თბილისი. საიტი www.shenmartav.ge შესაძლებლობას აძლევს მომხმარებელს, მიიღოს მის მიერ არჩეული დეპუტატების პარლამენტში მოღვაწეობის შესახებ ინფორმაცია, გაეცნოს უახლეს კანონპროექტებს და პირდაპირ დაუკავშირდეს თავის წარმომადგენელს საკანონმდებლო ორგანოში. ვებგვერდი „მშვიდობის, დემოკრატიის და განვითარების კავკასიურმა ინსტიტუტმა" და „საერთაშორისო გამჭვირვალობა – საქართველომ" ერთობლივი პროექტის ფარგლებში შექმნა.  საიტზე მომხმარებელს ასევე შეუძლია დააკვირდეს, რა გადაწყვეტილებებს იღებს მის მიერ არჩეული დეპუტატი, გაეცნოს მის კენჭისყრაში მონაწილეობის მაჩვენებლებს, შრომით ბიოგრაფიას და ყოველწლიური ქონებრივი დეკლარაციის ჩანაწერებს, წერილობით დაუსვას მას შეკითხვა საიტის ან მოკლე ტექსტური შეტყობინების საშულებით და იმავე გზით მიიღოს პასუხი.  პროექტის მომდევნო ეტაპზე იგეგმება ვებ–გვერდის გაფართოება და მასში ახალი კომპონენტების შეტანა. სრულად წყარო: transparency.ge

სამცხე–ჯავახეთი. 4 სექტემბერს  ახალციხის  ახალგაზრდულ  ცენტრში ახალგაზრდებისათვის სოციალური მედიის ტრენინგი ჩატარდა. მსმენელებს გააცნეს ინფორმაცია ცენტრის მიერ შექმნილ ინტერნეტ- პორტალის civics.ge-ს ონლაინ ბიბლიოთეკაში განთავსებული მასალების შესახებ, სადაც დაინტერესებული პირები  სოციალურ მედიაზე მოიძიებენ საჭირო ინფორმაციას. ტრენინგის მონაწილეემა განიხილეს აქტუალური თემები, რაზეც შემდგომ შექმნეს ბლოგები. აღნიშნული პროგრამის ერთ-ერთი მთავარი კომპონენტია სოციალური მედიის  ცოდნისა და უნარ-ჩვევების განვითარება მოსწავლეთა, მასწავლებელთა და სხვა  მიზნობრივ ჯგუფებში.

აჭარა. 4 სექტემბერს, ხანდაზმულთა სოციალურ ცენტრში, პენსიონერთა საყოველთაო დაზღვევის შესახებ საინფორმაციო შეხვედრა გაიმართა.  შეხვედრაზე  ქობულეთის  სამედიცინო ცენტრის  სამედიცინო მენეჯერმა  ცენტრის ბენეფიციარებს ჯანმრთელობის დაზღვევის  პოლისით გათვალისწინებული მომსახურებისა და სარგებლობის  წესების შესახებ  ინფორმაცია  მიაწოდა. სრულად  წყარო: awa.org.ge

სამცხე–ჯავახეთი. ასპინძის საჯარო სკოლაში, მცირე გრანტების პროექტის ფარგლებში,  გაიმართა ტრენინგ-შეხვედრა ამავე მუნიციპალიტეტის სოფლების  - ტოლოშისა და ოშორის საჯარო სკოლების სამოქალაქო კლუბისა და საინიციატივო ჯგუფების წარმომადგენლებთან. ტრენინგ-შეხვედრის მიზანი იყო ახალი საგრანტო კონკურსის თემატიკის  კვლევა და ახალგაზრდებისათვის ტრენინგის საშუალებით იმ უნარჩვევების დაუფლება, რომელიც მათ გაუადვილებს საგრანტო პროექტზე მუშაობას. პროექტს ახორციელებს ახალციხის ახალგაზრდული ცენტრი.

თბილისი. 5 სექტემბერს, ეროვნულ–დემოკრატიულმა ინსტიტუტმა (NDI)  საზოგადოებრივი აზრის კვლევის შედეგები წარმოადგინა. კვლევის თანახმად, მოსახლეობისთვის სამ უმთავრეს პრიორიტეტს სამუშაო ადგილები, ხელმისაწვდომი ჯანდაცვა და ტერიტორიული მთლიანობა წარმოადგენს. ასევე საპარლამენტო არჩევნებში  მოსახლეობის უმრავლესობა (77%) აპირებს მონაწილეობის მიღებას.  კვლევა 2012 წლის 31 ივლისიდან 12 აგვისტოს პერიოდში ჩატარადა, პირისპირი ინტერვიუ საქართველოს მასშტაბით 2,038 რესპონდენტს ჩაუტარდა. კვლევაში ასახულია მოსახლეობის დამოკიდებულება დემოკრატიის, რეფორმების, საგარეო და საშინაო პოლიტიკის, მედიის  მიმართ. პარტიათა რეიტინგს NDI  7 სექტემბერს გამოაქვეყნებს.  NDI-ის კვლევები დაფინანსებულია შვედეთის საერთაშორისო განვითარების და თანამშრომლობის სააგენტოს (SIDA) მიერ და მას ახორციელებს კავკასიის კვლევითი რესურსების ცენტრი (CRRC).

თბილისი. 5 სექტემბერს, სასტუმრო „თბილისი მარიოტში" ოთხმა საზოგადოებრივმა ორგანიზაციამ კოალიციური პროექტი წარადგინა. პროექტი აღმოსავლეთ–დასავლეთის მართვის ინსტიტუტის პროგრამის ფარგლებში ხორციელდება და მასში ჩართულია ეკონომიკური პოლიტიკის კვლევის ცენტრი,   ISET–ის კვლევითი ინსტიტუტი, ლიბერალური აკადემია და „საერთაშორისო გამჭვირვალობა – საქართველო". პროექტი მიზნად ისახავს ქართული საზოგადოების ინფორმირებულობის გაზრდას წინასააჩევნოდ პოლიტიკური პარტიების პროგრამების შესახებ. ამ პროგრამებს ძირითადად განიხილავენ ეკონომიკური და სოციალური პერსპექტივიდან. პროექტის ფარგლებში იმუშავებს ვებ–გვერდი, რომელიც ამომრჩეველს მიაწოდებს ინფორმაციას პოლიტიკუი პარტიების პოზიციების შესახებ სხვადასხვა საკითხთან მიმართებაში. პროექტის ფარგლებში ასევე განხორციელდება ექსპერტული შეფასებები არასამთავრობო ორგანიზაციების მიერ და მოეწყობა პოლიტიკური პარტიების დებატები შესაბამის საკითხებზე.  პროექტმა უკვე დღეიდან აიღო სტარტი და ხვალ, 12 საათზე ეროვნულ დემოკრატიული პარტიის ეკონომიკური პროგრამის პრეზენტაცია გაიმართება თბილისი მარიოტში. მომდევნო დებატებში მონაწილეობას მიიღებენ „ახალი მემარჯვენეები", „ქრისტიან–დემოკრატიული მოძრაობა" და კოალიცია „ქართული ოცნება". ლეიბორისტული პარტიისა და ერთიანი ნაციონალური მოძრაობის ეკონომიკუირი პროგრამების პრეზენტაციის თარიღები ჯერ ცნობილი არ არის.

ქვემო ქართლი.საგანმანათლებლო ინიციატივების ქართული ასოციაციის (სიქა) ორგანიზებით, 29 აგვისტოს, რუსთავის დემოკრატიული ჩართულობის ცენტრში, გაიმართა სემინარი „რატომ უნდა გავხდე მოხალისე". მოხალისის ცნება, მოხალისეობის მნიშვნელობა საზოგადოებრივ ცხოვრებაში, საქართველოსა და უცხოეთში ქართველი ახალგაზრდებისათვის მოხალისეობის პერსპექტივები - ეს გახლდათ სემინარის ძირითადი თემები. შეხვედრას დაესწრო 50-დე რუსთაველი და თბილისელი ახალგაზრდა. მონაწილეებმა მიიღეს პრაქტიკული ინფორმაცია ევროპული მოხალისეობრივ სერვისის პროგრამაში მონაწილეობის შესახებ. წყარო: ორგანიზაციის გვერდი სოციალურ ქსელში

თბილისი. კლიმატის ცვილებებთან ადაპტაციის, ბუნებრივი კატასტროფების რისკის შემცირებისა და ბიომრავალფეროვნების დაცვის საკითხების თემატიკაზე იყო შექმნილი ქართველი, სომეხი და აზერბაიჯანელი ბავშვების ნამუშევრები, რომელთა გამოფენაც 29 აგვისტოდან 2 სექტემბრის ჩათვლით თბილისში, სამხატვრო გალერეა „ბაიაში" მოეწყო. ბავშვთა ნახატების გამოფენა მიზნად ისახავდა ამ საკითხების გარშემო საზოგადოების ცნობიერების ამაღლებას და განათლებას. ღონისძიება გარემოსდაცვის სამინისტროს ეგიდით მიმდინარე გარემოსდაცვითი განათლების კვირეულის ფარგლებში ჩატარდა. გამოფენის ორგანიზატორი გახლდათ ევროკავშირის მიერ დაფინანსებული გარემოსდაცვითი პროგრამა, რომელსაც ახორციელებენ საერთაშორისო ორგანიზაცია Mercy Corps და კავკასიის გარემოსდაცვითი არასამთავრობო ორგანიზაციების ქსელი CENN წყარო: CENN

თბილისი. კოალიციამ „დამოუკიდებელი ცხოვრებისთვის" მთელი საქართველოს მასშტაბით, შეზღუდული შესაძლებლობების მქონე პირთა საარჩევნო საჭიროებების დადგენის მიზნით, კვლევა დაიწყო. აღნიშნული აქტივობა დაეხმარება შეზღუდული შესაძლებლობის მქონე პირებს ხელმისაწვდომი და თანაბარი საარჩევნო გარემოს შექმნაში. სრულად წყარო: disability.ge

იმერეთი. 31 აგვისტოს ეროვნული კონკურსის „ალიანტე 2012" ფინალში გამარჯვებულები გამოვლინდნენ. ინტელექტუალური და ფიზიკური ასპარეზობების შემდეგ „ალიანტე 2012" ფინალისტები თბილისის, ბათუმისა და საჩხერის გუნდები გახდნენ. გამარჯვებულები, ჩეხეთის პარტნიორი ორგანიზაციის „ევროატლანტიკური ასოციაციის" (JAGELLO) თანამშრომლობის ფარგლებში, სექტემბრის შუა რიცხვებში ჩეხეთში გაემგზავრებიან. მათ საგზურები, სამოგზაურო დაზღვევები, სერტიფიკატები და სხვა პრიზები გადაეცათ. დახურვის ცერემონიალს თავდაცვის მინისტრის მოადგილე, ნატოს სამეკავშირეო ოფისის და სადაზღვევო კომპანია „ირაოს" წარმომადგენლები დაესწრნენ.  ეროვნულ კონკურსი „ალიანტე" საერთაშორისო კონკურს „ალიანტეს" ანალოგია, რომელსაც „ახალი თაობა – ახალი ინიციატივა" 2008 წლიდან ახორციელებს. პროექტის მიზანია ახალგაზრდების ცნობიერების ამაღლება უსაფრთხოების, ჩრდილო-ატლანტიკური ალიანსისა და საერთაშორისო ურთიერთობების საკითხების შესახებ. პროექტი ითვალისწინებს მულტინაციონალურ ჯგუფებში ფიზიკურ და ინტელექტუალურ ასპარეზობებს. ეროვნულ კონკურს „ალიანტე 2012" ფინალში მონაწილეობა 25 გუნდმა მიიღო. სრულად 

თბილისი. საზოგადოებრივი ორგანიზაციების  – „სამართლიანი არჩევნებისა და დემოკრატიის საერთაშორისო საზოგადოების", „ახალგაზრდა იურისტთა ასოციაციისა" და „საერთაშორისო გამჭვირვალობა – საქართველოს" წარმომადგენლებმა, 4 სექტემბერს, პრესკონფერენცია გამართეს. საზოგადოებას მათ საარჩევნო პორტალზე დაფიქსირებული წინასაარჩევნო დარღვევები გააცნეს. სამი საზოგადოებრივი ორგანიზაციის წარმომადგენლებმა ისაუბრეს საქართველოს მასშტაბით რომელ რეგიონებში ფიქსირდება ყველაზე მეტი დარღვევა და რა სახის დარღვევები ჭარბობს. სრულად  წყარო: gyla.ge

გურია. ოზურგეთის ახალგაზრდა პედაგოგთა კავშირთან არსებულ მცირე საოჯახო ტიპის სახლს ფილოლოგი ზაალ ჩხეიძე ესტუმრა. სამუშაო შეხვედრა 23 აგვისტოდან 25 აგვისტოს ჩათვლით მიმდინარეობდა. მოზარდები სამი დღის განმავლობაში ლიტერატურასა და ისტორიაზე ისმენდნენ სემინარს. შეხვედრას სახლის ბინადარ ბავშვებთან ერთად ლიდერთა სკოლის ათამდე მოსწავლე ესწრებოდა. შეხვედრის განმავლობაში სემინარის წამყვანმა ისაუბრა ადამიანის თავისუფლების არსზე და მის მნიშვნელობაზე, მოზარდებს მოუთხრო იმ ნაკლებად ცნობილი ფაქტების შესახებ, რომლებმაც ისტორია შექმნეს. ასევე, ისაუბრა მითოლოგიის მნიშვნელობაზე. სემინარის მეორე ნაწილი ლიტერატურას დაეთმო. განიხილეს „ვეფხისტყაოსანის" მთავარი იდეა, გაავლეს პარალელები ცნობილ ნაწარმოებებთან და დაახასიათეს პერსონაჟები; ისაუბრეს მხატვრულ ნაწარმოებში არსებული იმ ნაწილის შესახებ, რომელიც ტექსტში თვალნათლივ არ წერია და ადამიანმა უნდა ამოიკითხოს. სემინარის განმავლობაში ბავშვებს შესაძლებლობა ჰქონდათ გაეგოთ ცნობილი მწერლებისა და პოეტების ცხოვრების უცნობი ფაქტების შესახებ. მესამე დღეს ტრენერმა ბავშვებთან ერთად განიხილა უილიამ ტერნერის ორი ნახატი. ისაუბრა მხატვრობაში განსხვავებული ხედვის შესახებ, რომელიც კავშირშია ლიტერატურასთან. სემინარის მონაწილეები აღნიშნავდნენ რომ სამი დღის განმავლობაში მიღებული ინფორმაცია ძალიან საინტერესო იყო და ისურვებდნენ მსგავსი ღონისძიებების მომავალში გაგრძელებას.

თბილისი.3 სექტემბერს ნიდერლანდების ინსტიტუტმა მრავალპარტიული დემოკრატიისათვის (NIMD) ვებ–გვერდის (www.partiebi.ge) პრეზეტნაცია გამართა. ვებგვერდზე საზოგადოებას შეუძლია გაეცნოს, სპეციალური კითხვარის მიხედვით საარჩევნო სუბიექტების ხედვებს, შეადაროს ისინი და გაუგზავნოს კითხვები. ამჟამად ვებგვერდზე განთავსებულია ერთიანი ნაციონალური მოძრაობის, კოალიცია ქართული ოცნების, ქრისტიან–დემოკრატიული მოძრაობის, ახალი მემარჯვენეებისა და ლეიბორისტული პარტიის პროგრამები. ვებგვერდი საქართველოში ჰოლანდიის საელჩოს ფინანსური მხარდაჭერით შეიქმნა.   სრულად წყარო: nimd.ge

შიდა ქართლი. „ირის ჯგუფი – მრავალფეროვნების მართვისა" და დემოკრატიული ჩართულობის გორის ცენტრის მხარდაჭერით, გორში ხორციელდება პროექტი „ შეუერთდი სამოქალაქო განათლებას". პროექტის ფარგლებში გორის რაიონში მცხოვრები 15-17 წლის ახალგაზრდებისთვის ჩატარდება სემინარები და ვორქშოფები ისეთ თემებზე, როგორიცაა ადამიანის უფლებები, ლიდერობა და გუნდური მუშაობა და სხვა. მონაწილეთა შერჩევა მოხდება აპლიკაციისა და გასაუბრების საფუძველზე. სემინარები გაიმართება 22-23 და 29-30 სექტემბერს გორში. სრულად

თბილისი. 3 სექტემბერს ეროვნულ–დემოკრატიულმა ინსტიტუტმა (NDI) გრძელვადიანი სადამკვირვებლო მისიის წინასწარი შეფასებები წარადგინა. ანგარიში 3-27 აგვისტოს პერიოდს მოიცავს. მისიის წევრებმა 24 ოლქი მოინახულეს და ჩაატარეს 120–ზე მეტი შეხვედრა მთავრობისა და საარჩევნო ადმინისტრაციის თანამდებობის პირებთან, პოლიტიკური პარტიებისა თუ სამოქალაქო საზოგადოებისა და მედიის წარმომადგენლებთან. არჩევნების დღის მიმდინარეობას NDI დაახლოებით 20 მოკლევადიანი დამკვირვებლის მეშვეობით დააკვირდება ეროვნულ–დემოკრატიული ინსიტუტის (NDI). გრძელვადიანი საარჩევნო სადამკვირვებლო მისიის შუალედური ანგარიში  (3–27 აგვისტო, 2012) წყარო: civil.ge

4 სექტემბერს, 13:00 საათზე „სამართლიანი არჩევნებისა და დემოკრატიის საერთაშორისო საზოგადოება", „საქართველოს ახალაზრდა იურისტთა ასოციაცია" და „საერთაშორისო გამჭვრივალობა–საქართველო" პრესკონფერენციას გამართავენ. თემა: საარჩევნო პორტალზე  (www.electionsportal.ge) საქართველოს მასშტაბით დაფიქსირებული დარღვევები..  მისამართი: თბილისი, ონიაშვილის ქ. #37

თბილისი. სამოქალაქო საზოგადოების ინსტიტუტმა გამოაქვეყნა რეგიონული ჟურნალისტებისთვის გამართული კონკურსის შედეგები. კონკურსი, რომლის თემა იყო „სამოქალაქო აქტივობა!", მიზანდ ისახავდა სამოქალაქო აქტივობის, საზოგადოებრივი ორგანიზაციების საქმიანობის და მოქალაქეთა ინიციატივების უფრო ფართოდ და ღრმად გაშუქების ხელშეწყობას. კონკურსი გაიმართა 3  ნომინაციაში: საუკეთესო საგაზეთო სტატია; საუკეთესო სატელევიზიო სიუჟეტი; საუკეთესო რადიო სიუჟეტი. კონკურსის ჟიურიმ (ზვიად ქორიძის, დავით პაიჭაძის და სოსო სიმონიშვილის შემადგენლობით) გამოავლინა გამარჯვებული ჟურნალისტები. ჟიურის გადაწყვეტილებით, საუკეთესო სტატიისა და საუკეთესო რადიო-სიუჟეტის ნომინაციებში გამარჯვებული არ გამოვლინდა. საუკეთესო სატელევიზიო სიუჟეტის ნომინაციაში გამოვლინდა 2 გამარჯვებული: მარიამ აშუღაშვილი (კახეთი)  და  ნინო ჩიბჩიური(შიდა ქართლი), რომელთაც გადაეცემათ 500-500 ლარი; საუკეთესო სტატიის ნომინაციაში წამახალისებელი პრემია (300 ლარი) გადაეცემა თემურ მარშანიშვილს (გურიის მოამბე, ოზურგეთი); სამოქალაქო საზოგადოების ინსტიტუტის სპეციალური პრიზი და 500 ლარი გადაეცემა გოგა აფციაურს (რადიო თავისუფლება, გორი).

აჭარა. ნიდერლანდების მრავალპარტიული დემოკრატიის ინსტიტუტის და ფრიდრიხ ნაუმანის ფონდის თანამშრომლობით, 2012 წლის ოქტომბრიდან ბათუმში დემოკრატიის სკოლა გაიხსნება. სკოლა ითვალისწინებს ხუთთვიან საგანმანათლებლო პროგრამას, რომლის ფარგლებშიც მონაწილეები გაეცნობიან თანამედროვე უნარების, დემოკრატიული მმართველობის, ლიდერობის და სოციალური მეწარმეობის ძირეულ საკითხებს. ტრენინგებს ჩაატარებენ პრაქტიკოსები და ექსპერტები საქართველოდან და საზღვარგარეთიდან. მონაწილეები ასევე ისარგებლებენ ელექტრონული სასწავლო გარემოთი და მცირე გრანტების კონკურსში მონაწილეობის შესაძლებლობით. პროგრამაში მონაწილეობა შეუძლიათ დაინტერესებულ მოქალაქეებს, საზოგადოებრივი ორგანიზაციების, ადგილობრივი თვითმმართველობის, პოლიტიკური და მედია ორგანიზაციების წარმომადგენლებს. ბათუმის დემოკრატიის სკოლაში მონაწილეობისთვის განაცხადის წარდგენის ბოლო ვადაა 15 სექტემბერი. დამატებითი ინფორმაცია წყარო: nimd.ge

კახეთი. „ახალი თაობა – ახალი ინიციატივას" ორგანიზებით კაჭრეთში პოლიტიკოს ლიდერთა სკოლის კურსდამთავრებულთათვის სამდღიანი ტრენინგი გაიმართა ისეთ საკითხებზე, როგორიცაა პოლიტიკური კულტურა, არჩევნების თეორია, პარტიული სისტემები და სხვა. პროექტი „ახალგაზრდა პოლიტიკოს ლიდერთა სკოლა" მიზანად ისახავდა ახალგაზრდა ლიდერების პოლიტიკურ პროცესში ჩართულობის ხელშეწყობას საქართველოს სხვადასხვა რეგიონებში: სამეგრელოში, იმერეთში, კახეთში, შიდა და ქვემო ქართლში. პროექტი აშშ-ს საერთაშორისო რესპუბლიკური ინსტიტუტისა (IRI) და აშშ-ს საერთაშორისო განვითარების სააგენტოს (USAID) ხელშეწყობით განხორციელდა. სრულად წყარო: ორგანიზაციის გვერდი სოციალურ ქსელში

თბილისი. „სამართლიანი არჩევნებისა და დემოკრატიის საერთაშორისო საზოგადოება"  წინასაარჩევნო გარემოს მონიტორინგის მეხუთე შუალედურ ანგარიშს აქვეყნებს. ანგარიში მოიცავს შემდეგ პერიოდს – 2012 წლის 1 აგვისტოდან 26 აგვისტოს ჩათვლით. ამ დროის განმავლობაში „სამართლიანი არჩევნები" წინასაარჩევნო პერიოდის მონიტორინგს რამდენიმე მიმართულებით ახორციელებდა, კერძოდ, მონიტორინგს უწევდა: საქართველოში მოქმედ საარჩევნო 73 ადმინისტრაციის საქმიანობას; პოლიტიკური პარტიების/საარჩევნო სუბიექტების მიერ გამართულ საჯარო შეხვედრებსა და სხვა პოლიტიკურ აქტივობებს; ადმინისტრაციული რესურსის არამიზნობრივად გამოყენების ფაქტებს; პოლიტიკური ნიშნით ზეწოლა/მუქარის, პოლიტიკური საქმიანობისათვის ხელის შეშლისა და ამომრჩევლის მოსყიდვის შემთხვევებს. ორგანიზაცია აგრძელებს წინასაარჩევნო გარემოს მონიტორინგს და მომდევნო ანგარიშს სექტემბრის მეორე ნახევარში წარადგენს. წინასაარჩევნო გარემოს მონიტორინგის მეხუთე შუალედური ანგარიში წყარო: isfed.ge

აჭარა. 31 აგვისტოს, „სამოქალაქო მრჩეველთა კომიტეტმა" საზოგადოებრივ ორგანიზაციებსა და მედიის წარმომადგენლებს კომიტეტის მოდიფიცირების პროექტი წარუდგინა. აღნიშნული პროექტი „სამოქალაქო საზოგადოების ინსტიტუტმა" შეიმუშავა.  „სამოქალაქო მრჩეველთა კომიტეტი"  თვითმმართველ ქალაქ ბათუმის საკრებულოსთან არსებული საკონსულტაციო ორგანოა, რომლის მიზანია მოქალაქეთა ჩართულობის მექანიზმის გაძლიერება საკრებულოს საქმიანობაში, შენიშვნებისა და რეკომენდაციების წარდგენა. „სამოქალაქო მრჩეველთა კომიტეტის" ფორმირების პროექტის მიხედვით, თვითმმართველ ქალაქ ბათუმის ყველა ტერიტორიულ ერთეულში უნდა შეიქმნას საზოგადოებრივი დარბაზები, რომლებიც თავის მხრივ, მოქალაქეთა ჩართულობის უფრო მჭიდრო მექანიზმს შექმნიან. ახალი პროექტით, კომიტეტი წევრები იქნებიან საზოგადოებრივი დარბაზის თითო წარმომადგენელი და ქალაქ ბათუმში მოქმედი საზოგადოებრივი ორგანიზაციების, ბიზნეს სექტორის და მასმედიის საშუალებების ორ–ორი წარმომადგენელი. მათი არჩევა კი შესაბამისი ორგანიზაციის მიერ მოხდება. პრეზენტაციის შემდეგ გაიმართა დისკუსია. განსახილველ საკითხთა შორის მოექცა როგორც კომიტეტის საქმიანობის ეფექტიანობა, ისე მისი სახელწოდების მოდიფიცირების საკითხი.

8 სექტემბერს, 14:00 საათზე, დემოკრატიული ჩართულობის ცენტრში „ლიბერალური კლუბი" გამართავს დისკუსიას თემაზე – „პოლიტიკური კულტურა ქართულ საზოგადოებაში". მისამართი: ქუთაისი, პუშკინის #6, დემოკრატიული ჩართულობის ცენტრი