სამცხე–ჯავახეთი. 25 ივლისს, სამოქალაქო განათლებისა და პედაგოგთა გადამზადების პროგრამის ფარგლებში, ახალციხის ახალგაზრდული ცენტრის ორგანიზებით, სამოქალაქო კლუბის წევრებისთვის ტრენინგ-ლაშქრობა მოეწყო. ღონისძიება ნასწავლის პრაქტიკაში გამოყენებას ისახავდა მიზნად და მასში ახალციხისა და ადიგენის მუნიციპალიტეტის 6 სკოლებიდან სულ 25 მოსწავლე მონაწილეობდა. კლუბის წევრებმა სოფელ ურავლის ხეობა და აქ მდებარე აგარის ეკლესია მოინახულეს, შემდეგ ადიგენის სამოქალაქო კლუბის განმანათლებელმა ლონდა მაჭარაშვილმა თანატოლებს Civics.ge–ს ონლაინ ბიბლიოთეკის საშუალებით მოამზადებული თემა „გენდერი", წარუდგინა. თემის ირგვლივ დისკუსია გაიმართა, ბოლოს კი მსმენელებმა თავიანთი დამოკიდებულება შეფასების ფურცელზე დააფიქსირეს. ,,ტრენინგ-ლაშქრობის მიზანია, მოსწავლეები გაეცნონ მხარის გარემოს, ისტორიას და სხვადასხვა აქტუალურ თემებზე ისაუბრონ”, - განმარტა ახალგაზრდული ცენტრის თანამშრომელმა მზია ინასარიძემ.

  აჭარა. ინტერნიუს–საქართველოს ორგანიზებით ჩაქვში საზაფხულო მედიაბანაკი გაიხსნა. ბანაკის 21 მონაწილეს სომხეთიდან, აზერბაიჯანიდან და საქართველოდან სამი კვირის განმავლობაში თეორიული და პრაქტიკული სემინარები შემდეგ თემებზე ჩაუტარდებათ: ტელეჟურნალისტიკის საფუძვლები, რეპორტაჟების მომზადების ხელოვნება, კომპიუტერული და ვიდეო მონტაჟი, კონფლიქტების ანალიზი, ახალი მედია და სატელევიზიო ჟურნალისტიკა, რომელზეც სემინარს BBC-ის ჟურნალისტი ამანდა ჰარპერი გაუძღვება.  საზაფხულო მედია ბანაკის მუშაობის დროს მოზარდების მომზადებული საინფორმაციო გამოშვება ადგილობრივი ტელევიზიის პირდაპირ ეთერში გავა. ასევე მედიაბანაკის მონაწილენი სექტემბრიდან დაიწყებენ ახალგაზრდული სატელევიზიო პროგრამის „ჩვენი ექსპრესის" მომზადებას, რომლის ხილვაც საზოგადოებრივი მაუწყებლის ეთერში იქნება შესაძლებელი. მედია ბანაკი მუშაობს საერთაშორსიო პროექტის „საბავშვო გზაჯვარედინის" ფარგლებში, რომელსაც აფინანსებს სამხრეთ კავკასიის ქვეყნებში აკრედიტებული ბრიტანეთის საელჩოების კონფლიქტების ფონდი. წყარო: media.ge სრულად  

თბილისი. 30 ივლისიდან  2 აგვისტომდე  თბილისის მულტიმედია საგანმანათლებლო ცენტრში ტარდება ტრენინგი დოკუმენტური ფილმების სცენარების კონკურსის გამარჯვებული მოსწავლეებისათვის. დოკუმენტური ფილმების სცენარების კონკურსი „ჩვენ ვსაუბრობთ სამოქალაქო განათლებაზე"  ჩატარადა სამოქალაქო განათლებისა და პედაგოგთა გადამზადების პროგრამის, სოციალური მედიის კომპონენტის ფარგლებში. მასში მონაწილეობა მიიღო პროგრამის პარტნიორი სკოლების 27 მოსწავლემ, ხოლო  გაიმარჯვა 10  მოსწავლემ. მათ ტრენინგის ფარგლებში საშუალება აქვთ, შეისწავლონ ვიდეოს მომზადების მეთოდები და ასევე დაეუფლონ საკუთარი პროდუქტის გავრცელებაში სოციალური მედიის გამოყენების ეფექტურ საშუალებებს.   ტრენინგის შემდეგ გამარჯვებულ გუნდს, საშუალება მიეცემა საკუთარი სცენარის მიხედვით გადაიღოს ფილმი. ტრენინგს უძღვებიან საქართველოს საზოგადოებრივ საქმეთა ინსტიტუტის (GIPA) პროფესორები.  წყარო: civics.ge

კახეთი.საზოგადოებრივი ორგანიზაციის ,,მედია ცენტრი კახეთის’’ ორგანიზებით გურჯაანში 28 ივლისს, დიდების მემორიალის მიმდებარე ტერიტორიაზე, ფილმის - ,,ჯაზში მხოლოდ ქალიშვილები არიან’’ ჩვენება გაიმართა. ფილმის ჩვენებას მოსწავლეები, მედია ცენტრის  მშვიდობის კორპუსის ამერიკელი  მოხალისეები და დაინტერესებული მოქლაქეები  ესწრებოდნენ. მედია ცენტრის ახალგაზრდული პროექტის კოორდინატორის, მაკა ხაზიურის თქმით, მსგავსი სახის ღონისძიებები ხელს უწყობს ახალგაზრდების გააქტიურებასა და კულტურულ–საგანმანათლებლო ღონისძიებებში აქტიურ ჩართულობის გაზრდას: ,,ორგანიზაცია ახალგაზრდული პროექტის ფარგლებში თვეში რამდენიმე ღონისძიებას ანხორციელებს, მათ შორის დიდი ყურადღებას ვუთმობთ  კულტურულ–საგანმანათლებლო აქტივობებს. გვაქვს ფილმის ჩვენება ორგანიზაციის ახალგაზრდა მოხალისეების ინიციატივით გაიმართა". ფილმის ჩვენების შემდეგ გაიმართა ჯაზის საღამო. ღონისძიებები სათემო განვითარების ცენტრის მიერ დაფინანსებული ახალგაზრდული პროექტის ფარგლებში ხორციელდება.

ქვემო ქართლი. 23 ივლისს საზოგადოება „ბილიკმა" კულტურისა და დასვენების პარკში გამართა ღონისძიება სახელწოდებით - „ფერადი ზაფხული", ღონისძიებაში მონაწილეობა მიიღეს ორგანიზაციიის დღის ცენტრების ბენეფიციარებმა, სამოქალაქო და ჟურნალისტიკის კლუბების წევრებმა და სხვა დაინტერესებულმა ადამიანებმა. ღონისძიების „ფერადი ზაფხულის" ფარგლებში მოეწყო ფოტო-გამოფენა, რომელიც ასახავდა საზაფხულო ბანაკის – „ჩემს თავზე საუბარი" – ფარგლებში ჩატარებულ ღონისძიებებს, ტრენინგებს და საინტერესო აქტივობებს. სურათები თავად ბანაკის მონაწილე ქართველი, აზერებაიჯანელი, სომეხი და ჩეჩენი ბავშვების მიერ იყო გადაღებული, კულტურისა და დასვენების პარკში მოხალისეები ყველა მსურველს სახეზე ხატავდნენ, ხოლო ჟურნალისტიკის სტუდიის ტრენერმა მსურველებისთვის ჩაატარა ვორქშოფს ფოტო-გადაღებაში. ბანაკი 4-10 ივლისში, დაბა ურეკში მოეწყო და მიმი მასპინძელი საზოგადოებრივი ორგანიზაცია „ბილიკი" იყო.

სამცხე–ჯავახეთი. პროექტი „დიახ, ჩვენ შეგვიძლია" („Yes, We Can!"), რომელსაც საზოგადოებრივი ორგანიზაცია „ახალი თაობა – ახალი ინიციატივა" ახორციელებს. იგი გულისხმობს სამცხე-ჯავახეთის რეგიონში მცხოვრები ეროვნული უმცირესობების ინფორმირეულობის გაზრდას სამოქალაქო აქტიურობის და არჩევნების პროცესის შესახებ, მათ ჩართვას მნიშვნელოვან მოვლენებსა და გადაწყვეტილების მიღების პროცესში. პროექტის ფარგლებში გათვალისწინებულია მოქალაქეთა ჯგუფის შექმნა, მათთვის ტრენინგების გამართვა და მცირე საგრანტო კონკურსის ორგანიზება, რომლის ფარგლებში საუკეთესო ინიციატივები დაფინანსდება. ასევე, სოციალურ ქსელ Facebook-ზე გაიმართება აქტიურ მოქალაქეობასა და არჩევნების თემატიკასთან დაკავშირებული საინტერესო შემოქმედებითი კონკურსები. კონკურსის გამარჯვებულები ფასიანი საჩუქრებით დაჯილდოვდებიან. პროექტი ხორციელდება საარჩევნო სისტემების საერთაშორისო ფონდის (IFES) და აშშ-ის საერთაშორისო განვითარების სააგენტოს (USAID) ხელშეწყობით. სრულად

გურია. გურიის მოსწავლეთა რეგიონული პარლამენტი „ახალგაზრდა პედაგოგთა კავშირის" ბაზაზე 2007 წლიდან არსებობს (პარლამენტის შემადგენლობა ორგანიზაციის პარტნიორის კოლების მოსწავლეთა თვითმმართველობების თავმჯდომარეებით კომპლექტდება), რომლის წევრები სხვადასხვა ტიპის ინიციატივებს ახორციელებენ, ერთი-ერთი ძირითადი მიმართულება თემში პრობლემების კვლევა და ადვოკატირების პროცესის წარმოებაა. მიმდინარე წლის ბოლოს რეგიონული პარლამენტის ინიციატივით დაიწყო საზოგადოებრივი ტრანსპორტის მიმოსვლისა და საჯარო სკოლების საგაკვეთილო პროცესის შესაბამისობის შესახებ ადვოკატირების კამპანია, რომლის ფარგლებში წინასწარ შემუშავებული კითხვარის საფუძველზე გამოიკითხა გურიის რეგიონის 12 სკოლის 71 პედაგოგი და 228 მოსწავლე. კვლევის შედეგად აღმოჩნდა, რომ ტრანსპორტის არსებული განრიგი მოუხერხებელია და ქმნის მთელ რიგ პრობლემებს სკოლის ბენეფიციართათვის. უახლოეს პერიოდში იგეგმება შეხვედრა ადგილობრივი ხელისუფლების წარმომადგენლებთან გამოვლენილ პრობლემებთან დაკავშირებით.

სამცხე–ჯავახეთი. ტყეების მასიური გაჩეხვა-განადგურება, რადიაცია, მიწისძვრები, ვულკანი, ზვავი - ამ თემებზე ახალციხის საჯარო სკოლის მოსწავლეებმა იმსჯელეს სამეცნიერო კონფერენციაზე, რომელიც, საზოგადოებრივი ორგანიზაცია ,,ამერიკის კუთხის” ხელშეწყობით, 21 ივლისს, ახალციხის დემოკრატიული ჩართულობის ცენტრში გაიმართა. კონფერენციის თემა, ,,ეკოლოგიური პროლემები”,  წინასწარ იყო განსაზღვრული. კონფერენციის ჩატარების იდეა მოსწავლეებმა ორგანიზაციას რამდენიმე კვირის წინ პროექტის სახით წარუდგინეს და  სამუშაო შეხვედრების შემდეგ საუკეთესო მოხსენებებიც შეირჩა. ჟიურის მიერ გამოვლენილ პირველი, მეორე და მესამე ადგილის მფლობელ მონაწილეებს და კენჭისყრით გამოვლენილ ,,აუდიტორიის რჩეულს” სერთიფიკატები და ამერიკის კუთხის სპეციალური პრიზები - ინგლისურენოვანი წიგნები გადაეცათ. ,,ასეთი ღონისძიებები ხელს უწყობს იმას, რომ ახალგაზრდებმა სკოლის გარეთაც აქტიური ცხოვრებით ვიცხოვროთ და გარემოს შესახებ ცოდნა გავიღრმავოთ”, - განაცხადა კონფერენციის ერთ-ერთმა ორგანიზატორმა მარიამ კაპანაძემ.

გურია. ლანჩხუთის მუნიციპალიტეტის სოფელ აცანის სამოქალაქო კლუბმა ადგილობრივ თვითმმართველობასთან თანამშრომლობით ადგილობრივი მოსახლეობის, განსაკუთრებით კი ახალგაზრდების ეკოგანთლებაზე იზრუნა. სოფელი აცანა მეწყერსაშიშ ზონაში მდებარეობს, აქედან გამომდინარე სოფლისთვის უმნიშვნელოვანესია ტყის დაცვის საკითხი. იმისათვის, რომ ტყე გაჩეხვისგან დაიცვან, სამოქალაქო კლუბმა თანასოფლელთა ცნობიერების ამღლება, მათი ეკოგანათლება გადაწყვიტა და ამ მიზნით 16 ივლისს სოფლის ცენტრში ბანერი დაამონტაჟა. ,,თუ დამიცავ ფესვებს, შეგიჩერებ მეწყერს!’’ - ბანერზე განთავსებული ამ შინაარსის ტექსტით ახალგაზრდები მოუწოდებენ მოსახლეობას, არ გაჩეხონ ტყე და ამ გზით დაიცვან სოფელი დამეწყვრისგან. სამოქალაქო კლუბის მიმართვის შედეგად ბანერის მონტაჟის პროცესში ადგილობრივი თვითმმართველობაც ჩაერთო და კლუბს ბანერისთვის საჭირო მასალებით დაეხმარა. სამოქალაქო კლუბის წევრმა მოსწავლეებმა ბანერი თავად დადგეს და შეღებეს. საკუთარი ინიციატივით მიღწეულმა რეალურმა შედეგმა, ასევე ადგილობრივ მმართველობასთან წარმატებულმა თანამშრომლობამ მათ სტიმული მისცა, მომავალშიც განახორციელონ მსგავსი აქტივობები და იყვნენ ჩართულები სამოქალაქო პროცესში.

მცხეთა–მთიანეთი. 20 ივლისს ბაზალეთში, „სამოქალაქო განათლების საზაფხულო ბანაკი - 2012"-ის მეორე ნაკადი დაიწყო. ბანაკი „სამოქალაქო განათლებისა და პედაგოგთა გადამზადების პროგრამის" ფარგლებში ხორციელდება,  რომელსაც აფინანსებს აშშ–ს  საერთაშორისო განვითარების სააგენტო (USAID), ხოლო პროგრამას საქართველოში ახორციელებს PH-International. ბანაკის ორგანიზატორია სიქა - საგანმანათლებლო ინიციატივების ქართული ასოციაცია, რომელიც ამავდროულად პროგრამის პარტნიორი ორგანიზაციაა ქვემო ქართლის რეგიონში. „სამოქალაქო განათლების საზაფხულო ბანაკი 2012-ში" მონაწილეობას იღებენ მოსწავლეები და პედაგოგები საქართველოს 11  რეგიონიდან. ბანაკის სამ ნაკადად წარიმართება და სულ მონაწილეობას მიიღებს 270 მონაწილე -  სასკოლო სამოქალაქო კლუბების აქტიური წევრები,  რომლებიც წლის განმავლობაში ინიცირებას უკეთებენ და ახორციელებენ სხვადასხვა სახის სამოქალაქო აქტივობებს. ბანაკის განმავლობაში მონაწილეებს  უტარდებათ ტრენინგები სამოქალაქო აქტივობების დაგეგმვისა და განხორციელების კუთხით, წერენ პროექტებს, რომლებსაც განახორციელებენ თავიანთ სამოქალაქო კლუბებში სასწავლო წლის განმავლობაში. ბანაკის ყოველი დღე დატვირთულია სახალისო - შემეცნებითი საბანაკე აქტივობებით, რაც ხელს უწყობს სხვადასხვა რეგიონის მოსწავლეების დაახლოებას. სიქა მეორე წელია ორგანიზებას უწევს „სამოქალაქო განათლების საზაფხულო ბანაკს". შარშან ბანაკში მონაწილეობა მიიღო 150-მა მონაწილემ საქართველოს 9 რეგიონიდან. ბანაკში  ქართველ ლიდერებთან ერთად ევროპელი ახალგაზრდული ლიდერები მუშაობენ, რომლებსაც სიქა მასპინძლობს ევროკომისიის პროგრამა „ახალგაზრდები მოქმედებაში" ფარგლებში.

თბილისი. პროექტი „ახალგაზრდული ექსპრესის" მიზანია, ქართველი ახალგაზრდობის პრობლემების და გამოწვევების უკეთ გაშუქება და დღის წესრიგში დაყენება. პროექტი  ხორციელდება ორგანიზაციების „IMNS for Human Rights" და დემოკრატიული ცვლილებების ინსტიტუტის მიერ. პროექტი „ახალგაზრდული ექსპრესი" დაფინასებულია შვედური ფონდის „შვედეთის ინსტიტუტი"–ს მიერ, რომელიც 2011 წელს დაიწყო და წელს ამ პროექტის მეორე ეტაპი გაიმართება. პროექტის ფარგლებში შეიქმნა პორტალი youthexpress.ge. 2012 წლის სექტემბრიდან ახალგაზრდული ექპრესის (youthexpress.ge) ახალი მონაწილეები შეისწავლიან ვიდეო დოკუმეტირებას, PR ის ასპექტებს და სოციალური ქსელების გამოყენებას ამ სფეროში. გადაღებული მასალა გამოქვეყნდება ვებპორტალზე, ასევე ვიდეო ფილმების შესახებ მოეწყობა დისკუსიები და გაშვებულ იქნება ტელევიზიის ეთერში. პირველი ტრენინგი გაიმართება 14-16 სექტემბერს.   დეტაულრი ინფორმაცია იხილეთ ბმულზე

სამცხე–ჯავახეთი. საქართველოში მცხოვრები  რეპატრირებული მესხი ბავშვები ,,Brave Kids"-ის ფესტივალში იღებენ მონაწილეობას. ზაფარ ცაცანიძე, თემურ ბექაძე, საბა კამალოვი, აბას მეხრიევი და აიდა ლაზიშვილი  სამცხე ჯავახეთის რეგიონულ ასოციაცია „ტოლერანტთან" არსებული ანსამბლ „ფესვების" წევრებიან არიან.  ბავშვები ფესტივალზე სწორედ ასოციაცია „ტოლერანტმა" 20 ივნისს გააგზავნა. ანსამბლი „ფესვების" წევრები  უკვე სამი კვირაა ევროპის რამდენიმე ქალაქში  კონცერტებს მართავენ. ფესტივალში კიდევ 14 ქვეყნის 100-მდე ბავშვი მონაწილეობს. ისინი ფესტივალზე თავიანთ ნაციონალურ ცეკვებსა და სიმღერებს წარმოადგენენ. ფესტივალი „Brave Kids" უინესკოსა და პოლონეთის კულტურის სამინისტროს პატრონაჟით უკვე მესამე წელია ტარდება. ჩინელ, უგანდელ, პოლონელ, ქართველ, ებრაელ, რუმინელ, ტანზანიელ, ნორვეგიელ, ბულგარელ, ყირგიზ, ჩეხ, ზიმბაბველ და ბერძენ ბავშვებს ერთობლივი ვორქშოფებიც ჩაუტარდათ, სადაც ისინი ერთმანეთს თავიანთ ნაციონალურ ცეკვებსა და სიმღერებს ასწავლიდნენ. „ცოტა ვღელავ, იუნესკოში ამდენი მაყურებლის წინაშე გამოსვლა დიდი პასუხისმგებლობაა. თუმცა ვფიქრობ, ყველაფერს კარგად გავაკეთებთ და მაყურებელს აქაც მოვაწონებთ თავს", - ამბობს ფესტივალის ქართველი მონაწილე  თემურ ბექაძე.ფესტივალის დასკვნითი საღამო დღეს, 10 ივლისს პარიზში, იუნესკოს შენობაში  გაიმართება.  ამ წუთისთვის დარბაზში საფინალო კონცერტის რეპეტიცია მიმდინარეობს.

სამცხე–ჯავახეთი.მედია-ორგანიზაცია ,,გოუჯგუფი" ორდღიანი ვიზიტით ახალციხეს სტუმრობდა. ორგანიზაციის წარმომადგენლებმა 12 ივლისს, ახალციხის დემოკრატიული ჩართულობის ცენტრში დოკუმენტური ფილმი ,,გოგონას აქვს სათქმელი" აჩვენეს. ფილმის პერსონაჟები საქართველოს ოთხ რეგიონში - შიდა და ქვემო ქართლში, სამცხე-ჯავახეთსა და სამეგრელოში მცხოვრები თინეიჯერი გოგონები არიან, რომელთა მაგალითზეც გამოიკვეთა მშობლებისა და მოზარდების დამოკიდებულებაში არსებული მტკივნეული პრობლემები: შეზღუდული არჩევანი და თავისუფლება. ფილმის მაყურებლები საჯარო სკოლების უფროსკლასელები, სტუდენტები და ჟურნალისტები იყვნენ, რომლებმაც ფილმის დასასრულს დისკუსიაში მიიღეს მონაწილეობა. 14 ივლისს კი „გოუჯგუფის" წევრებმა ახალგაზრდებს დოკუმენტური ფილმის გადაღების პრაქტიკული უნარ-ჩვევების განმავითარებელი მასტერკლასი ჩაუტარეს.

კახეთი.საზოგადოებრივი ორგანიზაციის „სისხლის ბანკის" ინიციატივით  გურჯაანის მუნიციპალიტეტში, 13 ივლისს ჯავრიშვილის კლინიკის ოფთალმიჯის შენობაში გაიმართა აქცია სახელწოდებით „გაიღეთ სისხლი და გადაარჩინეთ ბავშვების სიცოცხლე". აქციაზე მისულმა საზოგადოების წევრებმა უანგაროდ გაიღეს სისხლი ბავშვების სიცოცხლის გადასარჩენად.

კახეთი. 13 ივლისს თელავის დემოკრატიული ჩართულობის ცენტრში საზოგადოებრივი ორგანიზაციის „თანადგომის" მიერ ორგანიზებული 5 დღიანი „თანასწორთა განათლების ტრენინგი"  დასრულდა. ტრენინგის მიზანი იყო ახალგაზრდებში ჯანმრთელი ცხოვრების წესის დამკვიდრებისა და სქესობრივი გზით გადამდები დაავადებების თავიდან აცილებისთვის დამსწრეთა ინფორმირება. ტრენინგში  50-მდე  მოსწავლე მონაწილეობდა. ტრენინგის კოორდინატორის თქმით, ტრენინგის მთავარი მიზანია, ახალგაზრდებმა თანატოლებში გაავრცელონ მიწოდებული ინფორმაცია, რათა თავიდან იქნეს აცილებული სხვადასხვა სახის დაავადებების გავრცელება. მაია ჯიბუტი, პროექტის კოორდინატორი, ფსიქოლოგი: „თანასწორთა განათლების ტრენინგის მიზანი იყო ტრენერთა მომზადება, რომელშიც აქტიური და ლიდერის თვისებებით გამორჩეული ახალგაზრდები მონაწილეობდნენ. გარდა ამისა, იყო საუბარი გენდერული თანასწორობის შესახებ და ეს ყველაფერი ჩაჯდა რეპროდუქციული ჯანმრთელობისა და უფლებების შესახებ საკითხებში".

მცხეთა–მთიანეთი. 30 ივნისს ბაზალეთში, თავისუფალი უნივერსიტეტის ტრენინგ ცენტრში „სამოქალაქო განათლების საზაფხულო ბანაკი - 2012" გაიხსნა. ბანაკი  „სამოქალაქო განათლებისა და პედაგოგთა გადამზადების პროგრამის" ფარგლებში მოეწყო, რომელსაც აფინანსებს USAID - აშშ საერთაშორისო განვითარების სააგენტო, ხოლო პროგრამას საქართველოში ახორციელებს PH-International. ბანაკის ორგანიზატორია   სიქა - საგანმანათლებლო ინიციატივების ქართული ასოციაცია, რომელიც ამავდროულად პროგრამის პარტნიორი ორგანიზაციაა ქვემო ქართლის რეგიონში. 30 ივნისიდან 5 ივლისამდე ბანაკის პირველი ნაკადი მოეწყო, რომელშიც მონაწილეობა მიიღო მოსწავლეებმა და პედაგოგებმა საქართველოს 11 რეგიონიდან.  ივლისსა და აგვისტოში დაგეგმილია ბანაკის კიდევ ორი ნაკადი. სამივე ნაკადის განმავლობაში ბანაკში მონაწილეობას მიიღებს 270 მონაწილე საქართველოს ყველა კუთხიდან. ბანაკში მონაწილე მოსწავლეების სასკოლო სამოქალაქო კლუბების აქტიური წევრები არიან, რომლებიც წლის განმავლობაში ინიცირებას უკეთებენ და ახორციელებენ სხვადასხვა სახის სამოქალაქო აქტივობებს. სიქა მეორე წელია ორგანიზებას უწევს „სამოქალაქო განათლების ბანაკს". გასულ წელს საზაფხულო სამოქალაქო ბანაკში მონაწილეობა მიიღო 170-მა მონაწილემ საქართველოს 9 რეგიონიდან. ბანაკში  ქართველ ლიდერებთან ერთად ევროპელი ახალგაზრდული ლიდერები მუშაობენ, რომლებსაც სიქა მასპინძლობს ევროკომისიის პროგრამა „ახალგაზრდები მოქმედებაში" ფარგლებში.

თბილისი. 11 ივლისს, ფონდ „ღია საზოგადოება– საქართველოს" ოფისში სოციალური დაცვის ლიგამ პროექტის შედეგები შეაჯამა. პროექტის ფარგლებში შეზღუდული შესაძლებლობების მქონე ბავშვების დაცვის  ცენტრი გაიხსნა, რომელიც სხვადასხვა სერვისს უფასოდ სთავაზობდა შშმ ბავშვებს. მისი არსებობის განმავლობაში მომსახურება მიიღო 182–მა ბენეფიციარმა, ცხელ ხაზზე კი დაახლობით 2000–ზე მეტი ზარი შემოვიდა. პრეზენტაციაზე ვრცლად ისაუბრეს იმაზე, თუ რა გაკეთდა პროექტის ფარგლებში, რა პრობლემები და საჭიროებები გამოიკვეთა,  რომელიც შემდგომ მუშაობას საჭიროებს.   „დიდი მოთხოვნაა უფასო რეაბილიტაციაზე და იგი უნდა გულისხმობდეს როგორც ფიზიკურ, ასევე ბავშვის გონებრივი განვითარების რეაბილიტაციას და აუცილებელად მორგებული უნდა იყოს ბავშვის განვითარების ინდივიდუალურ გეგმას"– აღნიშნა პრეზენტაციაზე ორგანიზაციის წარმომადგენლმა. განსაკუთრებით ხაზი გაესვა შშმ ბავშვების მშობლებზე ორიენტირებული სერვისების არსებობის საჭიროებასაც.

აჭარა. 9 ივლისს, ბათუმის დემოკრატიული ჩართულობის ცენტრში, „მშვიდობის, დემოკრატიისა და განვითარების კავკასიურმა ინსტიტუტმა" ახალგაზრდებისათვის გამართა შეხვედრა თემაზე: „მე და არჩევნები". შეხვედრის მიზანი იყო ახალგაზრდებისათვის საარჩევნო სისტემისა და პროცედურების გაცნობა, მათი მოტივაციის გაზრდა არჩევნებში მონაწილეობის მისაღებად.  შეხვედრაზე ისაუბრეს თუ რატომ არის არჩევნები ასეთი მნიშვნელოვანი ჩვენი პოლიტიკური სისტემისათვის. რა უფლებამოსილება აქვს იმ ორგანოებს, რომელთა არჩევნებშიც ვიღებთ მონაწილეობას. შეხვედრის ბოლოს ახალგაზრდებს დაურიგდათ ბროშურები სახელწოდებით „მე და არჩევნები", რომელიც დაფინანსებულია ევროპის საბჭოს მიერ.    

სამცხე–ჯავახეთი. 4 ივლისს, 14 საათზე, ახალციხის დემოკრატიული ჩართულობის ცენტრში, აშშ-ს მიერ დაფინანსებული პროექტის - ახალგაზრდული საკრებულოს - დასკვნითი ღონისძიება გაიმართა. პროექტს არასამთავრობო ორგანიზაცია "დემოკრატ მესხთა კავშირი" 2011 წლის ივლისიდან  ანხორციელებს. შეხვედრა მიზნად ისახავდა მთელი წლის განმავლობაში ჩატარებული ღონისძიებების შეფასებას და საზოგადოებისათვის გაცნობას.

ბათუმი. „თავისუფალი ჟურნალსიტთა სახლი" იწვევს სტუდენტებს, ახალგაზრდებს, რათა ჩაერთონ პროექტში – „საზოგადოებაში და ახლაგაზრდებში დემოკრატიული იდეების განვითარება/პოპულარიზაცია".პროექტის ფარგლებში მონაწილეებს შესაბამისი სწავლების შემდეგ ექნებათ შესაძლებლობა, მოამზადონ სიუჟეტები, მონაწილეობა მიიღონ თემებისა და სტუმრების შერჩევაში, გახდნენ გადაცემის წამყვანები. დეტალურად იხილეთ : http://presscafe.ge/index.php?newsid=181 წყარო: presscafe.ge

კახეთი. ,,იყავი აქტიური მოქალაქე" - ამ სახელწოდების პროექტის პრეზენტაციას 4 ივლისს  თელავის დემოკრატიული ჩართულობის ცენტრმა უმასპინძლა. ნიდერლანდების ინსტიტუტის დაფინანსებით, აღნიშნული პროექტის ფარგლებში 2 თვის განმავლობაში სხვადასხვა სახის ღონისძიებები განხორციელდა. პროექტის მონაწილეებმა თელავის სახელმწიფო უნივერსიტეტის ეზოში მწვანე კუთხეც მოაწყვეს. 4 ივლისს, თელავის საჯარო სკოლების დამამთავრებელი კლასების მოსწავლეებმა დემოკრატიის თემაზე პრეზენტაციები წარმოადგინეს. პროექტის ორგანიზატორებისგან 17-მა მოსწავლემ  საჩუქრად სიგელები და წიგნები მიიღეს.

იმერეთი. 28 ივნისს,  სასტუმრო „ქუთაისი პალასში" სამოქალაქო განათლებისა და გადამზადების ცენტრის საქმიანობის შემაჯამებელი პრეზენტაცია გაიმართა. ღონისძიებაზე სამოქალაქო კლუბებმა პროგრამის ფარგლებში მიღებული გადაწყვეტილებების ანგარიში წარმოადგინეს. ასევე დამსწრე საზოგადოებას მცირე საგრანტო კონკურსში გამარჯვებულმა სკოლის მოსწავლეებმა თავიანთი პროგრამა წარუდგინეს. შეხვედრაში მონაწილეობა იმერეთის რეგიონის საჯარო სკოლებისა და საინიციატივო ჯგუფის წევრებმა, სამოქალაქო განათლების პედაგოგებმა და პარტნოირი ორგანიზაციის წევრებმა მიიღეს. ღონისძიება ორგანიზებული იყო სამოქალაქო განათლებისა და პედაგოგთა გადამზადების პროგრამის ფარგლებში, რომელსაც ამერიკული ორგანიზაცია PH International ახორციელებს. პრეზენტაცია ამერიკის შეერთებული შტატების საერთაშორისო განვითარებიას სააგენტოს (USAID) დაფინანსებით გაიმართა. აღნიშნული პროგრამა იმერეთის რეგიონში 125 პარტნიორ სკოლასთან თანამშრომლობს. შეხვედრის ბოლოს ბლოგებისა და საკლუბო კონკურსებში გამარჯვებული მოსწავლეები დაჯილდოვდნენ.