სამცხე–ჯავახეთი. „აგრო განვითარების ჯგუფი" 14 სექტემბრიდან სამცხე-ჯავახეთში (ახალციხის, ადიგენის, ასპინძის, ნინოწმინდისა და ახალქალაქის მუნიციპალიტეტები) ფერმერთა მომსახურების ცენტრებისა და ვეტაფთიაქების განვითარება-გაძლიერებას იწყებს. ორგანიზაციის მიზანია აღნიშნულ რეგიონში თანამედროვე ტექნოლოგიების შეტანა და დანერგვა, ფერმერებთან და ვეტექიმებთან საგანმანათლებლო-საკვალიფიკაციო საქმიანობა. ასევე დაგეგმილია აღნიშნული მუნიციპალიტეტების მონაცემთა ბაზის (ცხოველთა და ფერმერთა სტატისტიკა, დაავადებების აღრიცხვა) წარმოება. სრულად წყარო: agro.ge

აჭარა. ასოციაცია ,,ღირსეული სიბერის” საქველმოქმედო კვირეული – ,,ჩვენც დავბერდებით” –დასრულდა. კვირეული პროექტის ,,ხანდაზმულთა სოციალური ცენტრის” ფარგლებში მიმდინარეობდა და მისი მიზანი იყო საზოგადოებაში  ქველმოქმედების და მოხალისეობის  კულტურის  განვითარებისთვის  ხელშეწყობა. კვირეულის ფარგლებში, ქობულეთის კულტურის ცენტრის თაოსნობით, ანსამბლ ,,ქობულეთის” კონცერტი გაიმართა. პარალელურად მიმდინარეობდა ხანდაზმულების მიერ დამზადებული სამკაულების და სუვენირების გამოფენა -გაყიდვა, შეგროვდა შემოწირულობა, დარიგდა საინფორმაციო მასალა. შემოწირულობა შეაგროვა  ახალგაზრდა მოხალისეთა   ჯგუფებმა. შეგროვილი თანხა მოხმარდა  უმწეო ხანდაზმულთათვის საკვები პროდუქტების შეძენას, რომლებიც  მარიამობის დღესასწაულზე,  ასოციაციის 100 ბენეფიციარს გადაეცა.   ვიდეო სრულად წყარო: www.awa.org.ge

სამცხე–ჯავახეთი. სექტემბრის ბოლოს საქართველო უმასპინძლებს გარემოსდაცვითი განათლების საკითხებისადმი მიძღვნილ საერთაშორისო კონფერენციას - ,,გარემოსდაცვითი განათლება მდგრადი განვითარებისთვის: თბილისი+35” . აღნიშნულ კონფერენციას წინ უსწრებს გარემოსდაცვითი კვირეული, რომელიც აერთიანებს ეროვნულ დონეზე სხვადასხვა დაინტერესებულ მხარეთა მიერ ორგანიზებულ გარემოსდაცვით საგანმანათლებლო ღონისძიებებს. კვირეულის ფარგლებში 30 აგვისტოს, სამცხე-ჯავახეთის რეგიონული გარემოსდაცვითი კავშირის ,,ეკოდახისა” და ახალციხის დემოკრატიული ჩართულობის ცენტრის ინიციატივით მოეწყო დისკუსია თემაზე: ,,ეკოტურიზმის განვითარების მნიშვნელობა საქართველოში”. ღონისძიებას სტუდენტები, არასამთავრობო და სამთავრობო ორგანიზაციების წარმომადგენლები ესწრებოდნენ. დისკუსიის მონაწილეები გაეცვნენ ინფორმაციას ეკოტურისტული აქტივობების და სერვისების, განახლებული ინფრასტრუქტურისა და ეკოტურიზმის მნიშვნელობის, ფასეულობების, ეკონომიკური და სოციალური სარგებლობის შესახებ. მონაწილეებს აჩვენეს ფილმი ,,საქართველოს დაცული ტერიტორიები”, გადასცეს ბუკლეტები და გზამკვლევი რუკები.  

კახეთი. გურჯაანის საინიციატივო ჯგუფმა, ,,სიკეთე ჩვენი ვალია", გაჭირვებულ ოჯახებში მცხოვრები ბავშვებისთვის დახმარების კამპანია წამოიწყო. პირველ სექტემბერს, ორგანიზაცია სოფელ ახაშნის უკიდურესად  გაჭირვებულ 3 ოჯახს დაეხმარა.  გიორგი მამულაშვილი, ჯგუფის ლიდერი: ,,ჩვენი მიზანია, მუნიციპალიტეტის ყველა სოფელში სადაც ჯგუფს ხელი მიუწვდება გამოვავლინოთ უკიდურესად გაჭირვებული ოჯახები, მივაწოდოთ ინფორმაცია საზოგადოებას და თავადაც შევიტანოთ  წვლილი მათ დასახმარებლად".  დახმარების მსურველებს შეუძლიათ დაუკავშირდნენ საინიციატივო ჯგუფის წევრებს.

იმერეთი.  31 აგვისტოს, ზედოზირების შესახებ საზოგადოების ცნობიერების ამაღლების საერთაშორისო დღე აღინიშნა. ჯანმრთელობის უფლების განხორციელების ხელშეწყობის ცენტრმა „რუბიკონმა" მოქალაქეთა ჯგუფისთვის პრაქტიკული მეცადინეობა ჩაატარა თემაზე: „რა არის ზედოზირება და როგორ დავეხმაროთ ზედოზირებულს ექიმის მისვლამდე."  შეხვედრაზე „რუბიკონის" ხელმძღვანელმა რატი ასათიანმა ასევე ისაუბრა ზედოზირებით გამოწვეულ სიკვდილიანობის შემთხვევებსა და აღრიცხვიანობაზე.  ჯანმრთელობის უფლების განხორციელების ხელშეწყობის ცენტრ „რუბიკონში" აცხადებენ, რომ მსგავსი შეხვედრები მომავალშიც გაიმართება.

კახეთი. თელავის დემოკრატიული ჩართულობის ცენტრში ,,30 აგვისტოს"  კოალიციამ ,,არჩევნების თავისუფლებისათვის” შეხვედრა გამართა, სადაც კამპანიის ,,ეს შენ გეხებას” მიერ წინასაარჩევნოდ პარტიებისთვის შემუშავებული ქცევის წესები გააცნო საზოგადოებას.  პრეზენტატორების განცხადებით, მუნიციპალიტეტებში ამგვარი კონფერენციების ჩატარება არჩევნების პროცესების მშვიდ, სამართლიან და კონკურენტულ გარემოში წარმართვას უწყობს ხელს.  კოალიციის წევრის ირაკლი მელაშვილის თქმით კამპანიის ფარგლებში უკვე მეთორმეტე შეხვედრა გაიმართა. შეხვედრები საქართველოს მასშტაბით რეგიონულ ცენტრებში ტარდება. ორგანიზატორები ხვდებიან ადგილობრივი საზოგადოებრივი ორგანიზაციების, მედიის და პარტიების წარმომადგენლებს: „ვაცნობთ „ეს შენ გეხებას" მთავარ მიზნებს, ამოცანებს, რას ვაკეთებთ, რა პრობლემები დგას და გარდა ამისა, ვიღებთ ინფორმაციას პირველწყაროდან, თუ რა ვითარებაა წინასაარჩევნოდ ქვეყანაში", – აცხადებს მელაშვილი.

იმერეთი.  31 აგვისტოს, „სამართლიანი არჩევნებისა და დემოკრატიის საერთაშორისო საზოგადოების" ოფისში შეხვედრა გაიმართა, რომელშიც მონაწილეობას იღებდნენ საზოგადოებისა და არასამთავრობო ორგანიზაციების წარმომადგენლები. საუბარი შეეხო რამდენიმე საკითხს: საარჩევნო თემატიკაზე მოსახლეობის ინფორმირებას, განსაკუთრებით ახალგაზრდების, რათა ისინი აქტიურად ჩაერთონ ქვეყანაში მიმდინარე პროცესებში. ასევე ახალგაზრდა იურისტთა ასოციაციის წარმომადგენელმა ისაუბრა მათ მიერ ჩატარებულ წინასაარჩევნო მონიტორინგზე. საიას წარმომადგენლის ინფორმაციით, ანგარიშში დაფიქსირებულია ზეწოლის ფაქტები, მატერიალურ–ტექნიკური თუ ადამიანური რესურსების არამიზნობრივი გამოყენება. როგორც შეხვედრაზე არასამთავრობო სექტორის წარმომადგენლებმა აღნიშნეს, მსგავსი შემთხვევების თავიდან აცილების მიზნით, მნიშვნელოვანია ადგილობრივი თვითმმართველობის მოხელეების სრულად ინფორმირება.

თბილისი. ორგანიზაცია „იდენტობა” როგორც დამწყებ, ასევე მომავალ ფსიქოლოგებს 2012 წლის 10 სექტემბერს უფასო ტრენინგს სთავაზობს ლგბტ საკითხებში. ტრენინგში მონაწილეობა საქართველოში აკრედიტებული ნებისმიერი უმაღლესი სასწავლებლის ფსიქოლოგიის შესწავლით დაინტერესებულ სტუდენტს შეუძლია. ტრენინგი ხორციელდება ნიდერლანდების საელჩოს მხარდაჭერით საგანმანათლებლო პროექტის ფარგლებში, რომლის მიზანი ქართველ სტუდენტებში ლგბტ (ლესბოსელი, გეი, ბი, ტრანსგენდერი) საკითხებისადმი ცნობიერების ამაღლება.  სარეგისტრაციო ფორმის შევსება 2012 წლის 8 სექტემბრამდე არის შესაძლებელი სრულად წყარო: identoba.com

სამცხე–ჯავახეთი, კახეთი. „სამართლიანი არჩევნებისა და დემოკრატიის საერთაშორისო საზოგადოება" და საქართველოს ახალგაზრდა იურისტთა ასოციაცია რეგიონებში საარჩევნო პორტალის პრეზენტაციას მართავენ. წინა კვირას პრეზენტაციები გაიმართა ახალციხეში (დემოკრატიული ჩართულობის ახალციხის ცენტრში), ასევე გურჯაანში (სამართლიანი არჩევნების ოფისში). შეხვედრებს ესწრებოდნენ ადგილობრივი საზოგადოების, საზოგადოებრივი ორგანიზაციებისა და პოლიტიკური პარტიების წარმომადგენლები. პორტალის მიზანია ყოვლისმომცველი ინფორმაციის მიწოდება 2012 წლის საპარლამენტო არჩევნების შესახებ საზოგადოებისთვის. მასზე განთავსდება ინფორმაცია წინასაარჩევნო პერიოდში, არჩევნების დღესა და არჩევნების შემდგომ პერიოდში გამოვლენილი დარღვევების შესახებ. არასამთავრობო ორგანიზაცია ,,სამართლიანი არჩევნების’’ კახეთის რეგიონული კოორდინატორის, ნანა დევიძის თქმით: ,,პორტალზე დადებული ინფორმაციით შეუძლიათ ისარგებლონ სხვადასხვა არასამთავრობო ორგანიზაციებმა, მედიასაშუალებებმა, პოლიტიკური პარტიების წარმომადგენლებმა, არჩევნებით დაინტერესებულმა პირებმა და სხვა. რაც ყველაზე მთავარია მოქალაქეებს საშუალება ექნება საიტზე თავად განათავსონ ინფორმაცია საარჩევნო პერიოდის სავარაუდო დარღვევებსა და ინციდენტების შესეხებ. გარდა ამისა ასევე მუშაობს უფასო sms ნომერი 2500, რომელზედაც ინფორმაციის გაგზავნა ნებისმიერ მოქალაქეს შეუძლია ნებისმიერი  მობილური ქსელიდან.’’  

3 სექტემბერს, 12:00 საათზე, "სამართლიანი არჩევნებისა და დემოკრატიის საერთაშორისო საზოგადოება" წინასაარჩევნო გარემოს მონიტორინგის მეხუთე შუალედურ ანგარიშს გამოაქვეყნებს.  მისამართი: ონიაშვილს ქ. #37

თბილისი. 31 აგვისტოს, სამოქალაქო საზოგადოების ინსტიტუტის ორგანიზებით გაიმართა შეხვედრა, სადაც წარადგინეს საზოგადოებრივი ორგანიზაციების დაბეგვრის თემაზე შექმნილი გზამკვლევი. გზამკვლევის ზოგად ნაწილში მოცემულია ინფორმაცია არასამეწარმეო იურიდიული პირის (ააიპ) დაარსების, საქმიანობის სამართლებრივი ასპეტებზე, ასევე საქველმოქმედო ორგანიზაციის საქმიანობის მარეგულირებელ ნორმებზე, არასამეწარმეო იურიდიული პირების შემოსავლის წყაროებზე და ა.შ. დოკუმენტის კერძო ნაწილში ყურადღება გამახვილებულია სამოქალაქო საზოგადოებრივ ორგანიზაციათა დაბეგვრის თავისებურებებსა და იმ შეღავათებზე, რომლებიც დაკავშირებულია არასამეწარმეო იურიდიულ პირებსა და საქველმოქმედო ორგანიზაციების საქმიანობასთან. გზამკვლევი მომზადდა ,,აღმოსავლეთ-დასავლეთის მართვის ინსტიტუტისა’’ და მის მიერ მართული პროექტის – „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.  დოკუმენტი მიზნად ისახავს, ხელი შეუწყოს არასამეწარმეო (არაკომერციულ) იურიდიულ პირების ფინანსურ სტაბილურობას და ასევე დაეხმაროს საზოგადოებრივ ორგანიზაციებს, კანონით გათვალისწინებული საგადასახადო უფლებების და ვალდებულებების რეალიზებაში.  არასამეწარმეო იურიდიული პირების დაბეგვრის თავისებურებები საქართველოში (გზამკვლევი)

იმერეთი. დღეს, ქუთაისში, დემოკრატიული ჩართულობის ცენტრში გაიმართა შეხვედრა-დისკუსია თემაზე „ქალაქ ქუთაისისა და იმერეთის რეგიონის ნარჩენების მართვის საკითხების შესახებ". დიალოგი ქ.ქუთაისსა და იმერეთის რეგიონის ნარჩენების მართვის საკითხებზე არასამთავრობო ორგანიზაციების, ადგილობრივი მმართველობისა და თვითმართველობების, ასევე კერძო ბიზნესის წარმომადგენლებს შორის გაიმართა. შეხვედრის მიზანს ნარჩენების მართვის საკითხებზე გამოცდილების გაზიარება და საზოგადოების ჩართულობის გაზრდაის შესაძლებლობების განხილვა წარმოადგენდა. შეხვედრა გარემოსდაცვითი განათლების კვირეულის ფარგლებში – „დავასუფთავოთ საქართველო - საზოგადოების ცნობიერების ამაღლება და მისი ჩართვა მყარი საყოფაცხოვრებო ნარჩენების მართვის გაუმჯობესების პროცესში" – იმართება. აღნიშნული პროექტი ხორციელდება არასამთავრობო ორგანიზაციათა კონსორციუმის - საქართველოს მწვანეთა მოძრაობა/დედამიწის მეგობრები-საქართველო და მდგრადი განვითარების კავშირის „ეკოხედვის" მიერ. შეხვედრის ადგილობრივი ორგანიზატორები არიან: სამეცნიერო-ინტელექტუალური კლუბი „თაობათა დიალოგი” და საქართველოს მწვანეთა მოძრაობის რეგიონული წარმომადგენელი.

თბილისი. 21–23 აგვისტოს, ფონდ „ღია საზოგადოება– საქართველოს" მიერ დაფინანებული პროექტის – „არც ერთი ბავშვი განათლების გარეშე" – ფარგლებში გაიმართა შეხვედრა. მონაწილეებმა განიხილეს სამ საგანში (წიგნიერება, მათემატიკური წიგნიერება, სასიცოცხლო) შექმნილი დამხმარე სახელმძღვანელოების აპრობაციის შედეგები საქართველოსა და აზერბაიჯანში. შედეგები მოიცავს 2011–2012 სასწავლო წელს. ქართულ მხარეს წარმოადგენდა თამარ მოსიაშვილი, სამოქალაქო განვითარების ინსტიტუტის განათლების მიმართულების ხელმძღვანელი. შეხვედრის დასასრულს მახარეებმა განიხილეს სამომავლო პარტნიორობის შესაძლებლობა სრულად წყარო: cdi.org.ge

თბილისი. ადამიანის უფლებათა ცენტრმა გამოქვეყნა საპარლამენტო არჩევნების გაშუქების მედიამონიტროინგის ანგარიში.  მონიტორები 30 ივლისი –12 აგვისტოს შუალედში აკვირდებოდნენ შემდეგ ტელეარხებზე გასულ პოლიტიკურ, სოციალურ და პოლიტიკურ რეკლამებს:  საზოგადოებრივი მაუწყებელი, „იმედი", „რუსთავი 2", „კავკასია", „მაესტრო" და „მე-9 არხი". მედიამონიტორინგი ხორციელდება ამერიკის საერთაშორისო განვითარების სააგენტოს (USAID) დაფინანსებული ოთხწლიანი პროექტის „ნდობის გაზრდა საარჩევნო პროცესებისადმი"  ფარგლებში, რომელსაც ახორციელებს საარჩევნო სისტემების საერთაშორისო ფონდი (IFES). საპარლამენტო არჩევნების გაშუქების მედიამონიტორინგი (30 ივლისი – 12 აგვისტო)

იმერეთი.ქუთაისის განათლების განვითარების და დასაქმების ცენტრის ორგანიზებით 23–27 აგვისტოს ჩატარდა ტრენინგი შშმ პირთა საკითხებით დაინტერესებული ორგანიზაციების მიერ ჩამოყალიბებული საკოორდინაციო საბჭოს წევრებისთვის. ტრენინგზე ყურადღება გამახვილდა საბჭოს მუშაობის დახვეწაზე, ადვოკატირების და ლობირების ტექნიკებზე. ტრენინგს 15 ადამიანი დაესწრო ადგილობრივი თვითმმართველობიდან, არასამთავრობო ორგანიზაციებიდან, მედიიდან, სოციალური მომსახურების სააგენტოდან და ა.შ. ტრენინგის ბოლოს მონაწილეებმა შეიმუშავეს საბჭოს დებულება და მისი დაფუძნების შესახებ შეთანხმებას მოეწერა ხელი. სრულად წყარო: kedec.ge

გურია. 2012 წლის 1 ივლისიდან ოზურგეთის მუნიციპალიტეტში ხორციელდება პროექტი „გურიის რეგიონში ადგილობრივი ბიბლიოთეკების რესურს-ცენტრებად გადაქცევა". პროექტის განმახორციელებელია „ღირებულებათა ინსტიტუტი", პროექტის პარტნიორია „გურიის აგრობიზნესცენტრი", ასევე პარტნიორი და ბენეფიციარი „ოზურგეთის ცენტრალური ბიბლიოთეკა". პროექტის მიზანია ადგილობრივი თემების განვითარება თანამედროვე საინფორმაციო რესურსებზე ხელმისაწვდომობის  გაზრდის საშუალებით. აღნიშნულის მისაღწევად გაუმჯობესდა ბიბლიოთეკების მატერიალ-ტექნიკური ბაზა და ჩატარდა ტრენინგები ადგილობრივი თემის ლიდერების და ბიბლიოთეკარებისათვის.   პროექტი ხორციელდება ოზურგეთში და მუნიციპალიტეტში შემავალ შემდეგ სოფლებში: შრომაში, მთისპირში, ბახვში, შემოქმედში, მერიაში, ლიხაურშიი, თხინვალში, ურეკში.

31 აგვისტოს, 13:00 საათზე, სამოქალაქო საზოგადოების ინსტიტუტის ორგანიზებით გაიმართება შეხვედრა, რომელზეც წარმოდგენილი იქნება სამოქალაქო საზოგადოებრივი ორგანიზაციების დაბეგვრის თემაზე შექმნილი გზამკვლევი. მისამართი: თავისუფლების მოედანი 4, სასტუმრო „ციტადინი"

თბილისი. საერთაშორისო განათლების ამერიკული საბჭოები და საქართველოს ახალგაზრდული პარლამენტი იწყებენ ახალ პროექტს - „ახალი თაობა სამართლიანი არჩევნებისათვის". პროექტის ფარგლებში შეირჩევა 40 ახალგაზრდა, რომლებიც მოისმენენ სემინარებს ისეთ თემებზე, როგორიცაა ხელისუფლების შტოები, პოლიტიკური იდეოლოგიები, ქვეყანაში არსებული საარჩევნო სისტემა, საპარლამენტო, საპრეზიდენტო და ადგილობრივი თვითმმართველობის არჩევნები და ა.შ.  პროექტი ხორციელდება „მომავალ ლიდერთა გაცვლითი პროგრამის" (FLEX) კურსდამთავრებულთა საგრანტო პროგრამის ფარგლებში, ამერიკის შეერთებული შტატების სახელმწიფო დეპარტამენტის ფინანსური მხარდაჭერით. მსურველებმა უნდა შეავსონ სააპლიკაციო ფორმა  განაცხადების მიღების ბოლო ვადაა 2012 წლის 9 სექტემბერი. სრულად

31 აგვისტოს,  12:00 საათზე, თვითმმართველი ქალაქი ბათუმის საკრებულოს მრჩეველთა კომიტეტი გამართავს შეხვედრას. შეხვედრის თემა: თვითმმართველობის განხორციელებაში მოქალაქეთა მონაწილეობის მექანიზმების და კომიტეტის მოდიფიცირების საკითხები.  მისამართი: ბათუმი, მელაშვილის და საბაჟოს შესახვევი 1–3 

აჭარა. 30 აგვისტოს, „თავისუფალ ჟურნალისტთა სახლმა" და „კავკასიის დემოკრატიისა და განვითარების ინსტიტუტმა", გამართა ვორკშოპი ადმინისტრაციულ–ტერიტორიულ მოწყობასთან დაკავშირებით. განიხილეს 3 მოდელი. ისაუბრეს მათ დადებით და უარყოფით მხარეებზე, თუ რომელი იქნებოდა საქართველოსთვის ყველაზე მეტად მორგებული და ეფექტური. დღეისთვის საქართველოში თვითმმართველობის ერთდონიანი მოდელია წარმოდგენელი, რაც გულისხმობს 64 მუნიციპალიტეტის მთელი ქვეყნის მასშტაბით. აღნიშნული ცვლილება შევიდა 2006 წლიდან. 2006 წლამდე კი საქართველოში 1000 თვითმმართველი ერთეული არსებობდა.   შეხვედრის დასასრულს გაიმართა ახალი საიტის –  www.shenmartav.ge –  პრეზენტაცია გაიმართა.   პროექტი დაფინანსებულია ჰოლანდიის სამეფოს მიერ. 

შიდა ქართლი. 30 აგვისტოს, გორის დემოკრატიული ჩართულობის ცენტრში გაიმართა შეხვედრა თემაზე: გორის ტურისტული პოტენციალი და ტურისტული ბიზნესის განვითარება, როგორც ისტორიულ-სანახაობრივი კუთხით, ასევე სპორტის მიმართულებით.  გორის მუნიციპალიტეტის ტურისტულ პოტენციალში მოიაზრება სამკურნალო ტურიზმი - კურორტი გორიჯვარი (რესპუბლიკური მასშტაბის ბალნეოლოგიური კურორტი); ტანას ხეობა, სადაც მდებარეობს უძველესი ქართული ხუროთმოძღვრების ძეგლი ვერეს ციხე და მონასტერი, ტანას ხეობაში მდებარე უნიკალური ჩანჩქერი, რომელიც ზამთრის პერიოდში იყინება და საინტერესოა ექსტრემალური ტურიზმის მოყვარულთათვის; ასევე - კლდეში ნაკვეთი უძველესი ქალაქი უფლისციხე და მრავალი სხვა უნიკალური ადგილი, რაც მთლიანობაში ხელსაყრელ გარემოს ქმნის ტურიზმის განვითარებისათვის. შეხვედრას ესწრებოდნენ: გორის მუნიციპალიტეტის საკრებულოს თავმჯდომარე ზვიად ხმალაძე, საკრებულოს უფროსი სპეციალისტი ეკა ჯაფიაშვილი, სამოქალაქო საზოგადოების და კერძო სექტორის წარმომადგენლები, ჟურნალისტები და მოქალაქეები.

სამეგრელო. საქველმოქმედო ჰუმანიტარული ცენტრი „აფხაზეთის”  ორგანიზებით  „დევნილთა პროფესიული სწავლებისა და მომსახურების ცენტრის" 40 კურსდამთავრებულს ჩაუტარდა ტრენინგი თემაზე: „სამუშაოს ძიების უნარ-ჩვევები და თვითპრეზენტაცია”.  ტრენინგზე ყურადღება იყო გამახვილებული სამუშაოს ძიების მექანიზმებზე, რეზიუმესა და სამოტივაციო წერილის შედგენაზე, თვითპრეზენტაციის უნარებზე და ა.შ. სრულად წყარო: ორგანიზაციის გვერდი სოციალურ ქსელში