აჭარა. 12 აგვისტოს, ხელვაჩაურის მუნიციპალიტეტში ახალგაზრდობის საერთაშორისო დღე აღინიშნა. „გასართობ-შემოქმედებითი ღონისძიება ხელვაჩაურის ახალგაზრდობის ცენტრის ინიციატივითა და ორგანიზებით გაიმართა. პროგრამა მოიცავდა: შემოქმედებით აქტივობებს, გუნდურ შეჯიბრებებს, სახალისო და სამაგიდე თამაშებს, მინიდისკოსა და კარაოკეს აქტივობებს. მშვიდობის კორპუსის ამერიკელმა მოხალისეებმა ღონისძიების მონაწილე ახალგაზრდებს სახე მოუხატეს. დღესვე, მონაწილეებს ახალგაზრდობის ცენტრის აქტივობებში ჩართულობისთვის სიგელები და წიგნების მაღაზიის ვაუჩერები გადაეცათ საჩუქრად. საზეიმო დღე ფერების ღონისძიებით დასრულდა. ახალგაზრდობის საერთაშორისო დღისადმი მიძღვნილ გასართობ-შემეცნებით ღონისძიებაში სულ 80 მოზარდი და ახალგაზრდა ჩაერთო", ნათქვამია ცენტრის ვებგვერდზე სოციალურ ქსელში. სრულად... წყარო: ხელვაჩაურის ახალგაზრდობის ცენტრის ვებგვერდი სოციალურ ქსელში

თბილისი. 2008 წლის ომის ათი წლისთავთან დაკავშირებით, საქართველოს სახალხო დამცველის აპარატი სპეციალურ ბიულეტენს აქვეყნებს. „ომი მძიმე დარტყმა იყო საქართველოს პოლიტიკური, ეკონომიკური და დემოკრატიული განვითარებისათვის. კონფლიქტმა ზიანი მიაყენა ადამიანურ ურთიერთობებს, ნათესაურ და მეგობრულ კავშირებს. იქ სადაც 10 წლის წინ ინტენსიური მიმოსვლა და ვაჭრობა მიმდინარეობდა, დღეს რუსეთის ფედერაციის მესაზღვრეები უკანონოდ აკავებენ და აჯარიმებენ ადამიანებს. რუსეთის და დე ფაქტო ხელისუფლებების განცხადებით აფხაზეთის საოკუპაციო ხაზზე დაკავებულთა რაოდენობამ 2009-2017 წლებში 15 000 შეადგენდა; ხოლო ცხინვალის რეგიონის მიმართულებით 2016-2017 წლებში დაკავებულთა რაოდენობა 1 063 იყო. საოკუპაციო ხაზებზე ადგილი ჰქონდა სიცოცხლის ხელყოფის ერთეულ შემთხვევებსაც. 1990 წლებისა და 2008 წლის კონფლიქტებმა ნახევარ მილიონზე მეტი ადამიანი დააზარალა, მათ შორის 278 103 იძულებით გადაადგილებული პირია, ოკუპირებულია საქართველოს ტერიტორიის 20%. ეს ციფრები ჩვენი ქვეყანის წინაშე მდგარ გამოწვევებსა და ცენტრალურ ხელისუფლებას დაკისრებულ უზარმაზარ პასუხისმგებლობაზე მიუთითებს", - ვკითხულობთ ბიულეტენში. სრულად  წყარო: სახალხო დამცველის ვებგვერდი

თბილისი. პარტნიორობა ადამიანის უფლებებისთვის (PHR) აქვეყნებს ორგანიზაციის იურისტის, ანა თავხელიძის ბლოგპოსტს ქუჩაში მცხოვრები და მომუშავე ბავშვების პრობლემასა და ამ მიმართულებით სახელმწიფოს ვალდებულებებზე. „იმ კონკრეტული საქმეების მიხედვით, რასთანაც ჩვენ გვქონია შეხება, შესაძლებელია იმის თქმა, რომ მიზეზად ზოგიერთ შემთხვევაში არის ოჯახში ძალადობა. ბავშვი, შესაძლოა, რომ იყოს უგულებელყოფილი ნათესავების მიერ ან სულაც ოჯახის წევრმა აიძულოს მსგავს ქმედებაში ჩაბმა. როდესაც სათანადო უწყებები თავის დროზე არ აქცევენ ყურადღებას ბავშვის ქცევის ცვლილებას, მაგალითად, როდესაც ბავშვი არ დადის საგანმანათლებლო დაწესებულებაში და განათლების სამინისტრო არ ახდენს ამაზე სათანადო რეაგირებას. ასევე, როდესაც პოლიცია ხედავს, რომ ბავშვი არის ქუჩაში - მუშაობს ან ცხოვრობს - და არ ახდენს ამაზე სათანადო რეაგირებას, ესეც ძალიან მწვავე პრობლემადაა ქცეული. ჩვენ ვმუშაობთ ბავშვთა უფლებების დაცვის კუთხით და შესაბამისად, ხშირად მოგვმართავენ, მათ შორის, მშობლებიც, ის ადამიანებიც, ვისაც უთითებენ, რომ კონკრეტული ბავშვები არიან ძალადობის მსხვერპლნი, მუშაობენ ან ცხოვრობენ ქუჩაში. ჩვენ სამართლებრივ მომსახურებას ვუწევთ ამ ადამიანებს და ვეხმარებით სახელმწიფო უწყებებთან კომუნიკაციაში. თუმცა, მხოლოდ ჩვენი რესურსი ამ პრობლემის მოსაგვარებლად არ არის საკმარისი", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

გურია. 24-25 ივლისს, „ახალგაზრდა პედაგოგთა კავშირის" ახალგაზრდული ცენტრის მოზარდების ინიციატივით, მსოფლიო მოსახლეობისა და ახალგაზრდობის საერთაშორისო დღეები აღინიშნა. 24 ივლისს „ახალგაზრდა პედაგოგთა კავშირის" ადმინისტრირებაში მყოფი ანასეულის დღეგრძელთა სახლის ბენეფიციარებისთვის საინტერესო საღამო მოეწყო, რომელიც მსოფლიო მოსახლეობის დღეს მიეძღვნა, ერთობლივი ძალებით გაიმართა ხანდაზმულთა სახლის ეზოს დალაგება - მოწესრიგების პროცესი, რომელშიც ხანდაზმულებიც ჩაერთნენ. მათ გადაეცათ სპეციალურად ამ დღისთვის დამზადებული მაისურები. პროცესში ორგანიზაციის გერმანელი მოხალისეებიც მონაწილეობდნენ. 25 ივლისს ცენტრის მოხალისეების მიერ გასვლითი ტური მოეწყო, ოზურგეთის მუნიციპალიტეტში მდებარე კურორტ „გომის მთაზე". აღსანიშნავია, რომ არაფორმალურ გარემოში, ორგანიზაციის უცხოელმა მოხალისეებმა შემაჯამებელი ანგარიში წარმოადგინეს. მათ კიდევ ერთხელ აღნიშნეს მსოფლიო მოსახლეობისა და ახალგაზრდობის დღეები. ხაზი გაუსვეს ახალგაზრდების მოხალისეობრივ საქმიანობას და მსოფლიო კულტურების პოპულარიზაციის აუცილებლობას სხვადასხვა გეოგრაფიულ არეალში. უცხოელი მოხალისეები ასევე გაეცნენ გურული (ქრისტიანი) და აჭარელი (მუსლიმი) მოსახლეობის წესებს, ცხოვრებას და თანაცხოვრებას", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

კახეთი. ევროკავშირის მხარდაჭერითა და ახალქალაქის LAG-ის ინიციატივით, კახეთში ახალგაზრდული ბანაკი მიმდინარეობს. ბანაკს 15 ახალგაზრდა სტუმრობს ახალქალაქის სხვადასხვა სოფლიდან, მათი მასპინძლები კი, საზოგადოებრივი კოლეჯ "აისის” ქვემო ალვანის ფილიალის სტუდენტები არიან. ღირშესანიშნაობების მონახულება, გუნდური თამაშები, საინტერესო ლექციები და ადგილობრივი ტრადიციების გაცნობა, ეს იმ აქტივობების მცირე ჩამონათვალია რაშიც ბანაკის მონაწილეები რამდენიმე დღის განმავლობაში ჩაერთვებიან. პროექტის - "სოფლის განვითარების ახალი მიდგომის ხელშეწყობა ახალქალაქში” ფარგლებში, ახალგაზრდული აქტივობების განხორციელება მომავალშიც იგეგმება. სრულად  წყარო: http://enpard.ge

კახეთი. მაკლეინის ასოციაციის ინიციატივითა და მშობელთა მხარდამჭერი ცენტრის ორგანიზებით, თელავში თვითმმართველობის საქმიანობაში შეზღუდულის შესაძლებლობის მქონე პირების ჩართულობასა და არასამთავრობო ორგანიზაციებთან თანამშრომლობის აუცილებლობის შესახებ იმსჯელეს. ამ საკითხებისადმი მიძღვნილ ორდღიან სემინარს შშმ პირები, მათი ოჯახის წევრები, დაინტერესებული მოქალაქეები, საზოგადოებრივი ორგანიზაციების წარმომადგენლები და საჯარო მოხელეები ესწრებოდნენ. ღონისძიების ძირითადი მიზანი სპეციალური საჭიროების მქონე პირებთან დაკავშირებული საკითხების ირგვლივ თვითმმართველი ერთეულების საქმიანობის გააქტიურება იყო. სრულად  წყარო: https://phrgeorgia.wordpress.com 

თბილისი. გაეროს ბავშვთა ფონდმა კვლევის „ქუჩაში მცხოვრები და მომუშავე ბავშვები" შედეგები წარმოადგინა. „კვლევამ აჩვენა, რომ ბავშვები ჯგუფებად  იკრიბებიან და ერთად მოძრაობენ იმისთვის, რომ ერთმანეთი დაიცვან, ღამის გასათევი ადგილი იპოვონ, დასვენებისა და გართობის სივრცეები შეიქმნან, დაამყარონ მეგობრული ურთიერთობები და ითანამშრომლონ ეკონომიკურ აქტივობებში, მაგალითად, წვრილმან ვაჭრობასა და ქუჩაში მათხოვრობაში, ასევე წვრილმან დანაშაულში. ბავშვთა ზოგიერთ ჯგუფს ისეთი შიდა სტრუქტურა აქვს, რომელიც ბავშვებს ხელმძღვანელი/უპირატესი სტატუსის მქონე ბავშვებად და დაქვემდებარებულ ბავშვებად ყოფს. უფროსი ბავშვები ზოგჯერ უმცროს ბავშვებს, რომლებსაც ჯერ არ შეუსრულდათ 14 წელი, ან დაქვემდებარებულ ბავშვებს ფარად იყენებენ სისხლისსამართლებრივი პასუხიმგებლობის თავიდან აცილების მიზნით, დანაშაულის ჩადენას აიძულებენ და ამ გზით მიღებულ შემოსავალს ართმევენ", ნათქვამია ორგანიზაციის ვებგვერდზე. სრულად... წყარო: unicef.ge

გურია. 19 ივლისს, ახალგაზრდა პედაგოგთა კავშირის პროექტის „ბულინგის აღმოფხვრის შესაძლებლობები" შემაჯამებელი ანგარიშის პრეზენტაცია გაიმართა. „პრეზენტაციაზე განიხილეს პროექტით გათვალისწინებული აქტივობები, საუბარი წარიმართა პროექტის შედეგებზე. კერძოდ: ჩამოყალიბდა განმანათლებელ მშობელთა და მოზარდთა ჯგუფები, რომლებიც მოცემულ ეტაპზე კონკრეტული თემისა და მიზნის ირგვლივ გაერთიანდა. ჯგუფი მოტივირებულია სხვა მშობლების გააქტიურებისა და მათი განათლების პროცესში მიიღონ მონაწილეობა. ისინი წარმოადგენენ მნიშვნელოვან ბერკეტს შესაძლო ცვლილებების განხორციელების პროცესში. ასევე, განხორციელდა მნიშვნელოვანი კამპანია მოზარდების მონაწილეობით -- საკუთარი სკოლების შინაგანაწესებში ბულინგის მართვის შესახებ შესატანი ცვლილებების განხორციელების შესახებ. პროექტში ჩართული მოზარდების ინიციატივით (მათი დიდი ნაწილი ახალგაზრდა პედაგოგთა კაშირის ლიდერთა სკოლის მოსწავლეები არიან) მომზადდა მიმართვის წერილები საჯარო სკოლების ადმინისტრაციების სახელზე, სადაც მოზარდები ითხოვენ სკოლების შინაგანაწესში ბულინგის რეგულაციასთან დაკავშირებული მუხლების დამატებას. აღსანიშნავია, რომ მოცემულ ეტაპზე 5 საჯარო სკოლის წერილობითი დასტური უკვე არსებობს. ახალი სასწავლო წლიდან პარტნიორ სკოლებში ანტიბულინგური პროგრამა გახდება სადამრიგებლო პროგრამის სავალდებულო ნაწილი და გათვალისწინებული იქნება სასკოლო სასწავლო გეგმაში. დაწყებით და საბაზო საფეხურებზე ჩატარდება 10-10 კლასის საათი. აღნიშნულთან დაკავშირებით არსებობს სკოლების თანხმობა და მოცემულ ეტაპზე იგეგმება ტრენინგი 4 სკოლის წარმომადგენლებთან პროგრამაში გათვალისწინებულ საკითხებთან დაკავშირებით”, ნათქვამია ახალგაზრდა პედაგოგთა კავშირის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

კახეთი. პანკისის ხეობაში, დუისის საგანმანათლებლო ცენტრში ბავშვებისთვის და ახალგაზრდებისთვის მიმდინარეობს თიხაზე მუშაობის კურსი, რომელიც ძალიან მოთხოვნადია და დიდი პოპულარობით სარგებლობს ადგილობრივ მოსახლეობაში, განსაკუთრებით კი ბავშვებში.  „პატარა მოსწავლეები აქტიურად ესწრებიან გაკვეთილებს და საკუთარი ხელებით ქმნიან სხვადასხვა ნამუშევრებს", ნათქვამია კახეთი რეგიონული ცენტრის ვებგვერდზე სოციალურ ქსელში. სრულად...  წყარო: ორგანიზაციის ვებგვერდი სოციალურ ქსელში

თბილისი. გაეროს ბავშვთა ფონდი (იუნისეფი) აქვეყნებს კვლევას: „ადრეული და სკოლამდელი აღზრდისა და განათლების სახელმწიფო სტანდარტები". „ადრეული და სკოლამდელი აღზრდისა და განათლების სახელმწიფო სტანდარტები(შემდგომში – სტანდარტები) განსაზღვრავენ თუ რა ცოდნას, უნარ-ჩვევებს, ღირებულებებსა და დამოკიდებულებებს უნდა იძენდეს ბავშვი სკოლამდელი აღზრდისა და განათლების ფარგლებში, ასევე განსაზღვრავს ადრეული და სკოლამდელი აღზრდისა და განათლების დაწესებულების გარემოსა და საგანმანათლებლო ხარისხის სტანდარტს. 2. სტანდარტი სავალდებულოა ყველა ადრეული და სკოლამდელი აღზრდისა და განათლების დაწესებულებისათვის (მიუხედავად მათი სამართლებრივი ფორმისა)", ნათქვამია პუბლიკაციაში. სრულად... წყარო: unicef.ge

თბილისი. 13 ივლისს, საქართველოს ახალგაზრდა იურისტთა ასოციაციამ (საია) გამართა კვლევის „ბავშვის მიმართ ძალადობა" პრეზენტაცია.  „კვლევაში აღწერილია საქართველოში ბავშვთა მიმართ ძალადობის ფორმები სფეროების მიხედვით: ოჯახი, სკოლა, საზოგადოება და მედიასივრცე და  ქვეყანაში ბავშვის მიმართ ძალადობის გამომწვევი მიზეზები. კვლევა, ასევე, მოიცავს სახელმწიფოსთვის განკუთვნილ რეკომენდაციებს", ნათქვამია ორგანიზაციის ვებგვერდზე. სრულად...  წყარო: gyla.ge

სამცხე-ჯავახეთი. 13 ივლისს „კეთილდღეობის და განვითარების ცენტრ"-თან არსებული სამოქალაქო აქტივიზმის ცენტრის მოხალისეები ჩაერთვნენ ბორჯომში გამართულ სპორტულ მარათონში.  „ღონისძიებაში მონაწილეობას იღებდნენ შშმ პირები საქართველოს სხვადასხვა კუთხეებიდან, მათ შორის გორიდანაც. შეჯიბრი გაიმართა პეინტ ბოლში და მშვილდოსნობაში, ასევე კულინარიაში”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

მცხეთა–მთიანეთი. მოხალისეობის პოპულარიზაციისა და ხელშეწყობის მიზნით 2018 წლის 14 ივნისს, ქალაქ მცხეთაში სასტუმრო ჯინო ველნეს მცხეთის საკონფერენციო დარბაზში გაიმართა მოხალისეობის ფორუმი. ფორუმი ერთმანეთთან დააკავშირებს მათ, ვინც ეძებს მოხალისეებს და მათ, ვისაც მოხალისეობა სურს. ფორუმში მონაწილეობას მიიღო 100 - მდე მონაწილემ, ახალგაზრდებმა მთელი რეგიონიდან, ადგილობრივი არასამთავრობო ორგანიზაციების, თვითმართველობის, ბიზნესისა და მედიასაშუალებების წარმომადგენლებმა. მოხალისეობის ფორუმი ორგანიზებული იყო მცხეთა-მთიანეთის რეგიონული ჰაბის მიერ, განათლების განვითარების და დასაქმების ცენტრის მხარდაჭერით, პროექტის ,,სამოქალაქო საზოგადოების განვითარების ინიციატივა’’ (2017-2020) ფარგლებში. ინიციატივა მიზნად ისახავს საქართველოში სამოქალაქო საზოგადოების გარემოს გაუმჯობესებას, საზოგადოებრივი ორგანიზაციების გაძლიერებას, მათი ანგარიშვალდებულების გაზრდას მოქალაქეების მიმართ და კავშირების განმტკიცებას სხვა აქტორებთან. პროექტი “სამოქალაქო საზოგადოების განვითარების ინციატივა” ითვალისწინებს 110-ზე მეტი აქტივობის განხორციელებას და 80-მდე გრანტის გაცემას. პროექტში სამოქალაქო საზოგადოების სულ მცირე 2500 წარმომადგენელი ჩაერთვება მთელი საქართველოს მასშტაბით. პროექტი დაფინანსებულია ევროკავშირისა და გერმანიის ეკონომიკური თანამშრომლობისა და განვითარების ფედერალური სამინისტროს მიერ.

იმერეთი. ქუთაისის ახალგაზრდული ცენტრის წევრებისთვის ჩატარდა სემინარი ძალადობის და ეთნიკური კონფლიქტების თემაზე. მისი მიზანი იყო მონაწილეთა ცნობიერების ამაღლება ძალადობის ფორმების, ეთნიკური კონფლიქტების, სახალხო დიპლომატიის, საქართველოში არსებული ეთნიკური კონფლიქტების და ძალადობის პრევენციის საკითხებზე. სრულად... წყარო: ორგანიზაციის ვებგვერდი სოციალურ ქსელში

სამეგრელო. 10 ივლისს, ასოციაცია „ათინათის" ახალგაზრდული ცენტრის წევრების ორგანიზებით, მცირე გრანტის ფარგლებში, ცენტრის წევრებმა და მოხალისეებმა მოხატეს „ზებრა" გადასასვლელი. ღონისძიება ორგანიზებულ იქნა „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის" (PITA) ფარგლებში. სრულად...  წყარო: ორგანიზაციის ვებგვერდი სოციალურ ქსელში

თბილისი. საქართველოს სახალხო დამცველმა რეკომენდაციით მიმართა საქართველოს მთავრობას, შემუშავდეს შესაბამისი სამოქმედო გეგმა და რეაბილიტაციის კონცეფცია, ქვეყანაში არასრულწლოვანთა მიმართ სექსუალური ძალადობის შემთხვევათა პრევენციის, ბავშვთა დაცვისა და დროული დახმარებისთვის. „საქართველოს სახალხო დამცველის აპარატი აქტიურად იკვლევს ბავშვთა ძალადობისგან დაცვის კუთხით ქვეყანაში არსებულ პრობლემებსა და „სექსუალური ექსპლუატაციისა და სექსუალური ძალადობისგან ბავშვთა დაცვის შესახებ" ევროპის საბჭოს კონვენციის ეროვნულ დონეზე განხორციელების საკითხებს", - ვკითხულობთ სახალხო დამცველის აპარატის მიერ გავრცელებულ ინფორმაციაში, - „შესწავლის შედეგად იკვეთება, რომ განსაკუთრებულ პრობლემად რჩება სექსუალური ძალადობის ფაქტებზე უწყებების მხრიდან დროული და ეფექტიანი რეაგირების გატარება; დროულად ვერ ხდება დაზარალებულ ბავშვთა გამოვლენა, ვერ ხორციელდება მსხვერპლთა ფსიქო–სოციალური რეაბილიტაცია და მათი საგანმანათლებლო და სოციალურ სივრცეში ჯეროვანი ინტეგრაცია". სრულად  წყარო: სახალხო დამცველის ვებგვერდი

თბილისი. საქართველოს სახალხო დამცველმა წინადადებით მიმართა საგარეო საქმეთა სამინისტროს, მშობელთა მზრუნველობას მოკლებულ და მიტოვების რისკის ქვეშ მყოფ ბავშვთა შესახებ გაეროს გენერალური ასამბლეის რეზოლუციის მხარდაჭერის შესახებ. ევროკავშირის წევრმა სახელმწიფოებმა გაეროს გენერალურ ასამბლეაზე „მშობელთა მზრუნველობას მოკლებულ და მიტოვების რისკის ქვეშ მყოფ ბავშვთა შესახებ" რეზოლუციის ინიცირება და 2019 წლისათვის მისი განხილვის ადვოკატირება მოახდინეს. საქართველოს სახალხო დამცველი მნიშვნელოვნად მიიჩნევს, რომ საქართველომ, გაეროში საკუთარი წარმომადგენლობის მეშვეობით, მხარი დაუჭიროს ევროკავშირის წევრ სახელმწიფოთა ინიციატივას, რომელიც ითვალისწინებს 2019 წელს ამ საკითხის შეტანას გაეროს გენერალური ასამბლეის მესამე კომიტეტის დღის წესრიგში და ასამბლეის მიერ ზემოაღნიშნული რეზოლუციის მიღებას. სრულად  წყარო: სახალხო დამცველის ვებგვერდი

თბილისი. სახალხო დამცველის აპარატმა აფხაზეთსა და ცხინვალის რეგიონში სკოლადამთავრებული სტუდენტებისთვის ადამიანის უფლებებისა და მისი დაცვის მექანიზმების თაობაზე სწავლება ჩაატარა. სწავლების დასასრულს, საქართველოს სახალხო დამცველი შეხვდა სტუდენტებს და მათგან მოისმინა იმ პრობლემებისა და გამოწვევების შესახებ, რომელიც ახალგაზრდებს საშუალო და უმაღლესი განათლების მიღების პროცესში ექმნებათ. სრულად  წყარო: სახალხო დამცველის ვებგვერდი

აჭარა. ევროკავშირის მხარდაჭერით, CENN-ის პროექტის, „ქედა ლიდერი", ფარგლებში, ბულაჩაურის „მწვანე ცენტრმა" ახალგაზრდა ლიდერთა და ინოვატორთა მწვანე ბანაკს უმასპინძლა. 10 დღის განმავლობაში, ქედის მუნიციპალიტეტის სხვადასხვა სოფლებიდან, კონკურსის - „მე ლიდერი" ფარგლებში შერჩეულ 21 მოსწავლეს გარემოსდაცვითი სფეროს სპეციალისტებმა ჩაუტარეს თავისუფალი გაკვეთილები მდგრადი განვითარების მიზნების, კლიმატის ცვლილების გლობალური გამოწვევების, ტყის მდგრადი მართვის, ნარჩენების თანამედროვე მართვის ტექნოლოგიების, წყლის სანიტარიის, ურბანიზაცია-რეგიონების განვითარების მიმართულებების შესახებ. სრულად  წყარო: http://enpard.ge

რაჭა. 8 ივნისს, რაჭა– ლეჩხუმისა და ქვემო სვანეთის რეგიონული ჰაბის – ფონდი ,,აფხაზინტერკონტი’’–ს (AIC) ორგანიზებითა და განათლების, განვითარებისა და დასაქმების ცენტრის( EDEC) მხარდაჭერით, პროექტის ,, სამოქალაქო საზოგადოების განვითარების ინიციატივის“ ფარგლებში – ქ. ამბროლაურში, სასტუმრო“ Hills Plaza’’ –ში გაიმართა რაჭა-ლეჩხუმი და ქვემო სვანეთის რეგიონის „მოხალისეობის ფორუმი“, რომელსაც რაჭა–ლეჩხუმის და ქვემო სვანეთის (ონის, ცაგერის, ლენტეხის, ამბროლაურის მუნიციპალიტეტების) ადგილობრივი ორგანიზაციების, მედიის, საინფორმაციო სამსახურების, ახალგაზრდების, სამოქალაქო საზოგადოების სხვადასხვა სექტორისა და თვითმმართველობის წამომადგენლები ესწრებოდნენ. ფორუმის მიზანს მოხალისის როლისა და საქმიანობის პოპულარიზაცია, ორგანიზაციების და მოხალისეების ერთმანეთთან დაკავშირება წარმოადგენდა , რაც ხელს შეუწყობს , მოხალისეობრივი საქმიანობის სისტემურ ჩამოყალიბებას. ფორუმის პირველი ნაწილი ორგანიზაციებსა და მოხალისეებს შორის საქმიან გარიგებებს დაეთმო. ფორუმმა ერთმანეთთან დააკავშირა ვინც ეძებს მოხალისეებს და ვისაც სურს მოხალისეობა. თითოეულმა მოწვეულმა ორგანიზაციამ მოხალისეობის მსურველებს გააცნო ორგანიზაციის საქმიანობა და ორმხრივი შეთანხმების შემთხვევაში, გაფორმდა მათ შორის გარიგება. ფორუმზე მონაწილეობა მიიღო სულ 130-ზე მეტმა ადამიანმა, აქედან შედგა 32 გარიგება. მეორე ნაწილი კი ფორუმის გახსნას და მოწვეულ სტუმრებთან მისალმებას დაეთმო. ფონდი ,,აფხაზინტერკონტის’’ ხელმძღვანელმა, ბატონმა არჩილ ელბაქიძემ მისასალმებელი სიტყვით მიმართა მოწვეულ სტუმრებს, კიდევ ერთხელ ხაზი გაუსვა ფორუმის მიზანს და მნიშვნელობას, ისაუბრა ორგანიზაციის და იმ აქტივობების შესახებ, რაც, ფონდ „აფხაზინტერკონტს“ (AIC ) მოხალისეთა ჩართულობით განუხორციელებია. ფორუმს მიესალმა და აქტიური სამოქალაქო საზოგადოების როლზე ისაუბრა პროექტის განმახორციელებელი კონსორციუმის კონრად ადენაუერის ფონდის წარმომადგენელმა, ბატონმა დავით აფრასიძემ. მოხალისეობრივი საქმიანობის სისტემურ კომპონენტზე ისაუბრა განათლების განვითარებისა და დასაქმების ცენტრის (EDEC) წარმომადგენელმა, ნათია ნამიჭეიშვილმა. პროექტის – „სამოქალაქო საზოგადოების განვითარების ინიციატივა’’, რაჭა - ლეჩხუმის და ქვემო სვანეთის რეგიონული ჰაბის წარმომადგენელმა, ქალბატონმა თამარ ელბაქიძემ გააკეთა პრეზენტაცია, ფორუმის მონაწილეებს გააცნო ის მიზნები და ამოცანები, რასაც ზოგადად პროექტი, მოხალისეობა და მოხალისეობის ფორუმი ემსახურება. ფორუმის მსვლელობისას , ფორუმის მონაწილეებმა აქცენტი გააკეთეს მოხალისეობრივი საქმიანობის დადებით მხარეებზე, მოიყვანეს განვითარებული ქვეყნების სხვადასხვა მაგალითები, სადაც მოხალისეობრივი აქტიურობით ადგილობრივი მნიშვნელობის მრავალი პრობლემა მოგვარებულა და ხაზგასმით აღნიშნეს, რომ, მოხალისეობა განვითარებული სამოქალაქო საზოგადოების ერთ–ერთი მნიშვნელოვანი ნაწილია, რომ, მოხალისეობა და მოხალისეობრივი საქმიანობა, დემოკრატიული საზოგადოების განვითარების ერთ-ერთი მძლავრი იარაღია. მოხალისეობრივი საქმიანობების გააქტიურებისაკენ მოუწოდა თავიანთ თანატოლებს ,, საქართველოს მოხალისემ“ , ლენტეხის მუნიციპალიტეტის საჯარო სკოლის მოსწავლემ სალომე ლიპარტელიანმა, მან აღნიშნა, რომ, :– ,, მოხალისისათვის ყველაზე დიდი ჯილდო– არის ის სიამოვნება , რასაც ადამიანი მოხალისეობრივი საქმიანობიდან იღებს, რასაც უანგაროდ აკეთებს , ის თავისუფალი დრო, კი, რომელიც გაგვაჩნია, სწორედ ამ „ჯილდოს“ მოპოვებისათვის უნდა დავხარჯოთ. ღონისძიებაზე ნაჩვენები იყო ვიდეო რგოლები და ფოტო– კოლაჟები, რომლებიც მოხალისეობრივ საქმიანობებს ასახავდნენ, როგორ ქვეყნის მასშტაბით, ასევე მუნიციპალურ და რეგიონულ დონეებზე. განათლების განვითარებისა და დასაქმების ცენტრის (EDEC) წარმომადგენელმა ავთო მაჩიტაძემ კი, ფორუმის მონაწილეებს პროექტის ერთ–ერთი კომპონენტი – ,, დროის ბანკი’’, წარუდგინა, რომლის მიზანია ორმხრივი მოხალისეობის სისტემის განვითარება. გააცნო ინფორმაცია ,,დროის ბანკი’’–ს , http://www.timerepublik.com/-ზე დარეგისტრირების და იმ აქტივობების შესახებ, რაც შესაძლებელია აღნიშნული ვებ– გვერდის მეშვეობით. მოხალისეობრივი ფორუმი ორგანიზებული იყო ფონდი ,, აფხაზინტერკონტის , (AIC) -რაჭა– ლეჩხუმისა და ქვემო სვანეთის რეგიონული ჰაბის მიერ, განათლების განვითარების და დასაქმების ცენტრის (EDEC) მხარდაჭერით , პროექტის ,, სამოქალაქო საზოგადოების განვითარების ინიციატივა”- ფარგლებში. პროექტი მიზნად ისახავს საქართველოში სამოქალაქო საზოგადოების გარემოს გაუმჯობესებას, საზოგადოებრივი ორგანიზაციების გაძლიერებას და მათი ანგარიშვალდებულების გაზრდას მოქალაქეების მიმართ. პროექტი სამი წლის განმავლობაში ითვალისწინებს 110– ზე მეტ აქტივობის განხორციელებას და 80– მდე გრანტის გაცემას. ინიციატივის ღონისძიებებში ჩაერთვება სამოქალაქო საზოგადოების 2500 წარმომადგენლამდე მთელი საქართველოს მასშტაბით. პროექტს ახორციელებს კონსორციუმი კონრად ადენაუერის ფონდის ხელმძღვანელობით. კონსორციუმში შედიან: სამოქალაქო საზოგადოების ინსტიტუტი, საქართველოს სტრატეგიული კვლევებისა და განვითარების ცენტრი, კონსულტაციისა და ტრენინგების ცენტრი, განათლების განვითარების და დასაქმების ცენტრი.

სამეგრელო. 5-6 ივლისს, ტექნოპარკში ზუგდიდის ახალგაზრდული ცენტრის წევრებმა გაიარეს 2 დღიანი ვორქშოფი გაზეთების დიზაინის შექმნაზე.  „ვორქშოფის ფასილიტატორმა გიორგი ხალათიანმა მონაწილეებს გააცნო დიზაინის შექმნის სპეციფიკა და ახალგაზრდებმა დაამზადეს გამოსაცემი ბეჭდური მასალის (პროექტის ფარგლებში დაგეგმილი) ელექტრონული ვარიანტების სამუშაო ვერსიები. ვორქშოფის ბოლოს ახალგაზრდებმა ჩამოაყალიბეს ყოველთვიური გაზეთის დიზაინსა და შინაარსობრივ ნაწილზე პასუხისმგებელი გუნდები", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს SOS ბავშვთა სოფელს, ამიერიდან, შეგიძლიათ ონლაინ პლატფორმის საშუალებითაც დაუჭიროთ მხარი დაეხმარეთ, მზრუნველობამოკლებულ ბავშვებსა და სოციალურად დაუცველ ოჯახებს.  სრულად... წყარო: ორგანიზაციის ვებგვერდი სოციალურ ქსელში