის, გადაემოწმებინა სხვადასხვა მხარის მიერ გავრცელებული ინფორმაციის სიზუსტე. ინციდენტის სრულფასოვანი შეფასებისთვის საჭირო დეტალური და დაზუსტებული ფაქტობრივი გარემოებები ამ დროისთვის ასევე არ არის ხელმისაწვდომი", - აღნიშნულია განცხადებაში, - „მოვუწოდებთ მთავარ პროკურატურას დაიწყოს გამოძიება 16 დეკემბერს, ოპოზიციის მხარდამჭერებსა და პოლიციის წარმომადგენლებს შორის მომხდარ ინციდენტზე, მათ შორის, დროულად და ობიექტურად გამოიძიოს: პოლიციის ქმედებების კანონიერება გადაადგილების და შეკრების თავისუფლებაში შესაძლო ჩარევის შესახებ; ასევე - აქციის მონაწილეთა და პოლიციელების მიერ მიღებული დაზიანებების საკითხი". სრულად  წყარო: ორგანიზაციის ვებგვერდი

თბილისი. „კოალიცია დამოუკიდებელი და გამჭვირვალე მართლმსაჯულებისთვის" აუცილებლად მიიჩნევს, უზენაესი სასამართლოს მოსამართლეებისა და თავმჯდომარის შესარჩევი პროცესი კანონმდებლობით დარეგულირდეს. „ახლად არჩეული პრეზიდენტის ფიცის დადების მომენტიდან ძალაში შევიდა კონსტიტუციის ახალი რედაქცია, რომლის მიხედვითაც საქართველოს უზენაესი სასამართლოს მოსამართლეებს პრეზიდენტის ნაცვლად, იუსტიციის უმაღლესი საბჭო წარადგენს და მათ თანამდებობაზე უვადოდ აირჩევს საქართველოს პარლამენტი. იმავე წესით მოხდება უზენაესი სასამართლოს თავმჯდომარის არჩევა 10 წლის ვადით", - ვკითხულობთ კოალიციის მიერ გავრცელებულ განცხადებაში, - „კოალიცია მიიჩნევს, რომ ორგანული კანონით იუსტიციის უმაღლესი საბჭოს მიერ კანდიდატის შერჩევისა და ნომინირების საკითხის დეტალურ მოწესრიგებამდე, არსებითად მნიშვნელოვანია, რომ არ განხორციელდეს უზენაესი სასამართლოს მოსამართლეების არჩევა. მოვუწოდებთ საქართველოს პარლამენტს, დაუყოვნებლივ დაიწყოს მუშაობა „საერთო სასამართლოების შესახებ" ორგანულ კანონში განსახორციელებელ ცვლილებებზე. მოვუწოდებთ საქართველოს იუსტიციის უმაღლეს საბჭოს, თავი შეიკავოს კანდიდატთა ნომინირებისაგან შესაბამისი საკანონმდებლო ცვლილებების განხორციელებამდე". სრულად  წყარო: coalition.ge

აჭარა. 2018 წლის 14 დეკემბერს, საკონსტიტუციო სასამართლომ სისხლის სამართლის საპროცესო კოდექსის 56-ე მუხლის მე-5 პუნქტის ნაწილი არაკონსტიტუციურად სცნო. კერძოდ, ის სიტყვები, რომელიც, ნაკლებად მძიმე და მძიმე დანაშაულის საქმეებზე, პირის დაზარალებულად ცნობასთან დაკავშირებით ზემდგომი პროკურორის უარის სასამართლოში გასაჩივრებას კრძალავდა. საია იცავდა მოსარჩელის გ.გ-ს ინტერესებს და მიიჩნევდა, რომ სადავო ნორმით დაწესებული შეზღუდვა ეწინააღმდეგება საქართველოს კონსტიტუციის 42-ე მუხლის პირველი პუნქტით გარანტირებულ სამართლიანი სასამართლოს უფლებას, რამდენადაც პირს არ ქონდა შესაძლებლობა, ნაკლებად მძიმე და მძიმე დანაშაულის საქმეებზე, სასამართლოს გზით გაესაჩივრებინა უფლებაშემზღუდველი აქტი - პროკურორის დადგენილება დაზარალებულად ცნობაზე უარის თქმის შესახებ. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველოში" (TI) მიიჩნევენ, რომ, 15 დეკემბერს ტელეკომპანია „რუსთავი 2”-ის ეთერით გასული რეპორტაჟის საფუძველზე, სასწრაფოდ უნდა დაიწყოს გამოძიება, არჩევნების სავარაუდო გაყალბების ფაქტზე. „რეპორტაჟში წარმოდგენილი იყო ვიდეოჩანაწერები, თუ როგორ აყალბებდნენ ზოგიერთი საუბნო საარჩევნო კომისიის წევრები საპრეზიდენტო არჩევნებს სხვადასხვა გზით", - ნათქვამია TI-ის მიერ გავრცელებულ განცხადებაში, - „მოვუწოდებთ საქართველოს მთავარ პროკურატურას, სასწრაფოდ დაიწყოს გამოძიება არჩევნების სავარაუდო გაყალბების ფაქტებზე, მათ შორის, დაადგინოს ჩანაწერების ავთენტურობა". სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს კვლევას: ოჯახში ძალადობა სექსუალური ორიენტაციისა და გენდერული იდენტობის საფუძველზე - საკანონმდებლო ხარვეზები და პოლიტიკის გამოწვევები. „მიუხედავად პოზიტიური ნაბიჯებისა, სიძულვილით მოტივირებულ იმ დანაშაულებზე, რომლებიც ოჯახის წევრების მხრიდან ხორციელდება სახელმწიფოს რეაგირება ვერ აკმაყოფილებს ეფექტიანობის, დროულობის, ჯეროვნებისა და მიუკერძოებლობის სტანდარტებს. სახელმწიფოს საკმარისად არ აქვს გააზრებული ოჯახში სიძულვილის მოტივით ჩადენილი დანაშაულების ის უარყოფითი სოციალური ეფექტი, რომელიც შესაძლოა, არსებით საფრთხეს უქმნიდეს პირის ფიზიკურ/მენტალურ ჯანმრთელობას, პირის განვითარებას და უარყოფითად აისახებოდეს მის სოციოეკონომიკურ მდგომარეობაზე," ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. სავარაუდოდ, უცნობი, ძლიერმოქმედი ნარკოტიკული ნივთიერებით გამოწვეული ინტოქსიკაციისა და გარდაცვალების ფაქტებთან დაკავშირებით, საზოგადოებრივი ორგანიზაციების ნაწილი განცხადებას ავრცელებს. „შექმნილ ვითარებაში, მოვუწოდებთ: საქართველოს შინაგან საქმეთა და ჯანდაცვის სამინისტროებს, მიაწოდონ საზოგადოებას ინფორმაცია ბოლო პერიოდში, ისევე როგორც მიმდინარე წლის მაისში დაფიქსირებული ინტოქსიკაციისა და გარდაცვალების ფაქტების გამომწვევი მიზეზების შესახებ; ჯანდაცვის სამინისტრომ, სხვა უწყებების ჩართულობით, შექმნას გაფართოებული სამუშაო პლატფორმა, სადაც პროფესიული და დაინტერესებული ჯგუფების მონაწილეობით, განისაზღვრება მსგავსი ფაქტების პრევენციის მიზნით გადასადგმელი კონკრეტული ნაბიჯები; სახელმწიფომ დაგეგმოს და გადადგას რეალური პრევენციული ნაბიჯები ნარკოტიკებით გამოწვეული ინტოქსიკაციის და გარდაცვალების ფაქტების შემდგომი პრევენციის მიზნით; საქართველოს პარლამენტმა გაიაზროს საკუთარი პასუხისმგებლობა და დაუბრუნდეს ნარკოპოლიტიკის რეფორმის საკითხის განხილვას", - ვკითხულობთ განცხადებაში. სრულად  წყარო: emc.org.ge

თბილისი. „ადამიანის უფლებების სწავლებისა და მონიტორინგის ცენტრი" (EMC), ზვიად რატიანის საქმესთან დაკავაშირებით, პროკურატურას მიმართავს და პოლიციელთა მიმართ დევნის დაწყებას ითხოვს. „პოლიციის მხრიდან ზვიად რატიანის მიმართ განხორციელებული ფიზიკური ძალადობიდან ერთი წელი გავიდა. თუმცა, პროკურატურაში მიმდინარე გამოძიების ფარგლებში, პასუხისგებაში მიცემული არ არის საქმეში მონაწილე არცერთი პოლიციელი, ასევე დაზარალებულის სტატუსი მინიჭებული არ აქვს თავად ზვიად რატიანს. EMC თბილისის პროკურატურას მიმართავს და შინაგან საქმეთა სამინისტროს თანამშრომლების მხრიდან ზვიად რატიანის ფიზიკური შეურაცხყოფის საქმეში მონაწილე პოლიციელთა მიმართ სისხლისსამართლებრივი დევნის დაწყებას ითხოვს", - ნათქვამია EMC-ის მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. „საქართველოს დემოკრატიული ინიციატივამ" (GDI) ანგარიშის - „სამართალწარმოება თანასწორობისთვის" - პრეზენტაცია გამართა. დოკუმენტი აღმოსავლეთ-დასავლეთის მართვის ინსტიტუტის (EWMI) პროგრამის - ,,კანონის უზენაესობის მხარდაჭერა საქართველოში" (PROLoG) მიერ დაფინანსებული პროექტის - „სამართალწარმოება თანასწორობისთვის" ფარგლებში მომზადდა. ანგარიშში მიმოხილულია პროექტის ფარგლებში განხორციელებული აქტივობები. გაანალიზებულია საქართველოს ექვს მუნიციპალიტეტში (ნინოწმინდა, ახალციხე, ახალქალაქი, ხულო, შუახევი და ადიგენი) მცხოვრები ეთნიკური და რელიგიური უმცირესობების წარმომადგენელ ქალთა უფლებრივი და სამართლებრივი მდგომარეობა. წარმოდგენილია ქალთა მიმართ და ოჯახში ძალადობის შესახებ GDI-ს მიერ წარმოებული სტრატეგიული საქმეები, ასევე, ეთნიკურ და რელიგიურ უმცირესობებში ამ მიმართულებით არსებული გამოწვევები. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო" (TI) მიმოიხილავს საკანონმდებლო ინიციატივას, რომლის მიხედვითაც, სტაჟირების პერიოდი სამუშაო სტაჟში ჩაითვლება. „საქართველოს პარლამენტი განიხილავს ცვლილებებს „საჯარო სამსახურის შესახებ" კანონში და „საქართველოს შრომის კოდექსში". საკანონმდებლო ინიციატივა ითვალისწინებს შრომით ბაზარზე სტაჟიორის/პრაქტიკანტის სტატუსის განსაზღვრას და სტაჟირების პერიოდის სამუშაო სტაჟში ჩათვლას", - აღნიშნულია TI-ის მიერ განხორციელებულ ანალიზში. სრულად  წყარო: ორგანიზაციის ვებგვერდი

თბილისი. „ინფორმაციის თავისუფლების განვითარების ინსტიტუტი" (IDFI) მიიჩნევს, რომ საჯარო სამსახურის შესახებ კანონში დაგეგმილი ცვლილება ლახავს პრეზიდენტის ადმინისტრაციაში დასაქმებული მოხელეების უფლებებს. „IDFI უარყოფითად აფასებს ინიცირებულ საკანონმდებლო ცვლილების პროექტს და მიიჩნევს, რომ ის საფრთხის წინაშე აყენებს საჯარო მმართველობის რეფორმას", - ვკითხულობთ IDFI-ის მიერ გავრცელებულ განცხადებაში, - „IDFI მოუწოდებს საქართველოს პარლამენტს მხარი არ დაუჭიროს შემოთავაზებულ საკანონმდებლო ცვლილებებს, ხოლო კანონპროექტის ავტორებს მოუწოდებს გაიწვიონ ინიცირებული საკანონმდებლო ცვლილების პროექტი, რადგან ინიცირებული ცვლილება ლახავს პრეზიდენტის ადმინისტრაციაში დასაქმებული საჯარო მოხელეების უფლებებს, რისკის ქვეშ აყენებს საქართველოში ეფექტური, მდგრადი და პოლიტიკურად ნეიტრალური საჯარო სექტორის ჩამოყალიბებას და მთლიანობაში საჯარო მმართველობის რეფორმის წარმატებით განხორციელებას". სრულად  წყარო: ორგანიზაციის ვებგვერდი

თბილისი. საია პრეზიდენტის ადმინისტრაციის თანამშრომლებთან დაკავშირებით ინიცირებულ რეგულაციას არაკონსტიტუციურად მიიჩნევს. „6 დეკემბერს საქართველოს პარლამენტს წარედგინა პარლამენტის წევრების, გურამ მაჭარაშვილისა და რატი იონათამიშვილის საკანონმდებლო ინიციატივა, რომლის მიხედვითაც, პრეზიდენტის ადმინისტრაციის თანამშრომლები ჩაითვლებიან ადმინისტრაციული ხელშეკრულებით დასაქმებულ პირებად და მათზე აღარ გავრცელდება ის შრომითი გარანტიები, რომლებიც გათვალისწინებულია პროფესიული საჯარო მოხელეებისათვის. აღნიშნულ კანონპროექტზე ბიურომ მიიღო გადაწყვეტილება მისი დაჩქარებული წესით განხილვის, მათ შორის, ერთ დღეს ორი მოსმენით განხილვის თაობაზე. მიგვაჩნია, რომ წარმოდგენილი საკანონმდებლო ინიციატივა ეწინააღმდეგება საქართველოს კონსტიტუციას, საქართველოს საკონსტიტუციო სასამართლოს პრაქტიკას და არ შეესაბამება „საჯარო სამსახურის შესახებ" საქართველოს კანონით განმტკიცებულ პრინციპებს, რითაც უხეშად არღვევს პრეზიდენტის ადმინისტრაციაში დასაქმებული პირების შრომით უფლებებს", - ვკითხულობთ საია-ს მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალო - საქართველო" (TI) აცხადებს, რომ საქართველოს პარლამენტმა ეთიკის კოდექსი ეფექტური სანქციების გარეშე მიიღო. „ეთიკის კოდექსის მიღება მნიშვნელოვანი ნაბიჯია პარლამენტის მხრიდან, თუმცა არსებით ხარვეზს წარმოადგენს დარღვევის შემთხვევაში შესაბამისი რეაგირების ეფექტური მექანიზმების არ არსებობა. მიღებული ეთიკის კოდექსი, ქცევის წესის დარღვევის შემთხვევაში, დეპუტატისთვის სარეკომენდაციო წერილით მიმართვის უფლებამოსილებას ითვალისწინებს. ასევე გადაწყვეტილების მიღების შემდეგ პარლამენტის ვებგვერდზე გამოქვეყნდება იმ დეპუტატების სახელები, რომლებმაც დაარღვიეს ეთიკის კოდექსი, დარღვევის მცირე აღწერით", - აღნიშნულია TI-ის მიერ გავრცელებულ შეფასებაში, - „მნიშვნელოვანი ხარვეზების მიუხედავად, პარლამენტის მხრიდან კოდექსის მიღება ამ მიმართულებით პირველი ნაბიჯია და ვიმედოვნებთ, რომ ეთიკის კოდექსი ეფექტურად იმუშავებს, ეტაპობრივად გაუმჯობესდება და დაიხვეწება პრაქტიკაში გამოვლენილი ხარვეზებიდან გამომდინარე". სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია 2018 წელს განხორციელებული საადვოკატო საქმეების მიმოხილვას აქვეყნებს. ინფორმაციის მიხედვით, 2018 წელს საია-მ წარმატებით დაასრულა 120 საადვოკატო საქმე, მათ შორის 2 - საკონსტიტუციო, ხოლო 1 - ადამიანის უფლებათა ევროპულ სასამართლოში. მოგებული საქმეების შედეგად, შესაძლებელი გახდა კონკრეტული პირების უფლებების დაცვა, ასევე, ზოგიერთმა საქმემ პოზიტიური გავლენა მოახდინა კანონმდებლობის ან/და პრაქტიკის შეცვლაზე. საია საადვოკატო დახმარებას აგრძელებს 300-ზე მეტ საქმეზე, როგორც ქვეყნის შიგნით, ისე საერთაშორისო დონეზე. სრულად  წყარო: ორგანიზაციის ვებგვერდი

თბილისი. კოალიცია დამოუკიდებელ და გამჭვირვალე მართლმსაჯულებისთვის პროკურატურის რეფორმის შედეგებს აფასებს. „რეფორმის საწყის ეტაპზე დაინტერესებული ჯგუფების აქტიური ჩართულობის და სხვადასხვა ფორმატში მოსაზრებების გაცვლის მიუხედავად, პარლამენტმა ინიცირება გაუკეთა ორგანული კანონის პროექტს, რომელშიც გაზიარებული არ იყო არაერთი პრინციპული შეთავაზება, რასაც გადამწყვეტი მნიშვნელობა ჰქონდა კონსტიტუციური რეფორმის მიზნებისთვის. სამწუხაროდ, რეფორმის საწყისი ეტაპისგან განსხვავებით, რეფორმის შემდეგი ეტაპები დახურულ ფორმატში და ნაჩქარევად გაგრძელდა. მიმდინარე წლის 31 ოქტომბერს, იურიდიულმა კომიტეტმა ინიცირებული პროექტი მეორე და ყველაზე მნიშვნელოვან მოსმენაზე, სხდომის შესახებ ინფორმაციის წინასწარი გამოქვეყნებისა და შესაბამისად, საზოგადოების წევრთა მონაწილეობის გარეშე განიხილა.კანონპროექტი მესამე მოსმენით, ქუთაისში პლენარულ სხდომებს შორის პერიოდში გავიდა ისე, რომ კომიტეტის სხდომის შესახებ ანონსი რეგლამენტით დადგენილ ვადებში არ გავრცელებულა", - აღნიშნულია დოკუმენტში. სრულად  წყარო: https://www.gdi.ge

თბილისი. 2018 წლის 1 მაისიდან, „ადამიანის უფლებების სწავლებისა და მონიტორინგის ცენტრი"(EMC) პარტნიორ ორგანიზაციებთან, „ინფორმაციის თავისუფლების განვითარების ინსტიტუტთან" (IDFI) და „კავკასიის კვლევითი რესურსების ცენტრთან" (CRRC) ერთად ახორციელებს პროექტს „სასამართლო რეფორმის განხორციელების მხარდაჭერა”. CRRC საქართველო პროექტის ფარგლებში ატარებს მოსახლეობის საბაზისო გამოკითხვას, სატელეფონო გამოკითხვების ოთხ ტალღას, სასამართლოების გაშუქების მონიტორინგს მედიაში და თვისებრივ კვლევას მოსამართლის როლზე პროფესიულ ჯგუფებთან. მოსახლეობის საბაზისო გამოკითხვა სასამართლო სისტემის შესახებ ცოდნასა და დამოკიდებულებაზე 2018 წლის სექტემბერში ჩატარდა. კვლევის ძირითადი მიგნებების თანახმად: საქართველოს მოსახლეობა სასამართლოსთან დაკავშირებულ საკითხებს ქვეყნისთვის ყველაზე მნიშვნელოვან პრობლემად ნაკლებად მიიჩნევს და პირველ რიგში ასეთ საკითხად სიღარიბესა და უმუშევრობას ასახელებს. თუმცა, ქვეყანაში თითქმის ნახევარს აინტერსებს ის, რაც საქართველოს სასამართლოებში ხდება. მიუხედავად ამისა, შეინიშნება, რომ საქართველოს მოსახლეობა ნაკლებად ინფორმირებულია სასამართლო სისტემის, მასში მიმდინარე პროცესებისა და რეფორმების შესახებ. ხშირ შემთხვევაში მოსახლეობის დიდმა ნაწილმა არ იცის, როგორია უფლებამოსილებების იერარქია ან ის, თუ რა მიზანს ემსახურება სასამართლოში მიმდინარე რეფორმები. სრულად... წყარო: crrc.ge