აჭარა. ასოციაციამ „ფორეჯი“ ქედის მუნიციპალიტეტის სოფელ წონიარისში კალმახის სამოდელო-საინკუბაციო საამქრო გახსნა. ინიციატივა ხორციელდება ევროკავშირის მხარდაჭერით და არის ENPARD პროეტის „ქედა ლიდერი“ ნაწილი, რომელიც მუნიციპალიტეტში CENN-ის მიერ ხორციელდება.  პროექტის ფარგლებში შეიქმნა თანამედროვე ინვენტარით აღჭურვილი თევზის სამოდელო-საინკუბაციო საამქრო. საწარმო უზრუნველყოფს მაღალსელექციური ქვირითისაგან წარმოებული ჯანსაღი ლიფსიტის გამოყვანას და თევზმწარმოებელი ფერმერებისათვის მიწოდებას მთელი სამეურნეო წლის განმავლობაში.  აღნიშნული პროექტის განხირციელება ხელს შეუწყობს აჭარის რეგიონის წყლის რესურსების ოპტიმალურ გამოყენებას, თევზწარმოების თანამედროვე სტანდარტების განვითარებას, ადგილობრივი თევზმწარმოებელი ფერმერებისთვის ჯანსაღი ლიფსიტის მიწოდებას და რეგიონში არსებული თევზსაშენი მეურნეობების გაძლიერებას.  სრულად... წყარო: http://enpard.ge

აჭარა. ევროკავშირი და გაეროს განვითარების პროგრამა (UNDP) მხარს უჭერენ ინოვაციური ბიზნეს იდეების განხორციელებას აჭარაში.  ნოემბრის ბოლოს, ჩაქვმა უმასპინძლა კრეატული ბიზნეს სტარტაპების საწვრთნელ ბანაკს, ანუ ბუთკემპს, რომლის მუშაობაში 40-მდე ადგილობრივი მეწარმე ჩაერთო. ბუთკემპის მიზანი იყო ინოვაციური ბიზნეს იდეების გამოვლენა და მათი ავტორების ხელშეწყობა იდეების განხორციელების რეალისტური გზების შემუშავებაში. ძირითად ყურადღება დაეთმო სოფლად ახალი ტიპის მეწარმეობის ჩამოყალიბებას, რომელიც სოფლის მეურნეობის ფარგლებს გასცდებოდა.  სრულად... წყარო: http://enpard.ge

თბილისი. კერძო სექტორისა და საერთაშორისო ორგანიზაციების 100-ზე მეტი წარმომადგენელი დაესწრო ბიზნეს ფორუმს, რომელიც 20 ნოემბერს თბილისში გაიმართა. ფორუმის მონაწილეებმა იმსჯელეს ბიზნესის განვითარების თანამედროვე მიმართულებებზე, მათ შორის, კონკურენტუნარიანობის გაზრდაზე კლასტერების შექმნის გზით.  სრულად... წყარო: ორგანიზაციის გვერდი სოციალურ ქსელში

თბილისი. დღეს, თბილისში, სასტუმრო მეტეხი პალასში, ევროკავშირის მიერ დაფინანსებული პროექტის „საქართველოში გეოგრაფიული აღნიშვნების ეფექტური დაცვისა და კონტროლის სისტემის დანერგვა’’ გახსნის ცერემონია გაიმართა.  ღონისძიებით აღინიშნა საჯარო სამსახურების დაძმობილების (ე.წ. ტვინინგის) პროექტის დაწყება, რომელიც მიზნად ისახავს საქართველოში გეოგრაფიულ აღნიშვნებთან დაკავშირებული ხარისხის პოლიტიკის გაუმჯობესებას. საქონლის გეოგრაფიული აღნიშვნების გამოყენების კონტროლის, სამართლიანი კონკურენციისა და დაცვის ეფექტური სისტემის ხელშეწყობას, არსებული ვითარების გაუმჯობესებას, საქართველოს მოსახლეობის საკეთილდღეოდ. ტვინინგის პროექტის მიზანია, ევროკავშირის გეოგრაფიული აღნიშვნების დაცვის სისტემის დებულებებითა და ეფექტური დამხმარე ინსტრუმენტების შექმნის გზით საქართველოში საქონლის ‘’ადგილწარმოშობის დასახელებისა’’ და ‘’გეოგრაფიული აღნიშვნების’’ სისტემის განვითარების ხელშეწყობა.  სრულად...  წყარო: https://eeas.europa.eu

თბილისი. ევროკავშირი საქართველოში და საქართველოს მთავრობა იწყებენ ახალ, 150 მილიონი ლარის ღირებულების პროგრამას, რომელიც ხელს შეუწყობს ქვეყანაში პროფესიული განათლების ზრდასა და შრომის ბაზრის განვითარებას. საქართველოს განათლების, მეცნიერების, კულტურისა და სპორტის მინისტრმა, ევროკავშირის ელჩმა საქართველოში და ევროპული განათლების ფონდის დირექტორმა, დღეს, „განათლება დასაქმებისთვის” (Skills4Jobs) პროგრამის მეორე ფაზა ოფიციალურიად გახსნეს. 5-წლიანი პროგრამის მიზანია, მაღალი ხარისხის პროფესიული განათლების, გაუმჯობესებული შრომითი პოლიტიკის და სამეწარმეო გადამზადების გზით შეუწყოს ხელი საქართელოს 105 000 მოქალაქის დასაქმებას. სრულად...  წყარო: eeas.europa.eu

აჭარა. 25 ოქტომბერს, ბათუმში, მდგრადი განვითარების მიზნების გამოფენა (SDG Fair) გაიმართა, რომელში მონაწილეობაც 15-მდე წამყვანმა ბიზნესკომპანიამ მიიღო. „გამოფენაზე კომპანიებმა წარადგინეს მდგრადი განვითარების მიზნების კუთხით განხორციელებულ აქტივობები და პროექტები და საზოგადოებას გააცნეს კორპორაციული პასუხისმგებლობის მიმართულებით საუკეთესო პრაქტიკა”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაცის გვერდი სოციალურ ქსელში

სამცხე-ჯავახეთი. საჯარო, კერძო და სამოქალაქო საზოგადოების ორგანიზაციების 100-ზე მეტი წარმომადგენელი ესწრებოდა კონფერენციას, რომელზეც ევროკავშირის მიერ მხარდაჭერილი ENPARD-ის ორწლიანი პროექტის „სოფლის განვითარების მოდელების სრულყოფა საქართველოში“ შედეგები შეაჯამეს.  პროექტი, რომელსაც ორგანიზაციები „მერსი ქორფსი“, „ფიფლ ინ ნიდ“ და „ქეა ავსტრია“, სოფლის განვითარების ევროპულ ასოციაციასთან პარტნიორობით ახორციელებდნენ, 2017 წლიდან მიმდინარეობდა და ბორჯომის, ლაგოდეხისა და ყაზბეგის მუნიციპალიტეტებში თემზე ორიენტირებული სოფლის განვითარების მიდგომის ხელშეწყობას ისახავდა მიზნად. სოფლის განვითარებაზე ორიენტირებული საუკეთესო ევროპული პრაქტიკის გაზიარებით, პროექტმა ხელი შეუწყო ევროპული LEADER მიდგომის დანერგვას სამ მუნიციპალიტეტში, რის შედეგადაც ჩამოყალიბდა ადგილობრივი განვითარების ჯგუფები, შემუშავდა ადგილობრივი განვითარების სტრატეგია და მოხდა ევროკავშირის გრანტების გაცემა 200-ზე მეტი ინიციატივისთვის. შედეგად, 600-ზე მეტი მუდმივი დასაქმების ადგილი სამივე მუნიციპალიტეტში.  2015 წლიდან დღემდე, ევროკავშირის ENPARD-ის პროგრამის ფარგლებში, სოფლის განვითარების ევროპული მოდელი საქართველოს რვა მუნიციპალიტეტში დაინერგა. ადგილობრივი განვითარების ჯგუფები შეიქმნა ბორჯომში, ლაგოდეხში, ყაზბეგში, დედოფლისწყაროში, თეთრიწყაროში, ახალქალაქში, ქედასა და ხულოში. აღნიშული ჯგუფები, ევროკავშირის პარტნიორ ორგანიზაციებთან ერთად, წარმატებით ახორციელებენ სოფლის განვითარების პროექტებს. მათი უშუალო ჩართულობით, საქართველოს მასშტაბით, ევროკავშირის მიერ უკვე 400-მდე ინიციატივაა დაფინანსებული. ეს ინიციატივები ხელს უწყობს წარმოებისა და მომსახურების ხარისხის ზრდას სოფლის მეურნეობის, ტურიზმის, სოციალური და სოფლის ინფრასტრუქტურის, ასევე გარემოს დაცვით სფეროებში. მათი საშუალებით, სოფლად უკვე დასაქმდა 1000-ზე მეტი ოჯახი, ხოლო 10,000-ზე მეტმა ადამიანმა სოფლად საცხოვრებელი პირობები გაიუმჯობესა. ამჟამად, დამატებით კიდევ ოთხ ახალ მუნიციპალიტეტში – ახმეტა, წალკა, წყალტუბო და მესტია – მიმდინარეობს სოფლის განვითარების ევროპული მოდელის, LEADER მიდგომის დანერგვის და ადგილობრივი განვითარების ჯგუფების შექმნის პროცესი.  სრულად...  წყარო: http://enpard.ge

ქვემო ქართლი. ევროკავშირის მიერ მხარდაჭერილი დასაქმების ხელშეწყობისა და პროფესიული გადამზადების პროგრამების ფარგლებში, ასოციაციის, სამხარეო განვითარება მომავალი საქართველოსთვის (RDFG) და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს სსიპ სოციალური მომსახურების სააგენტოს დასაქმების პროგრამების დეპარტამენტის ორგანიზებით, ქალაქ თეთრიწყაროში დასაქმებისა და პროფესიული განათლების ფორუმი გაიმართა.  ღონისძიება მიზნად ისახავდა ადგილობრივი სამუშაოს მაძიებლები პროფესიული გადამზადების კოლეჯებთან და დამსაქმებლებთან დაეკავშირებინა, ხოლო დამსაქმებლებს ახალი კვალიფიციური კადრების მოძიებაში დახმარებოდა. ღონისძიებაში მონაწილეობა მიიღეს: პროფესიული განათლების 11-მა კოლეჯმა, ქვემო ქართლის რეგიონში მცხოვრებმა სამუშაოს მაძიებლებმა და 23-მმა მსხვილმა დამსაქმებელმა კომპანიამ 300-მდე აქტიური ვაკანსიით, მათ შორის ევროკავშირის მიერ მხარდაჭერილი და RDFG-ის ხელშეწყობით განხორციელებული სოფლის განვითარების პროექტების წარმომადგენლებმა.  სრულად...  წყარო: http://enpard.ge

კახეთი. ევროკავშირისა და FAO-ს მხარდაჭერით ადგილობრივი ფერმერის მოყვანილი ტკბილი სიმინდი კარფურში იყიდება. საქართველოში ევროკავშირის ელჩი, კარლ ჰარცელი და FAO-ს წარმომადგენელი, რაიმუნდ იელე FAO-ENPARD-ის პროექტის ბენეფიციარს საკუთარი პროდუქციის „კარფურის“ მაღაზიათა ქსელში შეტანის პირველ დღეს პირადად შეხვდა.  კახეთში მოყვანილი ტკბილი სიმინდის სუპერმარკეტში გაყიდვა პირველი ფართომასშტაბიანი წარმატებაა ევროკავშირის და FAO-ს პროექტისა, რომელიც მიზნად ისახავს ქართველი ფერმერების პროდუქტიულობის და შემოსავლების ზრდას, თანამედროვე მიდგომებით და მწარმოებლებისა და შემსყიდველი კომპანიების ერთმანეთთან დაკავშირებით.  სრულად...  წყარო: http://enpard.ge

თბილისი. საზოგადოება და ბანკები ეკონომიკური მედია სკოლის მეთორმეტე ნაკადის მიღებას იწყებს.  „ტრენინგებს საქართველოს ეროვნული ბანკის პრეზიდენტის მრჩეველი - გიორგი ბაქრაძე ჩაატარებს. ეკონომიკურ მედია სკოლას მოწვეული სტუმრებიც ეყოლება. ეკონომიკური მედია სკოლის მიზანია ჟურნალისტების ფინანსური განათლების ამაღლება. სასწავლო კურსი, რომელიც 2 თვის განმავლობაში გაგრძელდება, უფასოა და მისი დასრულების შემდეგ, წარმატებულ კურსდამთავრებულებს სერტიფიკატები გადაეცემათ“, ნათქვამია ორგანიზაციის ვებგვერდზე.  სრულად...  წყარო: sab.ge

აჭარა. ევროკავშირის მხარდაჭერით, ქედის, შუახევის და ხულოს მუნიციპალიტეტებსთვის ეკონომიკური განვითარების ერთობლივი გეგმა შემუშავდა.  საჯარო, კერძო და სამოქალაქო სექტორის 50-ზე მეტი წარმომადგენელმა მონაწილეობა მიიღო ქედის, შუახევის და ხულოს მუნიციპალიტეტების ეკონომიკური განვითარების გეგმის განხილვაში. დოკუმენტი ევროკავშირის მხარდაჭერით პროექტის, „მერები ეკონომიკური ზრდისთვის“, ფარგლებში შემუშავდა, ქედასა და ხულოში მიმდინარე ENPARD-ის სოფლის განვითარების პროექტებისა და ადგილობრვი განვითარების ჯგუფების აქტიური ჩართულობით.  ეკონომიკური განვითარების გეგმის მიზანია საერთო ინტერესების რეალიზაცია, მონაწილე მუნიციპალიტეტებს შორის ეკონომიკური განვითარების საკითხებში კოორდინაციის გაძლერება და ერთობლივი მოქმედება ადგილობრივი ეკონომიკის განვითარებისთვის.  სრულად...  წყარო: http://enpard.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: მოპოვებითი დარგების გამჭირვალობის ინიციატივა საქართველოში.  „წინამდებარე პოლიტიკის დოკუმენტი აფასებს საქართველოს შესაძლებლობებს და პერსპექტივებს მოპოვებითი დარგების გამჭირვალობის ინიციატივის (Extractive Industries Transparency Initiative - EITI) გლობალურ სტანდარტთან მიერთებისა, რადგან იგი უზრუნველყოფს და განამტკიცებს ბუნებრივი რესურსების მართვას ღიაობის და ანგარიშვალდებულების პრინციპების შესაბამისად. ბუნებრივი რესურსების მოპოვება და გამოყენება განაპირობებს ეკონომიკურ ზრდას, მაგრამ ამავდროულად მათი არამართებული გამოყენების და მათთან დაკავშირებით კორუფციული გარიგებების წარმოების რისკი საკმაოდ მაღალია. დარგის არაეფექტიანობა ქვეყნის ეკონომიკური, სოციალური და ბუნებრივი გარემოსთვის მეტად მძიმე შედეგების მომტანი შეიძლება აღმოჩნდეს კიდეც“, ნათქვამია ორგანიზაციის ვებგვერდზე.  სრულად...  წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) ტყიბულის მეშახტეების პროტესტს ეხმიანება. „მიგვაჩნია, რომ ტყიბულში შექმნილი მძიმე ვითარება სახელმწიფოს პასუხისმგებლობაა და იგი სრულად გამოხატავს წლების განმავლობაში ქალაქის წინაშე არსებული უმძიმესი გამოწვევების სრული უგულებელყოფის შედეგად შექმნილ მდგომარეობას, რომელიც არამხოლოდ შახტებში დასაქმებული პირების, არამედ სრულად რეგიონის მომავალს აყენებს ეჭვქვეშ. მიუხედავად არაერთი მოთხოვნისა, სახელმწიფოს ამ დრომდე არ აქვს ტყიბულისა და სხვა ინდუსტრიული ქალაქების განვითარების გეგმა, რაც სრულ გაურკვევლობასა და ბუნდოვანებაში ამყოფებს კომპანიაში დასაქმებულებსა და რეგიონის მოსახლეობას“, ნათქვამია ორგანიზაციის ვებგვერდზე.  სრულად...  წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს რევაზ ქოიავას პუბლიკაციას: ნეოექსტრაქტივიზმი და „მწვანე გეოპოლიტიკა“ ლათინურ ამერიკაში.  „არგენტინელი სოციოლოგის მარისტელა სვამპას აზრით, ხშირად ნეოექსტრაქტივიზმი „გულისხმობს სასარგებლო წიაღისეულის ექსპლუატაციას, გიგანტური ჰიდროელექტროსადგურების მშენებლობას, თევზჭერის გაფართოებას, ტყეების მასშტაბურ გაჩეხვას და აგრო-ბიზნესის ზრდას (გენეტიკურად მოდიფიცირებული ისეთი პროდუქტების ხარჯზე, როგორიცაა სოიო, პალმის ზეთი, ბიოსაწვავი)“, ნათქვამია ორგანიზაციის ვებგვერდზე.  სრულად... წყარო: emc.org.ge

თბილისი. ა(ა)იპ სკოლამდელი აღზრდის დაწესებულებათა გაერთიანებამ, „ბორჯომის ჯანმრთელი მომავალი“, გაითვალისწინა საქართველოს სახალხო დამცველის რეკომენდაცია ბორჯომის მუნიციპალიტეტის ერთ–ერთი სოფლის მცხოვრები სამი არასრულწლოვანი შვილის მშობლისთვის საქართველოს საგადასახადო კოდექსით გათვალისწინებული საგადასახადო შეღავათის გავრცელების შესახებ.  საქმის შესწავლის შედეგად სახალხო დამცველის აპარატმა დაადგინა, რომ მოქმედი საგადასახადო კანონმდებლობის ცალკეული ნორმის არასწორი ინტერპრეტაციის შედეგად, 2016 წლის 1 იანვრიდან ა(ა)იპ უკანონოდ ხორციელდებოდა ბაღში დასაქმებულისათვის გაცემული ხელფასიდან საშემოსავლო გადასახადის დაკავებას. საქართველოს სახალხო დამცველის მიერ გაცემული რეკომენდაციის პასუხად, საჯარო დაწესებულებამ გამოთქვა მზაობა მაქსიმალურად შემჭიდროებულ ვადებში მოახდინოს 2016 წლის 1 იანვრიდან დღემდე დასაქმებულისათვის გაცემული ხელფასიდან დაკავებული საშემოსავლო გადასახადის დაბრუნება.  სრულად  წყარო: ორგანიზაციის ვებგვერდი

თბილისი. გალში მცხოვრები ახალგაზრდა ქალების მხარდასაჭერად ცენტრმა „აფხაზეთმა“, ბრიტანეთის საელჩოს დაფინანსებით, სამთვიანი პროექტის განხორციელება დაიწყო. „პროექტში ჩართულნი არიან გალში მცხოვრები ახალგაზრდა ქალები, რომლებიც ზუგდიდსა და სოხუმში არსებულ სახელოსნოებში გაივლიან ხელობის შემსწავლელ კურსს. პროექტის მიზანია კონფლიქტით დაზარალებული ახალგაზრდა ქალებისათვის ახალი ხელობის შეძენა, მეწარმეობის უნარჩვევების განვითარება და მშვიდობის მშენებლობის ხელშეწყობა“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებათა სახლში, კოალიცია დამოუკიდებელი და გამჭვირვალე მართლმსაჯულებისთვის წარმომადგენლები მამუკა ხაზარაძისა და ბადრი ჯაფარიძის ადვოკატებს შეხვდნენ. შეხვედრაზე თიბისი ბანკის ადვოკატებმა საზოგადოებრივი ორგანიზაციის წარმომადგენლებს მამუკა ხაზარაძისა და ბადრი ჯაფარიძის წინააღმდეგ მიმდინარე სისხლის სამართლის საქმის მასალები გააცნეს. შეხვედრა დისკუსიის რეჟიმში წარიმართა. სრულად  წყარო: ორგანიზაციის ვებგვერდი

გურია. ოზურგეთში, გაეროს ქალთა ორგანიზაციისა და ფონდ „ტასო“-ს ინიციატივით, ეროვნული ბანკის პრეზიდენტმა 2009-2016 წლებში, გიორგი ქადაგიძემ საჯარო ლექცია გამართა.  „ლექციის მთავარ თემას მეწარმეობა და ქალების როლი ეკონომიკაში წარმოადგენს. შეხვედრა პროექტის „ერთობლივი ძალისხმევა ქალთა ეკონომიკური გაძლიერებისთვის საქართველოში” ფარგლებში ტარდება, რომელიც ნორვეგიის მთავრობის ფინანსური მხარდაჭერით ხორციელდება. ლექციას სწორედ პროექტის მონაწილე მეწარმე ქალები ესწრებიან”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

ქვემო ქართლი. თეთრიწყაროს მუნიციპალიტეტში თოკების პარკის ატრაქციის, ალგეთის ეროვნული პარკის ვიზიტორთა ცენტრისა და წარმატებული საგრანტო აპლიკანტებისათვის აღჭურვილობის გადაცემის ღონისძიება გაიმართა. ვროკავშირის ENPARD პროგრამის ფარგლებში, ასოციაციამ სამხარეო განვითარება მომავალი საქართველოსთვის (RDFG) და თეთრიწყაროს ადგილობრივი განვითარების ჯგუფმა (LAG) წარმატებით დაასრულა სოფლის განვითარების საგრანტო პროგრამის ორი ფაზა, რომლის ფარგლებშიც დაფინანსდა 65 სოფლის განვითარების პროექტი, რომელთა ღირებულებამაც ჯამში 5 მლნ ლარი შეადგინა (თანხის 35% პროცენტი ბენეფიციართა წვლილმა შეადგენა). შერჩეული სოფლის განვითარების პროექტები თეთრიწყაროს მუნიციპალიტეტის მოსალეობისათვის 300-ზე მეტ სამუშაო ადგილს შექმნის, დასაქმებულთაგან 40% კი ქალი იქნება.  სრულად...  წყარო: enpard.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს მათე გაბიცინაშვილის ბლოგპოსტს: ვაჭრობა, ინტერესი და იდეოლოგია (ნაწილი I). „მრავალი დამკვირვებლის მოსაზრებით, თავისუფალი ვაჭრობის რეჟიმებს განსაზღვრავენ მოგებისა და სწრაფი გამდიდრების ჟინით შეპყრობილი მსხვილი კორპორაციები, რომლებიც ძალაუფლებაში მყოფ პოლიტიკურ პარტიებთან მჭიდროდ არიან დაკავშირებულნი. მათი ინტერესების გლობალიზაცია კი მსხვერპლად იწირავს მრავალ მცირე ან საშუალო ზომის ფირმებსა თუ ეკონომიკურ აგენტებს, რომლებიც კონკრეტული საზოგადოებების შიგნით მოქმედებენ და ხშირად სოციალური სტრუქტურის საყრდენს წარმოადგენენ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 2019 წლის 16 ივლისს, მშენებლობაზე დასაქმებული არასრულწლოვანის გარდაცვალებასთან დაკავშირებით, სახალხო დამცველმა განცხადება გაავრცელა.  „ქვეყანაში შრომის უსაფრთხოების კუთხით არსებული მდგომარეობა კვლავ უმთავრეს გამოწვევად რჩება. არსებული შემაშფოთებელი ვითარების გაუმჯობესებას მნიშვნელოვნად აფერხებს, ერთი მხრივ, შრომის ინსპექტორების სამუშაო ადგილებზე დაშვებისთვის გათვალისწინებული შეზღუდვები, რომლებიც მხოლოდ 2019 წლის სექტემბრიდან მოიხსნება, ხოლო, მეორე მხრივ - შრომის პირობების ინსპექტირების დეპარტამენტის ხელთ არსებული არასაკმარისი ადამიანური თუ მატერიალური რესურსები. აღნიშნული ფაქტორების გამო, დასაქმების ადგილებზე ინსპექტირება ვერ ხორციელდება იმდენად ხშირად და სრულყოფილად, რამდენადაც ეს აუცილებელია შრომის უსაფრთხოების ნორმების ეფექტური აღსრულების უზრუნველსაყოფად. შედეგად, უკანასკნელი შემთხვევის მსგავსად, მონიტორინგის გარეშე რჩება არაერთი დასაქმების ადგილი, სადაც სამუშაო პროცესი საქართველოს კანონმდებლობით გათვალისწინებული მოთხოვნების მნიშვნელოვანი დარღვევებით მიმდინარეობს“, - აღნიშნულია განცხადებაში.  სრულად...  წყარო: ორგანიზაციის ვებგვერდი

თბილისი. ევროპის ფონდი ეხმაურება ეკონომიკისა და მდგრადი განვითარების სამინისტროს სააგენტოს „აწარმოე საქართველოში“ მიერ გამოქვეყნებულ, პროგრამის „აწარმოე საქართველოში“ ინდუსტრიული ნაწილის, ტექნიკური მხარდაჭერის და ფინანსებზე ხელმისაწვდომობის კომპონენტების 2014-2018 წლების შედეგების შეფასებას. „2018 წლის აგვისტოში, ევროპის ფონდმა გამოაქვეყნა და დაინტერესებულ მხარეებს გააცნო საქართველოს მცირე და საშუალო მეწარმეობის განვითარების 2016-2020 წლების სტრატეგიის გენდერული შეფასების ანგარიში, რომლის ერთ-ერთ მიგნებასაც სტრატეგიის შემუშავების პროცესში გენდერული ანალიზის ნაკლებობა წარმოადგენს. სათანადო გენდერული ანალიზის გარეშე, მცირე და საშუალო მეწარმეობის განვითარების სტრატეგია და მისი სამოქმედო გეგმები ვერ უზრუნველყოფს ისეთი ღონისძიებების გატარებას, რომლებიც გააუმჯობესებდა ეკონომიკურ მაჩვენებლებს მცირე და საშუალო მეწარმეობის სექტორში ჩართული ქალებისა და მამაკაცებისთვის, ვინაიდან მათი საჭიროებები, პრობლემები და შესაძლებლობები განსხვავებულია“, - აღნიშნულია ფონდის მიერ გავრცელებულ ინფორმაციაში. სრულად წყარო: ორგანიზაციის ვებგვერდი